1, 2. (a) Yisiphi isinqumo esenziwa nguMosi eseleminyaka engu-40? (Khangela umfanekiso osekuqaliseni.) (b) Kungani uMosi wakhetha ukuphathwa kubi labantu bakaNkulunkulu?

 UMOSI wayekwazi ukuthi kwakuzamnceda ngani ukuhlala eGibhithe. Wayejayele ukubona izindlu ezinkulu zababenothile njalo engowendlu yesikhosini. “Wafundiswa kuyo yonke inhlakanipho yamaGibhithe,” okungenzakala ukuthi yayigoqela ukufunda ngezembali lokuphilisana kwabantu, ukufunda ngezinkanyezi, ngesamu langezinye izinto zesayensi. (ImiSeb. 7:22) Kwakulula kuye ukuthi anothe, athole isikhundla lelungelo elalingeke litholwe ngabanye abantu nje ababengamaGibhithe.

² Kodwa uMosi eseleminyaka engu-40 wenza isinqumo esaphica imuli yesikhosini yaseGibhithe eyayimondlile. Kazange akhethe ukuphila “njengabanye abantu” baseGibhithe kodwa wakhetha ukuphila lezigqili. Ngani? Ngoba wayelokholo. (Bala uHebheru 11:24-26.) Ngokukholwa, uMosi kazange agxile kulokho ayekubona ngamehlo kuphela. Ngenxa yokuthi wayeyindoda evuthiweyo ekukhonzeni, uMosi wayelokholo kuJehova, “lowo ongabonakaliyo” njalo wayekholwa ukuthi izithembiso zakhe zizagcwaliseka.​—Heb. 11:27.

3. Yiyiphi imibuzo emithathu ezaphendulwa esihlokweni lesi?

³ Lathi akumelanga sigxile kulokho esikubona ngamehlo ethu kuphela. Kumele sibe ‘yilabo abakholwayo.’ (Heb. 10:38, 39) Ukuze sibe lokholo oluqinileyo, kasihloleni okubhalwe mayelana loMosi kumaHebheru 11:24-26. Ekuhloleni kwethu, zama ukuthola izimpendulo  zemibuzo le: Ukholo lwamnceda njani uMosi ukuthi alwisane lezifiso zenyama? Lapho echothozwa, lwamnceda njani ukuthi aqakathekise imisebenzi ayeyiphiwe nguNkulunkulu? Kungani uMosi ‘wayekhangelele umvuzo ophambili’?

4. UMosi wananzelelani ‘ngenjabulo yesono’?

⁴ Ngokholo, uMosi wananzelela ukuthi “injabulo yesono” yayingeyesikhathi esifitshane. Abanye babengathi phela abantu bakaJehova bayizigqili kodwa iGibhithe isingumbuso olamandla emhlabeni wonke lanxa icwile ekukhonzeni izithombe lokuzihlanganisa lamadimoni. Kodwa uMosi wayekwazi ukuthi uNkulunkulu wayengantshintsha izinto. Lanxa labo ababeqakathekisa ukusuthisa izifiso zabo zenyama babekhanya bephumelela, uMosi wayekholwa ukuthi ababi babezatshabalaliswa. Lokhu kwamenza wangayengwa ‘yinjabulo yesono yesikhathi esifitshane.’

5. Kuyini okuzasinceda ukuthi singahugwa ‘yinjabulo yesono yesikhathi esifitshane’?

⁵ Ungenzani ukuze ungahugwa ‘yinjabulo yesono yesikhathi esifitshane’? Ungakhohlwa ukuthi injabulo yesono ngeyesikhatshana nje. Ngokholo, nanzelela ukuthi “umhlaba lezinkanuko zawo kuyadlula.” (1 Joh. 2:15-17) Cabangisisa ngokuthi izoni ezingaphendukiyo zizakuba lekusasa elinjani. ‘Zisendaweni etshelelayo lapho ezizakhuculwa khona.’ (Hubo. 73:18, 19) Nxa ulingeka ukuthi wenze isono esithile, zibuze ukuthi, ‘Ngifuna ikusasa lami libe ngelinjani?’

6. (a) Kungani uMosi wala “ukuba aziwe njengendodana yendodakazi kaFaro”? (b) Kungani ucabanga ukuthi uMosi wenza isinqumo esiqondileyo?

