1, 2. (a) Ania a desision ti inaramid ni Moises idi agtawenen iti 40? (Kitaen ti ladawan iti rugi ti artikulo.) (b) Apay a pinili ni Moises ti agsagaba a kadua ti ili ti Dios?

AMMO ni Moises no ania ti agbalin a masakbayanna iti Egipto. Makitkitana sadiay dagiti nalalawa a mansion dagiti babaknang. Maysa isuna a kameng ti sangakabbalayan ti ari. “Nasursuruan ni Moises iti isuamin a kinasirib dagiti taga Egipto,” a nalabit pakairamanan ti arkitektura, astronomia, matematika, ken dadduma pay a benneg ti siensia ken sirib ti tao. (Ara. 7:22) Nalakana la idi a magun-odan ti kinabaknang, pannakabalin, ken pribilehio nga ar-arapaapen ti maysa nga ordinario nga Egipcio!

² Ngem idi agtawenen ni Moises iti 40, nangaramid iti desision a sigurado a nakasdaawan ti pamilia ti ari ti Egipto a nangampon kenkuana. Pinilina ti biag ti maysa nga adipen, a nababbaba pay ngem iti “normal” a biag ti maysa nga ordinario nga Egipcio. Apay? Adda ngamin pammati ni Moises. (Basaen ti Hebreo 11:24-26.) Gapu iti pammatina, saan a ti pisikal a bambanag ti kinitana. Kas maysa a naespirituan a tao, namati ken Jehova, “daydiay Maysa a di makita,” ken iti kaitungpalan dagiti karina.—Heb. 11:27.

3. Ania a tallo a saludsod ti masungbatan iti daytoy nga artikulo?

³ Nasken met a kitaentayo ti saan a makita ti pisikal a matatayo. Masapul a datayo ti “kita [ti tao] nga addaan pammati.” (Heb. 10:38, 39) Tapno mapabileg ti pammatitayo, usigentayo ti naisurat maipapan ken Moises iti Hebreo 11:24-26. Kagiddan dayta,  panunotentayo ti sungbat dagitoy a saludsod: Kasano a nakatulong ken Moises ti pammati tapno maparmekna dagiti nainlasagan a tarigagay? Idi naumsi, kasano a nakatulong ti pammatina tapno matagipategna ti pribilehiona nga agserbi ken Jehova? Ken apay a ‘kimmita a sipapasnek ni Moises iti pannakabayad ti gunggona’?

4. Ania ti naawatan ni Moises mainaig iti “panangtagiragsak iti basol”?

⁴ Gapu iti mata ti pammati, naawatan ni Moises a temporario laeng ti ‘ragsak nga ipaay ti basol.’ Ngem nalabit saan a kasta ti panangmatmat idi ti dadduma. Apay? Nakitada ngamin no kasano a nagbalin ti Egipto a kabilgan a turay iti lubong, uray nasaknap sadiay ti idolatria ken espiritismo, idinto ta agrigrigat ken maad-adipen ti ili ni Jehova! Nupay kasta, ammo ni Moises a kabaelan ti Dios a balbaliwan ti situasion. Nupay kasla naballigi idi dagidiay mangpempennek iti bukodda a tartarigagay, mamati ni Moises a dagiti nadangkes ket madadaeldanto. Isu a saan a nagargari iti “temporario a panangtagiragsak iti basol.”

5. Ania ti makatulong tapno malabanantayo ti panagtarigagay iti ‘temporario a ragsak nga ipaay ti basol’?

⁵ Kasanom a malabanan ti panagtarigagay iti ‘temporario a ragsak nga ipaay ti basol’? Dimo liplipatan nga apagkanito laeng ti ragsak a maited ti basol. Matulongannaka ti pammati a mangbigbig a “ti lubong [ket] aglabas ken kasta met ti tarigagayna.” (1 Juan 2:15-17) Utobem ti pagbanagan dagiti di agbabbabawi a managbasol. Addada iti “nagalis a pagsaadan . . . [ket dumtengto ti] panungpalanda!” (Sal. 73:18, 19) No masulisogka nga agaramid iti dakes, isaludsodmo iti bagim, ‘Ania a talaga ti kayatko a masakbayan?’

