A Hu Na Ane A Nga Kona U Shumela Vhaṋe Vhavhili
“A hu na ane a nga kona u shumela vhaṋe vhavhili . . . Ni nga si kone u shumela Mudzimu na Lupfumo.”—MAT. 6:24.
1-3. (a) Ndi dzifhio thaidzo dza tshelede dzine vhanzhi vha sedzana nadzo ṋamusi, nahone vhaṅwe vha lingedza u dzi piringulula nga nḓila-ḓe? (Sedzani tshifanyiso tsha u thoma.) (b) Ndi mbilaelo dzifhio dzine dza vha hone musi zwi tshi ḓa kha u alusa vhana?
MARILYN * u ri: “Munna wanga James, u vhuya hayani o neta ḓuvha ḽiṅwe na ḽiṅwe, fhedzi muholo wawe a u koni u ṱanganya zwishaiwa zwashu zwa ḓuvha ḽiṅwe na ḽiṅwe. Ndo vha ndi tshi ṱoḓa u fhungudza muhwalo wawe nahone nda mu thusa u rengela ṅwana washu Jimmy zwiṅwe zwithu zwavhuḓi zwine vhane a dzhena navho tshikolo vha zwi takalela.” Marilyn o vha a tshi ṱoḓa u thusa mashaka awe na u vhulunga tshelede a tshi itela vhumatshelo. Vhunzhi ha khonani dzawe vho pfulutshela kha maṅwe mashango u itela u hola tshelede nnzhi. Fhedzi a tshi elekanya nga ha honoho vhukando, o ḓipfa o hanganea vhukuma. Ndi ngani?
2 Marilyn o vha a tshi ofha u sia muṱa wawe une a u funa na zwithu zwa muya zwe vha vha vha tshi zwi ita tshifhinga tshoṱhe. Naho zwo ralo, o humbula nga ha vhaṅwe vhe vha ya kha maṅwe mashango lwa tshifhinganyana nahone miṱa yavho i vhonala i tshi khou bvelela nga lwa muya. Fhedzi o ḓivhudzisa nga ha nḓila ine a nga alusa ngayo Jimmy musi e kule. Naa a nga kona u alusa ṅwana wawe nga nḓila i bvelelaho ‘nga u mu laya na u mu ṱuṱuwedzela zwa Yehova’ nga Inthanethe?—Vhaef. 6:4.
3 Marilyn o ṱoḓa vhulivhisi. Munna wawe o vha a sa ṱoḓi uri a ṱuwe, naho o mu vhudza uri a nga si lingedze u mu thivhela. Vhahulwane na vhaṅwe tshivhidzoni vho mu eletshedza uri a si ṱuwe, fhedzi vhahawe vha tshisadzini vho vhalaho vha mu ṱuṱuwedza uri a ye kha ḽiṅwe shango. Vho ri: “Arali ni tshi funa muṱa waṋu, ni ḓo ṱuwa. Ni ḓo ḓi kona u bvela phanḓa ni tshi shumela Yehova.” Hu sa londwi u timatima hawe, Marilyn a onesa James na Jimmy nga u vha khisa nahone a ya u shuma kha ḽiṅwe shango. O vha fulufhedzisa a ri: “Ndi nga si ṱuwe lwa tshifhinga tshilapfu.”
