1, 2. (a) Chumanyi chafuukwiliyi Mosi chashikijiliyi yaaka 40 yakuvwalika? (Talenu mwevulu wakutachikilahu.) (b) Muloñadi Mosi chatondeleluhu kukabakena hamu nawantu jaNzambi?

 MOSI welukili yuma yateleleli kuhetayi muEjipitu. Wamweneña matala amaneni amawahi awantu aheta. Wadiña wakuchisaka chawanta. Mosi ‘amutañishili mwaya maana amuEjipitu ejima,’ kushilahu nimudimu wakuleñaleña, kudiza hayuma yamwiwulu, makumi ninsañu jikwawu jasayansi. (Yil. 7:22) Wadiña namaheta, ñovu nikukooleka kwabulili kwikala nawakwaEjipitu amakwawu.

² Chashikijiliyi yaaka 40 yakuvwalika, Mosi wafuukwiluhu chuma chahayamishili chisaka chakuwanta chamuEjipitu chamuleleli. Wafuukwiluhu kubula “kuhanda” neyi chahandileñawu aEjipitu ejima, nakutondahu kwikala hamu nawanduñu. Muloñadi? Muloña Mosi wadiña nachikuhwelelu. (Tañenu Aheberu 11:24-26.) Hamuloña wachikuhwelelu, Mosi wamweni yuma yayiwahi yakumbidi kubadika yamweneñayi hayina mpinji. Chineli wadiña nawulunda wakola naNzambi, Mosi wakuhweleleli “Wakamonewaña,” Yehova, niyikaninu yaNzambi yashikijañayi.—Heb. 11:27.

3. Malwihwinyi asatu itukwakula muchinu chibaaba?

³ Anetu nawa twatela kumona yuma yayiwahi yakumbidi kubadika yitwamonaña makonu. Twatela kwikala ‘antu akweti chikuhwelelu.’ (Heb. 10:38, 39) Hakwila tukoleshi chikuhwelelu chetu, tushinshikenu hansañu yasonekawu hadi Mosi yidi haAheberu 11:24-26.  Chitukushinshikaña haniyi nsañu, tuwanenu ñakwilu yanawa malwihu: Indi chikuhwelelu chamukwashili ñahi Mosi kukaana yuma yafwilaña mujimba? Chamusawishiluwu, chikuhwelelu chamukwashili ñahi kulemesha nyidimu yamwinkeluwu? Nawa muloñadi Mosi ‘chatalilileñayi chikupu masomu amba kamusomwenawu’?

4. Yumanyi yelukiliyi Mosi ‘hachiseki chanshidi’?

⁴ Chikuhwelelu chamukwashili Mosi kwiluka nindi “chiseki chanshidi” chadiña chakapinji kantesha hohu. Antu amakwawu atela atoñojokeleña nawu hela chakwila mwituña daEjipitu mwenzeli kupesha nikupanda, dekalili ituña dasweja ñovu mukaayi, nawa antu jaYehova ayikabishileña neyi anduñu. Hela chochu, Mosi welukili nindi Nzambi nateli kuhimpa yuma. Hela chakwila antu elileña yuma yatama amwekeneña neyi anakuhanda chiwahi, Mosi wakuhweleleli nindi antu atama akayikisañana. Dichi, hafwili mumuhetu wakufwila ‘chiseki chanshidi chakapinji kanteshaku.’

5. Chumanyi chikutukwasha kukaana ‘chiseki chanshidi chakapinji kantesha’?

⁵ Munateli kukaana ñahi ‘chiseki chanshidi chakapinji kantesha’? Bayi muvulamenaku, chiseki chanshidi chakapinji kantesha hohu. Nakukuhwelela, ilukenu nenu ‘mpata yamunu mwishina yinakuhita nikufwila kwayu kwatama.’ (1 Yow. 2:15-17) Toñojokenuña hachuma chikamwekena akwanshidi abulaña kubalumuka munyichima yawu. Adi ‘hasenena chineli kujilumuka kwawu kudi mukamwihi.’ (Mas. 73:18, 19) Neyi munakukeña kuvulumuna, dihulenu nenu, ‘Inakukeña nakekali nachihandilu chamuchidinyi kumbidi?’

