1, 2. (a) Kahpwal dah oh peidek dah kan me peneinei tohto kin ahneki? (b) Ia duwen pahpa nohno kan oh neirail seri kan ar kak kaunopadahng wekidekla kan?

 E INENEN kansensuwed en esehda me omw pahpa nohno, me mahs kin kehlail oh kak pein kelekelehpw, solahr kak pein apwalih ira. Mwein emen rehra pwupwudi oh tipw pwone, de eh madamadau pingida oh eri kohkohseli, de toahkte nda me e ahneki soumwahu laud ehu. Ni pali teio, e pil kansensuwed ong me mah kan en pohnese wekidekla kan me pid arail roson de irair kan, mehlel ma met kin kihsang arail saledek en pein wia arail. (Sohp 14:1) Dahme kitail kak wia pwehn sewese irail? Ia duwen atail kak apwalih irail?

² Ehu pwuhk duwen omw en apwalih me mah kan koasoia me e apwal en koasoiapene kahpwal kan me pid me mah kan. Ahpw e nda me mendahki met, peneinei kan me kin wiahda koasoandi kan mwowe pahn kak kaunopada mwahu en wiahda pilipil pwung ni ahnsou me pilipil me pid epwelpen roson en paliwar anahne wiawi. Kitail anahne pohnese me kitail sohte kak soikala kahpwal kan en me mah kan. Ihme kahrehda e kesempwal en kaunopada nin duwen peneinei ehu. Ia duwen peneinei kan ar kak doadoahkpene oh wiahda pilipil apwal pwukat?

3. Dahme tohn peneinei kan ele anahne wia ni ar pahpa nohno me mahlahr kan anahne sawas laud? (Menlau kilang tepin kilel.)

³ Ahnsou ehu pahn kohdo me pali laud en pahpa nohno kan sohla kak apwalih pein irail oh anahne sawas. (Wadek Eklesiasdes 12:1-7.) Ni ahnsou me met wiawi, irail me mah pwukat oh neirail seri kan anahne koasoiahpene oh pilada soangen sawas dah me keieu mwahu oh dahme re kak pwain. E wia elen loalokong peneineio en tuhpene oh koasoiahpene soangen sawas dah kan me anahn, ia duwen sawas pwukat ar pahn kohda oh ia duwen koaros ar kak sawaspene. Koaros anahne pohnese dahme mehlel duwen ireo oh koasoiahpene ni sansal dahme re men koasoia. Pahpa nohno kan kak pousehlahte pein kelekelehpw? * Koasoiahpene dahme emenemen kak wia pwe pahpa nohno kan en kak alehdi epwel me re anahne. (Lep. Pad. 24:6) Ekei mwein kak sawas sang ni arail kihda anahn en ehuehu rahn, ahpw ekei mwein kak sawas sang ni arail sewese pwain epwelpen soumwahu kan. Emenemen anahne pein ese eh pwukoa, ahpw mwuhr pwukoa kan ele pahn wekila, oh mwein tohn peneineio anahne wilian meteikan arail pwukoa.

4. Ni irair akan eh wekila, ia wasa peneinei kan kak rapahki sawas?

⁴ Ni omw pahn tepida apwalih omw pahpa nohno, kihong ahnsou pwe ken kak sukuhlki uwen me kak duwen ara soumwahwo. Ma liho de ohlo ahnekihdi soumwahu ehu me pahn wie susuwedla, esehda dahme ke pahn kak kasik mwuhr. (Lep. Pad. 1:5) Eker de kohla ni ohpis en koperment nan omw wasa me kin kihda sawas ong me mah kan. Tehkada soangen prokram dah me kak sewese omw pahpa nohno en alehdi epwel mwahu de me kak kamengeila omw en apwalih ira. Ni omw kin medemedewe soangen wekidekla apwal pwukat, ele ke pahn tepida ahneki nsensuwed laud, pwuriamwei, de omw madamadau pingida. Ni soangen ahnsou pwukat, ke kak ehukihong omw pepehm kan kompoakpahmw men me ke likih. Ahpw me keieu kesempwal sang met iei en wehkohng Siohwa omw mohngiong. E kak ketikihong uhk popohl me ke anahne pwe ken kak dadaur pahn irair sohte lipilipil.​—Mel. 55:22; Lep. Pad.  24:10; Pil. 4: 6,  7.