VHUḒIFHINDULELI HA MUṰA NA MAITELE A BIVHILI
4. Ndi ngani vhanzhi vha tshi pfuluwa, nahone ndi vhafhio vhane vha fheleledza vha tshi khou ṱhogomela vhana vhavho?
4 Yehova ha ṱoḓi vhashumeli vhawe vha tshi shaya, nahone u pfuluwa ndi iṅwe nḓila ya u shavha vhushai u bva kale. (Ps. 37:25; Mir. 30:8) Musimulalushaka Yakobo o ruma vharwa vhawe Egipita u renga zwiḽiwa a tshi itela u iledza nḓala. * (Gen. 42:1, 2) Ṋamusi, vhunzhi ha vhane vha pfuluwa a vha sii mahaya avho nga nṱhani ha uri vha khou sika nga nḓala. Naho zwo ralo, vha nga kha ḓi pfuluswa nga nṱhani ha u vha na zwikolodo zwihulwane. Vhaṅwe vha na lutamo lwa u khwinisa matshilele a miṱa yavho. U itela u swikelela zwipikwa zwa ekonomi i re fhasi, vhanzhi vha fheleledza vha tshi dzula kule na miṱa yavho, hu sa londwi uri vha pfulutshela kha ḽiṅwe shango kana kha shango ḽavho. Kanzhi vha sia vhana vhavho vhaṱuku vha tshi khou ṱhogomelwa nga mubebi muthihi, nga ṅwana wa tanzhe, vhomakhulu, maṅwe mashaka kana dzikhonani. Naho zwi tshi vhavha kha vhapfuluwi u sia vhafarisi kana vhana, vhanzhi vhane vha ya kha maṅwe mashango vha vhona u nga a hu na zwine vha nga ita.
5, 6. (a) Yesu o funza mini nga ha dakalo na tsireledzo? (b) Yesu o funza vhatevheli vhawe uri vha rabelele zwithu zwifhio? (c) Yehova uri fhaṱutshedza nga nḓila-ḓe?
5 Misini ya Yesu, vhathu vhanzhi vho vha vhe vhashai, vha tshi ḓipfa vhe vha fhasi nahone vha nga vha vho ḓipfa u nga vha ḓo takala vhukuma na u tsireledzea arali vho vha vhe na tshelede nnzhi. (Marko 14:7) Fhedzi Yesu o vha a tshi ṱoḓa vhathu vha tshi vhea fulufhelo ḽavho huṅwe fhethu. O vha a tshi ṱoḓa uri vha ḓitike nga Yehova, Tshisima tsha lupfumo lwa tshoṱhe. Kha Pfunzo ya Yesu ya Thavhani, o ṱalutshedza uri dakalo ḽa vhukuma na u tsireledzea a zwi ḓitiki nga zwithu zwi vhonalaho na nga vhuḓidini hashu, fhedzi zwi ḓitika nga vhushaka hashu na Khotsi ashu wa ṱaḓulu.
6 Kha thabelo yawe ya tsumbo, Yesu o ri funza u rabelela zwishaiwa zwashu zwa ḓuvha ḽiṅwe na ḽiṅwe, “tshinkwa tshashu tsha ḓuvha ḽa ṋamusi,” hu si tsireledzo ya zwa tshelede. O vhudza vhathetshelesi vhawe nga ho livhaho a ri: “Litsha u ḓikuvhanganyela lupfumo fhano kha ḽifhasi . . . Nṱhani hazwo, ḓikuvhanganyele lupfumo ngei ṱaḓulu.” (Mat. 6:9, 11, 19, 20) Ri nga fulufhela uri Yehova u ḓo ri fhaṱutshedza samusi o fulufhedzisa. Mudzimu ha ri fhaṱutshedzi nga u sokou ri ṱanganedza; u ri ṋea zwine ra zwi shaya ngangoho. Vhukuma, u itela uri ri wane dakalo ḽa vhukuma na tsireledzo, ri tea u fulufhela Khotsi ashu a re na vhulenda u fhira u fulufhela tshelede.—Vhalani Mateo 6:24, 25, 31-34.
7. (a) Yehova o hwesa vhafhio vhuḓifhinduleli ha u alusa vhana? (b) Ndi ngani vhabebi vhoṱhe vha tshi fanela u shela mulenzhe kha u alusa vhana vhavho?
