1, 2. (a) Moo tsɔɔ nɔ́ he je nɛ eko ɔ, o ma de ke Mose wami ya je oslaa mi ɔ. (Moo hyɛ foni nɛ ngɛ ni kasemi ɔ sisije ɔ.) (b) Mɛni he je nɛ Mose yi matsɛ ɔ mi mi fumi ɔ gbeye ɔ?

FARAO ji nɔ yelɔ ko nɛ e ngɛ he wami wawɛɛ nitsɛ, nɛ Egipt bi ɔmɛ jaa lɛ kaa mawu. Womi ko nɛ a tsɛɛ ke When Egypt Ruled the East ɔ tsɔɔ kaa ngɛ Egipt bi ɔmɛ a hɛ mi ɔ, Farao “le ní nɛ e ngɛ he wami pe nɔ tsuaa nɔ.” Akɛnɛ Farao suɔ kaa Egipt bi ɔmɛ nɛ a ye lɛ gbeye he je ɔ, e pee sinɔ nɛ pee klaalo kaa e maa kɔ nɔ he okadi ngɛ e matsɛ pɛɛ ɔ hɛ nya. Jamɛ a okadi ɔ tsɔɔ kaa matsɛ ɔ be e he nyɛli blɔ ngmɛe nɛ a hi je mi ligbi kake po. Ke jã a, lɛɛ benɛ Yehowa tsɔ Mose kɛ munyu nɛ nyɛɛ se nɛ ɔ, mo susu bɔ nɛ Mose maa pee e ní ha a he nɛ o hyɛ. Yehowa de lɛ ke: “Ma tsɔ mo Farao ngɔ nɛ o ya je ye ma, Israel bi ɔmɛ kɛ je Egipt.”—2 Mose 3:10.

² Mose ya Egipt nɛ e ya fiɛɛ Mawu sɛ gbi ɔ. Enɛ ɔ wo Farao mi mi la. Benɛ haomi kakaaka nɛɛ ba Egipt ma a nɔ ɔ, Farao bɔ Mose kɔkɔ ke: “Jee hiɛ ɔ nɛ o ho! Hyɛ nɛ e hi nɛ o ko ha nɛ ma na o hɛ mi ekohu. Ligbi nɛ o ma ba da ye hɛ mi ekohu ɔ, o ma gbo.” (2 Mose 10:28) Loko Mose maa je Farao hɛ mi ɔ, e gba fɔ si kaa Farao bitɛte ma gbo. (2 Mose 11:4-8) Nyagbe ɔ, Mose fã wekuhi  tsuo nɛ a ngɛ Israel ɔ kaa a gbe apletsi aloo jijɔ ku nɛ a ngɔ muɔ ɔ kɛ kpa a sinya tsohi a he. Lohwe nɛ ɔmɛ ngɛ klɔuklɔu kɛ ha Egipt bi ɔmɛ a mawu nɛ ji Ra a. (2 Mose 12:5-7) Kɛ Farao maa pee e ní ha kɛɛ? Mose yi gbeye. Mɛni he je? Akɛnɛ e ngɛ hemi kɛ yemi he je ɔ, “e yi matsɛ ɔ mi mi fumi ɔ gbeye. E kpale we e se, ejakaa Mawu nɛ e nɛ́ kɛ e hɛngmɛ ɔ, e pɛtɛ e he wawɛɛ kaa nɔ́ nɛ e ngɛ lɛ hyɛe pãa.”—Kane Hebri Bi 11:27, 28.