⁶ Ukholo lukaMosi lwamenza ukuthi akhethe kuhle umsebenzi. “Ngokukholwa uMosi, esekhulile, wala ukuba aziwe njengendodana yendodakazi kaFaro.” (Heb. 11:24) UMosi kazange acabange ukuthi wayengakhonza uNkulunkulu elesikhundla esigodlweni abesesebenzisa inotho yakhe lelungelo lakhe ukuze ancede abafowabo abangama-Israyeli. Kodwa wazimisela ukuthanda uJehova ngenhliziyo yakhe yonke, ngomphefumulo wakhe wonke langamandla akhe wonke. (Dute. 6:5) Isinqumo sakhe samnceda kakhulu ukuthi angezwa ubuhlungu ngoba inotho enengi eyayiseGibhithe angazange azihluphe ngayo yacina ithethwe ngabako-Israyeli. (Eks. 12:35, 36) UFaro wayangiswa futhi wakhukhulelwa elwandle. (Hubo. 136:15) Kodwa uMosi wasinda njalo wasetshenziswa nguNkulunkulu ukuthi akhokhele isizwe sonke. Wasuthiseka kakhulu empilweni yakhe.

7. (a) UMathewu 6:​19-21 utshengisa njani ukuthi kungani kumele sicabange ngezibusiso zesikhathi esizayo? (b) Nika isibonelo esitshengisa umahluko okhona phakathi kwenotho yasemhlabeni leyasezulwini.

⁷ Ukholo lungakunceda njani ukuthi ukhethe kuhle umsebenzi nxa uyinceku kaJehova esakhulayo? Uyabe uhlakaniphile nxa ungahlela kuseselesikhathi ukuthi ufuna ukwenzani empilweni. Kodwa ukukholwa izithembiso zikaNkulunkulu kuzakwenza ukhethe inotho yaphakade kulokuthi ukhethe eyesikhatshana. (Bala uMathewu 6:19-21.) USophie owayeligabazi lomgido okuthiwa yi-ballet kwakumele akhethe phakathi kwezinto lezi ezimbili. Wathenjiswa ukubhadalelwa izifundo zakhe lokuphiwa izikhundla ezazifunwa ngabanengi kumankampani e-ballet kulo lonke elase-United States. Uthi: “Kwakumnandi kakhulu ukuqakathekiswa. Vele ngasengizibona ngingcono kakhulu kulabanye bami. Kodwa ngangingajabuli.” USophie wabukela ividiyo ethi Young People Ask​—⁠What Will I Do With My Life? Uthi: “Ngananzelela ukuthi lanxa umhlaba lo wawusungenze ngaphumelela kanye lokuthi ngithandwe ngabanengi, wawusungenze ukuthi ngingakhonzi uJehova ngenhliziyo yonke. Ngathandaza kuye ngincenga kakhulu. Ngasengitshiya umsebenzi wami wokugida.” Khathesi uzizwa njani ngenyathelo alithathayo? Uthi: “Vele angiyikhanuki impilo yami yakudala. Lamuhla angingeke ngiyichaze intokozo engilayo. Ngiyaphayona lomkami. Singabantu abangadumanga kakhulu njalo asilazinto ezinengi. Kodwa siloJehova, abantu esifunda labo iBhayibhili kanye lezinto esihlela ukuzenza  ekukhonzeni kwethu. Angizisoli ngitsho lakancane.”

8. Yisiphi iseluleko esiseBhayibhilini esinganceda osakhulayo nxa esenza isinqumo sokuthi uzakwenzani ngempilo yakhe?

⁸ UJehova uyakwazi ukuthi kuyini okungakuthokozisa empilweni. UMosi wathi: “Kuyini uJehova uNkulunkulu wakho angakucela kuwe ngaphandle kokuba umesabe uJehova wakho, ukuhamba ezindleleni zakhe, ukumthanda, ukumsebenzela uJehova uNkulunkulu wakho ngenhliziyo yakho yonke njalo langomoya wakho wonke, lokugcina imilayo kaJehova kanye lezimiso lezi engilinika zona lamhlanje ukuze kulilungele?” (Dute. 10:12, 13) Nxa usakhula, khetha umsebenzi ozakwenza wenelise ukuthanda uJehova futhi umkhonze “ngenhliziyo yakho yonke njalo langomoya wakho wonke.” Nxa ungenza njalo, uzakuba leqiniso lokuthi indlela oyikhethileyo ‘izakulungela.’

