1, 2. (a) Ko e heigoa e fifiliaga ne taute e Mose he 40 e tau haana? (Kikite fakatino he kamataaga.) (e) Ko e ha kua fifili a Mose ke matematekelea mo e tau tagata Isaraela?

 ILOA e Mose e vahā anoiha ka foaki e Aikupito ki a ia. Kitia e ia e tau fale lalahi mo e fulufuluola he tau tagata monuina. Kua hiki he magafaoa he patuiki a ia. “Ne fakaako foki a Mose ke he iloilo oti ni he tau tagata Aikupito,” ne liga putoia e tau fakatino, tau fetū, tau mata numera, mo e falu saiene. (Gahua 7:22) To liga mukamuka lahi ma haana ke moua e tau tupe, pule, mo e tau kotofaaga kua nakai moua he ha tagata noa i Aikupito.

² Pete ne tau mena oti ne moua e Mose, ne taute e ia e fifiliaga he 40 e tau haana he moui ne liga nakai maama e Farao mo e magafaoa haana. Ne fifili a ia ke toka e vahā anoiha haana i Aikupito. Manako kia a ia ke he moui he tagata Aikupito? Nakai, ai pihia foki! Ne fifili a ia ke matematekelea mo e tau tupa. Ko e ha? Ha kua tua a Mose. (Totou Heperu 11:24-26.) Ha ko e tua ha Mose kua tuga na kitia e ia a Iehova. Ha ha ia Mose e tua ki a ‘Ia nakai kitia’ mo e fakamooliaga he tau maveheaga he Atua.​—Hepe. 11:27.

3. Ko e heigoa e tau hūhū tolu ka tali he vala tala nei?

³ Tuga a Mose, kua lata a tautolu ke moua e tau mata he tua ke kitia muatua atu mai he tau mena ne foaki he lalolagi mo e ke kitia a Iehova. Kua lata ia tautolu ke “tua.” (Hepe. 10:38, 39) Ke lagomatai a tautolu ke fakamalolō e tua ha tautolu, kia kumikumi e tautolu e mena ne tohi hagaao ki a Mose ia Heperu 11:24-26. He taute pihia e tautolu, lali ke tali e tau hūhū nei: Lagomatai fēfē he tua a Mose ke tiaki e tau manako  he tino? He fehagai a ia mo e totokoaga, lagomatai fēfē he tua a ia ke tokiofa e kotofaaga haana he fekafekau ki a Iehova? Ti ko e ha a Mose ne lahi e ‘amaamanaki ke he taui’?

4. Ko e heigoa ne maama e Mose hagaao ke he “fiafia ke he hala”?

⁴ Ke he tau mata he tua, ne maama e Mose ko e “fiafia ke he hala” kua mole vave. Liga kehe e mena ne kitia he falu. Ko e ha? Ne kitia e lautolu a Aikupito, ko e matakavi ne puke ke he tapuaki tupua mo e tau matutakiaga fakataulatua, ti eke mo pule he lalolagi, ka e matematekelea e tau tagata ha Iehova he eke mo tau tupa. Ka e iloa e Mose to hiki he Atua e tuaga. Pete ko lautolu ne hagaaki ke fakamakona e tau manako ni ha lautolu kua tuga ke kautū, ne tua a Mose to moumou a lautolu ne mahani kelea. Ti ko e fua, ne nakai kamatamata a ia he “fiafia ke he hala kua mole vave.”

5. Ko e heigoa ka lagomatai a tautolu ke totoko e “fiafia ke he hala kua mole vave”?

⁵ Maeke fēfē a koe ke totoko e “fiafia ke he hala kua mole vave”? Ua nimo ko e fiafia kua moua mai he agahala ko e mena nakai leva. To lagomatai he tua a koe ke kitia “ha ne mole atu foki e lalolagi katoa mo e hana tau manako lahi.” (1 Ioa. 2:15-17) Manamanatu fakahokulo ke he vahā anoiha he tau tagata agahala ne nakai fakatokihala. Ko lautolu “ke he tau mena momole . . . kua fakaotioti a lautolu.” (Sala. 73:18, 19) Ka kamatamata a koe ke agahala, hūhū, ‘Ko e heigoa e vahā anoiha kua manako au ma haaku?’

6. (a) Ko e ha ne fakaheu e Mose “ke talahau a ia ko e tama he tama fifine a Farao”? (e) Ko e ha kua manamanatu a koe kua taute e Mose e fifiliaga hako?

