O Kuila o Kizuelu Kiê Uila—‘Kiene mungu uixi Kana?’
Xinganeka ia mu bhita: Kafunga u bhanga mbandu ia Comissão de Ligação com Hospitais, ua bakana ni munzangala phala ku tunda kumoxi mu sidivisu ia ku boka kia Lumingu mu kamene. Mu kimene kieniókio, phange ua xindi ku kafunga, mukonda muéne uambatele muhatu’ê ni lusolo, mu kididi kia ku saka, mukonda dia kizangu kia dikalu. Muéne u bhinga ku kafunga phala ku mu kuatekesa ku sanga dotolo u saka sé manhinga. Mu kiki, o kafunga, u fonga o kuia mu boka ni munzangala, phala o ku kuatekesa o muiji, ua kexile mu di bhana ni maka a bhingile kua batula ni lusolo.
Xinganeka kima kia mukua: Mama dikudi, ni kiiadi kia an’a, a mu bhingi ku dikaza phala kuia mu usuku ku bhata diâ. Kioso muéne kia zuela ni an’a ia lungu ni maka enhá, o pholo jâ ja londekesa ku sanguluka. Ene a kingila o usuku uenhó ku bhixila ni ku sanguluka kuoso. Mu kiki, ande dia kizuua ku bhixila, o dikaza di xinda ku mama íii, a mu ambela kuila, kua moneka maka, mu kiki a a fidisa phala kezé ngó. Mu ku bhita kithangana, muéne uejidile mukonda diahi o dikaza ua a fidisile o kuia ku inzo iâ. Kioso o dikaza kia bhingi ku mama íii phala kuia ku bhata diâ, mu ku bhita ka kithangana, ene uâ a a bhingi ku makamba mâ phala kuia ku inzo iâ mu usuku uenhó, ene a xikina.
Kuma tu Jikidistá, mu kidi tua tokala ku kumbidila o izuelu ietu. Etu ki tu tokala kuzuela kuila, ‘kiene mungu tuixi kana.’ (2 Kol. 1:18) Kala ki tua mono kia ku ifika iiadi íii, kuala ima i moneka ki i sokela ni ia mukuá. Nange ku moneka maka a bhangesa kuila, o kima ki tua bakana, ki tu tena ku ki kumbidila. Katé ué ni poxolo Phaulu ua bhitile ué mu maka enhá.
PHAULU A MU TATELA MAKUTU
Ku muvu ua 55 K.K., kioso Phaulu kia kexile mu Efezo ku njila iê ia katatu ia ukunji, muéne ua mesenene ku bhitila ku Kalunga ka Ajeu mu Kolindo phala kuia ku Masedonha. Kioso kia vutuka mu Jeluzaleme, muéne ua mesenene ku kunda o kilunga kia Kolindo luua kaiiadi, phala ku takana o maujitu phala ku ambatele ku jiphange mu Jeluzaleme. (1 Kol. 16:3) Kiki a kilondekesa mu divulu dia 2 Kolindo 1:15, 16, mua soneka kiki: “Mu kudielela kiki o ima ioso ienhi’ii, ku dimatekenu ngambele kudianga kuiza ko kuenu, phala ku mi kunda, mbé o mbote mu i mone lua kaiadi. Mukonda ngambele ku mi somboka mu kuia ku Masedonia, ni ku mi sanga dingi mu kuvutuka ku Masedonia, phala mu ngi xinjikile njila iami ia kuia ku Judeia.”
