1, 2. a) Ka turóbuli úmabei hagagibudagua saragu iduheñu? b) Ka burí álügüdahani áfuachubei? c) Ida luba gayara lan haranserun agübürigu hama isaanigu lun le gayarabei lasuseredun ámuñegü?

 GAYARATI hiru lan houn isaanigu harihini siñaguaaña lan hagübürigu houngua ha meha buídubaña átuadi ani here hagía lidan hadaani. Háfuga aba lan léiguadun háguchi o háguchu ani aba láhalachun somu katei hawagu, o aba habulieidagun o súfuritiña somu gáriti. Ani ligibuagun lira, háfuga hénrenguti houn hagübürigu hánharun luagu wuribaali lan hátuadi ani luagu siñahaali lan herederun hábugua (Hob. 14:1). Ka gayarabei ladügǘniwa? Ida luba gayara lan hounigirún?

² Ariñagati aban arütíkulu le ayanuhabei luagu letenirún houn wéiyaaña mutu: “Íbini hénrengu lan layanuhóun luagu le asuseredubei lidan aweiyaduni, iduheñu ha añuurubaña ayanuha luagu le gayarabei ladügǘniwa ani subudi hamaali le lunbei hadügüni danme le lachülürün dan ligía, aransetimatiña lubá furumiñeguarügü katei”. Mosu wasubudiruni siñati lan wanurahan sunsuinagubei luéi turóbuli le lanügübei aweiyaduni. Ligía mosu lubéi waranserun lau dan lun wasubudiruni kaba lan desidírü wamá. Ariha waméi ida luba lan hídehan iduheñu lun hibihini katei le.

3. Ka lunbei hadügüni iduheñu eibu habusenrún hagübürigu hiderawagún? (Ariha huméi dibuhu le lídanbei lagumeseha arütíkulu.)

³ Chülüti aban dan lun lásiñarun hóunigiragun hibe-agei wéiyaaña mutu houngua ani mégeitiña hiderawagún (aliiha huméi Apurichihati 12:1-7). Dan le siñahaali hadügüni agübürigu katei houngua, dandu hagía kei hasaanigu lunti desidírü hamani ka lan luwuyeri ídemuei habusenrunbei ani mosu giñe háluahani le buídutimabei houn. Buídubei lun hañuurun ayanuha luagu kaba lan hadüga luma luagu ida luba lan hídehan kada aban. Sun hagía mosu háfaagun lun hayanuhan furangu, agübürigutima. Kei hénpulu, gayarati harihini anhein gayaragili lubéi hawinwandun agübürigu hábuguarügü hábiñe láurügü murusun ídemuei le lunbei híchuguni hasaanigu houn. * Gayarati giñe hakutihani le gayarabei ladügüni kada aban hádangiñe lun memegeirun hamá hagübürigu ni kata (Ari. 24:6). Háfuga gayarati hóunigiruniña fiú hádangiñe, ha híbiri gayarati hídehan lau seinsu. Súngubei hagía lunti gunfuranda hamani lunti lan hagunfuliruni hani buligasion lun hetenirun houn hagübürigu; gama lumoun, lau lásügürün dan gayarati lasansirun lidasin kada aban.

4. Halíaba san gayara lan háluahan iduheñu ídemuei?

⁴ Danme le hagumeserun óunigirei húguchi o húguchu, akutiha huméi sun le hiyaraati luagu hasandi. Anhein akomoradeina haña lubéi hagübürigu, akutiha humá luagu asansiruni le lunbei hagurabuni (Ari. 1:5). Amuriaha humá ídemuei tuma somu óundaruni to lani urúei to arihiboun lau hiderawagún wéiyaaña mutu. Álügüdaha humá anhein anuhein lubéi somu óundaruni lidan fulasu le ñein lubéi hawinwandan to gayaraboun tíderagunün abuiduragüdei ligaburi hetenirun houn hagübürigu. Gayarati hadiheridun lau hasaminarun gayarabei lan lasansirun le gádanbaliña hiduheñu. Kei hénpulu, libidiñedun hun kaba lan hadüga. Ayanuha humá luagu katei le luma somu humada le uágubei hafiñera. Ani le súdinitimabei, dará humóun hanigi lun Heowá, lugundun líchugubei darangilaü le hemegeirubei hun lun hagagibudagun luma furumiñeguarügü katei (Sal. 55:22; Ari. 24:10; Fili. 4:6, 7).

