Ke Toe Lahi Age Te Fiafia ʼi Takotou Ako Fakafamili
ʼE ui fenei e te tamai ʼi Pelesile: “ ʼI te kua maholo lelei ʼo tamatou Ako Fakafamili ʼi te afiafi, ʼi ʼihi temi ʼe matou fualoa ʼosi mo kapau ʼe mole au taʼofi toku famili.” Pea ʼe ui e te pule famili mai Saponia ʼe hage ia ʼe mole tokagaʼi e tona foha ʼae ʼe taʼu hogofulu ia te fakalaka ʼo te temi pea ʼe ina loto ke hoko atu te ako. Kotea tona tupuʼaga? ʼE tali fenei e te tamai: “ ʼE lotomalohi pea mo fiafia ai.”
ʼE moʼoni, ʼe mole lotomalohi feia te tamaliki fuli, pea ʼi tona fakahagatonu, ko ʼihi ʼe lagi mole natou leleiʼia te ako fakafamili. Kotea tona tupuʼaga? ʼE fakaha e te tamai ʼi Togo te faʼahi ʼaeni: “Ko tatatou tauhi ʼae kia Sehova ʼe mole tonu ke liliu ko he meʼa ʼe fakapiko.” Pea kapau koia, ʼe feala koa hakotou fakakaukauʼi te faʼahiga takitaki ʼo te ako fakafamili? Maʼa te ʼu famili tokolahi, ko te ako fakafamili ʼe feala ke liliu ko he “fiafiaaga” ohage pe ko tona ui e Esaia ʼo ʼuhiga mo te Sapato.—Esa. 58:13, 14.
ʼE mahino ki te ʼu tamai fuli ʼi te moʼoni, ke fiafia tonatou famili lolotoga te ako fakafamili, ʼe maʼuhiga ke fai te ako ʼi he lakaga fiafia mo fimalie. ʼE ui e Ralf, ʼae ko ʼona ʼofafine ʼe toko tolu pea mo tona foha ʼe tahi, ʼe hage pe tanatou ako fakafamili ko he faipalalau mahani; pea ʼe natou kau fuli ki ai. ʼE moʼoni, ʼi ʼihi temi, ʼe feala ke faigataʼa ki te ʼu fanau hanatou leleiʼia pea mo nofo tokaga ki te manatu ʼae ʼe vakaʼi. Pea ʼe fakamoʼoni fenei ia he faʼe: “ ʼI ʼihi temi ʼe mole au maʼu he malohi feʼauga ke fiafia ai te Ako Fakafamili ohage ko taku loto ki ai.” ʼE kotou felaveʼi koa mo te fihifihia ʼaia?
KE FAKAPOTOPOTO MO FETOGITOGI
ʼE ui fenei e te tamai ʼi Siamani ʼae ko ʼana toe ʼe tokolua: “ ʼE tonu ke tou fakapotopoto.” Pea ʼe ui fenei e Natalia, ʼae ko ʼana toe ʼe tokolua: “Ko te faʼahi ʼae ʼe maʼuhiga age ki tomatou kiʼi famili, ʼe ko te fetogitogi, fetogitogi, fetogitogi.” Tokolahi te ʼu famili ʼe natou vaevae te temi ʼo te ako fakafamili. Ko he tamai ʼi Pelesile ʼe higoa ko Cleiton ʼae ko ʼana toe ʼe tokolua, ʼe ina fakamahino fenei: “Ko te faʼahiga fai ʼaia ʼe maʼuli ai te ako pea ʼe ʼaoga kia matou fuli.” ʼAki tanatou vaevae te temi ʼo te ako, ʼe tokakaga ai te ʼu matuʼā ki te ʼu meʼa ʼae ʼe ʼaoga ki te fanau takitokotahi ʼo mulimuli ki ʼonatou taʼu. Kapau ʼe fakafuafua lelei e te ʼu matuʼā tanatou filifili te ʼu manatu, mo te ʼu tohi, pea mo te ʼu ʼata, ʼe feala ai ke natou faipalalau ki te ʼu meʼa ʼae ʼe ʼaoga ki te famili katoa.