7 U “ṱoḓa Muvhuso wa Mudzimu na u luga hawe u thoma” zwi katela u dzhia vhuḓifhinduleli ha muṱa nga nḓila ine Yehova a vhu dzhia ngayo. Mulayo wa Mushe u katela enea maitele ane a shuma kha Vhakriste: Vhabebi vha fanela u gudisa vhana vhavho zwithu zwa muya. (Vhalani Doiteronomio 6:6, 7.) Mudzimu o hwesa vhabebi honoho vhuḓifhinduleli, hu si vhomakhulu kana vhaṅwe vhathu. Khosi Salomo o amba uri: “Ṅwana’nga, thetshelesa U tshi laiwa nga vho-khotsi-au; U songo nyadza mulayo wa mme-au.” (Mir. 1:8) Yehova o vha a tshi ṱoḓa uri vhabebi vhoṱhe vha livhise na u gudisa vhana vhavho. (Mir. 31:10, 27, 28) Vhunzhi ha zwine vhana vha zwi guda kha vhabebi vhavho, zwihuluhulu musi zwi tshi ḓa kha zwithu zwa muya, vha zwi pfa musi vhabebi vhavho vha tshi amba nga ha Yehova tshifhinga tshoṱhe na kha tsumbo yavho.
MASIANDOITWA A SONGO LAVHELELWAHO
8, 9. (a) Ndi tshanduko dzifhio dzine kanzhi dza vha hone musi vhabebi vha sa dzuli na muṱa? (b) U dzula kule na muṱa zwi vha na mvelelo dzifhio siani ḽa maḓipfele na matshilele?
8 Musi vha sa athu u ya kha maṅwe mashango, vhapfuluwi vha lingedza u sedza khombo dzine dza nga vha hone na zwine vha nga xelelwa ngazwo, fhedzi vha si gathi vha vhona hu tshee nga phanḓa masiandoitwa a u ṱutshela muṱa wavho. (Mir. 22:3) * Musi Marilyn a tshi kha ḓi tou bva u ṱuwa, o thoma u pfa vhuṱungu vhuhulu nge a vha o no vha kule na muṱa wawe. Na munna wawe na murwa wavho vho ḓipfa nga yeneyo nḓila. Jimmy we a vha a tshee muṱuku o vha a tshi ṱolou vhudzisa uri, “Ndi ngani vho ntsia?” Marilyn o vha o dzudzanya uri u ḓo ṱuwa lwa miṅwedzi i si gathi, fhedzi yeneyo miṅwedzi yo vha miṅwaha, a ṱhogomela uri hu na tshanduko i si yavhuḓi muṱani wawe. Jimmy o vha o no fhumulesa nahone ho vha hu si tsheena vhudavhidzano vhukati hawe na mme awe. Mme awe o amba o ṱungufhala a ri: “O vha a si tsha mpfuna.”
9 Musi vhabebi na vhana vha si tsha dzula vhoṱhe sa muṱa, vha nga vhaisala siani ḽa maḓipfele nahone zwa tshinya matshilele avho. * Musi vhana vhe vhaṱuku nahone ha fhela tshifhinga tshilapfu vha sa dzuli na vhabebi vhavho, hu vha na khombo khulwane. Marilyn o ṱalutshedza Jimmy uri o vha a tshi khou zwi itela u mu vhuyedza. Fhedzi Jimmy o vhona u nga mme awe vho mu laṱa. U thomani o vha a sa takali musi mme awe vhe siho. Fhedzi musi mme awe vha tshi ḓa u mu dalela, o vha a sa takaleli u vha hone havho. Samusi zwo ḓowelea kha vhana vhe vha siiwa nga vhabebi vhavho, Jimmy o vha a tshi vhona u nga ho ngo tsha tea u thetshelesa na u funa mme awe.—Vhalani Mirero 29:15.
Ni nga si kone u kuvhatedza ṅwana waṋu ni tshi shumisa Inthanethe (Sedzani phara 10)
10. (a) Vhana vha kwamea hani musi vhabebi vha tshi vha rumela zwifhiwa nṱhani ha u vha ṋea tshifhinga? (b) Ndi zwifhio zwine zwa shayea musi mubebi a tshi lingedza u alusa ṅwana wawe e kule nae?
10 Naho Marilyn o lingedza u lifha tshifhinga tshe a vha e siho nga u rumela tshelede na zwifhiwa, o zwi ṱhogomela uri u khou ḓisendedza kule na murwa wawe na u mu gudisa a sa vhuyi a zwi ṱhogomela, uri a vhee zwithu zwi vhonalaho phanḓa u fhira zwithu zwa muya na vhushaka ha muṱa. (Mir. 22:6) Jimmy o vha a tshi vhudza mme awe uri: “Vha songo tsha vhuya. Vha sokou bvela phanḓa vha tshi rumela zwifhiwa.” Marilyn o thoma u zwi ṱhogomela uri a nga si kone u alusa murwa wawe nga luṱingo, marifhi kana u amba nga zwishumiswa zwa Inthanethe. U ri: “Ni nga si kone u kuvhatedza ṅwana waṋu kana u mu khisa musi a tshi eḓela ni tshi shumisa Inthanethe.”
