1, 2. (a) I kare ma mwakane oo 40, tam ango ma Moses omoko? (Nen cal ma tye i pot karatac man.) (b) Pingo Moses oyero me deno can kacel ki jo pa Lubanga?

 MOSES onongo ngeyo ni etye ki anyim maber i lobo Ejipt. En oneno odi mabeco ma lulonyo gugedogi. En bene onongo bedo i ot ker dok “gipwonyo ki ryeko ducu pa Luejipt,” ma man nen calo kwako goyo pulan me ot, kwano lok i kom lakalatwe, cura ki dong cayan mapat pat. (Tic 7:22) Onongo yot bote tutwal me bedo ki lonyo, twero, ki dong mot ma Luejipt mukene pe gitwero nongone.

² Ento i kare ma mwaka pa Moses oo 40, en omoko tam mo ma ocungo wi Parao kacel ki lupacone. En oyero me kwo i kin opii ma ka kwo calo Luejipt mukene-ni! Pingo? Moses onongo tye ki niye. (Kwan Jo Ibru 11:24-26.) Pi niyene, Moses pe oneno jami ma gurumo ka ngete keken. Moses onongo tye ki niye i kom Jehovah, “Lubanga ma pe nen,” kacel ki cobbe pa cikkene.​—Ibru 11:27.

3. Lapeny adek mene ma kibinyamogi i pwony man?

³ Wan bene omyero pe wanen jami ma gurumo ka ngetwa keken. Omyero wabed “i kin jo ma gitye ki niye.” (Ibru 10:38, 39) Me jingo niyewa, kong wanyamu gin ma kicoyo i kom Moses i Jo Ibru 11:24-26. Ka watye ka nyamone, yeny lagam pi lapeny magi: Bedo ki niye ocuko cwiny Moses nining me kwero  miti me kom? I kare ma kicaye, niye okonye nining me bedo ki pwoc pi mot me tic ma en onongo tye kwede? Dok pingo Moses “ociko wange kun neno mot me kare me anyim”?

4. Gin ango ma Moses oniang ma lubbe ki “bedo ki yomcwiny me bal”?

⁴ Pien en onongo tye ki niye, Moses oniang ni “bedo ki yomcwiny me bal” pe ri. Jo mogo nen calo gubedo ka tamone ni kadi bed ni Luejipt onongo gudonyo matut i woro cal ki dok tim me tyet tyet, ento onongo pud gitye oteka ma loyo lobo ducu kun jo pa Jehovah onongo gitye ka deno can macalo opii! Ento, Moses onongo ngeyo ni Lubanga twero kelo alokaloka. Kadi bed jo ma gimito cobo mitigi keken onongo nen calo gipe ki peko, ento Moses onongo ngeyo ni jo ma kitgi raco kibityekogi woko. Macalo adwogine, en pe oye ni “yomcwiny me bal ma ri pi kare manok mo keken-ni” odwo tamme.

5. Ngo ma bikonyowa me kwero “bedo ki yomcwiny me bal ma ri pi kare manok mo keken-ni”?

⁵ Itwero kwero “yomcwiny me bal ma ri pi kare manok mo keken-ni” nining? Wi pe myero owil ni yomcwiny me bal pe ri. Pi niye ma watye kwede, wangeyo ni “lobo tum woko ki mitine ducu.” (1 Jon 2:15-17) Lwod lok i kom anyim pa jo ma gitimo bal labongo ngut. Gin gucung i ‘kabedo mapwot ma gicer acera ki iye dok kibirwenyogi woko oyotoyot ki gin maraco ma kelo lworo.’ (Jab. 73:18, 19) Ka itye i atematema me timo bal, penye kekeni ni, ‘Anyim ango ma an amito?’

6. (a) Pingo Moses pe oye ni myero “gilwonge ni en e wod pa nya pa Parao”? (b) Pingo itamo ni Moses omoko tam matir?

⁶ Niye pa Moses okonye me yero gin ma en onongo mito timone i anyim. “Pi niye Moses, ka dong odongo, pe oye ni myero gilwonge ni en e wod pa nya pa Parao.” (Ibru 11:24) Moses pe obedo ki tam ni etwero tic pi Lubanga macalo laker kun etiyo ki lonyone kacel ki twerone me konyo Luicrael luwote. Ma ka meno, Moses omoko tam me maro Jehovah ki cwinye, tamme, ki dong kerone ducu. (Nwo. 6:5) Tam ma Moses omoko-ni okonye ki i arem cwiny. Lonyo me Ejipt ma en oweko-ni Luicrael guyakogi woko ducu! (Nia 12:35, 36) Lewic omako Parao ci omwony woko i pii. (Jab. 136:15) Ki tungcel, Moses obwot ci Lubanga otiyo kwede me telo jo Icrael. Kwone obedo ki tyen lok.

