1, 2. 1) Jmé kjoa xi faʼatojin je familia. 2) Jméni xi koa̱n chjónangilee yaoná. 3) Jméni xi koa̱n sʼin je xijchá kao je xti nga ska̱le je kjoa xi bitjatojiaan nga jemajchíngaa.

 NʼIO aon maná nga ʼyaa nga jetsínle nganʼio je xijcháná kʼoa nga jechʼin tjíobʼetʼale, nga tsín tichókjoanile nga síkuinda yaole. Tsakui nichxin toʼi̱koa̱n sʼe̱jinná nga je nʼainá kʼoa tsa je na̱ná kakatsʼotje̱n kʼoa katjotʼáole kʼoa tsa tokachangaleje̱ kʼoa tokacha, kʼoa tsamaije̱ kamatáo je chʼinle. Tonga je chjotajchínga kʼoati ñʼai male nga tsín tima kʼoasʼínni josʼín ngasʼa kʼoa ngisa tsa chʼin kakatʼale kʼoa tsín tikoa̱n jme xi sʼinni (Job 14:1). Jméni xi koa̱n sʼiaan nga kuinyakoaa. Jósʼin koa̱n koa̱nkuinda.

² Jngo xo̱n xi tsoya josʼin koa̱nkuinda je chjotajchínga itso: “Ninga ñʼai tíjna nga kui chobayañá joma kʼianga jemajchíngaa, tonga je familia xi kui fáoyani jokoa̱n sʼin nga kuichoka nichxin ngisa tjíonda jme kjoa xi sʼe̱le”. Nkjín koya jme xi bʼetʼaná kʼianga jemajchíngaa. Kuinga machjénni nga tongini kuiyondaa kʼoa tongini chósonnilee jmeni xi sʼiaan kʼianga jekui kjoa tiyojiaan. Kataʼyala jokoa̱n sʼin je familia nga ñaki kao kjoatsjoa kuinyakao tsa ʼya xi jekamajchíngale.

3. Jméni xi koa̱n sʼin je xti kʼianga ngisa koanchjénle nganʼio je xijchále. (Chótsenlai sén xi faʼaitʼa ya jña fitsʼiani kjoaʼmiya jebi.)

³ Chan bichóka nichxin kʼianga tsín timanile síkuinda yaole je chjotajchínga kʼoa machjénle nga ʼya xi koasenkao (Eclesiastés 12:1-7). Kʼianga jetsín tikoa̱nnile si̱kuinda yaole je chjotajchínga, tjínnele kʼoendajin kao xtile josʼin nga ngisa nda koa̱nkuinda kʼoa jmeni xi kʼoakoa̱nle nga sʼin. Sakʼoa nda bichótsjoá kʼianga tongini batiojtín nga fáoyani jmeni xi machjénle, nga bʼéndajin josʼin kʼoa nga fáoyani josʼin tsjoánganʼio nga jngó jngó. Je xti kʼoa kao je xijchá machjén nga kʼoakatatso kixi jotjío kon. Tobʼelañá, je xijchá xi toje tjío, a koaan nga tojo ya koationi ya niʼyale. * Kʼoati koa̱n kjaoyani josʼin nga jngó jngó kʼianga nda katamasinle je xijchále (Prov. 24:6). Tsakui nichxin tjínkʼa xi nyaon nyaon sikuinda je xijchále kʼoa je xi ngikʼa tsakui nichxin totao̱n tsjoá. Ngatsʼi tjínnele nga sitjoson jme xi kjinele. Tonga kʼoati koa̱n nga sa jela xi ngikʼa kʼoasʼinngá jmeni xi tjíosʼín xi ngikʼa nga jekoai nichxin.

