1, 2. Gürigia ha ñǘdünbaña nadagimei lidan amu ageiraü, ka lénrengunga úmabei hagagibudagua dan le hagiribudun hábiñoun? (Ariha huméi dibuhu le lídanbei lagumeseha arütíkulu.)

 ARIÑAGATI Eduardo a: “Bóugudi meha luéi nageira nawinwanda; hǘrüti meha nererehan lidan nuadigimari ani buiti meha nagañeirun”, gama lumoun, dan le nagumeserunbei aturiahoun Bíbülia hama gefentiña luagu Heowá, aba níchugun fe anihein lan aban buligasion wéiritimati lun nagunfuliruni: mosu netenirun houn nufamilian dandu lun níchuguni heigin houn luma hemegeirun keisi lidan hamadagua luma Heowá. Ligía aba lubéi nagiribudun hamoun” (Efe. 6:4).

² Subudi lumuti meha Eduardo busén lan Heowá lun lagiribudun hamoun lufamilian. Gama lumoun, ítara kei Liliana —to uáguboun layanuhóua lidan arütíkulu le ásügürübei— mosu meha ladügün aban katei hénrenguti, laransehani magundani le hawagubei liduheñu. Mosu giñe letenirun tun lani weiriou luma houn hasaanigu lidan aban fulasu le ñein lubéi lougua lan wadagimanu. Ida luba meha ladüga lun lóustarun seinsu le lagañeirubei darí lagumuchun hati? Gayarabei meha san híderaguni íbirigu lidan damuriguaü lau somu katei?

3. Ka lánibei efekütu hawagu isaanigu ua lan háguchi habadu?

³ Sigiti Eduardo ariñaga: “Aba gunfuranda nani ígira nániña nisaanigu dántima le megei hamani nadundehan luma nínsiñehabu. Úatina  meha ñein lun naliihan abahüdaguni tídangiñeti Bíbülia houn, lun wafurieidun úara, lun nóuburuniña o lun náhurerun hama” (2 Lur. 6:7). Ariñagatu Ana, lisaani to íbugañaü: Machourunti meha nasandiragun nungua lun desidírü nan somu katei ladüga dise lan núguchi nuéi. Dan le lagiribudunbei, ligiburügüñein luma lumalali wasubudira. Ámuti meha nasandiragun nungua dan le lóuburunina”.

4. Ka uagu hénrengu lubéi lun aban úguchili le ñǘdünhali diseun hawéi lufamilian lagunfulirun lau luadigimari keisi ichügüdinaü?

⁴ Eibu lálüdün úguchili dise, hénrengutimabei lun lagunfulirun lau luadigimari keisi ichügüdinaü. Afuranguagüdatu Rubí, to lani Eduardo weiriou: “Nuguya meha úguchuruboun, nuguya úguchili. Aba néchudun desidírü luagu libe-agei katei. Dan le lagiribudunbei Eduardo, mosu meha nafurendeirun ka lan mini lubéi eyeri lan ichügüdinaübei. Chülǘ lumoun weyu le uguñebei anihein dan mosu lan naritaguni aniheinhali lan ya” (Efe. 5:22, 23). Aba lariñagun Eduardo: Héchuhaña meha nisaanigu lun túmarügü lan hamuriaha üma lubá háfuridun. [...] Mosu meha nafurendeirun árügüdei nilugaarun lidan familia lidan aban manera kristiánu. Dandu Eduardo kei Rubí gunfuranda hamuti mosu lan úara hamá lidan le desidírü habéi keisi agübürigu.

5. a) Ida liña lagumeserun aban úguchili aransehei damichi le lanügübei ladisedun hawéi lufamilian? b) Ka resultóu libihibei?