7. (a) Ma lubbe ki Matayo 6:19-21, pingo omyero wago pulan pi anyim me labed naka? (b) Mi labol ma nyuto apokapoka ma tye i kin goyo pulan pi anyim ma tye pi tutunu ki dong pi anyim ma ri?

⁷ Ka ibedo bulu ma tye ka tic pi Jehovah, niye twero konyi nining me yero gin ma myero itim i anyim? Ka igoyo pulan pi anyim, meno nyuto ni iryek. Tika niyeni i kom Lubanga bimiyo ‘ikano lonyo,’ pi anyim ma tye pi tutunu nyo kece pi anyim me labed naka? (Kwan Matayo 6:19-21.) Man aye lapeny ma lamyel mo ma nyinge Sophie okemme kwede. Kampuni mapol me myel i lobo Amerika gudyere me culo pi kwanne ki dok me miye tic macalo lamyel. En owaco ni: “Abedo ka nongo mit pa pak ma kibedo ka mina-ni. Ki lok ada, onongo atamo ni adit akato luwota. Ento cwinya onongo pe yom.” I ngeye, Sophie oneno video me Young People Ask​—What Will I Do With My Life? [Lapeny pa Jo Matino​—Ngo ma Abitimo ki Kwona?] En owaco ni, “Aniang ni pak kacel ki cwak ma dano gubedo ka miya-ni oweko pe atiyo pi Jehovah ki cwinya ducu. Alego ki cwinya ducu bote. Lacen, aweko yubba me medde ki myel.” En owinyo nining ma lubbe ki tam ma en omoko-ni? En omedde ni: “Pe atamo pi kwona mukato angec. I kareni, cwinya yom adada. Wan ki cwara watye ka tic macalo painia. Pe watye jo muywek dok bene wape ki jami mapol. Ento watye  ki Jehovah, lutino kwanwa me Baibul, ki dong yub me cwiny. Pe atye ka koko ange kadi matidi mo.”

8. Tira mene me Baibul ma romo konyo jo matino me moko tam i kom gin ma gibitimo ki kwogi?

⁸ Jehovah ngeyo gin maber piri. Moses owaco ni: ‘Wun jo Icrael, gin ma Rwot [Jehovah] Lubangawu mito ki botwu en ene keken ni, wulwor Rwot [Jehovah] Lubangawu ki cwinywu ducu ki kwowu ducu, dok wugwok gin ducu ma en ociko ki cik mapatpat ma acikowu kwede tin wek wubed dong maber.’ (Nwo. 10:12, 13) Ka pud itidi, yer gin ma ibitimo i anyim ma weko imaro Jehovah dok itiyo pire ki ‘cwinyi ducu ki kwoni ducu.’ Bed ki gen ni kwanyo yo ma kit meno bikonyi ‘wek ibed maber.’

9. Tit kong gin mumiyo Moses onongo ni tek tutwal me tiyo tic ma kimiye.

⁹ Moses “otamo ni yet ma giciro pi Kricito obedo lonyo madit makato lonyo ducu ma tye i Ejipt.” (Ibru 11:26) Moses onongo kicimo calo “Kricito” nyo “Ngat ma Kiwiro,” pien ni Jehovah oyero en me telo wi Luicrael ki i Ejipt. Moses onongo ngeyo ni tic man bibedo tek, dok bikelo “yet” i kome. Con kong, Laicrael mo ocaye kun penye ni: “Anga muketi me bedo laker ki langolkop i komwa?” (Nia 2:13, 14) Lacen, Moses openyo Jehovah ni: “Parao biwinyo lokka ningning?” (Nia 6:12) Wek eyubbe me ciro yet, Moses otito lworone kacel ki tam ma i cwinye bot Jehovah. Jehovah okonye nining me cobo ticce matek tutwal-li?

10. Jehovah okonyo Moses nining wek ocob ticce?

¹⁰ Me acel, Jehovah ocikke bot Moses ni: “An aye abibedo kwedi.” (Nia 3:12) Me aryo, Jehovah omiye gen dok ocuko cwinye kun tito tyen lok me nyinge: ‘Atwero Doko Gin Mo Keken ma Amito.’ * (Nia 3:14) Me adek, en omiyo teko me timo tango bot Moses, dok man onyuto ni Lubanga aye ocwalle. (Nia 4:2-5) Me angwen, Jehovah ocimo Aron me bedo lalok pa Moses, kun bene konye me tiyo ticce. (Nia 4:14-16) I agikki me kwone, Moses onongo ngeyo maber adada ni Lubanga konyo luticce me tiyo tic mo keken ma En minigi. Man oweko en owaco ki tekcwiny bot Yocwa, ngat ma oleyo kakare-ni ni: “Rwot [Jehovah] aye bitelo nyimi, en bibedo kwedi, pe bibiwoti ata, pe biweki keni. Pe ilwor, cwinyi pe opoti.”​—Nwo. 31:8.