Kotea ʼae ʼe fai e ʼihi famili moʼo fetogitogi tanatou ako fakafamili? Ko ʼihi ʼe natou kamata tanatou ako fakafamili ʼaki tanatou hiva te ʼu katiko kia Sehova. Ko Juan ʼae ʼe maʼuli ʼi Mekesike, ʼe ina ui fenei: “ ʼE tupu ʼaki ai he lakaga fakafiafia pea ʼe ina teuteuʼi matou ke matou fakakaukau ki te ʼu manatu ʼae ka matou vakaʼi.” ʼE hivaʼi e tona famili ia te ʼu katiko ʼae ʼe alu tahi mo te ʼu manatu ʼae ka natou vakaʼi ʼi te afiafi.
Tokolahi te ʼu famili ʼe natou lau fakatahi he koga Tohi-Tapu. Pea moʼo fetogitogi, ʼe natou fesuisuiʼaki ia tanatou lau te koga Tohi-Tapu ʼaia. Ko he tamai ʼi Saponia ʼe ina fakamoʼoni, ‘ ʼi te kamata neʼe mole mahani ia mo te faʼahiga lau ʼaia.’ Kaʼe neʼe fiafia ʼona foha ʼe tokolua ʼi tanā sisio ʼae ki te leleiʼia e ʼanā matuʼā he faʼahi ʼe natou leleiʼia fuli. Ko ʼihi famili ʼe natou tau gaoʼi te ʼu hisitolia Fakatohi-tapu. ʼI Afelika Saute, ʼe ui e Roger, ʼae ko ʼona foha ʼe tokolua ‘ ʼe tau tokagaʼi e te fanau ni faʼahi ʼi te ʼu fakamatala Fakatohi-tapu kaʼe ʼe mole tokagaʼi ia e matou ko te ʼu matuʼā.
Ko te tahi faʼahi ki te fetogitogi, ʼe ko te gaue fakatahi ki he kiʼi fakatuʼutuʼu, ohage la ko te faʼifaʼitakiʼi te aleka ʼo Noe peʼe ko te fale lotu ʼo Salomone. Pea ko te taʼi fakatuʼutuʼu ʼaia ʼe ʼaoga ki ai he ʼu fekumi pea ʼe feala ia ke liliu ko he ʼu lakaga fakafiafia. Ohage la ʼi Asia, neʼe fai e te kiʼi taʼahine ʼe taʼu nima mo ʼana matuʼā pea mo tana kui fafine he gaoʼi Fakatohi-tapu ʼi tanatou salo ʼe fakatafito ki te ʼu folau fakamisionea ʼa te apositolo ko Paulo. Pea ko ʼihi famili, neʼe fakatafito natou ki te ʼu fakamatala ʼae ʼe tuʼu ʼi te tohi ʼo Ekesote. ʼE ui e Donald mai Togo ʼae ʼe taʼu 19, ko te fetogitogi, ʼe matou “maʼu ai he toe fetogi lahi ʼi tamatou ako fakafamili pea mo tomatou famili pe la.” ʼE feala koa hakotou fakakaukauʼi he kiʼi fakatuʼutuʼu ʼae ʼe toe lahi age ai anai te fiafia ʼi takotou ako fakafamili?
