1-3. a) Zu-loe-bʋs la zags wʋsg segda, la wãn to la kẽer maood n na n welg-ba? (Ges-y fotã sẽn be yĩngrã.) b) Roagd sã n wa rat n bas a zakã rãmb n tɩ bao tʋʋma, zu-loe-bʋg la a tõe n paam kambã wubr wɛɛngẽ?

DAAR fãa, a Marilyn sɩd a James sigda tʋʋma ne yaamse. * La a pa paamd ligd tɩ sek a na ra bũmb nins sẽn yaa tɩlae ne-bã ye. A Marilyn rat n sõnga a sɩdã, la a ra teed kẽer n kõ a biig a Jimmy, tɩ yẽ me wõneg a karen-bi-taasã. A rat n sõnga a roagdb kẽer me, la a paam ligd n bĩngi. A zo-rãmb wʋsg kẽnga tẽns a taab n na n tɩ bao ligdi. La a Marilyn sã n da tags loog n bas a zakã rãmb yelle, a yamã yuusdame. Bõe yĩnga?

² A ra yɛɛsda rẽ sẽn na n wa ne zu-loees ninsã. B ra teenda taab a Zeova tũudmã pʋgẽ. A sã n looge, wãn to la b na n tõog n ket n maand rẽ? La a ra mii neb sẽn bas b zags n tɩ tʋmd tẽn-zẽmse, tɩ yẽ sã n getẽ bɩ yaa wa b ket n tũuda a Zeova. La rẽ yĩnga a na n tõog n tũnuga ne ẽntɛrnetã n wub a biigã ne a Zeova ‘saglg la a zãmsg’ bɩ?—Ef. 6:4.

³ A Marilyn baoa saglse. A sɩdã ra pa rat a loogrã ye. La a yeelame t’a sã n yãk yam n na n looge, yẽ pa na n gɩdg-a ye. Kãsem-dãmbã ne tigingã neb a taab sagl-a lame t’a ra looge, la saam-bi-pogs kẽer yeel-a lame t’a segd n loogame.  B ra yeta woto: “Fo sã n nong f zakã rãmba, f segd n loogame. F tõe n ket n tũuda a Zeova.” Baa a Marilyn sẽn da maand sãmb-sãmbã, a basa a James ne a Jimmy, n kẽng tẽn-zẽng n na n tɩ tʋme. * A pʋlmame t’a pa na n kaoos ye.

4. Bõe yĩng tɩ neb wʋsg mi n yik n tɩ tʋmd tẽn-zẽnga, la ãnd dãmb n wubd roagdb nins sẽn maan woto wã kamba?

⁴ A Zeova pa rat t’a nin-buiidã ki kom ye. (Yɩɩl 37:25; Yel. 30:8) Hal pĩnd wẽndẽ, wẽn-tũudb n yik n toeem zĩis sẽn na yɩl n põs kom. Kom yĩng kɩtame t’a Zakoob tʋm a kom-dibli wã tɩ b tɩ ra rɩɩb Ezipti. * (Sɩng. 42:1, 2) La rũndã-rũndã, neb wʋsg sẽn basd b zagsã rãmb n yikd n toeemd zĩisã pa kom yĩng ye. Kẽer tara sam wʋsgo. Sãnda sẽn vɩẽ wã neb yaa naong rãmbã. B sẽn dat n paam naar vɩɩmã kɩtame tɩ wʋsg bas b zags n yik n kẽng zĩig a to b tẽngã pʋgẽ wall tẽn-zẽng n na n tɩ bao ligdi. Naoor wʋsgo, ned sẽn maand woto basda a kom-bõonegã ne b roagd a ye, b kẽema, b yaab-rãmba, wall ne b roagdb a taaba. Pa rẽ bɩ ne a zo-rãmba. Baa sẽn pa nana ne nin-kãensã tɩ b bas b zakã rãmb n tɩ tʋmd zĩig a to wã, b wʋsg tagsdame tɩ sẽn maand kae ye.

5, 6. a) Bõe la a Zezi yeel sũ-noogã la bãanã wɛɛngẽ? b) A Zezi zãmsa a karen-biisã tɩ b pʋʋs n kos bõe? d) A Zeova sẽn pʋlem t’a na n ning-d-la barkã rat n yeelame tɩ bõe?

