1, 2. Sooq nunani allani sulisut angerlarnissartik sapernartissinnaavaat? (Allaaserisap aallaqqaataani assiliaq takuuk).

EDUARDO ima oqaluttuarpoq: “Nunami allami suligallarama qaffasissumik atorfeqarlungalu aningaasarsiorluarpunga. * Jehovalli Nalunaajaasuinit atuaqqissaaqatigineqartalerama suli pingaarnerusumik akisussaaffeqarlunga — tassa ilaquttama anersaakkut timikkullu pisariaqartitaat isumagisariaqarlugit — paasivara. Taamaattumik najorniarlugit angerlarpunga.” — Ef 6:4.

² Eduardop nalunngilaa ilaquttaminik najueqqilernini Jehovap iluarissagaa. Tamannali ajornaatsuinnaanngilaq. Nuliaminut qitornaminullu attaveqaqqilertariaqarlunilu taakku isumassorniarlugit naammattumik aningaasarsiortariaqarpoq. Qanoq taamaaliussava? Ilagiinniittunit ikiorneqassappat?

3. Meeqqat angajoqqaaminnik najugaqateqannginnertik qanoq sunnerneqaatigisarpaat?

³ Eduardo ima nassuerpoq: “Qitornamma uannit siulersorneqarnissaminnik sunnerneqarnissaminnillu pisariaqartitsinerpaaffianni sumiginnarsimavakka. Biibilimi oqaluttuanik atuffattarnissaannut, qinoqatigisarnissaannut, pakkutaartarnissaannut pinnguaqatigisarnissaannullu  tunngatillugu imminiiginnarsimavakka.” (5 Mos 6:7) Pania angajulleq, Anna, ima oqaluttuarpoq: “Ataatatta angerlarsimaffitsinni najugaqannginnera misigissutsikkut toqqissisimajunnaassutigaara. Angerlarmat taamaallaat isikkuatigut nipaatigullu ilisarisinnaavarput. Ataatannit pakkunneqartarnera uannut pissusissamisuunngilaq.”

4. Sooq ataataasoq ilaquttaminit ungasissumi najugaqaraangat ilaqutariinni ittutut akisussaaffimminik naammassinninnissaa sapernarsiartortarpa?

⁴ Ataataasoq ilaquttaminit ungasissumi najugaqaraangat ilaqutariinni ittutut akisussaaffimminik naammassinninnissaa sapernarsiartortarpoq. Eduardop nulia, Ruby, ima nassuiaavoq: “Ataataasup anaanaasullu akisussaaffii ataatsikkut naammassisussaallugillu aalajangigassat ilaqutariinnut tunngasut kisimiillunga aalajangertarnissaat sungiuppara. Eduardo angerlarmat kristumiutut naalatsigitinnerup qanoq paasisariaqavinnera ilinniartariaqarpara. Allaat massakkumut uinnik najugaqateqarninnik imminut eqqaasittariaqartarpunga.” (Ef 5:22, 23) Eduardo ima oqarpoq: “Niviarsissat arlaannik iliuuseqarsinnaanerlutik anaanaminnut aperisarnissartik sungiussimavaat. Angajoqqaajusutut qitornatsinnut tunngatillugu ataasioqatigiittarnissarput paasivarput, kristumiutullu siulersuinissara ilikkartariaqarpara.”

5. Eduardo angerlarami ilaquttaminut attaveqarluaqqilerniarluni qanoq iliorpa, tamannalu qanoq kinguneqarpa?

⁵ Eduardo sapinngisani tamaat ilaquttaminut attaveqarluaqqilerniarlunilu taakku Jehovamut attaveqarluaqqilernissaannut ikiorpai. Qitornaminut Jehovamik asanninneraannarneq ajorpoq, maligassiuinermigulli qitornani sallusuissummik ilinniartippai. (1 Joh 3:18) Eduardo iliuutsini pillugit Jehovamit pilluaqquneqarpa? Anna ima oqarpoq: “Ataataalluarusulluni uagutsinnullu qanilleqqikkusulluni iliuuseqangaarnera killinneqaatigingaarparput. Ilagiinni akisussaaffeqarnerulermat tulluusimaarpugut. Silarsuup Jehovamit ungasillitinniarsarigaluarpaatigut. Angajoqqaavulli sallusuissummik pingaarnerpaatitsimmata uaguttaaq sapinngisatsinnik sallusuissummik pingaarnerpaatitsiniarpugut. Ataatatta qimaqqinngisaannarniarluta neriorsorpaatigut, neriorsuutinilu eqqortippaa. Taamaaliorsimanngitsuuppat Jehovap peqatigiissortai ullumikkut qimareersimassagaluarpakka.”