6. (a) Muloñadi Mosi chakaanininiyi ‘kumutena nawu mwana kamwana kaFwaro wamumbanda’? (b) Muloñadi chimukuhoshela nenu Mosi wafuukwiluhu chiwahi?

⁶ Chikuhwelelu chaMosi chamukwashili kutonda mudimu wakuzata. ‘Nakukuhwelela Mosi, heliliyi nakuli dehi, wakaanini kumutena nawu mwana kamwana kaFwaro wamumbanda.’ (Heb. 11:24) Mosi hatoñojokeleña nindi nateli kumuzatila Nzambi muchipañu chamwanta nikuzatisha maheta nikukooleka kwadiñayi naku kulonda yakwashi amana kwindi aIsarelaku. Ilaña, Mosi wafwilileña kumukeña Yehova namuchima windi wejima, nawumi windi wejima niñovu jindi jejima. (Kuhit. 6:5) Mosi hamweni kukala hamuloña wachuma chafuukwiluhuku. Maheta amavulu amuEjipitu akaaniniyi ayibuwili kudi aIsarela. (Kwid. 12:35, 36) Fwaro amusawili nawa amujahili. (Mas. 136:15) Kwambukaku, Mosi amupulwishili nawa Nzambi wamwinkeli mudimu wakulombola munza wejima hakufuma muEjipitu. Wadiña namuzañalu muchihandilu chindi.

7. (a) Kwesekeja naMatewu 6:19-21, muloñadi wutwatela kushila maana hachihandilu chakumbidi? (b) Shimunenu chuma chamwekeni chinakumwekesha chaambu chekala hakachi kamaheta akumujimba nikuspiritu.

⁷ Neyi mudi kambuña Yehova wakansi, indi chikuhwelelu chinateli kuyikwasha ñahi kutonda mudimu wakuzata? Chikuwaha neyi mufuukulahu mudimu wumukazataña kumbidi. Komana kukuhwelela muyikaninu yaNzambi kukuyikwasha kutonda chihandilu chakumbidi chakapinji kantesha tahindi chahaya nyaka? (Tañenu Matewu 6:19-21.) Sophie wadiña mukwakuhañana winu watenañawu nawu ballet wadihwili ilu lwihu. Amufweteleleña mali kushikola nawa amwinkeli yifulu yafwilaña antu hamakampani aballet muUnited States. Wahosheli nindi, “Natiyileña kuwaha chiyanhamekeleñawu. Nawa nadimweneña nami nayibadika akwetu. Ilaña hinadiña namuzañaluku.” Ifuku dimu Sophie watalili vidiyo yakwashaña atwansi. (Young People Ask—What Will I Do With My Life?) Wahosheli nindi, “Nelukili nami kaayi kankwashili kwikala nachihandilu chachiwahi nikunlemesha kudi antu ankeñeli chatela nizatisheña mpinji yami hakudifukula kudi Yehova namuchima wejima. Nalombeli chikupu kudi Nzambi. Dichi nalekeli mudimu wami wakuhañana.” Komana waneñaña hachuma chafuukwiliyi? Wahosheli nindi, “Hinatoñaña chihandilu chami chakunyimaku. Ichi nidi namuzañalu chikupu. Ami ninfumwami tudi apayiniya. Hitwaya mpuhuku nawa hitukweti maheta amavuluku.  Ilaña tukweti Yehova, atudizi aBayibolu niyikonkwanyi yakuspiritu. Hinaditoñeshañaku.”

8. Kufumbanyi kwamuBayibolu kunateli kukwasha kansi kufuukulahu mudimu watela kuzatayi muchihandilu chindi?

⁸ Yehova weluka yuma yimwakeñaña. Mosi wahosheli nindi: “Yehova Nzambi yenu nakeñi chumanyi kudenu? Nakeñi nindi chiña mumutiyaña Yehova Nzambi yenu woma, mwendi munjila jindi jejima, mumukeñi, mumukalakeli Yehova Nzambi yenu nanyichima yenu yejima, nawumi wenu wejima, mwovwahili mwanayilejiyi Yehova, nimuyidika yindi, munukuyileja lelu kulonda mumoni kuwaha.” (Kuhit. 10:12, 13) Hampinji yimuchidi kansi, tondenuhu mudimu wukayikwasha kumukeña Yehova nikumuzatila ‘namuchima wenu wejima, nawumi wenu wejima.’ Ilukenu chikupu nenu ‘mukamona kuwaha’ neyi mwila mwenimu.