5. Dahme kahrehda e mwahu en esehda mwowe duwen sawas kan me mie ong apwalih me mah kan?

⁵ E pahn mwahu ma me mah kan oh arail peneinei kan sukuhlki soangen sawas kan me mie ong me mah kan oh kaunopada mwowe. Karasepe, ele re kak tehkada ma e mwahu ong pahpa de nohno en mi rehn emen neirail ko, de isaneki soangen sawas teikan me mie nan arail wasao. Ni ahl wet, peneinei kan kak kaunopada ong ‘pwunod oh apwal’ me kin wiawi ong me mah kan. (Mel. 90:10) Peneinei kan me sohte wiahda koasoandi kan ele pahn pwururdahte wiahda pilipil kan ni ahnsou me kahpwal kan pwarada. Emen me samanih apwalih soangen irair wet koasoia me soangen ahnsowo kin kalapw wia “ahnsou me keieu suwed en wiahda pilipil.” Ma pilipil kan anahne wiawihda ni karuwaru, tohn peneinei ele pahn pwunodada oh sohte pwungkipene dahme anahne wiawi. Ahpw ni atail kaunopada mwowe, e sohte pahn apwal en pahsan wekidekla kan.​—Lep. Pad. 20:18.

6. Dahme kahrehda e kin sawas ma kitail koasoiapene ia wasa oh ia mwomwen pahpa nohno mahla kan pahn kousoan ni arail mahla?

⁶ Ele e pahn apwal en koasoiong omw pahpa nohno duwen arail en wiahda wekidekla kan nan imwara de duwen anahnepen ira en keseu sang imwarao ehu rahn. Ahpw me tohto nda me soangen pehsehpene wet kin sewese irail mwuhr. Dahme kahrehda? Pwehki e mengei en koasoiapene soahng apwal kan, rong kanahieng, oh wiahda koasoandi mwahu kan mwohn kahpwalo pwarada. Ni soangen ahnsou ko me tohn peneineio kak ni saledek kasalehda dahme re mwahuki, irail pahn karanihala emenemen oh pahn tamataman limpoak me re ahneki. Mwein  me mah kan pahn mwahuki pein mihmi kelekelehpw uwen me re kak. Ni pahpa nohno kan ar koasoiaiong neirail seri kan duwen soangen epwel me re mwahuki, met pahn inenen sewese koaros ni ahnsou me pilipil pwukat anahne wiawihda.

7, 8. Dahme peneinei kan anahne koasoiahpene oh dahme kahrehda?

⁷ Pahpa nohno kan, erein amwail kin koasoakoasoipene, ndaiong amwa tohn peneinei dahme kumwa mwahuki, ia uwen mwohni me kumwa kak doadoahngki, mehnia pilipil kan me kumwa mwahuki. Eri ma ehu rahn kumwa sohla kak pein wiahda amwa pilipil, irail kak wiahda pilipil kan me kumwa mwahuki. Ele irail pahn men wauneki dahme kumwa men en wiawi oh wia soahng koaros uwen arail kak pwe kumwa en kak pein wia amwa. (Ep. 6:2-4) Karasepe, kumwa kin kasik me emen rehn noumwa seri ko en luke kumwa pwe kumwa en kousoan reh oh eh peneinei? De mie mehkot tohrohr me kumwa kasikasik? Kumwa en tamataman me ahn meteikan madamadau weksang amwa. Koaros anahne ahnsou pwe arail madamadau en materek.

⁸ Ni atail kin pilahnda mwowe oh koasoiahpene mwahu, kitail kak soikala kahpwal tohto. (Lep. Pad. 15:22) Koasoiaiong tohn omw peneinei duwen sawas en palien wini oh omw pilipil kan me ke mwahuki. Kitail kak doadoahngki ire kan nan doaropwe me pid dehr ale nta, (Health Care Proxy de DPA) me Sounkadehdehn Siohwa kan wiahda ni atail koasoakoasoipene. Emenemen ahneki pwuhng en ese mehnia sawas ong palien wini me mie, oh e pil ahneki pwuhng en alehdi de sohte alehdi sawas en palien wini pwukat. Kisin doaropweo pahn kasalehda ahn emen eh pilipil. En pilada emen aramas me ke likih en wiahda pilipil konehng kan ong komwi ma ke anahne me pid duwen doaropweo. Me mah kan, soun epwelparail kan, oh me pahn wia omw pilipil, koaros anahne koahpi en doaropwe kesempwal wet ahnsou me anahn. Ekei me mah kan kin nekidala neirail doaropwe wet iangahki doaropwehn sohso kan oh doaropwe kesempwal teikan, duwehte doaropwehn insurance, pali en bank, de doaropwehn ohpis teikan.

9, 10. Iahd me pahpa nohno kan uhdahn anahne sawas sang neirail seri kan?

