Sicaríʼ guníʼ ti hombre de Brasil: «Qué lica rudiʼdu cuenta ridiʼdiʼ tiempu ora maʼ cayuni adorardu Dios né binnilídxidu, purtiʼ nabé galán maʼ cayuidu diidxaʼ». Sti hombre de Japón ni naca xaíque lidxi bizeeteʼ qué lica rudii ti xiiñiʼ de 10 iza cuenta riluxe tiempu gudíxhecaʼ para guni adorarcaʼ Dios né binnilídxicaʼ. Xiñee yaʼ. Bixhoze hombrehuiiniʼ riʼ na: «Nabé riuuláʼdxibe ni ne nabé nayecheʼ riuube».

Peru cadi guiráʼ diʼ xcuidi nga riuulaʼdxiʼ guni adorar Dios né binnilidxi. Nuu tu qué riuu nayecheʼ ora maʼ cayaca ni. Xiñee yaʼ. Purtiʼ nagueenda rireecaʼ gana. Ti xpinni Cristu de Togo guníʼ: «Cadi naquiiñeʼ guiree binni gana ora guni adorar Jiobá». Pa zacá runi sentir ca xiiñitu, ñee cadi pur modo ruundanetu laacabe nga rireecabe gana la? Stale familia maʼ biiyaʼ zanda gácani «ti dxi nayecheʼ», casi rieeteʼ lu libru stiʼ Isaías (Is. 58:13, 14).

Ca xpinni Cristu ni napa xiiñiʼ nánnacaʼ jma riuulaʼdxiʼ ti familia guni adorar Dios pa guiracaʼ nuucaʼ nayecheʼ. Ralf nga ti xpinni Cristu ni napa chonna xiiñidxaapaʼ ne ti hombrehuiiniʼ. Laa guníʼ ora maʼ cayuni adorarné binnilidxi Dios rúnicani casi ora maʼ cayuiʼcaʼ diidxaʼ; guiracaʼ riniʼcaʼ. Peru nuu tiru raca nagana para guidxela binni ximodo gusiidiʼ ca xiiñiʼ sin guireecaʼ gana. Ti gunaa napa xiiñiʼ guníʼ: «Cadi guiráʼ diʼ biaje randa ridxelaʼ xi guundaniáʼ ca xiiñeʼ ti chuuláʼdxicaʼ ora ridagulisaadu para guni adorardu Dios». Yanna, xi zanda guni binni ti cadi guiree ca xiiñiʼ gana ora guʼndanécabe laacaʼ yaʼ.

Ti hombre de Alemania ni napa chupa xiiñiʼ guníʼ: «Zanda gúnitu ni gadxé gadxé modo». Natalia, ti gunaa ni napa chupa xiiñidxaapaʼ guníʼ:  «Ni jma racané laadu nga cadi gúninu ngueca ca ngueca guiráʼ semana, sínuque gatigá ruchaʼdu modo rúnidu ni». Stale familia rúnicaʼ ni chupa chonna ndaa. Cleiton, ti hombre de Brasil ni napa chupa xiiñiʼ ni maʼ ziniisi guníʼ: «Zacá jma riuucabe gana ne guirácabe ricábicabe». Ora napa binni xiiñiʼ maʼ huaniisi ne nahuiiniʼ, galán iquiiñecaʼ caadxi tiempu para gusiénecaʼ cani huaniisi ne cueecaʼ tiempu para cani nahuiiniʼ, ne zacá zánnacaʼ xi caquiiñeʼ cada tobi de ca xiiñicaʼ. Naquiiñeʼ guiníʼ ique binni xi riuulaʼdxiʼ cada tobi de ca xiiñiʼ ti zacá ganda guyúbicaʼ xi zanda gúʼndanecaʼ laacabe ne ximodo gúnicaʼ ni.

Xi runi caadxi familia ti gúʼndacaʼ gadxé gadxé tema guiráʼ semana yaʼ. Nuu tu ruundaʼ diidxaʼ riuundaʼ ante guzulucaʼ. Ti hombre de Méjicu láʼ Juan guníʼ: «Nga racané laadu chuʼdu nayecheʼ ne guiníʼ íquedu ni chiguidúʼndadu». Binnilídxibe nga ribí diidxaʼ riuundaʼ ni caníʼ de tema ni chiguundacabe gueelaʼ runi adorárcabe Dios.

Xcaadxi familia ruundaʼ chupa chonna capítulo stiʼ Biblia. Ne ruundacabe ni casi ora laacabe nga ca binni ni cayeeteʼ lu relatu ca. Ti xpinni Cristu de Japón ni napa xiiñiʼ guníʼ nagana guca para laa guʼndaʼ zacá. Peru guiropaʼ xiiñibe riuuláʼdxicaʼ gúʼyacaʼ laabe ne jñaacaʼ gúnicaʼ zaqué. Nuu familia ruundacaʼ xiixa relatu zeeda lu Biblia ne rúnicaʼ casi ñaca cadíʼdicaʼ lu teatru. Roger, ti hombre de Sudáfrica ni napa chupa hombrehuiiniʼ guníʼ: «Ruuyaʼ ca xcuidi ca xcaadxi cosa ni qué ridúʼyadu lu relatu ca».