⁵ A Zezi wakatẽ wã, neb wʋsg ra yaa naong rãmba. Tõe tɩ b ra tagsdame tɩ b sã n paam ligdi, b vɩɩmã na n yɩɩ noogo, tɩ b yamã me gãe bãane. (Mark 14:7) La a Zezi ra pa rat tɩ b teeg arzɛgsã sẽn pa paad wakat fãa wã ye. A ra ratame tɩ b teeg a Zeova, bala bark nins a sẽn kõtã paada wakat fãa. A sẽn wa n zãmsd nebã tãngã zugã, a wilgame tɩ pa arzɛk wall tõnd meng modgr n wat ne sũ-noog la bãan hakɩk ye. Yaa d sẽn na n tar d saasẽ Ba wã zoodo.

⁶ A Zezi sẽn wa n zãmsd a karen-biisã pʋʋsgã, a pa yeel tɩ d kos naar vɩɩm ye. A yeelame tɩ d kos a Zeova t’a kõ-d ‘d rɩɩb rũndã,’ sẽn yaa bũmb nins sẽn yaa tɩlae ne-d daar fãa wã. A yeela a kɛlgdbã woto vẽenega: “Bɩ y ra bĩng-y paoong dũniyã ka . . . ye. Bĩng-y yãmb paoongã [“saasẽ,” MN].” (Mat. 6:9, 11, 19, 20) D tõe n kɩsa sɩd t’a Zeova na n ning-d-la bark wa a sẽn pʋlmã. Bark-kãng pa bũmb sẽn wilgd tɩ d tata a yam bal ye. Wilgdame t’a na n kõ-d-la bũmb nins sẽn yaa tɩlae ne-dã me. Sɩd me, sẽn na yɩl n paam sũ-noog la bãan hakɩka, d segd n teega d Ba a Zeova lakae, pa arzɛgsã ye.—Karm-y Matɩe 6:24, 25, 31-34.

7. a) A Zeova ratame tɩ ãnd dãmb wub kamba? b) Bõe yĩng tɩ yaa roagdb a yiibã n segd n wub b kambã?

⁷ Bũmb d sẽn tõe n maan n wilgd tɩ d baooda Wẽnnaam tɩrlmã yaa d sẽn na n get d zakã rãmb yell wa a sẽn datã. Wala makre, a Moiiz tõogã wilgame tɩ roagdbã segd n zãmsa b kambã a Zeova noyã. Kiris-neb nins sẽn dat n ta a Zeova yamã segd n maana woto. (Karm-y Tõod 6:6, 7.) Yaa kambã roagdbã la Wẽnnaam kõ tʋʋm-kãngã, pa b yaab-rãmbã wall ned a to ye. Rĩm a Salomo yeelame: ‘M biiga, reeg f ba zãmsgo, la ra bas bũmb nins f ma sẽn wilg foomã ye.’ (Yel. 1:8) A Zeova ratame tɩ zak rãmb vɩ ne taaba, tɩ roagdb a yiibã fãa tõe n zãms b kambã la b wilg-b sore. (Yel. 31:10, 27, 28) Kambã sã n be ne b roagdbã daar fãa, n wʋmd b roagdbã sẽn gomd a Zeova  yelle, la b ne bũmb nins b sẽn maand a tũudmã pʋgẽ wã, b tõe n dɩka b togs-n-taare.

8, 9. a) Roagd sã n bas a zak rãmb n looge, wae n wata ne bõe? b) Roagdbã ne b kambã sã n pa vɩ ne taaba, wata ne zu-loe-bʋse?

