1, 2. (a) Lumbululenu chitukuhoshela netu wumi waMosi wadiña hakatoña. (Talenu mwevulu wakutachikilahu.) (b) Muloñadi Mosi chabulililiyi kutiya woma wandombu yamwanta?

 FWARO wadiña nyuuli wakutiyisha woma nawa nzambi yawaEjipitu wamumi. Kwesekeja namukanda wukweti mutu wakwila nawu Mpinji Yayulileña Ejipitu Kumusela (When Egypt Ruled the East) wahosha nawu, akwaEjipitu amumweneña nawu “wabadikili yileñaleña yejima maana niñovu.” Fwaro wavwalileña chibañula chadiña nachifwikija chanfwiji wunakukeña kusumana, chumichi chayanukishileña ayilumbu jamwanta nawu anateli kuyikisañana chikupu. Fwikijenu Mosi chatiyiliyi hampinji yamulejeluwu kudi Yehova nindi: “Nikutemeshi kudi Fwaro, kulonda wuyifumishi antu ami anyana kaIsarela muEjipitu.”—Kwid. 3:10.

² Mosi wayili kuEjipitu, washimwinini mazu aNzambi nawa wamuleñeleli Fwaro kuzuwa. Chelili Nzambi yaleti yipupu yitanu nayiwana muEjipitu, Fwaro wamusoñamishili Mosi nindi: “Bayi wakanmona cheñi kumesu amuku. Ifuku diwakanmona cheñi kumesu ami wakafwa hohu.” (Kwid. 10:28) Henohu Mosi kanda yafumi kudi Fwaro, waprofweteli nindi wedi weyala wamwanta wakafwa. (Kwid. 11:4-8) Nkumininaku, Mosi walejeli yisaka yawaIsarela  yejima nindi ajahi mpembi hela mukoku, kanyama wajila kudi nzambi wawaEjipitu wejina daRa, kulonda asampwili mashi kuyipamba yakuyisu yawu. (Kwid. 12:5-7) Indi Fwaro welilidi? Mosi hatiyili womaku. Muloñadi? Hamuloña wachikuhwelelu, wamwovwahilili Yehova ‘chakadi kutiya woma wandombu yamwanta; chadiñi nakumonayi Wakamonewaña hakutatakena.’—Tañenu Aheberu 11:27, 28.

3. Yumanyi yitukushinshikahu kutalisha hachikuhwelelu chaMosi mudi ‘Wakamonewaña’?

³ Komana chikuhwelelu chenu chakola chikupu nawa chidi neyi kwiji ‘munakumumona Nzambi’? (Mat. 5:8) Tushinshikenu hadi Mosi hakwila tukoleshi chimwenu chetu kulonda tumoneña ‘Wakamonewaña.’ Indi kukuhwelela mudi Yehova kwamukiñili ñahi kulonda yabuleña kutiya antu woma? Munjilanyi mwakuhweleleliyi muyikaninu yaNzambi? Indi wuswa wakumona ‘Wakamonewaña’ wamukolesheli ñahi Mosi niantu jindi hampinji yadiñawu muwubanji?

4. Antu amumweneña ñahi Mosi kwesekeja nachifulu chaFwaro?

⁴ Antu amumweneña Mosi nawu hesekena naFwaroku. Chidi neyi wumi waMosi nichihandilu chakumbidi chadiña mumakasa aFwaro. Mosi wamwihwili Yehova nindi: “Ami yaminyi mwaka niyi kudi Fwaro nakufumisha anyana kaIsarela muEjipitu?” (Kwid. 3:11) Mwahitili yaaka 40 kufuma hampinji yatemukiliyi Mosi muEjipitu. Watela wadihwileña nindi, ‘Komana chachiwahi ami kufunta cheñi kuEjipitu hadaha nikumuhilisha mwanta?’

5, 6. Chumanyi chamukwashili Mosi kumutiya woma Yehova, bayi Fwaroku?

