1, 2. (a) Splica pakico por a parce cu Moises tabata den peliger. (Wak e prome plachi.) (b) Dicon Moises no tabatin miedo di e rabia di e rey?

FARAO tabata un gobernante poderoso, y e Egipcionan tabata mir’e como un dios. Den nan bista, el ‘a surpasa tur otro criatura riba tera den sabiduria y poder’, segun e buki Tempo Cu Egipto Tabata Goberna Oriente (When Egypt Ruled the East). Pa hinca miedo den su subditonan, Farao tabata bisti un corona cu e figura di un cobra cla pa ataca—un advertencia di cu enemigo di rey lo a keda elimina mesora. Imagina bo anto con Moises lo a sinti su mes ora Jehova a bis’e: “Lo mi manda bo cerca Farao pa bo saca mi pueblo, e yiunan di Israel, for di Egipto.”—Exo. 3:10.

² Moises a bay Egipto, el a duna Farao e mensahe di Dios y, manera tabata di spera, Farao a haya rabia riba dje. Despues cu nuebe plaga a asota e pais, Farao a spierta Moises: “Percura pa bo no mira mi cara mas, pasobra e dia cu bo mira mi cara, lo bo muri!” (Exo. 10:28) Prome cu Moises a bay for di su dilanti, el a profetisa cu e prome yiu homber di e rey lo a muri. (Exo. 11:4-8) Finalmente, Moises a instrui tur famia Israelita pa mata  un cabrito of un carne—un animal cu tabata sagrado pa e dios Egipcio Ra—y sprengo e sanger riba nan kozijnnan. (Exo. 12:5-7) Con Farao lo a reacciona? Moises no tabatin miedo. Dicon no? Cu fe, el a obedece Jehova, “[sin] miedo di e rabia di e rey, ya cu el a sigui firme, comosifuera el a mira Esun cu ta invisibel.”—Lesa Hebreonan 11:27, 28.

3. Kico nos lo analisa tocante e fe cu Moises tabatin den “Esun cu ta invisibel”?

³ Bo fe ta asina fuerte cu ta comosifuera bo ta “mira Dios”? (Mat. 5:8) Pa nos haci nos vision spiritual mas skerpi pa nos por mira “Esun cu ta invisibel”, laga nos wak e ehempel di Moises atrobe. Con su fe den Jehova a proteh’e for di miedo di hende? Con el a demostra fe den e promesanan di Dios? Y con e echo cu Moises por a mira “Esun cu ta invisibel” a fortalece e y su pueblo ora nan tabata den peliger?

4. For di un punto di bista humano, Moises por a para banda di Farao?

⁴ For di un punto di bista humano, Moises no por a para banda di Farao. E bida, bienestar y futuro di Moises a parce di ta den man di Farao. Moises mes a puntra Jehova: ‘Ta ken mi ta pa mi bay cerca Farao y saca e yiunan di Israel for di Egipto?’ (Exo. 3:11) Un 40 aña prome Moises a huy for di Egipto. E lo a puntra su mes: ‘Ta sabi pa mi bay Egipto bek y core e riesgo di pone e rey rabia?’

5, 6. Kico a yuda Moises pa teme Jehova en bes di Farao?

⁵ Prome cu Moises a bolbe Egipto, Dios a siñ’e un principio importante, e principio cu e mesun Moises aki a registra despues den e buki di Job: “E temor di SEÑOR, ta esey ta sabiduria.” (Job 28:28) Pa yuda Moises haya e temor aki y actua sabi, Jehova a lag’e mira un contraste grandi entre hende y e mes, e Dios Todopoderoso. El a puntr’e: “Ta ken a traha boca di hende? Ta ken a traha e mudo, of e sordo, of esun cu ta mira of e ciego? No ta ami?”—Exo. 4:11.

