1, 2. Mɛni haomi nihi fuu nɛ a hia blɔ nɛ a kpale kɛ ba we ɔ kɛ kpeɔ? (Moo hyɛ foni nɛ ngɛ ni kasemi ɔ sisije ɔ.)

EDUARDO * de ke: “Benɛ i ngɛ ní tsue ngɛ ma se ɔ, ye ní tsumi ɔ hi, nɛ i náa sika fuu. Se benɛ i kɛ Yehowa Odasefohi bɔni Baiblo ɔ kasemi ɔ, i ba yɔse kaa i ngɛ blɔ nya ní tsumi ko nɛ he hia wawɛɛ nitsɛ. Lɔ ɔ ji kaa e sa nɛ ma ye bua ye weku ɔ konɛ huɛ bɔmi kpakpa nɛ hi a kɛ Mawu a kpɛti, nɛ ma ha mɛ a helo nya hiami níhi hulɔ. Enɛ ɔ he ɔ, i kpale kɛ ba we.”—Efe. 6:4.

² Eduardo le kaa Yehowa bua jɔ kaa e kpale ba piɛɛ e weku ɔ he. Se kaa bɔ nɛ e ba ngɛ Marilyn nɛ wa tu e he munyu ngɛ ni kasemi nɛ sɛ hlami ɔ mi ɔ blɔ fa mi ɔ, e biɔ nɛ Eduardo hu nɛ ngɔ be fuu kɛ dla weku kpa nɛ ngɛ e kɛ weku mi bimɛ ɔmɛ a kpɛti ɔ. Ngɛ ohia si himi mi nɛ a ngɛ ɔ tsuo se ɔ, e biɔ hu nɛ e hyɛ e yo kɛ e bimɛ ɔmɛ. Mɛni blɔ nɔ e maa gu kɛ pee jã? Mɛni yemi kɛ buami nɛ e nine ma nyɛ maa su nɔ kɛ je nyɛmimɛ nɛ a ngɛ asafo ɔ mi ɔ a dɛ?

3. Mɛni blɔ nɔ nɛ ke fɔlɔ ko hia blɔ kɛ je e bimɛ a he ɔ, e gbaa bimɛ ɔmɛ a nya ngɛ?

³ Eduardo de ke: “I na kaa be mi nɛ ye bimɛ ɔmɛ hia mi wawɛɛ  ɔ, i tu fo je a he. I be a kasa mi konɛ ma kane Baiblo mi sanehi kɛ ha mɛ, nɛ i kɛ mɛ nɛ bla kɛ sɔle, nɛ ma fua mɛ, nɛ i kɛ mɛ nɛ fiɛ.” (5 Mose 6:7) E biyo nɔkɔtɔma nɛ a tsɛɛ lɛ ke Anna a de ke: “Ye bua jɔɛ kaa papaa hia blɔ. Benɛ e kpale kɛ ba a, e gbi kɛ e hɛ mi kɛkɛ nɛ waa kɛ le lɛ. Ke e fua wɔ ɔ, e si we wɔ kpu.”

4. Ke huno ko hia blɔ kɛ je e yo kɛ e bimɛ a he ɔ, kɛ e saa e wekuyi nɛ e ji ɔ he ha kɛɛ?

⁴ Ke huno ko hia blɔ kɛ je e yo kɛ e bimɛ a he ɔ, e nyɛ we nɛ e tsuɔ e blɔ nya ní tsumi kaa wekuyi ɔ he ní. Eduardo yo, Ruby de ke: “Imi nɔuu ji jokuɛwi ɔmɛ a Tsɛ kɛ a Nyɛ. Imi lɛ i mwɔɔ yi mi kpɔhi fuu kɛ haa weku ɔ. Benɛ ye huno Eduardo kpale kɛ ba a, e sa nɛ ma ba ye he si kɛ ha lɛ kaa bɔ nɛ a hyɛɛ blɔ kaa yigbayihi nɛ a ji Kristofohi nɛ a pee ɔ. Amlɔ nɛ ɔ po ɔ, be komɛ ngɛ nɛ ye hɛ jeɔ ye he nɔ kaa ye huno ɔ kpale kɛ ba.” (Efe. 5:22, 23) Eduardo hu de ke: “Ke wa biyi ɔmɛ suɔ kaa a pee nɔ́ ko ɔ, a yaa a yayo ngɔ nɛ a ya biɔ blɔ. Se wa ha nɛ jokuɛwi ɔmɛ na kaa kake peemi ngɛ i kɛ a yayo wa kpɛti. E he ba hia nɛ ma kase bɔ nɛ Baiblo ɔ tsɔɔ kaa e sa nɛ wekuyihi nɛ a tsu a blɔ nya ní tsumihi ha a.”