Ndi khombo ifhio ine na nga sedzana nayo musi ni sa dzuli na mufarisi waṋu? (Sedzani phara 11)
11. (a) U dzula kule na mufarisi u itela mushumo wa u ḓitshidza zwi kwama hani mbingano yavho? (b) Muṅwe wahashu wa tshisadzini o ṱhogomela hani uri u tea u humela hayani uri a vhe na muṱa wawe?
11 Marilyn o vha e si tsheena vhushaka havhuḓi na Yehova u katela na munna wawe James. O vha a tshi ya tshivhidzoni tsha Vhukriste na vhuḓinḓani lu sa fhiri luthihi nga vhege nahone o vha a tshi fanela u lwisana na milingo ya mutholi wawe we a vha a tshi ṱoḓa u ita zwa vhudzekani nae. Samusi Marilyn na James vho vha vhe si na muthu ane vha nga mu vhudza nga ha thaidzo dze vha sedzana nadzo, vho amba na vhaṅwe nga ha maḓipfele avho nahone vha ṱoḓa u wela tshikwekweni tsha u ḓifara luvhi nga zwa vhudzekani. Marilyn o zwi vhona uri naho ene na munna wawe vha songo ṱonḓola musi vha sa dzuli vhoṱhe, vho vha vha sa koni u tevhela vhulivhisi ha Bivhili ha u ṱhogomelana siani ḽa maḓipfele na u fushana siani ḽa ṱhoḓea dza vhudzekani. Vho vha vha sa koni u somolelana zwa haṋwani, u sedzana maṱoni kana u ṅwethuwa, u farana nga nḓila ya u sumbedza lufuno, u kuvhatedzana, u sumbedzana “lufuno,” kana u ita “ṱhoḓea” dza mbingano. (Ngosha 1:2; 1 Vhakor. 7:3, 5) Vho vha vha sa koni u gwadamela Yehova vhoṱhe na murwa wavho. Marilyn u ri: “Musi ndi tshi zwi pfa buthanoni uri vhurabeli ha muṱa ha tshifhinga tshoṱhe ndi ha ndeme kha riṋe u itela u ponyoka ḓuvha ḽihulu ḽa Yehova, nda zwi pfesesa uri ndi tea u humela hayani. Ndo vha ndi tshi tea u vusulusa vhumuya hanga na vhutshilo ha muṱa.”
NYELETSHEDZO YAVHUḒI NA I SI YAVHUḒI
12. Ndi nyeletshedzo ifhio yo thewaho Maṅwaloni ine ya nga ṋewa vhane vha dzula kule na miṱa yavho?
12 Musi Marilyn a tshi dzhia phetho ya u humela hayani, vhaṅwe vho mu ṋea nyeletshedzo yavhuḓi na i si yavhuḓi. Vhahulwane vha tshivhidzoni tsha shango ḽe a vha e khaḽo vho mu khoḓa nga nṱhani ha lutendo na tshivhindi tshawe. Fhedzi vhaṅwe vhe vha vha vha tshi dzula kule na vhafarisi na miṱa yavho a vho ngo mu khoḓa. Nṱhani ha u tevhela tsumbo yawe yavhuḓi, vho lingedza u mu kula nungo. Vho ri: “Ni ḓo dovha na vhuya hu si kale. Ni ḓo badela hani zwikolodo arali na humela hayani?” Nṱhani ha u sokou amba zwithu zwi kulaho nungo, Vhakriste nga riṋe vha fanela u ‘humbudza vhafumakadzi vhaswa uri vha fune vhanna vhavho, khathihi na u funa vhana vhavho, vha shume mahayani,’ mahayani avho, “uri ipfi ḽa Mudzimu ḽi si ambiwe luvhi.”—Vhalani Tito 2:3-5.
