1, 2. a) ¿Mbaʼérepa haʼetévaicha Moisés oĩ hague peteĩ situasión ipeligrósovape? (Ehecha pe taʼanga oĩva iñepyrũme.) b) ¿Mbaʼérepa Moisés ndokyhyjéi faraóngui?

FARAÓN haʼe vaʼekue peteĩ governánte orekóva tuicha autorida. Umi ehípsio heʼi voi hese haʼeha peteĩ diós. Peteĩ lívro omombeʼu chupekuéra g̃uarã “ndaiporiha iñaranduve ha ipoderosovéva chugui” (When Egypt Ruled the East [Cuando Egipto gobernaba el Este]). Faraón oiporu vaʼekue peteĩ koróna orekóva peteĩ kóvra raʼanga oĩva oporosuʼu hag̃uáicha. Upéicha omongyhyje opavave oĩvape ipoguýpe, ha oavisa porã iñenemigokuérape pyaʼe ojejukataha oñemoĩramo hese. Ñapensamíntena mbaʼéichapa Moisés oñeñandúne raʼe Jehová heʼírõ guare chupe: “Romondóta faraón rendápe, ha renohẽta Egipto poguýgui che puévlope, Israel raʼykuérape” (Éx. 3:10, NM).

² Moisés oho Egíptope ha omeʼẽ Ñandejára mensáhe. Faraón katu ipochyeterei upévare. Jehová ombou rire nueve plága upe tetãme, faraón heʼi Moiséspe: “Tereho koʼágui ha anive reju. ¡Cháke rohecha jeýramo remanóta!” (Éx. 10:28). Oho mboyve upégui, Moisés oprofetisa faraón raʼy ypykue omanotaha (Éx. 11:4-8). Upe rire Moisés omanda entéro família isrraelítape ojuka hag̃ua peteĩ  kavara térã peteĩ ovecha mácho ha ohypýi hag̃ua huguykuépe hokẽ márko. Hiʼarive pe ovecha mácho sagrádo vaʼekue umi ehípsiope g̃uarã oadora rupi diós Rápe (Éx. 12:5-7). Péro Moisés ni michĩmi ndokyhyjéi faraóngui. La Biblia heʼi haʼe ojerovia hague Jehováre ha iñeʼẽrendu chupe, upéicha rupi “pe rréi ipochýramo jepe, [Moisés] ndokyhyjéi chugui. Haʼe osegi vaʼekue ojerovia mbarete ohecharamoguáicha Upe ikatuʼỹvape jahecha” (elee Hebreos 11:27, 28).

3. ¿Mbaʼe porandúpa ñahesaʼỹijóta ko artíkulope?

³ ¿Jajeroviápa avei Ñandejárare ‘jahecharamoguáicha’ chupe? (Mat. 5:8.) Ñahesaʼỹijomína koʼág̃a Moisés ehémplo ikatu hag̃uáicha ñamombareteve ñande jerovia ha jahecha avei “Upe ikatuʼỹvape jahecha”. ¿Mbaʼéichapa ijerovia oipytyvõ chupe ani hag̃ua okyhyje yvypóragui? ¿Mbaʼéichapa ohechauka ojeroviaha Ñandejára promesakuérare? Moisés oiko vaʼekue ohecharõguáicha “Upe ikatuʼỹvape jahecha”, ¿mbaʼéichapa upéva oipytyvõ chupe ojecha vaírõ guare haʼe ha Jehová puévlo?

4. ¿Mbaʼépa opensáne raʼe umi hénte Moisés rehe?

⁴ Entéronte opensáne raʼe Moisés ndahaʼeiha mbaʼevete asy faraón rovake, ha oĩha pe governánte omanda guasúva pópe. Ha Moisés voi oporandu vaʼekue Jehovápe: “¿Che piko máva aha hag̃ua faraón rendápe ha anohẽ Egíptogui Israel raʼykuérape?” (Éx. 3:11, NM). Hiʼarive ojapo kuri 40 áñorupi haʼe osẽ hague Egíptogui. Oiméne opensa raʼe: “¿Mbaʼéicha piko che aha jeýta Egíptope? Pe rréi ningo ipochyetereíta ha che katu ajapeligráta upérupi”.