3. Mɛni he wa ma susu ngɛ hemi kɛ yemi nɛ Mose ngɛ ngɛ ‘Nɔ nɛ a nɛ lɛ kɛ hɛngmɛ ɔ’ mi ɔ he?

³ Anɛ o hemi kɛ yemi ɔ mi wa wawɛɛ nɛ lɔ ɔ ha nɛ o nyɛɔ ‘naa Mawu’ lo? (Mat. 5:8) Bɔ nɛ pee nɛ wa hemi kɛ yemi ɔ mi nɛ wa konɛ wa nyɛ nɛ waa na ‘Nɔ nɛ a nɛ lɛ kɛ hɛngmɛ ɔ,’ nyɛ ha nɛ wa susu Mose he nɛ waa hyɛ. Mɛni blɔ nɔ hemi kɛ yemi nɛ Mose ngɛ ngɛ Yehowa mi ɔ ha nɛ e yi nɔmlɔ hɛ mi gbeye ngɛ? Mɛni blɔ nɔ e gu kɛ ná hemi kɛ yemi ngɛ Mawu si womi ɔmɛ a mi? Mɛni blɔ nɔ nami nɛ Mose na ‘Nɔ nɛ a nɛ lɛ kɛ hɛngmɛ ɔ’ wo lɛ he wami benɛ e kɛ e we bi ɔmɛ a wami ya je oslaa mi ɔ?

4. Eko ɔ, nihi nɛ a be hemi kɛ yemi ɔ ma de ke, Mose ngɛ kaa mɛni ngɛ Farao hɛ mi?

⁴ Eko ɔ, nihi nɛ a be hemi kɛ yemi ɔ ma de ke, Mose ngɛ kaa tatu ngɛ Farao hɛ mi. Mose wami ngɛ Farao dɛ mi. Lɛ nitsɛ e de Yehowa ke: “Mɛnɔ ji mi nɛ ma ya Farao ngɔ, nɛ ma ya je Israel bi ɔmɛ kɛ je Egipt ɔ?” (2 Mose 3:11) Jeha 40 nɛ be ɔ, Mose tu fo kɛ je Egipt ya laa e he ngɛ he ko. Eko ɔ, e ma bi e he ke, ‘Anɛ nile ngɛ mi kaa ma kpale kɛ ho Egipt ya nɛ ma ya wo matsɛ ɔ mi mi la lo?’

5, 6. Mɛni ye bua Mose nɛ e ye Yehowa gbeye, se e yi Farao gbeye ɔ?

⁵ Loko Mose maa kpale e se kɛ ho Egipt ya a, Mawu tsɔɔ lɛ nɔ́ ko nɛ he hia. Pee se ɔ, Mose ngma nɔ́ nɛ ɔ ngɛ Hiob womi ɔ mi ke: ‘Yehowa gbeye yemi ɔ, lɔ ɔ ji nile.’ (Hiob 28:28) Mawu Ope ɔ ngɔ e he kɛ to adesahi a he konɛ Mose nɛ e ye lɛ gbeye konɛ e pee e ní ngɛ nile mi. E bi Mose ke: ‘Mɛnɔ nɛ haa nɔmlɔ tuɔ munyu, loo e tui munyu? Mɛnɔ nɛ haa nɔmlɔ hyɛɛ nɔ́, loo e hyɛ we nɔ́? Mɛnɔ nɛ haa nɔmlɔ nuɔ nɔ́, loo e nui nɔ́? Anɛ pi imi, Yehowa lo?’—2 Mose 4:11.

⁶ Mɛni Mose kase ngɛ munyu nɛ ɔ mi? Mose na kaa e sɛ nɛ e ye gbeye. Yehowa nɛ tsɔ lɛ. Yehowa ma ha lɛ nɔ́ tsuaa nɔ́ nɛ e hia konɛ e nyɛ nɛ e fiɛɛ sɛ gbi ɔ kɛ ha Farao. Farao pi nɔ ko kulaa ngɛ Yehowa hɛ mi. Pi be nɛ ɔ pɛ ji be nɛ Mawu we bi a yi fi ngɛ Egipt bi a nɔ yemi sisi. Yehowa po Abraham, Yosef, kɛ Mose a he piɛ ngɛ Faraohi nɛ a sɛ hlami ɔ a he. Eko ɔ, Mose susu enɛ ɔmɛ a he. (1 Mose 12:17-19; 41:14, 39-41; 2 Mose 1:22–2:10) Akɛnɛ Mose ngɛ hemi kɛ yemi ngɛ ‘Nɔ nɛ a nɛ lɛ kɛ hɛngmɛ ɔ’ mi he je ɔ, e ya da Farao hɛ mi nɛ e de lɛ nɔ́ tsuaa nɔ́ nɛ Yehowa tsɔ lɛ ke e ya de lɛ ɔ pɛpɛɛpɛ.

