1. Gini gbegberẽpai aboro agbiatiyo na ni?

YEKOVA aakusanga aboro i nirungo be surungba gbinza te. Gako ringbisapai adu nga akumba na adee dunduko du na ngbarago na wene kpotoyo rogo Paradizo. Ono awere, “ũzegino dũ mongo niukaga omehe nimbu be ima.” (Rom. 8:22) Ginipai mo aberãha tipa gu bipai du Mbori na ni tipa gu surungba ingapai du rogo aboro yo? Kurigure, dungu gbinza aboro naabitiyo nga aboro angeranga fuoyo ti gu regbo i aida na undo rogo gayo raka te.—Tam. 39:5; 2 Tim. 3:3.

2. Tipagine du aKristano ti ni na ngbarago kadu nagbinza aboro beyo rogo dungurati?

² Ga Yekova aboro na ngbarago ka ino gupai nga i na gbinza aboro dagbayo rogo dungurati. Ani nagbia undo ti gu tatamana du yo na ni na gayo kpiapai nanyakasa gaani idapase. Agurani kinaho du yo ni agumerani rogo borose yo. Ono wa vura duhe wo, ka pagume vura du dagbarani nayo watadu si te, si naida ani fu wasa gbiati ngbarago fuyo. (Gara. 6:10; 1 Pet. 1:22) Ani dunduko nika gbia undo ka ani wisigi gu bipai du Mbori na ni tipa gbinza aboro. Ani nika sakapai a tipa gu sunge du aborokporo na ni ni basasa gbiati gu du dungurati na ni tipa gaani gbinza aboro.

3, 4. (a) Gini nyanyakipa pai bake Atambuahe 71 asana Yekova tipaha? (b) Ginipai si aida gbinza aKristano sana Mbori tipaha?

³ Atambuahe 71:9 naya: “Ka mo bá nga re ku sa yo ti rago gbinza mi ya; ka mo mbú nga re ho omere ka nyasa ni ya.” Si nawira wa agi afugo atambuahe re nga papara Atambuahe 70. Na si wa Davide du naape gupai du rogo Atambuahe 71:9. Ko amangisunge fu Yekova tona kinaho ko adu ni ni paranga daho ko agbinza ni, na Yekova ki mangisunge na ko ngba iiriwo agene. (1 Sam. 17:33-37, 50; 1 Aba. 2:1-3, 10) Ono tie, Davide abihe nga si naida ko sana Yekova asana tipa ko idi na ko.—Oni gedi Atambuahe 71:17, 18.

⁴ Dungu aboro du wa Davide. Wa vura duhe nga agarãyo nange na “gbegberẽ arago” kini fudi yo, i nandu ku mbatayo kindi kaa taasarimo Mbori wa rẽ omeyo na ni. (Batu. 12:1-7) Dunguyo arengbanga ka manga agu apai i anaamangaha mbata rogo raka kodihe na tungusapai te. Ono i rengbe ka sana Yekova tipa ko undoyo na kini ngerefuo yo. Si naida ngbatunga gu gbinza aboro re du na kido nga Mbori nika degatuko adega kuti gayo kparakpee. Nirengo, gu gayo akpee re wakina gu kpee Davide amangihe du paha rogo Ziazia Kekeapai.

5. Yekova nabi gbinza aboro wai?

⁵ Ziazia Kekeapai naya Yekova nabi gu gbinza aboro du ni ruruyo fuko na nyanyaki payo na ko naida gako amoyambu niˈirisi yo airisa. (Tam. 22:24-26; Snz. 16:31; 20:29) Pa Amotumo 19:32 naya: “Oni arú ku ari bara bangiri gbinza aboro, ki niirisi kuru aboro, oni ki nigunde ti gaoni Mbori: Mi nga Yekova.” Nirengo, si anidu ni nyanyakipa pai tipa ka fu irisa fu gbinza aboro ti agu aregbo i ake agi afugo re, na kina gu bangisapai re du areme a. Ono ginipai du tipa ngerafuo yo? Gada tindiro du nga ka ngerafuo yo?

6. Gini kpiapai Yesu amoihe tipa ngerafuo avunguse?

⁶ Fugo Mbori naya furani wẽ: “Mo niirisi bamo na namo.” (Gate 20:12; Ef. 6:2) Yesu anyakasipa gi rugute re ti gu regbo ko aabira aFarusi na abakeapai nangia agu aboro naaidanga ka ngerafuo avunguyo ya. (Mk. 7:5, 10-13) Ko nitiko aima maa wene kpiapai. Ni kpiapai, ho ko aambeda ni na kpio, ko aasia pa ngerafuo nako si awira wa ri angia dekurugbo ku be gu gako bawiriki ko akpinyemuko gbe nangia Yoane.—Yo. 19:26, 27.