⁹ Pak tohto, koaros nan peneinei kin men me mah kan en kak en pein wiewia arail. Ma pahpa nohno kan kin kak kukihada mwenge, kamwakel, ale oh kang wini oh kak kapehse mwahu, seri kan sohte anahne wia soahng koaros ong irail. Ahpw ahnsou dower powe, ma e apwalla ong pahpa nohno kan en alu, sohla kak kohla netinet, de ma re kalapw manokehla soahng kan, ele seri kan anahne wiahda wekidekla kan.

¹⁰ Me mah kan ele kin pingida nan arail madamadau de re mworusala. Ele re tepidahr salengoponla, ediedlahr nan meserail kan, de limanokonok, de mwein re kin apwalki doadoahngki imwen kainen. Ma ekei kahpwal pwukat pwarada, ke kak ale sawas sang imwen wini. Ken mwadang tuhwong toahkte men ni kahpwal pwukat eh tepida wiawi. Ele seri kan me pahn tiengla  mwowe en koasoanehdi ahnsou me pahpa de nohno en tuhwong toahkte oh pil pein ara anahn teikan. Pwehn tehk me pahpa nohno kan ale epwel me keieu mwahu, seri kan anahne wilian oh koasoaiki irail, sewesehki neirail doaropwe kan, tangahki irail lahng imwen wini ong rahn akan me re koasoanehdi ren pwurala.​—Lep. Pad. 3:27.

11. Dahme kak wiawi pwehn mengei ong pahpa nohno kan ren idawehn wekidekla kan?

¹¹ Ma omw pahpa de nohno ahnekihdi soumwahu laud ehu, ele ke anahne wiahda wekidekla kan de pil ong wasa me re kousoan ie pwehn mwahuong omw en apwalih ira. Ma wekidekla pwukat sohte laud, e pahn mengei ong ira en idawehn. Ma ke mihmi dohsang omw pahpa nohno, ele e mwahu ma Sounkadehde men de mehn mpara men en kin kaukaule mwemweitla rehra oh padahkihong uhk ia irara. Ia duwe, ira anahne sawas en ihte kukihada kenara mwenge oh kamwakel? Kisin wekidekla kan nan imwarao pahn kamengeila oh sohte keper ong ara pahn mwekidseli, duhdu de wia soahng teikan? Mwein ihte me mah kan anahne pwehn kak pein kousoan nan imwarail iei sawas sang emen tohnpeneinei. Ahpw, ma e pahn keper ong irail en kelekelehpw, irail pahn anahne emen, duwehte emen tohnpeneinei de kisehrail en kousoan rehrail pwehn apwalih irail. Sohte lipilipil soangen irair dah, peneineio anahne medewe soangen sawas dah me mie.​—Wadek Lepin Padahk 21:5. *

12, 13. Dahme ekei seri laud kan wiadahr pwehn wauneki oh apwalih arail pahpa nohno me mi dohsang irail?

¹² Kitail men atail pahpa nohno en sohte mi nan keper oh en nsenamwahu pwehki kitail poakohng irail. E kin kihong kitail pepehm en meleilei ni atail ese me atail pahpa nohno kan kin ale epwel mwahu. Ahpw, seri tohto sohte kousoan karanih arail pahpa nohno. Ekei seri pwukat kin doadoahngki arail ahnsoun kommoal pwehn mwemweitla rehn arail pahpa nohno pwehn sewese irail wia doadoahk kan me re solahr kak wia. Seri kan kak kasalehda me re poakohng arail pahpa nohno ni arail kin kaukaule de rahn koaros delepwohn, nting kisin likou, de e-mail ong irail.​—Lep. Pad. 23:24, 25.

¹³ Mehnda ma kumwail kousoan dohpeseng, ke pahn anahne pilada soangen sawas dah me anahn ehuehu rahn ong omw pahpa nohno. Ma ke sohte mihmi karanih ira oh omw pahpa nohno wia Sounkadehdehn Siohwa kei, ke kak koasoiong elder kan nan ara mwomwohdiso oh peki kaweid. Kesempwal sang met, kapakapki ong Siohwa duwen irair en omw pahpa nohno. (Wadek Lepin Padahk 11:14.) Mehnda ma omw pahpa nohno kaidehn Sounkadehde kei, ke anahne ‘wauneki semomw oh inomw kan.’ (Eks. 20:12; Lep. Pad. 23:22) Ni mehlel, kaidehn peneinei koaros pahn wiahda pilipil kan me duwepenehte. Ekei pilada arail pahpa de nohno me mahlahr en keseudo oh kousoanla rehrail de keseudo wasa kis me karanih irail. Ahpw met sohte kak wiawi ahnsou koaros. Ekei pahpa nohno kan ele sohte men kousoan rehn neirail seri laud kan oh arail peneinei. Ele re men kousoan kelehpw oh sohte men katoutouwih neirail seri kan. Mwein ekei kak pein pwain soangen sawas kan me mie ong irail.​—Ekl. 7:12.