7. Mɛni blɔ nɔ hemi kɛ yemi nɛ nyɛmiyo ko ngɛ ngɛ Yehowa mi ɔ po e he piɛ ngɛ?

⁷ Jã nɔuu nɛ hemi kɛ yemi nɛ nyɛmiyo ko nɛ a tsɛɛ lɛ ke Ella ngɛ ngɛ Yehowa mi ɔ, ha nɛ e yi nɔmlɔ hɛ mi gbeye. Soviet polisihi nu Ella ngɛ jeha 1949 ɔ mi ngɛ Estonia. A je nɔ́ tsuaa nɔ́ ngɛ e he nɛ e hɛɛ e he gu. Lɔ ɔ se ɔ, polisi tsɔwi ɔmɛ muɔ a hɛngmɛ pue e nɔ nɛ a ngɛ lɛ hyɛe totooto. Ella de ke: “Zo gbe mi wawɛɛ. Se benɛ i sɔle ha Yehowa se ɔ, zo ɔ laa.” Lɔ ɔ se ɔ, a wo Ella tsu ligbi etɛ. E de ke: “Polisi ɔmɛ kpa ngmlaa nɛ a de ke: ‘Wa be hae nɛ a kai Yehowa biɛ ngɛ Estonia gblegbleegble! Wa maa wo mo tsu nɛ waa ngɔ ni nɛmɛ piɛ ɔ kɛ ho Siberia ya! A ye wa he fɛu nɛ a de hu ke, ‘Jije nyɛ Yehowa a ngɛ?’” Anɛ Ella maa ye nimli a hɛ mi gbeye aloo e kɛ e hɛ maa fɔ Yehowa nɔ? Benɛ nihi nɛ a ngɛ e he fɛu yee ɔ ta e nya mi ɔ, e kɛ kã de ke: “I susu sane nɛ ɔ he wawɛɛ momo, nɛ ma suɔ kaa nyɛɛ wo mi tsu mohu pe nɛ ma puɛ huɛ  bɔmi nɛ ngɛ i kɛ Mawu wa kpɛti ɔ nɛ nyɛ maa ngmɛɛ ye he.” E ngɛ kaa nɔ́ nɛ Ella kɛ e hɛngmɛ ngɛ Yehowa hyɛe pãa kaa bɔ nɛ e ngɛ nihi nɛ daa si ngɛ e hɛ mi ɔ hu hyɛe ɔ. Hemi kɛ yemi nɛ e ngɛ ɔ ha nɛ e ya nɔ nɛ e ye Mawu anɔkuale.

8, 9. (a) Mɛni ma ha nɛ wa be nɔmlɔ hɛ mi gbeye yee hu? (b) Ke nihi ngɛ wa he gbeye woe ɔ, e sɛ nɛ wa hɛ nɛ je mɛnɔ nɔ?

⁸ Ke o ngɛ hemi kɛ yemi ngɛ Yehowa mi ɔ, o be nɔ́ ko nɔ́ ko gbeye yee hu. Ke amlaalo nikɔtɔmahi bɔ mɔde kaa a ma ha nɛ o kpa Mawu jami ɔ, eko ɔ, e maa pee mo kaa o wami ngɛ a dɛ mi. Eko ɔ, o ma bi o he po ke: ‘Anɛ nile ngɛ mi kaa ma ya nɔ nɛ ma sɔmɔ Yehowa konɛ amlaalo nikɔtɔma amɛ a mi mi nɛ fu mi lo?’ Mo kai kaa ja wa ná hemi kɛ yemi ngɛ Mawu mi loko wa be nɔmlɔ hɛ mi gbeye yee hu. (Kane Abɛ 29:25.) Yehowa ngɛ bie ke: “Nɔmlɔ adesa nɛ gboɔ, nɛ e wami se kɛmi pi kaa nga nɔ́ po ɔ, mɛni he je o yeɔ lɛ gbeye?”—Yes. 51:12, 13.

