Juntúul taatatsil kajaʼan Brasileʼ, ku yaʼalik: «Tumen k-jach búuyul tsikbal tu Áakʼabil Adoración ich Familiaeʼ maʼ t-tsʼáaik cuenta u máan le tiempooʼ». Juntúul taatatsil kajaʼan Japoneʼ ku yaʼalikeʼ u hijo yaan 10 jaʼaboʼob tiʼeʼ maʼ tu tsʼáaik cuenta u máan le tiempooʼ yéetel u kʼáat ka seguernak le xookoʼ. ¿Baʼaxten? Letiʼeʼ ku yaʼalik: «Ku tsʼíiboltik u kaanbal, le oʼolal kiʼimak u yóol».

Maʼ tuláakal le paalaloʼob bey u yuʼubikubaʼoboʼ. U jaajileʼ yaan paalaleʼ nak óol u yilkoʼob le adoración ich familiaoʼ. Juntúul taatatsil kajaʼan Togoeʼ ku yaʼalikeʼ «maʼ unaj u nak óoltal u adorartaʼal Jéeobaiʼ». Baʼaleʼ wa ku nak óoltaleʼ, ¿maʼ wa ta tʼaan tu yoʼolal bix u nuʼuktaʼal le xookoʼ? Yaʼab familiaʼobeʼ tsʼoʼok u yilkoʼobeʼ le xookoʼ jeʼel u pʼáatal bey «u kʼiinil kiʼimak óolal» jeʼex u yaʼalik u libroil Isaías yoʼolal u kʼiinil sabadooʼ (Isa. 58:13, 14).

Le taatatsiloʼoboʼ u yojloʼobeʼ wa maʼ nak óol le xookoʼ yaan u kiʼikiʼ óoltaʼal. Ralf, yaan kantúul u paalal óoxtúul x-chʼúupal yéetel juntúul xiʼipaleʼ, ku yaʼalikeʼ ken yanaktiʼob le adoración ich familiaoʼ maʼ bey junpʼéel xookeʼ, baʼaxeʼ bey junpʼéel tsikbaleʼ; tuláakal ku táakpajliʼ. Le baʼax tu yaʼalaʼ jach maʼalob, baʼaleʼ u jaajileʼ maʼ chéen chʼaʼabil maʼ u náakal u yóol le paalaloʼoboʼ. Juntúul maamatsileʼ, ku yaʼalik: «Yaan kʼiineʼ jach kaʼanaʼanen, le oʼolal maʼ tu páajtal in beetik u jatsʼutstal le xook ich familia jeʼex in kʼáatoʼ». ¿Baʼax jeʼel u páajtal u beetik le taatatsiloʼob utiaʼal maʼ u náakal u yóol u paalaloʼoboʼ?

Juntúul taatatsil kajaʼan Alemania —kaʼatúul u paalaleʼ— ku yaʼalik: «Unaj u yilik máak baʼax kʼaʼabéet tiʼ tuláakal». Natalia, —kaʼatúul u  paalaleʼ— ku yaʼalik: «Toʼoneʼ k-jach ilik maʼ k-beetik junpʼéeliliʼ baʼal mantatsʼ». Yaʼab familiaʼobeʼ ku jóoʼskoʼob wa jaypʼéel jaats tiʼ le xookoʼ. Cleiton, kajaʼan Brasil —kaʼatúul u paalaleʼ— ku yaʼalik: «Tumen jejeláas baʼax ku beetaʼaleʼ, tuláakal ku táakpajal». Wa jejeláas u jaʼabil u paalal máakeʼ ken jóoʼsaʼak wa jaypʼéel jaats tiʼ le xookoʼ ku béeytal u yáantaʼal cada juntúul. Le taatatsiloʼoboʼ jeʼel u páajtal u yilkoʼob baʼax kʼaʼabéet tiʼ cada juntúul tiʼ le paalaloʼ yéetel u chʼaʼikoʼob en cuentail utiaʼal u yéeyikoʼob baʼax kun xokbil yéetel bix kun xokbil.

¿Baʼax ku beetik jujunpʼéel familia utiaʼal maʼ u pʼáatal juntakáaliliʼ le xookoʼ? Yaneʼ utiaʼal u káajaloʼobeʼ ku kʼaykoʼob kʼaayoʼob tiʼ Jéeoba. Juan, kajaʼan Méxicoeʼ, ku yaʼalik: «Leloʼ ku beetik u yantal kiʼimak óolaliʼ yéetel ku yáantkoʼon tuukul tiʼ le baʼax ken k-xakʼaltoʼ». Le kʼaayoʼob ku yéeyikoʼoboʼ ku tʼaanoʼob xan tiʼ le baʼax ken u xokoʼob teʼ áakʼaboʼ.

Yaan xan familiaʼobeʼ ku múul xokikoʼob junjaats tiʼ le Bibliaoʼ. Utiaʼal u maas jatsʼutstaleʼ ku yaʼalikoʼob máax kun xokik baʼax ku yaʼalik cada juntúul tiʼ le máaxoʼob ku chíikpajal teʼ xookiloʼ. Juntúul taatatsil kajaʼan Japoneʼ ku yaʼalikeʼ jelaʼan u yilik kaʼach u yúuchul xook beyaʼ. Baʼaleʼ tu kaʼatúulil u mejen paalaleʼ jatsʼuts u yilkoʼob baʼax ku beetik u taataʼob tu yéeteloʼob. Yaan familiaʼob xaneʼ ku beetkoʼob mejen obra de teatro yéetel le tsikbaliloʼob yaan teʼ Bibliaoʼ. Roger, kajaʼan Sudáfrica —kaʼatúul u paalaleʼ— ku yaʼalik: «Le mejen paalaloʼoboʼ yaan baʼaloʼob ku yilkoʼob tiʼ le tsikbaliloʼob maʼatech k-ilik toʼonoʼ».

