1. Ki situashon tristu hende ta konfrontá awe?

NUNKA Yehova tabata ke pa hende bira bieu i sufri. Al kontrario, su propósito tabata pa tur hende, tantu hòmber komo muhé, disfrutá di salú perfekto i biba den Paradeis. Pero realidat ta ku awe “henter kreashon huntu ta sigui keña i ta keda den doló.” (Rom. 8:22) Kon bo ta kere Dios ta sinti ora e mira hende sufri pa motibu di piká ku nan a heredá? Komo si fuera esei no ta basta, hopi hende di edat avansá ta ser neglishá nèt na e momento ku mas nan tin mester di yudansa.—Sal. 39:5; 2 Tim. 3:3.

2. Dikon nos ta kontentu ku nos rumannan di edat den kongregashon?

² Komo e pueblo di Yehova, nos ta masha kontentu ku nos rumannan di edat den kongregashon. Nos ta benefisiá di nan sabiduria i ta siña di nan ehèmpel di fe. Kisas ún òf mas di e rumannan akí ta nos mes famia. Pero, sea ku nan ta nos famia òf nò, nos ta interesá den nan bienestar. (Gal. 6:10; 1 Ped. 1:22) P’esei, ta bon pa nos analisá kon Dios ta mira nos rumannan di edat avansá. Nos lo mira tambe ki responsabilidat miembronan di famia i kongregashon tin pa ku rumannan di edat.

3, 4. (a) Kiko e eskritor di Salmo 71 a roga Yehova? (b) Kiko rumannan di edat por pidi Yehova Dios?

³ E eskritor di Salmo 71:9 a roga Dios: “No benta mi afó  den tempu di behes; no bandoná mi ora mi forsa ta faya.” Ta parse ku e salmo akí ta un kontinuashon di Salmo 70, ku tin komo introdukshon: “Di David.” Pues, probablemente ta David a hasi e petishon ku nos a lesa na Salmo 71:9. For di David su hubentut te na su behes, el a sirbi Dios, i Yehova a us’é pa hasi kosnan grandi. (1 Sam. 17:33-37, 50; 1 Rei. 2:1-3, 10) Asina mes, David a sinti nesesidat di pidi Yehova pa sigui bendishon’é i kuid’é.—Lesa Salmo 71:17, 18.

⁴ Awe, hopi di nos rumannan ta manera David. Apesar di edat avansá i “dianan malu,” nan ta sigui alabá Dios lo mihó ku nan por. (Ekl. 12:1-7) Den vários aspekto di bida, inkluso nan sirbishi kristian, hopi di nan kisas no por hasi mes tantu ku nan tabata hasi ántes. Pero nan tambe por roga Yehova pa sigui bendishoná nan i kuida nan. I e rumannan fiel akí por ta sigur ku Dios lo kontestá nan orashonnan. Al fin i al kabo, nan orashonnan ta ekspresá e mesun inkietutnan ku David a ekspresá bou di inspirashon divino.

5. Kon Yehova ta mira rumannan di edat?

⁵ Beibel ta mustra bon kla ku Yehova ta balorá rumannan di edat mashá i ku e ta ferwagt ku su sirbidónan ta onra e rumannan akí. (Sal. 22:24-26; Pro. 16:31; 20:29) Por ehèmpel, Levítiko 19:32 ta bisa: “Lanta para pa esun ku tin kabei blanku, onra e ansiano i teme bo Dios; Ami ta SEÑOR.” Sí, tempu ku e palabranan akí a ser skirbí, e responsabilidat di onra rumannan di edat tabata algu serio, i te awe ta asina. Pero ta ken tin e responsabilidat di kuida nan?

6. Ki ehèmpel enkuanto kuido di mayornan Hesus a pone?

⁶ E Palabra di Dios ta bisa nos: “Onra bo tata i bo mama.” (Éks. 20:12; Efe. 6:2) Hesus a enfatisá e importansia di e mandamentu akí ora el a kondená e fariseo- i eskribanan, kendenan a nenga di perkurá pa nan mayornan. (Mar. 7:5, 10-13) Hesus mes a pone un bon ehèmpel. Por ehèmpel, ora e tabata a punto di muri na staka, el a pidi disipel Huan, kende tabata su bon amigu, pa kuida su mama. E tempu ei probablemente su mama tabata biuda.—Huan 19:26, 27.