⁹ O hɛ nɛ ko je o Tsɛ ope ɔ nɔ kɔkɔɔkɔ. E naa nihi nɛ e biɛ ɔ he je a waa mɛ yi mi ɔ, nɛ a ní peeɔ lɛ mɔbɔ, nɛ e yeɔ bua mɛ. (2 Mose 3:7-10) Ke e biɔ nɛ o fã o hemi kɛ yemi ɔ he ngɛ amlaalo nikɔtɔmahi a hɛ mi ɔ, ‘Koo hao o he ngɛ nɔ́ nɛ o ma de, kɛ bɔ nɛ o ma plɛ kɛ de lɛ ha a he. Ke be ɔ su ɔ, a maa tsɔɔ mo nɔ́ nɛ o ma de.’ (Mat. 10:18-20) Adesa nɔ yeli kɛ ma nikɔtɔma amɛ ngɛ kaa tatuhi ngɛ Yehowa hɛ mi. Ke o ha nɛ hemi kɛ yemi nɛ o ngɛ ngɛ Yehowa mi ɔ mi wa a, lɔ ɔ ma ha nɛ o maa na lɛ kaa Nɔ ko nɛ e ngɛ nitsɛnitsɛ, nɛ e suɔ kaa e ye bua mo.

10. (a) Mɛni Yehowa fã Israel bi ɔmɛ ke a pee ngɛ Nisan nyɔhiɔ ɔ nɔ, ngɛ jeha 1513 L.M.B. ɔ mi? (b) Mɛni he je nɛ Mose bu Mawu fami nɛ ɔ tue ɔ?

¹⁰ Ngɛ Nisan nyɔhiɔ ɔ nɔ ngɛ jeha 1513 loko a fɔ Kristo ɔ mi ɔ, Yehowa fã Mose kɛ Aaron konɛ a de Israel bi ɔmɛ nɛ a pee nɔ́ ko. E de mɛ ke a gbe jijɔ ku aloo apletsi nɛ a ngɔ muɔ ɔ kɛ kpa a sinya tsohi a he. (2 Mose 12:3-7) Kɛ Mose pee e ní ha kɛɛ? Pee se ɔ, bɔfo Paulo ngma ke: “Hemi kɛ yemi lɛ Mose kɛ to Hetsɔmi ɔ sisi, nɛ e fã Israel bi ɔmɛ ke a ngɔ muɔ kɛ fia a sinya tso ɔmɛ a he, bɔ nɛ pee nɛ bɔfo nɛ kpataa nɔ hɛ mi ɔ ko ba gbe Israel bi ɔmɛ a bitɛte ɔmɛ.” (Heb. 11:28) Mose le kaa Yehowa yeɔ anɔkuale. E ngɛ hemi kɛ yemi kaa si nɛ Yehowa wo kaa e ma kpata Egipt bi ɔmɛ a bitɛtehi a hɛ mi ɔ maa ba mi.

11. Mɛni he je nɛ Mose ngɔ Yehowa sɛ gbi ɔ ya ha Israel bi ɔmɛ ɔ?

¹¹ E ngɛ heii kaa jamɛ a be ɔ mi ɔ, Mose nitsɛ e binyumu ɔmɛ ngɛ Midian. A be Egipt, he nɛ “bɔfo nɛ kpataa nɔ hɛ mi” ɔ ma tsu ní ngɛ ɔ. (2 Mose 18:1-6) Se e bu Mawu tue nɛ e kɛ Mawu sɛ gbi ɔ ha Israel bi kpa amɛ nɛ a bitɛtehi a wami ya je oslaa mi ɔ. Baiblo ɔ de ke: ‘Mose tsɛ Israel ma nimeli ɔmɛ tsuo kpe, nɛ e de mɛ ke, “Nyɛ ya hla jijɔhi nɛ nyɛɛ gbe kɛ ha Hetsɔmi ɔ yemi.”’—2 Mose 12:21.

