Sena Kwaamba Kwanu
Amweezeezye bukkale oobu: Mwaalu umwi wamukabunga ka Hospital Liaison Committee wabikka bubambe bwakubeleka amukwesu mukubusi mumulimo wakukambauka mu Nsondo mafwumofwumo. Mpoonya mafwumofwumo aayo mwaalu watambula luwaile ilumuzyibya kuti ulayandika cakufwambaana, iluzwa kumukwesu uulaa bakaintu ibajanika muntenda yamumugwagwa akutolwa kucibbadela. Mukwesu ooyo walomba mwaalu kuti amugwasye kujana dokotela uukonzya kumugwasya kujatikizya makani aabulowa. Aboobo, mwaalu ooyu wabucinca bubambe bwakuunka mubukambausi amukwesu mukubusi kutegwa caluyando agwasye mukwasyi ooyu wacitikilwa ntenda.
Amweezeezye alimwi bukkale bumbi: Mukaintu uuli alikke uujisi bana bobilo watambwa abanabukwetene bamwi bamumbungano mwazulilwa kuti akajanike kuŋanda yabo kumangolezya. Ciindi mukaintu ooyu naabaambila bana bakwe, bakkomana kapati. Balabulangila buzuba oobo caluyandisisyo. Nokuba boobo, kakuceede buzuba bomwe kuti baswaye, banabukwetene aaba baambila mukaintu kuti kwacitika cintu cimwi ncobatali kuyeeyela, mpoonya babucinca bubambe oobu. Kwiinde buyo ciindi cisyoonto mukaintu ooyu wazyiba ncobabucincila bubambe banabukwetene aaba. Icacitika ncakuti, nobamana kumutamba, abalo batambwa abeenzinyina kuti bakaswaye ngamunya mangolezya aayo ngobamutamba, alimwi bazumina kutambwa ooku.
Mbotuli Banakristo, tweelede kuzuzikizya ncotwaamba. Kwaamba kwesu takweelede kuba kwakuti “ ‘inzya’ alimwi a ‘peepe.’” (2 Ko. 1:18) Nokuba boobo, kweelana azikozyanyo zyobilo mbozyatondezya, bukkale bulakonzya kwiindana. Zimwi ziindi cilakonzya kuboneka kuti twabula cakucita ccita buyo kucinca bubambe mbotwakabikkide. Mwaapostolo Paulo cimwi ciindi wakalijana mubukkale buli boobu.
PAULO WATAMIKIZYIGWA KUTASYOMEKA
Mu 55 C.E., mulweendo lwakwe lwatatu lwabumisyinali kacili ku Efeso, Paulo wakali kuyanda kuzabuka Lwizi lwa Aegean kuya ku Korinto alimwi kuzwa ooko akuya ku Makedoniya. Naakali kuzwa ku Jerusalemu, wakakanzide kuswaya mbungano yaku Korinto ciindi cabili kutegwa abweze zipego zyaluse zyabakwesu ibakali ku Jerusalemu. (1 Ko. 16:3) Eeci cilisinizyidwe mulugwalo lwa 2 Bakolinto 1:15, 16, nkotubala kuti: “Kandijisi lusyomo oolu, musyule oomu ndakakanzide kuboola ooko kulindinywe ikutegwa mube aciindi cabili cakukondwa, akuti ndaakumana kumubona ndikaunke ku Makedoniya, mpoonya ndaakujoka kuzwa ku Makedoniya mukandisindikile musinzo uuli mbuubede kuya ku Judaya.”
