1, 2. (1) ¿Kasa naainjaka Moisés wanaa sümaa pienchin shikii nuuyase? (Piirakaa sümüin tü ayaakuaakat.) (2) ¿Jamüsü anaka nümüin Moisés müliainjachin nia wanaajiraa sümaa nupueulose Maleiwa?

NÜTÜJAA AAʼU Moisés tü nukuwaʼipainjatkat chaa Egipto. Niʼrapuʼuin anain maʼin nepia na washinnuukana. Akaʼaya nipia niakai, anapuʼusü maʼin süka kepiain nia sümaa nüpüshi chi Faraónkai. «Je Moisés, ekirajünüshi sünain sütüjüin tü wayuu sulujutkat tü mmakat Egipto.» Eeshijaʼa süpüla nikirajünüin sünain astronomía, matemáticas, arquitectura otta waneeirua kasa (Aluw. 7:22). Eesü süpüla wainmain kasa nümaʼana nnojotka süpüla nümaʼanain wanee egipcio.

² Wanaa sümaa pienchin shikii nuuyase Moisés, naainjüin wanee kasa ponoko maʼin saaʼin nüpüshi Faraón. Niyouktüin Moisés süpüshuaʼa tü kasairua eekat süpüla nümaʼanain. Nnojotpejeʼe naainjüin tia süpüla kepiainjachin nia naʼaka na wanee egipciokana, na nnojoliikana washirüin. ¿Jamakaʼa niyouktaka nawashirüin na egipciokana? Shia süka anain nümüin müliainjachin nia wanaajiraa namaa na israeliitakana. Anasü nümüin tia süka kanoulain nia ( paashajeʼera Hebreokana 11:24-26). Sutuma kanoulain nia, nnojotsü jülüjüin naaʼin washirüinjachin nia. Shia jülüjaka naaʼin chi Maleiwakai, mayaashijeʼe nnojolin niʼrüin nia. Nunouja anainrü nikeraajüinjatüin Jeʼwaa süpüshuaʼa tü nümakat (Heb. 11:27).

3. ¿Jarat tü apünüinsükat pütchi asouktüneetka eʼipajee sünain ekirajaayakat tüü?

³ Müinjanaʼaya waya maʼaka naaʼin Moisés, jülüjüinjachi waaʼin chi Maleiwakai, mayaashijeʼe nnojolin weʼrüin nia. Wachecherüinjatü waaʼin  «sünain anoujaa» (Heb. 10:​38, 39). Makalaka anain wekirajaale sünain tü ashajünakat nüchiki Moisés suluʼu Hebreokana 11:24-26. Suʼunnaa wekirajaain sünain tia, wasoukta shiʼipajee pütchikat tüüirua: ¿Kasa naaʼinraka Moisés süka tü keeʼireekat saaʼin tü manoujüinsatkalüirua sutuma kanoulain nia? Mayaapejeʼe mojuin pütchi nümüin Moisés, ¿jamüsü kojutüka nümüin tü niʼyataainkat nümüin Jeʼwaa sutuma kanoulain nia? ¿Jamüsü jülüjaka naaʼin «waneepia tü kasa anasü naapeetkat chi Maleiwakai nümüin soʼuweena wane kaʼi»?

4. ¿Kasa niyaawataka aaʼu Moisés sutuma kanoulain nia?

⁴ Sutuma kanoulain Moisés, niyaawata aaʼu motsomüin neʼe tü talataa eekat suluʼu naaʼin wanee wayuu sünainjee tü kaainjalaakat. Shiapejeʼe naaʼinreein waneeinnua wayuu tü niyouktakat Moisés. ¿Jamüsü? Mayaapejeʼe wainmain maleiwayaasüirua naʼwaajaka na egipciokana sümaa sünainpünaain naya ouutsü, müleʼushaata noumain sümaa wainmain nawashirüin. Akanasaʼa na aʼyataashiikana nümüin Jeʼwaa, achepchiee neʼe naya. Nütüjaapejeʼe aaʼu Moisés eein süpüla suʼwanajaain sukuwaʼipa tia nutuma Jeʼwaa. Nunouja anainrü najaʼlajeʼennüinjanain na mojulaashiikana, mayaainjeʼe müin anakai saaʼin nakuwaʼipa. Makalaka nnojolin nüneeküin Moisés talataa aaʼin motsomüin saʼaka kaainjalaa.