5. Benɛ Eduardo kpale kɛ ba we ɔ, mɛni e pee kɛ dla weku kpa nɛ ngɛ e kɛ e weku mi bimɛ ɔmɛ a kpɛti ɔ? Mɛni je jã nɛ e pee ɔ mi kɛ ba?

⁵ Eduardo fia e pɛɛ si kaa e ma dla weku kpa nɛ ngɛ e kɛ e weku mi bimɛ ɔmɛ a kpɛti ɔ, konɛ e ha nɛ a he nɛ wa ngɛ Mawu jami mi hulɔ. E de ke: “Oti nɛ i kɛ ma ye hɛ mi ji kaa ma du anɔkuale ɔ kɛ wo ye bimɛ ɔmɛ a tsui mi. I kɛ ye nya kɛkɛ de we ke i suɔ Yehowa, mohu ɔ, i kɛ ye munyu tumi kɛ ye ní peepee maa nɔ mi jã.” (1 Yoh. 3:18) Anɛ Yehowa jɔɔ Eduardo ngɛ hemi kɛ yemi nɛ e je kpo ɔ he lo? Anna de ke: “Wa na kaa papaa ngɛ mɔde bɔe kaa e ma ha nɛ weku kpa kpakpa nɛ hi weku ɔ mi. Enɛ ɔ ye bua wɔ wawɛɛ. Benɛ wa na kaa e ngɛ hɛ mi yae ngɛ asafo ɔ mi ɔ, wa bua jɔ wawɛɛ nitsɛ. Je ɔ ngɛ mɔde bɔe kaa e ma puɛ waa kɛ Yehowa wa kpɛti. Se wa na kaa wa fɔli ɔmɛ a hɛdɔɔ ngɛ anɔkuale ɔ he, enɛ ɔ he ɔ, wɔ hu wa bɔɔ mɔde kaa wa maa pee jã. Papaa wo wɔ si kaa e be wa he jee hu gblegbleegble, nɛ niinɛ hu e ye e si womi ɔ nɔ. Kaa e kpale hia blɔ kɛ je wa he ɔ, eko ɔ, jinɛ mwɔnɛ ɔ, i be Yehowa asafo ɔ mi.”

6. Benɛ a ngɛ ta hwue ngɛ Balkan ma a mi ɔ, mɛni fɔli komɛ yɔse?

⁶ Jokuɛwi suɔ nɛ a hi a fɔli a kasa mi. Kaa nɔ hyɛmi nɔ́ ɔ, benɛ a ngɛ ta hwue ngɛ Balkan ma a mi ɔ, Yehowa Odasefohi fuu nyɛ we nɛ a ya ní tsumi. Enɛ ɔ he ɔ, a ná deka kɛ ha a bimɛ ngɛ we mi. A kɛ a bimɛ ɔmɛ kaseɔ ní, a kɛ mɛ fiɛɔ, nɛ a kɛ mɛ sɛɛɔ ní. E ngɛ mi kaa ta a ha nɛ níhi a mi wa ngɛ jamɛ a be ɔ mi mohu lɛɛ, se jokuɛwi ɔmɛ a bua jɔ kaa a ngɛ a fɔli ɔmɛ a kasa nya. Mɛni wa ma nyɛ maa kase ngɛ enɛ ɔ mi? Nɔ́ titli nɛ jokuɛwi hia ji nɛ a fɔli ma ná deka kɛ ha mɛ. Lɔ ɔ he hia mɛ pe sika aloo nike ní nɛ a ma ná. Niinɛ, Mawu Munyu ɔ tsɔɔ kaa ke fɔli ná deka kɛ ha a bimɛ ɔ, a bimɛ ɔmɛ náa he se wawɛɛ.—Abɛ 22:6.

