Papa kadjasɛ la Brésil mbutaka ate: “Etena kasalaso Ɔtɛmwɛlɔ wa lo nkumbo ko hambute ase nkumbo kami dia sho memadia, kete sho mbeyaka ntshɔ polo la kati k’otsho.” Papa kɛmɔtshi kadjasɛ la Japon mbutaka dia etena katowosalaka Ɔtɛmwɛlɔ wa lo nkumbo, ɔnande lele l’ɛnɔnyi dikumi halangaka menda wonya ndo kombolaka dia sho tatetemalaka tsho. Lande na? She mbutaka ate: “Nde ndjashaka efula lo wekelo ndo dui sɔ mbookimanyiya dia nde monga l’ɔngɛnɔngɛnɔ w’efula.”

Koko aha ana tshɛ mbangɛnangɛna Ɔtɛmwɛlɔ wa lo nkumbo. Lande na? Papa kɛmɔ ka la Togo mbutaka ate: “Ɔtɛmwɛlɔ wa Jehowa hawohombe monga eshi.” Ko naka vɔ wosha anto eshi, kete paka menda woho walɔmbɔmawɔ. Nkumbo efula wakɛnyi dia Ɔtɛmwɛlɔ wa lo nkumbo koka monga oko woho wakate Izaya lo dikambo dia lushi la Sabato ɔnɛ: “Lushi l’ongenongeno.”—Is. 58:13, 14.

Papa ya nkumbo efula wamboshihodia ɔnɛ di’ase nkumbo ngɛnangɛna Ɔtɛmwɛlɔ wa lo nkumbo, sawo dia dimɛna pombaka monga. Ralf lele l’ana asato wa wamato la ɔna ɔtɔi la pami mbutaka dia Ɔtɛmwɛlɔ wa lo nkumbo mbetaka oko anto wasawola ndo onto tshɛ tɛkɛtaka. Koko mbeyaka monga tshondo y’okakatanu di’onto tshɛ nanga awui wayekama ndo ndjasha lɔkɔ. Mama kɛmɔtshi mbutaka ɔnɛ: “Halotongaka l’akoka wa nsala di’Ɔtɛmwɛlɔ wa lo nkumbo monga diaaso di’ɔngɛnɔngɛnɔ oko wakombolami.” Onde ndo wɛ mbele l’okakatanu ɔsɔ?

Papa kɛmɔ kele l’ana ahende kadjasɛ l’Allemagne mbutaka ate: “Sho pombaka  mbɔtɔnganyiya wekelo l’ehomba w’ose nkumbo tshɛ.” Natalia, lele l’ana ahende mbutaka ate: “Ɛngɔ koleki ohomba l’Ɔtɛmwɛlɔ aso wa lo nkumbo ele, mbekaka awui wotshikitanyi mbala la mbala.” Nkumbo efula kahanyaka Ɔtɛmwɛlɔ wa lo nkumbo lo tenyi diotshikitanyi. Cleiton lele l’ana ahende wele l’ɛnɔnyi dikumi l’ɛmɔtshi ladjasɛ la Brésil mbutaka ate: “Nkahanya wekelo lo tenyi diotshikitanyi kimanyiyaka dia vɔ mbeta dimɛna ndo dia ose nkumbo tshɛ ntɛkɛta.” Naka ambutshi nkahanya wekelo lo tenyi diotshikitanyi, kete dui sɔ diayowasha diaaso dia vɔ nkimanyiya ɔna tshɛ naka vɔ wekɔ l’ɛnɔnyi wotshikitanyi. Ambutshi koka nkɛtshanya ehomba w’ɔna l’ɔna ndo mbɔtɔnganyiya wekeleo lo nsɔna akambo wahombawɔ mbekaka ndo nkongɛ woho wayowekaka.

Kakɔna kasala nkumbo mɔtshi dia mbeka awui wotshikitanyi? Amɔtshi tatɛka Ɔtɛmwɛlɔ wa lo nkumbo l’esambo wa Diolelo. Juan ladjasɛ la Mexique mbutaka ate: “Dui sɔ toshaka ɔngɛnɔngɛnɔ ndo nɔngɔsɔlaka timba taso lo kɛnɛ kendana l’awui wayangaso mbeka.” Ase nkumbo kande sɔnaka esambo wɔtɔnɛ l’awui amɔtshi wayowɔkɛtshanya.

Ase nkumbo amɔtshi mbadiaka Bible kaamɛ. Dia mbeka awui wotshikitanyi, ase nkumbo efula mbɔsaka ahole w’anto watɛkɛta lo ɔkɔndɔ ɔmɔtshi wa lo Bible ko vɔ tadiaka. Papa kadjasɛ la Japon akate ɔnɛ: “Laki l’okakatanu dia mbadia Bible kaamɛ l’ase nkumbo kami l’etatelo.” Koko anande ahende w’apami wakangɛnangɛnaka etena kakawadiaka Bible kaamɛ l’ambutshi awɔ. Nkumbo mɔtshi kɛnyaka tɔkɛnyɔ t’ɛkɔndɔ wa lo Bible. Roger lele l’ana ahende w’apami ladjasɛ la Afrique du Sud mbutaka ate: “Etena kadiaso ɛkɔndɔ wa lo Bible ana mbisholaka awui wele sho ambutshi hatokoke mbashola.”