7. (a) Ki prinsipio enkuanto kuido di mayornan apòstel Pablo a duna? (b) Den ki konteksto Pablo a papia e palabranan ei?

⁷ Yehova a inspirá apòstel Pablo pa skirbi ku kristiannan mester perkurá pa nan famia. (Lesa 1 Timoteo 5:4, 8, 16.) Laga nos analisá e konteksto di loke Pablo a bisa Timoteo akinan. Pablo tabata splika ken lo por a haña yudansa finansiero di kongregashon i ken nò. Pablo a mustra bon kla ku ta yunan, nietunan òf otro famia den e bèrdat tabatin e responsabilidat primario di perkurá pa nan famianan di edat, ku ta biuda. Esei lo a libra e kongregashon di un karga finansiero innesesario. Awe ta meskos: Un manera ku kristiannan por demostrá “deboshon na Dios” ta di perkurá materialmente pa nan famianan den nesesidat.

8. Dikon ta bon ku Beibel no ta duna instrukshon spesífiko enkuanto kuido di mayornan di edat avansá?

⁸ Simplemente bisá, kristiannan adulto tin e obligashon di perkurá pa e nesesidatnan material di nan mayornan. Aunke Pablo tabata papia di famianan kristian, kristiannan mester perkurá tambe pa nan mayornan ku no ta den e bèrdat. Pero e manera ku yunan ta perkurá pa nan mayornan por varia pasobra no ta tur situashon ta meskos. Nesesidat, kondishon físiko i karakter di tantu e yunan komo e mayornan por ta distinto. Algun mayor di edat tin vários yu, miéntras ku otronan tin ún yu so. Tin mayor por haña yudansa di gobièrnu, miéntras ku otronan nò.  Ademas, loke e mayornan ta preferá òf deseá tambe por ta distinto. P’esei, no ta sabí ni amoroso pa kritiká e manera ku un persona ta perkurá pa su famianan di edat avansá. Al fin i al kabo, Yehova por bendishoná kualke desishon ku nos tuma basá riba Beibel i pone ku kosnan ta kana bon, meskos ku e ta hasiendo pa Su pueblo desde tempu di Moises.—Num. 11:23.

9-11. (a) Ki desishon difísil algun ruman sa haña nan konfrontá kuné? (Wak e promé plachi.) (b) Dikon yunan adulto no mester ta purá pa stòp ku nan sirbishi di tempu kompleto? Duna un ehèmpel.

⁹ Ora yunan ta biba leu for di nan mayornan, por ta difísil pa nan duna nan mayornan e kuido nesesario. Por sosodé ku diripiente yunan mester bai bishitá nan mayornan, debí ku kisas un di nan su salú a bai atras diripiente pa motibu di un kaida, wesu ku a kibra òf kualke otro emergensia. Despues, e mayornan kisas mester di yudansa pa un tempu kòrtiku òf un tempu mas largu. *

¹⁰ Sirbidónan di tempu kompleto ku ta sirbi Yehova leu fo’i kas por haña nan konfrontá ku desishonnan masha difísil. Nos rumannan ku ta sirbi por ehèmpel komo bètelita, misionero òf superintendente biahero ta balorá nan asignashon i ta konsiderá esaki komo un bendishon di Yehova. No opstante, si nan mayornan bira malu, kisas nan promé reakshon ta: ‘Nos tin ku laga nos asignashon i bai kuida nos mayornan.’ Pero promé ku un ruman tuma un desishon asina, lo ta sabí pa e hasi orashon i hasi sigur si su mayornan ta deseá pa e hasi esei òf si esei ta nesesario. Nos no mester ta muchu purá pa entregá nos privilegionan di sirbishi, i tin biaha esei no ta nesesario tampoko. Podisé e mayor su problema ku salú ta algu temporal, i algun ruman den su kongregashon mes lo ta dispuesto pa yuda.—Pro. 21:5.

