Pane mekune pena jë së la hnaaluene ewekë ka traqa: Hna hëne la thine ka mele casi pe me lue kuku hnene la lue trefën ka ce ekalesia me angatre troa ce xeni ngöne la hej. Ame la eahlo a thuemacane la lue nekö i eahlo, kola madri la lue ialameke i nyidro. Nyidroti pe hi a lapa treqene matre traqa pi kowe la heji cili. Ngazo pe, ca drai qëmeken, hnene lai lue trefën hna qaja kowe la thine ka hape, hetre ketre ewekë ka traqa matre tha ijije hmaca kö tro angatre a ce xen. Ngo e thupene hë, eahlo ha atre la kepin. Thupene jë hi lo hna hë eahlo troa xen, hëne hmaca jë pena ha lai lue trefëne hnene la itre sinee i nyidro kowe lai ca heji pala hi, ame hnei nyidroti hna kapa.

Ame easë itre Keresiano, tha tro kö sa saze ithanata. Tha tro pi kö sa tune la aqane ithanata celë, ka hape, “ ‘eje hi,’ nge ase hë, ‘pëkö,’ ” ene la troa nangëne la ketre atr, nge thupene lai kolo pena ha qaja ka hape, ohea. (2 Kor. 1:18) Ngo tune la hna amamane hnene lue ceitune celë, tha ceitune asë kö la itre ewekë ka traqa. Hetre itre ijine laka, kösë pëkö ketre ewekë ka ijije troa kuca, casi hi la ka loi, troa apëne lai hna isapui. Hna traqa la ewekë ka tune lai koi Paulo aposetolo.

Ame lo 55 M.K., lo Paulo e Efeso ngöne la hnaakönine trongene mesinare i nyidrë, hnei nyidrëti hna mekune troa ea Korinito eë jëne la Hnagejë ne Égée, nge e traqa ha e cili tro pi hë Makedonia eë. Ame la nyidrëti a bëeke Ierusalema eë, mekune jë hi nyidrëti troa nyihnaaluene wange la ekalesia ne Korinito, matre troa tro fë la itre ahnahna i angatre kowe la itre trejine ne Ierusalema. (1 Kor. 16:3) Mama hnyawa la mekune celë ngöne 2 Korinito 1:15, 16, kola hape: “Ngöne la lapaune celë, hnenge hna mekune troa traqa koi nyipunie ekö, mate lue loi nyipunie ; nge troa gojenyi thei nyipunie e tro Makedonia eë, nge troa traqa hmaca koi nyipunie qa Makedonia, mate akele ni [ce tro me eni] hnei nyipunie e tro Iuda eë.”

Kola mama laka, hnei Paulo hë hna thuemacanyi angetre Korinito jëne la ketre tusi nyidrë la itre tronge i nyidrë. (1 Kor. 5:9) Ame ngöne la  hnepe ijine thupene la hna cinyihan lai tus, hnene la lapa i Keloe hna thuemacanyi Paulo laka, kola ikelikelë e hnine la ekalesia. (1 Kor. 1:10, 11) Celë hi kepine matre, saze pi Paulo lo mekuna i nyidrë hnapan, ame hnei nyidrëti hna cinyihane la tusi 1 Korinito. Ame e hnine la tusi cili, nyidrëti a hamëne la itre eamo me ihaji. Nyidrëti fe a qaja ka hape, saze hë la itre gojenyi nyidrë, me thuemacanyi angatre ka hape, tro nyidrëti a pane Makedonia eë, nge thupene lai Korinito.—1 Kor. 16:5, 6. *

Ame hë la kola kapa la tus hnene la itre trejin ne Korinito hnene la itre hna ati ëjene ka hape, “nyipi aposetolo,” hna qaja hnei itre xan göi Paulo ka hape, atre lue mekun, nge tha ka eatrëne kö la hna qaja. Öni Paulo e sa koi angatre ka hape: “Hape u, hnenge hna qaja nyimenyimëne ngöne la mekunenge cili ? nge ame la nöjei ewekë hnenge hna mekun, hape u, hnenge hna mekune thenge la ngönetei mate qaja ni, eje hi, eje hi, ‘eje hi,’ [“nge ase hë,” MN] ‘pëkö’ ”?—2 Kor. 1:17; 11:5.

Ma öni së jë, Nyipici jë kö ka hape, hnei Paulo hna “qaja nyimenyimëne” la mekune cili? Ohea! Ame la aliene la trenge ithanata ka ujëne la hna hape “qaja nyimenyimëne,” tre, kola qaja la ka saze mekun, atre tha nyine tro kö a mejiune kow, nge tha ka trongëne kö la hna qaja. Jëne la aqane hnyinge i Paulo ka hape, “ame la nöjei ewekë hnenge hna mekun, hape u, hnenge hna mekune thenge la ngönetei?,” kola aijijëne la angetre Korinito troa trotrohnine ka hape, hetre sipu kepine kö matre saze mekune jë Paulo.

