1. Ka gádanbaliña gürigia uguñe weyu?

 LÚMAGIÑE furumiñeti dan, mabusenrungubeiti Heowá lun hasufuriruni gürigia luriban lani aweiyaduni efekütu. Le meha labusenrunbei, lun hagundaarun dandu wügüriña kei würiña lau aban lubuidun átuadi lidan Paraísu. Gama lumoun, anihán le asuseredubei uguñe weyu: “Sun ubóu le ladügübei Bungiu ayahuati lau igarigu” (Rom. 8:22). Agia hugía, ka hisaminanbei, ida liña lasandiragun Bungiu lungua dan le larihini lani figóu efekütu hawagu gürigia? Añahein wéiyaaña, aba hagurúniwa dan le hachülürün lidoun irumudiri burí le, dántima hemegeirun ídemuei (Sal. 39:5; 2 Tim. 3:3).

2. Ka uagu weiri lubéi wagundan lau añahein hamá íbirigu derebuguhaña wadan?

² Wagía lubúeingu Heowá gúndaatiwa añahein lan wügüriña hama würiña ha derebuguhaña lidan damuriguaü. Sagatiwa buiti lídangiñe le hasubudirubei, ani ruti hafiñen erei woun. Saragu wádangiñe gaduheguatiwa hama íbirigu hínsiñewatiña ha. Gama lumoun, waduheñu lan yebe o mama lan waduheñu, súngubei wagía nidiheritiwa luagu le asuseredubei houn (Gal. 6:10; 1 Fe. 1:22). Ligíati, akutiha waméi le lasaminarubei Heowá hawagu wéiyaaña mutu ani ariha waméi ka lan buligasion hánibei haduheñu hama ítara kei damuriguaü.

3, 4. a) Ka katei súdiniti lamuriahabei le abürühabalin Sálumu 71 luma Heowá? b) Ka gayarabei hamuriahan wéiyaaña mutu ha lídanbaña damuriguaü luma Heowá?

³ Ariñagati Sálumu 71:9: “Mágurabana danme le wéiyaadina; mígirun báname danme le méreedina!”. Genegeti lasigiruñein lan Sálumu 71 le ñǘbuinbei lídangiñe Sálumu 70 ani genegeti luagu Dawidi lan adügübalin ayumuraguni le lídanbei Sálumu 71:9. Seriwiti lun Bungiu lúmagiñe nibureingili darí laweiyadun, ani yusu lumuti Heowá lun ladügün saragu katei wéinamuburiti (1 Sam. 17:33-37, 50; 1 Uru. 2:1-3, 10). Lau sun lira, sanditi meha megei lan lamuriahan luma Heowá lun lasigirun abinirei luma lun lóunigiruni (aliiha huméi Sálumu 71:17, 18).

⁴ Lidan damuriguaü añahein saragu íbirigu kei Dawidi. Íbini chülühaña lan lidoun dan ‘hénrenguti’ lánina aweiyaduni, adüga hamuti sun hayaraati lun halawahani Bungiu (Apur. 12:1-7). Saragu hádangiñe siñati hadügüni le meha hadügübei lidan amu dan lidan habagari, kéiburi lidan apurichihani. Gama lumoun, ítara kei Dawidi, gayarati hayumuragun lun Heowá lun lasigirun abiniraña luma lun lóunigiruniña, chóuruti luagu laganbubei lan hafurieidun. Le linarün katei, lau furíei ligía hariñagei lun le hasandirubei, kei meha labürüdüni Dawidi.

5. Ida liña larihiniña Heowá íbirigu derebuguhaña ha úaragubaña?

⁵ Furanguti tariñaguni Lererun Bungiu weiri lan hebegi kristiánugu ha derebuguhaña lun Heowá, ani agurabahati lun inebe hamá woun (Sal. 22:24-26; Ari. 16:31; 20:29). Aliihatiwa lidan Fádirigu 19:32: “Ráramaba arufuda báamugei binebenehabu houn wéiyaaña mutu. Arufudabéi lineben Bubungiute bun. Au Aburemeibei”. Aban meha buligasion sériuti lichugún inebesei houn gürigia ha derebuguhaña dan meha le labürüdǘnbei dimurei burí le, ani súdiniti giñe uguñe weyu. Gama lumoun, ka gánibalin buligasion lun hetenirun luma lun harihin lau le hemegeirubei wéiyaaña mutu?