⁵ Desidírühali meha Eduardo lun ladügüni sun liyaraati lun léredagüdüni hamadagua lufamilian luma Heowá ani aransehaleime hamadagua keisi iduheñu. Ariñagati: “Busentina meha narufudahani inarüni houn nisaanigu dandu lau le nariñagubei kei lau le nadügübei, mama meha busenrügütina nariñagun hínsiñe lan Heowá nun, busentina meha narufuduni” (1 Huan 3:18). Biní lumuti san Heowá láfaagun Eduardo? Óunabatu Ana: “Warihini áfaaguni le ladügübei lun aban lan úguchili buiti, luma lun layarafadun woun ídehati saragu. Gúndaatiwa giñe lau warihini lanarime lawadigimaridun lidan damuriguaü. Busenti ubóu le ladisedagüdüniwa luéi Heowá, gama lumoun badületiña meha wagübürigu luagu inarüni, ani ínchaha lumutiwa katei le lun wadügüni ligiaméme. Füramaseti wáguchi woun mígirundigia láadiwa lan, ani gúnfuli lumuti lererun. Lun hamuga meha ábaya lan lidin, háfuga úatina hamuga tidan lóundarun Heowá”.

6. Ka harihibei fiú agübürigu lidan meha lidaani wuribu le gíribei guerra de los Balcanes?

⁶ Lidan meha lidaani wuribu le gíribei guerra de los Balcanes, saragu gefentiña luagu Heowá ha awinwandubaña lidan fulasu ligía ariha hamuti houngua luagu gúndaatima hamá hasaanigu lau sun lídanñanu lan lidere dan. Ka uagu? Lugundun, kei siñá lubéi meha houdin hagübürigu awadigimarida, aba meha herederun múnada, aturiaha, áhurera ani ayanuha hagía hama hasaanigu. Ka wafurendeirubei lídangiñe katei le? Furendeitiwa luagu mégeitima hamá isaanigu lun ñein hamá hagübürigu hama, sügǘ lau seinsu luma idewesei. Ligía tariñagunbei Lererun Bungiu dan le lan harufudahan hagübürigu houn buidu ani teni hagía houn, buiti lidin houn (Ari. 22:6).

7, 8. a) Ka idan hacharara fiú agübürigu? b) Ida liña gayara lan híderaguniña agübürigu hasaanigu ha wuribati hasandiragun houngua?

⁷ Añahein fiú agübürigu, dan le hagiribudun hábiñoun aba hasandirun luagu anihein lan igarihabu tidan hanigi hasaanigu ani marufudun hamá ínsiñeni hawagu. Ani añahein agübürigu charatiña lau hariñagun: “Ka san uagu bóuserana ítara? Sun le nadügübei, buagu nadügei!”. Úati gunfuranda hamani wuriba lan hasandiragun hasaanigu houngua ladüga hadisedun hawéi. Anhein ligía lubéi asuseredubei hun, ka lunbei hadügüni lun gayara lan hagaranihan lun katei le?

⁸ Amuriaha humá luma Heowá lun líderagunün lun gunfuranda humaniña hiduheñu. Lárigiñe, ábame hariñaguni houn tídangiñe sun hanigi luagu subudi humani luagu gadurun humá lidan le asuseredubei ani sarí humani. Anhein hariha hisaanigu tuma hani weiriou o hani weiriei luagu háfaaguña lan sagü weyu lun haransehani katei, hafiñeruba hun. Lau gurasu luma áfaaguni, gayarabei hagañeiruni hínsiñehabu hufamilian ani inebe huguyame houn.

9. Ka uagu mama lubéi mosu harisidun kristiánugu lun hagunfuliruni gumadi le lánina ‘hetenirun houn haduheñu’?

⁹ Ariñagati meha apostolu Pábulu lunti lan ‘hetenirun’ isaanigu hama ibañanigu houn hagübürigu hama hárugutinu dan le siñahali hanuriagun houngua. Gama lumoun, ínchaha lumutiña sun kristiánugu lun gunda hamá lau hibihini le hemegeirubei —éigini, daüguaü tuma muna— lubaragiñe háfaagun lun habuiduragüdüni ligaburi hawinwandun o hareidahan saragu seinsu lubá ámuñegü (aliiha huméi 1 Timotéu 5:4, 8; 6:6-10). Lun gayara lan ‘híchuguni le hemegeirubei haduheñu houn’, mama mosu larisidun kristiánu lidan ubóu le madiseelibei lagumuchun (1 Huan 2:15-17). Mígira wamá lun ladügün ‘ínsiñehabuni luagu irisini’ o “idiheri luagu burí katei lánina ibagari le” lun mibihin hamani waduheñu “ibagari magumuchaditi” lidan iseri ubóu le lani Bungiu (Mar. 4:19; Luk. 21:34-36; 1 Tim. 6:19).