5. ¿Kasa waaʼinrajatka süpüla nnojoluinjatüin waneeküin talataa aaʼin motsomüin saʼaka kaainjalaa?

⁵ ¿Kasa waaʼinrajatka süpüla nnojoluinjatüin waneeküin talataa aaʼin motsomüin saʼaka kaainjalaa? Soteesü waaʼin nnojoleerüin talatüin naaʼin waneepia wanee wayuu sutuma tü kaainjalaakat. Süka kanoulain waya jülüjeesü waaʼin yüüʼülaa sümeerüin nakuwaʼipa «na manoujainsaliikana sümaa tü kasa mojusü keeʼireekat naaʼin» (1 Juan 2:15-17). Jülüjeesü waaʼin kaseerüin alatüin namüin na wayuu nnojoliikana ayaawajaain suulia naainjala. Müshii waraittakai naaʼin «saaʼu wanee mma chüüchüüisü» otta mojeerü nakuwaʼipa (Sal. 73:​18, 19, NM). Waainjeere kasa mojusü, jülüja waaʼin pütchikat tüü: «¿Kasa teʼreeka watta kaʼi?».

6. (1) ¿Jamüsü niyouktaka Moisés ayatüinjachin nia sünain süchonyaain tü nüchonkot Faraón? (2) ¿Jamüsü anaka saaʼin pümüin tü naaʼinrakat Moisés?

⁶ Nüneeküin Moisés tü naaʼinrajatkat wanaapünaa sümaa tü nunoulakat. «Miyoʼupa Moisés, süka shiimüin nünoula nünain Maleiwa, niyouktüin süpüleerua ayataa sünain süchonyaain nia tü nüchonkot [Faraón] chi sülaülakai mma.» (Heb. 11:24.) Jülüjüsü naaʼin Moisés aʼyatawaa nümüin Jeʼwaa. Nnojotsü shiain jülüjüin naaʼin niʼyataainjachin suluʼu tü aluwataaleekat Egipto süpüla nükaaliinjüinjanain na nuwalayuu israeliitakana sükajee tü nuwashirüinkat. Shia nüneekaka aʼyatawaa nümüin Jeʼwaa süka süpüshuaʼa naaʼin otta nütchin (Deut. 6:5). Sutuma nüneeküin tia, nnojoishi müliain maʼin nia mapa. Süka jamüin, wainmain kasa nalüʼüjaka na israeliitakana saʼakajee nawashirüin na egipciokana (Éx. 12:​35, 36). Müliashi maʼin Faraón jee ayamünnüshi nia nutuma Jeʼwaa (Sal. 136:15). Akaisaʼa Moisés, ayatüsia katüin noʼu otta nia eʼitaanaka nutuma Maleiwa sünain oʼuniraa na israeliitakana süpüla noʼttaainjanain. Anashaatasü maʼin nukuwaʼipa Moisés otta talatüsü naaʼin.

7. (1) Saashin Mateo 6:19-21, ¿jamüshii waʼyataainjanaka süchiirua anain wakuwaʼipa süpüla kaʼika süpüshuaʼa? (2) Püküja tü saaʼinrakat wanee wawala aneekaka aʼyatawaa nümüin Jeʼwaa suulia aaʼinraa tü nachekakat na manoujüinsaliikana.