Maʼalob xan ka múul beetaʼak wa baʼax, jeʼex junpʼéel u chan arca Noé wa u templo Salomón. Utiaʼal u beetaʼaloʼobeʼ yaʼab baʼax kʼaʼabéet u xakʼaltik máak, lelaʼ jeʼel u jatsʼutstal u yilaʼaleʼ. Tu luʼumil Asiaeʼ, u taataʼob yéetel u abuela juntúul chan x-chʼúupal yaan cinco jaʼaboʼob tiʼeʼ tu beetoʼob junpʼéel báaxal yaan yil yéetel le viajeʼob tu beetaj apóstol Pablooʼ. Yaan uláakʼ familiaʼobeʼ tsʼoʼok u beetkoʼob báaxaloʼob yaan yil yéetel le baʼax ku yaʼalik u libroil Éxodooʼ. Donald, 19 jaʼaboʼob yaantiʼ yéetel kajaʼan Togoeʼ, ku yaʼalik: «Tumen maʼ juntakáaliliʼ baʼax k-beetkeʼ jatsʼuts u yilaʼal le xook ich familiaoʼ yéetel tuláakal páaʼtik u yorail». ¿Yaan wa baʼax ku taal ta tuukul jeʼel u yáantaj utiaʼal u maas jatsʼutstal le adoración ich familiaoʼ?

Le xook ich familiaoʼ jatsʼuts u yilaʼal wa maʼ juntakáaliliʼ bix u beetaʼal yéetel wa ku yilaʼal baʼax kʼaʼabéet tiʼ cada juntúul. Baʼaleʼ utiaʼal u maas jóoʼsaʼal u yutsileʼ tuláakal unaj u líiʼskuba. Yaan kʼiineʼ le táankelmoʼoboʼ jeʼel u náakal u yóoloʼobeʼ, le oʼolal le taatatsiloʼ unaj u tuklik baʼax ken u xokoʼob yéetel u jóoʼsik tiempo utiaʼal u líiʼskuba maʼalob. Juntúul taatatsileʼ ku yaʼalik: «Ken in líiʼsinbaeʼ ku kiʼikiʼ óoltaʼal le xookoʼ». Juntúul taatatsil alemaneʼ ku yaʼalik baʼax kun xakʼaltbil tiʼ le semanaʼob ku taaloʼ. Junpʼéel familia kajaʼan Benín, —seis u paalaleʼ— yaan kʼiineʼ ku chaʼantikoʼob junpʼéel video teʼ adoración ich familiaoʼ. Yéetel utiaʼal u líiʼskubaʼobeʼ, le taatatsiloʼ ku beetik junpʼéel lista kʼáatchiʼob utiaʼal ka u tsʼáatiʼob. U jaajileʼ chíikaʼan u yilaʼal wa u líiʼsmuba máak.

Tuláakal le familiaoʼ maʼalob ka u yojéelt baʼax kun xokbil, beyoʼ yaan u tsikbaltikoʼob ichil le semanaoʼ yéetel yaan u maas tsʼíiboltkoʼob u kʼuchul u kʼiinil le xookoʼ. Wa cada juntúul ku tsʼaʼabal baʼax u beeteʼ yaan u yuʼubikoʼob kʼaʼabéet u yantaloʼobiʼ.

Yaʼab familiaʼobeʼ ku talamtal u xookoʼob cada semana.

Yaʼab taatatsiloʼobeʼ bul kʼiin táan u meyajoʼob utiaʼal u tsʼáaikoʼob baʼax kʼaʼabéet tu yotochoʼob. Jeʼex juntúul taatatsil kajaʼan Méxicoeʼ láas seis jaʼatskab tu jóokʼol tu yotoch yéetel láas ocho áakʼab tu suut. Tsʼoʼoleʼ yaan kʼiineʼ maʼ xaaneʼ yaan u kʼaʼabéettal u kʼeʼexel u kʼiinil le Áakʼabil Adoración ich Familia yoʼolal junpʼéel asamblea wa uláakʼ baʼax jach kʼaʼanaʼan.

Kex beyoʼ unaj u yantaltoʼon mantatsʼ le adoración ich familiaoʼ. Loïs, yaan 11 jaʼaboʼob tiʼ, yéetel kajaʼan Togoeʼ, ku yaʼalik: «Kex yaan hora ku maas tardetal tu káajal le xook yoʼolal wa baʼax úuch teʼ kʼiinoʼ, mix juntéen ku pʼáatal maʼ k-xook». Maʼalob ka yanak le xook tu káajbal le semanaoʼ tumen wa ku yúuchul wa baʼaxeʼ jeʼel u beetaʼal tuláakʼ kʼiin tiʼ le semanaoʼ.

Jeʼex k-ilkoʼ le adoración ich familiaoʼ ku meyaj utiaʼal k-adorartik Jéeoba. Ilawil u nojbeʼenkúuntaʼal wa u ‹kiʼikiʼtʼantaʼal› Jéeoba cada semana tumen tuláakal a familia (Ose. 14:2). Yéetel ilawil u kiʼimaktal u yóol tuláakal a familia teʼ súutukiloʼ «tumen u kiʼimak óolal Yuumtsileʼ letiʼ k-muukʼ» (Neh. 8:9, 10).