Kulibonya kuti mulugwalo lwamusyule ndwaakalembela Banakristonyina baku Korinto, Paulo wakabaambila kujatikizya makanze aakwe. (1 Ko. 5:9) Nokuba boobo, kwiinde buyo ciindi cisyoonto kuzwa naakabalembela lugwalo oolo, bamuŋanda ya Kloe bakazyibya Paulo kuti kwakali mazwanga kapati mumbungano. (1 Ko. 1:10, 11) Paulo wakasala kucinca makanze aakwe, alimwi wakalemba lugwalo lino lwiitwa kuti 1 Bakolinto. Mulugwalo oolu, Paulo wakabapa lulayo alimwi akubalulamika caluyando. Alimwi wakabaambila kuti wacinca lweendo lwakwe, akuti uyakusaanguna kuya ku Makedoniya mpoonya ku Korinto.—1 Ko. 16:5, 6. *
Kulibonya kuti Banakristonyina nobakatambula lugwalo lwakwe ku Korinto, bamwi ‘batumwa bacibwene kwiinda boonse’ mumbungano eeyo bakamutamikizya kutasyomeka, akuti ulacinca-cinca zisyomezyo zyakwe. Kutegwa aliiminine, Paulo wakabuzya kuti: “Lino nindakajisi makanze aayo, sena kuli nindakaaubya-ubya? Naa sena zyintu nzyondikanza ndizikanza kweelana akuyeeya kwabantu, cakuti ndaba buyo sikutamauka ooyo aciindi comwe waamba kuti ‘Inzya, inzya’ akuti ‘Peepe, peepe’?”—2 Ko. 1:17; 11:5.
Tulakonzya kubuzya kuti, Sena ncobeni mwaapostolo Paulo ‘wakaaubya-ubya makani’ mubukkale oobu? Peepe! Ibbala lisanduludwe kuti “kuubya-ubya” lijisi muzeezo wakucinca-cinca, mbuli kuti muntu tasyomeki, tabambi zisyomezyo zyakwe. Kweelede kuti mubuzyo wa Paulo wakuti “sena zyintu nzyondikanza ndizikanza kweelana akuyeeya kwabantu?” wakacisalazya ku Banakristo baku Korinto kuti kusala kwakwe kwakucinca makanze aakwe tiikwakali akaambo kakuti tanaakali kusyomeka.
Cakukankaizya, Paulo wakakukaka kutamikizyigwa ooku, aboobo wakalemba kuti: “Pele Leza ulasyomeka cakuti nzyotumwaambila tazili ‘inzya’ alimwi a ‘peepe.’” (2 Ko. 1:18) Cakutadooneka, Paulo wakali kubayandisisya Banakristonyina baku Korinto ciindi naakacinca makanze aakwe. Mulugwalo lwa 2 Bakolinto 1:23, tubala kuti ‘tanaakali kuyanda kubamvwisya bubi,’ aboobo wakacinca makanze aakwe aakusaanguna aakuunka ku Korinto. Mubwini, wakabapa ciindi cakuti balulamike zyintu katanaunka kuti abonane ambabo. Kweelana abulangizi mbwaakajisi kacili ku Makedoniya, Paulo wakamvwa kuzwa kuli Tito kuti lugwalo lwakwe masimpe lwakabapa kuusa alimwi akweempwa, calo cakapa kuti akondwe kapati.—2 Ko. 6:11; 7:5-7.
“AMENI” NGOTWAAMBA KULI LEZA
Kutamikizyigwa kutasyomeka kwakali kukonzya kupa kuti naa Paulo takonzyi kusyomwa muzisyomezyo zyakwe zyamubuumi bwaabuzuba abuzuba, nkokuti awalo mulimo wakwe wakukambauka tiiwakali kukonzya kusyomwa. Nokuba boobo, Paulo wakayeezya bana Korinto kuti wakali kubakambaukila kujatikizya Jesu Kristo. Wakaamba kuti: “Mwana wa Leza, Kilisito Jesu, iwakakambaukwa akati kanu kwiinda mulindiswe, nkokuti kwiinda mulindime, Siluvano a Timoteyo, tanaakaba ‘inzya’ alimwi a ‘peepe,’ pele ‘inzya’ yaba ‘inzya’ ncobeni mulinguwe.” (2 Ko. 1:19) Sena cikozyanyo cibotu ncaakali kutobela Paulo ca Jesu Kristo tiicakali kusyomeka? Peepe! Mubuumi alimwi amumulimo wakwe woonse, Jesu lyoonse wakali kwaamba masimpe. (Joh. 14:6; 18:37) Ikuti naa Jesu nzyaakali kukambauka zyakali zyamasimpe ncobeni alimwi zyakali kusyomeka alimwi Paulo wakakambauka mulumbe nguwenya, nkokuti kukambauka kwamwaapostolo akwalo kwakali kusyomeka.
