1, 2. а) Бирӕ бинонтӕ цавӕр зындзинӕдтыл сӕмбӕлынц ӕмӕ сӕ цавӕр фарстатӕ аскъуыддзаг кӕнын фӕхъӕуы? ӕ) Бинонтӕн сӕ бон куыд у ивындзинӕдтӕм сӕхи бацӕттӕ кӕнын?

КУЫД зын вӕййы адӕймагӕн, йӕ ацӕргӕ ныййарджытӕ сӕхимӕ кӕсынхъом куы нал вӕййынц, уӕд. Кӕд раздӕр фидар ӕмӕ рӕвдз уыдысты, уӕд ныр та ӕнӕ искӕй ӕххуысӕй сӕ бон нал у. Вӕййы афтӕ дӕр, ӕмӕ ацӕргӕ адӕймаг ахауы ӕмӕ дзы исты асӕтты. Иуӕй-иу ацӕргӕтӕн та сӕ зонд адзӕгъӕл вӕййы ӕмӕ, искуыдӕм куы ацӕуынц, уӕд фӕндаг нал фӕарынц. Кӕмӕдӕрты та сӕ цавӕрдӕр уӕззау низ ссарынц. Ӕмӕ адӕймаг йӕ зынаргъ мад кӕнӕ фыды тыххӕй ахӕм хабӕрттӕ куы фехъусы, уӕд йӕ зӕрдӕ куыннӕ фӕриссы. Фӕлӕ зын ӕрмӕст сывӕллӕттӕн нӕ вӕййы, фӕлӕ ма ацӕргӕ ныййарджытӕн сӕхицӕн дӕр. Зын сын вӕййы, се ’нӕниздзинад кӕй фӕцуды ӕмӕ уый тыххӕй сӕхи бон алцы кӕй нал вӕййы аразын, уый (Иов 14:1). Ахӕм уавӕры цы ис саразӕн? Куыд ис ацӕргӕтӕн баххуыс кӕнӕн?

² Ацӕргӕтӕм куыд кӕсын хъӕуы, уый фӕдыл иу статьяйы фыст уыди: «Ацӕргӕтӕ цы зындзинӕдтыл ӕмбӕлынц, уыдоныл ныхас кӕнын ӕнцон нӕ вӕййы. Фӕлӕ уыцы хъуыддӕгтыл рагацау чи аныхас кӕны ӕмӕ алцыдӕр рагацау чи спълан кӕны, ахӕм бинонтӕ цыфӕнды зындзинӕдтӕм дӕр цӕттӕ разынынц». Адӕймаг кӕй зӕронд кӕны, уый ныхмӕ махӕн нӕ бон ницы у саразын. Фӕлӕ уӕддӕр  бинонтӕн сӕ бон у уыцы ивындзинӕдтӕм сӕхи рагацау бацӕттӕ кӕнын ӕмӕ уый фӕрцы зын уавӕрты раст архайын. Ӕркӕсӕм, уый сӕ бон куыд у аразын, уымӕ.

3. Ацӕргӕ ныййарджыты фылдӕр ӕххуыс куы бахъӕуа, уӕд бинонтӕн сӕ бон цы у саразын? (Кӕс нывмӕ 25 фарсыл.)

³ Ацӕргӕтӕн сӕхи бон куы нал вӕййы сӕхимӕ кӕсын, уӕд сӕ фӕхъӕуы искӕй ӕххуыс. (Бакӕс Екклесиаст 12:1–7.) Ахӕм уавӕры хъуамӕ сӕ сывӕллӕттимӕ иумӕ бауынаффӕ кӕной, хуыздӕр куыд уыдзӕн бакӕнын ӕмӕ сӕ бон цы у саразын. Хорз уаид, бинонтӕ иууылдӕр куы ӕрӕмбырд уаиккой ӕмӕ иумӕ куы аныхас кӕниккой, чи сӕ цы хӕстӕ ӕххӕст кӕндзӕн ӕмӕ куыд. Се ’ппӕт дӕр, уӕлдайдӕр та ныййарджытӕ, хъуамӕ сӕ уавӕрмӕ раст цӕстӕй кӕсой ӕмӕ сӕ хъуыдытӕ ӕргом дзурой. Бинонтӕн сӕ бон у ахъуыды кӕнын: ныййарджытӕн дарддӕр дӕр сӕ бон бауыдзӕн хицӕнӕй цӕрын ӕви нӕ? * Чи сӕ цы араздзӕн, цӕмӕй сӕ ныййарджытӕ мацы цух уой? (Ӕмб. 24:6). Чи зоны сӕ кӕмӕндӕр йӕ бон бауа, алы бон цы хъуыддӕгтӕ кӕнын фӕхъӕуы, уыдон кӕнын, кӕмӕндӕр та – ӕхцайӕ ӕххуыс кӕнын. Алчидӕр сӕ хъуамӕ зона, цы аразын ӕй хъӕуы, уый. Фӕлӕ рӕстӕг куы рацӕуа, уӕд сӕ, чи зоны, сӕ хӕстӕ фӕивын дӕр бахъӕуа.