5. Ka uagu buidu lubéi wasubudiruni lau dan kaba lan adügǘwa lun hounigirúniwa wéiyaaña mutu?

⁵ Buídubei lun hasubudiruni wéiyaaña mutu hama haduheñu lau dan kaba lan adügǘwa. Kei hénpulu, buídubei hamuga san lun lawinwandun úguchili o úguchuru luma aban hádangiñe hasaanigu? O buídubei hamuga san hanügǘniwa tidoun haban wéiyaaña? Ka amu katei gayarabei ladügǘniwa? Íderagua lumutiña akutihani le sun iduheñu lun haranserun lubá “wadagimanu” le lanügübei aweiyaduni (Sal. 90:10). Gama lumoun, híruti madügün hamani saragu iduheñu katei le, ani lárigiñe mosu desidírü hamani katei hénrenguti le lau lóufudagun dan le anihán lan turóbuli hagibugiñe. Ariñagati aban sásaamu: “Ligíatima dan hénrengutimabei lun desidírüwa lan somu katei”. Dan le hóufudahan iduheñu desidírü somu katei, háfuga hénrengu lan houn hasubudiruni kaba lan hadüga. Luagu amu oubaü, madiheridunbaña saragu ánhaña adüga aban lubuidun aransehani (Ari. 20:18).

6. Ka uagu buidu lubéi layanuhóun luagu halíaba lan hawinwanda agübürigu derebuguhaña luma luagu ida luba lan letenirún houn?

⁶ Wuribati wasandiragun woungua dan le wasaminarun mosu lan wayanuhan hama wagübürigu luagu somu asansiruni le lunbei wadügüni múnada o luagu mosu lan háguyun lidoun amu fulasu. Gama lumoun ariñagatiña saragu gürigia luagu buidu lan layanuhóun luagu katei le. Ka uagu? Lugundun ménrengunti ladimurehóun luagu somu tema súdiniti, waganbun lau inebesei luma wadügün lubuidun aransehani lubaragiñe liabin turóbuli. Lau darangilaü, haritagubei  sun iduheñu ínsiñeni le hasandirubei hóuniwagua ani hayanuhaba sin anufudei luagu le hasaminarubei. Furanguti busenbaña lan agübürigu lun houngua hamá. Gama lumoun, ánhaña ayanuha hama hasaanigu luagu ida liña lan habusenrun letenirún houn anhein hamuga achülüra dan ligía, ménrenguntimabei houn súngubei desidírü hamá buidu.

7, 8. Ka burí tema buídubei lun hayanuhan iduheñu luagu, ani ka uagu?

⁷ Agübürigu, danme le hayanuhan hama hiduheñu, ariñaga huméi houn ka lan habusenrunbei luma ka lan himei hubéi, luma átiriñein lan seinsu huma. Ítara, gayarabei desidírü hamá buidu ánheindügü hamuga siñá lubéi desidírü humá. Háfuga busentiña harufudun inebesei lun le himei hubéi luma lun hadügüni sun hayaraati lun hasigirun awinwanda hubiñe (Efe. 6:2-4). Kei hénpulu, agurabahatün san lagunbirahanün aban hádangiñe hisaanigu lun hawinwandun lúbiñe, o busentün hamuga amu katei? Samina humá buidu ani gunfuranda huméi luagu mama lan sun gürigia ariha hamuti katei kei harihini. Haritagua huméi luagu barǘ lan dan wasansiruni ligaburi wasaminan.

⁸ Séfutiwa luéi saragu turóbuli dan le wadügün aban lubuidun aransehani ani ayanuha wagía wámagua (Ari. 15:22). Agübürigu, ayanuha humá hama hiduheñu luagu agaranihani le himei hubéi. Lidan yanu ligía mosu híriduni puntu burí le áfuachubei tidan dugumedu to lánina letenirun surusia woun to hayusuruboun gefentiña luagu Heowá. Garichatün lun hasubudiruni ka lan agaranihani gayarabei hayusuruni ani garichatün giñe lun hánharun o lun hamahadun lun. Buíngüda humóun dugumedu to lánina letenirun surusia hun lau dan, le ñein lubéi hariñagei le himei hubéi. Anúadira humá aban gürigia le uágubei hafiñera lun ligía lan ayanuha huagu luma surusia (lidan fulasu le ñein lubéi lánharua lun lúrudu le). Ítarati, gayarabei desidírü lan gürigia ligía anhein emegeirúa. Mosu ñein tan aban kopia tani dugumedu burí to súdinitu hama gürigia ha yarafabaña hun. Añahein agübürigu areidatiña aban kopia tani dugumedu burí to úara tuma hani testamentu tuma burí amu gárada súdinitu, kéiburi dugumedu to lánina lareidahóun seinsu.

9, 10. Kátima dan megei hamá agübürigu ídemuei hámagiñe hasaanigu?

