1. Hari taunimanima be dahaka hekwakwanai idia davaria noho?

 IEHOVA ia ura lasi taunimanima do idia hisihisi, manoka bona idia buruka. To, iena ura be taunimanima be do idia gorere lasi bona Paradaiso ai mauri namona do idia noholaia. To hari, taunimanima “ibounai be idia taitai bona idia hisihisi hebou noho.” (Roma 8:22) Oi laloa Dirava ena hemami be edena bamona, bema ia itaia taunimanima be kara dika dainai idia hisihisi? Hari ita itaia buruka taudia momo be heduru idia ura, to taunimanima ese idia durudia lasi.—Sal. 39:5; 2 Tim. 3:3.

2. Dahaka dainai ita moale badina kongrigeisen lalonai buruka taudia idia noho?

² Iehova ena taunimanima idia moale badina kongrigeisen lalonai buruka taudia idia noho. Edia aonega herevadia amo heduru ita abia bona edia abidadama ese ita ia hagoadaia. Reana unai buruka taudia haida be iseda varavara. To, gau badana be idia ita naria, herevana idia be iseda varavara o lasi. (Gal. 6:10; 1 Pet. 1:22) Dirava ena lalohadai buruka taudia dekenai ita dibaia neganai, lalohadai maorona do ita abia. Danu, inai stadi lalonai famili bona kongrigeisen taudia ese buruka taudia idia naria ena maduna do ita herevalaia.

3, 4. (a) Salamo karoa 71 ia torea tauna be Iehova amo dahaka ia noia? (b) Buruka taudia be Dirava amo dahaka idia noia diba?

³ Salamo 71:9 ia gwau: “Lauegu buruka dinadia neganai lau do oi rakatania lasi. Egu goada be ia ore lao neganai, lau  dekena amo do oi siri lasi.” Reana Davida ese unai hereva ia torea. Iena mauri ibounai lalonai Dirava ia hesiai henia, bona Iehova ese ia gaukaralaia kara badadia ia karaia totona. (1 Sam. 17:33-37, 50; 1 Kin. 2:1-3, 10) Ena be Davida be Iehova ena gaukara momo ia karaia, to ia buruka neganai Iehova ia noia ia do ia naria totona.—Salamo 71:17, 18 duahia.

⁴ Hari inai negai, momo be Davida bamona. Ena be idia buruka idia lao bona “nega dika dinadia” idia davaria, to idia hekwarahi Dirava idia hanamoa totona. (Had. 12:1-7) Hari, idia be gau momo hegeregere, haroro gaukara idia karaia momo lasi, guna idia karaia bamona. To, Iehova idia noia diba idia Ia hanamoa bona naria noho totona. Namona be idia abia dae momokani Iehova ese edia guriguri do ia haerelaia. Unai ita diba badina Iehova ese Davida ia hasiahua unai bamona guriguri ia torea totona.

5. Iehova ese ia idia abidadama henia buruka taudia be edena bamona ia lalodia?

⁵ Iehova be ia idia abidadama henia buruka taudia ia laloa bada bona ia ura ena hesiai taudia ese idia do idia matauraia. (Sal. 22:24-26; Aon. 16:31; 20:29) Levitiko 19:32 ia gwau: “Tau buruka edia vairanai do umui toreisi, bona buruka taudia ibounai do umui matauraia. Umui emui Dirava garina do umui gari. Lau inai Lohiabada.” Oibe, idaunegai amo ema bona hari, kongrigeisen lalonai buruka taudia matauraidia karana be mai anina bada. To buruka taudia naria gaukarana be daika ena maduna?

6. Edena dala ai Iesu be ena sinana naria karana ia laloa bada?

⁶ Baibel ia gwau: “Emu tamana bona emu sinana oi matauraia.” (Eso. 20:12; Efe. 6:2) Iesu ese ia hahedinaraia unai oda herevana be mai anina bada. Hegeregere, ia ese Farisea bona taravatu hadibaia taudia ia gwau henidia badina idia ese edia tama sina idia naridia lasi. (Mar. 7:5, 10-13) Iesu be haheitalai namona. Hegeregere, kahirakahira hisihisi auna ai do ia mase neganai, ia ese ena sinana naria ena maduna be Ioane ia henia. Reana unai negai, ena sinana be vabu.—Ioa. 19:26, 27.