5, 6. ¿Mbaʼépa oipytyvõ Moiséspe ani hag̃ua okyhyje faraóngui, síno Jehovágui?

⁵ Moisés oho jey mboyve Egíptope, Ñandejára omboʼe chupe peteĩ mbaʼe iñimportantetereíva, ha upe rire Moisés oskrivi upéva lívro de Jóbpe: “Upe okyhyjéva [Jehovágui] iñarandu” (Job 28:28, ÑÑB). Ikatu hag̃uáicha Moisés iñarandu ha okyhyje Ñandejáragui, Jehová ohechauka chupe mbaʼeichaitépa haʼe, pe Ñandejára ipuʼakapáva, idiferénte umi yvypóragui. Jehová oporandu chupe: “¿Mávapa omeʼẽ yvypórape ijuru? ¿Máva ojapo upe iñeʼẽngúva, upe ohenduʼỹva, upe ohechaʼỹva térã ohechávape? ¿Ndachéipa hína, pende Jára?” (Éx. 4:11).

⁶ ¿Mbaʼépa Jehová omboʼese Moiséspe? Haʼe ndokyhyjéi vaʼerãha. Ndahaʼéi ningo peteĩ yvypóra reínte pe ojokuáiva chupe, síno Ñandejára voi, ha haʼe omeʼẽta chupe opa mbaʼe oikotevẽva omog̃uahẽ hag̃ua faraónpe pe mensáhe. Ha amo ipahápe faraón ndahaʼeiete mbaʼeve Jehová rovake. Hiʼarive heta vésema Ñandejára puévlo ojapeligra umi ehípsio poguýpe. Ha oime vaʼerã katuete Moisés opensa mbaʼéichapa Jehová oprotehéma kuri Abrahánpe, Josépe, ha chupe voi umi ótro faraóngui (Gén. 12:17-19; 41:14, 39-41; Éx. 1:22–2:10). Moisés ohecha vaʼekue “Upe ikatuʼỹvape jahecha”, upévare ipyʼaguasu, oho faraón rendápe ha heʼipaite chupe Jehová mensáhe.

7. ¿Mbaʼéichapa oprotehe peteĩ ermánape ijerovia?

⁷ Peteĩ ermána hérava Ella ojerovia Jehováre ha upéva oipytyvõ chupe ani hag̃ua okyhyje yvypóragui. Áño 1949-pe, pe KGB omoinge préso ko ermánape ha omboipa chupe, ha umi polisía imitãvéva katu omaña tieʼỹ hese. Haʼe heʼi: “Atĩeterei ha añeñandu vai, péro añemboʼe Jehovápe ha tuicha chepyʼaguapy”. Upe rire oñemoĩ chupe kalavósope tres díare. Haʼe omombeʼu: “Umi polisía osapukái chéve: ‘¡Estóniape avave ni naimanduʼamoʼãi pe téra Jehováre! ¡Nde rehóta peteĩ kámpo de konsentrasiónpe ha umi ótro ohóta Sibériape!’. Upe rire oñembohory cherehe hikuái ha heʼi: ‘¿Moõ piko oĩ la nde Jehová?’”. ¿Mbaʼépa ojapo ko ermána? ¿Ojeroviápa Jehováre térãpa  okyhyje yvypóragui? Umi oñembohorýva hese oñepyrũrõ guare ombaʼeporandu chupe, ko ermána pyʼaguasúpe ombohovái: “Hetáma apensa ha nambopochymoʼãi Ñandejárape, tapyta jepe raʼe taiko ko kárselpe”. Ella oiko ohecharõguáicha Jehovápe, ha iñeʼẽrendu ojerovia rupi hese.

8, 9. a) ¿Mbaʼépa ñanepytyvõta ñandepyʼaguasu hag̃ua? b) ¿Mávarepa ñapensa vaʼerã oiméramo jakyhyje yvypóragui?

