1, 2. (a) Sang 40 anyos si Moises, ano nga desisyon ang iya ginhimo? (Tan-awa ang piktyur sa umpisa sini nga artikulo.) (b) Ngaa ginpili ni Moises nga piguson sia upod sa katawhan sang Dios?

NAHIBALUAN ni Moises ang matanyag sa iya sang Egipto. Nakita niya ang dalagku nga mga balay sang mga manggaranon. Miembro sia sang harianon nga panimalay. “Gintudluan [sia] sing tanan nga kaalam sang mga Egiptohanon,” nga mahimo nagalakip sang mga art, astronomiya, matematika, kag iban pa. (Binu. 7:22) Mahapos lang niya matigayon ang manggad, gahom, kag posisyon nga ginadamgo lamang sang ordinaryo nga mga Egiptohanon!

² Apang sang 40 anyos na si Moises, naghimo sia sing desisyon nga ayhan nagpatingala gid sa harianon nga panimalay sang Egipto nga nag-adoptar sa iya. Wala niya ginpili bisan ang “normal” nga kabuhi sang ordinaryo nga Egiptohanon, kundi ang kabuhi sang mga ulipon! Ngaa? Bangod may pagtuo si Moises. (Basaha ang Hebreo 11:24-26.) Bangod sang iya pagtuo, pareho lang nga nakita ni Moises si Jehova. May pagtuo sia sa “Isa nga di-makita” kag sa katumanan sang mga saad sang Dios.—Heb. 11:27.

3. Ano ang tatlo ka pamangkot nga sabton sa sini nga artikulo?

³ Kaangay ni Moises, kinahanglan man nga may mata kita sang pagtuo para makita ang labaw pa sa ginatanyag sang kalibutan kag makita si Jehova. Dapat kita “ang sahi nga may pagtuo.” (Heb. 10:38, 39) Para mapalig-on ang aton pagtuo, binagbinagon naton ang ginsulat parte kay Moises sa Hebreo 11:24-26. Samtang ginabinagbinag naton ini, pangitaa ang mga sabat sa sini nga mga pamangkot: Paano  ang pagtuo nagpahulag kay Moises nga isikway ang mga kailigbon sang unod? Sang ginpakalain sia, paano ang pagtuo nakabulig sa iya nga maapresyar ang iya mga pribilehiyo sa pag-alagad? Kag ngaa “gintulok niya sing maayo ang balos nga padya”?

4. Ano ang nahibaluan ni Moises parte sa “pagpangalipay sa sala”?

⁴ Paagi sa pagtuo, nahibaluan ni Moises nga ang “pagpangalipay sa sala” temporaryo lamang. Ayhan nagsiling ang iban nga bisan pa grabe ang idolatriya kag espiritismo sa Egipto, nangin kagamhanan ini sa kalibutan, samtang ang katawhan ni Jehova nagaantos subong mga ulipon! Apang nahibaluan ni Moises nga mabag-o sang Dios ang mga kahimtangan. Bisan daw nagauswag ang mga nagapatuyang, nagtuo si Moises nga madula ang mga malauton. Gani, wala sia naganyat sa “umalagi nga pagpangalipay sa sala.”

5. Ano ang makabulig sa aton nga masikway ang “umalagi nga pagpangalipay sa sala”?

⁵ Paano mo masikway ang “umalagi nga pagpangalipay sa sala”? Indi pagkalimti nga ang pagpangalipay sa sala umalagi lang. Paagi sa mata sang pagtuo, makita mo nga “ang kalibutan nagataliwan kag amo man ang kailigbon sini.” (1 Juan 2:15-17) Pamalandungi ang matabo sa ulihi sa indi mahinulsulon nga mga makasasala. Yara sila sa “madanlug nga mga duug” samtang ‘nagakapapas sila sing bug-os nga may kakugmat!’ (Sal. 73:18, 19) Kon ginasulay ka nga maghimo sing sala, mamangkot, ‘Ano ang gusto ko matabo sa akon palaabuton?’

6. (a) Ngaa nangindi si Moises nga “tawgon nga anak sang anak nga babayi ni Paraon”? (b) Sa banta mo, ngaa husto ang desisyon ni Moises?