6. Ka hénpulu líchugubei Hesusu libügürü hounigirúniwa agübürigu?

⁶ Ariñagatu Lererun Bungiu woun: “Ruba inebesei lun búguchi luma tun búguchu” (Afu. 20:12; Efe. 6:2). Águyuguagüda lumuti Hesusu gumadi le dan le meha lasiadirunbaliña fariséugu hama amu alidihatiña relihión ha meha máhabaña hetenirun houn hagübürigu (Mar. 7:5, 10-13). Hesusu guánarügü íchugubei aban buiti hénpulu libügürü katei le. Dan le chülümémeeli oura lun lounwen luagu wagabu, aba lariñagun lun Huan, disipulu le hínsiñetimabei lun, lun lóunigirunu lúguchu, genegeti hilá lan meha tani María weiriei (Huan 19:26, 27).

7. a) Ka lúrudu líchugubei apostolu Pábulu libügürü letenirún houn agübürigu? b) Ka uagu layanuha Pábulu?

⁷ Ruti meha Heowá sífiri sandu lun apostolu Pábulu lun labürühan luagu lunti lan hóunigiruniña afiñetiña haduheñu (aliiha huméi 1 Timotéu 5:4, 8, 16). Akutiha waméi le lariñagubei Pábulu libügürü katei le. Lafuranguagüdüñein meha Pábulu lun Timotéu ka lan lúnbaña hiderawagún lau seinsu lidan damuriguaü. Afuranguagüda lumuti hani lan isaanigu, ubañanigu hama amu iduheñu afiñetiña buligasion lun hetenirun houn gürigia derebuguhaña. Sefu lumuti damuriguaü luéi aban ihürügü. Ítarameme uguñe weyu, arufuda hamuti kristiánugu hafiñen luagu Bungiu lau ‘híderaguniña’ haduheñu ha mégeihabubaña.

8. Ka uagu mariñagun tubalin Bíbülia ídatima luba lan hounigirún agübürigu lidan haweiyan?

⁸ Mosu hachoururuni isaanigu kristiánugu ha wéinamuhaña luagu anihein lan le hemegeirubei hagübürigu hama. Íbini layanuhaña lan meha Pábulu hawagu iduheñu ha afiñebaña luagu Heowá, mosu hetenirun kristiánugu houn hagübürigu íbini mama hamá  gefentiña luagu Heowá. Mama sun le gádanbaliña iduheñu lun ligiamémebei lan. Kada iduñeñu lunti desidírü hamani ida luba lan hetenirun houn haduheñu ha mégeihabubaña. Ámuñegueinarügübei hemegeirun, hagaburi luma hátuadi. Añahein fiú gürigia derebuguhaña gíbetiña hasaanigu, ani añahein amu, ábanrügüñein hasaani. Añahein hagía ibihatiña ídemuei lúmagiñe urúei, añahein amu, mibihintiña. Ámuñegueinarügüti giñe le habusenrunbei ha mégeibaña hounigirún. Ligía moun lumuti lubéi wadimurehan wuriba luagu ligaburi hóunigiruniña amu gürigia haduheñu ha derebuguhaña. Le linarün aban katei, gayarati labiniruni Heowá furumiñeguarügü katei le desidírü wabéi según le tarufudahabei Bíbülia ani adüga ligía lun lahuudun, ítara kei meha lagumeserun adügei lúmagiñe lidaani Moisesi (1 Lur. 11:23).