Hnei Paulo hna lepe trije la hna qeje nyidrë, me hape: “Ngo nyipici Akötesie, tha hna eje hi me pëkö la tenge ewekë huni koi nyipunie.” (2 Kor. 1:18) Eje hi laka, hnene la ihnimi Paulo kowe la itre trejine ne Korinito matre saze pi la tronge i nyidrë. Ame ngöne 2 Korinito 1:23, kola hape, hnene la ‘ihnimi nyidrë koi angatr’ matre mekune jë nyidrë troa saze lo pane mekuna i nyidrë, ene lo troa tro Korinito. Eje hi laka, hnei nyidrëti hna pane nue ijine koi angatre troa amekötine la itre joIe ka eje thei angatr qëmekene tro nyidrëti a wai angatr. Tune la hna trenge une hnei nyidrë, ame la ijine Paulo e Makedonia, drenge jë hi nyidrë jëne Tito ka hape, hetre thangane hë la tusi nyidrë, ke, hna ahlëne la mekuna i angatr, matre hleuhleu hë angatr, ame hnei angatre hna ietra; celë hi ka amadrinë nyidrëti catr.—2 Kor. 6:11; 7:5-7.

Ame la kola qeje Paulo ka hape, ka tha trongëne la hna qaja, tre kösë kola hape, ketre atre angeic tha nyine tro kö a mejiune kow, ke ka saze mekune o drai, haawe, tha nyine tro kö a mejiune kow ngöne la huliwa ne cainöj. Ngo hnei Paulo hna amekunëne la angetre Korinito ka hape, hnei nyidrëti hna cainöjë Iesu koi angatr. “Ame la Hupuna i Akötesie, Iesu Keriso, lo hne huni hna cainöjëne koi nyipunie, ene ini me Silevana me Timoteo ; te, tha hna eje hi, nge ase hë, pëkö.” (2 Kor. 1:19, MN) Ame Iesu Keriso, lo tulu i Paulo, ketre atr fe nyidrë tha nyine tro kö a mejiune kow? Ohea! Ame ngöne la mele i nyidrë, me huliwa ne cainöje i nyidrë, hnei nyidrëti pala hi hna qaja la nyipici. (Ioane 14:6; 18:37) Maine ka nyipici pala hi la hna cainöjëne hnei Iesu, me nyine mejiune kow, nge maca fe hi lai hnei Paulo hna cainöjën, haawe, tro fe hi a mejiune kow la hna cainöjëne hnei Paulo.

Eje hi laka, Iehova la “Akötesieti ka nyipici.” (Sal. 31:5) Easa öhne lai ngöne la itre hnei Paulo hna cinyanyi e thupen: “Ame la nöjei hna thinge hnaeane i Akötesie, te, eje hi thei nyidë,” kola hape, jëne Keriso. Hnene la aqane mele nyipici Iesu e celë fen, ene pe tha lueluëne hë së la nöjei hna thingehnaeane hnei Iehova. Öni Paulo e sisedrëne ka hape: “Me amene [koi Akötresie jëne Iesu], nyine atrunyi Akötesie jë hun.” (2 Kor. 1:20) Haawe, Iesu hmekuje hi la jën, maine ‘Amen’ matre eatre pi la nöjei hnei Iehova Akötresie hna thingehnaean!

Mama hnyawa hi laka, hnei Paulo pala hi hna tui Iesu Keriso me Iehova Akötresie, laka hnei nyidrëti pala hi hna kuca la hnei nyidrëti hna qaja. (2 Kor. 1:19) Ka trongëne pala hi nyidrëti la hna qaja, tha ka tune kö la atre thingehnaeane “thenge la ngönetei.” (2 Kor. 1:17) Ka tro pe  nyidrë ‘thenge la u.’ (Gal. 5:16) Ka tru e kuhu hni nyidrë la itre hna ajane hnene la itre atr, nge kola mama ngöne la aqane imelekeu i nyidrë me angatr. Ame la Eje Hi nyidrë, tre, Eje Hi!

Hna majemine hnene la itre atr enehila ka tha melëne kö la itre trepene meköti ne la Tusi Hmitrötr, troa thingehneane la ketre ewekë, nge tro hi a canga thipetrije e traqa pi la ketre hnepe jol koi angatr. Ame ngöne la itre huliwa ne thele mani, tre ame la “eje hi” enehila, tre tha “eje hi” hmaca kö elany, ngacama hna inyipicikeu ju hë me sija ngöne ipepa. Ala nyimu hë la angetre tha xome hmaca kö la faipoipo ceitune me aqane troa inyipicikeu hnene la lue trefën, nge nyine troa metrötrëne uti hë mec. Kola amamane hnene la etrune la itre ka sei hna cile ka hape, tru catre la itre atr ka wange ahmalohmaloeëne la faipoipo ceitu me otretre ka xecixeci, laka tro hi canga sesei.—2 Tim. 3:1, 2.

Nge tune kaa fe epun, ame la eje hi, ke, eje pala hi koi epun? Nyipici laka, tune lo hne së hna ce wange hë ngöne la qaane la taane mekune celë, laka ame itre xa ijin, tro sa apëne la hna isapui, tha hnene kö laka ka saze mekune së, ngo hnene la itre ewekë ka traqa, nge ka asesëkötrë së. Ngo ame easë itre Keresiano, e ase hë së ce axeciëne la ketre ewekë memine la ketre atr, the tro kö sa trian. (Sal. 15:4; Mat. 5:37) Maine tro së a ujë tune lai, haawe troa ha qeje së ceitu me ketre atr ka nyipici pala hi, atre trongëne la hna qaja, nge nyine troa mejiune kow. (Efe. 4:15, 25; Iako. 5:12) E tro la itre atr a öhne laka, ka qaja pala hi së e nöjei drai la nyipici, tro hë angatre lai a ajane catrëne troa drei së ngöne lo itre ijine easa tro fë la maca ne Baselaia koi angatr. Haawe, epi tro pala hi sa qaja ka hape, Eje Hi, tre, Eje Hi!