⁵ Henohu Mosi kanda yafunti kuEjipitu, Nzambi wamudizishili chishina chalema. Chimwahitili mpinji, Mosi wasonekeli chishina chenichi mumukanda waYoba nindi: ‘Kumutiya Yehova woma wowu maana.’ (Yoba 28:28) Hakwila amudizishi Mosi kwikala nawoma wamuchidiwu nikuzata mwamaana, Yehova wamulejeli chaambu chekala hakachi kawantu naNzambi Wañovu Yejima. Wamwihwili nindi: ‘Indi wamwinkeli muntu kanwa hinyi? Indi wamwinkeli muntu hela wumama, hela kujika matu hela kutona, hela wumputamesu, hinyi? Hiyami Yehovaku, tahindi?’—Kwid. 4:11.

⁶ Chumanyi chadiziliyi? Mosi hateleli kutiya womaku. Amutemesheli kudi Yehova, wamwinkeli Mosi yuma yejima yakeñekeleña hakushimuna nsañu yaNzambi kudi Fwaro. Nawa cheñi, Fwaro hadiña nañovu yakwesekana naYehovaku. Kafwampi, bayi neyi diyi yadiña mpinji yatachi yawambuña Nzambi kwikala muwubanji mwituña daEjipituku. Hadaha, Mosi watoñojokeleña chikupu Yehova chakiñiliyi Abarahama, Yosefu niMosi yomweni hampinji yayuulileñawu aFwaro akunyima. (Kutach. 12:17-19; 41:14, 39-41; Kwid. 1:22–2:10) Hamuloña wakumukuhwelela Yehova, ‘Wakamonewaña,’ Mosi wayili nakudimona naFwaro chakubula kutiya woma nawa washimwini mazu ejima amulejeluwu kudi Yehova nawu yahoshi.

7. Kumukuhwelela Yehova kwakwashili ñahi muhela wumu?

⁷ Kukuhwelela mudi Yehova kwamukwashili muhela wejina daElla kubula kutiya antu woma. Mu 1949, Ella amukasili mukaleya muEstonia kudi aKGB, amusubwili nawa amusupishili kudi atupokola atwansi. Wahosheli nindi “antiyishili nsonyi nankashi. Ilaña chinalombeli kudi Yehova, nadiwunjikili nawa nawundishili muchima.” Kuhiñahu, Ella amukasili mukaleya mwadiñayi nkawindi hadi mafuku asatu. Washimwini nindi: “Atupokola ahosheli nawu: ‘Tukuzata nañovu kulonda ijina daYehova akabuli kudanuka cheñi muEstonia. Tukukutwala muchilombu nawa akwenu tukuyitwala kuSiberia. Atwalekeluhu nakunsupisha nawu, ‘Indi Yehova weyi wudi kudihi?’ Komana Ella watiyili antu woma tahindi wamukuhweleleli Yehova? Chamwihujoleluwu, wahosheli chakadi woma nakuleja amusupishileña nindi: “Natoñojoka chikupu haniyi nsañu, nawa chikuwaha  kutwalekahu kushakama mukaleya nakwikala nawulunda wawuwahi naNzambi kubadika kufuma mukaleya chakadi wuselewa windi.” Ella wamumweneña Yehova neyi kwiji muntu wunemani kumbidi yindi. Hamuloña wakwikala nachikuhwelelu, wahembeli kashinshi kindi.

8, 9. (a) Chumanyi chinateli kukwasha muntu kubula kutiya antu woma? (b) Neyi muholokela mukweseka kwakutiya antu woma, mwatela kushindamena hadinyi?