9-11. a) Ka burí lénrengunga úmabei gayara lan hagagibudagun fiú íbirigu? (Ariha huméi dibuhu le lídanbei lagumeseha arütíkulu.) b) Ka uagu moun lumuti lubéi hóufudahan isaanigu wéinamuhaña ha eseriwidubaña lidan dan dayarüti ígirei heseriwidun? Ru humá aban hénpulu.

⁹ Dan le hawinwandun isaanigu dise hawéi hagübürigu, gayarati hénrengubei lan híchuguni ídemuei le hemegeirubei houn. Dan le lakomoradun aban hádangiñe lagübürigu sódini ladüga léiguadun, láhalachun somu katei luagu o amu katei le sódiniti, mégeitiña habisidahóun lau lóufudagun. Ani lárigiñe, háfuga mégeitiña letenirúniwa houn, luagu murusun o saragu dan. *

¹⁰ Íbirigu ha eseriwidubaña lidan dan dayarüti ani dísetiña hawéi haduheñu háfuga lunti desidírü hamá somu katei hénrenguti. Ha eseriwidubaña Betelirugu, o kei misioneru hama óunigirutiña sirkuitu luma distritu hínsiñeti heseriwidun houn saragu. Gama lumoun, ánhaña asandira hagübürigu, furumiñeti katei le ñǘbuinbei lidoun hasaminan hígiruni heseriwidun lun hagiribudun óunigiraña hagübürigu. Gama lumoun lubaragiñe hadügüni lira, buídubei lun hafurieidun lun Heowá luma lun hachoururuni anhein megei habaliña hagübürigu. Moun lumuti hóufudahan ígirei somu chansi lánina eseriwiduni, lugundun mama súnwandan hemegeirúba lan. Gayarati san aban lan sandi gásügürati le hawagubei hagübürigu ani gayarati aranseñu haña lan lílana damuriguaü le ñein habéi hagübürigu lun hídehan? (Ari. 21:5.)

¹¹ Kei hénpulu, samina wamá luagu hakesin bián íbirigu ha eseriwidubaña lun Heowá dise hawéi hagübürigu. Seriwiti meha aban hádangiñe kei misioneru Sudamérica ani le aban leseriwiduña meha tidan Beteli Brooklyn (Nueva York). Dan le hemegeirunbei hagübürigu ídemuei, aba haweiyasuhan isaanigu hama hánigu weiriou Asia lun habisidahaniña luma lun harihin kaba lan hadüga. Ha eseriwidubaña Sudamérica haransehaña meha lun hígiruni heseriwidun lun hagiribudun óunigiraña hagübürigu. Ábati lagúarun aban hádangiñe wéiyaaña lidan afiñeni le lídanbei damuriguaü le ñein lubéi hadamuridagua hagübürigu houn. Ayanuhaña meha wéiyaaña lidan afiñeni luagu kesi le ani busentiña meha lun hetenirun misionerugu lun heseriwidun sunsuinagubei. Gúndaatiña meha lau lubuidun wadagimanu le hadügübei íbirigu ha ani busentiña meha hídehan lidan hounigirún hagübürigu. Sun iduheñu seremei hamutiña íbirigu ha luagu híderaguniña.

12. Ka lunbei hachoururuni iduheñu kristiánugu dan le desidírü hamá ida luba lan hónigiruniña hagübürigu?

¹² Meberesenga ka lan hadügübei iduheñu kristiánugu lun hetenirun houn hagübürigu, súngubei lunti hachoururuni híchugun uéiriguni lun Bungiu lau le desidírü habéi. Mítaran wamá kei lábutigu relihión ha meha lídanbaña lidaani Hesusu (Mat. 15:3-6). Busentiwa lun líchugun sun le desidírü wabéi uéiriguni lun Bungiu luma lun damuriguaü (2 Ko. 6:3).

13, 14. Ida liña tarufuduni Bíbülia lunti lan hóunigiruniña lílana damuriguaü íbirigu ha derebuguhaña?