11. Pingo Moses oneno ticce calo gin ma pire tek?

¹¹ Ki kony pa Jehovah, Moses oneno ticce matek-ki calo gin ma pire tek, kun tero ni obedo “lonyo madit makato lonyo ducu ma tye i Ejipt.” Pe tye gin mo ma kiromo porone ki tic pi Lubanga Won Twer Ducu. Bedo wod ker i Ejipt onongo konye pe ka iporo ki bedo ngat ma Jehovah oyero me telo Luicrael. Kimiyo mot bot Moses pi bedo ki neno mupore. En obedo ki wat macok ki Jehovah, ngat ma oweko en obedo ki “twer madwong” i kare ma en tye ka telo Luicrael i Lobo ma Kiciko Pire.​—Nwo. 34:10-12.

12. Mot me tic ango ma Jehovah ominiwa ma myero wabed ki pwoc iye?

¹² Wan bene watye ki tic ma kiminiwa. Jehovah otiyo ki Wode me miniwa tic mo ma pire tek, kit ma omiyo kwede bot lakwena Paulo ki jo mukene. (Kwan 1 Temceo 1:12-14.) Wan ducu watye ki mot meno me tito kwena maber-ri. (Mat. 24:14; 28:19, 20) Jo mukene gitye ka tic pi kare malac. Omege ma guteggi i yo me cwiny gitiyo i kacokke macalo lukony kor tic ki dok luelda. Ento, jo me pacowu ma  gin pe luye kacel ki jo mukene giromo bedo ki akalakala ka mot me tic magi pigi tek nyo bene gicayi pi cwiny me jalle-ken ma inyuto. (Mat. 10:34-37) Ka dong gubalo cwinyi, itwero cako penye kekeni ka ce jalle-ni piri tek nyo ka ce itwero cobo ticci. Ka gin ma kit meno otimme, bedo ki niye twero konyi nining me diyo cwinyi?

13. Jehovah konyowa nining wek wacob tic ma en ominiwa?

¹³ Bed ki niye ka itye ka lega bot Jehovah wek en okonyi. Titte lworoni kacel ki parri. Pien Jehovah aye omini tic man, en bikonyi me cobone. Nining? En bikonyi kit ma okonyo kwede Moses i yo mapol mapat pat-ti. Me acel, Jehovah ocikke boti ni: “Abimiyi tek, dok abikonyi, abimaki ki cinga lacuc, ma miyo aloyo lukworra-ni.” (Ic. 41:10) Me aryo, en poyo wi ni cikkene genne: “Dong aloko, dok abicobone, dong atyeko yubone, dok bene abitimo.” (Ic. 46:11) Me adek, Jehovah mini ‘teko madwong’ me cobo ticci me pwony. (2 Kor. 4:7) Me angwen, wek imedde ki ticci, Wonwa ma lamar-ri okeli i dul pa utmege ma gitye i woro me ada ma ‘gicuko cwinygi kekengi dok gikonyo luwotgi. (1 Tec. 5:11) Niyeni i kom Jehovah bijing doko matek ka ce en mini gin ma imito wek icob ticci maber. Macalo adwogine, ibitero motti me tic calo gin ma pire tek kato gin mo keken ma loboni twero mini.

14. Pingo Moses onongo tye ki gen ni wang ma kimine mot?

¹⁴ Moses “ociko wange kun neno mot me kare me anyim.” (Ibru 11:26) Ada, kadi bed ni ngec pa Moses onongo nok ma lubbe ki jami ma gitye anyim, en oweko ngec meno manok-ki otire i moko tamme. Calo kwarone Abraim, Moses onongo tye ki gen ni Jehovah twero cero jo muto. (Luka 20:37, 38; Ibru 11:17-19) Gen ma Moses obedo kwede i kom cikke pa Lubanga okonye pe me neno mwaki 40 ma en ocwalo macalo laring ayela ki dok mwaki 40 ma en ocwalo i dye tim-mi calo kare ma oballe nyong. Kadi bed ni en onongo pe ngeyo jami ducu ma lubbe ki kit ma Lubanga bicobo kwede cikkene, Moses oneno mot me kare me anyim pi niye ma en obedo kwede-ni.

15, 16. (a) Pingo omyero wacik wangwa i kom motwa? (b) Mot macalo mene ma itye ka kurogi ki miti madit i te loc me Ker-ri?