9. Lumbululenu chichamukalilili Mosi kukalakala mudimu windi.

⁹ Mosi ‘wamweni kusawuka kwaKristu nindi himaheta abadika yuma yalema yamuEjipitu yejima.’ (Heb. 11:26) Mosi amwinkeli mudimu wakwikala “Kristu,” hela “Wawayishewa,” muloña amutondeli kudi Yehova kulombola aIsarela kufuma muEjipitu. Mosi welukili nindi iwu mudimu wukekala wakala nawa ‘akamusawula.’ KaIsarela wumu wamusupishili nindi: “Indi eyi nakwilishi mulopu wetu, ninsompeshi yetu, hinyi?” (Kwid. 2:13, 14) Chimwahitili mafuku Mosi wamwihwili Yehova nindi: “Indi Fwaro wakantiya mwakanyi?” (Kwid. 6:12) Mosi wamulejeli Yehova yuma yatiyileñayi woma niyakameneneñayi kulonda yadiloñeshi chakuumika nakasawuntu kamweniyi. Indi Yehova wamukwashili ñahi Mosi kuzata mudimu wakala?

10. Yehova wamukwashili ñahi Mosi kuzata mudimu windi?

¹⁰ Chatachi, Yehova wamukanini chikupu Mosi nindi: “Ami nikwikala neyi.” (Kwid. 3:12) Chamuchiyedi, Yehova wamukolesheli kuhitila mukumulumbulwila mwatalisha ijina dindi nindi: “Ami Yami Mwomunekalila Kwami.” * (Kwid. 3:14) Chamuchisatu, wamwinkeli Mosi ñovu yakukoña yihayamisha kulonda chimwekani hatooka nawu chalala Mosi amutemesheli kudi Nzambi. (Kwid. 4:2-5) Chamuchiwana, Yehova wamwinkeli Mosi mukwawu wakuzata nindi nawa kamba nsañu Aroni kulonda yamukwasheña kuzata mudimu windi. (Kwid. 4:14-16) Hadiñayi kwakwihi nakufwa, Mosi welukili chikupu nindi Nzambi wakwashaña ambuñindi kulonda azati mudimu wejima Wukuyinkayi, chakwila wamulejeli nswana yindi Yoshuwa chakadi kujinoka nindi: “Yehova diyi wukutwaminañaku kuwukuyeyi; diyi wakekala nindi, hakakañanyaku, hakakuumbaku; bayi wutiyaña womaku, bayi wakamañaku.”—Kuhit. 31:8.

11. Muloñadi Mosi chalemesheleliyi chikupu mudimu windi?

¹¹ Nawukwashu waYehova, Mosi walemesheli chikupu mudimu windi nakuwumona neyi ‘wabadika maheta ejima amuEjipitu.’ Kafwampi watambwilili wuloku wawuwahi chikupu hakumukalakela Nzambi Wañovu Yejima kubadika wadi kutambwilayi hakumuzatila Fwaro. Chumanyi chadi kuhetayi hakwikala kalamba muEjipitu kubadika kwikala “Kristu,” hela wawayishewa waYehova? Mosi amusomweneni hakwikala namuchima wakulemesha Nzambi. Wadiluñishili wubwambu wawuwahi naYehova wamwinkeli “ñovu yabadika” hakulombola aIsarela Mwituña daChikaninu.—Kuhit. 34:10-12.

12. Nyidimwinyi yatwinkayi Yehova yitwatela kulemesha?

¹² Anetu nawa atwinka mudimu. Yehova watwinka mudimu kuhitila mudi Mwanindi neyi chenkeliyi kapostolu Pawulu niamakwawu. (Tañenu 1 Timotewu 1:12-14.) Wonsu wetu tukweti kukooleka kwakudikita mumudimu wakushimwina nsañu yayiwahi. (Mat. 24:14; 28:19, 20)  Amakwawu azataña mudimu wampinji yejima. Amana kwetu apapatishewa apama kuspiritu akalakelaña akwawu muchipompelu neyi ankoñi akuzatila niaeluda. Hela chochu, antaña jenu abula kwitiya niantu amakwawu anateli kumona iyi nyidimu nawu hiyalemaku hela kuyisawula hakwikala namuchima wakudihana. (Mat. 10:34-37) Neyi atwesha kuyidimbulula, munateli kutachika kujinoka neyi chakwila kudihana kwenu kwashikilamu hela neyi mwatela kutwalekahu kukalakala mudimu wenu. Neyi chumichi chiyimwekena, chikuhwelelu chinateli kuyikwasha ñahi kuumika?