7. (a) Paulo ese tama sina naria karana dekenai edena hakaua herevana ia gwauraia? (b) Paulo ese dahaka gau ma haida ia herevalaia danu?

⁷ Paulo ese Timoteo dekenai ia torea revarevana lalonai ia hahedinaraia, Keristani tauna ese iena ruma bese taudia ia naridia be namo. (1 Timoteo 5:4, 8, 16 duahia.) Mani Paulo ena hereva ma haida ita laloa. Ia ese ia hahedinaraia daidia be kongrigeisen amo heduru monina idia abia diba bona daidia be lasi. Ia gwau bema vabu burukana ta be mai ena natudia, tubudia bona varavara, gau badana be idia ese moni dalanai unai vabu do idia naria. Unai amo kongrigeisen idia hametaua kava lasi. Unai hegeregerena, hari Keristani taudia ese “Dirava badinaia karana idia hahedinaraia” dalana ta be, tauanina dalanai edia varavara idia naria.

8. Dahaka dainai Baibel ese tama sina burukadia naria daladia ta ta ia henia lasi?

⁸ Keristani natudia ese tauanina dalanai edia tama sina idia naria be namo. Ena be Paulo be “abidadama” varavara naria karana ia herevalaia, to natudia ese edia abidadama lasi tama sina idia naria danu be namo. Namona be famili ta ta be edia noho dalana hegeregerena abia hidi idia karaia, edena dala ai edia tama sina idia naria totona. Buruka taudia ta ta edia helt, ura gaudia bona  kara be idauidau. Idia haida edia natudia be momo, to haida edia be tamona sibona. Haida be gavamani amo heduru idia abia, to haida be lasi. Unai dainai namo lasi tadikaka ta ese ena tama sina burukadia ia ura naria dalana ita gwauraia dika. Badina Baibel ena taravatu hegeregerena abia hidi ia karaia tauna, be Iehova ese do ia hanamoa, Mose ena negai ia karaia bamona.

9-11. (a) Haida be dahaka hekwakwanai idia davaria? (Laulau ginigunana itaia.) (b) Dahaka dainai natudia ese edia ful-taim hesiai gaukara idia rakatania haraga lasi be namo? Haheitalai ta gwauraia.

⁹ Bema natudia edia noho gabuna be edia tama sina burukadia amo ia daudau, reana do ia auka edia tama sina idia durua totona. Hegeregere, bema tama sina burukadia be idia moru bena edia turia ta ia makohia, o hekwakwanai ta idia davaria, edia natudia be do idia vadivadi. Unai murinai, reana natudia be do idia noho sisina daudau, unai amo edia tama sina burukadia idia naria bona durua diba. a

¹⁰ Gabu daudau ai ful-taim hesiai gaukara idia karaia tadikaka taihu be abia hidi badana do idia karaia. Betele taudia, misinari, bona loaloa naria taudia be edia hesiai gaukara idia laloa bada, badina unai be Iehova amo ia mai hahenamo. To, edia tama sina idia gorere neganai, momo ese idia abia lalohadai be inai: ‘Namona be ful-taim hesiai gaukara ita rakatania bona ita giroa lou eda tama sina ita naria totona.’ To, aonega karana be unai idia gurigurilaia bona edia tama sina edia ura idia laloa namonamo. Namo lasi karaharaga edia hesiai gaukara idia rakatania, badina reana heduru daladia ma haida idia noho. Reana tama sina edia gorere be maragi dainai, edia kongrigeisen ena pablisa haida be heduru idia henia diba, a?—Aon. 21:5.

