E fai mai se tamana i Brazil, “ko tō tuku katoa omotou mafaufau ki te sau‵talaga i te Tapuakiga a te Kāiga i te afiafi, tela la, ko oko sāle loa ki te valuapo māfai e se taofi ne au toku kāiga.” E fai mai se ulu o te kāiga i Tiapani me e foliga mai me e se matea ne tena tama tagata ko sefulu tausaga te matua a te taimi kae manako o faka‵soko. Kaia? “Me ko fakamalosigina a ia, kae fesoasoani atu te mea tenā ki tena fiafia,” ko pati a te tamana.

E tonu, e se ko tamaliki katoa e fia‵fia malosi, a te tonuga loa, kāti a nisi tino e se fia‵fia ki te tapuakiga a te kāiga. Kaia la? Ne fakaasi mai ne se tamana i Togo a tena iloa, “e se ‵tau o ‵noga a te tapuakiga ki a Ieova.” Kafai e ‵noga, e mata, ko te auala e fai ei a te tapuakiga a te kāiga? Ne maua aka ne kāiga e uke me e mafai o fai a te tapuakiga a te kāiga, e pelā mo pati a Isaia e uiga ki te Sapati, me se mea ‘fakafiafia.’​—Isa. 58:13, 14.

E malama‵lama a tamana Kelisiano me kafai e fia‵fia olotou kāiga ki te tapuakiga a te kāiga, e ‵tau o maua se sautalaga filemu kae fiafia. E fai mai a Ralf telā e tokotolu ana tamaliki fa‵fine kae tokotasi te tamaliki tagata, i te lotou tapuakiga a te kāiga e fai pelā me se sau‵talaga fiafia kae e sē se akoga; a tino katoa e aofia i ei. E tonu, a te faiga o tino katoa ke fia‵fia kae ‵saga tonu ki te sau‵talaga se mea faigata i nisi taimi. E taku tonu mai te mātua e tokotasi: “E se maua faeloa ne au te malosi ke fai te tapuakiga a te kāiga ke gali e pelā mo te mea e manako au ki ei.” E mafai ne koe o fakafesagai ki te tulaga faigata tenā?

“E ‵tau mo tatou o uiga faigofie,” ko pati a se tamana e tokolua ana tama i Siamani. Muna a Natalia, se mātua e tokolua ana tama: “A te ‵toe mea tāua ki te motou kāiga “ko te fakakese‵kese o mataupu mo auala e fai ei.” E uke a kāiga e  vaevae ne latou olotou tapuakiga a kāiga ki vaega kese‵kese. “E fai ne te mea tenā ke matagi te tapuakiga kae ke aofia i ei a tino katoa o te kāiga,” e fakamatala mai a Cleiton, se tamana i Brazil e tokolua ana tamaliki talavou. Mai te vaevaega o taimi, e mafai ei ne mātua o ‵saga tonu atu ki manakoga o tamaliki taki tokotasi māfai e tai lasi te ‵kese i tausaga. E mafai ne mātua o fai‵pati ki manakoga o tino taki tokotasi i te kāiga kae uiga faigofie i te filifiliga o se mataupu mo te auala e fai ei te tapuakiga.

Ne a mea e fai ne nisi kāiga ke tai faka‵lei aka a te fakakese‵kesega? E kamata ne nisi tino a te lotou tapuakiga a kāiga ki te usuga o pese ki a Ieova. “E ati aka i ei se lagonaga ‵lei kae fakatoka ‵tou mafaufau ki te mataupu telā ka suke‵suke ki ei,” ko pati a Juan i Mekisiko. E fili ne tena kāiga a pese kolā e tauga tonu ki te mataupu telā ne fakatoka mō te afiafi tenā.

E isi ne kāiga e fai‵tau fakatasi ki se vaega o te Tusi Tapu. Ona ko te fakakese‵kesega, e faitau ne tino kese‵kese o te kāiga a vaega kese‵kese o tino taki tokotasi kolā e taku mai i se vaega o te Tusi Tapu. E fai tonu mai se tamana i Tiapani me e “fai fakaatea ki a i te taimi muamua ke faitau i te auala tenā.” Kae ne fia‵fia ana tama ta‵gata e tokolua i te ‵kilo atu ki lā mātua e fia‵fia fakatasi mo lāua. A nisi kāiga e fai ne latou a tāga o tala i loto i te Tusi Tapu. A tamaliki e “masani o lavea ne latou a mea kolā e se lavea ne mātua i se tala i loto i te Tusi Tapu,” ko pati a Roger, se tamana e tokolua ana tama ta‵gata i Afelika ki Saute.