⁸ Neb wʋsg sã n wa rat n bas b zags n tɩ bao ligdi, b miime tɩ na n waa ne zu-loeese. La ned pa tõe n bãng zu-loe-kãens fãa ye. (Yel. 22:3) * A Marilyn loogrã poor bala, a sũurã sɩnga sãoongo, a sẽn pa le be ne a zakã rãmbã yĩnga. Ra sãamda a sɩdã la a biigã sũur me. A sã n da bool fãa, a biig a Jimmy sokd-a-la woto: “Bõe yĩng tɩ fo loog n bas maam?” A Marilyn ra tagsame t’a na n maana kiis a wãn bala. La wa n lebga yʋʋma. Sẽn paase, a zakã neb manesem toeemame, tɩ sãamd a sũuri. Wala makre, a Jimmy pa le nong goama, n pa le sakd n togs-a bũmb sẽn be a sũurẽ ye. A Marilyn yeela woto: “A pa le nong maam ye.”

⁹ Roagdbã ne b kambã sã n pa vɩ ne taaba, tõe n kɩtame tɩ b pa nong taab sõma ye. Tõe n kɩtame meng tɩ b sẽn tagsd bũmb ning sõma ne wẽngã wɛɛngẽ wã toeeme. * Kambã sã n yaa bõonese, tɩ roagdbã bas-b n tɩ kaoose, zu-loees nins welgrã sẽn wat ne wã me na n yɩɩ wʋsgo. A Marilyn yeela a Jimmy tɩ bũmb ning fãa a sẽn maandã yaa yẽ yĩnga. La a Jimmy ra tagsdame t’a ma pa le nong-a ye. Sɩngrẽ wã, a ma wã sẽn da zãr ne-bã sãamda a sũuri. La kaoosg zugẽ, a ma wã sã n da lebg n wa na n ges-ba, a sẽn be yambẽ wã sãamda a sũuri. A Jimmy wa n tagsda wa kamb wʋsg sẽn zãr ne b roagdb sẽn tagsdã, n getẽ t’a ma pa le tar sor n na n yeel tɩ yẽ nong-a la a waoogd-a ye.—Karm-y Yelbũn 29:15.

10. a) Roagd sã n kõt a kamb kũun n yaool n pa be yambẽ, tõe n waa ne bõe? b) Bõe la roagd sẽn dat n pa yɩɩg n wub a kamb pa tõe n maane?

¹⁰ A Marilyn ra toonda a Jimmy ligd la bũmb a taaba, n tagsdẽ tɩ rẽ na n kɩtame tɩ yẽ sẽn zãr ne-a wã ra sãam a sũur wʋsg ye. La a wa n bãngame t’a kẽesda a biigã weoogo. Ra yaa wa a wilgd-a lame t’a segd n nonga ligdã n yɩɩd a zakã neb la a Zeova menga. (Yel. 22:6) A Jimmy wa n yeel-a lame t’a kell n pa be n toond ligd la bũmb a taaba. A Marilyn wa n bãngame t’a pa tõe n tũnug ne lɛta, telefõn la ẽntɛrnetã n wub a biigã tɩ  zems ye. A yeelame tɩ f pa tõe n tũnug ne ẽntɛrnetã n mobg f biiga, wall f tall-a n tɩ gãneg ye.

11. a) Ned sã n bas a pag bɩ a sɩd n tɩ tʋmd tẽn-zẽnga, wãn to la tõe n sãam b kãadmã? b) Bõe n sõng a Marilyn t’a bãng t’a segd n lebg n kulame?

¹¹ A Marilyn ne a Zeova zoodã pãng boogame. Semen fãa, yaa vugr la a kẽnd tigissã la a yit koe-moonegã. Wakat ninga, a pa tõogd ye. Yẽ ne a sɩdã me ra pa le noom woto ye. Sẽn paase, a tʋʋmdã taoor-soab ra rood-a lame, tɩ pa nana ye. A Marilyn ne a James sẽn da zãr ne taab n pa tõe n teeg taab b zu-loees sasa wã, b ned kam fãa baoa belsg zĩig a to. Woto wa n kɩtame tɩ ra kellẽ bilf tɩ b yo. A Marilyn bãngame tɩ baa bãmb sẽn pa yo wã, b kãadmã tõe n sãamame. Biiblã sagenda sẽn kẽ-b kãadmã tɩ b ned kam fãa segd n wilgame t’a nonga a to wã, la a kõ-a a rẽnd lagengã wɛɛngẽ. A Marilyn ne a James sẽn zãr ne taabã, b pa tõe n ges taab yell sõma woto ye. (Sal. Yɩɩl. 1:2; 1 Kor. 7:3, 5) Sẽn paase, bãmb ne b biigã pa tõe n teel taab a Zeova tũudmã pʋgẽ ye. A Marilyn yeela woto: “Mam sẽn wa n wʋm tigis-kãsengẽ tɩ d sã n dat n põs a Zeova ra-kãsengã sasa, d segd n maanda zak pʋgẽ Biibl zãmsgã n pa vaandẽ wã, m bãngame tɩ m segd n lebg n kulame.” A ra segd n lebs n manega yẽ ne a Zeova zoodã, la a mao tɩ yẽ ne a zakã rãmb le vɩ ne taab ne sũ-noogo.