⁶ Ko e tua ha Mose ne takitaki foki haana fifiliaga he gahua. “Ko e tua, kua lahi a Mose ti nakai maeke ai e ia ke talahau a ia ko e tama he tama fifine a Farao.” (Hepe. 11:24) Ne nakai fakamaama e Mose kua lata a ia ke moua e tuaga aoga ke he lotopā he fale patuiki ti fekafekau mogoia ke he Atua he fakaaoga e tau tupe mo e pule haana ke lagomatai e tau matakainaga Isaraela haana. Ne fifili a Mose ke fakaalofa ki a Iehova mo e haana a loto, moui, mo e malolō katoa. (Teu. 6:5) Ko e fifiliaga ha Mose ne laveaki a ia mai he matematekelea lahi. He fakahikuaga, ne loga e koloa ne uta he tau Isaraela i Aikupito. (Esoto 12:35, 36) Ne fakamā a Farao ti tomo a ia. (Sala. 136:15) Ka e kua a Mose? Ne fakaaoga he Atua a ia ke takitaki e motu katoa ha Isaraela ke momoui. Kua kautū mooli e moui haana.

7. (a) Hagaao ki a Mataio 6:19-21, ko e ha kua lata ke fakatokatoka a tautolu ma e vahā tukulagi anoiha? (e) Ko e heigoa e mena ne tupu ne fakakite e kehekeheaga he fakatokatoka ma e vahā anoiha kua mole vave mo e pulega ma e vahā anoiha kua tukulagi?

⁷ Kaeke ko e fekafekau fuata ha Iehova a koe, maeke fēfē e tua ke lagomatai a koe ke fifili e gahua? Fakatokatoka ma e vahā anoiha. Tua ke he tau maveheaga he Atua mo e “tanaki” po ke fakatokatoka ma e vahā anoiha ne tukulagi, ka e nakai mole vave. (Totou Mataio 6:19-21.) Ko e fifiliaga anei ne lata ia Sophie ke taute ne iloilo he koli ballet. Ko e tau kamupanī ballet he Tau Faahi Kaufakalataha ne foaki ki a ia e tau sikolasipi mo e tau gahua tokoluga. Pehē a ia “ko e mena ke nava lahi ki ai.” Ne talahau foki e ia kua mitaki atu a ia ke he falu tagata koli. Ka kua nakai fiafia a ia. Ti kitekite e Sophie e vitiō Young People Ask​—What Will I Do With My Life? Pehē a ia: “Mailoga e au ko e lalolagi ne foaki ki a au e kautū mo e navaaga he tau tagata ne hiki aki e tapuakiaga katoatoa haaku ki a Iehova.” Ti liogi fakalahi a ia ki a Iehova ti oti e koli haana. Fēfē e logonaaga haana ke he fifiliaga haana? “Ai misi e au e moui fakamua haaku. Magaaho nei, 100 pasene e fiafia haaku. Ne paionia au mo e taane haaku. Nakai talahaua a maua ti nakai loga e tau koloa tino ha maua. Ka e ha ha ia maua a Iehova, tau tagata fakaako Tohi Tapu, mo e tau foliaga fakaagaaga. Nakai tokihala au.”

8. Ko e heigoa e fakatonuaga he Tohi Tapu ka lagomatai e fuata ke fifili e mena ka taute he moui haana?

⁸ Iloa e Iehova e mena kua mitaki lahi mahaki ma haau. Pehē a Mose: “Ko e heigoa kia e mena kua finagalo ki ai a Iehova hau a Atua kia koe, ka ko e tau mena nai hokoia, kia matakutaku  a koe kia Iehova hau a Atua, kia fano ai ke he hana tau puhala oti ni, mo e fakaalofa atu a koe kia Iehova hau a Atua, mo e fekafekau a koe kia Iehova hau a Atua mo e hau a loto katoa mo e hau a agaga katoa, Kia omaoma a koe ke he tau poaki a Iehova mo e hana tau fakatufono kua poaki atu ai e au kia koe ke he aho nai, kia monuina ai a koe.” (Teu. 10:12, 13) He fuata a koe, fifili e gahua ka maeke a koe ke fekafekau mo e fakaalofa ki a Iehova mo e “hau a loto katoa mo e hau a agaga katoa.” Maeke a koe ke mauokafua ko e fifiliaga pihia to “monuina ai a koe.”

