1. Ano ang makapasubo nga kahimtangan sang katawhan?

INDI katuyuan ni Jehova nga mag-antos ang mga tawo bangod sa mga epekto sang katigulangon. Sa kabaliskaran, katuyuan niya nga ang mga lalaki kag babayi makatigayon sing himpit nga panglawas sa Paraiso. Pero sa karon, “ang tanan nga tinuga padayon nga nagaugayong sing tingob kag ginasakitan sing tingob.” (Roma 8:22) Ano sa banta mo ang ginbatyag sang Dios sang nakita niya sa mga tawo ang malain nga resulta sang sala? Isa pa, madamo nga tigulang ang napabay-an sa tion nga mas kinahanglan nila ang bulig.—Sal. 39:5; 2 Tim. 3:3.

2. Ngaa ginapabaloran gid sang mga Cristiano ang mga tigulang?

² Nagapasalamat gid ang katawhan ni Jehova nga may mga tigulang sa kongregasyon. Makabenepisyo kita sa ila kaalam kag mapalig-on kita sang ila halimbawa sang pagtuo. Madamo sa aton ang may labot sa isa ukon kapin pa sa sining pinalangga nga mga tigulang. Pero pamilya man naton sila ukon indi, interesado kita sa ila kaayuhan. (Gal. 6:10; 1 Ped. 1:22) Makabenepisyo kita tanan kon usisaon naton ang pagtamod sang Dios sa mga tigulang. Usisaon man naton ang mga responsibilidad sang miembro sang pamilya kag kongregasyon sa aton pinalangga nga mga tigulang.

3, 4. (a) Ano ang talalupangdon nga ginpangabay kay Jehova sang manunulat sang Salmo 71? (b) Ano ang mahimo mapangabay sa Dios sang tigulang nga mga miembro sang kongregasyon?

³ “Dili ako pag-isikway sa tion sang katigulangon; dili ako pagbayai kon magluya ang akon kusug,” ang ginpangabay sa Dios sang manunulat sang Salmo 71:9. Ini nga salmo kasugpon sang Salmo 70, nga may superskripsion nga “Salmo ni David.” Gani mahimo nga si David ang nagsiling sang pangabay nga aton mabasa sa Salmo 71:9. Nag-alagad sia sa Dios halin sang bata asta magtigulang, kag gingamit sia ni Jehova sa talalupangdon nga mga paagi. (1 Sam. 17:33-37, 50; 1 Hari 2:1-3, 10) Bisan pa sini, nagbatyag si David nga kinahanglan niya pangabayon si Jehova nga padayon sia nga kahamut-an.—Basaha ang Salmo 71:17, 18.

⁴ Madamo karon ang pareho kay David. Bisan pa sa ila katigulangon kag “malaut nga mga adlaw,” padayon nila nga ginadayaw ang Dios sa bug-os nila nga masarangan. (Man. 12:1-7) Mahimo nga madamo sa ila ang indi na makasarang sang ila mga nahimo sang una, lakip na ang pagministeryo. Pero makapangabay man sila kay Jehova nga padayon sila nga kahamut-an kag atipanon. Ining matutom nga mga tigulang makasiguro nga sabton sang Dios ang ila mga pangamuyo. Nahibaluan naton ini bangod gintuytuyan sang Dios si David nga ipabutyag niya sa pangamuyo ang amo man sini nga mga kabalaka.

5. Ano ang pagtamod ni Jehova sa mga tigulang?

⁵ Ang Kasulatan maathag nga nagsiling nga ginapabaloran gid ni Jehova ang matutom nga mga tigulang kag ginapaabot niya nga padunggan man sila sang iya mga alagad. (Sal. 22:24-26; Hulu. 16:31; 20:29) “Magtindug ka sa atubangan sang olo nga ubanon, kag tahora ang nawung sang tigulang nga tawo, kag magkahadluk ka sa imo Dios: Ako amo ang GINOO,” siling sang Levitico 19:32. Huo, ang pagpadungog sa mga tigulang sa kongregasyon isa ka serioso nga responsibilidad sang ginsulat ini nga mga pinamulong, kag maaplikar ini asta sa aton karon. Pero, kamusta naman ang pagtatap sa ila? Kay sin-o ini responsibilidad?

6. Ano nga halimbawa ang ginpahamtang ni Jesus parte sa pag-atipan sa ginikanan?

⁶ Ang Pulong sang Dios nagasiling sa aton: “Tahora ang imo amay kag ang imo iloy.” (Ex. 20:12; Efe. 6:2) Ginpadaku ni Jesus ini nga sugo paagi sa pagpakamalaut sa mga Fariseo kag mga escriba nga wala nagaatipan sa ila mga ginikanan. (Mar. 7:5, 10-13) Si Jesus mismo nagpahamtang sing maayo nga halimbawa. Sang malapit na lang sia mapatay sa usok, ginsalig ni Jesus ang iya iloy, nga mahimo balo na, sa iya pinalangga nga disipulo nga si Juan.—Juan 19:26, 27.