7, 8. (a) Mɛni ha nɛ ke fɔli komɛ je blɔ hiami tso mi kɛ ba a, a nya kpɛɔ a he ɔ? (b) Kɛ fɔli ma plɛ kɛ ye bua a bimɛ konɛ a kpale ná bumi kɛ suɔmi ha mɛ kɛɛ?

⁷ Ke fɔli komɛ je blɔ hiami tso mi kɛ ba nɛ a ba na kaa pi a bimɛ ɔmɛ a kɔmɔ ji mɛ ɔ, a nya kpɛɔ a he. A biɔ jokuɛwi ɔmɛ ke, “Lɔ ɔ dengme nɛ ɔ tsuo nɛ i ngɛ gboe ngɛ nyɛ he ɔ, nyɛ nɛ lo?” Se e sɛ nɛ a pia jokuɛwi ɔmɛ. Eko ɔ, a he nɛ a fɔli ɔmɛ je ɔ lɛ gba a nya. Mɛni fɔlɔ ko ma nyɛ maa pee kɛ dla níhi?

⁸ Mo bi Yehowa konɛ e ye bua mo nɛ o nu o weku mi bimɛ ɔmɛ a sisi. Ko pia nɔ ko ngɛ nyagba nɛ ba a he, mohu ɔ, moo kplɛɛ nɔ kaa nyagba a je mo. Eko ɔ, ke o je o tsui mi nɛ o kpa mɛ pɛɛ ɔ, níhi maa hi.  Ke o huno ɔ aloo o yo kɛ o bimɛ ɔmɛ na kaa o ngɛ mɔde bɔe wawɛɛ konɛ o dla níhi ɔ, a maa na kaa pɛɛ nɛ o kpa a je o tsui mi. Ke o to o tsui si nɛ o mia o hɛ mi ɔ, eko ɔ, o weku ɔ maa suɔ mo nɛ a maa bu mo ekohu.

9. Mɛni he je nɛ e sa kaa wa bua nɛ jɔ níhi nɛ wa ngɛ ɔ he ɔ?

⁹ Bɔfo Paulo tsɔɔ kaa ke Kristofohi nɛ a wa ngɛ jeha mi ɔ be nyɛe maa hyɛ a he ɔ, e sa nɛ a bimɛ kɛ a bibimɛ nɛ a hyɛ a nɔ kɛ ‘to mɛ nane mi.’ Se Paulo tsa nɔ nɛ e wo Kristofohi tsuo he wami kaa ke a ngɛ niye ní, heha ní, kɛ hwɔ he ɔ, a bua nɛ jɔ he. E sɛ nɛ daa nɛ ɔ, waa bɔ mɔde kaa wa ma ná sika fuu nɛ wa si himi nɛ pee kpakpa. (Kane 1 Timoteo 5:4, 8; 6:6-10.) E he hia we nɛ Kristofo no nɛ ná sika fuu ngɛ je nɛ e be kɛe nɛ a ma kpata e hɛ mi nɛ ɔ mi loko ‘e hyɛ e we mi bimɛ a nɔ.’ (1 Yoh. 2:15-17) E sɛ nɛ “ní nami,” aloo “je nɛ ɔ mi nya gbami” nɛ ha nɛ “wami nɛ ngɛ kɛ yaa neneene” ngɛ Mawu je ehe nɛ a peeɔ dami ní ngɛ mi ɔ nɛ bɔ wa weku ɔ!—Mar. 4:19; Luka 21:34-36; 1 Tim. 6:19.

