1, 2. (a) Anton desisyon so ginawa nen Moises nen 40 años to? (b) Akin et pinili nen Moises so napairap kaiba iray totoo na Dios?

AMTA nen Moises no antoy magmaliw ya bilay tod Ehipto. Angkakabaleg so abung na saray mayayaman. Sikatoy kabiangan na pamilya na Faraon. “Kanian si Moises et nibangat ed amin a karunongan na saray Ehipsio,” kaiba lad tay arts, astronomya, matematika, tan arum ya siensia. (Gawa 7:22) Mainomay ya niwalad sikatoy kayamanan, pakayari, tan pribilehyo ya pirpirawaten na ordinaryon Ehipsio!

² Balet nen 40 años nen Moises, walay ginawa ton desisyon ya agnatalosan na pamilya na Faraon ya anagibi ed sikato. Nandesisyon ya taynan so maong ya bilay to. Kasin labay to lay magmaliw ya ordinaryon Ehipsio? Andi, pinili to ni ingey bilay ya kaiba iray aripen! Akin? Lapud walay pananisia to. (Basaen so Hebreos 11:24-26.) Lapud pananisia, aliwan say walad kaliberliber to labat so anengneng to. Sikatoy maespiritual ya too, kanian walay pananisia to ed samay “Sakey ya agnanengneng,” si Jehova, tan ed saray sipan To.—Heb. 11:27.

3. Anton taloran tepet so ebatan ed sayan artikulo?

³ Singa si Moises, kaukolan ya aliwan saray iyoopresi labat na sayan mundo so nanenengneng tayo. Nepeg ya ‘walaan itayo na pananisia.’ (Heb. 10:38, 39) Pian ombiskeg so pananisia tayo, aralen tayo imay akasulat nipaakar ed si Moises diad Hebreos 11:24-26.  Legan tayon aaralen itan, anapen so ebat ed sarayan tepet: Panon ya akatulong so pananisia pian nipulisay nen Moises iray pilalek na laman? Nen wala ray onsusumpad sikato, panon ya akatulong so pananisia pian naapresya to ray pribilehyo to? Tan akin ya “akateen so ilalo to ed pakaawat ed tumang”?

4. Antoy amoria nen Moises nipaakar ed “panliket ed kasalanan”?

⁴ Lapud pananisia, anengneng nen Moises ya say “panliket ed kasalanan” et temporaryo labat. Ompan inkatunongan na arum nensaman ya anggano grabe so idolatriya tan espiritismo ed Ehipto, nagmaliw itan ya makapanyari ed interon mundo. Saray totoo nen Jehova balet et maniirap lapud ariripen ira! Balet amta nen Moises ya sarag ya umanen na Dios so situasyon. Anggano singa onaaligwas iray manggagaway mauges, manisia si Moises ya naderal lanlamang ira. Kanian sikatoy ag-asagyat ed “temporaryon panliket ed kasalanan.”

5. Antoy ontulong pian nipulisay tayoy “temporaryon panliket ed kasalanan”?

⁵ Panon mon nipulisay so “temporaryon panliket ed kasalanan”? Tandaan ya say pamenek ed makasalanan iran pilalek et magangganon onlabas. Ontulong so pananisia pian nanengneng mon “say mundo tan say pilalek na satan et agmansiansia.” (1 Juan 2:15-17) Nonot moy pansumpalan na saray nankasalanan ya agmagbabawi. Singa ra walad ‘andanglel a pasen . . . anggad naupot ira.’ (Sal. 73:18, 19) No natutukso kan manggaway kasalanan, tepetan moy sarilim, ‘Antoy labay kon nagawad siak ed arapen?’

6. (a) Akin et “agnilabay nen Moises so patawag ya anak na marikit [na] Faraon”? (b) Parad sika, akin et dugay desisyon nen Moises?

⁶ Tinmulong met so pananisia nen Moises pian makapandesisyon na duga. “Lapud pananisia, agnilabay nen Moises so patawag ya anak na marikit [na] Faraon.” (Heb. 11:24) Agto inkatunongan ya sarag toy manlingkor met ed Dios legan ya manlilingkor bilang opisyal ed palasyo insan to usaren so kayamanan tan posisyon to pian tulongan iray kapara ton Israelita. Imbes, determinado si Moises ya aroen si Jehova ed amin a puso, kamarerwa, tan biskeg to. (Deu. 6:5) Lapud satan ya desisyon to, apaliisan toy dakel a problema. Dakel ed saray kayamanan na Ehipto ya tinaynan to et sinamsam lanlamang na saray Israelita! (Exo. 12:35, 36) Say Faraon et abaibaingan tan inatey. (Sal. 136:15) Si Moises balet ey? Sikatoy inusar na Dios pian ibulos so interon bansa na Israel. Talagan walay kabaliksan na bilay to.

