1, 2. Vahapu ovo hava ka longa kondje yoilongo ohava hangwa komashongo elipi ngeenge va aluka? (Tala efano pehovelo loshitukulwa.)

EDUARDO okwa ti: “Eshi nda li handi longo kondje yoshilongo, onda li ndi na oilonga hai futu nawa. * Ndele eshi nda ka hovela okukonakona Ombibeli nEendombwedi daJehova, onda ka mona kutya ondi na oshinakuwanifwa sha kwata moiti shokufila oshisho oukwaneumbo wange pamhepo ndele hapalutu ashike. Opo nee onda ka shuna keumbo.”—Ef. 6:4.

² Eduardo okwa li e shii kutya ngeenge okwa shuna koukwaneumbo waye ota hafifa Jehova. Ndele ngaashi ashike Marilyn oo a tumbulwa moshitukulwa sha tetekela, Eduardo naye okwa li ta ka tamekulula okupameka ekwatafano laye noukwaneumbo waye. Okwa li yo a taalela eshongo lokufila oshisho oukwaneumbo waye moshilongo shavo osho sha hepa. Mbela okwa li te ke u fila oshisho ngahelipi? Mbela eongalo ola li tali ke mu kwafela?

3. Okukala kwomudali kokule noukwaneumbo ohaku kumu ngahelipi ounona?

³ Eduardo okwa ti vali: “Onda li nda mona kutya onda hauluka  ovana vange pefimbo opo va li va pumbwa ewiliko nohole yange. Kanda li navo ndi va leshele omahokololo Ombibeli, okwiilikana pamwe navo, oku va papatela nokudanauka navo.” (Deut. 6:7) Omonakadona wedina Anna okwa ti: “Onda li ndi udite inandi amenwa pamaliudo eshi tuhe na tate meumbo. Eshi a ka aluka, ondaka nolupe laye oyo ashike twa li tu shii, naashi a papatela nge, kasha li sha kuma nge.”

4. Ongahelipi okukala kokule noukwaneumbo kwomushamane haku kumu onghandangala yaye e li omutwe woukwaneumbo?

⁴ Ngeenge omushamane oku li kokule noukwaneumbo, iha dulu okuwanifa po oshinakuwanifwa shaye shoukwamutwe. Omukulukadi waEduardo okwa ti: “Onda li handi dana onghandangala ndi li meme natate nonda li nda ikilila okuninga omatokolo mahapu oukwaneumbo. Eshi Eduardo a ka alukila keumbo, onda li ndi na okulihonga kutya okudulika u li Omukriste okwa kwatela mo naanaa shike. Nokuli nopaife, omafimbo amwe ondi na okulidimbulukifa kutya kandi na okuninga omatokolo molwaashi omushamane wange okwa aluka.” (Ef. 5:22, 23) Eduardo okwa ti: “Ovanakadona vetu ova li va ikilila okupula epitikilo kuina ngeenge va hala okuninga sha. Tu li ovadali, otwa li twa mona kutya ovana vetu ova pumbwa okumona kutya ohatu ningi omatokolo pamwe nonda li ndi na okulihonga okukwatela komesho monghedi yopaKriste.”

5. Ongahelipi omushamane umwe a li a hovela okutungulula ekwatafano laye noukwaneumbo eshi a alukila keumbo, naasho osha li sha etifa oidjemo ilipi?

⁵ Eduardo okwa li a ninga ngaashi ta dulu opo a tungulule ekwatafano laye noukwaneumbo noku u pameka pamhepo. Okwa ti: “Elalakano lange okufindila oshili movana vange moku va honga nomoku va tulila po oshihopaenenwa, mokuulika kutya ondi hole Jehova shili ndele hakupopya ashike ngahenya.” (1 Joh. 3:18) Mbela Jehova okwa li ngoo a nangeka noupuna eenghatu daEduardo deitavelo? Anna okwa ti: “Eshi twa mona tate ta ningi eenghendabala opo a kale xe muwa noku kale e na ekwatafano liwa nafye, osha etifa omalunduluko manene. Otwa li tu udite etumba eshi twa mona ta ningi exumokomesho meongalo. Ounyuni owa li tau kendabala oku tu ehenifa kokule naJehova. Ndele otwa mona nghee ovadali vetu tava yandje elitulemo koshili, onghee hano nafye otwa li twa kendabala tu ninge sha faafana. Tate okwa li e tu udanekela kutya ite ke tu fiya po vali, naasho osho a ninga. Ngeno okwa li e tu fiya po vali, ngeno otashi dulika paife ndihe mo mehangano laJehova.”