10. Mɛni he je nɛ nile ngɛ mi kaa wa be nɔ́ ko pee nɛ ma ha nɛ waa hɛɛ nihi hiɔ ɔ?

¹⁰ Yehowa le kaa wa hia sika. Se sika be nyɛe maa bu wa he nɛ e maa baa wa yi kaa bɔ nɛ nile nɛ Yehowa ha wɔ ɔ ma nyɛ maa pee ɔ. (Fiɛlɔ 7:12; Luka 12:15) Behi fuu ɔ, ke níhi maa hia blɔ kɛ ya ma se ɔ, a susuu we haomihi nɛ maa je mi kɛ ba a he. Nɔ́ ko be nɛ tsɔɔ kaa ke a ya hu a ma ya ná sika. Ngɛ anɔkuale mi ɔ, oslaa ngɛ jã peemi he wawɛɛ. Nihi fuu ngɛ nɛ benɛ a maa je blɔ hiami ɔ mi kɛ ba a, kɛkɛ a ye hiɔ ngua. Enɛ ɔ he ɔ, be mi nɛ e sa kaa a kɛ tue mi jɔmi nɛ sɔmɔ Mawu ɔ, kɛkɛ a ya ngɛ nihi nɛ a hɛɛ mɛ hiɔ ɔ mohu sɔmɔe. (Kane Abɛ 22:7.) Nile ngɛ mi kaa wa be nɔ́ ko pee nɛ ma ha nɛ wa maa hɛɛ nihi hiɔ.

11. Mɛni he je nɛ ke wekuhi to a sika he blɔ nya saminya a, a be ohia yee tsɔ ɔ?

¹¹ Eduardo le kaa loko e ma nyɛ maa hyɛ e weku ɔ nɔ saminya ke e kpale kɛ ba we ɔ, ja e to e sika he blɔ nya saminya. Enɛ ɔ he ɔ, e kɛ e yo ɔ ma nya si kaa a ma he níhi nɛ hia mɛ pɛ. Enɛ ɔ ha nɛ weku ɔ nine sui ní komɛ nɛ be ko nɛ be ɔ a nine suɔ nɔ ɔ a nɔ hu. Se mɛ tsuo a bɔ mɔde kaa a be sika puɛe ngɛ níhi nɛ a he hia we ɔ a he. * Eduardo de ke: “Kaa nɔ hyɛmi nɔ́ ɔ, i je ye bimɛ ɔmɛ kɛ je plaiveti sukuu kɛ ho amlaalo sukuuhi nɛ a bɔɔ mɔde ɔ ya.” E kɛ e weku ɔ sɔle konɛ Yehowa nɛ ha nɛ e ná ní tsumi nɛ maa ye bua lɛ konɛ e kɛ e he nɛ wo Mawu jami mi ní tsumihi tsuo a mi. Kɛ Yehowa ha a sɔlemi ɔ heto ha kɛɛ?

12, 13. Mɛni Eduardo pee kɛ ye bua e weku ɔ, nɛ mɛni blɔ nɔ Yehowa jɔɔ a si himi kpokploo nɛ a pee ɔ nɔ ngɛ?

¹² Eduardo de ke: “Jeha enyɔ nɛ sɛ hlami ɔ lɛɛ, níhi a mi wa wawɛɛ nitsɛ. Sika nɛ i kɛ to si ɔ bɔni tami, ye hiɔwo ɔ hu sui wɔ kɛ nɔ́ ko peemi, nɛ pɔtɔɔ ye he. Se ngɛ enɛ ɔ tsuo se ɔ, wa yaa asafo mi kpehi tsuo, nɛ wa yaa fiɛɛmi hulɔ.” Eduardo ma e juɛmi nya si kaa e be ní tsumi ko nɛ ma ha nɛ e je e weku ɔ he ɔ tsue hu. E de ke: “I kase ní tsumi slɔɔtoslɔɔtohi konɛ ke e ko je ye dɛ ɔ, ma nyɛ ma tsu ekpa.”

¹³ E he be saii loko Eduardo wo e he hiɔhi, enɛ ɔ he ɔ, e wo sika nɛ e pa a kɛ hekpa. Se Eduardo suɔ kaa e maa pee jã konɛ e kɛ e weku ɔ nɛ a nyɛ nɛ a sɔmɔ Yehowa. Eduardo de ke: “E ngɛ mi kaa amlɔ nɛ ɔ, sika nɛ i náa a sui nɔ́ nɛ i naa benɛ i ngɛ ma se ɔ kulaa mohu lɛɛ, se hwɔ yi wɔ. ‘Yehowa nine be kpoku.’ Ngɛ anɔkuale mi ɔ, wa ma juɛmi nya si kaa wa ma tsu gblɔ gbami ní tsumi ɔ. E kɛ we  tsɔ nɛ níhi a mi ba hi bɔɔ, enɛ ɔ he ɔ, e yí ha mi tsɔ kaa ma hyɛ ye weku ɔ nɔ.”—Yes. 59:1.

