Okuti Ondaka Yove
Soka kuetyi: Omukulu umwe weuaneno, umwe Povaameni Vonombangi Konthele Yohonde wapanga okuundapa nomukuendye umwe movilinga viokuivisa Motyalumingu komuhuka. Komuhuka watyo, omukulu weuaneno atelefonalelua nomukuatate umwe una omukai waviluka netukutuku iya atualwa liwa kosipitali. Omukuatate oo waita omukulu weuaneno emukuateseko okuvasa ondotolo maitande omukai wae aihaundapesa ohonde. Ngotyo, omukulu weuaneno apopila omukuendye okuti kamai vali nae movilinga viokuivisa mokonda makakuatesako ombunga imwe yatumbukilwa notyitateka.
Soka vali kuetyi: Omphange umwe wahanepelue una ovana vevali wakongua novalinepi vamwe mewaneno liae opo akahungile keumbo liavo. Etyi apopila ovana vae okuti vakongwa, ovana avahambukwa unene. Ankho vahanda onthiki oyo ihikepo liwa. Mahi, etyi kuakamba onthiki ike, ovalinepi ovo avapopila ina yovana ovo okuti vatumbukilwa natyimwe kamatyitavela vali vayeko. Konyima omphange anoñgonoka omokonda yatyi ovalinepi ovo vapopila ngotyo. Etyi ovalinepi ovo vemukonga, tupu avakongwa nomapanga avo, iya avetavela.
Mokonda Tuvakristau, tuesukisa okufuisapo etyi tupopia. Katupondola okuti “‘enga,’ tupu atuti ‘au.’” (2 Cor. 1:18) Mahi, onongeleka ombo onombali mbulekesa okuti ononkhalelo mbelikalaila. Hamwe petupu vali etyi tupondola okulinga opo tufuisepo etyi tualaele. Otyo tupu tyaendele na apostolu Paulu.
PAULU WATENDELEYWA OKUTI ONKHEMBI
Menima 55 P.K., puetyi Paulu ankho eli ko Efesu moungendi wae watatu woumisionaliu, ankho uhanda okukuata Kelunga Egeu okuenda noko Korintu iya konyima aende noko Masedonia. Pokukondoka noko Jelusalei, apange okutalelapo ewaneno lio Korintu otyikando tyavali, opo apituile oviawa viavo evituala kovakuatate mo Jelusalei. (1 Cor. 16:3) Otyo tutyii mokonda 2 Coríntios 1:15, 16, yati: “Nonthumbi oyo, nahandele tete okukuata oko, opo mukale nehambu otyikando tyavali. Ngotyo nahandele okumutalelapo tete iya andyiende noko Masedonia, tyina namatundu ko Masedonia andyikuate oko, amunthyindikila alo ko Judeia.”
Otyo tyilekesa okuti Paulu wahonekelele ovakuatate voko Korintu, okuti wapanga okukevetalelapo. (1 Cor. 5:9) Etyi Paulu ahoneka omukanda oo, pakala vala katutu, vomeumbo lia Cloe, avemupopila okuti mewaneno muna ovitateka ovinene. (1 Cor. 1:10, 11) Paulu ahalingi vali etyi ahandele iya ahoneka omukanda wa 1 Coríntios. Momukanda omo Paulu weveviyulile, nokuveavela onondonga. Tupu evehonekela okuti wapilulula oungendi wae, tete maende ko Masedonia iya konyima aende noko Korintu.
Tyafuile etyi ovakuatate voko Korintu vatambula omukanda wa Paulu, vamwe ankho “veliti ono apostolu” mewaneno olio, avemutendeleya okuti kapopi otyili. Opo eliyakulile evepulu okuti: “Mokonda yetyi nahandele okulinga, otyo munthalela ngatyina ndyinkhembi? Ine okuti omokonda ovipuka nahanda okulinga ndyivilinga monkhalelo yopahitu, otyo ndyipopila okuti ‘Enga, enga’ iya tupu ‘Au, au’?”
Tupondola okulipula okuti: Pomuvo opo apostolu Paulu tyilityili ankho ‘onkhembi’? Au! Ondaka yapitiyua “onkhembi” ilekesa omunthu uhayumbwa onthumbi, iya uhafuisapo etyi apopia. Epulo lia Paulu liati: “Omokonda ovipuka nahanda okulinga ndyivilinga monkhalelo yopahitu?” liakuatesileko Ovakristau mo Korintu okunoñgonoka okuti etokolo lia Paulu liokupilulula oungendi wae kalialekesile okuti kayumbwa onthumbi.