4. Jñáni koa̱n sijé nganʼio je familia.

⁴ Kʼianga si̱kuindai je nʼaili kʼoa tsa na̱li tjasjaiyai jme chʼin xi tjínle. Tsakui tjínle je chʼin xi sa táo sa táo ma, jchaní joma je xi kui chʼin tjínle (Prov. 1:5). Tʼin ya jñani tjío je jtín xi tsʼe gobierno jñani binyakao je chjotajchínga. Kʼoa chjónangiyai tsa jñani koa̱n koasenkaoli kʼoa tsa koasenkaoje̱ xijcháli nga ngisa nda koa̱nkuinda. Kʼianga sa kjaʼaí sa kjaʼaí sʼin je chjotajchíngali tsakui nichxin likui ti̱jchani josʼiain. Tsakui nichxin chʼao sʼe̱ tokuin kʼoa ba koa̱nli. Chja̱kaonajmí je miyoli xi nʼiotʼai kʼoa kʼoatʼinlai jomali. Tonga je xi ngisa machjén nga kʼoakʼuínlai jotjín tokuin jé Jeobá, nga̱ je xi koa̱nle nyʼán kʼoe kjoafaʼaitsjenli kʼoa kui xi koasenkaoli nga kuitjátojin tojme kjoani (Sal. 55:22; Prov. 24:10; Filip. 4:6, 7).

5. Ánni nga ndatjínsíni nga tongi katafáoyani je chjotajchínga kʼoa kao je xtile josʼin koa̱nkuinda.

⁵ Nʼio ndatjín nga je chjotajchínga kʼoa kao je familiale tongini kʼoakatatsole xínkjín jmeni xi sʼin. Tobʼelañá, a koaan tsa ya ndʼiale tile kʼoa tsa tsotile koaikʼejnani je chjotajchínga. Kʼoati koa̱n koasjaisale jokoa̱n sʼin. Tsa kʼoasʼin kui xi tongini sikatíonda nga chókjoajinle je kjoañʼai xi tje̱nkao nga jemajchíngaa (Sal. 90:10). Je familia xi tsín tongini bʼéndajin josʼín kʼiaani nʼio ñʼai male nga jetíjnanele kjoa kʼoa saʼnda likui tinda kosonnile jmeni xi sʼín. Jngo chjotachjine xi i̱ kitso: “Nʼio ñʼai tjínle nga kʼia kʼoasʼiaan nga jekui kjoa tiyojiaan”. Kʼianga xitso xiská kʼoasʼín je familia, alikui tongóson sʼin síkjaʼaitsjen nga jngó jngó kʼoa tsakui nichxin saʼnda estrés sʼe̱le. Tonga tsa tongini nda kʼoéndajin alikui nʼai koa̱nle (Prov. 20:18).

6. Ánni nga ndatjínsíni nga tongini chja̱kaonajmí je xijchá tʼatsʼe jñani koaikatio kʼoa josʼin koa̱nkuinda.

⁶ Toxá ñʼai maniná nga kʼoaʼmilee je xijcháná nga machjén nga kjaʼaí si̱chonlee niʼyale ánni nga tsín ñʼai koa̱nsínile kʼoa tsa machjénje̱ nga sikʼantjaiya jñani tjío. Tonga nʼio nkjín chjota xi kʼoatso nga nda bichómani nga tongini chobayañá jmeni xi nʼia. Ánni. Kuinga ngisa choa ñʼai maná nga chobayañá je kjoa xi ñʼai tjín, ngasin nganda noʼyalee xíngiaa kʼoa tongini nda bʼendajiaan josʼiaan nga jekui tiyojiaan. Kʼiatsa nda tiyokoaa xíngiaa, koaan tokoán nga kʼoakuixoán josʼin nikjaʼaitsjeen kʼoa ngatsʼiaa jchañá jokji tsjoachaa xíngiaa. Tsakui nichxin kʼoasʼin koa̱nmele  je xijchá nga tojéla sisinle yaole jokji tje̱n kʼoakoa̱nle. Kʼiatsa tongini kjoakao je xtile jósʼin mele nga koa̱nkuinda, ngisajin choa ñʼai koa̱nle nga nda skoéjin jmeni xi sʼin.

7, 8. Jméni xi ndatjín nga katafáoyani je familia, kʼoa ánni.

⁷ Jon xi xijchá mao, kʼoatʼinlao je xtino kʼianga cho̱banajmío jmeni xi meno sʼiaon kʼoa jotjín tao̱n tíjnano xi si̱chjaon. Ánni nga je xtino kʼoasʼinsíni jmeni xi tsín tikʼoakoa̱nnino sʼiaon. Kʼoajinsʼin jokʼuínlao kʼoa koa̱nsenkaojinno jokji tje̱n kʼoakoa̱nle ánni nga tojo kʼoasʼiansíño jonʼiao ngantsjai (Efes. 6:2-4). A meno nga kʼoakuitsono je xtino nga ya koanngínkiyokaoño ya niʼyale axo jméni xi meno. Tonga kʼoati kuenta tʼiaon nga tsín tongóson kuitso je xtino. Tikjaʼaitsjaon nga tsín tokjoan mangóson kjoafaʼaitsjenná.

