1, 2. (a) Susar saida mak ita barak hasoru? No pergunta saida deʼit mak mosu iha ita-nia hanoin? (b) Oinsá mak inan-aman no oan sira bele hasoru susar neʼebé mosu tanba situasaun troka?

 KUANDU ita haree katak ita-nia inan-aman neʼebé uluk iha forsa, maibé agora sira la bele ona tau matan ba sira-nia an rasik, ida-neʼe halo ita laran-kanek. Ita sente triste kuandu rona katak ita-nia inan ka aman monu no ruin tohar, hanoin la moos ona, dala barak haluha dalan, ka hetan moras boot ruma. Oinsá ho inan-aman neʼebé idade ona? Sira karik lakohi simu katak sira-nia forsa la hanesan uluk ona ka sira-nia situasaun la husik sira atu halo buat barak mesak. (Jó [Ayub] 14:1) Entaun saida mak ita bele halo? Oinsá mak ita bele tau matan ba sira?

² Livru ida neʼebé koʼalia kona-ba tau matan ba ema neʼebé idade ona dehan: “Maski susar atu koʼalia kona-ba problema neʼebé mosu tanba idade, maibé família neʼebé koʼalia hamutuk no konkorda ona kona-ba planu oioin bele tahan kuandu problema mosu.” Ita hatene katak kuandu ema sai idade ona, ida-neʼe sei lori problema oioin. Tan neʼe, importante tebes atu koʼalia hamutuk nuʼudar família hodi prepara nanis. Entaun, oinsá mak família sira bele hatudu domin hodi apoia malu atu halo desizaun sira?

3. Saida mak família sira presiza halo kuandu sira-nia inan-aman presiza ajuda? (Haree foto iha pájina 25.)

³ Tempu sei toʼo mai kuandu ema neʼebé idade ona la bele tau matan ba sira-nia an rasik no presiza ajuda husi ema seluk. (Eclesiastes [Pengkhotbah] 12:1-7) Kuandu ida-neʼe akontese, katuas-ferik no sira-nia oan neʼebé boot ona tenke halo desizaun hamutuk kona-ba oinsá mak sira bele tau matan ba inan-aman nia presiza. Dala barak diʼak atu halo enkontru família nian atu koʼalia kona-ba saida mak inan-aman presiza, no oinsá mak família bele apoia malu. Ema hotu iha família laran, liuliu inan-aman sira, tenke fó sai sira-nia hanoin no koʼalia nakloke ba malu. Porezemplu, sira bele koʼalia kona-ba se inan-aman sei bele hela mesak iha sira-nia uma ka lae. a (Haree nota iha kraik.) No mós, koʼalia hamutuk kona-ba saida mak família ida-idak bele halo hodi halaʼo sira-nia responsabilidade. (Provérbios [Amsal] 24:6) Karik sira balu bele tau matan ba inan-aman loroloron, no balu seluk bele apoia ho osan. Ema hotu tenke hatene katak sira ida-idak iha knaar. Maski nuneʼe, nuʼudar tempu liu daudaun, karik ita presiza hanoin kona-ba troka knaar sira.

4. Dala ruma família sira bele buka ajuda husi sé?

⁴ Kuandu ita hahú tau matan ba inan-aman, diʼak atu uza tempu hodi buka-hatene kona-ba sira-nia situasaun. Se ita-nia inan ka aman iha moras neʼebé neineik-neineik halo sira sai fraku liu, diʼak atu buka-hatene kona-ba susar saida mak sei mosu iha futuru. (Provérbios [Amsal] 1:5) Kontaktu ba ita-nia família neʼebé besik atu sira mós bele ajuda ita-nia inan-aman hodi halo kmaan ita-nia serbisu atu tau matan ba inan-aman. Kuandu ita hanoin kona-ba mudansa iha família laran, ida-neʼe bele halo ita estrese, triste, laran-tun, ka bilán. Se nuneʼe, fahe ita-nia sentimentu ba ita-nia belun diʼak. Liután neʼe, fó sai ita-nia laran-todan ba Jeová. Nia bele haraik dame ba ita-nia neon hodi bele tahan hasoru situasaun neʼe.—Salmo (Mazmur) 55:22; Provérbios (Amsal) 24:10; Filipe 4:6, 7.