Tu mona kuila ku mukanda ua diangela o ku soneka, Phaulu ua tangele o jiphange mu Kolindo o kima kia mesenene o ku bhanga. (1 Kol. 5:9) Kioso kia bhiti o kithangana kia soneka o mukanda iú, Phaulu uevu bhu kaxi ka muiji ua Koloue, kuma mua kexile maka mu Kilunga. (1 Kol. 1:10, 11) Phaulu ua bhingile ku lungulula o ima ia mesenene o ku bhanga, iu ua soneka o mukanda, lelu u tuejiia mu dijina dia, mukanda ua 1 ua Kolindo. Mu mukanda iú, Phaulu ni henda ioso ua a bhana milongi ni kua bazela. Muéne ué ua zuela kuila ua lunguluile o njila iê, mu ku a tangela kuila ueji kuia hanji ku Masedonha, kiene kiua kieji iá mu Kolindo.—1 Kol. 16:5, 6. *
Nange kioso o jiphange mu Kolindo kia tambula o mukanda ué, o ‘jipoxolo’ ja mukuá mu kilunga, a mu tatela makutu, mba exi ka mu kumbidila ioso ia kanena. Mu kua tangela o kidi Phaulu uebhula: ‘O ki ngambele kubhanga kiki kifua ngedikisa ku lungujuka mba ima i ngi kana ku bhanga kifua ngi i kanena mu xitu, phala ngi kale ngi mukua kuila, hinu kiene kiene, hinu kana kana?’—2 Kol. 1:17; 11:5.
Nange tu dibhudisa, o kuila mu kithangana kieniókio, poxolo Phaulu ua kexile mu ‘lungujuka mu ku mona o ima ia kexile mu bhanga?’ Kana! O kizuelu ku ‘lungujuka’ kilombolola muthu ka tena ku mu dielela, mba muthu ka mu kumbidila ni íii ia kanena. O kibhuidisu kia Phaulu kia difu kuila, “ima i ngi kana ku bhanga kifua ngi i kanena mu xitu?” Kieji kuatekesa o Jikidistá akua Kolindo kuila Phaulu o ku lungujuka kuê, ki kuila muéne muthu u kamba ku kumbidila o ima ia kanena mba ka tena ku mu dielela.
Phaulu ua ditunu o kitatelu kioso kia soneka: “Kabasa Nzambi uala fiiele, ua k’ijiia kuma hundu ietu ko kuenu ki ia kuila kiene ni kana.” (2 Kol. 1:18) Mu kidi kioso, Phaulu ua lungulula o njila iê, mukonda muéne ua mesenene o mbote ia jiphange jê mu Kolindo. O mukanda ua 2 Kolindo 1:23, tu tanga-mu kuila kia dianga muéne, kendele mu Kolindo ‘phala kua fikidila.’ Mu kidi muéne ua bhana kithangana kia ku batula o maka a monekene ande dia ku di sanga nau. Kala kia ki kingile ande dia kuia ku Masedonha, Phaulu uevu bhu kaxi ka Tito kuila o mukanda ua a sonekena, ua a kuatekesa o ku mona kuila o ima ia kexile mu bhanga, ia iibha, ia a diela, mu kiki muene ua sangulukile mu ku kivua.—2 Kol. 6:11; 7:5-7.
O KIZUELU ‘KIENE’ KIA TOKALA KUA NZAMBI
Kioso o jipoxolo kia tatela Phaulu kuila ka mu kumbidila o ima ia zuela, nange ene ambele ué kuila ka tokelele ku dielela o kikalakalu kiê mu ukunji. Maji Phaulu ua lembalesa o akua Kolindo kuila, muéne ua bokele o njimbu ia lungu ni Jezú Kristu kua ene. “Mon’a Nzambi, Jezú Kristu, tua mu kola mu’axaxi kenu, eme ni Sidivanu ni Timote, kene kuila kindala kiene, kindala kana, maji mukua kiene mu kiene.” (2 Kol. 1:19) O kuila Jezú Kristu, o muthu akexile mu ku mu kaiela kua Phaulu, ua kexile mu lungujuka? Kana! Ku muenhu uoso ni mu ukunji ué, Jezú ua nangenena mu kuzuela ngó o kidi. (Nzuá 14:6; 18:37) Se ioso ia boko Jezú ia kexile ia kidi, ia ku dielela, o Phaulu ua boko ué o Njimbu ienii, kienhiki-phe, ioso ia boko o jipoxolo ia ku dielela ué.