13, 14. Ndi ngani zwi tshi ṱoḓa lutendo u itela u vhea Yehova u thoma u fhira zwilavhelelwa zwa muṱa? Fanyisani.
13 Vhathu vhanzhi vhane vha pfuluwa vha tshi bva kha maṅwe mashango vho aluswa kha mvelele dzine dza ombedzela nga maanḓa sialala na u ṱunḓela muṱa, zwihuluhulu vhabebi. Arali Mukriste a sa tevhela eneo maitele o ḓoweleaho kana lutamo lwa muṱa a tshi itela u takadza Yehova, u vha a tshi khou sumbedza u vha na lutendo.
14 Ṱhogomelani mafhungo a Carin, u ri: “Musi murwa wanga Don a tshi bebiwa, nṋe na munna wanga ro vha ri tshi shuma kha ḽiṅwe shango nahone ndo vha ndi kha ḓi tou u bva u thoma u guda Bivhili. Muṅwe na muṅwe muṱani o vha a tshi lavhelela uri ndi ise Don hayani uri a aluswe nga vhabebi vhanga u swika vhuimo hashu ha tshelede vhu tshi vha khwine.” Musi Carin a tshi ima kha ḽa u alusa Don nga dzawe, mashaka awe u katela na munna wawe, vho amba uri u a bvafha nahone vha mu sea. Carin u ri: “Ngoho ndi ya uri nga tshenetsho tshifhinga ndo vha ndi sa pfesesi zwavhuḓi uri ho vha ho khakhea mini nga u isa Don kha vhabebi vhanga lwa miṅwaha i si gathi. Fhedzi ndo vha ndi tshi zwi ḓivha uri Yehova o ṋea mushumo wa u alusa murwa washu riṋe—samusi ri vhabebi vhawe.” Musi Carin a tshi dovha a vhifha muvhilini, munna wawe ane a si vhe mutendi o mu kombetshedza uri a reḓule thumbu. Phetho yavhuḓi ye Carin a i dzhia yo khwaṱhisa lutendo lwawe nahone a imela Yehova a sa timatimi. Zwino ene, munna wawe na vhana vhawe vha takalela uri vha dzula vhoṱhe. Arali Carin o ṱuwisa ṅwana wawe kana vhoṱhe uri vha aluswe nga vhaṅwe, mvelelo dzo vha dzi tshi ḓo vha dzi si dzavhuḓi.
15, 16. (a) Ṱalusani tshenzhelo ya muṅwe wa tshisadzini we a si aluswe nga vhabebi vhawe. (b) Ndi ngani o khetha u ita zwo fhambanaho kha ṅwananyana wawe?
15 Iṅwe Ṱhanzi ine ya pfi Vicky yo amba uri: “Lwa miṅwaha i si gathi, ndo aluswa nga makhulu wanga, naho vhabebi vhanga vho vha vha tshi dzula na murathu wanga. Musi ndi tshi vho dzula na vhabebi vhanga, ndo vha ndi si tsha vha takalela. Murathu wanga o vha a tshi amba navho o vhofholowa, a tshi vha kuvhatedza na u ḓiphina nga vhushaka ha tsini navho. Ndo ḓipfa ndi kule na vhabebi vhanga, naho ndo no aluwa, zwo vha zwi tshi nkonḓela u vha sumbedza nḓila ine nda ḓipfa ngayo zwa vhukuma.” Nṋe na murathu wanga ro khwaṱhisedza vhabebi vhashu uri ri ḓo vha ṱhogomela musi vho no vha vhalala. Fhedzi ndi ḓo zwi ita u itela u sokou ḓadzisa mulayo, ngeno murathu wanga a tshi ḓo zwi ita nga nṱhani ha lufuno.”