⁶ Ang pagtuo ni Moises nakaimpluwensia man sa kon ano ang iya himuon sa iya kabuhi. “Bangod sa pagtuo si Moises, sang nagdaku na, nangindi nga tawgon nga anak sang anak nga babayi ni Paraon.” (Heb. 11:24) Wala nangatarungan si Moises nga puede niya maalagad ang Dios subong miembro sang pamilya sang hari kag dayon gamiton ang iya manggad kag posisyon para buligan ang iya kauturan nga mga Israelinhon. Sa baylo, determinado sia nga higugmaon si Jehova sa bug-os niya nga tagipusuon, kalag, kag kusog. (Deut. 6:5) Ini nga desisyon nakabulig sa iya nga malikawan ang daku nga kasakit. Sang ulihi, ang madamo nga manggad sang Egipto nga iya gintalikdan ginkuha sang mga Israelinhon mismo! (Ex. 12:35, 36) Si Paraon nahuy-an kag napatay. (Sal. 136:15) Pero si Moises naluwas kag gingamit sang Dios para proteksionan ang bilog nga pungsod. Nangin madinalag-on gid ang iya kabuhi.

7. (a) Suno sa Mateo 6:19-21, ngaa dapat kita magtulok sing labaw pa sa temporaryo nga palaabuton? (b) Magsaysay sing eksperiensia nga nagapadaku sang kinatuhayan sang materyal kag espirituwal nga mga bahandi.

⁷ Kon pamatan-on ka nga alagad ni Jehova, paano ang pagtuo makabulig sa imo sa pagpili sang karera? Maalamon ka kon nagaplano ka para sa palaabuton. Pero ang pagtuo bala sa mga saad sang Dios nagapahulag sa imo nga magtipon para sa temporaryo nga palaabuton, ukon sa palaabuton nga wala sing katapusan? (Basaha ang Mateo 6:19-21.) Ini nga pamangkot ginpaligban ni Sophie, nga maayo gid magsaot sing baley. Gintanyagan sia sing mga scholarship kag halandumon nga mga posisyon sang mga kompanya sang baley sa bilog nga Estados Unidos. “Kanami gid kon ginadayaw ka. Ang matuod, nagbatyag ako nga superyor sa akon mga katubotubo,” siling niya. “Pero indi ako malipayon.” Dayon gintan-aw ni Sophie ang video nga Young People Ask—What Will I Do With My Life? “Narealisar ko nga ang kalibutan naghatag sa akon sing kadalag-an kag pagdayaw sang mga fan bilang kabaylo sang akon bug-os tagipusuon nga pagsimba kay Jehova,” siling niya. “Sinsero ako nga nangamuyo sa iya. Dayon gin-untatan ko ang akon karera nga pagsaot.” Ano ang iya ginbatyag sa iya desisyon? “Wala ako nahidlaw sa akon kabuhi sadto. Sa karon, 100 porsiento ako nga malipayon. Nagapayunir ako upod sa akon bana. Indi kami bantog, kag imol kami sa materyal. Pero ara sa amon si Jehova, may ginatun-an kami sa Biblia, kag may espirituwal kami nga mga tulumuron. Wala gid ako naghinulsol.”

8. Ano nga laygay sang Biblia ang makabulig sa isa ka pamatan-on sa pagdesisyon kon ano ang himuon niya sa iya kabuhi?

 ⁸ Nahibaluan ni Jehova kon ano ang pinakamaayo para sa imo. Si Moises nagsiling: “Ano bala ang ginakinahanglan sa imo sang GINOO nga imo Dios, kondi ang pagkahadluk sa GINOO nga imo Dios, ang paglakat sa tanan niyang dalanon, ang paghigugma sa iya, kag ang pag-alagad sa GINOO nga imo Dios sa bug-os mong tagiposoon kag sa bug-os mong kalag, ang pagbantay sang mga sogo sang GINOO, kag sang iya mga palatukuran, nga ginsogo ko sining adlaw sa imo tungud sa imo kaayohan?” (Deut. 10:12, 13) Samtang pamatan-on ka pa, magpili sing karera nga magabulig sa imo nga higugmaon si Jehova kag alagdon sia “sa bug-os mong tagiposoon kag sa bug-os mong kalag.” Makasalig ka nga para ina “sa imo kaayohan.”