12. Mɛni sɛ gbi nɛ he hia nɛ Yehowa fã wɔ kaa waa fiɛɛ?

¹² Bɔfohi yeɔ bua Yehowa we bi nɛ a fiɛɛɔ munyu nɛ he hia nɛ nyɛɛ se nɛ ɔ: “Nyɛɛ ye Mawu gbeye, nɛ nyɛɛ wo e hɛ mi nyami! Ejakaa be ɔ su nɛ e maa kojo nihi tsuo nɛ ngɛ je ɔ mi. Nyɛ ja nɔ nɛ pee hiɔwe kɛ zugba, kɛ wo kɛ nyu hɛngmɛhi nɛ baa a!” (Kpoj. 14:7) Amlɔ nɛ ɔ ji be nɛ e sa kaa waa fiɛɛ munyu nɛ ɔ. E sa nɛ waa bɔ wa kpɔ mi bimɛ kɔkɔ nɛ a je Babilon Ngua a mi, konɛ ‘haomi nɛ maa ba e nɔ ɔ, ko ba mɛ hu a nɔ!’ (Kpoj. 18:4) “To kpa” amɛ piɛɛ Kristofohi nɛ a pɔ mɛ nu ɔ a he kɛ ngɛ nihi nɛ a je a he kɛ je Mawu he ɔ pɛɛ kpae konɛ ‘a dla a kɛ Mawu a kpɛti.’—Yoh. 10:16; 2 Kor. 5:20.

13. Mɛni ha nɛ waa fiɛɛɔ sane kpakpa a kɛ tsɔɔ nihi ɔ?

¹³ Wa ngɛ nɔ mi mami kaa ‘be ɔ su nɛ  Mawu maa kojo nihi tsuo nɛ ngɛ je ɔ mi ɔ.’ Wa ngɛ nɔ mi mami hu kaa ke Yehowa ke wa fiɛɛmi ní tsumi ɔ he hia a, pi fiɛmi nɛ e ngɛ fiɛe, se hɛdɔ munyu e ngɛ tue ɔ nɛ. Mawu je nina ko kɛ tsɔɔ bɔfo Yohane nɛ e “na Mawu bɔfohi eywiɛ nɛ a daa si ngɛ je ɔ kɔ nya eywiɛ ɔmɛ. A tsi kɔɔhiɔ eywiɛ ɔmɛ a nya, konɛ kɔɔhiɔ ko fia ngɛ zugba a nɔ, loo ngɛ wo nɔ, loo kɛ muɔ tso ko.” (Kpoj. 7:1) Anɛ hemi kɛ yemi nɛ o ngɛ ɔ ha nɛ mo hu o na bɔfohi nɛ a pee klaalo kaa a kɛ kɔɔhiɔ ma kpata je ɔ hɛ mi ngɛ amanehlu ngua a mi ɔ lo? Ke hemi kɛ yemi nɛ o ngɛ ɔ ha nɛ o na bɔfo nɛ ɔmɛ ɔ, lɔ ɔ ma ha nɛ o kɛ kã maa fiɛɛ sane kpakpa a kɛ tsɔɔ nihi.

14. Mɛni woɔ wɔ he wami nɛ wa ‘bɔɔ yayami peelɔ kɔkɔ konɛ e tsake’ ɔ?

¹⁴ Huɛ bɔmi kpakpa ngɛ Kristofohi kɛ Yehowa a kpɛti momo. A ngɛ hɛ nɔ kami hu momo kaa a ma nyɛ maa hi si kɛ ya neneene. Se wa le kaa e ji wa ní tsumi kaa wa maa ‘bɔ yayami peelɔ kɔkɔ konɛ e tsake nɛ a he e yi wami.’ (Kane Ezekiel 3:17-19.) Ngɛ anɔkuale mi ɔ, pi nihi a muɔ he fɔ nɛ wa sume kaa wa maa ye ɔ he je kɛkɛ nɛ wa fiɛɛɔ ngɛ. Wa fiɛɛɔ ejakaa wa suɔ Yehowa kɛ wa nyɛmi nɔmlɔ. Yesu tsɔɔ nɔ́ nɛ suɔmi kɛ mɔbɔ nami tsɔɔ tutuutu ngɛ e nɔ́ hetomi nɔ́ nɛ kɔɔ Samaria no ɔ he ɔ mi. Wa ma nyɛ ma bi wa he ke, ‘Anɛ i ngɛ kaa Samaria no ɔ nɛ i naa nihi “mɔbɔ,” nɛ i yeɔ mɛ odase lo?’ Wa ti nɔ ko be nɛ e suɔ kaa e maa pee e ní kaa osɔfo ɔ kɛ Levi no ɔ nɛ a tu a he munyu ngɛ nɔ́ hetomi nɔ́ ɔ mi ɔ. A ngɔ níhi kɛ je a nya nɛ ‘a tsɔ nɔ ɔ he kɛ be.’ (Luka 10:25-37) Ke wa ngɛ hemi kɛ yemi ngɛ Mawu si womi ɔmɛ a mi nɛ wa suɔ wa nyɛmi nɔmlɔ ɔ, lɔ ɔ maa wo wɔ he wami nɛ wa maa fiɛɛ kɛ ha nihi loko be nɛ be.