10. Ka larufudahabei lichú aau le lúmagiñeti Bungiu woun luagu adúeihani?

¹⁰ Subudi lumuti Heowá megei wamá seinsu lun gayara lan wawinwandun. Gama lumoun siñati lóunigiruniwa ni lun líderaguniwa seinsu kei ladügüni lichú aau le lúmagiñeti Bungiu (Apur. 7:12; Luk. 12:15). Gíbetiña masaminaruntiña luagun lénrengunga le lunbei hadariruni dan le houdin nadagimein lidoun ageiraü díseti. Ani úati giñe ichouruni luagu hagañeiruba lan saragu seinsu ñein. Bandi peliguru hadarirubei ñein. Gíbetiña agiribudutiña hageiroun lau saragu dúeiti. Lubaragiñe hamuga líbüretima hamá lun heseriwidun lun Bungiu, nadagimeinrügütiña hadamunme ha afuredeirubaña seinsu houn (aliiha huméi Ariñawagúni 22:7). Ka larufudahabei lichú aau le lúmagiñeti Bungiu woun? Luagu buidu lan lun madúeihan wamá.

11. Ka uagu buidu lubéi harihini gürigia átiribei lan seinsu hemegeirun?

¹¹ Giributi Eduardo hamoun liduheñu, gama lumoun subudi lumuti meha mosu lan lasubudiruni ida luba lan layusuruni seinsu lun memegeirun hamá liduheñu ni kata. Aba lakutihani tuma lani weiriou kátima lan hemegeirubei ani aba habürüdüni átiribei lan seinsu hemegeirun lun hawinwandun. Inarüni lau lan iseri aransehani ligía siñahali lan hagañeinhan saragu katei kei meha furumiñe. Gama lumoun, ídehatiña súngubei hagía ani aba magañeinhan hamá katei le memegeirun hamuti. b Afuranguagüdati Eduardo: “Sagá numutiña nisaanigu tídangiñe leskuela to fáyeiwarügütu ani aba nabürüdagüdüniña tidan leskuela to lani urúei to buitu”. Ligía hau sun liduheñu aba hamuriahan luma Heowá lun líderaguni adarira aban wadagimanu le lunti madarasahan lani heseriwidun lun Bungiu. Ida liña meha lóunabun Heowá?

12, 13. a) Ka ladügübei aban úguchili lun letenirun houn lufamilian? b) Ida liña labiniruni Heowá Eduardo ladüga desidírü lan lanügün aban ibagari sensiyuti?

¹² Sigiti Eduardo ariñaga: “Lidan furumiñeti bián irumu, muruti meha katei woun. Murusun seinsu le nagañeirubei aniheinha dan lougua lan lun le wemegeirubei, agumucheina liña meha seinsu le areida náalibei ani wéiriti meha lubucha nuagu. Gama lumoun, meferidiruntiwaha ni aban adamuridaguni ani furitiwa giñe apurichiha”. Mabusenrunti meha Eduardo lánharun lun furumiñeguarügü wadagimanu le gayarabei ladisedagüdüni hawéi liduheñu luagu saragu hati o irumu. Ariñagati: “Furendeitina adüga furumiñeguarügü wadagimanu. Ligíati dan le siñá lan nadügün aban katei, gayarati nawadigimaridun lidan amu”.

¹³ Kei le lüti lubéi Eduardo lubá lafayeiruni ladúeihan, mosu meha lafayeirun saragu seinsu ligibuagun le lafuredeihabei. Ani íbini ítara, manarimeti libe larihini seinsu ligía dan le konpararü lani luma lichansin lun hama lan lufamilian lidan sun le hadügübei lidan habagari, ítara kei lagurabuni Heowá hámagiñe agübürigu”. Ariñagati: “Dan le meha dise nubéi, gáñeintina meha diisi wéiyaasu lóugiñe le nagañeirubei guentó ya, gama lumoun, masufuriruntiwa ilamaü. ‘Malouguadungili lubafu Heowá’. Aba wagumeserun eseriwida kei prekursorugu ani lárigiñe lira, sódini, aba buídutimaraü lan wadeiragun woungua, aba  ménrengunhali lan níchuguni le hemegeirubei niduheñu houn” (Isa. 59:1).