7. (a) Ano nga prinsipio ang ginpahamtang ni apostol Pablo parte sa pag-atipan sa mga ginikanan? (b) Ano ang konteksto sang mga ginsiling ni Pablo?

⁷ Si apostol Pablo gingiyahan sang Dios sa pagsulat nga ang mga tumuluo dapat mag-aman sa iya kaugalingon nga panimalay. (Basaha ang 1 Timoteo 5:4, 8, 16.) Binagbinaga ang konteksto sang sulat ni Pablo kay Timoteo. Ginbinagbinag ni Pablo kon sin-o ang mahimo nga kalipikado sa pagbaton sing pinansial nga suporta sang kongregasyon. Direkta sia nga nagsiling nga ang tumuluo nga kabataan, kaapuhan, kag iban pa nga pamilya sang tigulang nga mga balo amo ang panguna nga magaatipan sa ila. Sa amo, indi mapabug-atan sa pinansial ang kongregasyon. Sa karon, ang isa man ka paagi nga mapakita sang mga Cristiano ang “diosnon nga debosyon” amo ang pag-aman sa materyal nga kinahanglanon sang ila imol nga mga miembro sang pamilya.

8. Ngaa wala nagahatag ang Biblia sing espesipiko nga mga instruksion parte sa pag-atipan sa tigulang nga mga ginikanan?

⁸ Buot silingon, ang hamtong nga mga kabataan nga Cristiano may obligasyon sa pag-aman sang materyal nga mga kinahanglanon sang ila mga ginikanan. Ginpatuhuyan  ni Pablo ang tumuluo nga mga paryente, pero ang mga ginikanan nga indi miembro sang kongregasyon indi man dapat pagpabay-an. Lainlain ang paagi sang mga kabataan sa pag-atipan. Indi man pareho ang ila sitwasyon. Lainlain man ang mga kinahanglanon, batasan, kag kapagros sang kada isa. Ang pila ka tigulang madamo sing kabataan; ang iban isa lang. Ang pila ginabuligan sang gobierno, ang iban wala. Lainlain man ang gusto sang mga ginaatipan. Gani indi maalamon ukon mahigugmaon kon pakanubuon ang pagtinguha sang isa sa pag-atipan sa tigulang nga mga miembro sang pamilya. Pero, pakamaayuhon ni Jehova ang bisan ano nga desisyon base sa Kasulatan kag nagabulig sia nga mangin madinalag-on ini, subong sang ginhimo niya sugod sang panahon ni Moises.—Num. 11:23.

9-11. (a) Ano ang mabudlay nga mga kahimtangan nga mahimo maatubang sang pila? (Tan-awa ang piktyur sa umpisa sini nga artikulo.) (b) Ngaa indi dapat magpadasudaso ang hamtong nga mga kabataan nga mag-untat sa pag-alagad sing bug-os tion? Maghatag sing halimbawa.

⁹ Kon malayo ang ginaistaran sang mga kabataan sa ila ginikanan, mahimo nga indi mahapos ang pag-atipan sa ila. Ang hinali nga pagluya sang mga ginikanan, ayhan bangod natumba sila, nabalian, ukon iban pa nga aksidente, mahimo nga amo ang mga rason para kadtuan gilayon si Tatay kag si Nanay mo. Pagkatapos sini, mahimo kinahanglan nila ang temporaryo ukon padayon nga bulig. *

¹⁰ Ang bug-os tion nga mga alagad nga malayo sa ila puluy-an bangod sang ila teokratiko nga mga asaynment, mahimo makaatubang sing mabudlay nga mga desisyon. Ginatamod sang mga Bethelite, misyonero, kag mga nagalakbay nga manugtatap nga hamili ang ila asaynment, nga subong pagpakamaayo ni Jehova. Pero kon magmasakit ang ila mga ginikanan, ang ila una nga reaksion mahimo nga, ‘Mauntat kita sa aton asaynment kag mapauli para atipanon ang aton mga ginikanan.’ Apang mas maayo nga mangamuyo anay kag binagbinagon sing maayo kon bala amo gid sina ang kinahanglan ukon gusto sang mga ginikanan. Indi dapat magpadasudaso nga mag-untat sa mga pribilehiyo, kag mahimo nga indi na ini kinahanglan. Ang balatian bala indi gid man malubha, nga ayhan ang pila ka miembro sang kongregasyon malipay man sa pagbulig?—Hulu. 21:5.