⁷ Piakai jimaʼaikai, aʼyataakai nümüin Jeʼwaa jee piakat majayütkat, ¿kasa püneeküinjatka wanaapünaa sümaa punoula? Jülüjeesü paaʼin tü paaʼinrajatkat süpüla anain pukuwaʼipa watta kaʼi. Punoujüinjatü anain nikeraajeerüin Maleiwa tü nümakat otta aʼyataainjachi pia süchiirua tü kasa eeinjatkat süpüla kaʼika süpüshuaʼa. Nnojo puʼunüin süchiirua tü kasa ajaʼttajatkat (paashajeʼera Mateo 6:​19-21). Jülüja paaʼin tü saainjakat Sophie. Ayonnajüt shia ballet otta akaaliinjünüinjatü sutuma kojuyasü konpainyiia chaa Estados Unidos süpüla shikirajaain suluʼu wanee eʼikülee sümaa saapünaleʼeinyain aʼyatawaa sümüin. Müsü shia: «Tachekapuʼuin maʼin taʼwaajünüin sutuma wayuu. Yaletüsü maʼin taaʼin sutuma tatüjüin maʼin ayonnajaa suulia tü waneeirua. Akatsaʼa nnojoluin talatüin taaʼin». Shiasaʼa mapa shiʼrajaka tü video kanüliakat Los jóvenes preguntan... ¿Qué haré con mi vida? Sümaka mapa: «Tayaawatüin saaʼu anain takuwaʼipa noʼuluʼu na manoujüinsaliikana otta kojutüin taya namüin. Nnojotpejeʼe jülüjüin taaʼin aʼwaajaa Jeʼwaa. Toʼuraajaka nümüin Jeʼwaa süka süpüshuaʼa taaʼin jee tooʼulaaka suulia ayonnajaa ballet». ¿Jamakaʼa saaʼin tü  wawalakat maaʼulu? Müsü sünüiki: «Nnojotsü choʼujaain tamüin tü taainjapüʼükat sümaiwa. Talatüsü maʼin taaʼin maaʼulu. Pürekutsootsü taya nümaa chi taʼwayuusekai. Mayaapejeʼe nnojoluin weʼraajünüin maʼin jee nnojoluin washinnuuin waya, eeshi Jeʼwaa wamaʼa, eeshii kojuyashii wayuu wekirajaka sünain tü Wiwüliakat otta eesü tü wasaʼwateekat sünain waʼyataain nümüin Maleiwa. Makalaka talatüin taaʼin sümaa tü taaʼinrakat maaʼulu».

8. Püküja jaralüin tü pütchi suluʼujeejatkat tü Wiwüliakat aneetka atuma nakuwaʼipa na jimaʼaliikana.

⁸ Nia Jeʼwaa atüjaaka saaʼu tü anakat süpüla paaʼinrüin. Müshi Moisés: «¿Kasa nuchuntaka pümüin Jeʼwaa, chi pümaleiwasekai? Shia mmoluwaainjachin pia neema Jeʼwaa süpüla paaʼinrüinjatüin süpüshuaʼa tü nümakat, süpüla alinjachin nia püpüla, süpüla piʼyataainjachin nümüin süka süpüshuaʼa paaʼin; paaʼinrüinjatü tü nuluwataakalü anain pia Jeʼwaa otta tü tamakat pümüin jooluʼu. Tia süpülajatü anainjatüin pukuwaʼipa» (Deut. 10:​12, 13, NM). Piakai jimaʼaikai jee piakat majayütkat, jüneeka aʼyatawaa nümüin Jeʼwaa otta jiiʼiyata mayaa alin nia jüpüla süka süpüshuaʼa jaaʼin. Aneerü maʼin jukuwaʼipa jaaʼinrüle tia.