6. (a) Apay a nagkedked ni Moises a “maawagan ti anak daydi anak a babai ni Faraon”? (b) Apay a makunam nga umiso ti desision ni Moises?

⁶ Dakkel met ti epekto ti pammati ni Moises iti karera a pinilina. “Babaen iti pammati nagkitakit ni Moises, idi dimmakkelen, a maawagan ti anak daydi anak a babai ni Faraon.” (Heb. 11:24) Saan nga inrason ni Moises a makapagserbi met latta iti Dios uray no kameng ti sangakabbalayan ti ari ken mabalinna nga usaren ti kinabaknang ken impluensiana a mangtulong kadagiti kakabsatna nga Israelita. Imbes ketdi, determinado ni Moises a mangayat ken Jehova iti isuamin a puso, kararua, ken pigsana. (Deut. 6:5) Naliklikan ni Moises ti adu a panagsagaba gapu iti dayta a desisionna. Ti adu a gameng ti Egipto a binaybay-anna ket sinamsam met laeng idi agangay dagiti Israelita. (Ex. 12:35, 36) Naibabain ni Faraon ken nalmes iti Nalabaga a Baybay. (Sal. 136:15) Ngem komusta ni Moises? Inusar ti Dios a mangidaulo ken mangispal iti nasion ti Israel. Nagbalin a pudpudno a makapnek ti biagna.

7. (a) Sigun iti Mateo 6:19-21, apay a rumbeng nga agplanotayo para iti agnanayon a masakbayan? (b) Ania a kapadasan ti mangipakita iti nagdumaan ti namaterialan ken naespirituan a kinabaknang?

⁷ No maysaka nga agtutubo nga adipen ni Jehova, kasano a matulongannaka ti pammatim a mangpili iti kasayaatan a karera? Agplanoka a nainsiriban para iti masanguanan. Ngem ti kadi pammatim kadagiti kari ti Dios tignayennaka nga agurnong para iti agnanayon a masakbayan imbes nga iti temporario a masakbayan? (Basaen ti Mateo 6:19-21.) Naipasango idi iti dayta a saludsod ni Sophie, a maysa a nalaing a ballet dancer. Intukon dagiti ballet company iti Estados Unidos a pagadalenda ni Sophie iti libre ken ikkanda iti napintas a trabaho iti kompaniada. “Nagsayaat ti riknak no daydayawenda ti panagsalak. Isu a ti panagriknak idi ket natantan-okak ngem kadagiti kakaduak,” inaminna. “Ngem saanak a naragsak.” Binuya ni Sophie ti video a Young People Ask—What Will I Do With My Life? “Nabigbigko nga inikkannak ti lubong iti balligi ken id-idoloendak dagiti tattao kas sukat ti amin-puso a panagdayawko ken Jehova,” kinunana. “Gapuna, sipapasnek a nagkararagak kenkuana. Inkeddengko a panawan ti karerak a panagsala.” Ania ti makunana iti dayta a desisionna? “Diak kailiw ti dati a biagko. Maibagak a pudpudno a naragsakak itan. Nagbalinkami a payunir ken lakayko. Saankami a  nalatak, ken bassit laeng ti material nga ik-ikutanmi. Ngem adda kadakami ni Jehova, ken addaankami kadagiti yad-adalan iti Biblia ken kadagiti naespirituan a kalat. Awan a pulos ti pagbabawyak.”

8. Ania a balakad ti Biblia ti makatulong iti maysa nga agtutubo nga agdesision no ania ti aramidenna iti biagna?

⁸ Ammo ni Jehova ti kasayaatan para kenka. Kinuna ni Moises: “Ania ti kidkiddawen kenka ni Jehova a Diosmo no di ti panagbuteng ken Jehova a Diosmo, tapno magnaka iti amin a daldalanna ken tapno ayatem ken tapno agserbika ken Jehova a Diosmo buyogen ti isuamin a pusom ken isuamin a kararuam; tapno salimetmetam dagiti bilin ni Jehova ken dagiti paglinteganna nga ibilbilinko kenka ita nga aldaw, maipaay a pagimbagam?” (Deut. 10:12, 13) Bayat nga agtutuboka, piliem ti karera a makatulong kenka a mangayat ken Jehova ken agserbi kenkuana iti “isuamin a pusom ken isuamin a kararuam.” Manamnamam a dayta a pilim ket “maipaay a pagimbagam.”