Yoho kina yakokaso mbeka awui wotshikitanyi ele nkamba olimu ɔmɔtshi kaamɛ, ɛnyɛlɔ nsɛla waato wele oko wakasɛlɛ Nɔa kana mpika tɛmpɛlɔ kele oko kakahike Sɔlɔmɔna. Dia nkamba elimu ɛsɔ kaamɛ, nɔmbamaka nsala eyangelo ndo dui sɔ koka mbisha ɔngɛnɔngɛnɔ w’efula. Tɔshi ɛnyɛlɔ ka yana ya yimato yele l’ɛnɔnyi etanu yadjasɛ lo Asiya kaamɛ l’ambutshi ande ndo la tshɛnde ka womoto. Vɔ wakakongɛ tɔkɛnyɔ tendana la olimu wa misiɔnɛrɛ w’ɔpɔstɔlɔ Pɔɔlɔ. Nkumbo nkina wakakongɛ tɔkɛnyɔ tɔtɔnɛ l’ɛkɔndɔ watanema lo dibuku di’Etumbelu. Donald lele l’ɛnɔnyi 19 ladjasɛ la Togo mbutaka ate: “Mbeka awui wotshikitanyi ndowanyaka Ɔtɛmwɛlɔ aso wa lo nkumbo ndo nkumbo kaso.” Shi wɛ nkoka nkanyiya dia mbeya olimu ɔmɔ wakokanyu nkamba kaamɛ dia ndeka ndowanya Ɔtɛmwɛlɔ wa lo nkumbo?

Kaanga mbele di’Ɔtɛmwɛlɔ wa lo nkumbo mbeta dimɛna ekɔ ohomba mbeka awui wotshikitanyi ndo mbaɔtɔnganyiya l’ehomba w’ose nkumbo tshɛ, ekɔ ohomba tayalɔngɔsɔdi la ntondo. Wenya ɛmɔtshi, ana w’akɛnda mongaka l’ɔlɛmbɛlɔ. Diakɔ diahomba ambutshi nsɔna wonya wahomba Ɔtɛmwɛlɔ salema ndo ndjalɔngɔsɔla dimɛna. Ombutshi ɔmɔtshi mbutaka ate: “Naka lakayalɔngɔsɔdi la ntondo, kete ose nkumbo tshɛ kondjaka wahɔ oma lo Ɔtɛmwɛlɔ aso wa lo nkumbo.” Papa kɛmɔ kadjasɛ l’Allemagne mbewoyaka ase nkumbo kande kɛnɛ kayoweka lo Ɔtɛmwɛlɔ wa lo nkumbo wa mbala kayaye. Papa kekina kadjasɛ la Bénin kele l’ana asamalo takongɛki ambola la ntondo naka nde ambɔsa yɛdikɔ ya vɔ menda DVD lo Ɔtɛmwɛlɔ wa lo nkumbo. Aha la taamu, ɔlɔngɔswɛlɔ kimanyiyaka dia Ɔtɛmwɛlɔ wa lo nkumbo mbeta dimɛna.

Naka ase nkumbo teyi la ntondo kɛnɛ kayowoyeka, kete vɔ koka kɛtshanyaka awui akɔ l’atei wa lomingu ndo dui sɔ diayofudia nsaki kawɔ. Naka onto tshɛ akalongola ɔkɛndɛ, kete nde ayoyaoka dia nde mendanaka la ɔtɛmwɛlɔ akɔ.

Nkumbo efula yekɔ l’okakatanu dia salaka Ɔtɛmwɛlɔ wa lo nkumbo mbala la mbala.

Papa ya nkumbo efula kambaka efula dia ntana woho wa nsɛna. Ɛnyɛlɔ, papa kɛmɔ kadjasɛ la Mexique tombaka oma lakande lo eshidi esamalo wa pindju ko ndjokalola lo eshidi enanɛi w’otsho. Mbala mɔtshi, ekongelo k’Ɔtɛmwɛlɔ wa lo nkumbo koka tshikitanyema l’ɔtɛ w’awui akina wa lo nyuma.

Koko, sho pombaka ndjashikikɛ dia salaka Ɔtɛmwɛlɔ wa lo nkumbo mbala la mbala. Loïs lele l’ɛnɔnyi dikumi l’ɔtɔi ladjasɛ la Togo mbutaka lo kɛnɛ kendana la yɛdikɔ yakandɔshi ya salaka Ɔtɛmwɛlɔ wa lo nkumbo ate: “Oyadi tamboyotatɛ Ɔtɛmwɛlɔ wa lo nkumbo yema l’ɔkɔngɔ l’ɔtɛ w’awui amɔtshi, hatotetshaka aha la nsala.” Diakɔ diele, nkumbo mɔtshi wakakongɛ dia salaka Ɔtɛmwɛlɔ wa lo nkumbo l’etatelo ka lomingu. Laadiko dia laasɔ, naka dui dimɔtshi dia shashimoya diambaakomɛ, kete vɔ koka ndjosala lushi lokina la lo lomingu lakɔ laamɛ.

Oko welamɛwɔ ɔnɛ Ɔtɛmwɛlɔ wa lo nkumbo, vɔ wekɔ etenyi k’ɔtɛmwɛlɔ aso le Jehowa. Kimanyiya ase nkumbo kayɛ tshɛ dia vɔ mbishaka Jehowa ‘elowa w’oma l’enyɔ awɔ’ lomingu tshɛ. (Hos. 14:2) Ɔsɔ ayonga etena k’ɔngɛnɔngɛnɔ le ose nkumbo tshɛ “ne dia ongenongeno wa [Jehowa] eli wulu anyu.”—Neh. 8:9, 10.