9. Fakamaama e kakano kua liga uka ma Mose ke fakamooli e kotofaaga haana?

⁹ “Ne manatu a ia [Mose] ko e ekefakakelea ha ko Keriso, ko e koloa haia kua mua ke he tau tanakiaga koloa a Aikupito.” (Hepe. 11:26) He kupu tohi nei, ne hagaao ki a Mose “ko Keriso.” Kakano e mena nei kua fifili e Iehova a ia ke takitaki a Isaraela mai i Aikupito. Iloa e Mose to uka ke taute e mena nei. To fehagai foki a ia mo e “ekefakakelea,” kakano ai ko e totoko. He kamataaga, taha he tau Isaraela ne vaiga a Mose he pehē: “Ko hai ne kotofa a koe mo iki mo fakafili kia mautolu?” (Esoto 2:13, 14) Fakahiku, ne hūhū a Mose ki a Iehova: “To fanogonogo mai fefe a Farao kia au?” (Esoto 6:12) Ke mautauteute ma e totokoaga, ne liogi a Mose ki a Iehova hagaao ke he tau matakutaku mo e tau tupetupe haana. Lagomatai fēfē e Iehova a Mose ke kautū he kotofaaga uka haana?

10. Age fēfē e Iehova ki a Mose e mena kua lata a ia ke fakamooli e kotofaaga haana?

¹⁰ Fakamua, ne mavehe a Iehova ki a Mose: “To fakalataha au mo koe.” (Esoto 3:12) Uaaki, ne foaki e Iehova ki a ia e amaamanakiaga mo e malolō he fakamaama taha e puhala he kakano he higoa ni Haana: “To Fakamooli Ai Au ti To Fakamooli Ni Au.” (NW) a (Esoto 3:14) Toluaki, ne age he Atua ki a Mose e malolō ke taute e tau mana, ti fakamooli he mena nei na fakafano mooli mai e Ia a Mose. (Esoto 4:2-5) Fāaki, ne fifili e Iehova a Arona ke vagahau ma Mose mo e ke lagomatai a ia ke fakamooli e kotofaaga haana. (Esoto 4:14-16) He matahiku he moui ha Mose, ne iloa mooli e ia kua lagomatai he Atua e tau fekafekau Haana ke fakamooli e tau kotofaaga ne age e Ia ki a lautolu. Ne mauokafua lahi a Mose ki a Iehova ti tala age a ia ki a Iosua: “Ko Iehova foki kua mua atu kia koe, to fakalataha ni a mua mo ia; nakai toka e ia a koe, to nakai tiaki foki e ia a koe; aua neke fakaatukehe a koe, ti ua matakutaku.”—Teu. 31:8.

11. Ko e ha ne aoga ki a Mose e kotofaaga haana?

¹¹ He lalagoaga ha Iehova, ne tokiofa e Mose e kotofaaga uka ne mua atu ke he “tau tanakiaga koloa a Aikupito.” Nakai fai mena ke tatai mo e fekafekau ke he Atua mua ue atu. Ko e heigoa e aoga he eke mo patuiki i Aikupito he fakatatai mo e fifili e Iehova ke takitaki a Isaraela? Ne taui mitaki a Mose he moua e aga hako. Ne olioli e ia e fakafetuiaga tata mo Iehova, ne foaki ki a ia e malolō ofoofogia lahi ke takitaki e tau Isaraela ke he Motu he Maveheaga.​—Teu. 34:10-12.

12. Ko e heigoa e tau kotofaaga kua foaki mai e Iehova ki a tautolu?

¹² Fai kotofaaga foki a tautolu. Ne kotofa e Iehova ki a tautolu e “feua,” tuga ne kotofa e ia ke he aposetolo ko Paulo mo e falu. (Totou 1 Timoteo 1:12-14.) Moua oti e tautolu e kotofaagake fakamatala e tala mitaki. (Mata. 24:14; 28:19, 20) Falu ne gahua ko e tau fekafekau mau. Ko e tau matakainaga taane motua fakaagaaga ne papatiso kua fekafekau ke he fakapotopotoaga ko e tau fekafekau lagomatai mo e tau motua. Pete ia, ko e haau a magafaoa nakai tua mo e falu ne liga hūhū ke he aoga he tau kotofaaga kua moua e koe. To liga tuhituhi foki e lautolu a koe ma e tau foakiaga kua taute e koe ma Iehova. (Mata. 10:34-37) Ka fakalolelole e lautolu a koe, to kamata a koe ke manamanatu kua nakai aoga e tau foakiaga nei po ke nakai maeke a koe ke fakamooli e kotofaaga haau. Ka tupu e mena ia ki a koe, to lagomatai fēfē he tua a koe ke fakauka?

