Ita haree “Ida neʼebé matan la haree” ka lae?
“Nia kontinua hamriik metin hanesan haree Ida neʼebé matan la haree.”—EBREU 11:27.
1, 2. (a) Esplika toʼok tansá mak Moisés nia situasaun haree hanesan perigu. (Haree dezeñu iha leten.) (b) Tanbasá Moisés la taʼuk ba liurai nia hirus?
LIURAI Ejitu mak ukun-naʼin neʼebé iha kbiit boot, no ema Ejitu sira adora nia hanesan maromak ida. Tuir livru ida naran When Egypt Ruled the East (Kuandu Ejitu mak Ukun rai Oriente), ema Ejitu sira sente katak sira-nia liurai mak iha “matenek no kbiit” boot liu fali kriatura sira seluk iha mundu. Tanba Liurai Ejitu hakarak ninia povu atu taʼuk ba nia, nia tau iha ninia ulun koroa ho imajen samea-kobra neʼebé prontu atu ataka, hodi hatudu katak nia bele halakon ninia inimigu sira lalais. Tan neʼe, hanoin toʼok Moisés sente oinsá kuandu Jeová dehan: “Haʼu sei haruka ó ba Liurai Ejitu nian, no ó sei lori haʼu-nia povu Izraél sai husi Ejitu.”—Êxodo (Keluaran) 3:10.
2 Moisés laʼo ba rai-Ejitu hodi hatoʼo Maromak nia mensajen ba Liurai Ejitu. Ida-neʼe halo liurai hirus. Kuandu rai-Ejitu hetan tiha malisan sia, liurai neʼe sai laran-nakali tebetebes toʼo hatete ba Moisés: “Keta koko atu haree tan haʼu-nia oin, tanba iha loron neʼebé ó haree haʼu-nia oin, ó sei mate.” (Êxodo [Keluaran] 10:28) Antes Moisés sai, nia fó-hatene ba Liurai neʼe katak ninia oan-mane primeiru sei mate. (Êxodo [Keluaran] 11:4-8) Tuirmai, Moisés haruka família Izraél hotu atu oho bibi-timur ka bibi-malae aman ida, no hisik nia raan ba sira-nia odamatan-riin. Bibi-aman mak animál neʼebé santu ba ema Ejitu nia maromak Rá. (Êxodo [Keluaran] 12:5-7) Ida-neʼe sei halo Liurai sai hirus liután ka lae? Moisés la taʼuk kona-ba neʼe. Tanbasá? Tanba nia iha fiar no halo tuir Jeová hodi “la taʼuk liurai nia hirus, basá nia kontinua hamriik metin hanesan haree Ida neʼebé matan la haree”.—Lee Ebreu 11:27, 28.
3. Pergunta saida deʼit mak ita sei koʼalia hamutuk kona-ba Moisés nia fiar ba “Ida neʼebé matan la haree”?
3 Ita-nia fiar mak metin loos hanesan ita “haree Maromak” ka lae? (Mateus 5:8) Atu hametin ita-nia fiar hodi haree “Ida neʼebé matan la haree”, mai ita koʼalia hamutuk kona-ba Moisés nia ezemplu. Oinsá mak ninia fiar ba Jeová proteje nia husi taʼuk ba ema? Oinsá mak nia hatudu katak nia fiar duni Maromak nia promesa sira? No oinsá mak fiar ba “Ida neʼebé matan la haree” ajuda Moisés kuandu nia no ninia povu sira iha perigu laran?
NIA LA TAʼUK “LIURAI NIA HIRUS”
4. Kuandu Moisés hasoru Liurai Ejitu, ema neʼebé la iha fiar karik hanoin saida?
4 Ema neʼebé la iha fiar bele hanoin katak Moisés la iha forsa se kompara ho Liurai Ejitu neʼebé iha kbiit boot. No karik sira mós hanoin katak Moisés nia moris no ninia futuru iha Liurai nia liman. Moisés rasik mós husu Jeová: “Haʼu neʼe sé atu tenke bá hasoru Liurai Ejitu nian no lori ema Izraél sira sai husi Ejitu?” (Êxodo [Keluaran] 3:11) Maizumenus tinan 40 antes neʼe, Moisés halai husi rai-Ejitu. Tan neʼe, karik nia hanoin: ‘Diʼak duni ba haʼu atu fila fali ba Ejitu no halo liurai hirus ka lae?’
