Muṅwe khotsi wa ngei Brazil o amba uri: “Ri vha na dzangalelo ḽihulu ḽa u haseledza nga madekwana kha Vhurabeli ha Muṱa, zwine kanzhi arali nda sa zwi thivhela, muṱa wanga u bvela phanḓa u tshi khou vhala u swika vhusiku vhuhulu.” Iṅwe ṱhoho ya muṱa ya ngei Dzhapani i amba uri mutukana wayo ane a vha na miṅwaha ya fumi ha ṱhogomeli tshifhinga nahone u ṱoḓa u bvela phanḓa. Ndi ngani? Khotsi o amba uri: “U a ṱuṱuwedzea nahone zwenezwo zwi ita uri a takale.”

Vhukuma, a si vhana vhoṱhe vhane vha ṱuṱuwedzea, nahone vhaṅwe a vha takaleli vhurabeli ha muṱa. Fhedzi ndi ngani? Muṅwe khotsi wa ngei Togo o amba uri: “U gwadamela Yehova a zwo ngo fanela u bora.” Arali zwi tshi bora, zwenezwi zwi amba uri hu fanela u vha na tshanduko kha nḓila ine ya farwa ngayo? Miṅwe miṱa yo wana uri vhurabeli ha muṱa vhu nga fana na nḓila ye Yesaya a amba nga ha Sabatha musi a tshi ri “ndi ḽa u ḓifha.”—Yes. 58:13, 14.

Vhokhotsi vha Vhakriste vho ṱhogomela uri arali miṱa yavho ya ḓigeḓa zwavhuḓi nga tshifhinga tsha vhurabeli ha muṱa, miṱa i ḓo vha yo takalaho. Ralf ane a vha na vhananyana vhararu na murwa muthihi o amba uri vhurabeli havho ha muṱa vhu fana na nyambedzano i songo dzudzanywaho hu si u sokou vhala; muṅwe na muṅwe u na tshipiḓa. Vhukuma, uri muṅwe na muṅwe a vhe na dzangalelo na u livhisa ṱhogomela kha zwine zwa khou vhaliwa, nga zwiṅwe zwifhinga zwi nga vha khaedu. Muṅwe mme o amba uri: “Kanzhi a thina nungo dza u ita uri vhurabeli ha muṱa vhu vhe vhu takadzaho sa zwine nda zwi ṱoḓa ngayo.” Naa ni nga ita uri vhurabeli ha muṱa vhu vhe vhu takadzaho?

Muṅwe khotsi wa ngei Dzheremane ane a vha na vhana vhavhili o amba uri: “Ri fanela u tendelana na zwiimo.” Natalia ane a vha mme wa  vhana vhavhili o amba uri: “Zwithu zwa ndeme vhukuma muṱani washu ndi u ita zwithu zwo fhamba-fhambanaho.” Miṱa minzhi i khethekanya vhurabeli ha muṱa ha vha zwipiḓa zwo fhamba-fhambanaho. Cleiton, khotsi wa ngei Brazil ane a vha na vhana vhavhili vhane vha kha ḓi vha vhaswa o amba uri: “Zwenezwo zwi ita uri ngudo i takadze nahone vhoṱhe muṱani vha vha na tshipiḓa.” Arali vhana vha sa lingani nga miṅwaha, vhabebi vha nga khethekanya tshifhinga tsha u guda, zwenezwo zwi ḓo ita uri vha livhise ṱhogomelo kha zwishaiwa zwa ṅwana muṅwe na muṅwe. Vhabebi vha nga amba nga ha zwishaiwa zwa muraḓo muṅwe na muṅwe nahone vha nga tendelana na zwiimo musi vha tshi khetha khandiso dzine vha ḓo dzi shumisa na nḓila ya u dzi guda.

Miṅwe miṱa i khou ita mini u itela uri i ite zwithu zwo fhamba-fhambanaho? Vhaṅwe vha thoma vhurabeli ha muṱa nga u imbela Yehova. Juan wa ngei Mexico o amba uri: “Zwi ita uri hu vhe na vhuimo havhuḓi nahone zwi ita uri mihumbulo yashu i livhise ṱhogomelo kha zwine ra ḓo zwi guda.” Muṱa wawe u khetha nyimbo ine ya tshimbidzana na zwiṅwe zwe zwa khethwa zwine zwa ḓo vhalwa nga madekwana.

Miṱa minzhi i vhala yoṱhe tshipiḓa tsha Bivhili. U itela uri hu itwe zwithu zwo fhamba-fhambanaho, muraḓo muṅwe na muṅwe u vhala tshipiḓa tsha mubvumbedzwa a re Bivhilini. Khotsi wa ngei Dzhapani u a tenda uri “mathomoni zwo vha zwi songo leluwa u vhala nga nḓila yeneyo.” Fhedzi vhatukana vhawe vhavhili vho vha vho takala u vhona vhabebi vhavho vha tshi takalela u ita zwiṅwe zwithu navho. Vhaṅwe vhabebi vha ita ḽitambwa ḽa mafhungo a Bivhili. Roger wa ngei Afurika Tshipembe ane a vha na vhana vhavhili uri: “Kanzhi [vhana] vha vhona zwiṅwe kha mafhungo a Bivhili zwine riṋe sa vhabebi zwa vha zwo ri pfuka.”