⁸ Kumukuhwelela Yehova kukuyikwasha kulonda mubuleña kutiya woma. Neyi akulumpi janfulumendi anakuyikañesha kudifukula kudi Nzambi, chinateli kumwekana neyi wumi wenu wudi mumakasa awantu. Hadaha munateli kujinoka neyi chakwila chachiwahi kutwalekahu kumukalakela Yehova nakuhilisha akwanfulumendi. Ilukenu nenu: Chuma chinateli kukwasha muntu kubula kutiya antu woma hikumukuhwelela Nzambi. (Tañenu Yishimu 29:25.) Yehova wehulaña nindi: “Eyi watiyaña woma muntu wakafwa, watiyaña woma mwana kamuntu wakabalumuka neyi matahu”?—Isa. 51:12, 13.

⁹ Mushindamenenu Tata yenu wañovu yejima. Wamonaña, kutiyila luwi nikwimenaku ejima akabishañawu kudi anyuuli atama. (Kwid. 3:7-10) Hela chakwila mwatela kuhakwilaku yuma yimwakuhwelela kudi akulumpi janfulumendi, “bayi mwakaakama nenu tukuhoshadi? Hela nenu tukuhosha mazwinyuku? Muloña akayinka mazu akuhosha yoyena mpinji oyu.” (Mat. 10:18-20) Anyuuli jawantu niakulumpi janfulumendi kwila esekana naYehova nehi. Neyi mukolesha chikuhwelelu chenu chayinu mpinji, mukwiluka nenu Yehova hiMuntu wafwilaña kuyikwasha.

10. (a) Yehova wayilejeli aIsarela nshimbinyi jalema mukakweji kaNisani 1513 B.C.E.? (b) Muloñadi Mosi chovwahililiyi nshimbi jaNzambi?

¹⁰ Mukakweji kaNisani 1513 B.C.E., Yehova walejeli Mosi niAroni kulonda aleji aIsarela iji nshimbi jalema jakwila nawu: Sakulenu mukoku hela mpembi weyala wabula hataminayi, mumujahi nawa musampwili mashi kuyipamba yakuyisu yenu. (Kwid. 12:3-7) Indi Mosi welilidi? Chimwahitili mpinji kapostolu Pawulu wasonekeli hadi Mosi nindi: “Nakukuhwelela hakwila paseka nakusampula mashi, kulonda mukwakujilumuna anyana awedi abuli kuyila chuma.” (Heb. 11:28) Mosi welukili nindi Yehova hatwambañaku, dichi wakuhweleleli muchikaninu chaYehova chakujilumuna awedi ejima awamayala muEjipitu.

11. Muloñadi Mosi chasoñamishililiyi akwawu?

¹¹ Anyana kaMosi awamayala adiña kuMidiyani kwakulehi nakwadiña “akwakujilumuna.” * (Kwid. 18:1-6) Hela chochu, walejeli yisaka yawaIsarela yikwawu yadiña nawanyana awamayala awedi adiña muwubanji. Wumi wadiña muwubanji, dichi Mosi wakeñeli akwawu antu. Bayibolu yahosha nawu, “hohenohu,” Mosi ‘watambikili akulumpi ejima awaIsarela, wayilili nindi, jahenu paseka.’—Kwid. 12:21.

12. Yehova watuleja kushimwina nsañwinyi yalema?

¹² Kuhitila muwunlomboli wawañelu, antu jaYehova anakushimwina nsañu yalema yakwila nawu: ‘Akamenu Nzambi mumulemeshi; muloña mpinji yindi yakusompesha yinashiki dehi; difukulenu kudi Waleñeli niiwulu nimaseki nikaluñalwiji nituseloki twamenji.’ (Chim. 14:7) Yinu diyi mpinji yakushimwina ayinu nsañu. Twatela kusoñamisha akwetu kulonda afumi muBabiloni Muneni hakwila akabuli “kutambula nindi yipupu.” (Chim. 18:4) “Anyikoku acheñi” anakuzatila hamu nawakwaKristu awayishewa hakwila akwashi antu adambulaña kudi Nzambi kulonda ‘akundami cheñi’ kudi yena.—Yow. 10:16; 2 Kor. 5:20.