¹¹ Tuma por ehèmpel e kaso di un pareha di edat na Hapon. Nan tabatin dos yu hòmber ku tabata sirbi Yehova leu for di kas. E yu mas yòn tabata misionero na Suramérika i e otro tabata traha na nos sede mundial, na Brooklyn, New York. Ora nan mayornan di edat tabatin mester di yudansa, e dos ruman hòmbernan akí huntu ku nan kasá a bai bishitá nan mayornan na Hapon pa wak kiko nan por a yuda kuné. Poko tempu despues, e pareha ku tabata biba na Suramérika a asta kuminsá pensa seriamente pa bandoná nan asignashon i bai Hapon bèk. Pero nan a haña un yamada di e koordinadó di e kuerpo di ansiano di e kongregashon di e mayornan. E ansianonan a papia tokante e asuntu i tabata ke pa e pareha keda den nan asignashon mas tantu posibel. E ansianonan a balorá loke e pareha akí tabata hasi pa Yehova i tabata determiná pa yuda ku e kuido di e mayornan. Henter e famia a apresiá e yudansa amoroso akí mashá!

12. Kiko famianan kristian mester hasi sigur di dje ora di disidí kon pa perkurá pa nan mayornan?

¹² Sea kual sea e manera ku famianan kristian skohe pa perkurá pa nan mayornan di edat avansá, tur esnan enbolbí mester hasi sigur ku nan desishonnan ta onra e nòmber di Dios. Hamas nos ke ta manera e lidernan religioso den tempu di Hesus. (Mat. 15:3-6) Mas bien, nos ke pa nos desishonnan onra Dios i e kongregashon kristian.—2 Kor. 6:3.

13, 14. Kon Beibel ta mustra ku kongregashon tambe mester yuda kuida nos rumannan di edat avansá?

¹³ No ta tur kongregashon por yuda  sirbidónan di tempu kompleto manera e ehèmpel ku nos a kaba di trata a mustra. No opstante, Beibel ta mustra ku kongregashonnan mester hasi tur loke nan por pa yuda rumannan di edat avansá. Beibel ta mustra ku den e kongregashon di Herúsalèm di promé siglo “no tabatin ningun hende den nesesidat.” Kon bini? Akaso tur e rumannan tabata hende riku? Nò. Al kontrario, algun tabata pober. Pero e kongregashon tabata parti e plaka ku nan tabata risibí na kontribushon entre esnan den nesesidat. (Echo. 4:34, 35) Sinembargo, mas despues a surgi un problema serio den e kongregashon ei. Algun di e biudanan tabata ser neglishá ora e disipelnan tabata parti “kuminda di tur dia.” P’esei, e apòstelnan a enkargá algun hòmber di bon reputashon pa hasi sigur ku e biudanan tabata haña loke nan tabatin mester. (Echo. 6:1-5) Ta bèrdat ku e “partimentu di kuminda di tur dia” tabata un areglo temporal pa yuda e personanan ku a bira kristian na Pentekòste di aña 33 di promé siglo, kendenan a keda Herúsalèm un tempu pa progresá den sentido spiritual. No opstante, e desishon ku e apòstelnan a tuma ta mustra bon kla ku kongregashonnan por yuda kuida rumannan di edat.

¹⁴ Manera nos a menshoná anteriormente, Pablo a duna Timoteo instrukshon ku ta indiká ki ora un kongregashon por yuda kubri nesesidat di biudanan kristian. (1 Tim. 5:3-16) Yehova a inspirá Santiago tambe pa skirbi ku kristiannan tin e obligashon di perkurá pa e huérfanonan, biudanan i otro miembronan di kongregashon ku ta den situashon difísil. (Sant. 1:27; 2:15-17) Apòstel Huan a puntra: “Esun ku tin e rekursonan di e mundu akí pa sostené bida i ta mira su ruman den nesesidat, ma ta sera su kurason p’e, por bisa ku e tin amor pa Dios?” (1 Huan 3:17) Pues, si tur kristian tin e obligashon di yuda nan ruman den nesesidat, no ta lógiko ku henter e kongregashon tambe mester hasi esei?

