Da munyaki wa ku Brazil wangukamba kuti: “Asani tichita Kusopa kwa Pabanja mazulu, tikambiskana nkhani zinandi mwakuti nyengu zinyaki tifika usiku asani ndaleka kulikambiya banja langu kuti tilekezge penapa.” Da munyaki so ku Japan, wangukamba kuti mwana waki munthurumi wa vyaka 10, wakhumba kuti alutirizgengi kusopa kwa pabanja chinanga kuti nyengu yingamala. Nchifukwa wuli wachita viyo? Da yo wangukamba kuti: “Iyu wachiskika, vo vichitiska kuti wakondwengi.”

Mbuneneska kuti mbana wosi cha wo achiskika chifukwa anyaki kusopa kwa pabanja kutiŵanozge cha. Nchifukwa wuli ve viyo? Da munyaki wa ku Togo wangukamba kuti: “Kusopa Yehova kukhumbika cha kujanga kwambula kunozga.” Asani ndi viyo, kumbi vilongo kuti suzgu ndi mo kusopa kwa pabanja kuchitikiya? Mabanja nganandi ngasaniya kuti kusopa kwa pabanja kuja ‘kwakukondwesa,’ nge mo buku la Yesaya likambiya.​—⁠Yes. 58:​13, 14.

Ada achikhristu aziŵa kuti asani akhumba kuti banja lawu likondwengi ndi kusopa kwa uneneska, banja likhumbika kujanga mwachimangu. Ralf yo we ndi ŵana anayi wangukamba kuti asani achita kusopa kwa pabanja, aja ŵaka nge akambiskana ndipu weyosi wamukapu. Kukamba uneneska, nyengu zinyaki kuja kwakusuzga kuti weyosi wakondwengi ndi kumukapu pa nkhani yo mukambiskana. Ma munyaki wangukamba kuti: “Nyengu zosi nditondeka kuti kusopa kwa pabanja kujengi kwakunozga nge mo ndikhumbiya kuti vijaliyengi.” Kumbi namwi mukumana ndi suzgu lenili?

Da munyaki ku Germany yo we ndi ŵana ŵaŵi wangukamba kuti: “Tikhumbika kukambiskananga nkhani zakupambanapambana.” Ma munyaki, Natalia yo we ndi ŵana ŵaŵi wangukamba kuti: “Kusambira nkhani  zakupambanapambana kutitiwovya ukongwa m’banja lidu.” Mabanja nganandi ngachita venivi pa kusopa kwa pabanja. Da munyaki Cleiton, wa ku Brazil yo we ndi ŵana ŵaŵi, wa vyaka 17 ndi 14 wanguti: “Venivi vitovya kuti kusopa kwa pabanja kujengi kwakunozga ndipu banja losi limukapu.” Asani ŵana ŵe ndi vyaka vakupambana, kugaŵa nyengu pa kusopa kwa pabanja kungawovya apapi kuti asambizengi mwana weyosi mwakukoliyana ndi vo wakhumbikiya. Apapi angaziŵa vo weyosi wakhumbika m’banja ndipu angasankha nkhani zakwenere ndi nthowa zo angasambiziya.

Kumbi mabanja nganyaki ngachita wuli venivi? Anyaki atamba kumba sumu zakuthamika Yehova. Juan wa ku Mexico wangukamba kuti: “Venivi vitovya kuti weyosi waje wakufwatuka kweniso wanozgekereski maŵanaŵanu pa nkhani yo tisambirengi.” Banja laki lisankha sumu mwakukoliyana ndi vo asambirengi.

Mabanja nganandi ngaŵerenge limoza nkhani yo asankha kutuliya m’Bayibolo. Kuti banja lichitengi vinthu vakupambanapambana, weyosi wapaskika chigaŵa chakuti waŵerengi chakukwaskana ndi munthu munyaki yo wazumbulika m’Bayibolo. Da munyaki ku Japan, wangukamba kuti, “pakwamba vandisuzganga kuŵerenga Bayibolo limoza ndi banja.” Kweni ŵana ŵaki ŵaŵi anthurumi akondwanga kuchitiya limoza vinthu ndi apapi ŵawu. Mabanja nganyaki ngachita seŵeru la nkhani zakutuliya m’Bayibolo. Roger wa ku South Africa, yo we ndi ŵana ŵaŵi, wa vyaka 15 ndi 12 wangukamba kuti: “Kanandi ŵana asaniya fundu zo apapi atizisaniya cha asani akambiskana nkhani yinyaki ya m’Bayibolo.”