6. Oshilihongomwa shilipi ovadali vamwe ve lihonga pefimbo loita?

⁶ Ounona ohava kala va hala ovadali vavo va kale navo. Pashihopaenenwa, eshi muBalkans mwa li oita, ovadali vahapu vEendombwedi kava li hava dulu okuya koilonga. Oshidjemo, ova li hava kala novana vavo momaumbo. Ova li hava danauka navo, hava kundafana navo nokukonakona navo. Ounona ova li have shi hafele nova li va hafa nonande ova li meenghalo didjuu. Osho otashi tu hongo shike? Otashi tu hongo kutya ounona ohava kala va hala okukala novadali vavo shi dulife okupewa ashike oimaliwa ile omaano. Ngaashi Ombibeli ya popya, ounona ohava mono ouwa ngeenge ovadali ohava kala pamwe navo noku va deula. — Omayel. 22:6.

7, 8. (a) Epuko lilipi ovadali vamwe ovo va ka longele kokule va fiya po omaukwaneumbo hava ningi? (b) Ongahelipi ovadali tava dulu okupameka vali ekwatafano lavo nomaludalo avo?

⁷ Ovadali vamwe ovo va ka longele kokule va fiya po omaukwaneumbo avo shimha va aluka ohava kala va kumwa eshi ovana vavo vehe na vali navo. Ovadali va tya ngaho otashi dulika va tye: “Omolwashike muhe na olupandu omolweenghendabala adishe odo nda ninga omolweni?” Ashike otashi dulika oikala ii younona ya tya ngaho ya etifwa kwaashi ovadali va li ve va fiya po. Ongahelipi ovadali tava dulu okuungaunga nomupondo noupyakadi oo?

⁸ Pula Jehova e ku kwafele u ude ko onghalo youkwaneumbo woye. Opo nee ngeenge to popi noukwaneumbo woye, dimina kutya naave ou na mo ombinga mokweetifa onghalo ya tya ngaho. Ndele ngeenge owa yandje ombili otashi ka xwepopaleka onghalo. Ngeenge oukwaneumbo woye owa mono  kutya oho ningi alushe eenghendabala opo u xwepopaleke onghalo, otau ka mona kutya ou mu diinini. Ngeenge owa kala omulididimiki nowa tokola toko, mokweendela ko kwefimbo oukwaneumbo woye otau ka kala vali u ku hole nowe ku fimaneka.

9. Omolwashike ‘okufila oshisho vambuloye’ inaku pumbwa omunhu a lalakanene oupuna?

⁹ Omuyapostoli Paulus okwa ti kutya, ngeenge Ovakriste ovanamido itava dulu okulifila oshisho, ovana novatekulu ove na “okwaalulila ovakulunhu vavo eyakulo liwa.” Okwa twikila ko vali ta kumaida Ovakriste aveshe va kale va wanenwa koipumbiwa yakeshe fiku oyo ve na, ngaashi oikulya, oikutu nonhele yokukala. Katu na okukala hatu kendabala tu kale nonghalamwenyo youdjeko ile oimaliwa ihapu hatu ningile onakwiiwa. (Lesha 1 Timoteus 5:4, 8; 6:6-10.) Omukriste ina pumbwa okulikongela oupuna mounyuni ou u li pokuxula po opo a ‘file oshisho vambulaye.’ (1 Joh. 2:15-17) Katu na okweefa ‘epukifo loupuna’ ile ‘oshisho shoipalwifa’ i tule moshiponga omhito yomaukwaneumbo etu yoku ka mona “omwenyo waalushe” mounyuni mupe waKalunga wouyuki. — Mark. 4:19; Luk. 21:34-36; 1 Tim. 6:19.