14. Soangen kahpwal dah kan me ele kak pwarada ong irail me kin keieu apwalih pahpa nohno kan?

¹⁴ Nan peneinei tohto, seri kan me mihmi keieu karanih pahpa nohno iei me kin keieu apwalih irail. Ahpw, irail pwukat anahne toupahrek ni arail apwalih anahn en arail pahpa nohno oh pil anahn en arail peneinei tikitik. Mie irepen ahn emenemen eh ahnsou oh kehl. Oh ma irair en sounsawaso wekila, peneineio ele anahne koasoiapene wekidekla wet. Ia duwe, emen tohn peneineio nohn tohtohla eh pwukoa? Seri teiko pil kak kalaudehla arail sawas, ele wilian emenemen sewese arail pahpa nohno?

15. Dahme kitail kak wia pwe irail me kin keieu apwalih pahpa nohno kan ren dehr nohn pwangada?

 ¹⁵ Ni pahpa de nohno men me mahlahr eh anahne sawas ahnsou koaros, sounsawaso pahn uhdahn pwangada oh met keper. (Ekl. 4:6) Seri kan me poakohng arail pahpa nohno kin men wia soahng koaros me re kak, ahpw apwahpwalih arail pahpa nohno kak wiahla mehkot me laudsang dahme re kak wia. Irail me kin kalapw apwalih me mah pwukat anahne pohnese me re sohte kak kelehpwiki kahpwalo oh mwein re anahne peki sawas. Mwein ihte me anahn iei emen en iang sawas ekei ahnsou pwe sounsawaso en dehr nohn pwangada.

16, 17. Ia pepehm en seri kan ni arail apwalih arail pahpa nohno mahla kan? Dahme pahn sewese irail en wehwehki arail pepehm kan oh kolokol arail toupahrek? (Menlau pil kilang koakon “ Kalahnganki Pwukoahn Apwalih me Mah kan.”)

¹⁶ E kansensuwed en kilang atail pahpa nohno ar mahla oh lelohng soahng kansensuwed kan. Irail me kin apwalih me mah kan ekei pak kin nsensuwed, pwunod, tihwohla, lingeringer, kapwukoahki pein irail dahme wiawi de mwehlda. Ekei pak pahpao de nohno ele nda mehkan me sohte kadek de sohte kasalehda arail kalahngan. Ma met wiawihong uhk, dehr lingeringerda. Emen me samanih roson en madamadau koasoia me ni atail ahneki soangen pepehm en nsensuwed kan, kitail anahne keieu pohnese ni mehlel me kitail ahneki pepehm pwukat. Kitail eri song en dehr nsensuwedki met. Koasoiong omw pwoudo, emen tohnpeneinei, de kompoakepahmw men me ke likih duwen pepehm pwukat. Soangen koasoakoasoipene pwukat kak seweseiuk ken wehwehki omw pepehm kan oh kolokol omw toupahrek.

¹⁷ Ahnsou ehu pahn kohdo me peneinei solahr ahneki soahng kan de solahr mie soangen sawas tohrohr teikan pwehn pousehlahte apwalih me mah kan nan imwarailo. Mwein ke anahne ale sawas teikan pwehn apwalih irail erein awa 24. Emen riatail Kristian kin rahn koaros mwemweitla rehn eh nohno nan wasahn apwalih me mah kan. E nda: “Se uhdahn solahr kak apwalihki nohno soangen sawas me e anahne erein awa 24. At pilipil en wahla ih nan wasahn apwalih me mah kan uhdahn apwal. E uhdahn kansensuwed. Ahpw pilipil wet me keieu konehng eh irairo ni kaimwiseklahn sounpwong kan en eh mour oh e pil pwungki met.”

18. Dahme irail me kin apwalih me mah kan kak kamehlele?

¹⁸ Pwukoa kan en apwalih omw pahpa nohno me mahla kak apwal oh kak pil apwal ong omw pepehm kan. Ni atail kin apwalih me mahla kan, kitail koaros sohte kak doadoahngki soangen koasoandi ehute. Ahpw ma ke wiahda koasoandi kan ni keneinei, iang omw peneineio doadoahkpene, kapehse mwahu, oh laudsang met, kapakap ong Siohwa, ke kak kapwaiada omw pwukoahn wauneki omw pahpa nohno. Ni omw wia met, ke kak peren pwehki ke kihong irail omw ahnsou oh epwel mwahu me re anahne. (Wadek 1 Korint 13:4-8.) Me keieu kesempwal, ke pahn ahneki madamadau meleilei oh sapwellimen Siohwa kapai.​—Pil. 4:7.