⁹ Anihein dan, dandu agübürigu kei isaanigu himei hamuti houngua hamá wéiyaaña mutu. Háfuga gayaragili hábougun, harumadahan, hátuni hárani luma hayanuhan. Ligía hariñagubei houn hasaanigu lun madiheridun hamá saragu hawagu. Gama lumoun, ánhaña agumesera agübürigu abulieidagua o hagumeserun ásiñaragua houngua ani siñá hadügün somu fisiu —kéiburi hidin agañeiha—, mosu harihin isaanigu kaba lan hadüga.

¹⁰ Anihein dan, aba ladaürün lau haganbun wéiyaaña mutu, lougua ligía harihin o aba habulieidagun, hayuridagun o hawiyedagun hougua. Gayarati letenirún lun sandi burí le. Ligía súdini lubéi hanügǘn lumoun  surusia dan le lagumeseruña lan. Háfuga gayarabei hetenirun isaanigu lun turóbuli burí le, ani lau lásügürün dan, gayarabei hetenirun lun burí katei le meha hayaraabei hagübürigu adüga. Lun hetenirun houn buidu, háfuga mosu hayanuhan hawagu o hidin hama adüga somu mandóu (Ari. 3:27).

11. Ka gayarabei hadügüni isaanigu lun ménrengun lan houn hagübürigu héchudun luagu asansiruni?

¹¹ Anhein móuchaadagun agübürigu, háfuga lunti hadügün isaanigu asansiruni lidan ligaburi hetenirun houn. Anhein háfaagua isaanigu lun maweirin lan asansiruni le hadügübei, ménrengunbei houn hagübürigu lun hánharun lun. Anhein dise lubéi hawinwandun, buídurügübei funa san lun labisidahaniña aban Gefenti o aban habesina lun harihini ka lan mégeibei lun hariñaguni houn hasaanigu ida haña lan hagübürigu? Mégeitiña funa san hiderawagún lun hábougun luma lun harumadahanu haban? Gayarati funa san laransehóuniwa somu katei hábiñe lun chouru lan hasandiragun houngua, lun ménrengun lan houn hagoun o hadügüni hafisiute? Háfuga buídurügüti lachülürün somu gürigia kada átiri dan hábiñe lun híderaguniña lidan le hemegeirubei lun gayara lan hasigirun awinwanda hábugua. Anhein denchá lubéi hawinwandun hábuguarügü, gayarati mégeiwa lan lerederun somu gürigia ñein hama. Gama lumoun, lunti hálügüdahan isaanigu luagu somu programa le ichugúbei lidan fulasu le ñein lubéi hawinwanda (aliiha huméi Ariñawagúni 21:5). *

12, 13. Ka hadügübei fiú isaanigu ha awinwandubaña dise hawéi hagübürigu lun hasigirun íchiga inebesei houn ani góunigi hamaña?

¹² Sun wagía hínsiñetiña wagübürigu woun. Ligía busén wabéi lun hawinwandun gúndaañu. Wasubudiruni luagu góunigiwa hamá buidu ruti darangilaü woun. Gama lumoun, ladüga amu buligasion, saragu íbirigu mawinwanduntiña yarafa houn hagübürigu. Añahein fiú hádangiñe yusu hamuti hani bakechani lun habisidahaniña luma lun híderaguniña lidan wadagimanu le hásiñarubei adüga. Ámuya igaburi lun harufuduni hínsiñe hamá hagübürigu houn lau habürühan gárada houn gabügürügua ani agúaha hagía houn luéigiñe gágamuru. Ani gayarati hadügüni sagü weyu (Ari. 23:24, 25).

¹³ Íbini dise lan wawinwandun hawéi wagübürigu, lunti desidírü wamani ida luba lan letenirún houn. Anhein gefentiña lubéi luagu Heowá hagía, gayarati wayanuhan hama wéiyaaña lidan afiñeni ha lídanbaña damuriguaü le ñein habéi wagübürigu lun wamuriahan adundehani hama. Ani mabulieida waméi wíriduni katei le lidan wafurieidun (aliiha huméi Ariñawagúni 11:14). Íbini mama hamá gefentiña luagu Heowá hagía, lunti wagunfuliruni gumadi tídangiñeti Bíbülia lun inebe hamá woun (Afu. 20:12; Ari. 23:22). Lau sun lira, mama sun iduheñu lun desidírü hamani ligiaméme. Kei hénpulu, añahein isaanigu desidírütiña hawinwandun yarafa houn hagübürigu o hanügüniña awinwanda hámaguoun. Gama lumoun, anihein dan siñabei ítara lan. Añahein agübürigu himei hamuti mawinwandun hamá hama hasaanigu ha wéinamuhaña o hama hafamilian hasaanigu, lugundun hínsiñeti houn hábuguarügü hamá ani mabusenruntiña híchugun ihürügu ni ka un. Anhein gaseinsun habéi, háfuga busenbaña hafayeirun somu gürigia lun lóunigiruniña (Apur. 7:12).