A te suā auala ke fakakese‵kese a mea e fai ko te ga‵lue fakatasi i se galuega, pelā mo te faite se vaka pelā mo te vaka o Noa io me ko te faletapu telā ne faite ne Solomona. E manakogina ke fai ne sukesukega ki galuega penā kolā e mafai o fia‵fia ki ei. Pelā me se fakaakoakoga, ne nofo i te potu alaala o se fale i Asia ko te tamaliki fafine ko lima ana tausaga mo ana mātua mo tena tupuna fafine. E faite ne latou ki te laupapa se tafaoga e fakavae ki luga i malaga fakamisionale a te apositolo ko Paulo. Ne faite ne nisi kāiga a tafaoga mai tala kolā e maua i te tusi o Esoto. “Ne aumai ne te fakakese‵kesega se fiafia fou ki te tapuakiga a te motou kāiga mo te motou kāiga foki,” ko pati a Donald telā ko 19 ana tausaga mai Togo. E a, e mafai ne koe o mafaufau ki se galuega telā ka fai ei te tapuakiga a tou kāiga ke gali atu?

E ui eiloa e fai ne te fakakese‵kesega kae faigofie ke gali a te tapuakiga a te kāiga, e ‵tau mo tino katoa o fakatoka faka‵lei ko te mea ke aoga malosi a te tapuakiga. I nisi taimi ko fi‵ta a tamaliki fo‵liki, tela la, e manakogina ko tamana ke mafau‵fau muamua ki te mataupu telā ko oti ne filifili aka kae fakatoka faka‵lei ki ei. E fai mai se tamana e tokotasi, “kafai au e fakatoka faka‵lei, e uke atu a mea aoga e maua ne tino katoa i te taimi o te sukesukega.” E fakailoa atu ne se tamana i Siamani ki tena kāiga a mea kolā ka suke‵suke latou ki ei i te vaiaso mai mua. Kafai e fakaaoga se DVD faka-te-Tusi Tapu i te tapuakiga a te kāiga, e fakatoka ne se tamana e tokoono ana tamaliki a fesili a koi tuai o oko ki te taimi tenā. E tonu, e fai ne te fakatoka faka‵lei se ‵kesega i te faiga o te tapuakiga a te kāiga.

Kafai e iloa muamua ne te kāiga a mea kolā ka sau‵tala latou ki ei, e mafai o fai‵pati latou ki ei i loto i te vaiaso, i te faiga tenā e ati aka i ei a te loto finafinau. Kae kafai e isi ne tofiga o tino taki tokotasi, e mafaufau a te tino me i a ia te tapuakiga.

E se ko nāi kāiga fua e fakafesagai mo te tulaga faigata i te fai faeloa olotou tapuakiga a kāiga.

E ‵tau o ga‵lue leva a tamana e tokouke ke fakapaleni te olaga. Pelā mo te mea e tasi, e tiakina ne se tamana i Mekisiko a tena fale i te ono i te taeao kae toe foki mai ki te fale i te valu i te afiafi po. E se gata i ei, e ‵tau o ‵fuli te taimi e fai ei te Tapuakiga a Kāiga i nisi taimi ona ko nisi faigāmea faka-te-agaga.

E ‵tau eiloa o ma‵keke tatou ke fai faeloa a te tapuakiga a te kāiga. E fai mai a Loïs telā ko sefulutasi ana tausaga mai Togo e uiga ki te fakaikuga a tena kāiga: “Faitalia me e kamata tuai te motou tapuakiga a kāiga i nisi taimi ona me e isi se mea ne sae aka i se taimi o te aso, e fai faeloa te motou tapuakiga a kāiga.” Ko malamalama koe i te pogai ne fakatoka ei a nisi kāiga ke fai te tapuakiga a te lotou kāiga i te kamataga o te vaiaso. Me kafai e sae aka se mea e seki fakamoemoegina, e mafai ne latou o fai te tapuakiga a te lotou kāiga i se aso fakaa‵tea i te vaiaso tenā.

E pelā mo te fakamunaga te “tapuakiga a kāiga,” a te mea tenā se vaega o tau tapuakiga ki a Ieova. Ke aumai ne tino katoa o te kāiga ki a Ieova ‘a tavaega o olotou laugutu’ i vaiaso katoa. (Ho. 14:2) Kae ke fai a te mea tenā mo taimi fakafiafia ki tino taki tokotasi i te kāiga, me i “te fiafia telā ka aumai ne te Aliki [Ieova] ki a koutou, ka fai ne ia koutou ke ma‵losi.”​—Nee. 8:9, 10.