⁸ Jajeroviáramo Jehováre ndajakyhyjemoʼãi avavégui. Sapyʼánte oĩ mburuvicha ñandejokoséva ani hag̃ua jaservi Jehovápe. Upéicha jave, haʼetévaicha ku ñaiméva ipopekuéra ha ikatu voi ñañeporandu: “¿Oĩ porãta piko asegi aservi Jehovápe ambopochýtaramo jepe umi autoridápe?”. Ani ñanderesarái jajeroviáramo Jehováre ñandepyʼaguasutaha (elee Proverbios 29:25). Jehová oporandu: “¿Mbaʼére piko rekyhyjéta peteĩ yvypóra omanótavagui, térã peteĩ yvypóra raʼýgui koʼẽrõite ipirútava ku plánta hovyũvaicha?” (Is. 51:12, 13, NM).

⁹ Ñapensamíntena ñande Ru Ipuʼakapávare. Haʼe ningo ohecha mbaʼéichapa ohasa asy opavave oĩva umi mburuvicha hekojojaʼỹva poguýpe. Jehová oiporiahuvereko ha oipytyvõ chupekuéra (Éx. 3:7-10). Ha tekotevẽtarõ ñadefende ñande jerovia umi autorida renondépe, ñanemanduʼa vaʼerã Jesús heʼi vaʼekuére: “Ani pejepyʼapy ndapeikuaáirõ g̃uarã mbaʼépa pejéta térã mbaʼéichapa peñeʼẽta. Upévo ojekuaaukáta voi peẽme mbaʼépa peje vaʼerã” (Mat. 10:18-20). Ndaipóri ningo ni peteĩ mburuvicha yvypóra ipuʼaka vaʼerã Jehováre. Koʼág̃a ñamombaretérõ ñande jerovia, jaikóta jahecharamoguáicha Jehovápe ha ñañandúta haʼe ñanepytyvõseha.

10. a) ¿Mbaʼépa Jehová omanda umi isrraelítape mes de nisán áño 1513-pe a.C? b) ¿Mbaʼérepa Moisés osegi Jehová mandáto?

¹⁰ Áño 1513-pe a.C, mes de nisánpe, Jehová omanda Moisés ha Aarónpe omeʼẽ hag̃ua peteĩ mensáhe umi isrraelítape. Heʼi vaʼerã chupekuéra oiporavo hag̃ua peteĩ ovecha mácho térã kavara hesãiva, ha upéi ojuka ha ohypýi vaʼerãha huguykuépe hokẽ márko (Éx. 12:3-7). Upe rire apóstol Pablo heʼi Moisés rehe: “Ojerovia rupi, haʼe omboarete pe Páskua, ha ohypýi tuguýpe umi okẽ márko ani hag̃ua Ñandejára ánhel ojuka umi taʼýra ypykuépe” (Heb. 11:28). Moisés oikuaa porã Jehová okumpliha oprometéva, upévare ojerovia ojukataha umi ehípsio raʼy ypykuépe.

11. ¿Mbaʼérepa Moisés omeʼẽ Jehová mensáhe umi isrraelítape?

¹¹ Amalisia upérõ Moisés raʼykuéra oĩ kuri Madiánpe ha upéicha rupi ndojapeligrái hikuái (Éx. 18:1-6). Péro haʼe ohayhu rupi hapichakuérape, omeʼẽ umi isrraelítape Jehová mensáhe ikatu hag̃uáicha ojesalva Ñandejára ánhelgui umi taʼýra ypykue. Haʼekuéra ndojapóiramo ojeʼéva chupekuéra ikatu kuri omano. La Biblia heʼi: “Moisés ohenoika opaite Israel ansianokuérape ha heʼi chupekuéra: ‘Peguenohẽ [...] ha pejuka pe ovecharaʼy pe Paskuarã’” (Éx. 12:21, NM).

12. ¿Mbaʼe mensáhepa Jehová oipota ñamombeʼu?