9. Chaza ukuthi kungani kwakungaba nzima ukuthi uMosi enze umsebenzi wakhe.

⁹ UMosi ‘wakhetha ihlazo ngenxa kaKhristu njengegugu elikhulu kulengcebo yaseGibhithe.’ (Heb. 11:26) Wabekwa ukuthi abe “nguKhristu,” kumbe “Ogcotshiweyo,” okutsho ukuthi nguye owakhethwa nguJehova ukuthi akhokhele isizwe sako-Israyeli esikhupha eGibhithe. Wayekwazi ukuthi ukwenza umsebenzi lo kwakuzaba nzima, kumbe kube ‘lihlazo.’ Omunye um-Israyeli wayeke wamtshingela esithi: “Ngubani osewakwenza waba ngumbusi lomahluleli wethu?” (Eks. 2:13, 14) Ngemva kwesikhathi esithile, uMosi laye wabuza uJehova wathi: “Kuyini okungenza ukuthi uFaro angilalele?” (Eks. 6:12) Ukuze enelise ukulwisana lehlazo lelo, uMosi watshela uJehova konke ayekwesaba kanye lokwakumhlupha. UJehova wamncedisa njani ukuthi enze umsebenzi lo onzima ayemnike wona?

10. UJehova wamncedisa njani uMosi emsebenzini ayemnike wona?

¹⁰ Okokuqala, uJehova wenza ukuthi uMosi angesabi lapho emtshela ukuthi: “Ngizakuba lawe.” (Eks. 3:12) Okwesibili, uJehova wamenza waba lesibindi ngokumchasisela okuthile okuphathelane lokutshiwo libizo lakhe: “Ngizakuba Yilokho Engikhetha Ukuba Yikho.” * (Eks. 3:14, NW) Okwesithathu, wanika uMosi amandla okwenza izimangaliso ezazitshengisa ukuthi wayethunywe nguNkulunkulu sibili. (Eks. 4:2-5) Okwesine, uJehova wamnika u-Aroni ukuthi asebenze laye lokuthi abe ngumkhulumeli wakhe ukuze amncedise. (Eks. 4:14-16) UMosi wafa engasathandabuzi ngitsho lakancane ukuthi uJehova nguye oncedisa izinceku zakhe kuloba yiwuphi umsebenzi awupha izinceku zakhe, yikho watshela uJoshuwa wathi: “UJehova ngokwakhe uhamba phambi kwakho njalo uzakuba lawe; kasoze akutshiye loba akufulathele. Ungesabi; ungapheli amandla.”​—Dute. 31:8.

11. Kungani uMosi wawuqakathekisa kakhulu umsebenzi wakhe?

¹¹ UMosi wawuqakathekisa kakhulu umsebenzi wakhe owawunzima, ewubona “njengegugu elikhulu kulengcebo yaseGibhithe” ngoba uJehova wayemsekela. Ukukhonza uFaro kwakungeke kuqathaniswe lokukhonza uNkulunkulu uSomandla. Kanti njalo ukuba yinkosana yeGibhithe kwakungasilutho nxa kuqathaniswa lokuba “nguKhristu,” loba ogcotshiweyo kaJehova. UMosi wathola umvuzo ngenxa yokuqakathekisa kwakhe umsebenzi. Waba lobuhlobo obuligugu loJehova, owamupha amandla okwenza “izenzo ezesabekayo” njengoba wayekhokhela abako-Israyeli ebasa eLizweni elalithenjisiwe.​—Dute. 34:10-12.

12. Yiyiphi imisebenzi esiyiphiwe nguJehova okumele siyiqakathekise?

¹² Lathi silomsebenzi esiwuphiweyo. UJehova wathuma iNdodana yakhe ukuthi isinike umsebenzi wokutshumayela njengoba yanika  umphostoli uPhawuli kanye labanye. (Bala u-1 Thimothi 1:12-14.) Sonke silesibusiso sokumemezela izindaba ezinhle. (Mat. 24:14; 28:19, 20) Abanye bayizikhonzi zesikhathi esigcweleyo. Abazalwane ababhaphathiziweyo njalo abavuthiweyo bazinceku ezikhonzayo njalo abanye bangabadala ebandleni. Kodwa amalunga emuli yakho angakholwayo kanye labanye bangakusola besithi imisebenzi leyo kayiqakathekanga baze bakuchothoze ngokuzinikela kwakho. (Mat. 10:34-37) Nxa bengenza njalo, ungacina usubona angani ukuzinikela kwakho kakuqakathekanga loba ucine usubona angani awungeke wenelise ukwenza umsebenzi wakho. Ukholo lwakho luzakuncedisa njani ukuthi uqinisele nxa lokhu kungenzakala kuwe?