9. Püküja jamüin kapüleeka nümüin Moisés aaʼinraa tü nuluwataakalü anain nia Jeʼwaa.

⁹ Anasü nümüin Moisés eʼnnaa amüin saaliijee aʼyatawaa nümüin Jeʼwaa, «alanaʼaleesia maʼi shia sünain anain suulia tü washirüü Egiptojeʼewatkat aapünapüʼükat nümüin» (Heb. 11:26). Nia Moisés «Nüneekajalakai» Jeʼwaa süpüla nümaainjatüin tü nupueulosekat Egiptojee. Nütüjaa aaʼu Moisés kapüleein maʼin tia otta niʼnnüinjachin amüin saaliijee. Süpülapünaa tia matüjülia nünüiki wanee israeliita nümüin: «¿Jaraisaʼa eʼitaaka pia süpüla laülaainjachin pia waaʼu otta süpüla süsalainjanain waya waainjala putuma?» (Éx. 2:​13, 14, NM). Shiasaʼa sutuma tia müshi Moisés nümüin Jeʼwaa: «Nialeekajaʼa jaa meematüin Faraón tamüin» (Éx. 6:​12, NM). Süpüla nüchecherüinjatüin naaʼin Moisés suʼunnaa niʼnnüin amüin sutuma wayuu, oʼuraajüshi nümüin Jeʼwaa. Nüküjaka nümüin tü shapaakalü atuma naaʼin. ¿Kasa naaʼinraka Jeʼwaa süpüla nükaaliinjüin nia?

10. ¿Kasa naaʼinraka Jeʼwaa süpüla nükaaliinjüin Moisés sünain tü nüjütakalü apüla nia?

¹⁰ Palajana, müshi Jeʼwaa nümüin Moisés: «Eejeechi taya pümaa» (Éx. 3:​12, NM). Süchikijee, kooʼomüinsü nunoula Moisés nutuma Jeʼwaa nüküjapa nümüin jamaluʼuluin tü nünüliakat, müshi nia: «Tountüin Taaʼinrüin süpüshuaʼa tü Taaʼinreekat» (Éx. 3:​14, NM; noota). * Naapüin Jeʼwaa pülaa nümüin Moisés mapa. Sükajee tia atüjaana aaʼulu niain Jeʼwaa kajünalain nia (Éx. 4:2-5). Shiasaʼa süchikijee tia, nüjütüin Aarón nümaa Moisés süpüla niainjachin aashajaain nooʼopünaa Moisés otta nükaaliinjüin nia (Éx. 4:14-16). Laülaapa maʼin Moisés, niyaawata aaʼu nikirajüin Jeʼwaa na wayuu aʼyataashiikana nümüin süpüla nekeraajüin tü naʼyataainkat. Müshijeseʼe nümüin nümüin Josué: «Nia Jeʼwaa oʼuniraka pukuwaʼipa. Ayateechi nia pümaain. Naaʼinmajeechi pia otta nnojoleechi niyüülajüin pia. Nnojo mmoluin pia jee nnojo shiyoʼujaain paaʼin» (Deut. 31:​8, NM).

11. ¿Jamüsü kojutüka nümüin Moisés tü niʼyataainkat nümüin Jeʼwaa?

¹¹ Akaaliinjünüshi Moisés nutuma Jeʼwaa, makalaka kojutüin nümüin tü niʼyataainkat nümüin Jeʼwaa, «alanaʼaleesia maʼi shia sünain anain suulia tü washirüü Egiptojeʼewatkat aapünapüʼükat nümüin». Aʼyatawaa nümüin Faraón nnojotsü antapünaain sünain aʼyatawaa nümüin chi Maleiwa pülashikai maʼin. Jee müsia, kojutüleesia maʼin aʼyatawaa nümüin Jeʼwaa suulia aluwatawaa naaʼu na egipciokana. Sutuma shiain jülüjüin naaʼin Moisés tia, aleewashi maʼin nia nümaa Jeʼwaa. Otta nia aapaka pülaa nümüin süpüla nuʼunirüin na israeliitakana suluʼumüin tü Mma Aapünajatkat namüin (Deut. 34:10-12).

12. ¿Kasa aʼyatawaa naapaka Jeʼwaa wamüin?