9. Apay a nalabit saan a nalaka para ken Moises nga itungpal ti annongenna?

⁹ “Imbilang [ni Moises] ti pannakaumsi ti Kristo kas kinabaknang a dakdakkel ngem kadagiti gameng ti Egipto.” (Heb. 11:26) Iti daytoy a teksto, natukoy ni Moises kas “Kristo,” wenno “Napulotan,” ta pinili ni Jehova a mangidaulo iti pannakairuar ti Israel manipud Egipto. Ammo ni Moises a narigat daytoy nga annongen, nga agbanag pay ketdi iti “pannakaumsi.” Idi damo, linais isuna ti maysa nga Israelita, a nagkuna: “Siasino ti nangdutok kenka a kas prinsipe ken ukom kadakami?” (Ex. 2:13, 14) Idi agangay, insaludsod ni Moises ken Jehova: “Kasano koma nga umimdengto kaniak ni Faraon?” (Ex. 6:12) Tapno maibturan ni Moises ti pannakaumsina, inkararagna ken Jehova dagiti pakadanagan ken pakaseknanna. Kasano a tinulongan ni Jehova ni Moises a mangitungpal iti narigat nga annongenna?

10. Kasano a tinulongan ni Jehova ni Moises a mangitungpal iti annongenna?

¹⁰ Umuna, impasigurado ni Jehova ken Moises: “Addaakto kenka.” (Ex. 3:12) Maikadua, pinabilegna ni Moises babaen ti panangilawlawagna iti maysa nga aspeto ti kaipapanan ti naganna: “Agbalinakto no Anianto ti Pagbalinak.” * (Ex. 3:14) Maikatlo, impaayanna ni Moises iti pannakabalin a mangaramid iti milagro kas pammaneknek nga isu ket imbaon ti Dios. (Ex. 4:2-5) Maikapat, inikkanna ni Moises iti kadua ken pannakangiwat, ni Aaron, a tumulong kenkuana iti annongenna. (Ex. 4:14-16) Sakbay ti ipapatayna, kombinsido unay ni Moises a tultulongan ti Dios dagiti adipenna tapno maitungpalda ti aniaman nga annongen nga itedna kadakuada, iti kasta naikunana iti sunona a ni Josue: “Ni Jehova ti agmartsa iti sangom. Isu agtultuloyto a kaduam. Saannakanto a baybay-an wenno panawan a naan-anay. Dika agbuteng wenno agkullayaw.”—Deut. 31:8.

11. Apay a napateg ken Moises ti annongenna?

¹¹ Iti tulong ni Jehova, tinagipateg ni Moises ti narigat nga annongenna, nga imbilangna a “dakdakkel ngem kadagiti gameng ti Egipto.” Siempre, ania koma ti kaimudingan ti panagserbina ken Faraon no idilig iti panagserbina iti Mannakabalin-amin a Dios? Ania koma ti patpateg ti panagbalinna a prinsipe iti Egipto no idilig iti panagbalinna a “Kristo,” wenno pinulotan, ni Jehova? Nagunggonaan ni Moises iti panangtagipategna iti annongenna. Naaddaan iti naisangsangayan a relasion ken Jehova, a nangted kenkuana iti “naindaklan” a pannakabalin bayat nga iturturongna dagiti Israelita iti Naikari a Daga.—Deut. 34:10-12.

12. Ania dagiti pribilehio manipud ken Jehova a rumbeng a tagipatgentayo?

¹² Addaantayo met ita iti annongen. Babaen ti Anakna, adda ministerio nga impaannong ni Jehova kadatayo, kas ken apostol Pablo ken ti dadduma pay. (Basaen ti 1 Timoteo 1:12-14.) Addaantayo amin iti pribilehio a mangideklara iti naimbag a damag. (Mat. 24:14; 28:19, 20) Dadduma kadatayo ti agserserbi  kas amin-tiempo a ministro. Dagiti kakabsat a lallaki a nataengan iti naespirituan ket agserserbida iti kongregasion kas ministerial nga adipen ken panglakayen. Ngem amangan no tagibassiten dagiti di manamati a kapamiliam ken ti dadduma dagitoy a pribilehio wenno umsienda ti panagsakripisiom. (Mat. 10:34-37) No ipalubosmo a maupayka, mabalin a mangrugin a pagduaduaam no napateg met laeng dagiti sakripisiom ken no talaga a kabaelam nga itungpal ti annongem. No adda kasta a riknam, kasano a makatulong kenka ti pammati tapno makapagibturka?