Sti cosa ni zanda gúnitu nga guzaʼtu xiixa cosa juntu, casi ti arcahuiiniʼ stiʼ Noé o yuʼduʼ stiʼ Salomón. Nabé galán ora guʼndaʼ chaahuitu de cani cayúnitu. Ndaaniʼ ti guidxi stiʼ Asia, ti dxaapahuiiniʼ de gaayuʼ iza, bixhoze, jñaa ne jñaabiidaʼ bitieecaʼ lu ti cartón ca viaje ni biʼniʼ apóstol Pablu casi misioneru ne riguítecaʼ casi ora laacaʼ nga cayúnicaʼ ca viaje ca. Xcaadxi familia huaquiiñeʼ ca relatu ni zeeda lu libru stiʼ Éxodo para gúnicaʼ caadxi juegu. Donald, ti xpinni Cristu de 19 iza ni nabeza Togo guníʼ: «Ora riquiiñedu gadxé gadxé cosa para guni adorardu Dios né binnilídxidu jma galán rácani ne riuʼdu jma nayecheʼ». Ñee maʼ guníʼ íqueluʼ xi zanda gúniluʼ ti cadi guiree binnilídxiluʼ gana ora guni adorartu Dios la?

Neca galán nga guyúbinu gadxé gadxé modo guni adorarnu Dios né binnilídxinu, para ganda cueendúcabe ni galán caquiiñeʼ chúʼcabe listu dede ante. Riuu biaje riree cani nahuiiniʼ gana, nga runi, bixhózecabe nga naquiiñeʼ guiníʼ ique xi zanda guʼndané laacabe ne cuee tiempu para guʼndaʼ chaahuiʼ. Ti xpinni Cristu guníʼ: «Ora ruundaʼ chaahueʼ dede ante, jma riuulaʼdxiʼ binnilidxeʼ ora runi adorardu Dios». Sti xpinni Cristu de Alemania ni naca xaíque lidxi rabi binnilidxi dede ante xi chiguundacaʼ stiʼ semana zeeda. Ti familia ra nuu xhoopaʼ xcuidi ni nabeza ndaaniʼ guidxi Benín gatigá ruuyacaʼ ti DVD ora runi adorarcaʼ Dios. Ne para chuʼcaʼ listu la? dede ante rudii bixhózecaʼ laacaʼ ti guiʼchiʼ ra cá guiráʼ ca guendarinabadiidxaʼ ni chiguicábicaʼ. Racá ridúʼyanu jma galán runi adorar ca familia ca Dios ora ruundaʼ chaahuicaʼ dede ante.

Pa dede ante gánnacabe xi chiguundacabe, zaníʼcabe ximodo zanda gúnicabe ni ndaaniʼ semana ca ne pa ñanda si maʼ ñuba ñúnicabe ni. Ne pa cada tobi de laacabe gusiene xiixa de ni chigúʼndacabe semana ca la? guirácabe zuni sentírcabe risaca ni bíʼnicabe ora biʼniʼ adorárcabe Dios né binnilídxicabe.

Stale familia raca nagana para laacaʼ guidagulisaacaʼ guiráʼ semana para guni adorarcaʼ Dios. Xiñee yaʼ.

Purtiʼ stale xpinni Cristu rúnicaʼ dxiiñaʼ guidubi dxi para gudiicaʼ ni caquiiñeʼ binnilídxicaʼ. Ne ngapeʼ nga rizaaca ti xpinni Cristu de Méjicu. Guiráʼ dxi riree de ra lidxi siadóʼ biaʼ las seis ne ribiguétabe dede huaxhinni biaʼ las ocho. Ne nuu familia qué randa ridagulisaacaʼ dxi gudíxhecaʼ gúnicani purtiʼ nápacaʼ guendaridagulisaa roʼ o gueeda binnigola ni riganna ca neza binni ridagulisaa.

Neca zacá, naquiiñeʼ quixhe íquenu cadi gusaana de guni adorarnu Dios né binnilídxinu guiráʼ semana. Ti dxaapahuiiniʼ láʼ Loïs de 11 iza de guidxi Togo guníʼ: «Neca riuu biaje ruzuludu maʼ huadxí pur xiixa ni bizaaca dxi ca, qué rusaana de guidúʼndadu guiráʼ semana». Para cadi guiaananu sin guni adorarnu Dios né binnilídxinu, galán gúninu ni ra ruzulú semana, ti pa guiree xiixa ni gucueeza laanu dxi gudíxhenu ni la? zanda gúninu ni sti dxi ndaaniʼ semana ca.

Cadi guiaandaʼ laanu ora ridagulisaanenu binnilídxinu guiráʼ semana runi adorarnu Dios. Dxiqué bisisaca ca israelita Jiobá ra bidiicaʼ laabe «torohuiiniʼ», yanna rusisácanu laabe ora runi adorarnu Dios né binnilídxinu (Os. 14:2). Nga runi, laguni stipa pur chuʼtu nayecheʼ ora guni adorartu Dios né binnilídxitu, purtiʼ «zeeda gaca guendanayecheʼ stiʼ Jiobá casi ti lugar ni naguidxi» (Neh. 8:9, 10).