5, 6. Saida mak ajuda Moisés atu taʼuk ba Jeová, laʼós ba Liurai Ejitu?
5 Maromak hanorin buat importante ida ba Moisés antes nia fila fali ba Ejitu. Ikusmai iha livru Jó, Moisés hakerek kona-ba hanorin neʼe, dehan: “Taʼuk ba Jeová, neʼe mak matenek.” (Jó [Ayub] 28:28) Atu ajuda Moisés iha taʼuk neʼebé loos no halo desizaun ho matenek, Jeová kompara ema ho nia an rasik nuʼudar Maromak neʼebé aas liu hotu. Nia husu: “Sé mak kria ibun ba ema, ka sé mak halo sira la bele koʼalia ka diuk, haree moos ka matan-delek? Haʼu, Jeová mak halo, loos ka lae?”—Êxodo (Keluaran) 4:11.
6 Moisés aprende saida husi liafuan sira-neʼe? Katak, Jeová rasik mak haruka nia, tan neʼe nia la presiza taʼuk buat ida. Maromak sei fó kbiit ba Moisés atu fó sai Ninia mensajen ba Liurai Ejitu. Karik Moisés hanoin-hetan kona-ba oinsá mak iha tempu uluk Jeová proteje ona Ninia atan sira hanesan Abraão, José, no mós Moisés rasik kuandu hasoru perigu husi Liurai Ejitu sira seluk. Sin, Liurai Ejitu la iha kbiit se kompara ho Jeová. (Gênesis [Kejadian] 12:17-19; 41:14, 39-41; Êxodo [Keluaran] 1:22–2:10) Tanba Moisés tau fiar ba “Ida neʼebé matan la haree”, nia ho aten-brani bá hasoru Liurai Ejitu hodi fó sai Jeová nia mensajen.
7. Fiar ba Jeová proteje irmán ida iha dalan saida deʼit?
7 Fiar ba Jeová mós proteje ona irmán ida naran Ella hodi la sai taʼuk ba ema. Iha tinan 1949, polísia intelijénsia nian kaer nia iha rai-Estónia. Sira kolu ninia roupa hotu, no tuirmai polísia joven sira fihir nia. Ella dehan: “Haʼu moe loos, maibé kuandu haʼu halo orasaun ba Jeová, haʼu sente dame iha laran.” Tuirmai, sira husik irmán Ella mesak iha fatin kloot no nakukun ba loron tolu. Nia hatete: “Polísia hakilar hodi dehan: ‘Ami sei halo buat hotu hodi naran Jeová sei la hanoin-hetan tan iha rai-Estónia! Ó sei tama komarka, ó-nia maluk seluk sei bá Sibéria.’ Tuirmai, sira mós sadik hodi dehan: ‘Ó-nia Jeová iha neʼebé?’” Ella sei taʼuk ba ema, ka tau fiar ba Jeová? Ho aten-brani, nia dehan ba polísia sira: “Haʼu hanoin tiha ona kona-ba neʼe, no haʼu deside katak diʼak liu haʼu nafatin iha komarka laran hodi iha relasaun metin ho Maromak duké sai livre no lakon ida-neʼe.” Sin, Ella sente katak Jeová hamutuk duni ho nia iha fatin neʼe, hanesan mane sira neʼebé hamriik iha ninia oin. Ella nafatin laran-metin ba Jeová tanba ninia fiar.
8, 9. (a) Saida mak ajuda ita atu la taʼuk ba ema? (b) Se ita sente taʼuk ba ema, ita presiza hanoin kona-ba sé?
8 Fiar ba Jeová sei ajuda ita atu la sai taʼuk. Se ukun-naʼin sira koko atu hapara ita hodi adora Maromak, karik ida-neʼe haree hanesan ita-nia moris no futuru iha ona sira-nia liman. Karik ita bele husu ba ita-nia an: ‘Diʼak ba haʼu atu kontinua serbí Jeová no halo ukun-naʼin sira hirus ka lae?’ Hanoin-hetan katak, hodi tau fiar ba Maromak, ita bele manán hasoru taʼuk ba ema. (Lee Provérbios [Amsal] 29:25. a) Jeová husu: “Tansá mak ó presiza taʼuk ba ema neʼebé sei mate, ema neʼebé hanesan deʼit ho duʼut matak neʼebé sai namlaek?”—Isaías (Yesaya) 51:12, 13.