Iṅwe nḓila ya u ita zwithu zwo fhamba-fhambanaho ndi u ita miṅwe mishumo noṱhe, i ngaho u fhaṱa gungwa ḽa Noaxe kana thembele ya Salomo. U ita ṱhoḓisiso ya wonoyu mushumo zwi nga takadza. Sa tsumbo, muṅwe musidzana wa miṅwaha miṱanu wa ngei Asia o vha e na vhabebi vhawe na makhulu wawe kamarani ya u awela. Vho vha vha tshi khou ita mutambo wo thewaho kha nyendo dza vhurumiwa dza muapostola Paulo. Miṅwe miṱa yo ita mitambo yo thewaho kha mafhungo a wanalaho kha bugu ya Ekisodo. Donald wa ngei Togo a re na miṅwaha ya 19 uri, u ita zwithu zwo fhamba-fhambanaho “zwo ita uri vhurabeli hashu ha muṱa na muṱa wone une zwi takadze.” Naa hu na zwithu zwine na nga zwi ita, zwine zwa nga ita uri vhurabeli ha muṱa vhu takadze vhukuma?

Naho u ita zwithu zwo fhamba-fhambanaho na u tendelana na zwiimo, zwi tshi ita uri vhurabeli ha muṱa vhu takadze, vhoṱhe muṱani vha tea u lugiselela uri vha vhuyelwe. Nga zwiṅwe zwifhinga vhana vha a neta, nga zwenezwo vhokhotsi vha tea u humbula nga ha mafhungo ane a ḓo haseledzwa nahone vha lugiselele zwavhuḓi. Muṅwe khotsi u ri: “Musi ndo lugiselela zwavhuḓi, vhoṱhe vha a vhuyelwa nga vhurabeli ha muṱa.” Muṅwe khotsi wa Dzheremane u vhudza vha muṱani wawe hu tshee nga phanḓa nga ha zwine zwa ḓo haseledzwa vhegeni dzi tevhelaho. Muṅwe khotsi wa ngei Benin a re na vhana vha rathi vha re fhasi ha miṅwaha ya fumi, u lugiselela uri muṱa u ṱalele DVD yo thewaho Bivhilini kha vhurabeli ha muṱa nahone u vha ṋea mbudziso hu tshee nga phanḓa. Vhukuma, u lugiselela zwi ita uri vhurabeli ha muṱa vhu vhe vhuimoni ha nṱha.

Arali miṱa ya ḓivha hu tshee nga phanḓa zwine zwa ḓo haseledzwa, i nga amba nga hazwo vhukati ha vhege, zwenezwo zwi nga ita uri i lavhelele u vha na vhurabeli ha muṱa nga maṱo matswuku. Musi muṅwe na muṅwe o avhelwa tshipiḓa kha vhurabeli ha muṱa, u ḓo vhu dzhia vhu ha ndeme.

Miṱa minzhi i sedzana na khaedu musi zwi tshi ḓa kha u fara vhurabeli ha muṱa tshifhinga tshoṱhe.

Vhokhotsi vhanzhi vha a shuma awara nnzhi u itela u ṱhogomela miṱa yavho. Sa tsumbo, muṅwe khotsi wa ngei Mexico u bva hayani nga awara ya vhurathi nga matsheloni nahone a vhuya nga awara ya vhumalo nga madekwana. Zwiṅwe hafhu, hu nga vha na ṱhoḓea ya uri hu shandulwe tshifhinga tsha Vhurabeli ha Muṱa nga nṱhani ha zwiṅwe zwiitea zwa lwa muya.

Naho zwo ralo, ri tea u ḓiimisela u fara vhurabeli ha muṱa tshifhinga tshoṱhe. Loïs wa ngei Togo, a re na miṅwaha ya 11 u amba zwi tevhelaho nga ha u ḓiimisela ha muṱa wa hawe: “Naho arali ra kombetshedzea u thoma vhurabeli hashu ha muṱa ḽo no kovhela nga nṱhani ha zwithithisi zwa ḓuvha, a ri litshi u vhu fara.” Ndi ngazwo miṅwe miṱa i tshi dzudzanya u fara vhurabeli ha muṱa musi vhege i tshi tou thoma. Arali ha vha na zwiitea zwi songo lavhelelwaho, vha nga vhu fara musi vhege i tshi yo fhela, nga yeneyo vhege.

Samusi dzina ḽa honovhu “vhurabeli ha muṱa” ḽi tshi sumbedza, ndi tshipiḓa tsha vhurabeli hashu vhune ra vhu itela Yehova. U nga ri miraḓo yoṱhe ya muṱa i nga ḓisela Yehova ‘misumo ya milomo yavho’ vhege iṅwe na iṅwe. (Hos. 14:3) Nahone u nga ri tshi nga vha tshifhinga tshi takadzaho kha muṱa muṅwe na muṅwe ngauri “u takalela Yehova ndi one maanḓa aṋu.”—Neh. 8:9, 10.