9. Ngaa mahimo mabudlay para kay Moises nga tumanon ang iya asaynment?

⁹ “Ginkabig [ni Moises] ang pagpakahuya sa iya subong Isa nga Hinaplas subong daku pa nga manggad sangsa mga bahandi sang Egipto.” (Heb. 11:26) Ginsugo si Moises subong “Isa nga Hinaplas,” kay ginpili sia ni Jehova nga manguna sa Israel paggua sa Egipto. Nahibaluan ni Moises nga mabudlay ini nga asaynment, nga mahimo pa gani mangin “pagpakahuya” sa iya. Antes sini, ang isa sa mga Israelinhon nagpakalain sa iya, nga nagasiling: “Sin-o bala ang naghimo sa imo nga principe kag hukom sa amon?” (Ex. 2:13, 14) Sang ulihi, namangkot si Moises kay Jehova: “Paano bala niyan nga magpamati sa akon si Faraon?” (Ex. 6:12) Para mahandaan kag maatubang ang pagpakahuya, ginsugid ni Moises kay Jehova ang iya kahadlok kag kabalaka. Paano sia ginbuligan ni Jehova nga matuman ang iya mabudlay nga asaynment?

10. Paano ginbuligan ni Jehova si Moises sa iya asaynment?

¹⁰ Una, ginpasalig ni Jehova si Moises: “Magaupud ako sa imo.” (Ex. 3:12) Ikaduha, ginpabakod sia ni Jehova paagi sa pagpaathag sang isa ka aspekto sang kahulugan sang Iya ngalan: “Mangin Amo Ako Kon Ano ang Luyag Ko nga Mangin Amo Ako.” (Ex. 3:14, NW) * Ikatlo, ginhatagan niya si Moises sing gahom sa paghimo sing mga milagro nga nagpamatuod nga sia gid ang ginpadala sang Dios. (Ex. 4:2-5) Ikap-at, ginhatag ni Jehova si Aaron kay Moises subong iya kaupod kag humalambal para magbulig sa pagtuman sang iya asaynment. (Ex. 4:14-16) Sa katapusan sang iya kabuhi, kumbinsido gid si Moises nga ginabuligan sang Dios ang Iya mga alagad para matuman ang tanan nga asaynment nga ginahatag Niya sa ila, amo nga ginsilingan niya ang nagbulos sa iya nga si Josue: “Ang GINOO amo ang nagauna sa imo; sia magaupud sa imo, indi sia magpabaya sa imo ukon magbiya sa imo; dili magkahadluk ukon magkahangawa.”—Deut. 31:8.

11. Ngaa ginpabaloran gid ni Moises ang iya asaynment?

¹¹ Sa bulig ni Jehova, ginpabaloran gid ni Moises ang iya mabug-at nga asaynment, nga ginatamod ini subong ‘daku pa sangsa mga bahandi sang Egipto.’ Kay man, ang pag-alagad sa Labing Gamhanan nga Dios labaw pa sa pag-alagad kay Paraon. Ano bala ang balor sang pagkaprinsipe sa Egipto kon ikomparar sa mangin “Hinaplas” ni Jehova? Ginpadyaan si Moises bangod mainapresyahon sia. Nangin suod gid sia kay Jehova, nga nagbulig sa iya sa paghimo sing “dalagku nga kakugmat” samtang ginapangunahan niya ang Israel pakadto sa Ginsaad nga Duta.—Deut. 34:10-12.

12. Ano nga mga pribilehiyo halin kay Jehova ang dapat gid naton pabaloran?

¹² May asaynment man kita karon. Paagi sa iya Anak, ginsugo kita ni Jehova sa pagministeryo, subong sang ginsugo niya kay apostol Pablo kag sa iban. (Basaha ang 1 Timoteo 1:12-14.) Tanan kita may pribilehiyo nga ibantala ang maayong balita. (Mat. 24:14; 28:19, 20) Ang  iban nagaalagad subong bug-os tion nga ministro. Ang hamtong nga mga utod nagaalagad sa iban sa kongregasyon subong mga ministeryal kag mga gulang. Pero, mahimo duhaduhaan sang imo indi Saksi nga pamilya kag sang iban pa ang balor sini nga mga pribilehiyo, ukon pakalainon pa gani ang imo pagsakripisyo. (Mat. 10:34-37) Kon nagmadinalag-on sila sa pagpaluya sa imo, ayhan magapamensar ka kon bala may pulos gid man ang imo mga sakripisyo, ukon kon bala matuman mo ang imo asaynment. Kon matabo ini sa imo, paano ang pagtuo makabulig sa imo nga magpadayon?