¹³ Mama súngubei lun gayarabei lan híderaguniña ha eseriwidubaña lidan dan dayarüti lidan igaburi le uágubei wayanuha. Gama lumoun, arufuda lumuti le asuseredubei lidan furumiñeti sígulu luagu lunti lan berese lan damuriguaü lau le hemegeirubei íbirigu ha derebuguhaña. Ariñagatu Bíbülia luagu ‘ua lan meha ni aban emegeiruti’ lidan damuriguaü le Herusalénbei. Mama meha luagu gaseinsun hamá súngubei hagía. Añahein meha hádangiñe gudemetiña, gama lumoun afareinhóuati meha éigini “hadan ha emegeirutiña” (Adü. 4:34, 35). Dan lárigiñe, aba lagumeserun aban turóbuli. Aba lariñawagúniwa luagu “mibihin hamá würiña güriegu ha hilaañabaña úmarigu éigini dan le lafanreinhóuniwa, sagü weyu”. Ligía aba lubéi híridun apostolugu fiú wügüriña derebuguti hafiñen lun harihin luagu le hemegeirubei würiña ha luma lun letenirúniwa houn lau lubudubu (Adü. 6:1-5). Inarüni madura lan ‘afanreinhani’ le saragu dan; le lisuunibei lun hiderawagúniwa ha ánharubaña lun inarüni lidan Pentekosutesi lidan irumu 33, ha erederubaña luagu fiú dan Herusalén lun hederebudagüdüni hafiñen. Gama lumoun, arufuda lumuti le desidírü habéi apostolugu luagu gayara lan hídehan lílana damuriguaü lidan hounigirún ha mégeihabubaña lidan damuriguaü.

¹⁴ Kei buga wariñaguni, ariñaga lumuti Pábulu lun Timotéu ídaba lan gayara lan líderagunu damuriguaü aban würi kristiána hilaali túmari lidan le temegeirubei (1 Tim. 5:3-16). Ítarameme, subudigüda lumuti disipulu Santiagu hani kristiánugu buligasion lun hóunigiruniña méteñuhaña, würiña ha hilaañabaña hámarigu hama amu ha gaturóbulinbaña o ha mégeibaña (Sant. 1:27; 2:15-17). Ani ariñagati apostolu Huan: “Anhein risi lubéi aban gürigia, ani lariha luagu anihein lan lemegeirun liduhe ani míderagun lumuti, ida lubagia anihein lan ínsiñeni tidan lanigi lun Bungiu?” (1 Huan 3:17). Anhein kada lubéi kristiánu gani lumuti buligasion ligía lun larihin hau ha mégeibaña, ida lubati metenirun lan damuriguaü houn?

15. Ka gayarabei ladügün lun ámuñegueinarügü lan ligaburi hiderawagúniwa íbirigu ha derebuguhaña?

¹⁵ Lidan fiú ageiraü, téniti urúei houn gürigia ha derebuguhaña, kéiburi lau líchugun kaba lan óunigiraña (Rom. 13:6). Lidan amu ageiraü, úati aransehani burí le. Ligíati, ámuñegueinarügüti ídemuei le gayarabei híchuguni iduheñu hama lílana damuriguaü houn wéiyaaña mutu. Saragu isaanigu ha afiñetiña  díseti hawinwandun hawéi hagübürigu, ani gayarati ladügün katei le lun siñá lan hídehan kei habusenrun. Lidan kesi le, buídubei lun hayanuhan isaanigu hama wéiyaaña lidan afiñeni ha lídanbaña damuriguaü le ñein habéi hagübürigu lun gunfuranda hamani ka lan gádanbaliña. Gayarati híderaguniña wéiyaaña lidan afiñeni agübürigu lun hibihin ídemuei le ichugúbei lidan fulasu le ñein lubéi hawinwanda. Gayarati giñe harihini ka lan gádanbaliña lun hasubudiragüdüni houn hasaanigu, kéiburi anhein dará hamaaru lubéi gárada to súdinitu o anhein hátahañein lubéi hárani. Ladügüba hayanuhan wéiyaaña lidan afiñeni furangu hama isaanigu lun maganwoundun lan turóbuli luma lun hadarirun lárani. Aban awalidaguni houn isaanigu hasubudiruni anihein lan somu gürigia ñein, yarafa houn hagübürigu, lun gayara lan líderaguniña luma lun lawisaruniña luagu furumiñeguarügü katei le larihin.