ʼE MAUHIGA TE TEUTEU
Logo pe ko te ako fakafamili ʼe ko he lakaga fakafiafia ʼuhi ko te fetogitogi pea mo te fakapotopoto, kaʼe ke feala he taʼofi mai ai ni ako, ʼe tonu ia ke teuteuʼi e te famili katoa te ako. Koteʼuhi ʼi ʼihi temi, ʼe gaʼegaʼe ai te kau tupulaga, koia ʼae ʼe ʼaoga ai ke tokakaga lelei te ʼu tamai ki te ʼu manatu ʼae neʼe filifili pea ke natou teuteuʼi lelei ia te ako. ʼE ui e te tamai “Moka au teuteuʼi te ako, pea ʼe fua lelei ki toku kiʼi famili katoa.” Ko he tamai ʼi Siamani ʼe ina ui, e ina fakaha fakatomuʼa ki tona kiʼi famili te ʼu faʼahi ʼae ka natou vakaʼi anai ʼi te ʼu vahaʼa ka hoa mai. ʼI Bénin, ko te tamai ʼe tamaliki ono, moka ina fakatuʼutuʼu ke kau ki te ako fakafamili ia te sioʼi ʼo he foʼi ʼata Fakatohi-tapu, pea ʼe ina tohi te ʼu fehuʼi pea mo ina foaki fakatomuʼa kia natou. ʼE moʼoni, moka tou teuteuʼi te ako pea ʼe ha anai ʼi te lelei ʼo tatatou ako fakafamili.
Koia ka iloʼi fakatomuʼa e te famili te ʼu faʼahi ʼae ka vakaʼi, pea ʼe feala tanatou faipalalau ki ai lolotoga te vahaʼa, ʼo toe lahi ai pe tonatou fiafia. Pea kapau kua natou tahi tuʼu pe mo tana gaue, pea ʼe feala anai ke natou ui takitokotahi ʼe ko taku ako fakafamili.
KOTOU FAIGA KE FAI TUʼUMAU
Tokolahi te ʼu famili ʼe faigataʼa kia natou hanatou fai tuʼumaʼu tanatou ako fakafamili.
ʼE kauga malie te ʼu tamai ʼe tonu ke natou gaue lolotoga ni hola moʼo tokoni ki tonatou maʼuli fakafamili. Ohage la, ʼi Mekesike ʼe mavae te tamai ʼi tona ʼapi ʼi te hola ono uhu pea ʼe toe foki mai ʼi te hola valu poʼuli. Kaʼe ʼi ʼihi temi ʼe lagi ʼaoga ke fetogi te temi ʼae ʼe fai ai te Ako Fakafamili ʼuhi ko he tahi aluʼaga fakalaumalie.
Kaʼe ʼe ʼaoga ke tou fakatotonu ke tou fai tuʼumaʼu tatatou ako fakafamili. Ko Loïs mai Togo ʼae ʼe taʼu hogofulu ma tahi, ʼe ina ui fenei ʼo ʼuhiga mo te tonu kua fai e tona famili: “Logo pe ʼi ʼihi temi ʼe matou kamata tauhala ai tamatou ako fakafamili ʼuhi ko he aluʼaga neʼe hoko lolotoga te ʼaho katoa, kaʼe ʼe matou fai tuʼumaʼu pe tamatou ako fakafamili.” ʼE tou mahino ai pe ko ʼe ko ʼihi famili ʼe natou fai tanatou ako fakafamili ʼi te kamataʼaga ʼo te vahaʼa. Pea kapau ʼe hoko he aluʼaga fakafokifa, pea ʼe feala pe hanatou fakatuʼutuʼu te ako fakafamili ki he tahi ʼaho ʼo te vahaʼa pe ʼaia.
Ko te ako fakafamili ʼe ko he faʼahi maʼuhiga ia ʼo takotou tauhi ʼae kia Sehova. Koia ʼe tonu ai ki tokotou kiʼi famili katoa ke natou foaki kia Sehova ‘te ʼu vitulo kei mui ʼo ʼonatou laugutu’ ʼi te vahaʼa fuli. (Oseo 14:2) Pea ʼe fakaʼamu ke liliu ko he lakaga fakafiafia ki te famili katoa, “koteuhi ko te fiafia o [Sehova] ko tokotou malohiaga” ʼaia.—Nee. 8:9, 10.