5. Tanbasá mak diʼak atu halibur nanis informasaun kona-ba oinsá atu tau matan ba ema neʼebé idade ona?

⁵ Tuir loloos, diʼak ba katuas-ferik sira no mós sira-nia família atu halibur nanis informasaun neʼebé sira presiza. Porezemplu, sira bele hanoin nanis kona-ba se katuas-ferik presiza hela ho oan ida, ka se sira bele simu ajuda ruma husi governu. Ida-neʼe bele ajuda família atu prepara nanis hodi tahan hasoru problema sira neʼebé mosu tanba sai ferik-katuas. (Salmo [Mazmur] 90:10) Maibé, se família la halo planu nanis, karik sira presiza halo desizaun ho ansi kuandu problema mosu. Matenek-naʼin ida hatete katak neʼe mak “tempu neʼebé aat liu atu halo desizaun sira hanesan neʼe”. Kuandu halo desizaun ho ansi, ema iha família laran bele sai estrese, no karik sira bele istori malu kona-ba ajuda neʼebé família tenke fó. Maibé se ita halo planu nanis, ida-neʼe bele ajuda ita atu la sai estrese demais kuandu iha mudansa ruma iha futuru.—Provérbios (Amsal) 20:18.

6. Tanbasá mak diʼak ba inan-aman no oan sira atu koʼalia nanis kona-ba sira-nia situasaun?

⁶ Karik ita sente susar atu koʼalia ho ita-nia inan-aman kona-ba mudansa ruma neʼebé sei halo iha sira-nia uma ka kona-ba inan-aman muda sai husi uma. Maibé, ema barak dehan katak hodi koʼalia hamutuk kona-ba buat sira-neʼe bele ajuda tebes iha futuru. Tanbasá? Tanba fasil liu atu koʼalia hamutuk kona-ba problema neʼebé boot no rona didiʼak ba malu no halo nanis desizaun neʼebé diʼak antes problema mosu. Tuir loloos, kuandu família koʼalia nakloke ba malu ho kalma, sira bele sente besik no hadomi malu. No maski ema neʼebé idade ona hakarak hela  nafatin iha sira-nia uma ka hakarak atu tau matan ba sira-nia an rasik, sira bele hetan buat diʼak hodi koʼalia hamutuk ho sira-nia oan kona-ba oinsá oan sira sei tau matan ba inan-aman kuandu sira presiza hetan ajuda.

7, 8. Saida deʼit mak família sira presiza koʼalia hamutuk? Tanbasá?

⁷ Inan-aman sira, ita tenke fó-hatene ba ita-nia oan saida mak ita hakarak no presiza. Ida-neʼe sei ajuda sira atu halo desizaun neʼebé ita hakarak kuandu ita la iha ona kbiit atu halo nuneʼe. Klaru katak sira sei hatudu respeitu ba ita-nia hakarak. (Éfeso 6:2-4) Porezemplu, ita hakarak atu ita-nia oan ida bolu ita atu hela hamutuk, ka ita hakarak buat seluk fali? Diʼak atu ita la sai ulun-toos, tanba laʼós ema hotu sei iha hanoin hanesan ita-nian. La haluha katak ita hotu presiza tempu atu troka ita-nia toman.

⁸ Kuandu família halo planu no koʼalia nanis, sira bele hasees an husi problema oioin. (Provérbios [Amsal] 15:22) Koʼalia ba ita-nia família kona-ba tratamentu sira. Kuandu ita koʼalia kona-ba neʼe, ita presiza koʼalia kona-ba parte kiʼik husi raan no tratamentu neʼebé ita hakarak simu ka la simu no mós kona-ba saida mak família bele halo kuandu ita besik mate. Diʼak se ita bele hakerek dokumentu kona-ba neʼe. Hili maluk kristaun ida neʼebé bele reprezenta ita hodi bele kumpre ita-nia desizaun kona-ba tratamentu neʼebé ita sei simu. Katuas-ferik sira, ema neʼebé tau matan ba sira, no ema neʼebé reprezenta sira tenke rai kopia husi dokumentu neʼe atu bele uza kuandu presiza. Ema balu rai dokumentu neʼe hamutuk ho dokumentu importante seluk hanesan surat rai nian no sertidaun sira.

9, 10. Situasaun saida mak ema neʼebé idade ona hasoru no neʼe kona dalan neʼebé oan tau matan ba sira?

⁹ Iha situasaun barak, ema hotu iha família hakarak atu inan-aman tau matan ba sira-nia an rasik tuir sira-nia kbiit. Se ema neʼebé idade ona sei iha kbiit atu teʼin, hamoos, kontrola ninia ai-moruk, no koʼalia ho moos, karik oan sira la presiza kontrola buat hotu iha inan-aman nia moris. Maibé, nuʼudar tempu liu daudaun, se inan-aman la bele ona halo buat barak, porezemplu la bele ona atu bá kompras, ka sira-nia hanoin komesa lakon ona, oan sira presiza tau matan ba inan-aman.