7. (a) Gini rugute Pauro afuhe tipa ngerafuo avunguse? (b) Ginipai naasa Pauro ko fura tipa gipai re?

⁷ Ga Mbori toro adu kugii Pauro ko kepai nga aidipase duwa ka i ngerefuo gayo aborokporo. (Oni gedi 1 Timoteo 5:4, 8, 16.) Ani bingo gupai naasa Pauro ko ke gipai re fu Timoteo. Pauro asakipai tipa gu boro si aida i undo ní na marã rogo dungurati na guni si aidanga i undo ní ya. Ko apehe gbaiga nga ka dekurugbo duho, si naida awirini, atitani na kura agumeni ngia gu bambata aboro ka ngerefuo ní. Rogo gi gene re, si adu nga ni tindiro fu dungurati ka ngerafuo ní te. Sidu, gu gene rengbe aKristano ngbaha kadu na “inapai” nga ka ngerafuo agumeyo ho du yo ni na zingo.

8. Tipagine duhe ti ni nipa tatamana nga Ziazia Kekeapai afunga arugute kpadio nibipa wai si aida i ngerafuo gbinza aboro te?

⁸ Ni wiri guruhe, gu sosono agude nga aKristano na tindiro beyo ka ngerafuo agu azingo du avunguyo na ni. Pauro aafura tipa agu agume nga aidipase, ono si aidanga bangiri aKristano rogo dungurati go ti agu avunguyo angianga aKristano  ya te. Nirengo, gu gene agude angerafuo gayo aboro ngbaha ni bakiakia. Agu apai du tipa aboro ni bakiakia a. Gayo azingo, nyemuapai, na gupai du tipa kpotoyo si ni bakiakia. Kura gbinza aboro na dungu agude beyo aguyo gude kina sa gbua beyo. Aguyo nangera ku be agbiangbii tipa i ngerefuo yo, ono aguyo amanganga ha wo te. Agu aboro du na zingo agu apai i akpinyemuhe a ni bakiakia. Sidu, si adu ni gbegberẽpai ka si du nga ani na bisirapa gu gene boro ngerafuo gbinza agumeni ngbaha. Nirengo, Yekova rengbe arengba kafu maku kurii gu diaberã du mburuhe rii Ziazia Kekeapai a wa ko amangihe ti rago Moize.—Geda 11:23.

9-11. (a) Gini kpakarapai rengbe kura aboro ka gbiatiyo na ni? (Oni bi gu sura du ti tonatonaha.) (b) Tipagine si aidanga agude mangi gu diaberã du tipa mbu mangasunge fu Yekova ti ni niipo ya? Oni funga kpiapai tipa gipai re.

⁹ Ho avunguagude araka ni tuturũ ti awiriyo, si ima mbu tipa agude ngerefuo yo na gupai i aidaha. Ka si du nga avunguyo nawoka dedede, singia guni ti ki kuo, watadu gu kura kerepai mangiyo, si idi aida agude ye ka bi avunguyo. Sidu, si rengbe kadu nga i naida na undo tipa wiri bete regbo watadu tipa gbanga regbo. *

¹⁰ Agu aboro namangasunge tungusapai ti aregbo dunduko rogo kura aringara ima rengba ka gbiatiyo na kpakarakpakara diaberã. Aguyo namangasunge Betere yo, ni amokedi, na agu abiapai ninaata ata, i dunduko nabi gu sunge i amangaha na kikiipaha na nipa maku be Yekova. Ono tie, ka avunguyo ti na kaza, gu bambata pai rengbe yo ka berãha nga, ‘Si naida ani mbu sunge tungusapai tipa ka ga ku kporo yo ka ngerafuo avungurani.’ Ono si adu ni wenepai ka kpari tipaha na ki wisigipai ka ino singia boro gupai re nzunzu avunguyo akpinyemuhe. Si aidanga boro gu nibasa ki mbu mangasunge fu Yekova te. Ya mo gupai namanga yo re nika du tipa bete regbo, nga gu rengbe kura aboro rogo dungurati ka ngerafuo yo na ni?—Snz. 21:5.