14. Ka burí lénrengunga úmabei gayara lan lagagibudagun isaani le arihibei hawagu lagübürigu?

¹⁴ Anihein dan, isaanigu ha awinwandubaña yarafa houn hagübürigu hawagu léiguada buligasion lun hóunigiruniña. Gama lumoun, ánhaña móunigi, háfuga ladügün lira lun meteni hamá houn tílana haban buidu. Moun lumuti labulieidúniwa luagu sun lan katei gébehati.  Anhein asansiragua le gádanbalin isaani le óunigirubaliña lagübürigu, mósuya hañuurun sun iduheñu lun harihin luagu katei le. Gayarati funa san híderaguni amu lílana familia le arihibei hawagu lagübürigu? Gayarati hadügün aransehani lun hetenirun lun amu katei le hemegeirubei hagübürigu.

15. Ka gayarabei ladügün lun mabuchadun lan hawagu ha óunigirubaliña hagübürigu?

¹⁵ Dan le megei lan aban hádangiñe agübürigu letenirún lun saragu, gayarabei labuchadun luagu le ónigirubaliña (Apur. 4:6). Maribanti busén wamá wóunigiruniña wagübürigu buidu, gama lumoun áfaaguni le wadügübei gayarati labuchadagüdüniwa. Ha óunigirubaliña hagübürigu lunti harihini anhein megei habéi ídemuei. Ánhaña ídeha ha híbiri, háfuga gayarabei hasigirun óunigiraña hagübürigu sin hanügüniña hábiñoun wéiyaaña.

16, 17. a) Ida liña gayara lan hasandiragun isaanigu ha óunigirubaliña hagübürigu houngua? b) Ka gayarabei líderaguniña isaanigu lun hárügüdagun houngua? (Ariha huméi rekuáduru “Gúndaatina lau gayara lan nóunigiruniña”.)

¹⁶ Adügati warihini luriban lani aweiyaduni efekütu hawagu wagübürigu lun hiru wamá. Saragu gürigia ha óunigirubaliña hagübürigu hírutiña, gáñitiña ani sanditiña duru luma igarihabu. Anihein dan, ariñagatiña wéiyaaña mutu dimurei le moun lumuti ani arufudatiña meteingiradi. Anhein asusereda le, magañida humá lau lira. Ariñagati aban surusia dan le lan wuriba lan wasandiragun woungua luagu somu katei, furumiñeti katei le lunbei wadügüni wáfaagun lun gunfuranda wamani le asuseredubei ani lun míchugun wamani duru wawougua. Adimureha humá luagu katei le luma hani paaná, luma aban hiduhe o luma aban humada le uágubei hafiñera. Hadimurehan luagu katei le líderagubadün lun gunfuranda humani buidu le hasandirubei luma lun hárügüdagun hungua.

¹⁷ Gayarati lachülürün aban dan lun lemegeirun aban hádangiñe wagübürigu letenirúniwa lun saragu. Lidan kesi le, háfuga lunti wanügüni hábiñoun wéiyaaña. Ariñagatu aban íbiri to ñǘdünboun arihoun túguchu hábiñe wéiyaaña saragu wéiyaasu lidan dimaasu hawagu tiduheñu: “Siñati meha wetenirun tun wáguchu wein-gádürü oura. Hénrenguti meha woun desidírü wamani widin íchigoun hábiñe wéiyaaña. Hírutiwa saragu. Gama lumoun le wadügübei ligía buídutimabei, ani gunfuranda tumuti meha”.

18. Ka gayarabei hachoururuni ha óunigirubaliña hagübürigu ha derebuguhaña?

¹⁸ Gayarati hénrengu lan hounigirúniwa agübürigu ha derebuguhaña. Úati ábantima adundehani lun leseriwidun houn sun gürigia. Gama lumoun, ánhawa adüga lubuidun aransehani, wídehan hama sun waduheñu, wayanuhan furangu, ani le súdinitimabei, wafurieidun lun Bungiu, gayarabei wagunfuliruni buligasion lun wíchugun inebesei houn wagübürigu. Ítara, darangilubadiwa lau wasubudiruni letenirúña lan houn keisi lubudubu (aliiha huméi 1 Korintuna 13:4-8). Ani le súdinitimabei, gayarati wachoururuni darangilubei lan wasaminan ani luagu labinirubadiwa lan Heowá (Fili. 4:7).