⁶ Kico tabata e les? Moises no tabatin nodo di tin miedo. Ta Jehova a mand’e, y e lo a duna Moises loke sea e tabatin mester pa e hiba e mensahe di Dios pa Farao. Ademas, Farao no por a para banda di Jehova. Al fin al cabo, no tabata prome biaha cu sirbidornan di Dios a haya nan den peliger na Egipto. Kisas Moises a medita riba e manera cu Jehova a proteha Abraham, Jozef y hasta Moises mes durante e reinado di e Faraonan anterior. (Gen. 12:17-19; 41:14, 39-41; Exo. 1:22–2:10) Cu fe den Jehova, “Esun cu ta invisibel”, y cu curashi Moises a presenta dilanti di Farao y a papia tur loke Jehova a mand’e papia.

7. Con fe den Jehova a proteha un ruman muher?

⁷ Mescos tambe, fe den Jehova a proteha un ruman muher cu yama Ella pa no laga miedo di hende domin’e. Na 1949, autoridadnan policial (KGB) di Estonia a arest’e, nan a kit’e sunu y e polisnan hoben a keda wak e. El a bisa: “Mi a sinti mi humilia, pero mi a resa na Jehova y esey a duna mi un paz y trankilidad mental.” Despues nan a cera Ella den cachot pa tres dia. El a conta: “E polisnan a grita mi: ‘Nos lo percura pa niun hende corda e nomber Jehova na Estonia! Abo ta bay un campamento di trabou forsa y e otronan ta bay Siberia!’ Anto den forma di mofa, nan a puntr’e: ‘Unda bo Jehova ta?’” Ella a haya miedo di hende, of el a confia den Jehova? Ora nan a interog’e, el a bisa nan sin miedo: “Mi a pensa hopi riba e asunto  aki, y mi ta prefera di biba den prizon y mantene mi relacion cu Dios intacto en bes di sali liber y perde su aprobacion.” Pa Ella, Jehova tabata mes real cu e hombernan cu tabata para su dilanti. Pa medio di su fe, el a mantene su integridad.

8, 9. (a) Kico ta e remedi contra miedo di hende? (b) Si bo ta sinti cu bo tin miedo di hende, riba ken bo mester fiha bo atencion?

⁸ Fe den Jehova lo yuda bo vence cualkier miedo cu bo por tin. Si autoridadnan purba di stop bo di adora Dios, por parce cu bo bida, bienestar y futuro ta den man di e personanan aki. Lo bo por hasta puntra bo mes si ta sabi pa sigui sirbi Jehova y pone autoridadnan rabia. Ma corda esaki: E remedi contra miedo di hende ta fe den Dios. (Lesa Proverbionan 29:25.) Jehova ta puntra bo: “Con bo por tin miedo anto di hende cu tin cu muri toch, hende cu bida pasahero manera yerba?”—Isa. 51:12, 13, BPK.

⁹ Fiha bo atencion riba bo Tata todopoderoso. E ta mira ken ta sufri na man di gobernantenan inhusto; e ta sinti pa hende asina y ta yuda nan. (Exo. 3:7-10) Hasta si bo tin cu defende bo fe dilanti di oficialnan di rango halto, ‘no bira ansha tocante con pa papia of kico pa bisa, pasobra e momento ey lo bo haya sa kico pa bisa.’ (Mat. 10:18-20) Niun gobernante ni oficial di gobierno no por para banda di Jehova. Si bo fortalece bo fe awor, lo bo bin mira Jehova como un Persona real cu ta ansioso pa yuda bo.

10. (a) Ki instruccion Jehova a duna e Israelitanan den e luna di nisan di aña 1513 prome cu Cristo? (b) Dicon Moises a obedece e instruccionnan di Dios?

¹⁰ Den e luna di nisan di aña 1513 prome cu Cristo, Jehova a bisa Moises y Aaron pa duna e Israelitanan e instruccion un poco straño aki: Scoge un chubato di carne of di cabrito sano, mat’e y sprengo su sanger riba kozijn di boso portanan di cas. (Exo. 12:3-7) Con Moises a reacciona? Mas despues, apostel Pablo a skirbi di dje: “Pa medio di fe el a celebra e Pasco y a sprengo sanger riba e kozijnnan di porta, pa e destructor no haci daño na nan yiu mayo.” (Heb. 11:28) Moises tabata sa cu Jehova ta cumpli cu su promesanan y cu e lo mata tur e yiu hombernan mayo di Egipto.