9 Hanoin nafatin kona-ba ita-nia Aman iha lalehan neʼebé iha kbiit boot. Nia haree ema hotu neʼebé hetan terus tanba buat neʼebé la justisa. Nia hanoin sira no ajuda sira. (Êxodo [Keluaran] 3:7-10) Maski ita presiza defende ita-nia fiar ba ukun-naʼin neʼebé iha kbiit boot, maibé Bíblia dehan: “Keta laran-taridu kona-ba oinsá no saida mak imi sei koʼalia, tanba sei haraik ba imi iha oras neʼebá buat neʼebé imi atu koʼalia.” (Mateus 10:18-20) Ukun-naʼin sira la iha kbiit se kompara ho Jeová. Se ita hametin ita-nia fiar agora, ita bele haree Jeová nuʼudar ita-nia Belun neʼebé prontu atu ajuda ita.
NIA IHA FIAR BA MAROMAK NIA PROMESA
10. (a) Saida mak Maromak Jeová haruka ema Izraél atu halo iha fulan-Nisan, tinan 1513 molok Kristu? (b) Tanbasá mak Moisés halo tuir Maromak nia matadalan neʼe?
10 Iha fulan-Nisan, tinan 1513 molok Kristu, Maromak Jeová haruka Moisés no Aarão atu fó-hatene ba ema Izraél sira atu foti bibi-malae ka bibi-timur neʼebé diʼak, oho ida-neʼe, no hisik ninia raan iha sira-nia odamatan-riin. (Êxodo [Keluaran] 12:3-7) Moisés halo saida? Tinan barak depois neʼe, Paulo hakerek: “Liuhusi fiar, [Moisés] selebra Festa Salvasaun nian hodi hisik animál nia raan, atu nuneʼe Maromak nia anju sei la oho sira-nia oan primeiru.” (Ebreu 11:28) Moisés hatene katak Jeová nia promesa sira sei sai loos, no nia iha fiar katak oan-mane primeiru hotu iha Ejitu sei mate.
11. Tanbasá mak Moisés fó avizu ba ema seluk?
11 Maski Maromak nia anju sei la oho Moisés nia oan rasik neʼebé hela dook iha rai-Midian, maibé Moisés halo tuir Jeová hodi fó avizu ba família Izraél sira kona-ba neʼe. (Êxodo [Keluaran] 18:1-6) Tanba Moisés hadomi ninia maluk, nia bolu kedas katuas Izraél sira no haruka sira atu oho animál nuʼudar sira-nia sakrifísiu.—Êxodo (Keluaran) 12:21.
12. Mensajen saida mak Jeová haruka ita atu haklaken?
12 Ho anju sira-nia ajuda, Jeová nia povu ohin loron fó sai mensajen importante tuirmai neʼe: “Hamtaʼuk Maromak no fó glória ba nia, tanba tempu ba ninia tesi-lia toʼo mai ona; tan neʼe adora bá Ida neʼebé halo lalehan no rai, tasi no bee-matan.” (Apokalipse 14:7) Ita tenke haklaken mensajen neʼe agora. Ita tenke fó avizu ba ema atu sai husi Babilónia Boot, hodi nuneʼe sira sei “la sai parte iha ninia kastigu sira”. (Apokalipse 18:4) Ema kristaun kose-mina sira hetan apoia husi “bibi seluk” hodi husu ba ema atu sai belun ho Maromak.—João 10:16; 2 Korinto 5:20.
![[Dezeñu iha pájina 11]](https://assetsnffrgf-a.akamaihd.net/assets/m/2014283/univ/wpub/2014283_univ_cnt_2_xs.jpg)
Fiar metin ba Jeová sei book ita atu aumenta ita-nia haklaken liafuan diʼak (Haree parágrafu 13)
13. Saida mak sei ajuda ita hodi aumenta ita-nia hakarak atu haklaken liafuan diʼak?
13 Ita fiar metin katak tempu ba Maromak atu tesi lia toʼo ona mai. Ita mós fiar katak serbisu haklaken mak importante tebes hanesan Jeová hatete. Iha vizaun ida apóstolu João haree “anju haat hamriik iha rai nia sikun haat hodi kaer metin hela anin haat husi rai neʼe”. (Apokalipse 7:1) Ita haree anju sira-neʼe ka lae, neʼebé besik atu husik anin neʼebé lori tempu terus boot ba mundu aat? Se ita fiar metin ba buat hirak-neʼe, ita sei haklaken liafuan diʼak hodi la taʼuk.
