1. ¿Tuku xlakata nitlan wilakgolh latamanin?

JEHOVÁ ni xlakaskin pi tuwa xtitaxtuw akxni xkgolow. Tuku xlakapastaknit wa pi lakchixkuwin chu lakpuskatin ni xtatatlakgolh chu tlan xtawilakgolh kParaíso. Pero la uku «xlipaks ntamalakatsukun [o latamanin], makxtum jalhpanikgoy, chu makxtum» patinamakgolh (Rom. 8:22). ¿La lakpuwana pi makgkatsi Dios akxni akxilha pi latamanin patinankgo xlakata talakgalhin? Chu tuku tlakg nitlan, lhuwa tiku linkgoya kata kaʼakgxtakgwilikan uma kilhtamaku, akxni tlakg maklakaskinkgo kakamakgtayaka (Sal. 39:5; 2 Tim. 3:3).

2. ¿Tuku xlakata paxtikatsiniyaw pi kcongregación wilakgolh natalan tiku linkgoya kata?

² Xlakskujnin Jehová paxtikatsiniyaw pi kcongregación wilakgolh lakchixkuwin chu lakpuskatin tiku linkgoya kata. Tuku titaxtukgonit kinkamakgtayayan chu nachuna kanajlaputunaw la xlakan kanajlakgo. Lhuwa umakgolh natalan kifamiliajkan. Pero komo xparienteskan akinin o ni, kimputumkan lakaskinaw tlan katawilakgolh (Gál. 6:10; 1 Ped. 1:22). Wa xlakata, kaʼakxilhwi tuku lakpuwan Dios xlakata natalan tiku linkgoya kata chu naʼakxilhaw tuku xlitlawatkan xfamiliajkan chu congregación xpalakatakan.

3, 4. 1) ¿Tuku lu xlakaskinka skinilh Jehová tiku tsokgli Salmo 71? 2) ¿Tuku tlan skinikgo Dios tiku linkgoya kata?

³ Salmo 71:9 wan: «Kumu akit kkgolunita, kmakgskinan litlan  ni kakilakgmakganti; ni kakiʼakgxtakgwili akxni lakgonit [o sputnit] kilitliwekge». Max wa David tiku tsokgli umakgolh tachuwin. Chu max wa tiku tlawanilh Dios uma oración. Xla skujnanilh Dios lata kgawasaku xwanit asta akxni kgololh, chu Jehová limaklakaskilh xlakata xtlawalh tuku xlakaskinka (1 Sam. 17:33-37, 50; 1 Rey. 2:1-3, 10). Maski chuna, chuntiya skinilh Jehová pi ksikulunatlawalh chu xkuentajtlawalh (kalikgalhtawakga Salmo 71:17, 18).

⁴ La uku lhuwa natalan chuna la David. Maski titaxtumakgo «xatuwa kilhtamaku» nema min akxni kgolonkan, chuntiya tlawakgo tuku tlan xlakata namalankikgo Dios (Ecl. 12:1-7). Lhuwa nialhla tlawakgo tuku pulana tlan xtlawakgo kxlatamatkan, la akxni lichuwinankan Dios. Pero la David, tlan skinikgo Jehová chuntiya kakasikulunatlawalh chu kakakuentajtlawalh, chu liwana katsikgo pi xla nakakgalhti xʼoracioneskan. Katsiyaw uma xlakata Jehová matsokgnilh David tuku lilipuwankan akxni titaxtukan tuku tuwa.

5. ¿La xlilakaskinka kaʼakxilha Jehová natalan tiku linkgoya kata chu ni makgatsankgananikgo?

⁵ Tuku tatsokgnit masiya pi Jehová lu xlakaskinka kaʼakxilha natalan tiku linkgoya kata chu lakaskin pi nakamaxkiyaw kakni (Sal. 22:24-26; Prov. 16:31; 20:29). Anta kLevítico 19:32 wan: «Kataya akxni wi tiku aktsasawa, chu kamaxki kakni tiku lina kata, chu napekuaniya mi Dios. Akit Jehová». Akxni tsokgka uma tachuwin lu xlakaskinka xwanit nakamaxkikan kakni tiku xlinkgoya kata tiku xalak congregación xwankgonit, chu la uku chuntiya xlakaskinka. Pero, ¿tiku kalakgchan nakakuentajtlawa chu nakamaxki tuku maklakaskinkgo?