13. Paano kita ginasangkapan ni Jehova sa pagtuman sang aton mga asaynment?

¹³ Upod ang pagtuo, mangabay sang bulig ni Jehova. Isugid sa iya ang imo kahadlok kag mga kabalaka. Kay man, si Jehova ang nagsugo sa imo, kag buligan ka niya nga magmadinalag-on. Paano? Buligan ka niya pareho sang ginhimo niya kay Moises. Una, ginapasalig ka ni Jehova: “Palig-onon ko ikaw, buligan ko ikaw, alay-ayon ko ikaw sang too nga kamut sang akon pagkamatarung.” (Isa. 41:10) Ikaduha, ginapahanumdom ka niya nga ang iya mga saad masaligan: “Nagpamolong ako, kag pahanabuon ko man ini; ginboko ko, kag himoon ko man ini.” (Isa. 46:11) Ikatlo, ginahatagan ka ni Jehova sing “gahom nga labaw sa kinaandan” sa pagtuman sang imo ministeryo. (2 Cor. 4:7) Ikap-at, para buligan ka nga makapadayon sa imo asaynment, ginahatagan ka sang aton mapinalanggaon nga Amay sing bug-os kalibutan nga paghiliutod sang matuod nga mga sumilimba nga ‘padayon nga nagalugpay sa isa kag isa kag nagapalig-on sa isa kag isa.’ (1 Tes. 5:11) Samtang ginasangkapan ka ni Jehova sa pagtuman sang imo mga asaynment, ang imo pagtuo sa iya magalambo kag maapresyar mo nga ang imo mga pribilehiyo sa pag-alagad sa iya labaw pa sa bisan ano nga manggad sang kalibutan.

14. Ngaa napat-od ni Moises nga padyaan sia?

¹⁴ Si Moises ‘nagtulok sing maayo sa balos nga padya.’ (Heb. 11:26) Huo, bisan pa limitado lang sadto ang nahibaluan ni Moises parte sa palaabuton, gintugutan niya ini nga mag-impluwensia sa iya pagtamod. Pareho sang iya katigulangan nga si Abraham, nagsalig si Moises nga mabanhaw ni Jehova ang mga patay. (Luc. 20:37, 38; Heb. 11:17-19) Bangod sang mga pagpakamaayo sa palaabuton, wala gintamod ni Moises nga wala sing pulos ang iya 40 ka tuig nga paglaaslaas kag 40 ka tuig sa kamingawan. Bisan wala niya nahibaluan ang tanan nga detalye sang katumanan sang mga saad sang Dios, nakita sang iya mata sang pagtuo ang indi makita nga padya.

15, 16. (a) Ngaa dapat kita magkonsentrar sa aton padya? (b) Ano nga mga pagpakamaayo sang paggahom sang Ginharian ang gusto mo gid maeksperiensiahan?

 ¹⁵ Ginatulok mo man bala ‘sing maayo ang imo balos nga padya’? Kaangay ni Moises, wala pa naton mahibaluan ang tanan nga detalye parte sa mga saad sang Dios? Halimbawa, “wala [kita] makahibalo kon san-o ang gintalana nga tion” sang dakung kapipit-an. (Mar. 13:32, 33) Pero, mas madamo ang aton nahibaluan sangsa kay Moises parte sa palaabuton nga Paraiso. Bisan wala kita makahibalo sang tanan nga detalye, ang mga saad sang Dios parte sa kabuhi sa idalom sang Ginharian bastante na para makatulok kita “sing maayo” sa sini. Ang maathag nga laragway sang bag-ong kalibutan magapahulag sa aton nga pangitaon anay ang Ginharian. Paano? Binagbinaga ini: Baklon mo bala ang isa ka balay kon diutay lamang ang imo nahibaluan parte sa sini? Siempre indi! Sing kaanggid, indi man naton luyag gamiton ang aton kabuhi para tinguhaan ang wala sing kapat-uran nga paglaum. Paagi sa pagtuo, dapat makita naton ang maathag nga laragway sang kabuhi sa idalom sang paggahom sang Ginharian.