14, 15. a) Ka gayarabei hadügüni kristiánugu dan le hafosuruniña haduheñu lun híchuguni umegeguni luma seinsu furumiñe lubaragiñe heseriwidun lun Bungiu? b) Ka efekütu gayarabei gani lani le desidírü wabéi hawagun waduheñu?

¹⁴ Lidan saragu fulasu, héchutiña gürigia íchiga seinsu o idewesei houn haduheñu luma houn hamadagu. Ariñagati Eduardo: “Ligía wéchunbei, ani hínsiñeti woun. Gama lumoun gébehati sun katei. Ariñaga numuti lau inebesei houn niduheñu luagu níchugubei lan sun le niyaraabei houn, gama lumoun, neteniruba furumiñe lun le temegeirubei nani weiriou hama nisaanigu, gayara láamuga wasigirun agunfulira lau sun wani buligasion keisi kristiánugu”.

¹⁵ Gayarati hagañidun fiú iduheñu hama ha desidírübaña hagiribudun hábiñoun o ha máhabaña houdin nadagimein diseun. Gayarati íbini hariñagun houn hawouguounrügüñein lan hasaminara. Ka uagu? Ladüga busentiña hibihin seinsu hámagiñe súnwandan (Ari. 19:6, 7). Ariñagatu Ana, to lisaani Eduardo: Le buídubei anhein lan wíchiga weseriwidun lun Bungiu furumiñe lubaragiñe amu katei, gayarabei harihini waduheñu Heowá lan súdinitimabei woun. Anhein madügün wamá ítara, ida luba gunfuranda hamani?” (konpararü huméi luma 1 Féduru 3:1, 2).

16. a) Ida liña gayara lan ‘heyeedagun gürigia houngua? (Sant. 1:22.) b) Ida liña gayara lan labiniruni Heowá le desidírü habéi gürigia?

¹⁶ Ígira tumuti aban íbiri tani weiriei hama tisaanigu lun táguyun lidoun amu ageiraü le rísitimati. Dan le tachülürünbei, aba tariñagun houn wéiyaaña lidan afiñeni: “Adügatiwa saragu sákürifisiu lun gayara lan niabin ñahoun. Darí lun lígiruni nani weiriei leseriwidun kei wéiyaali lidan afiñeni. Agurabatina lubeiti lun labiniruni Heowá le desidírü nubéi”. Biní lumutiña Bungiu gürigia ha afiñerubaña luagu, ida luba san labinirun aban katei le kóntürati luagu lugundan, dántima le bígirun aban lubuidun chansi lidan beseriwidun lun? (Aliiha huméi Ebüréu 11:6 luma 1 Huan 5:13-15.)

17. a) Ka uagu lunti lubéi wáluahani ladundehan Heowá lubaragiñe desidírü wamá? b) Ida luba wáluahani ladundehan Heowá?

¹⁷ Lun masakürihan humá luagu le desidírü hubéi, áluaha huméi ladundehan Heowá lubaragiñe desidírü humá, mama lárigiñe. Amuriaha humá luma lun ladundehanün, lun líchugun sífiri sandu luma lichú aau hun (2 Tim. 1:7). Álügüdagua  humá hungua: “Gaganbadibadina san lun Heowá lidan sun katei? Neseriwiduba san lun íbini lidan éibaahouni? Anhein ítara liña lubéi, ma lunti giñe gaganbadi wamá lun lidan katei le ménrenguti kéiburi wanügün aban ibagari sensiyuti?” (Luk. 14:33). Ayanuha humá hama wéiyaaña lidan afiñeni ani sigí huméi adundehani tídangiñeti Bíbülia le híchugubei hun. Ítara luba harufudun afiñe humá luagu líderagubadün lan Heowá kei aubei füramase lani. Siñati desidírü hamá wéiyaaña lidan afiñeni huagu, gama lumoun adundehani le lunbei híchuguni leseriwiduba hun lun desidírü humá buidu ani lau lásügürün dan gúndaabadün (2 Ko. 1:24).

18. a) Ka un líchigei Heowá buligasion lun letenirun houn liduheñu? b) Ida luba gayara lan wíderaguniña lichügüdina familia?