15. Mɛni he je nɛ Israel bi ɔmɛ susu kaa a yi fi ɔ?

¹⁵ Benɛ Israel bi ɔmɛ je Egipt nɛ a wami ya je oslaa mi ɔ, hemi kɛ yemi nɛ Mose ngɛ ngɛ ‘Nɔ nɛ a nɛ lɛ kɛ hɛngmɛ ɔ’ mi ɔ ye bua lɛ. Baiblo ɔ de ke: ‘Benɛ Farao ná mɛ ta, nɛ Israel bi ɔmɛ wo a hɛ nɔ nɛ a na kaa Egipt bi ɔmɛ nyɛɛ a se kɛ ma a, sawale nu mɛ, nɛ a kpa bubuubui kɛ tsɛ Yehowa.’ (2 Mose 14:10-12) Anɛ e sɛ kaa Israel bi ɔmɛ nɛ a hyɛ blɔ kaa Farao maa nyɛɛ a se lo? E sa kaa a hyɛ blɔ, ejakaa Yehowa gba kɛ fɔ si nɛ e de ke: ‘Ma kplii Farao tsui, nɛ e maa fie a se. Nɛ manye nɛ ma ye ngɛ Farao kɛ e ta a tsuo a nɔ ɔ ma ha ye hɛ mi maa ba nyami. Jamɛ a be ɔ, Egipt bi ɔmɛ maa le kaa imi ji Yehowa.’ (2 Mose 14:4) Se ngɛ enɛ ɔ tsuo se ɔ, Israel bi ɔmɛ nɛ Yehowa, mohu ɔ, Wo Tsu ɔ nɛ ngɛ a hɛ mi, kɛ Farao ta zugba lɛhi nɛ a hɛɛ fo kɛ ma a, kɛ nɔmoyo to hyɛlɔ ɔ nɛ e ye jeha 80 nɛ nyɛɛ a hɛ mi ɔ pɛ nɛ a na. A susu kaa a yi fi.

16. Ngɛ mɛni blɔ nɔ hemi kɛ yemi wo Mose he wami ngɛ Wo Tsu ɔ nya?

¹⁶ Se Mose yi gbeye. Mɛni he je? Ejakaa e ngɛ hemi kɛ yemi. Enɛ ɔ he ɔ, e na nɔ́ ko nɛ e ngɛ he wami kulaa pee wo ɔ kɛ ta buli ɔmɛ. E nyɛ nɛ e ‘na bɔ nɛ Yehowa maa pee kɛ he a yi wami ha’ a. E le kaa Yehowa maa hwu ha Israel bi ɔmɛ. (Kane 2 Mose 14:13, 14.) Mose hemi kɛ yemi ɔ wo Mawu we bi ɔmɛ he wami. Baiblo ɔ de ke: “Hemi kɛ yemi lɛ ha Israel ma a po Wo Tsu ɔ kaa nɔ́ nɛ zugba gbigbli nɔ nɛ a ngɛ nyɛɛe. Se benɛ Egipt bi ɔmɛ ka kaa mɛ hu a maa pee jã a, a tlɔ wo ɔ mi, nɛ a gbo.” (Heb. 11:29) Lɔ ɔ se ɔ, ‘benɛ Israel bi ɔmɛ na he wami nguaa nɛ Yehowa kɛ ye Egipt bi ɔmɛ a nɔ ɔ, a ye lɛ gbeye, nɛ a he lɛ, kɛ e tsɔlɔ Mose ɔ ye.’—2 Mose 14:31.