11. Dicon Moises a spierta e otro Israelitanan?

¹¹ Aparentemente e yiu hombernan di Moises mes tabata na Madian, leu for di “e destructor.” * (Exo. 18:1-6) Pero el a obedece Dios y a instrui otro famianan Israelita pa nan por a scapa nan yiu hombernan mayo. Bida tabata den wega, y Moises tabata stima su prohimo. Bijbel ta bisa cu “e ora ey Moises a manda yama tur e ancianonan di Israel y a bisa nan: ... ‘Mata e lamchi di Pasco.’”—Exo. 12:21.

12. Jehova a instrui nos pa proclama ki mensahe importante?

¹² Bou di direccion di angel, e pueblo di Jehova ta proclama un mensahe importante: “Teme Dios y dun’e gloria, pasobra e ora di su huicio a yega! Pesey, adora Esun cu a traha cielo, tera, lama y fuentenan di awa.” (Rev. 14:7) Awor ta tempo pa declara e mensahe ey. Nos tin cu spierta nos prohimo pa sali for di Babilonia e Grandi, pa nan no “ricibi parti di su plaganan.” (Rev. 18:4) E cristiannan ungi, cu yudansa di e ‘otro carnenan’, ta roga hende cu ta aleha for di Dios pa “reconcilia” cu ne.—Juan 10:16; 2 Cor. 5:20.

13. Kico lo duna nos mas deseo pa predica e bon noticia?

 ¹³ Nos ta convenci cu “e ora di huicio” en berdad a yega. Nos tin fe tambe cu Jehova no a exagera e urgencia di nos trabou di predica y di haci discipel. Den un vision, apostel Juan “a mira cuater angel para na e cuater skinanan di tera, cu e cuater bientonan di tera duro teni.” (Rev. 7:1) Cu wowo di fe, bo ta mira e angelnan ey cla pa los e bientonan destructivo di e tribulacion grandi riba e mundo aki? Si bo ta mira nan, lo bo sinti bo impulsa pa predica e bon noticia cu conviccion.

14. Kico ta motiva nos pa ‘spierta e malbado pa e laga su mal caminda’?

¹⁴ Cristiannan berdadero ya caba tin un amistad cu Jehova y e speransa di biba pa semper. Sinembargo, nos ta reconoce cu nos tin e responsabilidad pa ‘spierta e malbado pa e laga su mal caminda pa e biba.’ (Lesa Ezekiel 3:17-19.) Naturalmente, nos no ta predica simplemente pa evita culpa di sanger. Nos ta stima Jehova, y nos ta stima nos prohimo. Den Hesus su comparacion di e bon Samaritano, el a ilustra kico realmente ta nifica amor y misericordia. Nos por puntra nos mes: ‘Mescos cu e Samaritano, mi tin “duele” di e hendenan, y esey ta motiva mi pa duna nan testimonio?’ Nos lo no kier bula pipa manera e sacerdote y e levita den e comparacion, na moda di papia, ‘crusa pasa bay’ otro banda di caminda. (Luc. 10:25-37) Fe den e promesanan di Dios y amor pa prohimo lo motiva nos pa participa activamente den e trabou di predica prome cu ta mucho laat.