10. Omolwashike shi li pandunge okuhenuka okulya omikuli?

¹⁰ Jehova oku shi shii kutya otwa pumbwa oimaliwa. Ndele oimaliwa itai dulu oku tu amena noku tu kwafela i dule ounongo waJehova. (Omuud. 7:12; Luk. 12:15) Luhapu ovanhu ihava diladila kutya otashi ke va pula shi fike peni okutembukila koshilongo shimwe nokape na eshilipaleko kutya omunhu ota ka mona oimaliwa ihapu kondje yoshilongo. Ndele okutembuka kwa tya ngaho otaku dulu okukala kwa nyika oshiponga neenghono. Vahapu ovo va ka longele kondje yoilongo ohava ka aluka ve na nokuli omikuli dihapu. Ponhele yokulongela Jehova va manguluka, ohave lihange va ninga ovapika vaavo ve va pa omikuli. (Lesha Omayeletumbulo 22:7.) Ndele osho shiwa unene, osho okuhenuka okulya omikuli.

11. Ongahelipi okuliufa kelandulafano laasho mwa pumbwa taku ninipike oupyakadi woshimaliwa?

¹¹ Eduardo okwa li e shii kutya opo a file oshisho oukwaneumbo waye e li pamwe nao, oku na okulihonga okulongifa nawa oimaliwa. Ye nomukulukadi waye ova li va ninga elandulafano loinima oyo va pumbwa shili. Eshi ve ke liufa kelandulafano olo, inava ka kala vali hava lande oinima ihapu ngaashi va li hava ningi eshi va li ve na oimaliwa ihapu. Aveshe ova li hava longele kumwe nokava li hava lande oinima inai pumbiwa. * Eduardo okwa ti: “Pashihopaenenwa, ovana vange onde va kufa ko keefikola dopaumwene ndele handi va kongele keefikola daaveshe odo hadi hongo nawa.” Okwa li a ilikana pamwe noukwaneumbo waye opo a mone oilonga oyo itai ka ya moshipala omalipyakidilo avo opamhepo. Ongahelipi Jehova a li a nyamukula omailikano avo?

12, 13. Eenghatu tadi longo dilipi xe umwe omudali a katuka opo a kwafele oukwaneumbo waye, nongahelipi Jehova a li a nangeka noupuna etokolotoko laye lokukaleka onghalamwenyo yaye paunafangwa?

¹² Eduardo okwa ti: “Oule womido mbali dopehovelo okudja eshi nda aluka, kanda li handi mono oshimaliwa sha wana okulanda oipumbiwa yetu. Ondjabi yange oya li inini noinai dula okuwanifa po oipumbiwa yetu nonda li handi kala nda loloka neenghono. Ashike otwa li hatu i kokwoongala keshe nohatu i moukalele pamwe.” Eduardo okwa li a tokola nale momutima waye kutya ita ka tambula oilonga oyo tai ke mu kaleka kokule noukwaneumbo waye. Okwa ti: “Ponhele yaasho, onda li nde lihonga okulonga oilonga yomaludi a yoolokafana opo ngeenge oilonga yoludi limwe kai po, ohandi dulu okulonga ikwao.”

¹³ Molwaashi osha li sha pula Eduardo efimbo lile okumana okufuta omikuli daye, okwa li e na okufuta oishoshela ihapu. Ashike Eduardo okwa li a ninga ngaho nehalo liwa opo a dule okulongela Jehova pamwe noukwaneumbo waye. Okwa ti: “Paife ohandi mono shinini shi dulike kwaasho nda li handi mono kondje yoshilongo, ashike nande ongaho ihatu nangele ondjala. ‘Eke lOmwene inali xupipala.’ Onghee hano, otwa li twa tokola  opo tu kokole ondjila. Shididilikwedi, lwanima eliko moshilongo ola ka ya pombada kanini, notwa ka kala hatu mono oipumbiwa yetu yakeshe efiku noupu.”—Jes. 59:1.

14, 15. Ongahelipi omaukwaneumbo taa dulu okuungaunga nomafininiko okulalakanena oinima yopamaliko ponhele yoinima yopamhepo, noshike tashi ka ningwa po ngeenge okwa tula po oshihopaenenwa shiwa?

