Kana mwa lapelanga kamita? Batu ba bañata ba lapelanga mane nihaiba ba ba sa lumeli kuli ku na ni Mulimu. Kono ki kabakalañi batu ha ba lapelanga? Patisiso ye ne ezizwe mwa France, i bonisa kuli hafu ya bayahi ba naha yeo ba lapelanga kamba ku yeya ka linako ze ñwi “ka mulelo feela wa kuli ba ikutwe hande.” Sina batu ba bañata ba ba pila mwa Europe, batu ba kwa France ha ba lapelangi ka mulelo wa ku lumbeka Mulimu. Kono ba lapelanga ka mulelo wa kuli “tapelo i ba tuse ku ikutwa hande.” Balapeli ba bañwi bona ba lapelanga feela ku Mulimu ha ba tokwa nto ye ñwi, mi ba libelelanga kuli a alabe litapelo za bona kapili-pili.—Isaya 26:16.

Mina bo? Kana mu nahana kuli tapelo ki nto feela ye lu tusa ku nahana hande? Haiba mwa lumela ku Mulimu, kana mu lemuhile kuli tapelo ya kona ku mi tusa mwa bupilo? Kamba kana mu ikutwa kuli litapelo za mina ha li alabiwangi? Bibele ya kona ku mi tusa ku lemuha kuli tapelo haki nto feela ye tusa mutu ku ikutwa hande, kono ki nzila ye nde ye lu tusa ku sutelela ku Mulimu.