¹⁰ Ema neʼebé idade ona karik sente estrese no bilán. Karik sira la bele ona rona didiʼak, matan la haree ho moos ka la bele bá sentina mesak. Se buat sira-neʼe balu mosu, dala ruma tratamentu bele ajuda sira. Entaun, konsulta kedas se problema sira hanesan neʼe komesa mosu. Karik oan sira mak tenke halo arranju ruma atu bá konsulta ka halo buat seluk. No atu bele tau matan didiʼak ba inan-aman, dala ruma oan sira presiza prenxe dokumentu ka koʼalia hodi reprezenta inan-aman, no lori sira ba konsulta.—Provérbios (Amsal) 3:27.

11. Saida mak família bele halo atu nuneʼe inan-aman bele sai toman ba situasaun foin?

¹¹ Se ita-nia inan-aman nia saúde sai aat  ba beibeik, karik ita presiza halo mudansa balu kona-ba sira-nia moris ka dalan neʼebé ita tau matan ba sira. Se mudansa neʼebé ita halo mak kiʼik deʼit, neʼe sei halo fasil ba ita no mós ita-nia inan-aman atu sai toman ho situasaun foun neʼe. Se ita hela dook husi ita-nia inan-aman, karik ita bele husu ita-nia maluk kristaun ka viziñu ida atu vizita sira beibeik no fó-hatene deʼit ba ita kona-ba sira-nia situasaun. Ita-nia inan-aman presiza ajuda kona-ba teʼin no hamoos ka lae? Ka, hodi halo mudansa uitoan iha uma laran sei halo fasil no seguru liu ba inan-aman atu laʼo bá-mai, hariis, no halo buat seluk tan ka lae? Se sira hela mesak, karik diʼak mós atu halo arranju hodi família ida vizita sira beibeik. Maibé se sira la bele ona atu hela mesak, karik sira presiza hela hamutuk ho ema seluk hodi tau matan beibeik ba sira. Sin, diʼak atu buka-hatene uluk kona-ba dalan oioin atu tau matan ba inan-aman. b—Haree nota iha kraik. Lee Provérbios (Amsal) 21:5. c

12, 13. Oinsá mak oan sira neʼebé hela dook husi sira-nia inan-aman bele kontinua hafolin no tau matan ba sira?

¹² Oan neʼebé hadomi sira-nia inan-aman hakarak atu sira moris kontente. No hodi hatene katak inan-aman hetan ajuda neʼebé diʼak, ida-neʼe bele halo oan sira sente dame iha laran. Maibé tanba oan sira mós iha responsabilidade seluk, sira barak la hela besik sira-nia inan-aman. Iha situasaun hanesan neʼe, oan balu uza sira-nia tempu feriadu atu vizita no tau matan ba inan-aman nia presiza, no halo serbisu neʼebé inan-aman la bele ona atu halo. Sira mós hatudu sira-nia domin ba inan-aman hodi telefone beibeik, karik loroloron se bele, ka haruka surat, ka haruka e-mail ba sira.—Provérbios (Amsal) 23:24, 25.

¹³ Maski ita hela dook husi inan-aman, maibé ita sei iha responsabilidade atu halo desizaun kona-ba sira-nia presiza loroloron. No se ita-nia inan-aman mak Testemuña, ita bele koʼalia ho katuas sira iha sira-nia kongregasaun no husu sira-nia ideia. Keta haluha atu halo orasaun ba Jeová kona-ba neʼe. (Lee Provérbios [Amsal] 11:14. d) Maski ita-nia inan-aman laʼós Testemuña, maibé ita hakarak nafatin atu ‘hatudu respeitu ba ita-nia inan no aman’. (Êxodo [Keluaran] 20:12; Provérbios [Amsal] 23:22) Tuir loloos, laʼós família hotu halo desizaun neʼebé hanesan. Ema balu halo arranju atu sira-nia inan-aman neʼebé idade ona muda atu hela ho sira ka hela besik sira. Maibé, neʼe laʼós buat neʼebé fasil. Inan-aman balu lakohi hela hamutuk ho sira-nia oan. Inan-aman sira-neʼe hakarak tebes atu iha liberdade no lakohi atu hatodan sira-nia oan. Inan-aman balu karik iha osan, entaun sira hakarak atu selu ema atu tau matan ba sira iha sira-nia uma rasik.—Eclesiastes (Pengkhotbah) 7:12.