15. Dicon e Israelitanan a sinti cu nan a cay den un trampa?

¹⁵ Moises su fe den “Esun cu ta invisibel” a yud’e ora cu e Israelitanan tabata den peliger despues cu nan a bandona Egipto. Bijbel ta bisa: “E yiunan di Israel a hisa cara wak, y mira, e Egipcionan tabata marcha bin nan tras, y nan a spanta masha, y e yiunan di Israel a sclama na SEÑOR.” (Exo. 14:10-12) Realmente, e situacion aki no mester a sorprende nan. Di con no? Pasobra Jehova a profetisa: “Lo mi haci Farao su curason duro, y e lo persigui nan; y ami lo wordo honra a traves di Farao y henter su ehercito, y e Egipcionan lo sa cu ta ami ta SEÑOR.” (Exo. 14:4) No obstante, e Israelitanan tabata mira solamente loke nan por a wak cu nan wowo literal: Lama Cora cu a blokia e caminda nan dilanti, Farao su garoshinan di guera rapido biniendo nan tras y un wardador di carne di 80 aña cu mester a guia nan! Nan a sinti cu nan a cay den un trampa.

16. Con fe a fortalece Moises na Lama Cora?

¹⁶ Pero Moises no tabatin miedo. Dicon no? Pasobra cu wowo di fe el a mira algo mucho mas poderoso cu un lama of un ehercito. E por a “mira e salbacion di SEÑOR”, y e tabata sa cu Jehova lo a bringa pa e Israelitanan. (Lesa Exodo 14:13, 14.) Y su fe a motiva e pueblo di Dios. Bijbel ta bisa: “Pa medio di fe nan a pasa door di Lama Cora comosifuera riba tera seco, pero ora e Egipcionan a purba di haci mescos, lama a traga nan.” (Heb. 11:29) Despues di esey, “e pueblo a [cuminsa] teme SEÑOR, y nan a kere den SEÑOR y den su sirbidor Moises.”—Exo. 14:31.

17. Den futuro, ki suceso lo pone nos fe na prueba?

¹⁷ Pronto, nos bida tambe lo parce di ta den peliger. Na e culminacion di e tribulacion grandi, e gobiernonan di e mundo aki lo destrui e organisacionnan religioso cu tabata mucho mas poderoso cu esun di nos. (Rev. 17:16) Den un profecia, Jehova ta describi nos condicion vulnerabel como un luga di biba sin proteccion, cu no tin ‘muraya, ni grendel ni porta.’ (Eze. 38:10-12, 14-16) For di un punto di bista humano, nos lo no tin scapatorio. Con lo bo reacciona?

18. Dicon nos no tin nodo di tin miedo durante e tribulacion grandi?

¹⁸ Nos no tin nodo di tin miedo. Dicon no? Pasobra Jehova a profetisa cu su pueblo lo ser ataca, pero tambe cu e lo proteha nan. El a bisa: “‘Lo sosode riba e dia ey, ora Gog bin contra tera di Israel’, SEÑOR Dios ta declara, ‘cu mi furia lo subi den mi nanishi.’ Y den mi celo y e ardor di mi furia, mi ta declara.’” (Eze. 38:18-23) E ora ey Jehova lo destrui tur esnan cu kier haci su pueblo daño. Si bo tin fe cu Jehova lo proteha bo durante su “dia grandi y temibel”, lo bo por ‘mira e salbacion di Jehova’ y mantene bo integridad.—Joel 2:31, 32.

19. (a) Con intimo e amistad entre Jehova y Moises tabata? (b) Si bo obedec’e Jehova den tur bo camindanan, ki bendicion lo bo ricibi?

¹⁹ Prepara awor pa e sucesonan emocionante ey door di sigui para firme comosifuera bo ta mira “Esun cu ta invisibel”! Fortalece bo amistad cu Jehova Dios mediante estudio regular y oracion. Moises tabatin un amistad intimo cu Jehova, kende a uz’e di un manera asina poderoso cu Bijbel ta bisa cu Jehova tabata conoce Moises “cara-cara.” (Deu. 34:10) Moises tabata un profeta extraordinario. Si bo tin fe, bo tambe por tin un amistad intimo cu Jehova; comosifuera bo por mir’e realmente. Si bo ta obedec’e “den tur bo camindanan”, manera e Palabra di Dios ta anima bo pa haci, “e lo dirigi bo bereanan.”—Prov. 3:6.