6. ¿Tuku liʼakxilhtit wililh Jesús xlakata la kakuentajtlawakan natlatni?

⁶ Dios kinkawaniyan kxTachuwin: «Kamaxki kakni mintlat chu mintse» (Éx. 20:12; Efes. 6:2). Jesús aktanks lichuwinalh uma limapakgsin akxni kawanilh fariseos chu escribas pi nitlan tuku xtlawamakgolh xlakata ni xkakuentajtlawaputunkgo xnatlatnikan (Mar. 7:5, 10-13). Jesús wililh tlan liʼakxilhtit xlakata uma. Akxni xʼamaja niy kkiwi, lakgayawalh Juan kstalanina tiku lu xpaxki, nakuentajtlawa xtse tiku ama kilhtamaku max xninita xchixku (Juan 19:26, 27).

7. 1) ¿Tuku tastakyaw lakkaxwililh apóstol Pablo xlakata la nakamaxkikan natlatni tuku maklakaskinkgo? 2) ¿Tuku xlichuwinama Pablo akxni wa uma tachuwin?

⁷ Jehová malakpuwanilh apóstol Pablo natsokga pi kstalaninanin Cristo xlimaxkitkan tuku maklakaskinkgo xfamilia (kalikgalhtawakga 1 Timoteo 5:4, 8, 16). Kaʼakxilhwi tuku xlichuwinama akxni tsokgli uma tachuwin. Pablo xwanima Timoteo tiku tlan xmakglhtinankgo tamakgtay nema liwana wa pi tiku xkalakgchan nakamakgtayakgo xmasta congregación chu tiku ni. Wa pi lakpuskatin tiku xninita xchixku tiku xlinkgoya kata, wa xkamanan, xnatanatni chu amakgapitsi tiku xalak xfamilia tiku kstalaninanin Cristo xwankgonit xkalakgchan nakakuentajtlawakgo. Uma xtlawalh pi congregación ni xmastalh tamakgtay nema ni xtalakaskin. La uku, pulaktum la kstalaninanin Cristo lilatamakgo “xaʼakgstitum takaknin” wa akxni kamaxkikgo xalak xfamilia tuku maklakaskinkgo.

8. ¿Tuku xlakata Biblia ni wan pulakatunu tuku xlitatlawat xlakata nakakuentajtlawakan natlatni tiku linkgoya kata?

⁸ Kstalaninanin Cristo tiku laklankata kuenta xlitlawatkan pi xnatlatnikan nakgalhikgo tuku maklakaskinkgo. Maski Pablo xkalichuwinama familia tiku kstalaninanin Cristo, kamanan na xlikuentajtlawatkan xnatlatni maski makgtapakgsikgo kcongregación o ni. Tanu tanu la nakakuentajtlawakgo xnatlatnikan. Ni anan pulaktiy nema lu lakxtum. Talakgpali tuku maklakaskinkgo, xtayatkan chu tuku litatatlakgo.  Makgapitsi natlatni kgalhikgo lhuwa xkamankan, chu amakgapitsin kajwatiya chatum. Wilakgolh tiku makglhtinankgo xtamakgtay mapakgsinanin chu wi tiku ni. Tuku lakgatikgo tiku kakuentajtlawakan na talakgpali. Wa xlakata, ni xlilat chu ni masiyamaw pi kapaxkiyaw komo nitlan nalichuwinanaw tuku tlawa tiku kuentajtlawama xfamiliajkan tiku lina kata. Komo takilhtiyanit kBiblia tuku laksakkgo natlawakgo, Jehová tlan sikulunatlawa chu tlawa pi tlan kakitaxtulh, chuna la tlawanit lata kxkilhtamaku Moisés (Núm. 11:23).

9-11. 1) ¿Tuku tuwa max natitaxtukgo makgapitsi natalan? (Kaʼakxilhti xapulana dibujo.) 2) ¿Tuku xlakata kamanan tiku putum kilhtamaku skujnanimakgo Dios ni lakapala namakgxtakgkgo tuku kalakgayawakanit? Kawili akgtum liʼakxilhtit.