13. Chumanyi chikuyisañumuna kulonda mwikali nampwila yakushimwina nsañu yayiwahi?

¹³ Tuneluki chikupu netu ‘mpinji yakusompesha,’ yinashiki dehi. Twakuhwelela cheñi netu Yehova halebumunaña hakuhosha nindi tunyakali hakuzata mudimu wetu wakushimwina nikwilisha  atumbanjuku. Kapostolu Yowanu wamweni muchimwenu ‘añelu awana anemani kumbañu jiwana jeseki, anakwati mpepela jiwana jeseki.’ (Chim. 7:1) Hamuloña wachikuhwelelu, komana mwamonaña ana añelu anakufwila kulekaku mpepela yikweti ñovu yakujilumuna halukadi lweneni hanu hamaseki? Neyi mumonaña awa añelu namesu enu achikuhwelelu, mukushimwinaña nsañu yayiwahi chakadi woma.

14. Chumanyi chatuleñelaña ‘kuleja mukwakwila chatama yababali kulonda yaleki mwatama mwelañayi’?

¹⁴ AkwaKristu alala adiluñishaña wubwambu naYehova nikuchiñeja wumi waha nyaka. Dichi, tweluka netu himudimu wetu ‘wakuleja mukwakwila chatama yababali, yaleki mwatama mwelañayi kulonda yahandishi wumi windi.’ (Tañenu Ezekeli 3:17-19.) Hela chochu, bayi neyi twashimwinaña hamuloña wakuchiina kutuhiisha namuloña wamashuku. Ilaña, hamuloña wakumukeña Yehova niakwetu antu. Yesu walumbulwili chikupu mwatalisha kukeña niwushona kuhitila muchishimu chindi chahosheleña hadi kaSamariya wamuwahi. Tunateli kudihula netu, ‘Komana nashimwinaña nsañu yayiwahi hamuloña ‘wakutiyila antu wushona’ neyi cheliliyi kaSamariya?’ Hela chochu, kwila tukeña kwikala neyi kapristu nikaLevi amuchishimu chaYesu nakutachika kuleyaleya ‘nikutondolwela antuku.’ (Luka 10:25-37) Kukuhwelela muyikaninu yaNzambi nikukeña akwetu antu kukutuleñela kudikita chikupu mumudimu wakushimwina henohu mpinji kanda yimani.

15. Muloñadi aIsarela chatoñojokeleluwu nawu anafwi dehi mumuhetu?

¹⁵ Kumukuhwelela ‘Wakamonewaña’ kwamukwashili Mosi hampinji yadiñawu aIsarela muwubanji hanyima yakufuma  muEjipitu. Bayibolu yahosha nawu: “Anyana kaIsarela afumbwili mesu awu, amweni aEjipitu akuyilondela awa; atiyili woma waweni; anyana kaIsarela abileleli kudi Yehova.” (Kwid. 14:10-12) Komana iyi yuma yamwekeni yadiña yakukasumwisha? Inehi. Yehova washimwineñahu dehi nindi: “Ninami nukumuchinchikisha Fwaro muchima windi, wukuyihaña nindi ayikwati, ninami nakatiyakana mpuhu hansañu yaFwaro nanjita yindi yejima; aEjipitu akeluka nawu ami yami Yehova.” (Kwid. 14:4) Hela chochu, aIsarela amweni hohu yuma yamweneñawu namesu, yidi neyi Kaluñalwiji Kachinana kadiña kumbidi kamwekeneña neyi hiyakutwesha kukawukaku, mashidika aFwaro atemukileña nankashi adiña nakuyikumpisha kunyima yawu nikabiña wayilombweleña wadiña nayaaka 80 yakusemuka. Atoñojokeli nawu anafwi dehi mumuhetu.