7. (a) Unong ed Mateo 6:19-21, akin et nepeg ya manplano tayo parad andi-anggaan ya arapen? (b) Mangisalaysay na eksperiensyan mangidadanet ed pandumaan na materyal tan espiritual ya kayamanan.

⁷ No sakey kan kalangweran ya lingkor nen Jehova, panon ya makatulong so pananisia diad pampilim no antoy gawaen mod bilay mo? Maabig no iplanom so arapen mo. No walay pananisiam ed saray sipan na Dios, napakiwas kan mantipon parad andi-anggaan, aliwan parad temporaryo ya arapen. (Basaen so Mateo 6:19-21.) Satan so desisyon ya inarap nen Sophie, sakey ya marundunong a ballet dancer. Saray kompanya na ballet diad United States et angiyopresid sikato na scholarship tan posisyon ya pipirawaten na dakel. “Makapalikliket no hahangaan ka na totoo. Diad tua, pakaliknak et mas nayari ak nen say arum,” so kuan to. “Balet agak maliket.” Binantayan nen Sophie so video ya Young People Ask—What Will I Do With My Life? “Nagmaliw ak ya sikat ed mundo tan dakel so fans ko, balet a-realize kon say kasalat na satan et say interon-puson panagdayew kod si Jehova,” so kuan to. “Nampikasi ak ya maong ed sikato. Insan ko la intunday karerak ed panagsayaw.” Pagbabawian to kasi desisyon to? “Agko aanap-anapen so datin bilay ko. Natan et 100% ak lan maliket. Payunir kamin dua nen asawak. Aliwa kamin sikat, tan agkami mayaman ed materyal. Balet wadtay Jehova,  saray iyaaralan mi Biblia, tan saray espiritual a kalat mi. Anggapon balot so pagbabawian ko.”

8. Anton simbawad Biblia so ontulong ed saray kalangweran diad pandesisyon da no antoy gawaen dad bilay da?

⁸ Amta nen Jehova no antoy sankaabigan parad sika. Imbaga nen Moises: ‘Antoy arum a kakaukolanen nen Jehova a Dios mo ed sika noag say takotan mo si Jehova a Dios mo, tumbok mo so amin a dalan to, tan say pangarom ed sikato, tan say panlingkor mo ed Jehova ed amin a pusom tan ed amin a kamarerwam, a sumpalen mo ray ganggan nen Jehova, tan saray pananontonan to, ya ingganggan ko natan ed sika ya onkana a kaabigan mo?’ (Deu. 10:12, 13) Legan ya wala ka nid kaksilan, pilim so karera ya ontulong ed sikan naaro tan nalingkoran si Jehova “ed amin a pusom tan ed amin a kamarerwam.” No atan so pilien mo, makapanmatalek kan ‘onkana itan a pankaabigan mo.’

9. Ipaliwawa no akin ya nairapan si Moises ya gawaen so asainmin to.

⁹ Parad si Moises, ‘say napabanday bilang Sakey a Nilanaan et babaleg ni nen say kaykayamanan na Ehipto.’ (Heb. 11:26) Si Moises et tinukoy bilang “Sakey a Nilanaan” o “say Kristo” ta sikato so pinili nen Jehova ya mangibulos ed Israel. Amta nen Moises ya mairap itan ya gawaen, tan sikatoy “napabanday” ni ingen. Oniay matangas ya imbaga na sakey ya Israelita ed sikato: “Siopa so angipasen ed sika a sakey a prinsipe tan manangukom ed sikami?” (Exo. 2:13, 14) Anggan si Moises et tinepetan toy Jehova: ‘Panon kasi idengel na Faraon ed siak?’ (Exo. 6:12) Pian akaparaan si Moises ya arapen so isusumpa, imbalikas tod si Jehova iray pakatatakotan tan kapagaan to. Panon ya tinulongan nen Jehova si Moises pian nagawaan toy mairap ya asainmin to?

10. Panon ya tinulongan nen Jehova si Moises pian nagawaan toy asainmin to?

¹⁰ Unona, impaseguro nen Jehova ed si Moises: ‘Kaiba mo ak.’ (Exo. 3:12) Komadua, pinabiskeg nen Jehova so liknaan to diad impangipaliwawa Tod kabaliksan na ngaran To: “Siak so Magmaliw ed no Antoy Pilien Kon Pagmaliwan.” * (Exo. 3:14, NW) Komatlo, inikdan toy Moises na pakayarin manggaway milagro ya mamaneknek a sikatoy talagan imbaki na Dios. (Exo. 4:2-5) Komapat, inikdan nen Jehova si Moises na kaiba tan pinagkasangiyan, si Aaron, ya ontulong ed panumpal tod asainmin to. (Exo. 4:14-16) Nen asingger lan ompatey si Moises, ontan lay talek to ya tulongan na Dios iray lingkor To kanian oniay imbaga tod si Josue: “Si Jehova, sikato naani onla ed arap mo: sikato naani miulop ed sika, sikato naani ag-onkulang nisay paulyan to ka: agka ontakot.”—Deu. 31:8.

