Pran kouraz Zeova pou sekour ou!

“Nou kapab dir avek kouraz: ‘[Zeova] i mon sekour.’”​—EBR. 13:6.

KI OU PANSE?

Ki bann paran i devret fer pour ed zot fanmir reste for spirityelman?

Ki mannyer bann sef fanmir i kapab fourni bann keksoz materyel san ki zot bezwen kit zot fanmir?

Ki mannyer bann Kretyen i kapab sirmont sa presyon pour al travay aletranze pour ganny plis larzan?

1, 2. Ki defi bokou imigran i gannyen kan zot retourn se zot? (Vwar portre anler.)

EDUARDO * i dir: “Ler mon ti aletranze, mon ti annan en bon travay e mon ti ganny en bon lapey. Me ler mon ti konmans etidye Labib avek Temwen Zeova mon ti remarke ki mon ti annan en responsabilite pli enportan, setadir pran swen avek mon fanmir lo kote spirityel pa zis lo kote materyel. Sa ti fer mwan retourn dan lakour kot zot.”​—Efe. 6:4.

² Eduardo ti konnen ki si i rezwenn son fanmir, sa ti pou fer plezir Zeova. Me parey Marilyn ki nou’n mansyonnen dan lartik avan, Eduardo ti bezwen pran bokou letan pour aranz bann relasyon dan son fanmir. I ti bezwen fer fas avek sa defi pour siport son madanm ek bann zanfan avek en lapey pli ba. Ki mannyer i ti pou sirviv? Ki led i ti pou kapab gannyen avek lezot dan kongregasyon?

ARANZ OU LAVI FANMIR EK OU SPIRITYALITE

3. Ki lefe labsans en paran i annan lo zanfan?

³ Eduardo i admet: “Mon ti realize ki mon’n negliz mon bann zanfan ler zot ti pli bezwen mon gidans ek lafeksyon.  Mon pa ti la pour lir zistwar Labib avek zot, pour priy avek zot, pour may e zwe avek zot.” (Det. 6:7) Son premye fiy Anna i rapel: “Emosyonnelman mon pa ti santi mwan an sekirite akoz mon papa pa ti la. Kan i ti retournen nou ti zis konn li par son figir ek son lavwa. Ler i ti may mwan, mon pa ti santi mwan alez.”

4. Ki mannyer labsans en msye i afekte son abilite pour desarz son rol konman en sef fanmir?

⁴ Labsans en papa i afekte son rol konman sef fanmir. Ruby madanm Eduardo i eksplike: “Mon ti bezwen zwe rol manman ek papa e mon ti bezwen fer tou desizyon familyal. Ler Eduardo ti retourn dan lakour, mon ti bezwen aprann ki soumisyon i vreman vedir. Menm konmela, mon bezwen rapel mon lekor ki mon msye i la.” (Efe. 5:22, 23) Eduardo i azoute: “Nou bann fiy ti abitye demann avek zot manman permisyon pour fer keksoz. Alor, nou ti realize ki nou ti bezwen ini dan lizye nou zanfan e mon ti bezwen aprann pour desarz mon responsabilite konman sef fanmir.”

5. Ki mannyer en papa ti repar domaz ki son labsans ti’n okazyonnen e ki rezilta sa ti anmennen?

⁵ Eduardo ti determinen pour fer tou sa ki i ti kapab pour aranz relasyon avek son fanmir e batir zot spirityelman. I ti dir: “Mon bi ti pour fer antre laverite dan mon zanfan par mon parol ek legzanp, pa zis dir ki mon kontan Zeova me montre sa par mon bann aksyon.” (1 Zan 3:18) Eski Zeova ti beni Eduardo ler i ti demontre lafwa? Anna i reponn: “Ler mon ti vwar tou son zefor pour vin en bon papa e vin pros avek nou, sa ti fer en gran diferans. Ler mon ti vwar li pe fer progre dan kongregasyon, mon ti santi mwan fyer. Sa lemonn ti pe esey elwanny nou avek Zeova. Me nou ti vwar ki nou paran ti serye dan laverite, alor nou osi nou ti fer parey. Papa ti promet ki i pa pou zanmen kit nou ankor e i pa ti kit nou. Si i ti’n kit nou, i tre probab ki mon pa ti pou dan lorganizasyon Zeova ozordi.”