4. Бинонты сӕ ныййарджытӕм кӕсын куы бахъӕуа, уӕд сӕ бон кӕм у ӕххуыс ссарын?

⁴ Кӕд дӕ дӕ ныййарӕгмӕ кӕсын бахъуыд, уӕд хорз уаид, йӕ низы тыххӕй йын фылдӕр куы базонис. Кӕд ахӕм низӕй рынчын у, ӕмӕ фыддӕрӕй-фыддӕр кӕндзӕн, уӕд базон, уыцы низ адӕймагыл куыд фӕзыны, уый тыххӕй (Ӕмб. 1:5). Уӕ бӕстӕйы хицауад ацӕргӕтӕн цы организациты уылты ӕххуыс кӕны, уыдонмӕ бацу ӕмӕ базон, дӕ бон цавӕр мадзӕлттӕй у спайда кӕнын, цӕмӕй дӕ ныййарджытӕн дӕр хуыздӕр уа ӕмӕ дӕуӕн дӕр ӕнцондӕр уа дӕ хӕс ӕххӕст кӕнын. Уӕ бинонты уавӕр бынтондӕр кӕй фӕивдзӕн, ӕрмӕст ууыл хъуыды кӕнгӕйӕ дӕр, чи зоны, дӕ къухтӕ ӕруадзай. Ахӕм рӕстӕг-иу дӕ хорз ӕмбалимӕ аныхас кӕн, цы дӕ тыхсын кӕны, ууыл. Сӕйраджыдӕр та-иу дӕ зӕрдӕйы сагъӕстӕ Йегъовӕйӕн радзур. Хуыцау дӕ йӕ фарнӕй схайджын кӕндзӕн, цӕмӕй цыфӕнды зын уавӕры дӕр дӕ бон уа фидар фӕлӕууын (Пс. 55:22; Ӕмб. 24:10; Фил. 4:6, 7).

5. Ацӕргӕ адӕймагӕн хуыздӕр цы уыдзӕн, уый тыххӕй бинонты рагацау цӕмӕн хъӕуы базонын?

⁵ Иуӕй-иу ацӕргӕтӕ ӕмӕ сӕ бинонтӕ рагацау аныхас кӕнынц дохтыртимӕ ӕмӕ, йӕ ацӕргӕ ныййарджытӕм чи кӕсы, уыдонимӕ. Ӕмӕ афтӕмӕй базонынц, кӕсын кӕмӕ фӕхъӕуы, ахӕм ацӕргӕтӕн хуыздӕр цы вӕййы – фыртимӕ цӕрын ӕви чызгимӕ, ӕви сӕм цӕмӕй хӕдзармӕ ӕндӕр исчи цӕуа ӕмӕ сӕм кӕса. Ахӕм бинонтӕ ӕмбарынц, адӕймагӕн йӕ зӕронды бонтӕ «маст ӕмӕ фыдӕбон» кӕй сты, ӕмӕ уыцы зындзинӕдтӕм сӕхи рагацау бацӕттӕ кӕнынц (Пс. 90:10). Алцӕуыл дӕр рагацау чи нӕ ахъуыды кӕны, уыцы бинонты та зын фарстатӕ лыг кӕнын талф-тулфӕй бахъӕуы, тыхст уавӕры куы бахауынц, уӕд. Ӕмӕ, иу иртасӕг куыд загъта, афтӕмӕй «ахӕм фарстатӕ лыг кӕнынӕн уый у ӕппӕты ӕвзӕрдӕр рӕстӕг». Бинонты ӕвӕстиатӕй ахсджиаг уынаффӕ рахӕссын куы фӕхъӕуы, уӕд стыхсынц ӕмӕ сын иу хъуыдымӕ ’рцӕуын дӕр зын вӕййы. Фӕлӕ сӕхи рагацау куы бацӕттӕ кӕной, уӕд сын тыхст уавӕры раст архайын ӕнцондӕр уыдзӕн (Ӕмб. 20:18).