⁸ Kʼiatsa ñá xi tongini kʼoéndajiaan kʼoa cho̱banajmiá alikui nanda kjoa so̱ko (Prov. 15:22). Kʼoatʼinlao je familiano josʼin nga meno nga koa̱nxkino. Kʼianga cho̱banajmío koaan kui chobayaño jmeni xi tso je directriz médica xi chʼá xi testigole Jeobá maa. Tjínno ʼnde nga kʼoakʼuínno josʼin koa̱nxkino kʼoa kʼoati tjínno ʼnde nga kʼoakuixón tsa meno kʼoa tsa mai. Tʼetʼao xo̱n jebi josʼin meno nga koanxkino. Xi ijngosani, koa̱n chjoéjin jngo xi nʼiotʼao nga je xi representante legal katamano, nga̱ tsa totseni koa̱nchjén jé kuinchja̱ngajaono josʼin koa̱nxkino. Machjén nga jngo copia katasʼejnano jon kʼoa kʼoati jngo copia katasʼejnale xi síkuindano. Tjínkʼa chjotajchínga xi ya fáyojinle xo̱n jebi je xo̱n xi nʼio chjíle, jolani tsa xo̱n xi tsʼe banco, xo̱n xi tsʼe seguro kʼoa tsa jmesa xo̱nnije̱.

9, 10. Kʼiáni nga ngisa koa̱nchjénle nganʼiole je xtile je chjotajchínga.

⁹ Je xijchá kʼoa kao je xtile sakʼoa kui xi mele nga kʼoakatasʼín je chjotajchínga jmeni xi kʼoakoa̱nle. Tsakui nichxin masale tojé bʼénda xi kjine, sítsje niʼyale, kjine xkile kʼoa ndasa nchja̱. Kuinga tsín machjénsíni nga je xti kʼoakuitsoyejele jmeni xi sʼin. Tonga jokji nga koai je nichxin, tsa sa jcha sa jcha kjoafaʼaitsjenle je xijchá, likui tinanda koa̱n kuinchja̱ni, likui tichókjoanile jme xi sʼin, jolani tsa tsín tikoa̱nnile koaikatse jme xi machjénle, machjénní nga je xtile jesisinle.

¹⁰ Je xi jechjotajchínga sakʼoa likui tibeni jme xi sʼín kʼoa sakʼoa to ba satío kon. Tsakui nichxin likui tinda nrʼoéni, likui tinda matsennile, tsa tojechangale kjoafaʼaitsjenle kʼoa tsa tsín tibeni yaole nga bʼejna kʼoa nga songi. Kʼiatsa jekui tísʼele tojñanile chʼin jebi, tsakui nichxin tjín xki xi koasenkao. Kʼianga tosʼa tíbʼatsenle koaan kjitʼanangi katafikao tsʼe chjinexki je xtile. Chan kuicho nichxin nga je xti kʼoasʼin jmeni xi kʼoasʼín tsakai je chjotajchínga. Kʼianga nda sikuinda xti je chjotajchíngale machjén nga je kuinchja̱ntjai, je kʼoenda  tsa jme xo̱n xi koa̱nchjénle kʼoa je koaikaoje̱ tsa jñani koai (Prov. 3:27).

11. Jméni xi koa̱n sʼiaan nga tsín ñʼai koa̱nle xijchá tsa jme xi si̱kʼantjaiyaa.

¹¹ Kʼiatsa tsín mandaya je chʼin xi tjínle xijchá, tsakui nichxin machjén nga kʼoantjaiya josʼin koa̱nkuinda. Kʼiatsa tochoa xi kʼoantjaiya ngisa choa ñʼai koa̱nle je chjotajchínga. Kʼiatsa kjin tjío je xtile koaan tsa jngo ndsʼee kʼoa tsa jngo tichjaa koaikotsenntsjaile kʼoa koajinkon je xtile josʼin tjíoni xijchále. Kʼoati koa̱nje̱ tsa je kʼoasʼin jngo chjota xi ya chrian tsʼe. Tsakui nichxin tokui xi machjénle nga tjín xi katabʼéndale tsojmi xi ski̱ne kʼoa nga tjín xi sitsje niʼyale. A koaan nga koa̱ndachon choale ya niʼyale ánni nga tsín ñʼai koa̱nsínile nga kʼoámje kʼoa nga koa̱nngóya. Tsakui nichxin tokui xi machjénle nga tjín xi kuinyakao ya yaniʼya. Tonga kʼiatsa tsín tikoa̱n nga toje koationi, machjén nga tjín xi kuinyakaontsjai. Tojñanile kjoa xi kuitjátojion tjasjao nganʼio xi tjín ya jñani tsaon xi koa̱n kuinyakaono * (tʼexkiai Proverbios 21:5). *