AKSEPTE RESPONSABILITE

6. Ki leson serten paran ti aprann pandan lager?

⁶ Serten leksperyans i montre ki pandan lager dan Balkans, zanfan bann Temwen Zeova ki ti viv laba ti ere menm si lavi ti difisil. Akoz? Bann paran ki pa ti kapab al travay ti reste kot lakaz e ti etidye avek zot zanfan, zwe e koz avek zot. Ki leson nou tire? Bann zanfan i bezwen zot paran la avek zot, plis ki larzan oubyen kado. Byensir, parey Parol Bondye i dir, bann zanfan pou benefisye si zot ganny latansyon ek formasyon zot paran.​—Prov. 22:6.

7, 8. (a) Ki fot serten paran ki retourn dan zot pei i fer? (b) Ki mannyer paran i kapab ed zot zanfan sirmont bann santiman negatif?

⁷ Malerezman, serten paran i kapab santi ki zot zanfan in rezet zot oubyen pa reazir byen ler zot retourn dan zot fanmir. Zot kapab dir: “Ki mannyer ou kapab pa demontre lapresyasyon pour tou sa sakrifis ki mon’n fer pour ou?” Me, move latitid en zanfan i souvan akoz labsans son paran. Ki mannyer paran i kapab aranz sa sityasyon?

⁸ Demann Zeova pour ed ou pour montre ou fanmir ki ou vreman konpran zot. Apre, ler ou pe koz avek ou fanmir, rekonnet e aksepte ki ou osi ou annan tor. Demann leskiz senser i kapab ede. Anmezir ki ou konzwen ek zanfan i vwar ki ou pe kontinyen fer zefor pour fer sa ki byen, zot pour santi ki ou senser. Avek determinasyon ek pasyans, ou kapab gradyelman reganny lanmour ek respe ou fanmir.

 PRAN SWEN AVEK SON PROP FANMIR

9. Akoz pran swen avek nou prop fanmir pa vedir ki nou devret kontinyen tay deryer larises?

⁹ Zapot Pol ti dir ki kan bann Kretyen pli aze pa kapab fer de bout zwenn ansanm, zot zanfan ek pti zanfan i devret “ranpli zot devwar anver zot paran ek gran paran.” Me, Pol ti ankouraz tou Kretyen pour kontant zot avek zot bezwen sak zour, setadir manze, lenz ek lakaz. Nou pa devret konsantre zis lo ganny en standar lavi pli siperyer e anmas en ta larzan pour lavenir. (Lir 1 Timote 5:4, 8; 6:6-10.) Pour pran swen avek son prop fanmir, en Kretyen pa devret tay deryer larises sa lemonn ki byento pou disparet. (1 Zan 2:15-17) Nou pa devret les “plezir larises” oubyen “traka lavi” anpes nou fanmir “ganny vre lavi” dan nouvo lemonn Bondye kot pou annan lazistis.​—Mark 4:19; Lik 21:34-36; 1 Tim. 6:19.

10. Ki mannyer nou kapab demontre lasazes sorti kot Bondye konsernan det?

¹⁰ Zeova i konnen ki nou bezwen larzan. Me larzan pa kapab protez e soutenir nou parey lasazes Bondye i fer. (Ekle. 7:12; Lik 12:15) Dan plizyer ka, serten dimoun i souzestim lakantite ki i pou koute pour al travay aletranze e napa okenn garanti ki zot pou ganny plis larzan laba. Anfet, sa i kapab anmenn plis problenm. Bokou imigran i retourn avek plis det. Dan plas pli lib pour servi Bondye, a lafen dizour zot servi sa bann ki zot drwa larzan. (Lir Proverb 22:7. *) Sa pli bon desizyon i premyerman evite annan det.

11. Ki mannyer ler ou fer en bidze sa i ede pour redwir lakantite depans?

¹¹ Eduardo ti konnen ki pour reisi dan son desizyon pour reste avek son fanmir, i ti pou bezwen konn servi byen larzan. Li avek son madanm zot ti fer en bidze lo bann keksoz materyel ki ti vreman neseser. Natirelman, sa nouvo bidze ti pou diminyen lakantite keksoz ki zot ti pou kapab aste. Me zot tou zot ti korpere e zot pa ti depans larzan lo bann keksoz ki pa neseser. * Par egzanp, Eduardo i dir: “Mon ti tir mon bann zanfan dan lekol prive e met zot dan en bon lekol piblik.” Eduardo ek son fanmir ti priye ki i trouv en travay ki pa ti pou enterfer avek son bann aktivite spirityel. Ki mannyer Zeova ti reponn zot lapriyer?