16 Vicky u ri: “Zwino mme anga vha ṱoḓa ndi tshi vha ṋea ṅwananyana wanga uri vha mu aluse, u fana na zwe vha zwi ita kha nṋe musi vha tshi nthumela kha mme avho. Nda hana nga vhuṱali u ita nga u ralo. Nṋe na munna wanga ri ṱoḓa u alusa ṅwana washu nga nḓila ine Yehova a ṱoḓa ri tshi mu alusa ngayo. Nahone a thi ṱoḓi u tshinya vhushaka hanga na ṅwananyana wanga.” Vicky o vhona uri nḓila ya khwine ya u bvelela ndi u vhea Yehova na maitele awe phanḓa ha zwipikwa zwa u vha na tshelede na zwilavhelelwa zwa muṱa. Yesu o amba nga hu pfalaho uri: “A hu na ane a nga kona u shumela vhaṋe vhavhili,” Mudzimu na Lupfumo.—Mat. 6:24; Ek. 23:2.
YEHOVA U ITA URI VHUḒIDINI HASHU VHU “BVELELE”
17, 18. (a) Ndi zwifhio zwine Vhakriste vha nga zwi ita tshifhinga tshoṱhe? (b) Ri ḓo ṱolisisa mbudziso dzifhio theroni i tevhelaho?
17 Khotsi ashu Yehova, o ḓikumedzela uri thusa nga zwithu zwine ra zwi shaya vhukuma arali ra vhea Muvhuso na u luga hawe phanḓa vhutshiloni hashu. (Mat. 6:33) Nga zwenezwo, hu na zwine Vhakriste vha ngoho vha nga zwi ita tshifhinga tshoṱhe. Yehova u ri fulufhedzisa u ri ṋea ‘nḓila ine ra ḓo bva ngayo’ ine ya sa ḓo dzhiela fhasi maitele a Bivhili, hu sa londwi khaedu dzine ra ṱangana nadzo. (Vhalani 1 Vhakorinta 10:13.) Musi ri tshi ‘lindela’ Yehova, ri tshi ‘mu fulufhela’ nga u rabelela vhuṱali na vhulivhisi hawe na nga u tevhela ndaela na maitele awe, ‘u ḓo ri shumela.’ (Ps. 37:5, 7) U ḓo fhaṱutshedza vhuḓidini hashu vhu bvaho mbiluni ha u shumela ene fhedzi sa Muṋe washu wa ngoho. Arali ra mu vhea u thoma, u ḓo ita uri vhutshilo hashu vhu “bvelele.”—Vhambedzani Genesi 39:3, NW.
18 Ndi mini zwine zwa nga thusa miṱa u itela u dzudzanya vhuleme ho bveledzwaho nga u fhandekana? Ndi vhukando vhufhio vhu shumaho vhune ra nga vhu dzhia u itela u ṱunḓela miṱa yashu ri sa dzuli kule nayo? Nahone ri nga ṱuṱuwedza hani vhaṅwe nga lufuno u dzhia phetho dzavhuḓi kha ḽeneḽi sia? Thero i tevhelaho i ḓo ṱolisisa dzenedzi mbudziso.
^ par. 1 Madzina o shandulwa.
^ par. 4 Kha nyendo dzavho dza ngei Egipita, vharwa vha Yakobo vha nga kha ḓi vha vho fhedza vhege dzi ṱoḓaho u vha tharu vha kule na miṱa yavho. Nga murahu musi Yakobo na vharwa vhawe vha tshi pfulutshela ngei Egipita, vho pfuluwa na vhafumakadzi na vhana vhavho.—Gen. 46:6, 7.
^ par. 8 Sedzani thero “Immigration—Dreams and Realities” kha Awake! ya February 2013.
^ par. 9 Mivhigo ya mashangoni o fhamba-fhambanaho i sumbedza uri u dzula kule na mufarisi kana vhana u itela u shuma kha ḽiṅwe shango zwi ita uri hu vhe na thaidzo khulwane vhukuma. Zwenezwi zwi ita uri mufarisi muthihi kana vhuvhili havho vha si tsha fulufhedzea, vhusawana kana u ita zwa vhudzekani na shaka ḽa tsini nahone kha vhana zwi engedza thaidzo siani ḽa vhuḓifari na ḽa pfunzo, vhuhali, mbilaelo, u tsikeledzea kana vha ṱoḓa u ḓivhulaha.