15. Ki faktornan mester tene kuenta kuné ora di perkurá kuido pa rumannan di edat avansá?

¹⁵ Den algun pais, gobièrnu ta perkurá penshon di behes, ayudo sosial i kuido na kas pa siudadanonan di edat. (Rom. 13:6) Pero tin pais ku no tin e benefisionan akí. Pues, e yudansa ku famianan òf kongregashon mester duna rumannan di edat avansá ta dependé di kada situashon. Por ehèmpel, kristiannan ku ta biba leu for di nan mayornan kisas lo no por yuda nan mayornan manera nan ke. Den un kaso asina, ta bon pa nan papia ku e ansianonan di e kongregashon na kua  nan mayornan ta asistí pa hasi sigur ku e kuerpo ta na altura di e sirkunstansianan di e famia. Kisas e ansianonan lo por pone e mayornan na altura di kualke yudansa ku nan lo por haña di gobièrnu. E ansianonan por haña sa tambe di sierto asuntunan ku nan por pone e yunan na altura di dje, manera por ehèmpel ku e mayornan no ta habri nan resibunan òf usa nan remedinan. Ora tin bon komunikashon entre e yunan i ansianonan, nan por yega na solushonnan práktiko i evitá ku e situashon di e mayornan ta empeorá. Sí, yunan ku ta biba leu lo sinti nan mas trankil ora tin hende den serkania ku por yuda nan mayornan di edat i ku por tene nan na altura di e situashon di nan mayornan.

16. Kon algun kristian ta yuda nan rumannan di edat den kongregashon?

¹⁶ Debí na amor i kariño pa rumannan di edat, algun kristian ta usa nan energia i tempu pa hasi loke nan por pa kuida e rumannan akí. Nan ta hasi esfuerso èkstra pa mustra interes den rumannan di edat den kongregashon. Algun ruman ta parti e trabou akí entre nan i nan ta tuma turno pa yuda e rumannan di edat avansá. Kisas e sirkunstansianan di e rumannan ku ta ofresé nan mes pa yuda no ta permití nan traha den sirbishi di tempu kompleto. P’esei, nan ta kontentu ku nan por yuda esnan ku sí ta hasiendo esei keda den nan asignashon. Ki un bunita ehèmpel di generosidat e rumannan akí ta pone! Pero e echo ku kongregashon ta yuda no ta apsolvé e yunan di e responsabilidat di perkurá pa nan mayornan te kaminda nan por.

17, 18. Ki aktitut ta hasi dunamentu di kuido plasentero?

¹⁷ Tantu e rumannan di edat avansá komo esnan ku ta duna kuido por hasi un situashon mas fásil si nan ta hasi nan bèst pa desplegá un aktitut positivo. Den algun kaso, behes por pone un hende bira desanimá òf asta deprimí. P’esei, e dunadó di kuido mester hasi su máksimo esfuerso pa onra i animá un ruman asina; e por hasi esei mediante un kòmbersashon ameno i edifikante. Nos rumannan di edat avansá ku tin hopi aña ta sirbi Yehova fielmente meresé elogio. Yehova no ta lubidá loke e rumannan akí a hasi den su sirbishi, i nos tampoko.—Lesa Malakías 3:16; Hebreonan 6:10.

¹⁸ Ademas, ora personanan di edat i esnan ku ta kuida nan tin un sentido di humor, lo bira muchu mas fásil pa kumpli ku e tareanan di tur dia. (Ekl. 3:1, 4) Hopi ruman di edat avansá ta hasi nan bèst pa nan no ta muchu eksigente. Nan ta konsiente ku si nan ta kariñoso, nan lo por haña mas bishita i atenshon. Hopi biaha bo ta tende hende ku bishitá un ruman di edat bisa: “M’a bai pa anim’é, pero ta é a animá mi.”—Pro. 15:13, 17:22.

19. Kiko por yuda rumannan di edat i esnan mas hóben keda fuerte den situashon difísil?

¹⁹ Nos tur ta anhelá e dia ku hende lo ta perfekto i ku lo no tin sufrimentu mas. Miéntras tantu, Yehova su sirbidónan mester keda ku nan bista fihá riba e futuro eterno. Fe den e promesanan di Dios ta yuda nos keda fuerte den situashon difísil. Debí na e fe ei, “nos no ta entregá; pasobra maske e hende ku nos ta di pafó ta kaba na nada, siguramente e hende ku nos ta di paden ta renobá su mes dia tras dia.” (2 Kor. 4:16-18; Heb. 6:18, 19) Awor, kiko mas lo por yuda nos kumpli ku nos responsabilidat di kuida rumannan di edat avansá? E siguiente artíkulo lo duna algun sugerensia práktiko.