Chinthu chinyaki cho apapi angachita, nkhuchitiya limoza vinthu nge kuzenga chingaraŵa chaku Nowa pamwenga nyumba yakusopiyamu yaku Solomoni, vakuyeruzgiya. Kuchita venivi kukhumbika kufufuza, ko kungachitiska kuti weyosi m’banja wakondwengi pa kugwira nchitu yo. Mwakuyeruzgiyapu, mwana munyaki wa vyaka vinkhondi ku Asia, wanguchita venivi limoza ndi apapi ŵaki ndipuso ambuyaki anthukazi. Yiwu akambiskananga ndipu ajambulanga papepala mo wakutumika Paulo wangwende ulendu waki wa umishonale. Achitiyanga venivi pabalaza, mu nyumba. Mabanja nganyaki ngakambiskana ndi kujambula papepala vinthu vo vikukonkhoskeka m’buku la Chituwa. Donald wa vyaka 19 wa ku Togo wangukamba kuti, “kusopa kwa pabanja kungwamba kunozga ndipuso banja lidu lenga lalikondwa” chifukwa chakuchita vinthu vakupambanapambana. Kumbi imwi muŵanaŵana kuti mungachita wuli kuti kusopa kwa pabanja kunozgengi ukongwa?

Chinanga wuli kuchita vinthu vakupambanapambana kuchitiska kuti kusopa kwa pabanja kunozgengi kweni kuti muyanduwi, banja losi likhumbika kunozgeke. Nyengu zinyaki ŵana anamana avuka, mwaviyo ada akhumbika kuŵanaŵaniya pakusankha nkhani zo asambirengi ndipuso kunozgeke umampha. Da munyaki wangukamba kuti, “asani ndanozgeke weyosi wayanduwa.” Ndipu da munyaki ku Germany, watiŵakambiya limu ŵana ŵaki vo azamusambira masabata ngakulondopu. Da wa ku Benin, yo we ndi ŵana 6 a vyaka va pakati pa viŵi ndi 12, asani akambiskanengi DVD ya nkhani za m’Bayibolo, iyu watiŵapaskiya limu mafumbu ŵana ŵaki. Kukamba uneneska, kunozgeke kutovya kuti kusopa kwa pabanja kuŵi kwakunozga ukongwa.

Asani banja liziŵiya limu vo azamusambira likhoza kukambiskana mukati mwa sabata ndipu venivi vitovya kuti lije ndi linweka. Mwaviyo, asani weyosi wapaskika chakuchita, watijivwa kuti kusopa kwa pabanja nkhwaki.

Mabanja nganandi ngatondeka kuchita kusopa kwa pabanja pa zuŵa lo ngakujalikiska.

Anthurumi anandi agwira nchitu kwa maora nganandi kuti asaniyi ndalama zakovye mabanja ngawu. Mwakuyeruzgiyapu, Da munyaki ku Mexico watuwa pa nyumba 6 koloku mulenji ndipu wawe ku nchitu 8 koloku mazulu. Kusazgiyapu pa fundu yeniyi, nyengu zinyaki, pangakhumbika kusintha nyengu yakuchitiya Kusopa kwa Pabanja chifukwa chakuti wakuwonere dera wacheze mpingu pamwenga kwe unganu wachigaŵa.

Chinanga kuti vingaŵa viyo, tikhumbika kuyesesa kuchita kusopa kwa pabanja pa zuŵa lo tikujalikiska. Loïs wa ku Togo, wangukamba vo banja laki litesesa kuchita kuti, “Chinanga kuti nyengu zinyaki tingayamba mwakuswera chifukwa cha vinthu vinyaki vo vachitika ndi msana, tichita mbwenu kusopa kwa pabanja.” Ndichu chifukwa chaki mabanja nganyaki ngachita kukwambiriya kwa sabata. Asani pachitika vinthu vinyaki vamabuchibuchi, achita mbwenu kusopa kwa pabanja zuŵa linyaki sabata yeniyo.

Nchifukwa wuli tidana kuti kusopa kwa pabanja? Chifukwa chakuti tisopa Yehova. Mwaviyo, chiskani a m’banja linu kuti ‘aperekengi vipasu va milomu yawu’ kwaku Yehova sabata yeyosi. (Hos. 14:⁠2) Weyosi wa m’banja linu watenere kukondwa pa nyengu yakusopa kwa pabanja “pakuti chimwemwi cha Ambuya ndi nthazi yinu.”​—⁠Neh. 8:​9, 10.