13. Lagomatai fēfē e Iehova a tautolu ke fakamooli e tau kotofaaga ne foaki e ia ki a tautolu?

 ¹³ Olelalo ki a Iehova ma e lalagoaga haana, he moua e tua to lagomatai e ia a koe. Tala age ki a ia e tau matakutaku mo e tau tupetupe haau. Mole ia, ko Iehova ne foaki atu ki a koe e kotofaaga nei, ti kua lata ia koe ke mauokafua to lagomatai e ia a koe ke kautū. Fēfē? He puhala taha ne lagomatai e ia a Mose. Fakamua, ne mavehe e Iehova: “Kua lagomatai au kia koe; ko e moli, kua taofi e au a koe ke he haku a lima matau ne ha i ai e mahani tututonu.” (Isaia 41:10) Uaaki, ne fakamanatu e ia ki a koe ke falanaki a koe ke he tau maveheaga haana: “Ne vagahau atu e au, to fakahoko ai ni e au; ne fafati e au, to eke ai ni e au.” (Isaia 46:11) Toluaki, foaki atu e Iehova ki a koe e “lahi ue atu he malolo,” ke kautū he kotofaaga haau. (2 Kori. 4:7) Fāaki, ke lagomatai a koe ke fakauka ke he kotofaaga haau, ko e ha tautolu a Matua fakaalofa kua foaki ki a koe e tau matakainaga he lalolagi katoa he tau tagata tapuaki mooli ne “fetomaaki a mutolu, mo e fefakamafanaki a mutolu.” (1 Tesa. 5:11) Ka foaki e Iehova ki a koe e mena kua lata mo koe ke kautū ke he tau kotofaaga haau, to malolō lahi e tua haau ki a ia. Ti ko e fua, to uho ki a koe e tau kotofaaga kua moua e koe ke he ha mena ka foaki atu he lalolagi ki a koe.

14. Ko e ha kua mauokafua a Mose to moua e ia e taui?

¹⁴ Ko Mose “kua amaamanaki a ia ke he t[au]i.” (Hepe. 11:26) Pete ni he loga e tau vala tala hagaao ke he vahā anoiha ne nakai iloa e Mose, ne fakaatā e ia e mena tote ne iloa e ia ke takitaki haana tau fifiliaga. Tuga e tupuna haana ko Aperahamo, ne mauokafua a Mose to maeke a Iehova ke fakaliu tu mai a lautolu ne mamate. (Luka 20:37, 38; Hepe. 11:17-19) Ko e mauokafua haana ke he tau maveheaga he Atua ne lagomatai a Mose ke nakai logona hifo ko e 40 e tau haana he paea fano mo e 40 e tau he tutakale ne moumou e moui. Pete ne nakai iloa tonu e ia e puhala kua taofi mau a Iehova ke he tau maveheaga oti Haana, ne lahi mahaki e tua ha Mose ki a Iehova ke tuga kua kitia e ia e taui haana anoiha.

15, 16. (a) Ko e ha kua lata ia tautolu ke hagaaki ke he taui ha tautolu? (e) Ko e heigoa e tau monuina kua amaamanaki lahi a koe ki ai i lalo he pule he Kautu he Atua?

¹⁵ Kua amaamanaki nakai a koe ke he taui haau? Tuga a Mose, kua nakaila iloa tonu e tautolu e puhala ka fakamooli e tau maveheaga he Atua. Ma e fakatai, ‘nakai iloa e tautolu po ke hoko mai a fe e aho ia’ ma e matematekelea  lahi. (Mare. 13:32, 33) Pete ne nakai iloa e tautolu e tau mena oti, kua lahi atu e mena ne iloa e tautolu hagaao ke he Parataiso anoiha ke he mena ne iloa e Mose. Kua foaki e Iehova ki a tautolu lahi e maveheaga hagaao ke he moui he pule he Kautu haana ka “amaamanaki” a tautolu ki ai, ke moua e tautolu e fakatino mahino he lalolagi foou he tau manamanatuaga ha tautolu. Ka ha ha ia tautolu e fakatino mahino nei, to manako mooli a tautolu ke kumikumi fakamua e Kautu. Pihia he ha? Manamanatu ke he mena nei: To fakatau nakai e koe e fale ka nakai lahi e iloaaga haau ki ai? Nakai pihia! He puhala taha, to nakai fakaaoga e tautolu e tau momoui ha tautolu ke tutuli e amaamanakiaga ne nakai mooli ki a tautolu. Kua lata e tua ha tautolu ke lagomatai a tautolu ke kitia e fakatino mahino mo e mauokafua he ha tautolu a moui i lalo he pule he Kautu.