13. Indi Yehova watudizishaña ñahi kulonda tuzati nyidimu yatwinkañayi?

¹³ Mulombenu Yehova kulonda yayikwashi kuhitila mukumukuhwelela. Mulejenu yuma yayitiyishaña woma niyimwakamenaña. Kafwampi Yehova diyi wayinkeli mudimu nawa wukuyikwasha kuzata chiwahi. Munjilanyi? Neyi chamukwashiliyi Mosi. Chatachi, Yehova wayikana chikupu nindi: “Nakakwinkaña ñovu; chalala nakakukwashañaku; chalala nakakukwataña chachiwahi nachikasa chami chachidiilu chakuloña kwami.” (Isa. 41:10) Chamuchiyedi, wayanukishaña nindi yikaninu yindi yalala chikupu, hakwila nindi: “Nahoshi dehi nukuchiila hohu. Nafuukuli dehi nukuchikoña nawa.” (Isa. 46:11) Chamuchisatu, Yehova wayinkaña “ñovu yabadika nankashi” kulonda muzati mudimu wenu chiwahi. (2 Kor. 4:7) Chamuchiwana, hakwila nawu muumiki mumudimu wenu, Tata yetu wakamenaña wayinka amana kwetu amukaayi kejima akwakudifukula alala ‘adikundejaña wejima wawu nikudikolesha wumu namukwawu.’ (1 Tesa. 5:11) Chineli Yehova wayidizishaña kulonda muzata nyidimu yenu, mukusweja kumukuhwelela nawa mukumonaña nyidimu yimwamukalakelaña nenu yabadika maheta ejima ahamaseki.

14. Muloñadi Mosi chakuhweleleliyi chikupu nindi akamusomwena?

¹⁴ Mosi ‘watalilileña chikupu masomu amba kamusomwenawu.’ (Heb. 11:26) Yuma yelukiliyi Mosi nindi yikamwekana kumbidi yamuleñeleli kutoñojoka chiwahi hela chakwila helukili yuma yejimaku. Kufwana nkakulula yindi Abarahama, Mosi wakuhweleleli chikupu nindi Yehova nateli kusañula afu. (Luka 20:37, 38; Heb. 11:17-19) Masomu atalilileñayi Mosi amukwashili kubula kumona yaaka 40 yadiñayi itunduka niyaaka 40 yadiñayi muchinkalampata nindi wamanishileña hohu mpinji yindi. Hela chakwila helukili nsañu  yejima kutalisha hakushikijewa kwayikaninu yaNzambuku, chikuhwelelu chamukwashili kumona masomu akamonewaña.

15, 16. (a) Muloñadi chitwatela kutoñojokela hamasomu etu? (b) Munakutalila kudiluñisha nkiswinyi muchiyuulu chaWanta?

¹⁵ Komana mwatalilaña ‘chikupu masomu amba’ kayisomwenawu? Kufwana Mosi, ninetu hitweluka nsañu yejima kutalisha hayikaninu yaNzambuku. Chakutalilahu, ‘hitweluka mpinji’ yikenza lukadi lwenenuku. (Maku 13:32, 33) Ilaña tweluka jajivulu kutalisha haParadisa yakumbidi kubadika nsañu yelukiliyi Mosi. Hela chakwila hitweluka nsañu yejimaku, tweluka yikaninu yaNzambi yayivulu yahosha hachihandilu chakekala muWanta waNzambi ‘chitwatalilaña chikupu.’ Neyi tukutoñojoka hetuña dadiha chumichi chikutuleñela kusambila kukeña iwu Wanta. Munjilanyi? Toñojokenu chumichi: Komana munateli kulanda itala neyi chakwila himuneluki nsañu yayivulu hanodu italaku? Inehi. Chochimu, kwila twiñija mutu mukufwila yuma yamukunkulwayuku. Chikuhwelelu chikutuleñela kumona chikekala chihandilu muchiyuulu chaWanta.