6. Ацӕргӕ ныййарджытӕм кӕсын куы бахъӕуа, уӕд куыд ӕмӕ кӕм цӕрдзысты, уый тыххӕй семӕ аныхас кӕнын хорз цӕмӕн у?

⁶ Дӕ ныййарджыты хӕдзары цыдӕр ивын кӕй бахъӕудзӕн кӕнӕ та сӕ ӕндӕр искуы кӕй бахъӕудзӕн цӕрын, уый тыххӕй семӕ аныхас кӕнын дӕм, чи зоны, зын кӕса. Фӕлӕ бирӕтӕ куыд зӕгъынц, афтӕмӕй, сӕ ныййарджытимӕ кӕй аныхас кодтой, уый сын фӕстӕдӕр стыр ӕххуыс фӕци. Ӕмӕ ӕцӕгдӕр, цалынмӕ бинонтӕ зын уавӕры нӕ бахауынц, уӕдмӕ сын ӕнцондӕр вӕййы хъуыддагыл сабырӕй аныхас кӕнын, стӕй кӕрӕдзимӕ лӕмбынӕг байхъусын ӕмӕ кӕрӕдзи бамбарын дӕр. Кӕрӕдзийӕн сӕ хъуыдытӕ рагацау фӕлмӕнӕй куы бамбарын кӕнынц, уӕд сын фӕстӕдӕр уынаффӕтӕ хӕссын ӕнцондӕр вӕййы. Чи зоны, ацӕргӕ ныййарджыты  фӕнды, цалынмӕ сӕ бон у, уӕдмӕ хицӕнӕй цӕрын. Фӕлӕ уӕддӕр хорз уаид, сӕ цотимӕ куы аныхас кӕниккой, фылдӕр ӕххуыс сӕ куы бахъӕуа, уӕд цӕуыл сразы уыдзысты, уый тыххӕй.

7, 8. Бинонты цӕуыл хъӕуы аныхас кӕнын ӕмӕ цӕмӕн?

⁷ Ныййарджытӕ, уӕ сывӕллӕттимӕ ахӕм хабӕрттыл куы ныхас кӕнат, уӕд-иу сын ӕргом зӕгъут, уӕхи цы фӕнды, уый тыххӕй, стӕй уӕ къух цас амоны, уый тыххӕй дӕр. Ӕмӕ, мыййаг, фӕстӕдӕр уӕхи бон куы нӕ уа уынаффӕ рахӕссын, уӕд уыдон бакӕндзысты, сымах куыд бакодтаиккат, афтӕ. Кӕй зӕгъын ӕй хъӕуы, уӕ сывӕллӕттӕ уӕ фӕндонӕн аргъ кӕнынц ӕмӕ архайдзысты, цӕмӕй, уӕ бон цы у, уый дарддӕр дӕр уӕхӕдӕг аразат (Еф. 6:2–4). Мыййаг уӕ уый фӕнды, цӕмӕй уӕ уӕ сывӕллӕттӕй исчи йӕхимӕ акӕна ӕмӕ йемӕ цӕрат? Ӕви сӕм ӕндӕр цӕмӕдӕр ӕнхъӕлмӕ кӕсут? Рох уӕ ма уӕд, ныййарджытӕ ӕмӕ сывӕллӕттӕ уыцы иу фарстамӕ алы хатт иухуызон цӕстӕй кӕй нӕ фӕкӕсынц, ӕмӕ сӕ рӕстӕг кӕй фӕхъӕуы, цӕмӕй сӕ хъуыды фӕивой.