13. UJehova usincedisa njani ukuthi senelise ukufeza imisebenzi asipha yona?

¹³ Ngokholo, cela ukuthi uJehova akusekele. Mtshele konke okwesabayo kanye lalokho okukuhluphayo. UJehova uzakuncedisa ukuthi uphumelele ngoba nguye okukhethileyo ukuthi wenze umsebenzi wakhe. Uzakuncedisa njani? Uzasebenzisa izindlela ezifanana lalezo azisebenzisa kuMosi. Okokuqala, uJehova uyakuqinisa ngamazwi la athi: “Ngizakuqinisa, ngikusize; ngizakusekela ngesandla sami sokudla esiqotho.” (Isaya. 41:10) Okwesibili, ukukhumbuza ukuthi uzazigcwalisa izithembiso zakhe lapho esithi: “Lokho engikutshiloyo ngizakufeza; lokho engikucebileyo ngizakwenza.” (Isaya. 46:11) Okwesithathu, uJehova uzakunika ‘amandla amakhulukazi’ ukuze uphumelele enkonzweni yakho. (2 Khor. 4:7) Okwesine, uBaba wethu olothando ukuncedisa ukuthi ubekezele emsebenzini wakho ngokukunika abazalwane abasemhlabeni wonke abayizikhonzi zeqiniso ‘abaqinisanayo njalo bakhane.’ (1 Thes. 5:11) Ukholo lwakho luzakhula njalo uzakubona ukuthi imisebenzi oyiphiwa nguJehova iqakathekile ukwedlula inotho yasemhlabeni njengoba ekuncedisa ukuthi uyenze.

14. Kungani uMosi wayeqiniseka ukuthi uzathola umvuzo?

¹⁴ UMosi ‘wayekhangelele umvuzo ophambili.’ (Heb. 11:26) Wasebenzisa ulwazi lwakhe ngekusasa ukuze akhethe kuhle umsebenzi lanxa ulwazi lolo lwalungalunengi kangako. Njengokhokho wakhe u-Abhrahama, uMosi wayeleqiniso lokuthi uJehova uzabavusa abantu abafileyo. (Luk. 20:37, 38; Heb. 11:17-19) Izibusiso ezizayo ayezilindele zamnceda ukuthi angacabangi ukuthi iminyaka engu-40 eyisiphepheli kanye leminye iminyaka engu-40 esenkangala kwakuyiminyaka ayidlalisayo. Lanxa wayengakwazi konke mayelana lokuthi  izithembiso zikaNkulunkulu zizagcwaliseka njani, ukholo lwakhe lwamenza ukuthi awubone umvuzo ayengakawuphiwa.

15, 16. (a) Kungani kumele sigxile emvuzweni wethu? (b) Yiziphi izibusiso ozazijabulela kakhulu eMbusweni kaNkulunkulu?

¹⁵ Wena ‘ukhangelele phambili’ emvuzweni wakho yini? Lathi njengoMosi kasikwazi konke mayelana lokuthi izithembiso zikaNkulunkulu zizagcwaliseka njani. Ngokwesibonelo, ‘kasikwazi ukuthi sizafika nini lesosikhathi’ sokuhlupheka okukhulu. (Mak. 13:32, 33) Kodwa kunengi esikwaziyo ngePharadayisi elizayo ukwedlula uMosi. Lanxa singakwazi konke okuzakwenzakala, silezithembiso ezinengi ezivela kuNkulunkulu ‘esingazikhangelela’ ezisitshengisa ukuthi ukuphila kuzabe kunjani eMbusweni kaNkulunkulu. Ukubona umhlaba omutsha ngelihlo lengqondo kuzakwenza ukuthi siqakathekise izinto eziphathelane loMbuso ukwedlula zonke izinto. Njani? Cabanga ngalokhu: Ungayithenga yini indlu nxa usazi okulutshwana ngayo? Awungeke uyithenge! Lathi kasingeke sidlalise izimpilo zethu ngokuba lethemba entweni esingelaqiniso ngayo. Ukholo kumele lusenze ukuthi sikubone kuhle ezingqondweni zethu ukuthi ukuphila kuzabe kunjani eMbusweni kaNkulunkulu.