¹¹ Ani bingo gu kpiapai du tipa agu awirina ue namangasunge fu Yekova tuturũ ti kpuyo. Gu kurako sa namangasunge ni mokedi Sudiyo Amerika yo, gu kurako kini mangisunge rogo gu riibasunge nga ga zegino du Brooklyn, New York, Amerika yo. Gbinza avunguyo aaida na undo. Agi awiriyo re andu na adiayo koyo tipa ka bi wai rengbe yo ka undo yo. Sidu, aguyo namangasunge Sudiyo Amerika yo atona ka bihe nga si naida i mbu sunge amokedi ka ga ku kporo yo. Fuani, barii gu gbuu nga ga abaakumba rogo gu dungurati avunguyo adu rogoho ayambu yo rogo terefuni. Agu abaakumba du rogo gu dungurati re asakipai na ki bihe nga si naida i undo gu wirina re tipa ka ko mbunga sunge amokedi ya. Agu abaakumba re adu na tambuahe tipa gu sunge agu awirina re amangaha na ki bihe nga i nika manga ome ka undo avunguyo. Aborokporo dunduko naadu na ngbarago tipa wai i angerefuo yo wenengai.

12. Ginipai si aida agu aborokporo nga aKristano berẽhe tipa gu diaberã du tipa ngerafuo avunguyo?

¹² Ka si vura du nga gini ngbatunga diaberã du agu aborokporo nga aKristano nadihe tipa ka ngerafuo gbinza avunguyo, si naida i tingidi gupai nga gu diaberã re ayengo na gbarasarimo kuti rimo Mbori te. Ani aidanga kadu wa agu abarumbatayo rogo pambori naadu ti rago Yesu te. (Mt. 15:3-6) Ani naida gaani  diaberã fu irisa fu Mbori na fu dungurati.—2 Kor. 6:3.

13, 14. Waigu Ziazia Kekeapai ayugo na ni nga dungurati rengbe arengba ka ngerafuo gbinza boro?

¹³ Anga aboro dunduko rengbe ka undo agu aboro natungusapai ti aregbo dunduko wa gu pe ani he re te. Ono tie, gupai namangi rogo bambata sa kama agarã nayugo gupai nga dungurati na nyemu ka ngerafuo gu gbinza aboro du na azingo rogoho. Ziazia Kekeapai naya tipa gu dungurati naadu Yerusarema yo ya “a nga boro sa nadu dagba yo na zingo ahe te.” Anga si adu were nga i dunduko nangia airakumuko te. Si ziazia nga, aguyo adu kinaho nangia airarungo, ono “i ki gagamu he fu yo ki nifu kina gu fu ni zingo ho anamaga ni.” (Amo. 4:34, 35) Kusa, kurapai amangi berewe. Pangbanga aye nga kura aYudo ahe “gayo adekurugbo ahe wa i nagama ahe na uru.” Sidu, amokedi asia agu akumba narẽ na ki kedi yo i ndu ka gama ahe ngba ruru gene. (Amo. 6:1-5) Nirengo, sunge gama ahe adu tipa ka mangapai kuti gu zingo nangia ga agu aboro naada ni aKristano na ki nye Yerusarema tipa bete regbo i nyakasiyo rogo toro yo rago Pendekote rogo gu garã nangia 33. Wa si avura duwo, gupai amokedi amangihe re nayugo gupai nga dungurati rengbe arengba ka ngerafuo gu boro du na zingo.

¹⁴ Pauro afu arugute fu Timoteo tipa gupai rengbe ka sa gupai nga i ngerefuo agu adekurugbo nga aKristano rogo dungurati. (1 Tim. 5:3-16) Yakoba afura tipa wai si aida i ngerefuo awirinyaure, adekurugbo, na kura aboro ti regbo gberango watadu zingo. (Yak. 1:27; 2:15-17) Gu mokedi nangia Yoane aya: “Gu ni ka ũzegino du be ni, ni nibi wirinani na zingo, ki nikisi gani nunga be ko, ga Mbori nyemuse wiri pa nye kpotoni yo wãi?” (1 Yo. 3:17) Kangia si naida Kristano ngerefuo gu boro du na zingo, anga kina gu bangisapai re si aida dungurati mangihe te?