⁸ Алчидӕр хъуамӕ ӕмбара, бинонтӕ кӕрӕдзиимӕ ӕргом куы аныхас кӕной ӕмӕ алцыдӕр куы спълан кӕной, уӕд сӕхи уӕлдай зындзинӕдтӕй кӕй бахиздзысты (Ӕмб. 15:22). Уӕдӕ аныхас кӕнут, цавӕр хос кӕныны мадзӕлттӕ ис ӕмӕ дзы кӕцытӕ равзардзыстут, ууыл дӕр. Ӕркӕсут-иу, Йегъовӕйы Ӕвдисӕнтӕн туджы тыххӕй цы документ ис, уымӕ ӕмӕ дзы цы хъуыддӕгтыл цӕуы дзырд, уыдоныл-иу аныхас кӕнут. Алы адӕймагӕн дӕр ис уый бар, цӕмӕй зона, цавӕр мадзӕлттӕй йын хос кӕндзысты, уый. Стӕй сыл сразы уыдзӕн ӕви нӕ, уый дӕр йӕхи бар у. Ӕмӕ туджы документы фыст вӕййы, адӕймаг хос кӕныны мадзӕлттӕй кӕцытыл у разы, уый тыххӕй. Адӕймагӕн йӕ бон у, кӕуыл ӕууӕнды, ахӕм искӕй равзарын, цӕмӕй, куы бахъӕуа, уӕд дохтыртимӕ йӕ номӕй аныхас кӕна (кӕд сӕ бӕстӕйы закъонмӕ гӕсгӕ уый гӕнӕн ис, уӕд). Ацӕргӕ адӕймагмӕ хъуамӕ ӕнӕмӕнг уа туджы документ, ӕмӕ ма уыцы документы къопитӕ хъуамӕ уой, чи йӕм кӕсы, стӕй, йӕ номӕй чи дзурдзӕн, уыдонмӕ дӕр, цӕмӕй дзы бахъуаджы сахат спайда кӕной. Ацӕргӕтӕй иуӕй-иутӕн сӕ туджы документы къопи вӕййы сӕ иннӕ документтимӕ.

9, 10. Ныййарджыты сӕ цоты ӕххуыс тынгдӕр кӕд бахъӕуы?

⁹ Арӕхдӕр бинонтӕй алчидӕр ууыл фӕархайы, цӕмӕй ацӕргӕтӕм афтӕ ма кӕса, ӕмӕ сын сӕ къухтӕ ӕмӕ сӕ къӕхтӕ бӕттынц. Бирӕтӕн сӕ сӕхи бон вӕййы хӕринаг кӕнын, ӕфснайын, хостӕ афоныл нуазын ӕмӕ иннӕтимӕ ныхас кӕнын. Ӕмӕ сын уӕд сӕ алы къахдзӕфмӕ дӕр хъус дарын нӕ фӕхъӕуы. Фӕлӕ рӕстӕг куы рацӕуа, уӕд, чи зоны, тынг рохгӕнаг суой, кӕнӕ сын цӕуын фӕзындӕр уа ӕмӕ сӕ бон дуканимӕ ацӕуын дӕр мауал уа. Ӕмӕ уӕд бинонты хъӕудзӕн сӕ царды цыдӕртӕ фӕивын.

¹⁰ Зӕронд адӕймаг арӕх йӕхимӕ ныхъхъусы, цӕмӕйдӕрты фӕтыхсы. Стӕй ма йе ’нӕниздзинад дӕр фӕцуды, зӕгъӕм, цӕстӕй хорз нал фӕуыны, хъусӕй хорз нал фӕхъусы, свӕййы рохгӕнаг кӕнӕ йӕ доныхуыпп нал фӕуромы. Фӕлӕ бинонтӕ дохтырты ӕххуыс афоныл куы бацагурой, уӕд, чи зоны, уавӕр гыццыл фӕхуыздӕр уа. Ӕмӕ сывӕллӕтты, чи зоны, сӕхи бахъӕуа дохтыртимӕ баныхас кӕнын. Гӕнӕн  ис, ӕмӕ сӕ бахъӕуа, сӕ ныййарджытӕ раздӕр сӕхӕдӕг кӕй арӕзтой, уыцы хъуыддӕгтӕ аразын дӕр, зӕгъӕм, сӕ номӕй дзурын, цавӕрдӕр гӕххӕттытыл зилын, кӕдӕм сӕ хъӕуа, уырдӕм сӕ ласын ӕмӕ афтӕ дарддӕр (Ӕмб. 3:27).

11. Исты ивындзинӕдтӕ скӕнын уӕ куы хъӕуа, уӕд цы ис саразӕн, цӕмӕй сыл уӕ ныййарджытӕ ӕнцондӕрӕй сахуыр уой?

