1. Dan ki sitiasion bien tris bann dimounn ete zordi?

 JÉHOVAH zame ti ena lintansion pou fer bann dimounn soufer akoz bann konsekans lavieyes. Okontrer, Li ti anvi ki bann zom ek bann fam ena enn lasante parfe dan Paradi. Me zordi, “kreasion antie pe kontign plegne ansam ek [pe] soufer.” (Rom. 8:22) Kouma eski ou panse Bondie santi Li kan Li trouve kouma bann dimounn pe soufer akoz pese? Anplis, li bien tris pou trouve ki boukou dimounn aze santi zot neglize dan enn moman dan zot lavi kot zot plis bizin led.​—Ps. 39:5; 2 Tim. 3:3.

2. Kifer bann Kretien bien kontan ki ena bann dimounn aze dan zot kongregasion?

² Bann serviter Jéhovah bien kontan ki ena bann dimounn aze dan zot kongregasion. Nou profit zot sazes ek nou anvi imit zot lafwa. Boukou parmi nou, nou fami ar enn ouswa plizir sa bann Kretien aze-la. Pourtan, ki nou fami ar sa bann frer ek ser aze la ouswa non, nou interese ar zot bien-et. (Gal. 6:10; 1 Pierre 1:22) Nou tou nou pou gagn bann bienfe kan nou pou examinn fason ki Bondie konsider bann dimounn aze. Nou pou examinn osi responsabilite ki lafami ek kongregasion ena pou pran swin bann Kretien aze ki nou bien kontan.

3, 4. (a) Ki siplikasion sinser ekrivin Psaume 71 ti fer ar Jéhovah? (b) Ki bann Kretien aze dan kongregasion kapav demann Bondie?

³ Ekrivin Psaume 71:9 ti fer sa siplikasion-la: “Pa rezet mwa dan mo vieyes; pa abandonn mwa kan mo lafors pe diminie.” Sa psaume-la trouv zis apre Psaume 70 kot ena enn not lao ki dir “Ekrir par David.” Alor, li paret ki se David ki finn ekrir Psaume 71:9. Li ti servi Bondie depi ki li ti zenn ziska ki li’nn vinn vie, ek Jéhovah ti servi li pou fer bann kitsoz extraordiner. (1 Sam. 17:33-37, 50; 1 Rois 2:1-3, 10) Mem sa, David ti santi ki li ti bizin demann Jéhovah kontign pran li swin.​—Lir Psaume 71:17, 18.

⁴ Zordi, boukou Kretien parey kouma David. Mem si zot aze ek zot bizin fer fas ar “bann zour difisil,” zot kontign fer tou seki zot kapav pou loue Bondie. (Eccl. 12:1-7) Kitfwa boukou parmi zot nepli kapav fer parey kouma avan dan plizir domenn dan zot lavi, parmi ena zot minister. Me, zot osi zot kapav sipliy Jéhovah pou kontign beni zot ek pran zot swin. Sa bann Kretien fidel la kapav sir ki Bondie pou reponn zot lapriyer. Apre tou, dan zot lapriyer zot mansionn mem kitsoz ki David ti mansione ek ki Jéhovah ti inspir li pou ekrir.

5. Kouma Jéhovah konsider bann Kretien aze ki fidel?

⁵ Jéhovah akord boukou valer ar bann Kretien fidel ki aze ek Li atann ki so bann serviter donn zot loner. (Ps. 22:24-26; Prov. 16:31; 20:29) Lévitique 19:32 dir: “Devan bann seve blan, to bizin leve, ek to bizin donn loner enn dimounn aze, ek to bizin ena lakrint pou to Bondie. Momem Jéhovah.” Wi, kan ti ekrir sa bann parol-la, li ti bien inportan pou donn loner bann dimounn aze, ek zordi osi li parey. Me zordi, ki sa vedir pran swin bann dimounn aze? Kisannla ki ena sa responsabilite-la?