14. Problema saida mak bele mosu ba ema neʼebé tau matan ba inan-aman?

¹⁴ Iha família barak, oan ida neʼebé hela besik mak iha knaar barak liu atu tau matan ba inan-aman. Maibé, ema neʼebé tau matan ba inan-aman tenke tetu didiʼak kona-ba sira-nia inan-aman nia presiza no sira-nia família nia presiza. Tuir loloos, ema ida-idak nia tempu no kbiit la barak. No karik ema neʼebé tau matan ba inan-aman nia situasaun troka, tan neʼe dala ruma família sei presiza atu haree fali arranju sira hotu. Entaun, iha família laran ema ida iha responsabilidade barak liu ka lae? No oan sira seluk bele ka lae aumenta liután sira-nia knaar, hanesan troka malu atu tau matan ba inan-aman?

15. Oinsá mak ita bele ajuda ema neʼebé tau matan ba inan-aman atu la sente kole demais?

 ¹⁵ Kuandu ema neʼebé idade ona presiza ajuda tempu tomak, karik ida-neʼe sei halo oan neʼebé tau matan ba sira sente kole demais. (Eclesiastes [Pengkhotbah] 4:6) Baibain, oan sira hakarak duni atu halo buat neʼebé sira bele halo hodi tau matan ba inan-aman, maibé se inan-aman presiza ajuda barak demais, ida-neʼe bele halo oan sai estrese. Se ema neʼebé tau matan ba inan-aman hasoru situasaun hanesan neʼe, diʼak atu ema neʼe la sente moe hodi husu ajuda. Karik buat neʼebé sira presiza mak simu ajuda ruma husi ema seluk hodi nuneʼe sira la bele lori todan mesak.

16, 17. Kuandu tau matan ba inan-aman neʼebé idade ona, susar saida mak oan sira hasoru? Oinsá mak sira bele tahan situasaun neʼe? (Haree mós kaixa “Kontente atu tau matan ba inan-aman”.)

¹⁶ Ita sente triste tebes kuandu haree susar neʼebé ita-nia inan-aman hasoru tanba idade ona. Dala barak ema neʼebé tau matan ba inan-aman sente triste, laran-susar, estrese, hirus, sente sala, no mós odi. Dala ruma, inan-aman neʼebé idade ona bele koʼalia buat neʼebé la diʼak ka la hafolin ema neʼebé tau matan sira. Se ida-neʼe mosu, keta sai laran-kanek lalais. Matenek-naʼin ida kona-ba saúde neon nian hatete katak kuandu ita laran-tun, ita lalika fó-sala ba ita-nia an. Koʼalia ba ita-nia kaben, família, ka kolega diʼak. Ida-neʼe bele ajuda ita atu kontrola ita-nia sentimentu no sente diʼak fali.

¹⁷ Iha rai balu, kuandu família la iha ona kbiit atu kontinua tau matan ba inan-aman iha uma, dala ruma oan sira deside atu lori inan-aman atu hela iha uma katuas-ferik sira-nian neʼebé iha ema atu tau matan sira tempu tomak. Loroloron irmán kristaun ida vizita ninia inan neʼebé hela iha uma hanesan neʼe. Nia dehan: “Ami la iha kbiit atu tau matan ba ami-nia inan nia presiza iha loron tomak. No atu husik nia hodi hela iha uma ba katuas-ferik sira mak laʼós desizaun neʼebé fasil. Ami sente susar tebetebes. Maibé, ami sente katak neʼe mak solusaun neʼebé diʼak ba nia durante fulan balu antes nia mate, no nia mós simu ida-neʼe.”

18. Ema neʼebé tau matan ba inan-aman bele fiar saida?

¹⁸ Atu tau matan ba inan-aman neʼebé idade ona mak laʼós buat neʼebé fasil no ida-neʼe bele kona ita-nia sentimentu. Tuir loloos, família ida-idak tenke halo desizaun tuir sira-nia situasaun rasik. Maibé, hodi halo planu nanis, hanoin kona-ba oinsá família serbisu hamutuk, koʼalia ba malu ho didiʼak, no liuliu hodi halo orasaun ho laran, ida-neʼe bele ajuda ita hodi kumpre ita-nia responsabilidade atu hatudu respeitu ba ema neʼebé ita hadomi. Hodi halo nuneʼe, ita bele sai kontente tanba hatene katak ita-nia inan-aman simu duni ajuda neʼebé sira presiza. (Lee 1 Korinto 13:4-8.) Buat neʼebé importante liu mak ita sei sente dame iha laran, tanba Jeová haraik bensaun ba ema sira neʼebé hatudu respeitu ba sira-nia inan-aman.—Filipe 4:7.