14. Tanbasá mak ita hakarak atu ‘fó avizu ba ema aat sira’?
14 Nuʼudar ema kristaun neʼebé loos, ita iha ona relasaun diʼak ho Maromak Jeová no esperansa atu moris ba nafatin. Maibé ita mós hatene katak ita iha responsabilidade atu ‘fó avizu ba ema aat atu fila fali husi nia dalan neʼebé aat hodi nuneʼe nia bele kontinua moris’. (Lee Ezequiel [Yehezkiel] 3:17-19. b) Klaru katak laʼós tanba razaun neʼe deʼit mak ita haklaken. Maibé, domin ba Jeová no ba ema mak book ita atu haklaken. Iha Jesus nia ai-knanoik kona-ba ema samaritanu diʼak, Jesus hanorin ita kona-ba hatudu laran-diʼak no domin. Ita bele husu ba ita-nia an: ‘Haʼu mak hanesan ema Samaria neʼebé “hanoin tebetebes” ema hodi haklaken ba sira? Ka, haʼu hanesan amlulik no ema Levi, neʼebé buka razaun oioin atu la haklaken ba ema seluk?’ (Lucas 10:25-37) Se ita iha fiar ba Jeová nia promesa no hadomi ita-nia maluk, ita sei hakaʼas an atu haklaken antes Maromak nia loron mai.
EMA IZRAÉL “LAʼO LIUHUSI TASI MEAN”
15. Tanbasá mak ema Izraél sente katak sira tama iha lasu ida?
15 Moisés nia fiar ba “Ida neʼebé matan la haree” ajuda nia kuandu ema Izraél iha perigu laran depois sira husik rai-Ejitu. Bíblia dehan: “Ema Izraél foti matan no haree ema Ejitu duni tuir sira. Entaun, ema Izraél sai taʼuk tebes no hahú hakilar ba Jeová.” (Êxodo [Keluaran] 14:10-12) Tuir loloos, ema Izraél sira tenke hatene katak situasaun neʼe sei mosu. Jeová fó-hatene nanis ona, dehan: “Haʼu sei husik Liurai Ejitu nia laran sai toos, no nia sei duni sira no haʼu sei hetan glória ba haʼu-nia an liuhusi Liurai Ejitu no nia soldadu hotu; no ema Ejitu sei hatene katak haʼu mak Jeová.” (Êxodo [Keluaran] 14:4) Maski Jeová fó avizu hanesan neʼe, maibé ema Izraél la iha fiar. Sira haree deʼit mak Tasi Mean neʼebé taka netik sira-nia dalan, Liurai Ejitu nia kuda-karreta funu nian mak tuir sira husi kotuk, no bibi-atan ida neʼebé tinan 80 ona mak dirije sira. Sira sente katak sira tama iha lasu ida.
16. Oinsá mak fiar ajuda Moisés iha Tasi Mean?
16 Moisés la sente taʼuk. Ninia fiar ajuda nia atu la haree deʼit ba tasi neʼebé hanetik sira, ka soldadu sira neʼebé hakbesik daudaun. Nia “haree salvasaun husi Jeová”, no nia hatene katak Jeová mak sei halo funu ba ema Izraél. (Lee Êxodo [Keluaran] 14:13, 14. c) Moisés nia fiar neʼe hametin no fó laran-manas ba Maromak nia povu. Bíblia hatete: “Liuhusi fiar mak sira hakur Tasi Mean hanesan laʼo iha rai-maran, maibé kuandu ema Ejitu sira koko atu halo tuir, sira mout hotu.” (Ebreu 11:29) Depois neʼe, “povu komesa atu taʼuk ba Jeová no tau fiar ba Jeová no ba ninia atan Moisés”.—Êxodo (Keluaran) 14:31.