⁹ Akxni kamanan makgat wilakgolh, tuwa nakitaxtu nakamaxkikgo xnatlatni tamakgtay nema maklakaskinkgo. Akxni lakapala tatatlakgo natlatni xlakata lhtujkgolh, o tamokgoskgolh, tatlekgekgolh o atanu tuku nitlan lanikgolh max natalakaskin pi xkamanan lakapala nakalakgminkgo. Alistalh max natalakaskin nakakuentajtlawakan, makgas o ni makgas kilhtamaku. *

¹⁰ Tiku putum kilhtamaku skujnanikgo Dios chu makgat wilanikgolh xfamilia max tuwa nakakitaxtuni nalaksakkgo tuku natlawakgo. Betelitas, misioneros chu superintendentes viajantes, lu xlakaskinka akxilhkgo tuku lakgayakgo, akxilhkgo la akgtum tasikulunalin nema Jehová kamaxkinit. Pero komo xnatlatnikan natatatlakgo, max wa uma tuku pulana lakpuwankgo: «Talakaskin namakgxtakgaw tuku lakgayaw kxkachikin Dios chu nataspitaw kkinchikkan xlakata nakakuentajtlawayaw kinatlatnikan». Pero pulana, tlan nawan natlawanikan oración Jehová chu liwana nakatsikan komo maklakaskinkgo natlatni o komo lakaskinkgo kakalakgaw. Niti lakapala xlimakgxtakgat taskujut nema lakgayawakanit kxkachikin Dios, xlakata ni putum kilhtamaku chuna natalakaskin. Max ni lhuwa kilhtamaku katikgalhilh uma tajatat, wa xlakata ¿tlan xkamakgtayakgolh makgapitsi natalan xalak congregación xlakata kamanan ni namakgxtakgkgo tuku lakgayakgo? (Prov. 21:5.)

¹¹ Kalilakapastakwi tuku titaxtukgolh chatiy lakgkgawasan linatalan tiku makgat kskujnanimakgolh Jehová. Chatum, misionero xwanit kʼSudamérica, chu achatum kskujma niku pulalinkan xtaskujut Jehová kBrooklyn (Nueva York). Akxni xnatlatni maklakaskinkgolh tamakgtay, xchatiykan chu xlakpuskatin taspitkgolh kxchikkan xlakata xʼakxilhkgolh la tlan xkamakgtayakgolh. Tamakgaxtokgat tiku xalak Sudamérica xlakpuwamakgo nialh misioneros nawankgo chu nataspitkgo kxchikkan. Ama kilhtamaku katachuwinalh tiku kamakgtaya nalakkaxwilikgo xtaskujutkan amakgapitsi lakgkgolotsin xalak xcongregación xnatlatni. Lakgkgolotsin xlichuwinankgonit tuku xtitaxtumakgo chu xlakaskinkgo pi misioneros chuntiya kskujnanikgolh Dios kʼSudamérica. Lu xlakaskinka xʼakxilhkgo taskujut nema xtlawamakgo chu xkamakgtayaputunkgo nakakuentajtlawa xnatlatni. Putum familia lu paxtikatsinikgolh lakgkgolotsin tapaxkit nema kamasiyanikgolh.

12. ¿Tuku kuenta xlitlawatkan kstalaninanin Cristo akxni laksakkgo la nakuentajtlawakgo xnatlatni?

¹² Maski tanu tanu la kuentajtlawakgo kstalaninanin Cristo xnatlatnikan, putum kuenta xlitlawatkan pi tuku nalaksakkgo natlawakgo namaxki kakni xtukuwani Dios. Ni kalitaxtuw la tiku xpulalinkgo takanajla kxkilhtamaku Jesús (Mat. 15:3-6). Lakaskinaw pi putum tuku natlawayaw, namaxki kakni Dios chu congregación (2 Cor. 6:3).

13, 14. ¿La masiya Biblia pi congregaciones xlikuentajtlawatkan tiku linkgoya kata?