¹² Müshiʼiya wayakana, naapüin Jeʼwaa wamüin wanee aʼyatawaa. Nuluwataain waya nükajee chi Nüchonkai süpüla waküjüinjanain pütchi maʼaka nuluwataanüin chi aluwataaushikai Pablo otta waneeinnua wayuu aʼyataakana nümüin Jeʼwaa ( paashajeʼera 1 Timoteo 1:12-14). Wapüshuaʼa wayakana  aküjülii pütchi süchiki tü pütchi anasükat (Mat. 24:14; 28:​19, 20). Eeshii wawalayuu eekai naʼyataain waneepia nümüin Jeʼwaa, eeshii eekai laülaashin suluʼu tü outkajaaleekat jee eekai naʼyataain neʼipajee süpüla nakaaliinjüin na wawalayuukana. Akanasaʼa na wapüshi nnojoliikana anoujüin otta waneeinnua wayuu, eesüjaʼa süpüla nnojoluin neʼrüin sujutü tü waʼyataainkat nümüin Jeʼwaa otta eein süpüla nayoujüin waya (Mat. 10:34-37). Müleka mojule waaʼin natuma, jülüjeerü waaʼin nnojoluin kasain anain apüla tü waʼyataainkat jee iseerüin wachiki wekeraajüin shia. Wayoujünüle, ¿jamüsü wachechereʼetka waaʼin kanourale waya?

13. ¿Kasa naaʼinraka Jeʼwaa süpüla nükaaliinjüin waya sünain tü aʼyatawaa naapakat wamüin?

¹³ Wachuntashaata nümüin Jeʼwaa nükaaliinjai waya. Weʼitaainjatü waaʼin nünain wachuntapa nümüin otta waküjüinjatü nümüin tü shapaakalü atuma waaʼin. Nia akaaliinjakaʼaya waya süpüla wekeraajüin tü aʼyatawaa naapakat wamüin. ¿Kasa naaʼinraka süpüla nükaaliinjüin waya? Shia tü naainjakat nüpüleerua Moisés. Palajana, müsü nünüiki wamüin: «Shiimain katsüinjeerüin paaʼin tatuma. Shiimainshaata maʼin takaaliinjeechin pia. Ayateechi takaaliinjüin pia süka tü tajapü tekiakat» (Is. 41:​10, NM). Süchikijee, nükaaliinjüin waya süpüla watüjaain saaʼu shiimain nikeraajeerüin tü nümakat, müshi nia: «Taküjüitpa achiki jümüin otta tekeraajeerü shia; takumajüin sukuwaʼipa otta taaʼinreerü shia» (Is. 46:​11, NM). Wanee kasa naainjaka Jeʼwaa wapüleerua shia yalayalain waaʼin nutuma süpüla aaʼinraa tü nüchekakat (2 Cor. 4:7). Jee müsia nükaaliinjüin waya süpüla wachecherüin waaʼin sünain aʼyatawaa nümüin. Müshiijeseʼe wainmain na wawalayuukana nutuma süpüla watütüleʼerajiraainjanain waaʼin sünain anoujaa (1 Tes. 5:11). Nikirajüin waya Jeʼwaa süpüla wekeraajüin tü aʼyatawaa naapakat wamüin. Sutuma tia kooʼomüinsü wanoula nünain otta wayaawata aaʼu kojutüshaatain maʼin tü waʼyataainkat nümüin suulialeʼeya waneeirua kasa.

14. ¿Jamüsü nütüjaaka aaʼu Moisés sünain shiimainjeerüin tü kasa naapüinjatkat Maleiwa nümüin?