15. Ho oni angerani fuo gbinza aboro, gini apai si akodaha?

¹⁵ Rogo kura aringara, abazogo namanga mbakadapai tipa kaa fu marã fu agu aboro i nazogo yo ti sunge, na kini mangi kura wene apai fu gbinza aboro. (Rom. 13:6) Ono rogo kura aringara, gipai re amanganga te. Sidu, gu gene si aida agume na dungurati ngerefuo awirinayo ngbaha ni bakiakia ringbisihe kuti agu apai du tipa yo. Kangia agude naraka tuturũ ti avunguyo, si rengbe kadu  ni mbumbuhe tipa i fu undo fuyo wenengai. Si naida agu agude re fura wenengai na agu abaakumba du rogo gu dungurati du avunguyo rogoho tipa wa ka i ini gupai du tipa avunguyo wenengai. Ni kpiapai, abaakumba ima rengba ka undo avunguyo i inipai tipa wai rengbe yo ka gbia undo be gu mbakadapai duho be abazogo. I ima rengba ka bi agu apai a si aida agude inihe, ngbatunga ahe wa nyanyakipa awaraga nga gu i azakanga ha ya watadu gu dawa avunguyo adianga ha ya. Ngbatunga gu wene fugo dagbase re rengbe ka sa gupai nga ka apai gberẽnga ku mbatayo kisusi ya watadu ki mangipai sani. Nirengo, ka boro duho naundo na kini fu arugute fu avunguagude, si ima rengba ka undo awiriyo ka i dunga na bakere bakabangirise ya.

16. Wai kura aKristano aundo gbinza awirinayo rogo dungurati?

¹⁶ Mbiko gu nyemuse du dungurati na ni tipa gbinza awirinayo, gu kura aKristano ima diaberã nga i nika manga ome tipa kaa ngerafuo agu azingo nga ga awirinayo. I na maaha ni gayo sasa ka yugo nyemuse fu gu gbinza awirinayo du rogo dungurati. Aguyo nafutiyo ka ngerafuo ní na ki kparaka agu asunge si aida i mangihe dagbatiyo. Wadu he nga i ima inoho nga agu apai du tipa yo arengbanga ka mbuyo i mangisunge fu Yekova ti aregbo dunduko te, i na ngbarago tipa ka ngerafuo avungu agu awirinayo namangasunge fu Yekova ti aregbo dũ. Nangba gu ngbatunga wene sino du ti agi awirinarani re! Nirengo, anga gayo gamahe re nadia gu tindiro kusayo du agude na ni tipa ka ngerafuo avunguyo te.

17, 18. Gini bipai rengbe ka sa gupai nga ngerafuo gbinza aboro du ni wenehe?

¹⁷ Agu aboro dunduko nangerafuo gbinza aboro si aida i sa apai si du taata na ngbarago. Kangia mo dagba agu aboro namanga gipai re, mo du na wene bipai. Gbinza naye na bakere gberarago fu dungu aboro. Sidu, si naida mo mangi ome tipa ka irisa gu gbinza aboro re na kini ngarasiyo ni pe mo agu afugo nangarasi yo. Si naida mo tambua aguyo atambua niima dia gbanga regbo kutingba mangasunge fu Yekova. Bangiri Yekova gbiati akurayo aKristano agonga ti gupai i amangihe tipa ka mangasunge fu Yekova te.—Oni gedi Maraki 3:16; AEbere 6:10.

¹⁸ Kurigure, ka oni aba abuga ti wene aregbo nayo, si rengbe ka sa gupai nga ka gu nyanyaki asunge oni amangaha na aˈuru dunduko dunga ni bakere pai bangironi ya. (Batu. 3:1, 4) Dungu gbinza aboro namanga ome ka zanga mbusa agu aboro nangerafuo yo. I ima inoho nga si ima rengba ka gbarasapa ye aboro ka biyo. Dedede, agu aboro ninaandu ka bi gbinza aboro, i naape gupai nga, “Mi nindu ka ngarasa gbinza bakureami, ono kina re nigbia wasa.”—Snz. 15:13; 17:22.

19. Gini bipai si aida paranga aboro nagbinza aboro dunduko du na ni tipa raka ku mbatayo?

¹⁹ Ani nangera tipa gu regbo rungo na zangarengba nika nyasa ti ni. Ono wadu rago re, si naida ga Mbori amoyambu moi bangiriyo kuti nyenye unga. Ani ima inoho nga pa kido ani kuti ga Mbori akidohe nazada gaani idapase ti regbo fudifudiapai. Ani na tambuahe tipa gi idapase re mbiko “ani arungbura nga te; ono gu kpotorani du zegi yo navura zirã, gu tororani du ku vuru he yo i nambakada ha waragoagira.” (2 Kor. 4:16-18; Eb. 6:18, 19) Ku pati nyanyaki idapase kuti ga Mbori akidohe, ginihe rengbe ka undo roni tipa oni du na diabese rogo ngerafuo gaoni aboro? Ani nika wisigo gu kura aberãpai rogo gu kekeapai ngbefuo gere.