¹¹ Кӕд уӕ ныййарджытӕн сӕ хабар афтӕ у, ӕмӕ сӕм ныр ӕдзух хъӕуы кӕсын, уӕд уӕ, чи зоны, хъӕуа ахъуыды кӕнын, уыцы хъуыддаг куыд араздзыстут, ууыл. Кӕм цӕрынц, уыцы хӕдзары дӕр, чи зоны, цыдӕртӕ фӕивын бахъӕуа. Уыцы ивындзинӕдтӕ гыццылгай куы кӕнат, уӕд сыл ныййарджытӕ ӕнцондӕрӕй сахуыр уыдзысты. Кӕд уӕ ныййарджытӕй дард цӕрут, уӕд, чи зоны, фаг уа, се ’мбырдӕй кӕнӕ-иу сӕ сӕ сыхӕгтӕй исчи куы бабӕрӕг кӕна ӕмӕ-иу уын стӕй куы фӕхабар кӕна, куыд сты, уый. Чи зоны сӕ ӕххуыс хъӕуы ӕрмӕстдӕр хӕринаг кӕнынӕн ӕмӕ ӕфснайынӕн. Стӕй ма, хӕдзары гыццыл цыдӕртӕ куы фӕиват, уӕд сын, чи зоны, ӕнцондӕр ӕмӕ ӕдасдӕр уа змӕлын, сӕхи найын ӕмӕ ӕндӕр хъуыддӕгтӕ кӕнын. Цӕмӕй дарддӕр дӕр сӕ бон хицӕнӕй цӕрын уа, уый тыххӕй, чи зоны, фаг уа, ацӕргӕтӕн чи ӕххуыс кӕны, уыцы организацийӕ сӕм исчи куы цӕуа. Фӕлӕ сӕ кӕд иунӕгӕй уадзын тӕссаг у, уӕд та хъӕудзӕн, цӕмӕй сӕ фарсмӕ ӕдзухдӕр исчи уа. Куыдфӕнды ма уа, уӕддӕр-иу базонут, ахӕм уавӕрты чи ис, уыдонӕн хицауад куыд ӕххуыс кӕны, уый тыххӕй *. (Бакӕс Ӕмбисӕндтӕ 21:5.)

12, 13. Йӕ ацӕргӕ ныййарджытӕй дард чи цӕры, уыдон сын куыд ӕххуыс кӕнынц?

¹² Йӕ ныййарджыты чи уарзы, уыцы сывӕллӕтты фӕнды, цӕмӕй сын хорз уа ӕмӕ мацӕуыл тыхсой. Ныййарджытӕ куы ницы хъуаг уой, уӕд сывӕллӕттӕ дӕр къаддӕр мӕт кӕндзысты. Фӕлӕ алкӕмӕн уый фадат нӕй, цӕмӕй йӕ ацӕргӕ ныййарджыты фарсмӕ уа. Ахӕм уавӕры иуӕй-иутӕ сӕ ныййарджытӕм ӕрцӕуынц сӕ отпусчы рӕстӕг ӕмӕ, уыдонӕн сӕхи бон кӕй нал у аразын, уыцы хъуыддӕгты сӕм фӕкӕсынц. Сӕ ныййарджытӕм арӕх, йе та алы бон дӕр, телефонӕй куы дзурой кӕнӕ сӕм писмотӕ куы фыссой, уӕд афтӕмӕй дӕр ӕвдисдзысты, бирӕ сӕ кӕй уарзынц (Ӕмб. 23:24, 25).

¹³ Уӕ бинонты уавӕр цавӕрфӕнды ма уа, уӕддӕр уӕ хъӕудзӕн ахъуыды кӕнын, уӕ ацӕргӕ ныййарджытӕн алы боны хъуыддӕгты куыд ис ӕххуыс кӕнӕн, ууыл. Кӕд сӕм хӕстӕг нӕ цӕрут ӕмӕ уыдон дӕр Йегъовӕйы Ӕвдисӕнтӕ сты, уӕд уӕ бон у се ’мбырды хистӕр нӕлгоймӕгтимӕ бауынаффӕ кӕнын. Сӕйраджыдӕр та, уыцы хъуыддаджы тыххӕй Йегъовӕмӕ кувут. (Бакӕс Ӕмбисӕндтӕ 11:14.) Кӕд уӕ ныййарджытӕ Ӕвдисӕнтӕ не сты, уӕддӕр сӕ хъуамӕ нымайат (Рац. 20:12; Ӕмб. 23:22). Кӕй зӕгъын ӕй хъӕуы, алы ӕмӕ алы бинонтӕ алы ӕмӕ алыхуызон уынаффӕтӕ рахӕссынц. Иуӕй-иутӕ сӕ ацӕргӕ ныййарджыты сӕхимӕ ракӕнынц йе та сӕ сӕхимӕ хӕстӕгдӕр ӕрцӕрын кӕнынц. Фӕлӕ алы хатт уый гӕнӕн нӕ вӕййы. Ныййарджыты хатт нӕ фӕфӕнды сӕ цотимӕ ӕмӕ сӕ цоты бинонтимӕ цӕрын. Фӕфӕнды сӕ хицӕнӕй цӕрын, цӕмӕй уаргъ макӕмӕн уой. Кӕмӕндӕрты сӕ сӕ къух амоны, ӕмӕ сӕ фӕндгӕ дӕр кӕны, цӕмӕй, сӕхи хӕдзары цӕргӕйӕ, искӕмӕн фидой ӕмӕ сӕм уый кӕса (Еккл. 7:12).