12, 13. Ki serten pa en papa ti pran pour siport son fanmir e ki mannyer Zeova ti beni son determinasyon pour gard en lavi senp?

¹² Eduardo i dir: “Sa de premye lannen ti difisil, nou bidze ti zis pour zis. Sa larzan ki mon ti’n met dekote ti pe fini e mon reveni pa ti toultan kouver nou depans e mon ti fatige fizikman. Me nou ti kapab asiste tou renyon e al predikasyon ansanm.” Eduardo ti deside pour pa aksepte okenn louvraz ki ti pou elwanny li avek son fanmir pour plizyer mwan oubyen lannen. I dir: “O kontrer mon’n aprann pour fer plizyer kalite travay pour ki ler ti nepli annan en kalite travay mon ti kapab fer en lot.”

¹³ Lefet ki Eduardo ti pran bokou letan pour pey son bann det, i ti bezwen pey plis lentere. I pa ti vwar sa en problenm akoz i ti anvi pas plis letan avek son fanmir dan diferan laspe zot lavi, zis parey Zeova i demann bann paran pour fer. I dir: “Aprezan mon ganny mwens ki 10 poursan sa ki mon ti pe gannyen ler mon ti pe travay aletranze, me nou pa pe mor lafen. ‘Lanmen Zeova pa tro kourt.’ Anfet, nou ti deside pour fer pionye. I remarkab ki apre sa, bann presyon ekonomik ti diminyen e i ti vin pli fasil pour ganny nou bann keksoz materyel ki neseser.”​—Iza. 59:1.

 FER FAS AVEK BANN PROBLENM FAMILYAL

14, 15. Ki mannyer fanmir i kapab fer fas avek presyon pour rod keksoz materyel dan plas keksoz spirityel e ki lefe zot bon legzanp i annan?

¹⁴ Dan bokou landrwa bann dimoun i santi zot oblize donn larzan ek kado zot fanmir ek zanmi. Eduardo i dir: “I form parti nou kiltir e nou kontan donnen.” Me i azoute: “I annan en limit. Dan en bon fason, mon ti eksplik lezot manm mon fanmir ki mon pou fer otan ki mon kapab, tan ki sa pa met an danze routin ek bezwen spirityel mon fanmir.”

¹⁵ Bann imigran ki retourn dan zot pei e bann ki refize kit zot fanmir pour al travay aletranze, i souvan ganny meprize par lezot manm zot fanmir ki ankoler e dezapwente avek zot akoz petet zot ti pe depan lo zot. Serten i dir ki sa bann imigran ek bann ki refize kit zot pei zot napa lanmour. (Prov. 19:6, 7) Anna, fiy Eduardo i dir: “Kantmenm sa, ler nou refize pour sakrifye bann keksoz spirityel pour bann keksoz materyel serten lezot manm fanmir i kapab avek letan vwar ki kantite enportan lavi Kretyen i vreman enportan. Me, ki mannyer zot pou konpran si nou sede e fer sa ki zot demann nou?”​—Konpar 1 Pyer 3:1, 2.

DEMONTRE LAFWA DAN BONDYE

16. (a) Ki mannyer en dimoun i kapab ‘tronp son lekor’ avek bann fo rezonnman? (Zak 1:22) (b) Ki kalite desizyon Zeova i beni?

¹⁶ Kan i ti’n ariv dan en pei byen prospere san son msye ek zanfan en ser ti dir bann ansyen: “Nou ti bezwen fer bann gro sakrifis pour mwan vin isi. Mon msye ti menm bezwen aret servi konman ansyen. Alor mon vreman swete ki Zeova pou beni nou pour desizyon ki nou’n pran.” Zeova i toultan beni bann desizyon ki montre ki nou annan lafwa dan li, me ki mannyer i kapab beni en desizyon ki tou lekontrer avek son lavolonte, espesyalman kan nou abandonn privilez servis san okenn rezon?​—Lir Ebre 11:6; 1 Zan 5:13-15.

17. Akoz nou devret rod gidans Zeova avan nou fer en desizyon e ki mannyer nou kapab fer sa?

¹⁷ I ti a byen pour rod gidans Zeova avan ki ou fer okenn desizyon oubyen  langazman, me pa apre ki ou’n fer li. Priye pour ganny son lespri sen, lasazes ek gidans. (2 Tim. 1:7) Demann ou lekor: ‘Dan ki sirkonstans mon pare pour obei Zeova? Eski menm anba persekisyon?’ Si wi, eski ou pare pour obei li menm si i vedir annan en standar lavi pli ba? (Lik 14:33) Demann bann ansyen konsey Labib e montre ki ou annan lafwa ek konfyans dan promes Zeova, sa pou ed ou swiv son bann konsey. Bann ansyen pa kapab fer bann desizyon pour ou, me zot kapab ed ou fer bann swa ki a lafen dizour pou fer ou ere.​—2 Kor. 1:24.