16. Indi chikuhwelelu chamukolesheli ñahi Mosi haKaluñalwiji Kachinana?

¹⁶ Ilaña Mosi hatiyili womaku. Muloñadi? Muloña mesu indi achikuhwelelu amweneña chuma chabadika ñovu kaluñalwiji hela mashidika. Wamweni “wamwinu waYehova” nawa welukili nindi Yehova wukuyilwilaku aIsarela. (Tañenu Kwidika 14:13, 14.) Chikuhwelelu chaMosi chakolesheli antu jaNzambi. Bayibolu yahosha nawu, “Nakukuhwelela ahitili muKaluñalwiji Kachinana nakwenda hamaseki awuma, cheliluwu aEjipitu nawu esekumu hiyakujilumukilamu.” (Heb. 11:29) Nkumininaku, “antu ana amutiyili Yehova woma, amwitiyili Yehova nakambuñindi Mosi.”—Kwid. 14:31.

17. Chumanyi chikamwekana kumbidi chinateli kweseka chikuhwelelu chetu?

¹⁷ Wumi wetu keña wumwekani neyi wudi muwubanji. Lukadi lweneni chilukashika kwakwihi nakumana, nfulumendi jakanu kaayi jikajilumuna chikupu yipompelu yawakwakwitiya yamaneni nawa yayivulu kubadika yetu. (Chim. 17:16) Yehova washimuna muwuprofwetu chitwamwekanaña neyi hitukweti wakutukwashaku, nindi tudi neyi ‘ituña dikweti nyikala yakadi mpwembu, nyikomenu hela yenzelu.’ (Ezek. 38:10-12, 14-16) Kwesekeja nayitoñojoka yawuntu, tunateli kutoñojoka netu hitwamba kapulukaku. Komana ichi chinateli kuyitiyisha woma?

18. Lumbululenu muloña waweni wakatuleñela tukabuli kutiya woma hampinji yalukadi lweneni?

¹⁸ Hitwatela kutiya womaku. Muloñadi? Muloña Yehova washimwineñahu dehi nindi antu jaNzambi akayilukuka. Cheñi nawa washimwinini chadimu yuma yakafumamu. “Mwanta Yehova nindi, Dena ifuku odu dakenzayi Gogi nakulwa netuña daIsarela, kulendumuka kwami kwakamwekana nikumesu ami. Muloña nahoshi dehi namukawu wami, nakesi kandombu yami.” (Ezek. 38:18-23) Kuhiñahu, Nzambi wakajilumuna antu ejima afwilaña kukabisha antu jaYehova. Neyi mukuhwelela muyuma yikafumamu hanyima ‘yefuku daYehova deneni, dakutiyisha woma,’ chikuyikwasha ‘kumona wamwinu waYehova’ nikutwalekahu nakashinshi kenu.—Yoweli 2:31, 32.

19. (a) Indi Yehova naMosi adiña nawubwambu wamuchidinyi? (b) Nkiswinyi jimukatambwila neyi mumukuhwelelaña Yehova mwejima mumukwilaña?

¹⁹ Dichi, diloñeshelenu chadimu yoyinu mpinji haniyi yuma yikamwekana kumbidi kuhitila mukutwalekahu ‘nakutatakena neyi kwiji munakumona Wakamonewaña.’ Koleshenu wubwambu wenu naYehova Nzambi kuhitila mukudiza mpinji yejima nikulomba. Mosi wadiña nawubwambu wamuchidiwu naYehova nawa amuzatishili nankashi kudi Nzambi chakwila Bayibolu yahoshaña nawu Yehova wamwilukili Mosi “mesu namesu.” (Kuhit. 34:10) Mosi wadiña kaprofwetu wazatileña chiwahi nankashi. Hela chochu, ninenu nawa neyi mwikala nachikuhwelelu, mukumwiluka Yehova nikudikunda nindi chikupu neyi chochimunateli kwila neyi mumumona namesu. Neyi mutwalekahu nakumukuhwelela ‘mwejima mumukwilaña,’ neyi chayikoleshaña Izu daNzambi, ‘niyena wakayolwelaña njila jenu.’—Yish. 3:6.