17. Hwɔɔ se ɔ, mɛni maa ba nɛ maa ka wa hemi kɛ yemi ɔ?

¹⁷ E be kɛe kulaa nɛ wɔ hu wa wami ma ya je oslaa mi. Loko Harmagedon ta a maa je sisi ɔ, nɔ yeli nɛ a ngɛ je ɔ mi ɔ ma kpata jami nguanguahi nɛ a kle nɛ a he hiɛ pe wɔ ɔ a hɛ mi kulaa. (Kpoj. 17:16) Yehowa tsɔɔ ngɛ gbami ɔ mi kaa wa maa pee kaa ma nɛ ‘gbogbo be he, nɛ agbo se lami dade ko hu be.’ (Eze. 38:10-12, 14-16) Ke wa be hemi kɛ yemi ɔ, e maa pee wɔ kaa a maa tane wa yi. Kɛ o maa pee o ní ha kɛɛ?

18. Moo tsɔɔ nɔ́ he je nɛ wa ma nyɛ ma fi si ngɛ amanehlu ngua a mi ɔ.

¹⁸ E he hia we nɛ waa ye gbeye. Mɛni he je? Ejakaa Yehowa gba kɛ fɔ si kaa nihi ma tua e we bi. E tsɔɔ bɔ nɛ tuami nɛ ɔ maa ba nyagbe ha. ‘Nyɔmtsɛ Yehowa ke, “Ligbi ɔ nɛ Gog ma ba tua Israel ɔ, ye mi mi ma fu wawɛɛ. I kɛ hunga, kɛ hɛdɔ nɛ maa tu munyu.”’ (Eze. 38:18-23) Kɛkɛ ɔ, Mawu ma kpata nihi tsuo nɛ a suɔ kaa a maa ye e we bi awi ɔ a hɛ mi. Ke o ngɛ hemi kɛ yemi kaa Yehowa maa po o he piɛ ngɛ ‘e ligbi nguaa nɛ ngɛ gbeye’ ɔ nɔ ɔ, o ma nyɛ maa ‘na bɔ nɛ Yehowa maa pee kɛ he o yi wami’ ha. Enɛ ɔ maa wo mo he wami.—Yoel 2:31, 32.

19. (a) Kɛ huɛ bɔmi nɛ hi Mose kɛ Yehowa a kpɛti ɔ hi kɛɛ? (b) Ke o kaiɔ Yehowa ngɛ nɔ́ tsuaa nɔ́ mi ɔ, mɛni jɔɔmi o ma ná?

¹⁹ Mo dla o he amlɔ nɛ ɔ kɛ to jamɛ a ligbi ɔ konɛ o ya nɔ nɛ o na ‘Nɔ nɛ a nɛ lɛ kɛ hɛngmɛ ɔ pãa’! Moo kase Baiblo ɔ nɛ o sɔle daa konɛ huɛ bɔmi nɛ ngɛ o kɛ Yehowa Mawu nyɛ kpɛti ɔ mi nɛ wa. Huɛ bɔmi gbagbanii hi Mose kɛ Yehowa a kpɛti nɛ Yehowa kɛ lɛ tsu ní wawɛɛ nitsɛ. Baiblo ɔ tsɔɔ kaa Yehowa le Mose “hɛ mi kɛ hɛ mi.” (5 Mose 34:10) Gbalɔ ko hi si hyɛ nɛ e kɛ Mose sɔ. Se ke mo hu o ngɛ hemi kɛ yemi ɔ, huɛ bɔmi gbagbanii maa hi o kɛ Yehowa nyɛ kpɛti, nɛ e maa pee kaa nɔ́ nɛ o ngɛ lɛ hyɛe pãa. Ke o ‘kaiɔ Yehowa ngɛ nɔ́ tsuaa nɔ́ mi’ kaa bɔ nɛ Baiblo ɔ woɔ mo he wami kaa o pee ɔ, “e maa tsɔɔ mo blɔ nɛ da.”—Abɛ 3:6.