¹⁵ Tika ‘iciko wangi kun ineno’ mot me  anyim? Calo Moses, wan bene pud pe wangeyo jami ducu madok i kom cikke pa Lubanga. Me lapore, pe ‘wangeyo nino’ ma twon can madit atika-ni bicakke iye. (Mar. 13:32, 33) Ento, wangeyo jami mapol madok i kom Paradic ma pud tye anyim-mi makato Moses. Kadi bed ni pe wangeyo jami ducu, ento watye ki ngec muromo i kom cikke pa Lubanga ma lubbe ki kit ma kwo bibedo kwede i te Kerre mumiyo omyero ‘wacik wangwa iye.’ Ka wagoyo i wiwa kit ma kwo bibedo kwede i lobo manyen, ci man bimiyo waketo pi Ker-ri bedo mukwongo i kwowa. I yo ma nining? Tam kong: Tika itwero wilo ngom ka ce ipe ki ngec muromo i kome? Pe wacel! I yo acel-li, pe watwero dyero kwowa kun nongo wageno bwoyo ngor. Pi niyewa, omyero wago i wiwa kit ma kwo bibedo kwede i te loc me Ker-ri dok wabed ki gen matek liking iye.

¹⁶ Wek ibed ki gen matek i kom Ker pa Lubanga, ‘cik wangi’ matek kun icwalo kare me goyo i wi kit ma kwo bibedo mit kwede i Paradic. Me lapore, ka itye ka kwano lok i kom jo ma gukwo ma kare pa Lukricitayo pudi, tam kong i kom lapeny ma onongo ibipenyogi kwede ka kicerogi. Tam kong gin ma gubipenyi kwede ma lubbe ki kwoni i kare me agikki. Go yomcwiny ma ibibedo kwede me rwatte ki kwarini ma guto mwaki mapol adada mukato angec ki dok me pwonyogi jami ducu ma Lubanga otimo pigi. Tam kong yomcwiny ma ibibedo kwede ka iwoto ki medo ngecci i kom lee tim mapol kun inenogi i lobo ma opong ki kuc. Tam bene i kom kit ma ibiwinyo kwede pi wat macok ma bibedo tye i kin in ki Jehovah ka nongo itye ka doko ngat ma pe ki roc.

17. Ka waniang maber adada mot ma wabinongo i anyim, ci meno twero konyowa nining i kareni?

¹⁷ Niang maber adada mot ma wabinongo i anyim bikonyowa me diyo cwinywa, bedo ki yomcwiny, ki dong weko wamoko tam ma nongo wangeyo ni wabikwo pi naka. Paulo ocoyo bot Lukricitayo ma kiwirogi ni: “Ka ce watye ki gen me nongo gin ma pe waneno kome, ci wakuro gin meno kun wadiyo cwinywa.” (Rom. 8:25) Ento man pe tye pi Lukricitayo ma kiwirogi keken. Kadi bed ni pud peya wanongo motwa, niyewa tek adada mumiyo wamedde ki diyo cwinywa kun wakuro “mot me kare me anyim.” Calo Moses, pe watero mwaki ma wabedo ka tic kwede pi Jehovah-ni calo kare ma oballe nono. Ma ka meno, watye ki gen matek ni “gin ma nen bedo pi kare manok mo keken, ento gin ma pe nen ri nakanaka.”​—Kwan 2 Jo Korint 4:16-18.

18, 19. (a) Pingo omyero walweny matek me gwoko niyewa? (b) Gin ango ma wabineno i pwony ma lubo man?

¹⁸ Niye konyowa me neno ‘jami ma pe waneno komgi.’ (Ibru 11:1) Ngat ma pe ki niye neno tic pi Jehovah calo gin ma konye pe. Ki tung bote, jami me cwiny “obedo gin me mingo.” (1 Kor. 2:14) Wan watye ki gen me nongo mit pa kwo pi naka ki dok me neno kit ma nicer bitimme kwede, jami ma jo me loboni gitamo ni pe bitimme kulu. Calo luryeko me kare pa Paulo ma gulwonge ni “lalok atata-ni,” dano mapol i kareni gitamo ni gen ma watito pire-ni obedo lok atata.​—Tic 17:18.

¹⁹ Kit macalo jo ma gipe ki niye gurumowa woko-ni, omyero walweny matek me gwoko niyewa. Leg bot Jehovah wek “niyeni pe odok cen.” (Luka 22:32) Bed kun ingeyo adwogi ma bal kelo, deyo me tic pi Jehovah, ki dong gen me kwo ma pe tum. Ento, niye pa Moses okonye pe me neno jami magi keken. I pwony ma lubo man, wabineno kit ma niye okonyo kwede Moses me neno “Lubanga ma pe nen.”​—Ibru 11:27.