12, 13. Jótjíosʼín kʼa je xti xi kjin tjíole xijchále kʼianga tjíobexkón kʼoa tjíosíkuinda.

¹² Je xti xi tsjoake xijchále kui xi mele nga nda katamakuinda je xijchále. Kʼianga be nga nda kjimasinle xijchále alijme xi nʼio síkjaojin. Nʼio nkjín xti xi tsín ya chrian tjío jñani tjío je xijchále. Kʼianga bʼaile nichxin nga síkjáya tjínkʼa xi kʼoasʼin síchjén nichxinle nga xijchále fikotsenle kʼoa fikinyakao. Tobʼelañá, kui kʼoasʼín je xá xi tsín tikʼoamanile xijchále. Jósʼin koakole kjoatsjoacha xijchále je xti. Koaan kjitʼa kuinchja̱le teléfono, kʼoa tsa nyaon nyaon kuinchja̱leje̱. Koaan xo̱n sikasénle kʼoa tsa correo skíle (Prov. 23:24, 25).

¹³ Ninga kjin tjío je xijcháná koaan si̱kjaʼaitsjeen jméni xi machjénle nga nyaon nyaon. Kʼiatsa testigole Jeobá ma, koaan chja̱kaonajmiá je xi chjotajchínga sʼin tjío ya jinjtín ánni nga je tsjoásíniná kjoafaʼaitsjen josʼiaan. Koaan kʼoati kʼoétsʼoantjé je xijcháná (tʼexkiai Proverbios 11:14). * Kʼoa ninga tsínlani testigole Jeobá ma je xijcháná, tojo machjén nga jchaxkoán nga si̱tjosoán je Énle Niná (Éx. 20:12; Prov. 23:22). Kjoaixi nga kjaʼaí kjaʼaísʼin nikuindaa je xijcháná. Tjínkʼa xti xi kʼoasʼin mamele nga ya katafikʼejnakaoni tsa nʼaile kʼoa tsa na̱le kʼoa tsamaije̱ ya katafikʼejnachrian jñani tjío. Tonga sakʼoa likui kʼoama. Tjínkʼa xijchá xi tsín mele nga ya koaikatiokaoni xtile kʼoa tsa xínkjín. Kui kʼoasʼínni nga tsín mele nga ʼya xi kʼoakuitsole jmeni xi sʼin kʼoa nga tsín mele nga ʼya xi ai katamale. Kʼiatsa bichó nganʼiole, tsakui nichxin tosa jngo chjota koasjai xi kʼoechjíle nga sikuinda (Ecl. 7:12).

14. Jméni xi sakʼoa ñʼai koa̱nle je xi tísíkuinda xijchále.

¹⁴ Nʼio nkjín familia tjín jñani nga tojngo xi kanele nga síkuinda je chjotajchíngale, jolani je xi ya chrian tíjna. Tonga je xi ngisa síkuinda xijchále tjínnele nga skósonnile josʼin ánni nga kʼoati koa̱nkuindasínile familia xi tsʼe. Nga̱ tsín tsa toʼa ʼndele kʼoa tsín tsa totjínntsjaile nganʼio. Tsa toʼi̱koa̱n tsín tikʼoakoa̱nnile nga je sikuinda je chjotajchínga, tjínnejinle nga ijngokʼa sʼe̱ndajin josʼin koa̱nkuinda. Kuinga machjénsíni nga si̱kjaʼaitsjeen tsa ʼya xi nʼio tíkanele xá josʼin kjimakuinda je  chjotajchínganá. A koaan nga ngisa tsjoánganʼio je xti xi ngikʼa. Tsakui nichxin koa̱n kjaʼaí kjaʼaí xi sikuinda.