¹⁶ Para mangin maathag sa imo ang laragway sang Ginharian sang Dios, tuluka “sing maayo,” ukon handurawa ang imo kabuhi sa Paraiso. Gamita ang imo imahinasyon. Halimbawa, kon ginatun-an mo ang kabuhi sang mga karakter sa Biblia antes sang mga Cristiano, pamensara kon ano ang ipamangkot mo sa ila kon banhawon na sila. Handurawa kon ano ayhan ang ipamangkot nila sa imo parte sa imo kabuhi sa katapusan nga mga adlaw. Hunahunaa kon daw ano ka makalilipay nga makita ang imo mga katigulangan nga nagkabuhi ginatos ka tuig na ang nagligad kag tudluan sila parte sa tanan nga ginhimo sang Dios para sa ila. Handurawa ang imo kalipay samtang ginatun-an mo ang madamo nga ilahas nga sapat paagi sa pag-obserbar sa ila sa malinong nga palibot. Pamalandungi kon paano ka nagasuod pa gid kay Jehova samtang amat-amat ka nga mangin himpit.

17. Paano ang maathag nga paghanduraw sa aton indi makita nga padya makabulig sa aton subong?

¹⁷ Ang maathag nga paghanduraw sang aton indi makita nga padya magabulig sa aton nga magpadayon, magkalipay, kag maghimo sing mga desisyon nga nahisuno sa masaligan kag wala katapusan nga palaabuton. Ginsulatan ni Pablo ang hinaplas nga mga Cristiano: “Kon ginalauman naton ang indi naton makita, padayon nga ginahulat naton ini nga may pagbatas.” (Roma 8:25) Maaplikar ini sa tanan nga Cristiano nga may paglaum nga mabuhi sing wala katapusan. Bisan wala pa naton mabaton ang aton padya, ang aton pagtuo mabakod katama, amo nga padayon naton nga ginahulat sing mapailubon ang “balos nga padya.” Pareho kay Moises, wala naton ginatamod nga uyang sing tion ang tinuig nga pag-alagad naton kay Jehova. Sa baylo, kumbinsido kita nga “ang mga butang nga makita umalagi, apang ang mga butang nga indi makita wala sing katapusan.”—Basaha ang 2 Corinto 4:16-18.

18, 19. (a) Ngaa dapat kita manikasog para mahuptan ang aton pagtuo? (b) Ano ang binagbinagon naton sa masunod nga artikulo?

¹⁸ Paagi sa pagtuo, mahangpan naton “ang maathag nga pagpasundayag sang mga katunayan bisan indi makita.” (Heb. 11:1) Indi makita sang pisikal nga tawo ang hamili nga balor sang pag-alagad kay Jehova. Para sa iya, ang espirituwal nga mga bahandi “kabuangan.” (1 Cor. 2:14) Pero nagalaum kita nga mabaton ang kabuhi nga wala sing katapusan kag masaksihan ang pagkabanhaw, mga butang nga wala makita sang kalibutan. Pareho sang mga pilosopo sang panahon ni Pablo nga nagtawag sa iya nga ignorante nga “babaan,” ang kalabanan subong nagahunahuna nga ang paglaum nga aton ginabantala kabuangan lamang.—Binu. 17:18.

¹⁹ Bangod napalibutan kita sang mga tawo nga wala sing pagtuo, dapat kita manikasog para mahuptan ang aton pagtuo. Ipangamuyo kay Jehova nga “indi madula ang imo pagtuo.” (Luc. 22:32) Padayon nga tan-awa ang mga resulta sang sala, ang nagalabaw nga balor sang pag-alagad kay Jehova, kag ang imo paglaum nga kabuhi nga wala sing katapusan. Pero bangod sa pagtuo ni Moises, indi lang amo sini ang iya nakita. Sa masunod nga artikulo, binagbinagon naton kon paano ang pagtuo ni Moises nakabulig sa iya nga makita ang “Isa nga indi makita.”—Heb. 11:27.