¹¹ Hegeregere, mani gabu daudau ai hesiai gaukara idia karaia tadikaka rua edia haheitalai oi laloa. Ta be South America ai misinari gaukara ia karaia, bona ena kakana be eda hedikwota Brooklyn, New York ai ia gaukara. Edia tama sina burukadia be heduru idia ura abia neganai, unai tadikaka rua bona adavadia be idia giroa lou edia tama sina idia itaia totona. Misinari tadikaka bona adavana be idia laloa edia gaukara do idia rakatania bona tama sina idia naria. Unai negai, edia tama sina edia kongrigeisen elda ta ese idia ia rini henia. Unai elda taudia be unai idia herevalaia, bona idia ura lasi tadikaka ese misinari gaukara do ia rakatania. Unai elda taudia be tadikaka bona adavana edia hesiai gaukara idia laloa bada dainai, idia gwau tadikaka ena tama sina idia naria. Unai famili ese elda taudia edia lalokau karana idia laloa bada!

12. Keristani famili ese tama sina naria totona abia hidi idia karaia neganai, dahaka idia laloatao be namo?

¹² Ena be Keristani famili ese tama sina burukadia durua totona abia hidi haida idia karaia diba, to namona be idia karaia abia hidi ese Iehova ena ladana do ia hanamoa. Ita ura lasi Iesu ena negai idia noho tomadiho gunalaia taudia edia kara ita tohotohoa. (Mat. 15:3-6) Ita ura ita karaia abia hidi ese Iehova bona kongrigeisen do ia hanamoa.—2 Kor. 6:3.

13, 14. Edena dala ai Baibel ese ia hahedinaraia, kongrigeisen ese buruka taudia idia durua diba?

¹³ Ita haida be hegeregere lasi ful-taim  hesiai taudia ita durua totona, paragraf 11 ai ita herevalaia kongrigeisen bamona. To aposetolo edia negai ia vara gauna ta ese ia hahedinaraia, kongrigeisen be abidadama tadikaka taihu burukadia idia naridia diba. Ena be Baibel ia gwau Ierusalema kongrigeisen ai “ta ia dabu lasi,” to haida be taga taudia lasi. Badina aposetolo taudia ese idia abia “moni be idia dabu taudia ta ta dekenai idia haria.” (Kara 4:34, 35) Gabeai, hepapahuahu ta ia vara, badina haida be ‘dina ibounai aniani idia haria neganai, vabu haida idia laloa lasi.’ Unai dainai, aposetolo taudia ese tatau haida idia abia hidi aniani idia haria totona, unai amo vabu ibounai ese aniani idia abia diba. (Kara 6:1-5) Unai dala ese idau tano amo idia mai taudia ia durua danu—Pentekoste 33 C.E. ai, idia be bapatiso idia abia, bena diba ma haida abia totona Ierusalema ai idia noho. Momokani, unai aniani haria gaukarana be nega kwadogi lalonai do idia karaia gauna, to aposetolo taudia edia disisen ese ia hahedinaraia, kongrigeisen ese idia dabu taudia idia durua diba.

¹⁴ Paulo ese Timoteo ia hadibaia, edena bamona negadiai kongrigeisen ese tauanina dalanai Keristani vabu ia durua diba. (1 Tim. 5:3-16) Iamesi danu ia gwau, Keristani taudia ese tamana bona sinana lasi natudia, vabu bona ma haida be edia dabu o hisihisi lalonai do idia naria. (Iam. 1:27; 2:15-17) Aposetolo Ioane danu ia gwau: “Bema tau ta be mai ena tanobada kohudia, bona ia itaia ena tadikaka be ia dabu, to ia hebogahisi henia lasi, Dirava ena lalokau be edena bamona ia lalonai ia noho diba?” (1 Ioa. 3:17) Unai dainai, ita ta ta bona kongrigeisen eda maduna be, dabu taudia ita durua be namo.