¹² Koʼág̃a, umi ánhel ogia Jehová puévlope omeʼẽ hag̃ua opavavépe ko mensáhe iñimportánteva: “Pekyhyje Ñandejáragui ha pembotuicha chupe, cháke og̃uahẽma pe óra haʼe oporohusga hag̃ua. Upévare, pemombaʼeguasúke Ñandejárape, upe ojapo vaʼekue yvága, yvy, mar ha yvukuéra” (Apoc. 14:7). Koʼág̃a tekotevẽterei ñameʼẽ upe mensáhe. Ñamombeʼu vaʼerã la héntepe osẽ vaʼerãha Babilonia Guasúgui ‘ndoipotáiramo ohupyty chupekuéra umi mbaʼe vai oikótava hese’ (Apoc. 18:4). Umi kristiáno unhído ha avei “ambue ovechakuéra” heʼi entéro oĩvape mombyry Ñandejáragui: “Peiko porã jeýna Ñandejára ndive” (Juan 10:16; 2 Cor. 5:20).

13. ¿Mbaʼépa ñanemokyreʼỹvéta japredika meme hag̃ua pe marandu porã?

 ¹³ Ñande jaikuaáma og̃uahẽmaha “pe óra [Jehová] oporohusga hag̃ua”. Avei jaikuaa porã ndareíri Jehová oipotaha japredika meme ha ñaipytyvõ ñande rapichápe oiko hag̃ua chugui disípulo. Apóstol Juan ohecha peteĩ visiónpe “cuatro ánhel oñemboʼýva umi cuatro eskínape oĩva ko yvy ári” (Apoc. 7:1). ¿Jaikópa jahecharõguáicha umi cuatro ánhel oĩva opoi hag̃uáicha umi yvytu ohundítava ko múndo pe jehasa asy guasúpe? Jajerovia mbaretéramo Jehová promesakuérare ñanekyreʼỹta japredika meme hag̃ua pe marandu porã.

14. ¿Mbaʼépa ñanepytyvõ ikatu hag̃uáicha ñamokyreʼỹ ñande rapichápe “opoi hag̃ua hembiapo vaígui”?

¹⁴ Ñande jaservímava Jehovápe jaikóma iñamígoramo ha jareko esperánsa jaikovévo opa árare. Upéicharõ jepe, jaikuaa porã tekotevẽha jaʼe ñande rapichápe “opoi hag̃ua hembiapo vaígui ha oikove hag̃ua” (elee Ezequiel 3:17-19). Añetehápe ningo ñande ndajapredikái jajesalvaséguinte, síno jahayhúgui Jehovápe ha ñande rapichápe. Jesús omombeʼúrõ guare pe ehémplo oñeʼẽva pe samaritáno ipyʼaporãvare, ohechauka mbaʼeichaitépa iñimportánte japorohayhu ha japoroporiahuvereko. Ikatu ñañeporandu: “¿Aiporiahuverekópa umi héntepe, ojapo haguéicha pe samaritáno? ¿Chemomýipa upéva apredika hag̃ua?”. Ndajajoguaséi ningo pe saserdótepe ni pe levítape, oñembotavy guaʼúnteva ha “ohasa pe ótro ládo” (Luc. 10:25-37). Jajeroviáramo Ñandejára promesakuérare ha jahayhu ñande rapichápe, ñanekyreʼỹta japredika hag̃ua opa  ikatuháicha og̃uahẽ mboyve pe ára pahaite.

15. ¿Mbaʼérepa umi isrraelíta opensa ndojesalvamoʼãiha?

¹⁵ Moisés ojerovia ‘Upe ikatuʼỹvare jahecha’, upéicha rupi oipytyvõ kuri umi isrraelítape ojejopy vaírõ guare osẽ rire Egíptogui. La Biblia omombeʼu: “Israel ñemoñarekuéra ojesaupi, ha ohechávo umi ehípsio ouha hapykuerikuéra, okyhyjeterei hikuái ha ojerure Jehovápe oipytyvõmínte hag̃ua chupekuéra” (Éx. 14:10-12, NM). Péro upéva ningo nomondýi vaʼerã kuri chupekuéra, Jehová voi heʼi rupi: “Ahejáta faraón oñembopyʼahatã ha penemuña. Che katu ahechaukáta che rekomimbipa opavavépe faraón ha ijehérsito rupive, ha toikuaa umi ehípsio che haʼeha Jehová” (Éx. 14:4, NM). Péro umi isrraelíta ojesareko umi mbaʼe ohechávarente. Henonderãkuéra oĩ pe mar Rojo ikatuʼỹva ojehasa, ha hapykuerikuéra faraón ehérsito ikarrokuéra reheve. Hiʼarive omoakã chupekuéra peteĩ ovecharerekuamínte orekóva 80 áño. Umi isrraelíta opensáma ndojesalvamoʼãiha.