17. Iha futuru, situasaun saida mak sei koko ita-nia fiar?
17 Lakleur tan, ita-nia situasaun sei haree hanesan ita monu iha perigu laran. Antes Armajedón hahú, governu sira iha mundu neʼe sei halakon ona relijiaun sira neʼebé boot liu fali ita-nian. (Apokalipse 17:16) Jeová fó-hatene nanis ona katak ita sei haree hanesan hela iha ‘rai neʼebé la iha protesaun husi moru, besi, ka odamatan boot’. (Ezequiel [Yehezkiel] 38:10-12, 14-16) Iha tempu neʼebá, tuir buat neʼebé ita-nia matan haree, ida-neʼe hanesan ita sei mate. Entaun, ita sei sente oinsá?
18. Esplika toʼok tanbasá mak ita bele laran-metin nafatin durante terus boot.
18 Ita la presiza taʼuk. Tanbasá? Tanba Jeová la fó-hatene nanis deʼit katak ema sei ataka ninia povu, maibé mós promete katak nia sei salva ita. Bíblia dehan: “‘Iha loron neʼe, loron neʼebé Gog ataka rai-Izraél,’ Jeová Naʼi aas liu hotu dehan, ‘haʼu sei hatudu sai haʼu-nia hirus. Ho laran-manas, ho ahi husi haʼu-nia hirus mak haʼu sei koʼalia.’” (Ezequiel [Yehezkiel] 38:18-23) Maromak Jeová sei halakon sira hotu neʼebé hakarak estraga ninia povu. Se ita iha fiar katak nia sei proteje ita durante ninia “loron boot”, ita sei bele haree “salvasaun husi Jeová” no kontinua laran-metin.—Joel 2:31, 32.
19. (a) Jeová no Moisés nia relasaun mak oinsá? (b) Se ita halo tuir Jeová ‘iha ita-nia dalan hotu’, ida-neʼe sei lori rezultadu saida?
19 Agora, mai ita prepara nanis hodi kontinua “hamriik metin hanesan haree Ida neʼebé matan la haree”! Estuda no halo orasaun beibeik hodi sai belun diʼak liután ho Maromak Jeová. Moisés no Jeová sai besik liu, no Jeová uza nia iha dalan neʼebé furak hodi kumpre Ninia hakarak, toʼo Bíblia dehan katak Jeová koñese didiʼak Moisés. (Deuteronômio [Ulangan] 34:10) Moisés mak profeta ida neʼebé espesiál tebes. Se ita iha fiar, ita mós bele iha relasaun diʼak ho Jeová toʼo sai hanesan ita haree nia. Se ita halo tuir nia ‘iha ita-nia dalan hotu’, hanesan Maromak nia Liafuan haruka ita atu halo, nia sei ‘halo ita-nia dalan sai loos’.—Provérbios (Amsal) 3:6.
a Provérbios 29:25: “Nakdedar tanba taʼuk ema mak sai lasu ida, maibé ema neʼebé tau fiar ba Jeová sei hetan protesaun.”
b Ezequiel 3:17-19: “17 Ema nia oan-mane, haʼu halo ona ó nuʼudar ema neʼebé tau matan ba umakain Izraél nian, no bainhira ó rona liafuan husi haʼu-nia ibun, ó tenke fó haʼu-nia avizu ba sira. 18 Bainhira haʼu dehan ba ema aat ida: ‘Ó sei mate’, maibé ó la fó avizu ba ema aat neʼe atu fila husi ninia dalan neʼebé aat hodi nuneʼe nia bele kontinua moris, ema neʼe sei mate duni tanba ninia sala, maibé haʼu sei husu fali ninia raan husi ó. 19 Maski nuneʼe, se ó fó avizu ba ema neʼebé aat, no nia la fila fali hodi troka ninia hahalok aat no husi nia dalan neʼebé aat, nia sei mate tanba ninia sala, maibé ó sei salva ó-nia moris rasik.”
c Êxodo 14:13, 14: “13 Moisés hatete ba povu: ‘Keta taʼuk. Hamriik metin bá no haree salvasaun husi Jeová, neʼebé ohin nia sei lori ba imi. Tanba ema Ejitu neʼebé imi haree ohin, imi sei nunka haree fali sira. 14 Jeová rasik mak sei halo funu ba imi, no imi sei nonook deʼit.’”