6. Ki lexanp Jésus inn les nou kan li ti demann Jean pran swin so mama?

⁶ Parol Bondie dir nou: “Onor to papa ek to mama.” (Ex. 20:12; Éph. 6:2) Jésus ti montre ki sa komannman-la ti bien inportan kan li ti kondann bann Farizien ek bann skrib ki ti refiz pran swin zot bann paran. (Marc 7:5, 10-13) Jésus limem ti les enn bon lexanp. Kan li ti pre pou mor lor poto soufrans, li ti demann Jean, so disip ki li ti bien kontan, pou pran swin so mama ki kitfwa ti enn vev sa lepok-la.​—Jean 19:26, 27.

7. (a) Ki prinsip lapot Paul ti done an rapor avek bann fami? (b) Lor ki kitsoz Paul ti osi koze?

⁷ Dan let ki lapot Paul ti ekrir Timothée, li ti dir ki bann Kretien bizin pran kont zot fami. (Lir 1 Timothée 5:4, 8, 16.) Anou gete dan ki sitiasion Paul ti ekrir sa bann parol-la. Paul ti dir kisannla ki ti kapav gagn enn led finansie ar kongregasion. Li ti montre dan enn fason bien kler ki se avan tou bann zanfan, bann tizanfan, ek lezot manb lafami ki dan laverite, ki ti bizin pran swin bann vev ki ti aze. Dan sa fason-la, kongregasion pa ti pou bizin fer bann depans anplis. Zordi osi parey, enn fason ki bann Kretien montre ki zot ena “latasman anver Bondie” se kan zot donn zot fami seki zot bizin lor plan materyel.

8. Kifer Labib pa donn bann instriksion presi lor fason ki bizin pran swin bann paran aze?

⁸ Bann Kretien ki adilt ena responsabilite pou pran swin zot paran lor plan materyel. Paul ti koz lor led ki bann fami ki dan laverite ti bizin gagne, selman, bann Kretien bizin pran swin osi zot bann paran ki pa dan laverite. Ena  diferan fason ki bann zanfan kapav pran swin zot bann paran. Tou sitiasion pa parey. Tou dimounn pena mem personalite, mem bezwin, ek mem lasante. Sertin dimounn aze ena boukou zanfan; lezot ena zis enn sel zanfan. Sertin kapav kont lor led ki gouvernman done, lezot non. Anplis, sak dimounn ki bizin led ena so preferans personel. Alor, li pa pou bon ouswa nou pa pou montre ki nou ena lamour si nou kritik fason ki enn kikenn pe pran swin so bann fami ki aze. Apre tou, Jéhovah kapav beni ninport ki desizion ki baze lor Labib ek fer sa reisi, parey kouma Li’nn fer depi lepok Moïse.​—Nomb. 11:23.

9-11. (a) Ar ki sitiasion difisil kitfwa sertin bizin fer fas? (Get zimaz dan koumansman lartik.) (b) Kifer fode pa ki bann zanfan prese pou aret zot servis aplintan? Explike.

⁹ Kan bann zanfan viv lwin ar zot paran, kitfwa sa kapav difisil pou sa bann zanfan-la pou pran swin zot paran aze. Enn sel kout, lasante enn paran kapav deteryore kitfwa parski li’nn tonbe, so lezo inn kase ouswa akoz lezot problem grav. Lerla bann zanfan bizin degaze al get zot paran. Apre, kitfwa bann paran-la pou bizin led pou enn sertin tan ouswa pou enn long peryod. a

¹⁰ Bann serviter aplintan ki servi dan bann landrwa ki lwin ar zot paran, kitfwa bizin pran bann desizion bien difisil. Bann Betelit, bann misioner, ek bann sirveyan, zot tou zot konsider zot servis kouma enn benediksion Jéhovah. Kanmem, si zot paran koumans malad, kitfwa zot pou ena sa premie reaksion-la: ‘Nou bizin kit nou servis ek retourn lakaz pou okip nou bann paran.’ Pourtan, li pou bon ki zot priye ek reflesi lor seki zot paran vremem bizin ouswa anvi. Fode pa ki enn kikenn prese pou aret so servis, ek kitfwa li pa touletan neseser pou fer sa. Eski se enn problem lasante ki tanporer? Eski sertin dan kongregasion sa bann paran aze-la ti pou kontan ede ek permet ki bann zanfan kontign zot servis?​—Prov. 21:5.