16. ¿Mbaʼéichapa Moisés jerovia omombarete chupe ohasárõ guare hikuái pe mar Rojo?

¹⁶ Péro Moisés ndokyhyjéi. Haʼe ohecháramo jepe pe mar ha pe ehérsito, ohecha avei “Ñandejára ojapótava”, ha oikuaa porã haʼe oñorairõtaha osalva hag̃ua chupekuéra (elee Éxodo 14:13, 14). Ha ijerovia omokyreʼỹ avei pe puévlope. La Biblia heʼi: “Ojerovia rupi haʼekuéra ohasa pe mar Rojo yvy isekohárupi, péro umi ehípsio ojaposérõ guare upéva, ojahogapa hikuái” (Heb. 11:29). Upémarõ “pe puévlo oñepyrũ okyhyje Jehovágui ha ojerovia Jehováre ha hembiguái Moisés rehe” (Éx. 14:31, NM).

17. ¿Mbaʼéichapa koʼẽrõite jahechaukáta añetehápepa jajerovia?

¹⁷ Koʼẽrõitéma, oñemohuʼãvo pe jehasa asy guasu haʼetéta avei ndajarekomoʼãiva salída. ¿Mbaʼérepa jaʼe upéva? Upe tiémpope g̃uarã, umi goviérno ohundipátama entéro umi rrelihión tuichavéva ha opyrũ hatãvéva ñandehegui (Apoc. 17:16). Peteĩ profesíape Jehová ombojoja ñane situasión peteĩ “táva imurallaʼỹva rehe”, ndojeprotehéiva ni ndorekóiva “tránka ni okẽ” (Ezeq. 38:10-12, 14-16, NM). Umi ojeroviaʼỹva oimoʼãta ndajajesalvamoʼãiha. ¿Mbaʼépa jajapóta upérõ?

18. ¿Mbaʼérepa ndajakyhyjéi vaʼerã pe jehasa asy guasu aja?

¹⁸ Jehová ningo heʼíma ojeatakataha ipuévlope, péro upéicha avei opromete ñandeprotehetaha, upévare reiete jakyhyjéta. “Ñandejára Jehová heʼi: ‘Upe árape, Gog ou vove Israel retã ári, che chepochy rendýta. Ha chepochyeterei rupi añeʼẽta’”. (Ezeq. 38:18-23, NM.) Enterove operhudikaséva Jehová puévlope, katuete oñehundíta. Haʼe oñangarekóta ñanderehe pe ‘ára guasuete oporomongyhyjetévape’. Jajeroviákena hese ikatu hag̃uáicha jahechakuaa umi mbaʼe “Ñandejára ojapótava” ñandesalva hag̃ua ha avei akóinte ñaneñeʼẽrendu hag̃ua chupe (Joel 2:31, 32).

19. a) ¿Mbaʼéichapa oĩ vaʼekue Moisés Jehová renondépe? b) ¿Mbaʼéichapa ñanepytyvõta ñanemanduʼáramo Jehováre opa mbaʼe jajapóvape?

¹⁹ Koʼẽrõitéma oikóta umi mbaʼe tuicháva. Upévare, jaikókena akóinte jahecharamoguáicha “Upe ikatuʼỹvape jahecha”. Jastudia ha ñañemboʼe memékena ikatu hag̃uáicha ñañemoag̃ui ag̃uive Jehováre. Moisés ningo Jehová amigoite vaʼekue, ha Haʼe oiporu chupe heta hendáicha okumpli hag̃ua hembipota. Upévare la Biblia heʼi Jehová ‘oikuaa porãitereiha Moiséspe’ (Deut. 34:10, NM). Moisés ojapo haguéicha, jajeroviáramo Jehováre ñañemoag̃uivéta hese ha jaikóta jahecharamoguáicha chupe. Ñanemanduʼáke hese ‘opa mbaʼe jajapóvape’, ha heʼiháicha la Biblia ‘haʼe omyesakãta ñandéve ñande rape’ (Prov. 3:6, NM).