15. Burukadia be edena dala idauidau ai ita durudia diba?

¹⁵ Tano haida ai gavamani ese burukadia durua totona, pensen monina idia henia bona dala ma haida ai heduru idia henia. (Roma 13:6) To, tano ma haida ai unai bamona heduru daladia idia noho lasi. Unai dainai, varavara bona kongrigeisen taudia be edia noho dalana hegeregerena heduru idia henia diba. Bema Keristani natu ta be gabu daudauna ai ia noho, reana ena tama sina durua dalana be do ia auka. Namona be unai natuna be tama sina edia kongrigeisen elda taudia ida idia herevahereva,  unai amo idia ibounai ese famili ena noho dalana do idia lalopararalaia. Hegeregere, reana elda taudia ese tama sina idia durua bona idia tahua gavamani ese dahaka heduru idia henia diba. Danu, bema elda idia itaia tama sina be mai anina bada revareva haida idia do duahia lasi o edia muramura idia do inua lasi, vadaeni idia ese unai natuna idia hadibaia diba. Bema natuna bona elda taudia be idia herevahereva namonamo, reana heduru maorodia do idia davaria. Oibe, ena be natuna be gabu daudau ai ia noho, to bema iena tama sina be kongrigeisen tauna ta ese ia naria bona durua, unai natuna do ia lalohekwarahi lasi.

16. Edena dala ai Keristani taudia haida ese kongrigeisen buruka taudia idia durua?

¹⁶ Keristani taudia haida be buruka taudia idia lalokau henia dainai, edia nega bona goada idia gaukaralaia heduru idia henia totona. Idia ese unai buruka taudia be edia famili korikorina bamona idia kara henia. Pablisa ta ta ese nega idauidau ai buruka taudia idia durua diba. Ena be idia haida be ful-taim hesiai taudia lasi, to mai moale ida buruka taudia idia naria, unai amo burukadia edia natudia be ful-taim hesiai gaukara idia karaia noho diba. Unai bamona pablisa be haheitalai namona! Ena be idia ese heduru idia henia diba, to burukadia edia natudia dekenai maduna ia noho edia tama sina idia naria totona.

17, 18. Buruka taudia naria karana dekenai dahaka be mai anina bada?

¹⁷ Burukadia bona naria taudia edia huanai hekwakwanai do idia vara momo lasi bema lalohadai maorona idia abia. Nega haida idia buruka idia lao taudia be idia moale lasi bona lalometau. Unai dainai, idia oi matauraia bona idia dekenai hagoadaia hereva namodia oi gwauraia. Idia haida be Iehova idia badinaia noho dainai, ita hanamodia be namo. Bema Iehova ese edia hesiai gaukara ia laloaboio lasi, vadaeni ita danu ese unai bamona ita karaia be namo.—Malaki 3:16; Heberu 6:10 duahia.

¹⁸ Bema burukadia bona naria taudia huanai kiri, hevaseha o moale ia vara, dina ta ta ena gaukara be do idia heau namonamo. (Had. 3:1, 4) Buruka taudia momo be edia natudia idia doria lasi idia totona gau momo idia karaia. Idia diba bema kara namodia idia hahedinaraia, momo ese do idia vadivadi henia bona durua. Nega haida buruka taudia idia vadivadi henia taudia idia gwau, “Lau be buruka tauna hagoadaia totona lau lao, to ia ese lau ia hagoadaia.”—Aon. 15:13; 17:22.

19. Dahaka ese matamata bona buruka taudia ia durua diba, nega aukadia lalonai idia haheauka totona?

¹⁹ Ita be hisihisi bona kara dika edia ore negana ita naria noho. To ita naria lalonai, namona be mauri hanaihanai helarona ita dogoatao auka. Iseda abidadama Dirava ena gwauhamata dekenai ese nega aukadia ai ita ia hagoadaia diba. Unai abidadama dainai, ‘ita hesiku lasi, ena be iseda tauanina be idia dika idia lao noho, to iseda kudouna be dina ibounai goada matamata idia abia.’ (2 Kor. 4:16-18; Heb. 6:18, 19) Dahaka ese burukadia idia naria taudia do ia durua edia maduna idia huaia namonamo totona? Stadi gabena ese unai dala haida do ia herevalaia.