13. Kasano a tultulongannatayo ni Jehova a mangitungpal iti nateokratikuan nga annongentayo?

¹³ Buyogen ti pammati, ipakaasim ken Jehova a tulongannaka. Ibagam kenkuana dagiti pakadanagan ken pakaseknam. Ni Jehova ti nangted kenka iti dayta nga annongen, ket tulongannaka nga agballigi. Kasano? Kas met laeng iti panangtulongna ken Moises. Umuna, ipasigurado kenka ni Jehova: “Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.” (Isa. 41:10) Maikadua, ipalagipna kenka a mapagtalkan dagiti karina: “Sinaok a mismo dayta; iyegkonto met. Binukelko [wenno, pinanggepko] dayta, aramidekto met.” (Isa. 46:11) Maikatlo, ikkannaka ni Jehova iti “pannakabalin a nalablabes ngem ti gagangay” tapno maitungpalmo ti ministeriom. (2 Cor. 4:7) Maikapat, tapno makapagibturka iti annongem, impaay ti naayat nga Amatayo ti sangalubongan a panagkakabsat dagiti pudno a managdaydayaw kenkuana nga ‘agtultuloy a mangliwliwa iti maysa ken maysa ken mangpabpabileg iti maysa ken maysa.’ (1 Tes. 5:11) Bayat a tultulongannaka ni Jehova a mangitungpal kadagiti annongem, bumileg ti pammatim ken matagipategmo dagiti pribilehiom kas kinabaknang a dakdakkel ngem iti aniaman a kinabaknang ditoy lubong.

14. Apay a masigurado ni Moises nga awatennanto ti gunggona?

¹⁴ ‘Kimmita ni Moises a sipapasnek iti pannakabayad ti gunggona.’ (Heb. 11:26) Wen, uray limitado ti ammona maipapan iti masanguanan, imdasen dayta a mangiwanwan kenkuana. Kas ken Abraham nga apongna, kombinsido ni Moises a kabaelan ni Jehova a pagungaren dagiti natay. (Luc. 20:37, 38; Heb. 11:17-19) Gapu ta nagtalek ni Moises kadagiti kari ti Dios, saanna a pinanunot a sayang ti 40 a tawen a panagbiagna kas pugante ken ti 40 a tawen a panagdaliasatna iti let-ang. Nupay saanna nga ammo ti amin a detalye no kasano nga itungpal ti Dios dagiti karina, nakabilbileg  ti pammatina a kasla makitkitana ti masanguanan a gunggona.

15, 16. (a) Apay a masapul nga ipamaysatay a panunoten ti gunggonatayo? (b) Ania dagiti segseggaam a bendision iti sidong ti turay ti Pagarian?

¹⁵ ‘Kumitkitaka kadi a sipapasnek iti pannakabayad’ ti gunggonam? Kas ken Moises, ditay pay ammo ti amin a detalye maipapan kadagiti kari ti Dios. Kas pagarigan, “saan[ta]yo nga ammo no kaano ti naituding a tiempo” nga iyaay ti dakkel a rigat. (Mar. 13:32, 33) Ngem no idilig ken Moises, ad-adu ti ammotayo maipapan iti masanguanan a Paraiso. Uray ditay ammo ti amin a detalye, umdasen dagiti kari ti Dios maipapan iti biag inton agturayen ti Pagarian ti Dios tapno kumitatayo a “sipapasnek” iti dayta. No nalawag kadatayo ti baro a lubong, matignaytayo a mangsapul nga umuna iti Pagarian. Kasano? Panunotem daytoy: Gatangem kadi ti maysa a balay nga awan man laeng ti ammom maipapan iti dayta? Siempre saan! Umasping iti dayta, saantayo kayat a busbosen ti biagtayo para iti maysa a nalibeg a namnama. Babaen iti pammati, makitatayo a silalawag ti kasasaadto ti biag iti sidong ti turay ti Pagarian.