¹⁴ Ovanhu vahapu ohava kala ve udite kutya ove na oshinakuwanifwa shokupa ovapambele nookaume oimaliwa nomaano. Eduardo okwa ti: “Oshi li meputuko letu okuyandja kuvamwe, ashike okuyandja oku na ongaba. Onda yelifila nelungi ovapambele vange kutya ohandi dulu oku va pa ngaashi handi dulu ngeenge itashi tula moshiponga omalipyakidilo neemhumbwe dopamhepo doukwaneumbo wange.”

¹⁵ Ovo va ka longele kondje yoilongo ndele tava aluka nosho yo ovo va anya okuya ko ohava handukilwa nohava fiwa ounye kovapambele molwaashi ova li ve va tala ko kutya ovo ooshikwete po. Vamwe ohave va ula nokuli kutya ove lihole. (Omayel. 19:6, 7) Okamonakadona kaEduardo kedina Anna oka ti: “Ngeenge otwa hoolola okulongela Jehova ponhele yokukonga oimaliwa, otashi dulika vamwe vomovapambele vetu va ude ko kutya Jehova okwa fimana shi fike peni. Ndele otave ke shi uda ko ngahelipi ngeenge ohatu liyandje komahalo ovo?”—Yelekanifa na-1 Petrus 3:1, 2.

16. (a) Ongahelipi omunhu ta dulu ‘okulifufya ye mwene’ omolwokutomhafana kwa puka. (Jak. 1:22) (b) Jehova oha nangeke noupuna omatokolo oludi lilipi?

¹⁶ Eshi omumwameme umwe a fika koshilongo shimwe oko a ka longa a fiya ko omushamane waye nounona, okwa li a lombwela ovakulunhuongalo a ti: “Otwa ninga omaliyambo manene opo ndi dule okuuya oku. Omushamane wange okwa efa po nokuli oshinakuwanifwa shaye shoukulunhuongalo. Onghee hano, ondi na elineekelo kutya Jehova ota ka nangeka noupuna okuuya kwange oku.” Oshoshili kutya Jehova oha nangeke alushe noupuna omatokolo oo a kanghamena keitavelo, ndele ongahelipi ta ka nangeka noupuna etokolo olo tali kondjifafana nehalo laye, naunene tuu ngeenge otali ningifa omunhu a efe po oufembanghenda woshilonga shiyapuki?—Lesha Ovaheberi 11:6; 1 Johannes 5:13-15.

17. Omolwashike tu na tete okukonga ewiliko kuJehova fimbo inatu ninga omatokolo, nongahelipi hatu dulu okuninga ngaho?

¹⁷ Kala ho kongo tete ewiliko laJehova fimbo ino ninga etokolo ile eudafano lonhumba ndele hangeenge wa ninga nale etokolo. Ilikana Jehova e  ku pe omhepo yaye iyapuki, ounongo nosho yo ewiliko laye. (2 Tim. 1:7) Lipula kutya: ‘Mbela ohandi kala nda hala okudulika kuJehova ngeenge ndi li meenghalo dilipi? Mbela nokuli nonande ohandi hepekwa?’ Ngeenge osho, mbela owa halelela okudulika kuye nonande osho osha kwatela mo okweefa po onghalamwenyo youdjeko? (Luk. 14:33) Konga omayele opamishangwa kovakulunhuongalo, nokuulika kutya ou na eitavelo nowe lineekela meudaneko laJehova loku ku kwafela ngeenge owa tambula ko omayele aye. Ovakulunhuongalo itava dulu oku ku ningila ko omatokolo, ashike otava dulu oku ku kwafela u ninge omatokolo oo tae ku etele ehafo monghalamwenyo. — 2 Kor. 1:24.