14, 15. Ke wa weku li suɔ kaa waa ngɔ helo nya níhi kɛ pee nɔ́ titli ngɛ wa si himi mi ɔ, mɛni wa ma nyɛ maa pee? Ke wa pee nɔ hyɛmi nɔ́ kpakpa a, mɛni ma nyɛ maa je mi kɛ ba?

¹⁴ Ngɛ hehi fuu ɔ, nihi susuɔ kaa e ji a blɔ nya ní tsumi kaa a ha a weku li kɛ a huɛmɛ sika aloo a ke mɛ ní. Eduardo de ke: “Ngɛ ma nɔ he nɛ i je ɔ, wa peeɔ jã. Se ke nɔ́ ko be wa dɛ ɔ, wa de we ke doo e sa nɛ waa pee jã. I gu ga blɔ nɔ nɛ i de ye weku li ɔmɛ ke, ke nɔ́ ko ngɛ ye dɛ ɔ, ma ha mɛ eko, se e sɛ nɛ jã nɛ ma pee ɔ nɛ ye ye weku ɔ awi ngɛ helo nya kɛ mumi mi.”

¹⁵ Behi fuu ɔ, ke nɔ ko ná he blɔ kaa e maa ya ma se nɛ e yɛ aloo nɔ ɔ ngɛ ma se nɛ e kpale kɛ ba nɛ e yɛ hu ɔ, e weku li a mi mi fuɔ lɛ. Ni komɛ deɔ ke jamɛatsɛmɛ ɔmɛ be suɔmi. (Abɛ 19:6, 7) Eduardo biyo Anna de ke: “Ke wa ha we nɛ helo nya níhi nɛ tsi wa Mawu jami nya a, wa weku li ɔmɛ ekomɛ ma nyɛ maa na kaa Yehowa jami he hia pe nɔ́ tsuaa nɔ́. Se ke wa peeɔ nɔ́ tsuaa nɔ́ nɛ a ngɛ hlae ngɛ wa dɛ ɔ, kɛ a ma plɛ kɛ na kaa Yehowa jami he hia ha kɛɛ?”—Kɛ to 1 Petro 3:1, 2 ɔ he.

16. (a) Ngɛ mɛni blɔ nɔ nɛ nɔ ko ma nyɛ maa ‘sisi e he ngɛ’? (Yak. 1:22) (b) Mɛni yi mi kpɔhi nɛ ke wa mwɔ ɔ, Yehowa jɔɔ nɔ?

¹⁶ Nyɛmiyo ko nɛ e je e huno kɛ e bimɛ a he kɛ ho ma se ya a de asafo mi nikɔtɔma amɛ ke: “Wa ngɔ níhi fuu kɛ sã afɔle loko i nyɛ ba je hiɛ ɔ nɛ. Jinɛ ye huno ɔ ngɛ sɔmɔe kaa asafo mi nɔkɔtɔma, se e ngɔ e sɔmɔmi he blɔ ɔ kɛ fɔ si. Enɛ ɔ he ɔ, i he ye wawɛɛ kaa Yehowa maa jɔɔ blɔ nɛ i hia kɛ ba je hiɛ ɔ nɔ.” Ke wa da hemi kɛ yemi nɛ wa ngɛ ngɛ Yehowa mi ɔ nɔ kɛ mwɔ wa yi mi kpɔ ɔ, Yehowa jɔɔ nɔ. Se anɛ o susu kaa ke wa mwɔ wa yi mi kpɔ ngɛ blɔ nɛ kɛ Yehowa suɔmi nya ní peemi kɔ we nɔ aloo wa je blɔ nɛ wa ngmɛɛ sɔmɔmi he blɔ ko he ɔ, Yehowa maa jɔɔ wɔ lo?—Kane Hebri Bi 11:6; 1 Yohane 5:13-15.