18. Lekel ki responsab pour pran swen avek en fanmir e ki bann sirkonstans ki kapab permet lezot ede?

¹⁸ Zeova i donn bann sef fanmir sa responsabilite pour pran swen avek zot fanmir sak zour. Nou devret felisit e priy pour bann ki desarz sa responsabilite, san ki zot kit zot konzwen ek zanfan malgre presyon ek tantasyon pour fer li. Bann sirkonstans san ekspekte parey dezas oubyen swen medikal irzan i donn nou loportinite pour nou montre vre lanmour Kretyen ek lafeksyon pour kanmarad. (Gal. 6:2, 5; 1 Pyer 3:8) Eski ou kapab ede finansyerman kan i ariv en ka irzan oubyen ed bann frer ek ser pour trouv en travay dan ou rezyon? Si wi, ou kapab tir sa presyon lo sa frer oubyen sa ser ki santi ki i bezwen kit son fanmir pour al rod en travay dan en lot pei.​—Prov. 3:27, 28; 1 Zan 3:17.

RAPEL KI ZEOVA POU SEKOUR OU!

19, 20. Akoz bann Kretyen i kapab satisfe ler zot konnen ki Zeova pou ed zot?

¹⁹ Labib i donn nou sa lankourazman: “Pa les lanmour pour larzan domin zot lavi, me kontant zot avek sa ki zot annan, parski Bondye ti dir: ‘Mon pa pou zanmen negliz ou, mon pa pou zanmen abandonn ou.’ Pour sa rezon, nou kapab dir avek kouraz: ‘Senyer i mon sekour, mon pa per personn. Ki dimoun i kapab fer mwan?’” (Ebr. 13:5, 6) Ki mannyer sa verse i kapab ganny aplike?

²⁰ En frer ki ansyen depi lontan, ki reste dan en pei ki pe devlope, i dir: “Souvan dimoun i koz lo ki mannyer bann Temwen Zeova i ere. Zot osi remarke ki menm bann Temwen ki pov i toultan byen sanze e paret pli annan ki lezot.” Sa i an armoni avek sa promes ki Zezi ti fer avek bann ki met Rwayonm premye. (Mat. 6:28-30, 33) Wi, Zeova ou Papa dan lesyel i kontan ou e i anvi sa ki meyer pour ou ek ou bann zanfan. “Lizye Zeova pe get partou lo later pour vwar bann ki zot leker i tou pour li, pour li donn zot son lafors.” (2 Kron. 16:9) I ti donn nou bann komannman enkli sa bann ki annan pour fer avek lavi fanmir ensi ki bann keksoz materyel ki neseser pour nou prop dibyen. Ler nou obei son bann komannman, nou montre ki nou kontan li e annan konfyans dan li. “La lanmour Bondye: ki nou obei son konmannman; e son bann konmannman i pa en fardo.”​—1 Zan 5:3.

21, 22. Akoz ou determinen pour montre ki ou annan konfyans dan Zeova?

²¹ Eduardo i dir: “Mon konnen ki sa bann letan ki mon ti elwannyen avek mon madanm ek zanfan, mon pa pou zanmen reganny ankor, menm si mon regrete, mon pa toultan mazin lo la. Bokou mon bann zanmi travay i ris me zot pa ere. Zot fanmir i annan bann problenm grav. Me mon fanmir i ere e mon enpresyonnen pour vwar ki lezot frer dan sa pei, menm si zot pov, zot met bann keksoz spirityel premye dan zot lavi. Sa promes ki Zezi in fer in vin vre pour nou tou.”​—Lir Matye 6:33.

²² Pran kouraz! Swazir pour obei Zeova e annan konfyans dan li. Les ou lanmour pour Bondye, pour ou konzwen ek pour ou zanfan motiv ou pour desarz ou responsabilite spirityel anver ou fanmir. An rezilta sa, ou pou vwar ki Zeova ‘pou sekour ou.’

[Not anba lo paz]

[Kestyon]

[Portre lo paz 25]

Eski ou kapab aprann fer diferan travay pour siport ou fanmir? (Vwar paragraf 12)