¹¹ Anou get lexanp de prop frer ki dan servis aplintan bien lwin ar zot paran. Enn ladan ti misioner an Amérique du Sud ek lot frer-la ti servi dan Biro Mondial, dan Brooklyn, New York. Zot paran aze ti bizin led. Alor, bann garson-la ek zot madam ti al Japon pou gete kouma kapav ed zot paran. Sa koup ki ti misioner an Amérique du Sud-la ti pe pans pou aret zot servis pou pran swin zot paran. Lerla, kordinater kolez ansien dan kongregasion zot paran ti telefonn zot. Sa bann ansien-la ti koz lor zot sitiasion ek zot ti anvi ki sa koup-la kontign zot servis misioner pli lontan ki posib. Zot ti bien apresie tou seki sa koup-la ti pe fer dan zot servis. Alor, zot ti deside pou fer tou seki zot ti kapav pou ed sa koup-la pran swin zot paran. Zot tou dan lafami ti bien apresie led ki sa bann ansien-la ti done avek amour.

12. Kan enn fami deside kouma pou pran swin bann paran aze, ki zot bizin fer sir?

¹² Ninport ki desizion enn fami pran pou okip bann paran aze, tou bann manb lafami bizin fer sir ki zot desizion donn loner nom Bondie. Fode zame nou resanble bann sef relizie dan lepok Jésus. (Mat. 15:3-6) Nou anvi ki nou bann desizion donn loner Bondie ek kongregasion.​—2 Cor. 6:3.

13, 14. Kouma Labib montre ki bann kongregasion bizin pran swin bann Kretien aze?

¹³ Pa tou Kretien ki kapav ed bann serviter aplintan kouma sa kongregasion  ki nou ti fek mansione-la. Me enn sitiasion ki ti arive dan premie siek montre bien ki bann kongregasion bizin fer tou seki zot kapav pou pran swin bann frer ek ser aze ki fidel. Labib dir ki dan kongregasion Jérusalem “pa ti ena personn ki ti mank kitsoz parmi zot.” Sa pa vedir ki zot tou ti ris. Li paret ki sertin pa ti ena boukou lor plan materyel, me “ti fer enn distribision ek sakenn parmi zot ti gagn dapre seki li ti bizin.” (Actes 4:34-35) Me plitar, ti ariv enn problem dan kongregasion. Sertin vev pa ti pe gagn manze ki ‘ti pe distribie toulezour.’ Alor, ki bann zapot ti fer? Zot ti etabli bann zom kalifie ki ti pran bann dispozision pou ki pena okenn preferans ek ki tou bann vev gagn mem kantite manze. (Actes 6:1-5) Sa distribision manze-la ti enn laranzman tanporer. Bann ki ti vinn Kretien pandan la Pentecôte lane 33 Nou Lepok ek ki ti res Jérusalem pou fortifie zot lafwa, ti pou gagn seki zot ti bizin lor plan materyel. Mem si sa laranzman-la ti tanporer, seki bann zapot ti fer, montre ki bann kongregasion kapav ede pou pran swin bann frer ek ser aze.

¹⁴ Paul ti donn Timothée bann instriksion pou montre dan ki sitiasion bann vev ti pou kapav gagn led materyel ar kongregasion. (1 Tim. 5:3-16) Jacques, enn ekrivin Labib, ti ekrir li osi ki bann Kretien ena responsabilite pou pran swin bann orfelin, bann vev, ek lezot ki pe pas par bann moman difisil. (Jacq. 1:27; 2:15-17) Lapot Jean osi ti dir: “Ninport kisannla ki ena bann kitsoz materyel sa lemond-la ek trouve ki so frer bizin led ek pourtan refiz pou montre so konpasion anver li, kouma eski lamour Bondie kapav res dan li?” (1 Jean 3:17) Si sak Kretien ena responsabilite pou pran swin bann ki bizin led, eski bann kongregasion osi pa bizin fer parey?