17. Mɛni he je nɛ e sa kaa o hla Yehowa blɔ tsɔɔmi se blɔ loko o mwɔ o yi mi kpɔ ɔ, nɛ mɛni blɔ nɔ o ma nyɛ maa gu kɛ pee jã?

¹⁷ Loko o maa mwɔ o yi mi kpɔ ngɛ nɔ́ ko he ɔ, mo hla blɔ tsɔɔmi kɛ je Yehowa  ngɔ kekle. Koo mwɔ o yi mi kpɔ ɔ loko o ya hla blɔ tsɔɔmi. Moo sɔle konɛ e ha mo mumi klɔuklɔu ɔ, nile, kɛ blɔ tsɔɔmi. (2 Tim. 1:7) Mo bi o he ke: ‘Anɛ i suɔ kaa ma bu Yehowa tue ngɛ si himi saisaa nɛ ma ya je mi ɔ mi lo? Anɛ ke nihi ngɛ mi yi mi wae po ɔ, ma bu lɛ tue lo?’ Ke jã a, anɛ o maa suɔ nɛ o bu Yehowa tue nɛ o hi weku ɔ he ke lɔ ɔ ma ha nɛ o he ma fi mo ngɛ si himi mi po lo? (Luka 14:33) Mo bi asafo mi nikɔtɔma amɛ nɛ a ye bua mo, konɛ o kɛ ga nɛ a maa wo mo kɛ je Ngmami ɔ mi ɔ nɛ tsu ní. Ke o pee jã a, lɔ ɔ tsɔɔ kaa o he ye kaa Yehowa maa ye bua mo kaa bɔ nɛ e wo si ɔ. Asafo mi nikɔtɔma amɛ be nyɛe maa mwɔ yi mi kpɔ ha mo, se a ma nyɛ maa ye bua mo konɛ o pee juɛmi nɛ da nɛ ma ha nɛ o ná bua jɔmi.—2 Kor. 1:24.

18. Mɛnɔ nɛ e sa kaa e hyɛ weku ɔ nɔ, nɛ mɛni wa ma nyɛ maa pee kɛ ye bua lɛ?

¹⁸ Yehowa suɔ nɛ wekuyihi nɛ a hyɛ a weku mi bimɛ a nɔ be tsuaa be. Wekuyihi fuu ngɛ nɛ nihi nyɛɔ a nɔ kaa a je a weku ɔmɛ a he kɛ ho ma se ya nɛ a ya tsu ní, se a yɛ. E sa nɛ wa je nihi kaa jã a a yi nɛ waa sɔle ha mɛ, ejakaa a ngɛ a blɔ nya ní tsumi ɔ tsue. Jehanɛ se hu ɔ, ke oslaa ko ba anɔkualetsɛmɛ nɛ ɔmɛ a ti nɔ ko nɔ, aloo hiɔ fia a ti nɔ ko kpatakpata a, wa ma nyɛ ma je suɔmi kpo kɛ ha mɛ. (Gal. 6:2, 5; 1 Pet. 3:8) Ke a hia sika nɛ a kɛ ma tsu ní komɛ a he ní amlɔ ɔ, anɛ o ma nyɛ maa ye bua mɛ lo? Anɛ o ma nyɛ maa ye bua mɛ nɛ a ná ní tsumi ko ngɛ ma a mi nɛ a tsu lo? Ke o pee jã a, a be a weku mi bimɛ ɔmɛ a he jee kɛ ya tsu ní ngɛ he kpa.—Abɛ 3:27, 28; 1 Yoh. 3:17.

19, 20. Mɛni he je nɛ e sa kaa Kristofohi nɛ a ná nɔ mi mami kaa Yehowa maa ye bua mɛ ɔ?