¹⁶ Hakwila nawu mutoñojokeña chiwahi haWanta waNzambi, ‘talilenuña chikupu’ chimukahandaña muParadisa. Fwikijenuña. Chakutalilahu, neyi munakudiza hachihandilu chawantu amuBayibolu adiñaku henohu akwaKristu kanda ekaluku, toñojokenu hayuma yimunateli kuyihula neyi anayisañuli. Fwikijenu yuma yatela kuyihulawu kutalisha hachimwahandileña mumafuku akukuminina. Fwikijenu muzañalu wumwakatiya hakudimona nawankakulula jenu akushankulu nikuyitañisha yuma yejima yayikoñeleliyi Nzambi. Fwikijenu muzañalu wumwakatiya hakudiza hadi anyama amavulu amwisaña nakuyitala chakadi kutiya woma. Toñojokenu chimwakadikunda naYehova chikupu hampinji yimukekalaña awanina chovu-chovu.

17. Indi kumona masomu akamonewaña kunateli kutukwasha ñahi makonu?

¹⁷ Neyi tumonaña masomu akamonewaña chikutukwasha kutwalekahu kwikala ashinshika, amuzañalu nikufuukula yuma yikatuleñela kuheta wumi wahaya nyaka. Pawulu wasonekeleli akwaKristu awayishewa nindi: “Neyi twachiñejaña chuma chakubula kumona, henohu dinu tukutatakena nakuchichiñilila.” (Rom. 8:25) Chikumichi chinakundami kudi akwaKristu ejima akweti kuchiñeja kwakuheta wumi wahaya nyaka. Hela chakwila kanda tutambwili isomu detu, chikuhwelelu chetu chakola chikupu chikutukwasha kutwalekahu nakuhembelela ‘kutusomwena’ chakadi kuzeya. Kufwana Mosi, hitwamonaña yaaka yitunamukalakeli Yehova netu hikumanisha mpinjuku. Ilaña twakuhwelela chikupu netu, ‘yuma yamonewaña yakapinji kantesha, hakwila yuma yabulaña kumonawu yahaya nyaka.’—Tañenu 2 Akorinda 4:16-18.

18, 19. (a) Muloñadi chitwatela kuzatila nañovu kulonda tuhembi chikuhwelelu chetu? (b) Chumanyi chitukadiza muchibaaba chinalondeluhu?

¹⁸ Chikuhwelelu chatukwashaña kutiyishisha ‘wunsahu walala wayuma yakadi kumona.’ (Heb. 11:1) Muntu wabulaña kulemesha yuma yakuspiritu wamonaña kumuzatila Yehova neyi hikumanisha mpinji. Muntu wamuchidiwu wamonaña maheta akuspiritu nindi “wusupi.” (1 Kor. 2:14) Hela chochu, twachiñejaña kudiluñisha wumi wahaya nyaka nikumona chikasañulawu afu, yuma yabulaña kumonawu antu mukaayi. Kufwana akwamaana amukaayi kamumafuku aPawulu, amuteneneña nawu muntu wabula kwiluka yuma nawa “sakubobola,” antu amavulu atoñojokaña nawu kuchiñeja kutwashimwinaña kwamukunkulwayi.—Yil. 17:18.

¹⁹ Chineli twashakamaña nawantu abula chikuhwelelu, twatela kuzata nañovu kulonda tutwalekuhu kwikala nachikuhwelelu. Mulombenu Yehova ‘kulonda chikuhwelelu chenu chibuli kukañanya.’ (Luka 22:32) Ilukenu yuma yatama yafumañamu neyi muntu nakoñi nshidi niyuma yafumaña mukumukalakela Yehova nikwikala nakuchiñeja kwawumi wahaya nyaka. Chikuhwelelu chaMosi chamukwashili kumona yuma yabadika yumiyi. Muchibaaba chinalondeluhu, tukadiza chikuhwelelu chichamukwashili Mosi kumona “Wakamonewaña.”—Heb. 11:27.