15. Ki bann kitsoz ki inplike kan nou donn led bann frer ek ser aze?

¹⁵ Dan sertin pei, gouvernman donn pansion, bann led sosial ek bann gard-malad pou bann dimounn aze. (Rom. 13:6) Me dan lezot pei, pena sa bann servis-la. Alor, led ki bann fami ek bann manb kongregasion pou done, pou depann lor servis ki disponib dan sa pei-la. Si bann zanfan ki dan laverite res lwin ar zot paran, kitfwa zot pa pou reisi donn kantite led ki zot anvi zot bann paran aze. Li bon ki bann zanfan kominik dan enn fason fran avek bann ansien ki  dan kongregasion zot paran pou ki zot tou konpran sitiasion lafami. Par exanp, bann ansien kapav ed sa bann paran-la pou kone ki bann servis gouvernman done ouswa ki bann led sosial ki ena dan landrwa. Kitfwa zot kapav osi gete si ena bann let inportan ki pa finn ouver ouswa bann medsinn ki bann paran-la pa finn pran ek lerla fer zot bann zanfan kone. Si ena enn kominikasion fran ant bann zanfan ek bann ansien, kitfwa zot kapav trouv bann solision pratik. Kan ena bann dimounn ki la pou ede ouswa pou donn bann konsey bann zanfan ki res lwin, sa kapav anpes enn sitiasion vinn pli grav ek soulaz lafami.

16. Kouma sertin Kretien ed bann frer ek ser aze dan kongregasion?

¹⁶ Sertin Kretien dan kongregasion inn dispoze pou donn zot letan ek zot lafors pou ed bann ki aze dan ninport ki fason ki zot kapav. Se lamour ki pous zot pou fer sa. Zot fer tou zot posib pou montre enn gran lintere anver bann frer ek ser aze dan kongregasion. Sertin partaz bann travay ki ena pou fer avek lezot dan kongregasion ek zot ed bann Kretien aze sakenn son tour. Mem si zot personelman zot pa kapav dan servis aplintan, kan zot pran swin sa bann Kretien-la, sa permet bann zanfan pou res dan zot servis pli lontan posib. Sa bann frer ek ser la manifeste vremem enn bon latitid! Biensir, ninport ki kantite lezot kapav ede, bann zanfan ena touzour responsabilite pou fer seki zot kapav pou zot paran.

17, 18. Ki latitid bann dimounn aze ek bann ki pran zot swin bizin ena?

¹⁷ Bann Kretien aze ek bann ki pran zot swin kapav fer enn sitiasion difisil vinn pli fasil kan zot gard enn latitid pozitif. Dan sertin ka, lavieyes kapav fer enn dimounn dekouraze, kitfwa mem deprime. Alor, ou kapav fer enn zefor spesial pou onor ek pou ankouraz bann frer ek ser aze kan ou kontign ena bann konversasion ankourazan avek zot. Sa bann Kretien-la finn res fidel anver Jéhovah pandan boukou lane, alor zot merit bann felisitasion. Jéhovah pa bliye seki zot inn fer pou Li, ek nou osi parey.​—Lir Malaki 3:16; Hébreux 6:10.

¹⁸ Anplis, li pou pli fasil pou okip bann Kretien aze toulezour si sa bann Kretien aze la ek bann ki okip zot, konn riye kan bizin. (Eccl. 3:1, 4) Boukou Kretien aze fer tou seki zot kapav pou zot pa vinn tro exizan. Zot konsian ki zot kapav gagn enn pli gran latansion ek pli boukou vizit si zot ena enn bon latitid. Souvan, bann ki vizit bann dimounn aze dir: “Mo ti al ankouraz enn kamarad ki aze, me se mwa ki’nn gagn lankourazman.”​—Prov. 15:13; 17:22.

19. Ki pou ed bann zenn ek bann aze pou gard enn lafwa solid dan bann moman difisil?

¹⁹ Nou pe atann avek inpasians zour kot bann soufrans ek bann lefe linperfeksion pou disparet. Me avan ki sa arive, bann serviter Bondie bizin kontign fixe zot latansion lor zot lavenir eternel. Nou kone ki se lafwa dan bann promes Bondie ki pou fer nou res ferm dan bann moman difisil. Gras-a nou lafwa, “nou pa bes lebra, me mem si seki nou ete andeor pe deperi, pena dout ki seki nou ete andan, pe renouvle sak zour.” (2 Cor. 4:16-18; Héb. 6:18, 19) Anplis ki nou gard enn lafwa solid dan bann promes Bondie, ki kitsoz kapav ed bann ki ena responsabilite pou pran swin bann dimounn aze? Dan prosin lartik nou pou examinn sertin konsey pratik.