16. Ka hadügübei fiú kristiánugu lun híderaguniña wéiyaaña mutu ha lídanbaña damuriguaü?

¹⁶ Añahein fiú íbirigu yusu hamuti hadaani luma here lau sun hagundan lun hetenirun lun le hemegeirubei wíbirigu ha derebuguhaña ani adüga hamuti ladüga ínsiñeni le hasandirubei hawagu. Añahein hagía adügatiña aransehani hama amu lílana damuriguaü lun hóunigiruniña. Kei le siñá lubéi heseriwidun íbirigu ha lidan dan dayarüti, gúndaatiña lau híderaguniña hasaanigu íbirigu ha lun hasigirun eseriwida lidan dan dayarüti. Ma lubuidun igaburi le harufudubei! Gama lumoun, furanguti madügün lan le lun hesefurun isaanigu luéi hani buligasion lun hetenirun houn hagübürigu ha wéiyaaña.

17, 18. Ka uagu mosu lubéi hakipurun dandu wéiyaaña mutu kei ha óunigirubaliña aban lubuidun igaburi?

¹⁷ Dandu wéiyaaña mutu kei ha óunigirubaliña gayarati háfaagun lun buidu lan léibugun sun katei. Lahuuduba aban lubuidun igaburi. Anihein dan, adügati aweiyaduni lun maguraasun hamá gürigia luma lun hiru hamá. Ligíati, háfuga mosu lan háfaagun lun inebe hamá ani ru hugíame gurasu houn wéiyaaña mutu. Mégeitiña wíbirigu ha lun wariñagun houn buidu lan hadüga lidan somu katei. Mabulieidun lumuti Heowá le adüga hamaalibei lun heseriwidun lun, ni giñe wagía (aliiha huméi Malakíasi 3:16 luma Ebüréu 6:10).

¹⁸ Gayarati ladügün aban lubuidun igaburi lun magañidun wamá luagu furumiñeguarügü katei le asusereduti (Apur. 3:1, 4). Saragu íbirigu ha derebuguhaña áfaaguatiña lun málugun hamá saragu katei. Gunfuranda hamuti según lan ligaburi hóuserun ítara luba letenirúniwa houn luma habisidahóuniwa. Maweiriduntu wanigi dan le waganbuniña gürigia ariñaga: “Nídiña yebe lun níchugun gurasu lun, ligíarüga íchiga gurasu nun” (Ari. 15:13; 17:22).

19. Kaba íderaguaña nibureintiña hama wéiyaaña mutu lidan lidaani lénrengunga?

¹⁹ Ayumaha wamuti weyu le ñeinba lubéi úaali lanme asufuriruni ani bulíei wamaalime lani figóu efekütu. Lidan awanha lan agurabahei dan ligía, wagía le lubúeingu Heowá, lunti wetenirun lun le lunbei liabin ámuñegü. Subudi wamuti ítara liña lan wafiñen luagu lani Bungiu furamasei kei aban óunguru lidan lidaani idiheri. Seremei afiñeni ligía “mábürühan lubéi warüna. Labu sun agumuchagueina liña lan wágubu murusun murusun; iseridagueina waña múnadagiñe wabiti sagü weyu” (2 Ko. 4:16-18; Ebü. 6:18, 19). Gama lumoun, íbini mosu lan wakipuruni wafiñen luagu lani Bungiu füramasei, kaba íderaguawa lun wagunfulirun lau buligasion lánina hounigirún wéiyaaña mutu? Lidan le aban arütíkulu lakutihóuba fiú adundehani luagu kaba lan wadüga.