11. Akin et pinabpabli nen Moises so asainmin to?

¹¹ Diad tulong nen Jehova, apabpablin maong nen Moises so mairap ya asainmin to, ya impasen to itan a “babaleg ni nen say kaykayamanan na Ehipto.” Diad tua, say panlingkor ed Faraon et agbalot naikomparad panlingkor ed Makapanyarin-amin a Dios! Anto ta so kakanaan na pagmaliw ya prinsipe na Ehipto no ikomparad pagmaliw ya “Kristo” o nilanaan nen Jehova? Atumangan si Moises lapud pinabli toy asainmin to. Maapit so relasyon tod si Jehova ya angiter ed sikato na makapakelaw a pakayari diad impangidaulo tod Israel paarap ed Insipan a Dalin.—Deu. 34:10-12.

12. Anto ran pribilehyon nanlapud si Jehova so nepeg tayon apresyaen?

¹² Wala met so naawat tayon asainmin. Panamegley nen Jesus, inyasain itayo nen Jehova ed sakey a ministeryo, ya singa ginawa tod si apostol Pablo tan arum ni nensaman. (Basaen so 1 Timoteo 1:12-14.) Pribilehyo tayon amin so pangipulong ed maong a balita. (Mat. 24:14; 28:19, 20) Say arum et manlilingkor ya  sigpot panaon. Wala ray maespiritual ya agagin lalaki ya ministeryal a lingkor tan elder ed kongregasyon. Balet ompan wala ray agmananisian kanayon tan arum ni ya mangibagan anggapoy kakanaan na saratan ya pribilehyo, odino balawen da ka ni ingen ed pansasakripisyom. (Mat. 10:34-37) Lapud pandidismaya dad sika, ompan isipen mon anggapo lanlamang so kana na saray sakripisyom o agmo sarag ya gawaen so asainmin mo. No ontan so situasyon mo, panon ya makatulong so pananisia pian mansiansia kan matoor?

13. Panon itayon tutulongan nen Jehova pian nagawaan tayo ray teokratikon asainmin tayo?

¹³ Kerew kay tulong ed si Jehova tan panisiaan mon iter to itan. Ibalikas mod sikato so amin ya pakatatakotan tan kapagaan mo. Tutal, si Jehova so angiter ed sika na satan a kimey kanian tulongan to kan nagawaan itan. Panon? Singa met ed intulong tod si Moises. Unona, ipapaseguro nen Jehova ed sika: ‘Pabiskegen ta ka; on, tulongan ta ka. Bembenan ta ka ed nikawanan a lima na inkatunong ko.’ (Isa. 41:10) Komadua, ipapanonot tod sika ya napanmatalkan iray sipan to: ‘Say sinalitak, gawaen ko; say ninonot ko, gawaen ko.’ (Isa. 46:11) Komatlo, iter nen Jehova ed sika so “pakayari a mas mabiskeg nen say pakayari na too” pian nagawaan moy ministeryom. (2 Cor. 4:7) Komapat, pian makapansiansia kad asainmin mo, inter na maaron Ama tayo so sankamundoan ya impanaagi ya ‘manliligliwa tan manpapabiskegan ed sakey tan sakey.’ (1 Tes. 5:11) Diad itutulong nen Jehova ed sika pian nagawaan moy asainmin mo, lalon ombiskeg so pananisiam ed sikato tan naapresyam ya saray pribilehyon naaawat mo et kayamanan a mas baleg ni nen say antokaman ya kayamanan ed mundo.

14. Akin et segurado si Moises a sikatoy tumangan na Dios?

¹⁴ Say ilalo nen Moises et ‘akateen ed pakaawat ed tumang.’ (Heb. 11:26) Anggano daiset labat so amta ton detalye ed nagawad arapen, saratan so angigiyad saray desisyon to. Singa ed laki ton si Abraham, matalek si Moises ya sarag ya paolien nen Jehova iray inaatey. (Luc. 20:37, 38; Heb. 11:17-19) Lapud inilaloan nen Moises so bendisyon ed arapen, agto inisip ya aperdi labat so 40 taon ya impanbilay to bilang takas tan say 40 taon tod kalawakan. Anggano agto amta so amin a detalye no panon ya nasumpal iray sipan na Dios, ontan la kabiskeg so pananisia to ya singa to la nanenengneng so tumang to.

15, 16. (a) Akin ya nepeg itayon akapokus ed tumang tayo? (b) Anton bendisyon na Panarian so labalabay mo lan naeksperiensya?