¹³ Ni putum natalan tlan kamakgtayakgo tiku putum kilhtamaku skujnikgo Dios chuna la lichuwinaw. Pero, tuku lalh kxapulana siglo masiya pi congregaciones kuenta xlitlawatkan tuku maklakaskinkgo tiku linkgoya kata chu ni makgxtakgkgo Dios. Biblia wan pi kcongregación xalak Jerusalén «[...]ni chatum xanan mpala ni anan ntu xlakaskin». Uma ni wamputun pi xkgalhikgo lhuwa tumin. Makgapitsi ni lhuwa tuku xkgalhikgo, pero «xtakgpitsiy wa lantlata xakchanilh nchatunu nalakaskin» (Hech. 4:34, 35). Alistalh analh akgtum taʼakglhuwit. Makgapitsi lakpuskatin tiku xninita xchixku «ni kuintaj xtlawakgokan lantla xmakgtakgalhwilikgokan nchali chali». Wa xlakata apóstoles kalaksakkgolh lakchixkuwin tiku kuentajtlawakgolh pi lakpuskatin tiku xninita xchixku lakxtum xmakglhtinankgolh tuku xmaklakaskinkgo (Hech. 6:1-5). Xlikana pi tamakgtay nema xmakgpitsikan chali chali ni makgapalalh; uma xlakkaxwilikanit xlakata xkalimakgtayaka tiku kstalaninanin Cristo wankgolh kkata 33 xla Pentecostés chu tamakgxtakgkgolh tsinu kilhtamaku kJerusalén xlakata xmatliwakglhkgolh xtakanajlakan. Pero tuku tlawakgolh apóstoles masiya pi congregación tlan makgtayanan akxni tiku anta makgtapakgsikgo maklakaskinkgo tamakgtay.

¹⁴ Chuna la lichuwinanitaw, Pablo wanilh Timoteo la xliwanat akxni chatum puskat tiku ninita xchixku tlan xmakglhtinalh xtamakgtay congregación (1 Tim. 5:3-16). Santiago malakpuwanika natsokga pi kstalaninanin Cristo kalakgchan nakakuentajtlawakgo tiku nialh kgalhi xnatlatni, lakpuskatin tiku ninita xchixku chu atanu tiku maklakaskinkgo (Sant. 1:27; 2:15-17). Chu apóstol Juan wa: «Wanti xkgalhilh xmakaʼananat [o tuku tamaklakaskin] yunu nkatuxawat, chu na xʼukxilhli xtala mpi nianan ntu maklakaskin, cha nchu xla, ni kgayaj xkatsanilh, ¿lantla nkgalhiy xtapaxkit Dios kxnaku?» (1 Juan 3:17). Xlakata chatunu kstalaninanin Cristo kalakgchan namakgtayankgo, ¿ni chuna xlitlawatkan congregaciones?

15. ¿Tuku xlakata tanu tanu la nakamakgtayakan kinatalankan tiku linkgoya kata?

¹⁵ Kmakgapitsi países, mapakgsinanin kamakgtayakgo tiku linkgoya kata chu kamaxkikgo tumin chu kalimakgtayakgo atanu tuku lakkaxwilikgonit (Rom. 13:6). Kʼatanu países ni anan uma tamakgtay. Wa xlakata talakgpali chuna la nakakuentajtlawakgo familia chu congregación natalan tiku linkgoya kata. Lhuwa kamanan tiku kstalaninanin  Cristo makgat wilakgo chu uma max natlawa pi nila lu nakakuentajtlawakgo xnatlatnikan. Komo chuna, talakaskin pi xakamanan putum nakawanikgo lakgkgolotsin xalak xcongregación xnatlatnikan tuku titaxtumakgo xfamilia. Lakgkgolotsin max tlan nakaputsanikgo natlatni tamakgtay nema mastakgo mapakgsinanin kxkachikinkan. Max na naʼakxilhkgo pi natlatni ni akxilhkgonit tuku xlilakgaxokgotkan o ni wamakgolh xlikuchukan, chu tlan nakawanikgo xkamanan. Akxni lakgkgolotsin chu kamanan tiku makgat wilakgo liwana latachuwinan makgtayanan ni lanka nawan taʼakglhuwit chu tlan nalakkaxtlawakgo. Kamanan lu tlan nalimakgkatsikgo komo wi tiku lakatsu katawi xnatlatni xlakata nakamakgtaya chu nakamakatsini komo wi tuku lama.