¹⁶ Tapno nalawag iti panunotmo ti Pagarian ti Dios, kumitaka a “sipapasnek” iti agbalinto a biagmo idiay Paraiso. Usarem ti imahinasionmo. Kas pagarigan, no adalem ti biag dagiti karakter ti Biblia a mapagungarto idiay Paraiso, ania ngata ti mabalinmo nga isaludsod kadakuada inton agungarda ken ania met ti nalabit isaludsodda kenka maipapan iti maudi nga al-aldaw? Iladawam ti gagarmo a makaam-ammo kadagiti inapom a nagbiag ginasgasut a tawenen ti napalabas ken mangisuro kadakuada maipapan iti amin nga inaramid ti Dios para kadakuada. Iladawam ti kasta unay a ragsakmo gapu kadagiti masursurom manipud iti adu nga atap nga animal bayat a buybuyaem ida nga agbibiag a sitatalna. Panunotem no kasanonto nga ad-adda a sumingedka ken Jehova bayat nga in-inut nga agbalinka a perpekto.

17. Kasano a magunggonaantayo no nalawag ti panangmatmattayo iti masanguanan a gunggonatayo?

¹⁷ No nalawag kadatayo ti masanguanan a gunggonatayo, agbalintayo a naragsak, ken makapagdesisiontayo maitunos iti namnamatayo a biag nga agnanayon. Insurat ni Pablo kadagiti napulotan a Kristiano: “No namnamaentayo ti saantayo a makita, itultuloytayo nga urayen dayta a buyogen ti panagibtur.” (Roma 8:25) Dayta a prinsipio ket agaplikar iti amin a Kristiano a mangnamnama nga agbiag nga agnanayon. Nupay ditay pay naawat ti gunggonatayo, siaanus nga ur-urayentayo ti “pannakabayad ti gunggona[tayo]” gapu iti nabileg a pammatitayo. Kas ken Moises, saantayo nga ibilang a sayang ti tawtawen a panagserbitayo ken Jehova. Kombinsidotayo a ‘ti bambanag a makita ket temporario, ngem ti bambanag a di makita ket agnanayon.’—Basaen ti 2 Corinto 4:16-18.

18, 19. (a) Apay a masapul nga ikagumaantayo a pagtalinaeden a nabileg ti pammatitayo? (b) Ania ti usigentayo iti sumaruno nga artikulo?

¹⁸ Gapu ti pammati, matarusantayo ti ‘nabatad a parangarang dagiti kinapudno a saan a makita.’ (Heb. 11:1) Saan a makita ti maysa a pisikal a tao ti kinapateg ti panagserbi ken Jehova, ta ibilangna a “kinamaag” dagiti naespirituan a gameng. (1 Cor. 2:14) Nupay kasta, namnamaentayo nga agbiagtayo nga agnanayon ken maimatangantayo ti panagungar dagiti natay, bambanag a di makita ti lubong. Kas kadagiti pilosopo idi kaaldawan ni Pablo a nagkuna nga isu ket ignorante a “tarabitab,” ipapan ti kaaduan ita nga awan mamaay ti namnama nga ikaskasabatayo.—Ara. 17:18.

¹⁹ Yantangay agbibiagtayo iti awanan pammati a lubong, masapul nga ikagumaantayo a pagtalinaeden a nabileg ti pammatitayo. Umararawka ken Jehova tapno “saan nga agkapuy ti pammatim.” (Luc. 22:32) Kas ken Moises, panunotem dagiti dakes nga epekto ti basol, ti naringringbaw a pateg ti panagserbi ken Jehova, ken ti namnama a biag nga agnanayon. Adda kadi pay maadaltayo ken Moises? Wen. Iti sumaruno nga artikulo, usigentayo no kasano a nakatulong ken Moises ti pammati tapno makitana “daydiay Maysa a di makita.”—Heb. 11:27.