¹⁶ Ukuze uwubone ngelihlo lengqondo uMbuso kaNkulunkulu, ‘khangelela’ ukuthi kuzabe kunjani ukuphila kwakho ePharadayisi. Cabanga ukuthi kuyini okuzabe kusenzakala. Ngokwesibonelo nxa ufunda ngokuphila kwabantu okukhulunywa ngabo eBhayibhilini abazaphila ePharadayisi, cabanga ngalokho ongababuza khona nxa sebevusiwe. Ubona angani bona bangakubuzani mayelana lokuthi yayinjani impilo yakho ngezinsuku zokucina? Zibone ngelihlo lengqondo ukuthi uzabe uthokoza njani nxa usuhlangana labokhokho bakho abafa kudaladala usubatshela ngakho konke uNkulunkulu abenzele khona. Zicabange usukholisa ukubona izinyamazana zeganga ezinengi njalo ufunda ngazo emhlabeni olokuthula. Njengoba isono siyabe sisuswa kancane kancane, cabanga langokuthi ubuhlobo bakho loJehova buzaqina kangakanani.

17. Ukucabangisisa ngomvuzo wethu esingakawutholi kungasinceda njani lamuhla?

¹⁷ Ukucabangisisa ngomvuzo esingakawutholi kusinceda ukuthi siqhubeke sisenza kuhle, sibe lentokozo njalo senze izinqumo ezitshengisa ukuthi sikhangelele ikusasa elingapheliyo. UPhawuli wabhalela amaKhristu agcotshiweyo ukuthi: “Uma sithemba lokho esingakabi lakho, siyakulindela ngokubekezela.” (Rom. 8:25) UMbhalo lo uyasebenza lakuwo wonke amaKhristu alethemba lokuphila okungapheliyo. Lanxa singakawutholi “umvuzo,” ukholo lwethu lulokhu luqinile okokuthi silokhu siwulindele ngokubekezela. Lathi njengoMosi, siyayiqakathekisa kakhulu iminyaka esiyiqeda sisenkonzweni kaJehova. Sileqiniso lokuthi “okubonakalayo kuyedlula kodwa okungabonakaliyo kakuyikuphela.”​—Bala u-2 Khorinte 4:16-18.

18, 19. (a) Kungani kumele sisebenze gadalala ukuze sihlale silokholo? (b) Sizahlolani esihlokweni esilandelayo?

¹⁸ Ukholo lwenza ‘siqiniseke ngalokho esingakuboniyo.’ (Heb. 11:1) Umuntu ongelakholo kakuboni ukuthi ukukhonza uJehova kuligugu kangakanani. Emuntwini lo, ukukhonza ‘kuyibuthutha.’ (1 Khor. 2:14) Kodwa thina silethemba lokuthola ukuphila okungapheliyo kanye lokubona abafileyo bevuswa. Umhlaba kawuzicabangi zonke lezizinto. Abantu befilosofi abaphila esikhathini sikaPhawuli bambiza ngokuthi ‘luwumani’ olungazi lutho. Lanamuhla abantu abanengi bacabanga ukuthi siyabe siziwumanela nje nxa sibatshela ngethemba esilalo.​—ImiSeb. 17:18.

¹⁹ Kumele sisebenze gadalala ukuze sihlale silokholo ngenxa yokuthi siphila emhlabeni olabantu abangelakholo. Ncenga uJehova ukuze “ukholo lwakho lungehluleki.” (Luk. 22:32) Ungasikhohlwa isibusiso esikhulu sokukhonza uJehova, kanye lethemba lokuphila okungapheliyo njalo cabanga ngokuthi kuzakwenzakalani nxa ungenza isono. Nanzelela lokuthi ukholo lukaMosi lwamenza wabona izinto ezinkulu kakhulu ukwedlula zonke lezi. Esihlokweni esilandelayo, sizahlola ukuthi ukholo lwamnceda njani ukuthi ambone “lowo ongabonakaliyo.”​—Heb. 11:27.