15. Jósʼin koa̱n kʼoainganʼiole je xi tísíkuinda chjotajchínga nga tsín katabijtajinle.

¹⁵ Kʼianga jemachjénle xijchá nga koa̱nkuinda ʼndeʼnde tsakui nichxin chan kuijtajinle je xi tísíkuinda (Ecl. 4:6). Toxá meniná nga nda si̱kuindaa je xijcháná tonga kʼoati bijtaná. Je xi kui kjoa tjíojin tjínnele nga skósonnile kʼoa sikjaʼaitsjen tsa machjénle nga ʼya xi koasenkao. Kʼianga kjitʼa tsjoánganʼio ngatsʼi je xti kui xi koasenkao je xi tísíkuinda chjotajchínga nga tsín ya kjoejin nganʼiole.

16, 17. 1) Jósatío sakʼoa kon je xti kʼianga tjíosíkuinda xijchále. 2) Jméni xi koasenkao je xti nga tsín chʼao katasatío kon. (Chótsenlai je rekuadro xi tso: “Tsjoa tjínna nga tisikuinda”.)

¹⁶ Ba maná kʼianga ʼyaa je kjoañʼai xi faʼá xijcháná kʼianga jekamajchínga. Nʼio nkjín je xi síkuinda chjotajchíngale xi ba satíole, xi síkjaojin, xi tsʼe satío kon, xi majtile, xi toje bánele jée yaole kʼoa xi saʼnda sʼengijti kon. Sakʼoa ai nchja̱ je chjotajchínga kʼoa sakʼoa likui tsjoá kjoanda. Kʼiatsa kʼoasʼín je chjotajchíngali ali tokjoan nijtijinlai yaoli. Jngo especialista xi kui kotʼa kjoafaʼaitsjenná kʼoatso nga je xi basenkaoná kʼianga chʼao sʼe tokoán, kuinga kʼoakuixoán nga kui kjoa tjínná kʼoa nga tsín chʼao katasʼe tokoán nga kʼoakjimaná. Kʼoatʼinlai jotjín tokuin tsa xʼinli kʼoa tsa chjoónli, tsa jngo xíngi kʼoa tsa jngo miyo xi nʼiotʼai. Kui xi koasenkaoli nga koa̱njinli jomali kʼoa nga tsín chʼao sʼe̱ tokuin.

¹⁷ Kʼiatsa kjoaʼaí nichxin nga tsín tikʼoakoa̱nnile je xti nga nda sikuinda je xijchále, tsakui nichxin nganʼiosa koa̱nchjénle nga koa̱nkuinda je chjotajchínga kao nichxin kao nitje̱n. Jngo tichjaa xi nyaon nyaon kikotsenle je na̱le nga tsakʼejna ya jñani batio je chjotajchínga itso: “Likui kʼoakoa̱nnajin nga kao nichxin kao nitje̱n kinikuindaijin je manajin. Alikui choa ñʼai koannajin nga ya kinikasáinjin ya jñani batio je chjotajchínga. Nʼio chʼao kisʼe tokuinjin. Tonga tokʼoasʼin nga ngisa nda koansinle jotjínsa sá tsakʼejna kʼoa kʼoati kitso tsanda je nga nda kinʼiaijin nga ya tsangínkoaijin”.

18. Jméni xi tsín jao katasʼele je xi nda síkuinda xijchále.

¹⁸ Tsakui nichxin ñʼai koa̱nná je xá xi kjinená nga si̱kuindaa je xijcháná kʼoa nʼio sikijtajinná. Ali tsa tojngojin koya tjín josʼin nga nda si̱kuindaa je chjotajchínganá. Tonga tsa nda kʼoéndajiaan kʼoa kʼoainganʼioá ngatsʼiaa ya familianá, ñaki nda chobayañá jmeni xi sʼiaan kʼoa kʼoétsʼoalee je Jeobá, kuitjosonná je xá xi kjinená nga si̱kuindaa je chjotajchínganá. Kʼoa nda sʼe̱ tokoán nga jchaa nga nda kjimasinle kʼoa nga tíbʼaile jmeni xi machjénle (tʼexkiai 1 Corintios 13:4-8). Je xi ngisasa chjíle kuinga tsín jao tjínná nga nyʼán sʼe̱ kjoafaʼaitsjenná kʼoa nga sichikontʼainná je Jeobá (Filip. 4:7).