¹⁴ Jülüjüsü naaʼin Moisés «waneepia tü kasa anasü naapeetkat chi Maleiwakai nümüin soʼuweena wane kaʼi» (Heb. 11:26). Nüneeküin Moisés tü naaʼinrajatkat wanaapünaa sümaa tü naainjüinjatkat Maleiwa. Nunouja anainrü nuuntüin Jeʼwaa nüsoʼireʼerüin naaʼin na ouktüshiikana maʼaka nunoujapuʼuin tia Abrahán (Luc. 20:​37, 38; Heb. 11:17-19). Nütüjaa aaʼu anainjatüin nukuwaʼipa nutuma Jeʼwaa watta kaʼi, makalaka nnojoluin amülain naashin nuunjulaain chaa anoouishii soʼu pienchi shikii juya otta müsia chain nia nüchikuaʼa pienchi shikii juya anoouishii namaa na israeliitakana. Mayaapejeʼe nnojoluin nütüjaain saaʼu jamüinjatüin shikeraajia tü nümakat Maleiwa, müsü niʼrakai  saaʼin tü «naapeetkat» Maleiwa nümüin süka kanoulain nia.

15, 16. (1) ¿Jamüsü jülüjüinjatka waaʼin tü naapeetkat wamüin Maleiwa? (2) ¿Kasa piʼreeka sünain ekeraajaa Nuluwataapeena Jesuu?

¹⁵ ¿Jama wayakana, jülüjüsüche waaʼin tü kasa anasü naapeetkat chi Maleiwakai wamüin soʼuweena wanee kaʼi? Nnojotsü watüjaain maʼin saaʼu jameerüin shikeraajia tü naainjüinjatkat Maleiwa maʼaka nnojolin nütüjaain saaʼu Moisés. Jamüsüjaʼa tü sükaliakat tü mülia miyoʼusükat, nnojotsü watüjaain aaʼu joujeerü suʼttüin (Mar. 13:​32, 33). Nnojotsü watüjaain saaʼu jameerüin maʼin sukuwaʼipa tü Paʼaraiisükat. Wainmapejeʼe kasa watüjaaka aaʼu süchiki tü Paʼaraiisükat nuulia Moisés. Jülüjüsü waaʼin tü naapeetkat wamüin Maleiwa süka nüküjüin wamüin tü sukuwaʼipainjatkat wayuu Nuluwataapa Jesuu. Müleka jülüjüle waaʼin tü sukuwaʼipainjatkat tü mma jeketkat, keeʼireejeerü waaʼin palajanain watuma tü waʼyataainkat nümüin Maleiwa. Jamüshiijaʼa wayaʼlajüinjanale wanee piichi, nnojotsü wayaʼlajüin süpaʼa mma. Müsia neʼe wakuwaʼipa sünain tü wanoulakat, nnojoishii waya anoujüin neʼe süpaʼa mma, watüjaa aaʼu shiimain tü wanoujakalü anain. Wayaawatüin saaʼu tü naaʼinrüinjatkat Maleiwa sükajee tü Nuluwataayakat. Süka kanoulain waya, ayatüinjatia suluʼuin waaʼin tia.

¹⁶ Süpüla watüjaainjatüin maʼin saaʼu tü sukuwaʼipainjatkat tü mmakat sutuma Nuluwataaya Maleiwa, shia jülüjüinjatka waaʼin tü wakuwaʼipainjatkat suluʼu tü Paʼaraiisükat. Wekirajaale sünain nukuwaʼipa wanee wayuu aʼyataapuʼukai nümüin Maleiwa süpülapünaa nükalia Kürisüto, jülüjeesü waaʼin kasain wasakirüinjachin anain nia nüsoʼiraapa aaʼin. Otta müsia jülüjeesü waaʼin tü nüsakireenakalü anain waya süchiki tü wakuwaʼipakat süpülapünaa sajaʼlajaain kasa süpüshuaʼa. ¡Wainma tü kasa eekat süpüla jülüjüin waaʼin süchiki tü Paʼaraiisükat! Eesü süpüla jülüjüin waaʼin jameerüin waaʼin weʼraajapa na wapüshi kakaliainnakana ouktüin otta waküjapa namüin tü naainjakat Maleiwa napüleerua; jülüjeesü waaʼin watteerüin saalii kasa wekirajaaka anain, talateenain waya sutuma weʼrüin maüsüin tü mürütkalüirua; jülüjeesü waaʼin talateenain waya sutuma warütkaain nünainmüin Maleiwa shiʼipaʼaya anain waya otta waneeirua kasa.