Etyi vemutendeleya, Paulu akumbulula okuti: “Mahi, ngetyi Huku ayumbwa onthumbi, ondaka tuemupopila, kaipondola okukala ‘enga,’ tupu aikala ‘au.’” (2 Cor. 1:18) Wapilululile oungendi wae mokonda ankho uhanda okukuatesako ovakuatate vae nonomphange mo Korintu. Mu 2 Coríntios 1:23, Paulu wati: “Heile ko Korintu opo nehemunumanese.” Wapilululile oungendi wae mokonda ankho uhanda okuveavela omphitilo opo valandule onondonga mbae, tyina nkhele ehenekevetalelepo. Etyi Paulu ankho eli ko Masedonia, weivile ku Titu okuti omukanda wae wakuatesako ova Korintu okuimbuka okuti etyi ankho vekahi nokulinga tyapenga iya avelivele. Otyo tyahambukisilwe unene Paulu.
ONTHUMBI YETU IKAHI MU JESUS
Etyi vokuliti ono apostolu vatendeleya Paulu okuti kapopi otyili, tupu ankho vekahi nokupopia okuti kavapondola okuyumba onthumbi movilinga viae viokuivisa. Mahi, Paulu ahinangelesa ova Korintu okuti una okuvepopila konthele ya Jesus Kristu. “Omona wa Huku, Jesus Kristu, una ame na Silvano, na Timoteo tuaivisa pokati kenyi, kakalele ‘enga’ iya tupu akala ‘au.’ Anthi konthele yae ‘enga’ yakala umwe ‘enga.’” (2 Cor. 1:19) Okuti Jesus Kristu nae ankho kayumbwa onthumbi? Au! Mokueenda kuomuenyo wae, no movilinga viae viokuivisa Jesus ankho apeho upopia otyili. (João 14:6; 18:37) Inkha etyi Jesus ankho aivisa otyili nokuyumbwa onthumbi, iya apostolu Paulu nae ankho otyo aivisa, naina etyi ankho aivisa natyo tyiyumbwa onthumbi.
Jeova o “Huku yotyili.” (Sal. 31:5) Otyo tutyitalela konondaka mba Paulu mbati: “Omilao aviho Huku alinga, vikala ‘enga’ menyina liae,” menyina lia Kristu. Mokonda etyi Jesus ankho ekahi pano pohi watuaileko noukuatyili, tupondola okukala nonthumbi yokuti omilao via Jeova viyumbwa onthumbi. Paulu watualako okuti: “Tupu menyina liae [Jesus] tyitiwa ‘Amem’ ku Huku, pala enkhimano menyina lietu.” (2 Cor. 1:20) Okuti Jesus o “Amem” tyilekesa tyi? Tyilekesa okuti omilao aviho via Jeova Huku mavifuisuapo menyina lia Jesus!
Ngetyi Jeova na Jesus apeho vapopia otyili, na Paulu ankho apeho ulinga etyi apopia. (2 Cor. 1:19) Paulu ankho omunthu uyumbwa onthumbi, ankho kalingi omilao iya ehevifuisipo. (2 Cor. 1:17) Paulu ankho uhongolelwa nospilitu ya Huku. (Gál. 5:16) Ovipuka aviho alingile vialekesile okuti ankho uhanda okukuatesako ovakuatate vae nonomphange. O Enga yae yakalele umwe Enga!
OKUTI O ENGA YOVE IKALA UMWE ENGA?
Hono, ovanthu ovanyingi valinga omilao avehevifuisipo mokonda yotyipuka tyimwe tyehesilivila ine vahanda okulinga otyipuka otyikuavo. Pokulinga onondando, ovikando ovinyingi o “enga” kaikala “enga,” alo umwe tyina ankho pelitaveluale. Ovanyingi kavatale otyinepo ngatyina omulao ovalinepi valinga opo vatualeko okukala kumwe namphila pamoneka ovitateka. Ovanthu ovanyingi vekahi nokulihenga, tyilekesa okuti ovanyingi vatala otyinepo ngatyina otyipuka tyihasilivila tyipondola okuhanyuapo.
Iya ove? Okuti o Enga yove ikala umwe Enga? Ngetyi tyapopiwa konthyimbi yonthele ei, hamwe, inkha kufuisipo etyi walaele ha mokonda kuyumbwa onthumbi, mahi omokonda hamwe pena etyi tyekumonekela uhevili okupilulula. Mahi tyina wamalingi omulao, tyotyili wesukisa okulinga ononkhono mbokuufuisapo. (Sal. 15:4; Mat. 5:37) Inkha ulinga ngotyo, monoñgonokwa okuti umunthu wokuyumbua onthumbi, apeho upopia otyili. (Efé. 4:15, 25; Tia. 5:12) Tyina ovanthu vaimbuka okuti uyumbwa onthumbi movipuka aviho, vapondola okukutehelela tyina uvepopila otyili konthele Youhamba wa Huku. Ngotyo, tuyekei o Enga yetu ikale umwe Enga!
^ palag. 7 Etyi Paulu ahoneka omukanda wa 1 Coríntios, pakala vala katutu alingi oungendi okukuata mepundaumbo lio Trôade okuenda noko Masedonia. Ngako ahonekela omukanda wa 2 Coríntios. (2 Cor. 2:12; 7:5) Konyima, aende noko Korintu.