¹¹ Halimbawa, binagbinaga ang kahimtangan sang mag-utod nga lalaki nga nagaalagad sa malayo nga lugar. Ang isa misyonero sa Bagatnan nga Amerika, kag ang isa nagaboluntaryo sa ulong talatapan sa Brooklyn, New York. Ang ila tigulang nga mga ginikanan kinahanglan atipanon. Ginbisitahan sang mag-utod upod sa ila mga asawa ang ila mga ginikanan para mahibaluan kon ano ang pinakamaayo nga bulig nga mahatag nila kag kon paano ini iaman. Sang ulihi, ang mag-asawa sa Bagatnan nga Amerika nagpamensar nga mauntat sa ila pribilehiyo kag magpauli. Pero gintawgan sila sang koordenitor sang hubon sang mga gulang sa kongregasyon sang ila mga ginikanan. Ginbinagbinag sang mga gulang sa kongregasyon ang kahimtangan kag gusto nila nga magpadayon ang mga misyonero sa ila asaynment tubtob posible. Ginaapresyar sang mga gulang ang pag-alagad sini nga mag-asawa kag determinado sila nga himuon ang tanan para mabuligan ang ila mga ginikanan. Nagapasalamat gid ang bilog nga pamilya sa sining mahigugmaon nga bulig.

12. Ano ang dapat pat-uron sang Cristianong pamilya parte sa ila desisyon sa pag-atipan sa ila mga ginikanan?

¹² Ano man ang pamaagi nga himuon sang isa ka Cristianong pamilya para maatipan ang tigulang nga mga ginikanan, pat-od nga gusto gid sang tanan nga masiguro nga makahatag ini sing kadayawan sa ngalan sang Dios. Indi naton luyag mangin kaangay sa mga lider sang relihion sang adlaw ni Jesus. (Mat. 15:3-6) Gusto naton nga ang aton mga desisyon makapadungog sa Dios kag sa kongregasyon.—2 Cor. 6:3.

13, 14. Ngaa makahinakop kita base sa Kasulatan nga interesado ang kongregasyon sa pag-atipan sa mga tigulang nga miembro sini?

¹³ Indi tanan makabulig sa bug-os tion nga mga ministro pareho sang ginsambit kaina. Pero base sa natabo sang unang siglo, interesado ang mga kongregasyon sa pag-atipan sa mga kinahanglanon sang huwaran nga mga tigulang nga kauturan. Suno sa Biblia, ‘wala sing isa nga nakulangan’ sa kongregasyon sa Jerusalem. Wala ini nagapahangop nga manggaranon sila tanan. Ang pila imol man, pero ang kada isa ‘ginpanagtagan suno sa iya kinahanglan.’ (Binu. 4:34, 35) Pero sang ulihi, may problema nga natabo sa sina nga kongregasyon. Suno sa report, may pila ka balo nga babayi nga ‘napabay-an sa adlaw-adlaw nga pagpanagtag sing pagkaon.’ Gani ang mga apostoles nagtangdo sing kalipikado nga mga lalaki, nga amo ang naghimo sing mga kahimusan para masiguro nga mahatag sing nagakaigo kag bastante ang mga kinahanglanon sang mga balo. (Binu. 6:1-5) Matuod, temporaryo lang nga kahimusan ang pagpanagtag adlaw-adlaw sang mga kinahanglanon sang mga nangin Cristiano sang Pentecostes 33 C.E., nga nagpabilin sing makadali sa Jerusalem para mapabakod sa espirituwal. Bisan pa sini, ang ginhimo sang mga apostoles nagapakita nga makabulig ang kongregasyon sa nagakinahanglan nga mga miembro sini.

¹⁴ Subong sang nasambit, si Pablo naghatag sing mga instruksion kay Timoteo kon san-o nagakaigo buligan sa materyal sang kongregasyon ang Cristiano nga mga balo. (1 Tim. 5:3-16) Ang manunulat sang Biblia nga si Santiago nagsiling man nga obligasyon sang mga Cristiano nga atipanon ang mga ilo, balo, kag iban pa nga yara sa kapipit-an ukon nagakinahanglan sing bulig. (Sant. 1:27; 2:15-17) Si apostol Juan nagsiling man: “Ang bisan sin-o nga may palangabuhian sining kalibutan kag nakita niya ang iya utod nga nagakinahanglan apang ginasira niya ang ganhaan sang iya mapinalanggaon nga kaawa sa iya utod, paano naton masiling nga may gugma sia sa Dios?” (1 Juan 3:17) Kon obligasyon ini sang kada Cristiano, indi bala nga may amo man sina nga obligasyon ang mga kongregasyon?