17. ¿Jameerü waaʼin jülüjüle waaʼin tü naapeetkat wamüin Maleiwa?

¹⁷ Jülüjüle waaʼin tü naapeetkat wamüin Maleiwa, wachechereerü waaʼin, talateerü waaʼin otta waneekeerü tü waaʼinrajatkat wanaapünaa sümaa tü waʼatapajakat. Müsü nünüiki Pablo namüin na anoujüshii chainjanakana iipünaa: «Aluʼujasa wayakana saaʼu nnojoliiyüliin [shikeraajüin weʼrüin tü waʼatapajakat], aʼatapajeeshii waya waneepia» (Roma 8:25). Pütchikat tüü, sünainpünaasü nakuwaʼipa napüshuaʼa na anoujüshiikana. Mayaapejeʼe nnojoyülüin saapünüin wamüin kataa oʼu waneepia, ayatüshiʼiya waya sünain aʼatapajaa tü naapeetkat wamüin Maleiwa. Maʼaka naaʼin Moisés, watüjaa aaʼu nnojoluin amülain tü waʼyataainkat nümüin Maleiwa. Watüjaa aaʼu sajaʼlajaajeerüin tü kasa weʼrakat maaʼulu otta tü kasa nnojotkat weʼrüin jooluʼu, nnojoleerü ajaʼlajaain. Ayateeria waneepia ( paashajeʼera 2 Corinto 4:16-18).

18, 19. (1) ¿Jamüshii wachecherüinjanaka waaʼin suulia sümalajaain wanoula? (2) ¿Kasa wekirajaajeetka anain sünain tü wanee ekirajaayakat?

¹⁸ Sutuma kanoulain waya, wountüin wayaawatüin saaʼu tü kasa meʼrujukat (Heb. 11:1). Akaisaʼa chi wayuu nnojoikai jüüjüüin nümüin Maleiwa süka manoulain nia, mojutsat nümüin tü aʼyatawaakat nümüin Jeʼwaa. Süka jamüin, «malaain shia saaʼin namüin» (1 Cor. 2:14). Waʼatapajüin katüinjatüin woʼu süpüla kaʼika süpüshuaʼa otta weʼrüinjatüin süsoʼiraain naaʼin na ouktüshiikana. Tia nnojotsü eeyaain süntapünaain suluʼu nekii na manoujüinsaliikana. Maaʼutpünaa yaa, wainma na wayuu nnojoliikana anoujüin tü pütchi waküjakat süka malaain shia naashin. Müshii naya maʼaka naaʼin na wayuu «chi koyooroloikai» makana nümüin Pablo (Aluw. 17:18).

¹⁹ Sutuma naʼakain waya wayuu manoujüinsalii, wachecherüinjatü waaʼin suulia sümalajaain wanoula. Achuntüinjana waya kaaliinwaa nümüin Jeʼwaa (Luc. 22:32). Washata nukuwaʼipa Moisés. Jülüja waaʼin mojuin nukuwaʼipa wayuu kaainjarale nia, jülüja waaʼin anashaatain maʼin aʼyatawaa nümüin Jeʼwaa otta jülüja waaʼin eein süpüla katüin woʼu süpüla kaʼika süpüshuaʼa. ¿Kasa maa eeka süpüla watüjüin nünainjee Moisés? Sünain tü wanee ekirajaayakat, wekirajaajeerü anain kanoulain Moisés nünain chi Maleiwakai mayaashijeʼe nnojolin niʼrüin nia (Heb. 11:27).