Be ilemoga? Ji mang’eny lemoga, kata mana joma ok oyie kuom Nyasaye. Kata kamano, ang’o momiyo ji lemoga? Kaluwore gi nonro moro ma notim e piny Faransa nus mar jopinyno lemoga kata walo kinde mar paro matut kuom gimoro mana mondo “giwinj maber.” Mana kaka jo pinje mag Ulaya mang’eny, jogo ok ne lemo kaka gima nyiso ni giyie kuom Nyasaye. Kar mano, gilemo mondo gibed gi “chuny mokuwe.” Moko to lemo mana sama gin e chandruok moro kendo gidwaro ni Nyasaye odwok kwayogino sano sano.—Isaiah 26:16.

In to ineno nade wach lemo? Dibed ni ineno lemo mana kaka gima konyi paro e yo maler? Kapo ni in ng’at moyie kuom Nyasaye, be ineno ka lemo konyi e ngimani? Koso ineno ni Nyasaye ok dwokga kwayo magi? Muma nyalo konyi neno lemo kaka yo maduong’ mar sudo machiegni gi Nyasaye to ok mana gima kweyo chuny ng’ato.