14. Ныййарджытӕн цотӕй сӕйраджыдӕр чи феххуыс кӕны, уымӕн цавӕр зындзинӕдтӕ вӕййы?

¹⁴ Бирӕ бинонтӕн сӕ хабар афтӕ у, ӕмӕ ныййарджытӕн цотӕй сӕйраджыдӕр феххуыс кӕны, хӕстӕгдӕр сӕм чи цӕры, уый. Фӕлӕ ахӕм адӕймаг хъуамӕ рох ма кӕна, йӕхи бинонты раз дӕр ын кӕй ис хӕстӕ. Ӕмӕ йӕм, чи зоны, уыйбӕрц рӕстӕг ӕмӕ хъарутӕ ма уа, цӕмӕй дыууӕрдӕм дӕр ӕххӕсса. Стӕй, йӕ ныййарджытӕм чи кӕсы, уымӕн, гӕнӕн ис, йӕ уавӕртӕ фӕивой ӕмӕ бинонты бахъӕуа хъуыддагмӕ ногӕй ӕркӕсын. Мыййаг, бинонтӕй сӕ иуыл ӕгӕр бирӕ хӕстӕ нӕй? Мыййаг, иннӕ сывӕллӕттӕн сӕ бон фылдӕр ӕххуыс кӕнын нӕу, зӕгъӕм, ныййарджытӕм радыгай кӕсын?

15. Цы ис саразӕн, цӕмӕй, йӕ ныййарджытӕм чи кӕсы, уый ӕгӕр ма ныффӕллайа?

¹⁵ Ацӕргӕ ныййарджытӕм ӕдзух кӕсын куы хъӕуа, уӕд тӕссаг у, адӕймаг афтӕ куы ныффӕллайа, ӕмӕ йӕм хъару ӕппындӕр мауал уа  (Еккл. 4:6). Кӕй зӕгъын ӕй хъӕуы, йӕ ныййарджыты чи уарзы, уый сын, йӕ бон цӕмӕйдӕриддӕр у, уымӕй ӕххуыс кӕндзӕн. Фӕлӕ алцыдӕр йӕхӕдӕг куы кӕна, уӕд бирӕ нӕ бафӕраздзӕн. Ахӕм уавӕры чи ис, уый хъуамӕ хъуыддагмӕ раст цӕстӕй кӕса ӕмӕ, куы хъӕуа, уӕд-иу ӕххуыс дӕр ракура. Рӕстӕгӕй-рӕстӕгмӕ йын исчи куы ’ххуыс кӕна, уӕд дарддӕр дӕр йӕ бон уыдзӕн йӕ ацӕргӕ ныййарджытӕм кӕсын, ӕмӕ сӕ уӕд зӕрӕдты хӕдзармӕ дӕттын нӕ бахъӕудзӕн.

16, 17. Йӕ ацӕргӕ ныййарджытӕм чи кӕсы, уыдонмӕ цавӕр ӕнкъарӕнтӕ фӕзыны ӕмӕ сын сӕ уавӕрмӕ раст цӕстӕй кӕсынӕн цы баххуыс кӕндзӕн? (Ноджыдӕр кӕс рамкӕ «Йӕ зынаргъ ныййарджытӕн йӕхи не ’вгъау кӕны».)