¹⁸ Lun lichügüdina familia líchigei Heowá buligasion lun líchuguni hemegeirun lufamilian houn (Gal. 6:5). Gíbetiña agübürigu agunfulirutiña lau buligasion le sin hadisedun tuéi hani weiriou ni hawéi hasaanigu íbini héredun amu hawagu o hasandirun busén hamá hadügüni. Ariñaga wamuti san houn buidu lan hadüga? Furíeitiwa san hawagu? Gayarati warufudun hínsiñe hamá woun lau wíderaguniña dan le lasuseredun somu sandi le magurabúnwati o dan le lasuseredun somu chagaguaü (Gal. 6:2, 5; 1 Fe. 3:8). Kei hénpulu, gayarati san wíderaguniña adarira wadagimanu yarafa houn haduheñu o wíchugun éigini houn o seinsu lun háfuridun lídangiñe lénrengunga? Anhein wadüga ítara, háfuga manarimeeli lanme hasaminarun mosu lan hígiruniña hafamilian lun houdin nadagimein lidoun amu fulasu (Ari. 3:27, 28; 1 Huan 3:17).

19, 20. Ka uagu gayara lubéi hachoururuni kristiánugu luagu líderagubaña lan Heowá?

¹⁹ Ariñagatu Bíbülia: “Míchiga huméi hínsiñehabu luagun seinsu; gunda humá lau le húmati, lugundun líchugubei Bungiu le hemegeirubei hun. Ariñagaali: ‘Nóunigirubadibu; mígirun nubadibu’. Gayaraati lubeiti wariñagun lau afiñeni: ‘Nabureme Bungiu íderagubalina; manufudebadina. Kábati gayara hamá gürigia adüga nau?’” (Ebü. 13:5, 6). Ida liña lagunfulirun dimurei burí le?

²⁰ Aban íbiri le lǘhali eseriwida kei wéiyaali lidan afiñeni ani lidan aban ageiraü gudemeti leredera ariñagati: “Súnwandan hayanuhan gürigia luagu gunda hamá gefentiña luagu Heowá”. Ariñagati giñe: “Ani rútiña fe íbini lan ha gudemetimabaña buiti lan hasansiragun ani genegeti luagu gaseinsun hamá hawéi híbiri gürigia”. Arufudati le gúnfuli lan füramasei le ladügübei Hesusu houn ha íchugubalin Larúeihan Bungiu furumiñe (Mat. 6:28-30, 33). Gayarati hachoururuni luagu hínsiñe humá lun Húguchi le siélubei ani luagu busén lan lun buidu lan lidin houn hiduheñu. Ariñagatu Bíbülia luagu “aríagu liña [lan] Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati” (2 Kro. 16:9). Rúhali gumadi woun luagu ida luba lan wetenirun houn wafamilian lun buidu lan lidin woun. Dan le gaganbadi wamá lun, arufudatiwa luagu hínsiñe lan woun ani afiñe wamá luagu. Lugundun “ladügǘniwa le lubeibei Bungiu, ligía ínsiñehabunibei lun; ani ménrengunti lagunfulirúniwa lugumadin” (1 Huan 5:3).

21, 22. Ka uagu desidírü hubéi hafiñerun luagu Heowá?

²¹ Ariñagati Eduardo: “Subudi numuti siñati lan nagiribudagüdüni dan le násügürübei dise tuéi nani weiriou hama nisaanigu, ani hóuchatina lun masaminarun nan saragu luagun. Saragu hádangiñe binadu nánigu paaná lidan wadagimanu, rísihaña guentó, gama lumoun, magundantiña. Anihein turóbuli wéinamuti hadan haduheñu. Ánheinti wagía, úaratiwa keisi iduheñu ani gúndaatiwa. Wéiritu nanigi lau narihini híchuguni íbirigu heseriwidun lun Bungiu lidan furumiñeti lúgaaru lidan habagari íbini gudeme hamá. Sun wagía warihiñein inarüni lan lani Hesusu füramasei” (aliiha huméi Matéu 6:33).

²² Ragǘ humá erei! Gaganbadi humá lun Heowá ani afiñe humá luagu. Lun ladügün ínsiñeni le hasandirubei luagu Bungiu, tuagu hani weiriou o hani weiriei hama hisaanigu lun hagunfulirun lau hani buligasion hama hufamilian. Anhein hadüga ítara, harihibei ‘líderagunün Heowá’.