 ¹⁵ Kasin akateen met so ilalom ed ‘pakaawat moy tumang’? Singa si Moises, agtayo amtan amin so detalye no panon ya sumpalen na Dios iray sipan to. Singa bilang, ‘agtayo amta no kapigan so aturon panaon’ na baleg a kairapan. (Mar. 13:32, 33) Balet mas dakel ni amta tayo nipaakar ed Paraiso nen say si Moises. Anggano agtayo amtan amin so detalye, dakel so insipan na Dios ya nagawad uley na Panarian to, kanian malinlinew la itan ed nonot tayo. No malinew itan ed nonot tayo, napakiwas itayon anapen nin unona so Panarian. Panon? Isipen pa: Saliwen mo kasi sakey ya abung no anggapoy kaam-amtam ed satan? Siempre andi! Mipadpara, agtayo usaren so bilay tayo ed bengatlan agtayo segurado. Ontulong so pananisia pian mansiansian malinew ed nonot tayo so bilay ed uley na Panarian.

¹⁶ Pian malinlinew ed nonot mo so Panarian na Dios, nepeg ya ‘akateen so ilalom’ ed bilay mo diad Paraiso. Usar moy imahinasyon mo. Alimbawa, no aaralen mo so istorya na saray karakter ed Biblia ya napaoli ed Paraiso, isip mo no antoy labay mon itepet ed sikara. Imadyin mo no anto ray nayarin itepet dad sika nipaakar ed bilay mo legay kaunoran iran agew. Imadyin mo met so liket ya naliknam no nakabat mo ray baim tan lakim nen inmuunan panaon, tan bangatan mo ra nipaakar ed amin ya ginawa na Dios parad sikara. Tan isip mo pa labat so panliket mo no aaralen mo ray nanduruman ayayep legan mo ran oobserbaan ed mareen ya kaliberliber. Isip mo pa labat so iyapit mon maong ed si Jehova legan ya kalkalnan magmamaliw kan perpekto.

17. Antoy epektod sikatayo no malinew ed nonot tayo iray tumang ed arapen?

¹⁷ No malinew ed nonot tayo so tumang ed arapen, natulongan itayon mansungdo, mansiansian maliket, tan mandesisyon ya sankanonot so andi-anggaan. Insulat nen Pablo ed saray alanaan ya Kristiano: “No manilalo itayo ed agtayo nanenengneng, itultuloy tayon alagaren itan tekep na panagsungdo.” (Roma 8:25) Onaplika met itan ed amin ya Kristianon maniilalo ya manbilay na andi-angga diad dalin. Anggano agtayo ni naawat so tumang, mabiskeg so pananisia tayo kanian maanos tayon aalagaren. Singa si Moises, agtayo iisipen ya aperdi labat iray taon na impanlingkor tayod si Jehova. Imbes, kombinsido itayon “saray bengatlan nanengneng et temporaryo, balet saray bengatlan agnanengneng et andi-anggaan.”—Basaen so 2 Corinto 4:16-18.

18, 19. (a) Akin et kaukolan tayoy mansagpot pian mansiansian mabiskeg so pananisia tayo? (b) Antoy aralen tayod onsublay ya artikulo?

¹⁸ Lapud pananisia, natetebek tayo iray ‘makakombinsin ebidensya a tua iray bengatlan iilaloan ya agnanenengneng’ na literal a mata. (Heb. 11:1) Agnanenengneng na pisikal ya too so kaimportantian na panlingkor ed si Jehova. Parad ontan ya klase na too, saray espiritual ya kayamanan et “kakulangkulangan.” (1 Cor. 2:14) Balet sikatayo, iilaloan tayon nanengneng so bilay ya andi-anggaan tan natasian so kiolid bilay, ya agnanenengneng na totood mundo. Singa saramay de-aral nen panaon nen Pablo ya anawag ed sikaton “malabir,” iisipen na dakel ya totoo natan ya aliwan tua so ipupulong tayon ilalo.—Gawa 17:18.

¹⁹ Manbibilay tayo ed mundo ya andian na pananisia, kanian kaukolan tayoy mansagpot pian mansiansian mabiskeg so pananisia tayo. Ipikasim ed si Jehova ya “ag-onkapuy so pananisiam.” (Luc. 22:32) Pansiansiam ed nonot mo so makapuy ya epekto na pankasalanan, say kagalangan ya lingkoran si Jehova, tan say ilalon bilay ya andi-anggaan. Balet aliwan satan labat so anengneng nen Moises lapud pananisia to. Diad onsublay ya artikulo, aralen tayo no panon ya tinmulong ed si Moises so pananisia pian nanengneng to “imay Sakey ya agnanengneng.”—Heb. 11:27.