12. Biiblã sagl-bʋg la d tõe n kõ sẽn bas-b b zags rãmb n tɩ tʋmd tẽn-zẽngã?

¹² A Marilyn sẽn wa n yeel t’a na n lebg n kulame wã, neb kẽer kõ-a-la sagl-sõma, tɩ sãnda kõ-a sagl-yoodo. A sẽn da be tiging ningã kãsem-dãmb pẽg-a lame. La neb a taab sẽn da bas b zags rãmb wa yẽ bao n na n komsa a raoodo, n da yetẽ t’a sã n lebg n kuli, a pa tõe n tɩ paam ligd tɩ sek-a ye. Wall tɩ b rɩk a togs-n-taarã, b ra yet-a-la woto: “Pa na n kaoos la fo lebg n wa ka ye.” La kiris-nebã pa segd n maan woto ye. B segd n sagla “pʋg-bi tɩ b nong b sɩdbã ne b kambã, . . . la b ges b zak yell neere, . . . tɩ Wẽnnaam goamã ra paam tʋʋsg ye.”—Karm-y Tɩt 2:3-5.

13, 14. Kiris-ned roagdb sã n wa rat t’a maan bũmb sẽn pa zems ne a Zeova raabã, bõe yĩng tɩ yaa tɩlae t’a tall tẽebo? Rɩk-y makre.

¹³ Neb wʋsg sẽn tɩ tʋmd tẽn-zems sẽn yi tẽns ninsã neb tara minimd b fãa sẽn segd n tũ. Ne bãmba, b segd n saka b roagdbã raabo, sẽn yɩɩd fãa, b ma wã ne b ba wã raabo. Rẽnd kiris-ned roagdb sã n wa rat t’a maan bũmb sẽn pa zems ne a Zeova raabã, yaa tɩlae t’a tall tẽeb sẽn tar pãng n tõog n zãgse.

 ¹⁴ Wala makre, a Carin yeela woto: “Mam sẽn wa n dog m biig a Don tɩ maam ne m sɩdã bee tẽn-zẽng n tʋmdẽ. Rẽ tɩ mam nan sɩnga Biiblã zãmsgo. Tõnd roagdbã fãa ra tẽedame tɩ mam na n talla a Don n wa bas ne m baaba la m ma, tɩ b wub-a n wa tãag wakat ning maam ne m sɩdã sẽn na n paam ligd wʋsgo.” A Carin yeelame t’a na n wuba a biig a toore, t’a sɩdã ne a roagdbã fãa yaand-a, n yetẽ t’a yaa kʋɩɩma. A Carin paasa woto: “Wakat kãnga, m da pa tolg n kɩs sɩd tɩ m sã n tɩ bas a Don ne m roagdbã yʋʋm a wãn yĩnga, yaa wẽng ye. La m da miime t’a Zeova ratame tɩ tõnd sẽn yaa roagdbã wub d biigã.” A Carin sẽn wa n le rɩk pʋga, a sɩdã sẽn pa a Zeova Kaset soabã yeelame t’a yiis pʋga. A Carin sẽn da zoe n yãk yam tɩ yɩ sõma wã sõng-a lame, t’a tõog n kell n sak a Zeova, n pa yiis pʋgã ye. Rũndã-rũndã, yẽ ne a sɩdã la b kambã sũur nooma b sẽn be ne taabã. A Carin sã n da tall a biig a ye wall b yiibã fãa n tɩ kõ neb a taab tɩ b wubi, yɛlã ra tõe n yɩɩ toor fasɩ.