18. Olyelye e na oshinakuwanifwa shokufila oukwaneumbo oshisho, noshike hatu dulu okuninga opo tu kwafele?

¹⁸ Jehova okwa teelela omitwe domaukwaneumbo di yambidide omaukwaneumbo ado efimbo keshe. Otu na okupandula nokwiilikanena ovo tava wanifa po oshinakuwanifwa shavo nopehe na okufiya po ookaume kavo kopahombo ile ovana vavo, nonande ope na omafininiko nosho omashongo oku shi ninga. Eenghalo odo hadi holoka po inashi teelelwa, ngaashi oiponga ile eenghalo dopaunamiti dopaulumomhumbwe, ohai tu pe omhito yokuulikilafana ohole noukwao wananghali tu li Ovakriste vashili. (Gal. 6:2, 5; 1 Pet. 3:8) Mbela ito dulu okuyandja oshimaliwa ngeenge pe na onghalo ya endelela ile u kwafele Omukriste mukweni a mone oilonga moshitukulwa shavo? Ngeenge osho, oto ka kwafela umwe oo ta fininikwa ile ta diladila okufiya po oukwaneumbo waye a ka konge oilonga pamwe pe lili. — Omayel. 3:27, 28; 1 Joh. 3:17.

19, 20. Omolwashike Ovakriste tava dulu okukala va wanenwa kokukala ve shii kutya Jehova ote ke va kwafela?

¹⁹ Ombibeli oye tu kumaida tai ti: “Mokukala kweni kaleni mu he nolwisho. Eshi mu shi kwete nashi mu wanene, osheshi Ye okwa tya: Ame ihandi ku efa noitandi ku fii po nande. Onghee hano hatu dulu okutya nelineekelo: Omwene Oye omukwafi wange, ame ihandi tila; omunhu ota dulu okuninga nge shike?” (Heb. 13:5, 6) Ongahelipi osho hatu dulu oku shi tula moilonga?

²⁰ Omumwatate umwe wokoshilongo shimwe osho opo tashi putuka nokwa kala omukulunhuongalo oule wefimbo lile okwa ti: “Ovanhu luhapu ohava pandula Eendombwedi daJehova molwaashi ohadi kala da hafa. Ova didilika yo kutya nokuli nEendombwedi odo da hepa ohadi djala nawa nodi na oinima oyo da pumbwa.” Osho otashi tu kumwe neudaneko laJesus olo a udanekela ovo va pitifa komesho Ouhamba. (Mat. 6:28-30, 33) Onghee hano, Xo yomeulu Jehova, oku ku hole nokwe ku halela osho sha denga mbada nosho yo ovana voye. Ombibeli oya ti: “Omesho Omwene taa tale edu alishe, opo a kwafe neenghono ovo have liameke kuye nomutima aushe.” (2 Omaf. 16:9) Okwe tu pa oipango yaye mwa kwatelwa naayo i na sha nonghalamwenyo youkwaneumbo nosho yo oinima yopamaliko, omolwouwa wetu. Ngeenge otwa dulika kuyo, ohatu ka ulika kutya otu hole Jehova notwe mu lineekela. Ombibeli oya ti: “Ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.”—1 Joh. 5:3.

21, 22. Omolwashike wa tokola toko okuulika kutya owe lineekela Jehova?

²¹ Eduardo okwa ti: “Ondi shi shii kutya efimbo olo nda kala kokule nomukulukadi wange novana vange itali aluka vali, ashike inandi hala okukala handi yandje elitulemo kwaasho. Vahapu ovo nda li handi longo navo nale ova punapala ashike inava hafa. Omaukwaneumbo avo oku na omaupyakadi a kwata moiti. Ndele fye moukwaneumbo wetu otwa hafa neenghono. Osha kuma nge neenghono okutala nghee ovamwatate moshilongo shetu va pitifa komesho oinima yopamhepo monghalamwenyo yavo nonande ova hepa. Atushe otu wete oushili weudaneko laJesus.”—Lesha Mateus 6:33.

²² Kala u na elineekelo! Hoolola okudulika kuJehova nokukala we mu lineekela. Ohole yoye yokuhola Kalunga, kaume koye kopahombo nosho yo ounona voye nai ku linyengife u wanife po oinakuwanifwa yoye yopamhepo noyoukwaneumbo woye. Oshidjemo, oto ka mona kutya ‘Omwene Oye omukwafi woye.’