Mu kidi, Jihova muéne “Nzambi ia kidi.” (Jisá. 31:5) Tu tena ku mona kuila kidi, kioso ki tu tanga ia soneka Phaulu ku pholo: “Né mbe ikanenu ia Nzambi i vula kinéne, kua muene kua kala kiene,” bhu kaxi ka Jezú Kristu. O ufiiele ua Jezú kioso kia kexile mu Ixi, u tu londekesa kuila o ikanenu ia Jihova ia ku dielela. Phaulu ua suluka: ‘Kua muène ue ku tunda o kuila kiene, ki bhekela ku mbandu ietu tu fumanesa Nzambi.’(2 Kol. 1:20) Jezú muéne o muthu ua dielelesa kuila ‘Kiene’ kia lungu ni ioso ia kanena Jihova Nzambi, ia-nda di kumbidila!
Kála Jezú Kristu ni Jihova Nzambi a zuela ngó o kidi, kiene ué kia kexile mu bhanga Phaulu. (2 Kol. 1:19) Muéne kexile muthu u lungujuka, mba muthu u “kanena mu xitu.” (2 Kol. 1:17) Mu veji dia kiki, muéne ua kexile mu kuehela o ‘Nzumbi ia Nzambi ku muendesa.’ (Nga. 5:16) Mu ku di bhana ni akuâ, muéne ua mesenene o mbote phala akuâ. Mu kidi, o kizuelu kiê kia kuila Kiene, kiexile muene Kiene!
O KUILA O KIZUELU KIÊ KIENE KI KALA KIENE?
Mu izuua íii, athu avulu ka mu kaiela o milongi ia Bibidia, a bhanga ikanenu maji ka i kumbidila mukonda dia kima kiofele ki moneka, mba kima kiambote kia beta-o-kota phala ene. Ku mundu iú ua uenji, kioso kiamba kiene, mu veji javulu, ki ‘kiene’ mu kala ‘kiene,’ né muene ene mudiâ, a ki soneka mu mukanda. Saí athu, ka mono o ukaza kala kikutu kia tokala o ku ki kumbidila ku muenhu uâ, né muene ni ibhidi ia di bhana na-iu. O ku dixisa, kulondekesa kuila saí athu a mona o ukaza, kála kima kioso-kioso, kia tena o ku ki muangununa.—2 Tim. 3:1, 2.
O ku mbandu iê? O kuila o kizuelu kiê Kiene, ki kala Kiene? Mu kidi, kala ki tua mono ku dimatekenu dia milongi íii, nange ki bhinga ku lungulula o kikanenu kiê, ki mukonda dia kima kioso-kioso, maji sumbala, mu kima ki moneka sé eie ku ki kingila. Maji eie u Kidistá, se ua bhange kikanenu, ua tokala u bhanga ioso phala ku ki kumbidila. (Jisá. 15:4; Mat. 5:37) Se u bhanga kiki, eie a-nda kuijiia kala u muthu a ku dielela, muthu ua kidi, muthu u zuela o kidi mu ithangana ioso. (Efe. 4:15, 25; Tiia. 5:12) Kioso o athu kia kijiia kuila eie a tena ku ku dielela ku maka a moneka mu kizuua ni kizuua, ene a-nda tena ku kuívua kioso ki u zuela nau ia lungu ni kidi kia Utuminu ua Nzambi. Mu kiki, tu di tonginine jinga, phala tu bhange ioso phala o kizuelu kietu kia kuila Kiene ki kala Kiene!
^ kax. 7 Mu ku bhita kithangana kioso kia soneka o mukanda ua 1 Kolindo, Phaulu ua bhange njila ia ku bhitila ku Tolouade iu uai ku Masedonha, kua sonekena o mukanda ua 2 Kolindo. (2 Kol. 2:12; 7:5) Mu ku bhita ithangana, muéne uai mu kunda akua Kolindo.