Masimpe, Jehova ngu ‘Leza wakasimpe.’ (Int. 31:5) Eeci cilitondezyedwe mumajwi aatobela Paulo ngaakalemba aakuti: “Nkaambo nozivwula buti zisyomezyo zya Leza, zyaba ‘inzya’ kwiinda mulinguwe,” nkokuti kwiinda muli Kristo. Kusyomeka kwa Jesu naakali anyika kwakapa kuti kutabi kudooneka kulikoonse kujatikizya zisyomezyo zya Jehova. Paulo wakazumanana kuti: ‘Aboobo kwiinda mulinguwe Jesu alimwi twaamba kuti ‘Ameni’ kuli Leza kutegwa Leza apegwe bulemu kwiinda mulindiswe.’ (2 Ko. 1:20) Jesu ndolusinizyo lwini-lwini naa “Ameni” wakuti cilicoonse Jehova Leza ncaasyomezya ciyakuzuzikizyigwa!
Mbubwenya mbuli Jehova alimwi a Jesu mbobaamba masimpe lyoonse, awalo Paulo lyoonse wakalicizyi ncaakali kwaamba. (2 Ko. 1:19) Wakali kusyomeka nkaambo zisyomezyo zyakwe tiizyakali mbuli “kuyeeya kwabantu.” (2 Ko. 1:17) Muciindi caboobo, ‘wakeenda amuuya.’ (Gal. 5:16) Mbwaakali kucita zyintu abantu, wakali kutondezya kuti ulabayandisya. Inzya wakwe wakali Inzya!
SENA KWAAMBA KWANU KWAKUTI INZYA NGU INZYA?
Mazubaano, cilidumide kubantu batatobeli njiisyo zyamu Bbaibbele kusyomezya akucinca cisyomezyo eeco kuti naa kwaba kaambo katayi koomoonga alimwi akuti naa babona cintu cimwi cibotu. Ziindi zinji mumakani aamakwebo “inzya” tali “inzya,” noliba leelyo nokuli cizuminano icakalembwa. Bantu banji tababoni cikwati kuba cizuminano akati kankamu zyobilo, alimwi akuba cintu ceelede kukkalilila. Muciindi caboobo, kuya atala kwamweelwe wazikwati zimana ncitondezyo cakuti bantu banji babona cikwati kuba cintu buyo calo cikonzya kumana kufwumbwa ciindi.—2 Ti. 3:1, 2.
Mbuti kujatikizya ndinywe? Sena kwaamba kwanu kuti Inzya ngu Inzya? Masimpe, kweelana ambokwatondezyegwa kumatalikilo aacibalo eeci, cilakonzya kujanika kuti muyandika kucinca cipangano kutali akaambo kakuti tamusyomeki pele akaambo kabukkale bumwi bwakatazya cakuti mwabula cakucita. Pele mbomuli Banakristo, ikuti mwasyomezya naa kuzumina kucita cintu cimwi, mweelede kusolekesya kuzuzikizya ncomwasyomezya. (Int. 15:4; Mt. 5:37) Ikuti mwacita oobo, muyakuzyibwa kuba muntu uusyomeka, uuzuzikizya ncaamba, alimwi waamba masimpe lyoonse. (Ef. 4:15, 25; Jak. 5:12) Ciindi bantu nobazyiba kuti mulasyomeka muzyintu nzyomucita buzuba abuzuba, balakonzya kumuswiilila nomubandika ambabo kasimpe kajatikizya Bwami bwa Leza. Aboobo, atube masimpe kuti Inzya wesu ngu Inzya ncobeni!
^ par. 7 Nokwakainda ciindi cisyoonto kuzwa naakalemba lugwalo lwa 1 Bakolinto, Paulo wakainda mu Trowa akuunka ku Makedoniya, kwalo nkwaakalembela lugwalo lwa 2 Bakolinto. (2 Ko. 2:12; 7:5) Kumane wakaswaya ku Korinto.