16. ¿Tuku tlawakgo makgapitsi natalan xlakata nakamakgtayakgo xalak congregación tiku linkgoya kata?

¹⁶ Makgapitsi natalan xalak congregación, xʼakstukan lakapastakkgo nalimaxtukgo kilhtamaku chu litliwakga xlakata nakamakgtayakgo kinatalankan tiku linkgoya kata, chuna tlawakgo xlakata kapaxkikgo. Xlakan kalikatsinikgo la xalak xfamilia. Amakgapitsin talakkaxlakgo tiku xalak congregación xlakata tanu tanu tiku nakuentajtlawakgo akgtum kilhtamaku. Xlakata nila putum kilhtamaku skujnanikgo Dios, lipaxuwakgo nakamakgtayakgo kamanan tlakg lhuwa kilhtamaku natamakgxtakgkgo niku skujnimakgolh Dios. ¡Lu tlan likatsikgo! Xlikana, maski nakamakgtayakan, uma ni wamputun pi kamanan nialh natlawakgo putum tuku kalakgchan xlakata nakakuentajtlawakgo xnatlatnikan.

17, 18. ¿Tukuya tayat nakamakgtaya tiku linkgoya kata chu tiku kakuentajtlawakgo?

¹⁷ Tiku linkgoya kata chu tiku kakuentajtlawakgo xlalimakgtayatkan xlakata lu tlan nalatalalin. Komo ni lakpuwankan pi lu tuwa uma lu namakgtayanan. Akxni kgolonkan, min kilhtamaku lu lilipuwankan. Wa xlakata, max natalakaskin lu naliskuja xlakata nakamaxkiya kakni tiku linkgoya kata chu nakalimatliwakglha lakwan tachuwin. Kinatalankan kalakgchan nakawaniyaw lakwan tachuwin. Jehová putum kilhtamaku lakapastaka la skujnanikgonit chu akinin nachuna tlawayaw (kalikgalhtawakga Malaquías 3:16 chu Hebreos 6:10).

¹⁸ Komo ni lakapala lisitsikan makgapitsi tachuwin o tuku natlawakan, uma namakgtayanan pi akxni natitaxtuyaw tuku tuwa ni naʼanan taʼakglhuwit (Ecl. 3:1, 4). Lhuwa natalan tiku linkgoya kata ni lhuwa tuku skinkgo. Akgatekgskgo pi tlakg tlan nakalikatsinikan chu tlakg nakalakgapaxialhnankan komo tlan likatsikgo. Lhuwa tiku kalakgankgo umakgolh natalan wankgo: «Akit xakama matliwakglha, pero wata wa kimatliwakglhli» (Prov. 15:13; 17:22).

19. ¿Tuku nakamakgtaya kamanan chu tiku linkgoya kata natayanikgo tuku tuwa natitaxtukgo?

¹⁹ Lakaskinaw kachilh kilhtamaku akxni tapatin chu talakgalhin nialh naʼanan. Pero la uku, kskujnanin Dios talakaskin nalilakapastakaw tuku Dios wanit nakinkamaxkiyan. Katsiyaw pi takanajla nema kgalhiniyaw Dios chu tuku wanit natlawa, kinkamakgtayayan akxni titaxtuyaw tuku tuwa. Xlakata uma takanajla, «ni [...]talaktuwajaw; maski wa yuma nkimaknikan ntu ntasiyuj, sputtilhama, wampi wa nkianimajkan, wa ntu ni tasiyuj, kax kgalhi litliwakga nchali chali» (2 Cor. 4:16-18; Heb. 6:18, 19). Nakinkamakgtayayan takanajla xlakata tuku Dios wanit natlawa, ¿tuku atanu na nakinkamakgtayayan nakakuentajtlawayaw kinatlatnikan tiku linkgoya kata? Kʼartículo nema aku mima nakinkawaniyan makgapitsi tuku tlan tlawakan.