15. Ano ang mahimo nalakip sa pagbulig sa tigulang nga mga kauturan?

¹⁵ Sa pila ka pungsod, ang gobierno mahimo nagabulig sa mga tigulang paagi sa pension kag mga programa para maatipan sila. (Roma 13:6) Sa iban nga lugar, wala sing amo sini nga mga serbisyo. Gani ang bulig nga mahatag sang mga paryente kag kongregasyon sa tigulang nga mga kauturan nagadepende sa mga kahimtangan. Kon ang tumuluo nga kabataan nagaistar malayo sa ila mga  ginikanan, mahimo nga makaapektar ini sa ila mahatag nga bulig. Ang mga kabataan kinahanglan pirme makigkomunikar sa mga gulang sa kongregasyon sang ila mga ginikanan para masiguro nga mahangpan sang tanan ang kahimtangan sang pamilya. Halimbawa, mahimo buligan sang mga gulang ang mga ginikanan para mahibaluan ang mga benepisyo nga ginahatag sang gobierno sa ila lugar. Mahimo man nila masugid ang mga butang nga kinahanglan mahibaluan sang mga kabataan, subong sang importante nga mga sulat nga wala pa mabuksan ukon mga bulong nga wala matomar sang mga ginikanan. Paagi sa sini, mahimo malikawan ang paglala sang kahimtangan kag makakita sing praktikal nga mga solusyon. Maathag nga kon may handa nga magbulig ukon magpalab-ot sing impormasyon sa mga miembro sang pamilya nga nagaistar sa malayo, mahimo magpahaganhagan ini sa kabalaka sang pamilya.

16. Paano ginabuligan sang pila ka Cristiano ang mga tigulang nga miembro sang kongregasyon?

¹⁶ Bangod palangga nila ang mga tigulang, ang pila ka Cristiano nagahatag sang ila tion kag kusog para makabulig suno sa ila masarangan. Ginapat-od nila nga makapakita sila sing pag-ulikid sa mga tigulang nga miembro sang kongregasyon. Ang pila sa kongregasyon nagabuligay kag nagabulosbulos sa pag-atipan sa ila. Bisan pa indi sila makasulod sa bug-os tion nga ministeryo bangod sang ila kahimtangan, nalipay sila sa pagbulig sa mga kabataan sang mga tigulang para makapabilin sila sa bug-os tion nga pag-alagad tubtob posible. Maayo gid ini nga panimuot sang mga kauturan! Siempre pa, ang ila pagkamabinuligon wala nagapahangop nga hilway na ang mga kabataan sa ila responsibilidad sa ila mga ginikanan.

17, 18. Ano ang mahimo sang positibo nga panimuot parte sa pag-atipan sa mga tigulang?

¹⁷ Ang mga tigulang kag ang mga nagaatipan sa ila mahimo nga indi mabudlayan kon huptan nila ang positibo nga panimuot. Kon kaisa, ang pagtigulang nagaresulta sa pagluya sing buot, kag depresyon pa gani. Gani dapat mo gid panikasugan nga padunggan kag palig-unon ang tigulang nga mga utod paagi sa makapalig-on nga pag-istoryahanay. Dalayawon gid ini nga mga utod bangod sa ila matutom nga rekord sang pag-alagad. Indi gid malipatan ni Jehova ang ila nahimo sa pag-alagad sa iya, kag indi man naton ini malipatan.—Basaha ang Malaquias 3:16; Hebreo 6:10.

¹⁸ Isa pa, mangin mahapos ang mga kahimusan adlaw-adlaw kon ang tigulang kag ang mga nagaatipan sa ila maglahog man sa nagakaigo nga mga tion. (Man. 3:1, 4) Indi gusto sang madamo nga tigulang ang sobra nga atension sa ila. Nahibaluan man nila nga mahimo mas madamo ang magaatipan sa ila kag magabisita kon mabuot sila. Kinaandan na nga amo sini ang komento sang mga nagabisita, “Nagbisita ako para palig-unon ang isa ka tigulang, pero daw ako pa ang napalig-on.”—Hulu. 15:13; 17:22.

19. Ano ang paglaum sang mga pamatan-on kag mga tigulang?

¹⁹ Gusto gid naton nga mag-abot na ang tion nga wala na ang pag-antos kag ang mga epekto sang pagkadihimpit. Samtang wala pa ina, dapat isentro sang mga alagad sang Dios ang ila paglaum sa mga butang nga wala sing katapusan. Nahibaluan naton nga ang pagtuo sa mga saad sang Dios isa ka angkla sa tion sang kabudlayan ukon kapipit-an. Bangod sina nga pagtuo, ‘wala kita nagapangampo, apang bisan ang aton lawas nagaluya, pat-od gid nga ang aton pagkatawo sa sulod ginabag-o adlaw-adlaw.’ (2 Cor. 4:16-18; Heb. 6:18, 19) Apang, luwas sa mabakod nga pagtuo sa mga saad sang Dios, ano ang makabulig sa imo para maabaga ang mga responsibilidad sa pag-atipan sa mga tigulang? Binagbinagon sa masunod nga artikulo ang pila ka praktikal nga panugda.