¹⁶ Адӕймагӕн, йӕ зынаргъ ныййарджытӕ куыд зӕронд кӕнынц ӕмӕ ӕнӕбонӕй-ӕнӕбондӕр куыд кӕнынц, уымӕ кӕсын зын куыннӕ вӕййы. Йӕ ацӕргӕ ныййарджытӕм чи кӕсы, уыдонӕн арӕх сӕ ныфс асӕтты, фӕмӕт кӕнынц, сӕхи фӕаххосджын кӕнынц, стӕй мӕсты дӕр фӕкӕнынц ӕмӕ хъыг дӕр фӕвӕййынц. Хатт ацӕргӕ адӕймаг йӕ ныхӕстӕй йӕ бинонты зӕрдӕ фӕриссын кӕны, кӕнӕ та бузныг нӕ вӕййы, кӕй йӕм кӕсынц, уый тыххӕй. Кӕд ды дӕр уый дӕхиуыл бавзарыс, уӕд-иу уайтагъд ма фӕхъыг у. Иу психиатр зӕгъы, зӕгъгӕ, адӕймагмӕ ахӕм ӕнкъарӕнтӕ куы фӕзына, уӕд сыл фыццаджыдӕр хъуамӕ басӕтта, ӕмӕ стӕй хъуамӕ бацархайа, цӕмӕй йӕхи ма ӕфхӕра, ахӕм ӕнкъарӕнтӕ йӕм кӕй фӕзынд, уый тыххӕй. Дӕ зӕрдӕйы цы ис, уый-иу радзур дӕ цардӕмбалӕн кӕнӕ дӕ бинонтӕй ӕндӕр искӕмӕн, йе та де ’ввахс ӕмбалӕн. Уый фӕрцы дын ӕнцондӕр уыдзӕн дӕ уавӕрмӕ раст цӕстӕй кӕсын.

¹⁷ Чи зоны, ахӕм рӕстӕг ӕрцӕуа, ӕмӕ бинонтӕн уыцы фадӕттӕ ӕмӕ гӕнӕнтӕ мауал уа, цӕмӕй сӕ зынаргъ ныййарӕгмӕ хӕдзары кӕсой. Чи зоны сӕ бахъӕуа зӕрӕдты хӕдзары тыххӕй ахъуыды кӕнын дӕр. Иу хойӕн йӕ мад йӕ мӕлӕты размӕ цалдӕр мӕйы уыди зӕрӕдты хӕдзары. Уыцы хо архайдта, цӕмӕй йӕ алы бон дӕр бӕрӕг кодтаид. Уый загъта: «Нӕ мадмӕ бон 24 сахаты дӕргъы, куыд ӕмбӕлы, афтӕ кастаиккам, уый нӕхи бон нӕ уыди. Зӕрӕдты хӕдзармӕ йӕ раттӕм, уыцы уынаффӕ рахӕссын ӕнцон нӕ уыд. Не ’ппӕтӕн дӕр уый уыди тынг зын. Фӕлӕ йын йӕ царды фӕстаг мӕйты уымӕй хуыздӕр ницы уыдаид, ӕмӕ йӕхӕдӕг дӕр ууыл сразы».

18. Йӕ ныййарджытӕм чи кӕсы, уыдон фидарӕй цӕуыл хъуамӕ ӕууӕндой?

¹⁸ Уӕдӕ куыд федтам, афтӕмӕй ацӕргӕ ныййарджытӕм кӕсын ӕнцон нӕу. Ӕмӕ уыцы хъуыддаджы фӕдыл, алы бинонтӕн дӕр чи сбӕзза, ахӕм амындтӕ нӕй. Фӕлӕ уӕддӕр, уӕ бинонтимӕ иумӕ алцыдӕр бӕстон куы пълан кӕнат, кӕрӕдзиимӕ куы уынаффӕ кӕнат ӕмӕ, сӕйраджыдӕр та, Йегъовӕмӕ зӕрдӕбынӕй куы куват, уӕд уӕ бон бауыдзӕн, уӕ зынаргъ ныййарджыты раз уыл цы хӕс ис, уый ӕххӕст кӕнын ӕмӕ сын афтӕмӕй кад кӕнын. Афтӕ куы архайат, уӕд ӕй зондзыстут, уӕ ныййарджытӕ кӕй ницы цух сты, ӕмӕ уӕ зӕрдӕ уӕхиуыл ницӕмӕй худдзӕн. (Бакӕс 1 Коринфӕгтӕм 13:4–8.) Ӕппӕты ахсджиагдӕр та уый у, ӕмӕ уӕд уӕ зӕрдӕйы уыдзӕн фарн ӕмӕ уын Йегъовӕ арфӕ кӕндзӕн (Фил. 4:7).