¹⁶ Ke moua e fakatino mahino he Kautu he Atua he manamanatuaga haau, kia “amaamanaki,” kakano ke manamanatu ke he moui haau he Parataiso. Ma e fakatai, ka fakaako a koe hagaao ke he tau momoui he tau tagata he Tohi Tapu ne momoui to fai Iesu, manamanatu ko e heigoa haau ka hūhū ki a lautolu ka fakaliu tu mai. Manamanatu ke he mena ka hūhū a lautolu ki a koe hagaao ke he moui haau he tau aho fakamui. Manamanatu ke he fiafia ka feleveia a koe mo e tau magafaoa haau mai he tau tau loga kua mole mo e ke fakaako a lautolu hagaao ke he tau mena oti ne taute he Atua ma lautolu. Manamanatu ke he fiafia haau he fakaako a koe hagaao ke he loga e tau manu totolo vale he kitekite ki ai he lalolagi mafola. Manamanatu fakahokulo ke he puhala ka tata lahi e logonaaga haau ki a Iehova he mitaki katoatoa fakahaga a koe.

17. Maeke fēfē e fakatino mahino he taui he vahā anoiha ha tautolu ke lagomatai a tautolu he vahā nei?

¹⁷ He tokaloto e fakatino mahino he taui ha tautolu he vahā anoiha kua lagomatai a tautolu ke fakauka, ke moua e fiafia, mo e taute e tau fifiliaga. Ne tohi e Paulo ke he tau Kerisiano fakauku: “Kaeke kua amaamanaki a tautolu ke he mena kua nakai kitia, kua fakatalitali a tautolu ki ai mo e fakauka.” (Roma 8:25) Ka e nakai ni hagaao e mena nei ki a lautolu ne fakauku. Kua hagaao ke he tau Kerisiano oti ne ha ha ai e amanakiaga he moui tukulagi. Pete he nakaila moua e tautolu e taui, kua malolō lahi e tua ha tautolu ti fakatali fakaeneene a tautolu ke he ‘taui.’ Tuga a Mose, nakai logona hifo e tautolu ko e tau tau ne fakaaoga e tautolu ke fekafekau ki a Iehova ko e moumou magaaho. Ka e mauokafua a tautolu “ko e tau mena kua kitia kua mole vave ia, ka ko e tau mena nakai kitia kua tukulagi ia.”​—Totou 2 Korinito 4:16-18.

18, 19. (a) Ko e ha kua eketaha a tautolu ke tumau e tua ha tautolu ke malolō? (e) Ko e heigoa ka fakatutala a tautolu he vala tala ka mui mai?

¹⁸ Fakaatā he tua a tautolu ke kitia e “fakamoli he tau mena nakai kitia atu.” (Hepe. 11:1) Ko e tagata he tino ne nakai ha ha ia ia e mata he tua, ti nakai maama e ia e uho he fekafekau ki a Iehova. Ke he tagata pihia, kua “goagoa” e kotofaaga nei. (1 Kori. 2:14) Amaamanaki a tautolu ke momoui tukulagi mo e ke kitia e liu tu mai, tau mena ne nakai maeke he tau tagata he lalolagi nei ke manamanatu ki ai. Tuga e falu tagata he vahā ha Paulo ne fakahigoa e lautolu a ia ko e “tagata fa lako” goagoa, laulahi he tau tagata he vahā nei ne manamanatu kua nakai aoga katoatoa e amaamanakiaga kua fakamatala e tautolu.​—Gahua 17:18.

¹⁹ Ha kua takatakai a tautolu he lalolagi ne nakai tua, kua lata ia tautolu ke eketaha ke tumau e tua ha tautolu ke malolō. Olelalo ki a Iehova “kia nakai mate hau a tua.” (Luka 22:32) Tuga a Mose, kia iloa maaliali e tau fua kelea he agahala, ko e lilifu he fekafekau ki a Iehova, mo e amaamanakiaga he moui tukulagi. Koēnaia kia e mena kua fakaako e tautolu mai he fakafifitakiaga ha Mose? Nakai. He vala tala ka mui mai, to fakatutala a tautolu ke he puhala he tua ne lagomatai a Mose ke kitia a ‘Ia nakai kitia.’​—Hepe. 11:27.