¹⁹ Ngmami ɔ de ke: “Nyɛ ko di sika se; nɔ́ tsuaa nɔ́ nɛ nyɛ ngɛ ɔ, nyɛ bua nɛ jɔ he. Ejakaa Mawu de ke, ‘I be mo sie, nɛ i be mo kuae gblegbleegble.’ Lɛɛ nyɛ ha waa kɛ kã nɛ de ke, ‘Nyɔmtsɛ ɔ ji ye he piɛɛlɔ, i be gbeye yee. Mɛni adesa ma nyɛ maa pee mi?’” (Heb. 13:5, 6) Mɛni blɔ nɔ wa maa gu konɛ waa kɛ ga womi nɛ ɔ nɛ tsu ní?

²⁰ Asafo mi nɔkɔtɔma ko nɛ e kɛ jehahi babauu sɔmɔ nɛ e je ma ko nɛ be sika tsɔ ɔ mi ɔ de ke: “Behi fuu ɔ, nihi deɔ ke Yehowa Odasefohi ngɛ bua jɔmi. A yɔse hu kaa Odasefohi nɛ a ji ohiatsɛmɛ po dlaa a he saminyayoo, nɛ a ngɛ kaa nihi nɛ nɔ́ ko he hia we mɛ.” Yesu tsɔɔ kaa jã ji bɔ nɛ e maa ba ngɛ nihi nɛ hlaa Matsɛ Yemi ɔ se blɔ kekle ɔ a blɔ fa mi. (Mat. 6:28-30, 33) Ngɛ anɔkuale mi ɔ, Yehowa nɛ ji o hiɔwe Tsɛ ɔ suɔ mo, nɛ e suɔ nɛ e hi ha o kɛ o bimɛ. ‘Yehowa hɛngmɛ ngɛ je ɔ tsuo he; nihi nɛ yeɔ lɛ anɔkuale ɔ, e woɔ mɛ he wami.’ (2 Kron. 16:9) E wo wɔ mlaahi konɛ wa ná he se. Mlaahi nɛ e wo wɔ ɔ ekomɛ kɔɔ weku si himi kɛ helo nya níhi a he. Ke waa kɛ mlaa nɛ ɔmɛ tsu ní ɔ, lɔ ɔ tsɔɔ kaa wa suɔ lɛ nɛ wa he lɛ ye. “Ke wa suɔ Mawu ɔ, wa yeɔ e mlaa amɛ a nɔ. Nɛ e mlaa amɛ a nɔ yemi wɛ kulaa.”—1 Yoh. 5:3.

21, 22. Mɛni he je nɛ o fia o pɛɛ si kaa o kɛ o hɛ maa fɔ Yehowa nɔ ɔ?

²¹ Eduardo de ke: “I le kaa i be nyɛe ma dla níhi nɛ puɛ benɛ i je ye yo kɛ ye bimɛ ɔmɛ a he ɔ mohu lɛɛ, se i ha we nɛ lɔ ɔ nɛ jɔ̃ ye kɔni mi. Nihi fuu nɛ i kɛ mɛ ya tsu ní ɔ pee niatsɛmɛ, se a be bua jɔmi. A kɛ haomi nguanguahi ngɛ kpee ngɛ a wekuhi a mi. Se wɔɔ lɛɛ bua jɔmi ngɛ wa weku ɔ mi wawɛɛ! Nɛ ke i hyɛ bɔ nɛ nyɛmimɛ komɛ ngɛ ohia si himi mi nɛ lɔ ɔ tsuo se ɔ, a hɛ dɔɔ ngɛ Mawu jami he ɔ, ye bua jɔɔ wawɛɛ. Wɔ tsuo wa na kaa si nɛ Yesu wo wɔ ɔ ngɛ mi bae.”—Kane Mateo 6:33.

²² Mo ná kã! Moo bu Yehowa tue nɛ o kɛ o hɛ nɛ fɔ e nɔ. Ha nɛ suɔmi nɛ o ngɛ ha Mawu, kɛ o huno aloo o yo, kɛ o bimɛ ɔmɛ ɔ nɛ wo mo he wami konɛ o tsu o Mawu jami mi blɔ nya ní tsumihi a he ní ngɛ weku ɔ mi. Enɛ ɔ ma ha nɛ o maa na kaa ‘Yehowa ji o he piɛɛlɔ.’