15, 16. a) Wãn to la b wub a Vicky? b) Bõe yĩng t’a pa rat n maan woto ne a bi-puglã?

¹⁵ Saam-bi-poak yʋʋr sẽn boond t’a Vicky yeela woto: “Mam roagdbã tɩ basa maam m yaab-poakã nengẽ tɩ m pa be yʋʋm a wãna, tɩ mam yaoã yaool n da be ne-ba. M sẽn wa n leb m roagdbã nengẽ wã, m mikame tɩ m pa le nong-b wa pĩndã ye. Mam yaoã ra tõe n togs-b-la bũmb sẽn be a sũurẽ, n mi n tõe n mobg-ba, hal tɩ b noom ne taaba. La mam yẽ ra pa tõe n sõs ne m roagdbã sõma ye. Hal baa m bɩʋʋngã zugẽ, ra ket n yaa toog ne-m tɩ m togs-b bũmb sẽn be m sũurẽ. Mam ne m yaoã yeela d roagdbã tɩ d na n gesa b yell b kʋʋlem zugẽ. La mam na n maana rẽ m sẽn mi tɩ yaa tɩlaeyã yĩnga, tɩ m yaoã get b yell a sẽn nong-bã yĩnga.”

¹⁶ A Vicky paasame: “Rũndã-rũndã, m ma ratame tɩ mam tall m bi-puglã n wa bas ne yẽ, wa yẽ sẽn tall maam n tɩ bas ne a ma wã. M maaga m yĩng n wilg-a tɩ m pa na n maan woto ye. Maam ne m sɩdã rat n wuba d biigã d toore, n wilg-a a Zeova noyã. Sẽn paase, m pa rat tɩ maam ne m bi-puglã wa pa noom ne taab ye.” A Vicky bãngame tɩ f sã n dat sũ-noog hakɩka, f segd n nonga a Zeova la a noyã n yɩɩd arzɛkã la f roagdbã. A Zezi yeela woto: ‘Ned ka be sẽn tõe n sak zu-soben-dãmb a yiib ye.’ Rat n yeel tɩ ned kae n tõe n pʋgd Wẽnnaam, la a pʋgd arzɛgs ye.—Mat. 6:24; Yik. 23:2.

17, 18. a) Bõe yĩng tɩ kiris-ned pa segd n wa tagsdẽ tɩ sẽn maand kae? b) Sogs-bʋs la sõsg ning sẽn pʋgdã na n leoke?

¹⁷ D Ba a Zeova pʋlmame tɩ d sã n lʋɩɩs a Rĩungã la a tɩrlmã taoore, a na n kõo tõnd bũmb nins sẽn yaa tɩlae ne-dã. (Mat. 6:33) Rẽnd baa sã n wa pa nana ne kiris-neda, a pa segd n tags tɩ sẽn maand kae ye. A Zeova pʋlmame tɩ sẽn wa n yaa zu-loɛɛg ning fãa la d segda, a na n sõng-d lame tɩ d kell n tũ Biiblã noy n ta a yam. (Karm-y 1 Korẽnt dãmb 10:13.) D sã n pʋʋsd a Zeova n kot yam la sor-wilgri, n tũud a saglsã la a noyã, d wilgdame tɩ d teeg-a lame. (Yɩɩl 37:5, 7) A na n nee modgr ning d sẽn maand n tũud-a wã, n kõt-d bũmb nins sẽn yaa tɩlae ne-dã. A na n ning-d-la bark d sẽn maand fãa pʋgẽ.—Ges-y Sɩngr 39:3.

¹⁸ La bõe la ned sẽn da bas a zak rãmb tõe n maan n welg zu-loees nins rẽ sẽn wa ne wã? Bõe la d tõe n maan n bao bũmb nins sẽn yaa tɩlae ne d zakã rãmba, la d kell n pa ne-ba? La wãn to la d tõe n sõng d taabã tɩ b kell n pa ne b zagsã rãmba? Sõsg ning sẽn pʋgdã na n leoka sogs-kãensã.