6. Balkanimi sorsuttoqarnerani angajoqqaarpassuit suna ilikkarpaat?

⁶ Meeqqat angajoqqaaminnit najorneqarnissartik kissaatigaat. Assersuutigalugu Balkanimi sorsuttoqarmat angajoqqaarpassuit nalunaajaasut suliartorsinnaaneq ajorput. Tamatuma kingunerisaanik piffissap annerpaartaani qitornatik angerlarsimaqatigisarpaat, pinnguaqatigisarpaat, oqaloqatigisarpaat atuaqqissaaqatigisarlugillu. Qitornaasut tamanna nuannarilluinnarpaat sorsuttoqalinnginneraninngarniillu pilluarnerulerlutik. Tamanna qanoq ilinniarfigisinnaavarput? Meeqqat aningaasanik tunissutinillu tunineqarnissaminngarnit allaallu toqqissisimasumik avatangiiseqarnissaminngarnit angajoqqaatik ilagerusunnerusarpaat. Biibilimi allassimaneratut meeqqat angajoqqaaminnit ilagineqartarnertik ilinniartinneqartarnertillu iluaqutigissavaat. — Uss 22:6.

7, 8. (a) Angajoqqaat ilaat uteraangamik suna tupaallaatigisarpaat? (b) Qanoq angajoqqaat qitornaminnut attaveqarluaqqilersinnaappat?

⁷ Angajoqqaat ilaat ilaquttaminnut uteraangamik tupaallassinnaasarput. Imaassinnaavoq meeqqat angajoqqaamik uteqqinnerat soqutigerpasinngikkaat angajoqqaaminnilluunniit tatiginnippasinngitsut. Immaqa angajoqqaaq ima oqassaaq: “Illit pillutit taama iliuuseqarnikuutigalunga sooq taama qujasuitsigaat?” Meerarli angajoqqaaminit qimanneqarsimanerminik aliasuutiginniinnarpoq. Ajornartorsiut angajoqqaap qanoq aaqqissinnaavaa?

⁸ Ilaquttavit sunik pisariaqartitsinerannik paasinninnissannut Jehovamut ikioqqullutillu ilaquttannik soqutiginninnerit ersersiguk. Aamma illit ajornartorsiummut pisooqataanerit paasisariaqarpat. Ilumoorluni utoqqatserneq iluaqutaasinnaavoq. Pissutsinik pitsaanerulersitsiniarnerit ilaquttavit takusinnaagunikku eqqortuliorusunnerit paasissavaat.  Utaqqisinnaassuseqaruit tunniutiinnanngikkuillu ilaquttavit asaqqilersinnaallutillu ataqqileqqissinnaavaatsit.

9. Sooq ‘eqqarlitsinnik isumaginninniarnitsinni’ amerlanerusunik pigisaqalertariaqanngilavut?

⁹ Apustili Paulusi allappoq kristumiut utoqqalisimasut pisariaqartitatik namminneq isumagisinnaanngikkunikkit qitornaasunit ernutaasunillu ikiorneqartariaqartut. Paulusi naapertorlugu nerisassaqarnerput, atisassaqarnerput angerlarsimaffeqarnerpullu inuunitsinni nalerisimaarnissatsinnut aalajangiisuusarput. (1 Timotheusi 5:4, 8; 6:6-10 atuakkit). Kristumiu ilaquttaminik pilersuisinnaajumalluni silarsuarmi matumani ‘nunguttussaasumi’ pisuunngortariaqanngilaq. (1 Joh 2:15-17) Aningaasat ajornartorsiutitsinnik tamanik aaqqiissutitut isiginngisaannartariaqarlugillu ‘inuunerup matuma piinik isumakuluutit’ pissutigalugit ilaquttatta Guutip silarsuassaani nutaami ‘inuunivimmik’ tigulluartitaarunnaarnissaat akuerinngisaannartariaqarparput. — Mark 4:19; Luk 21:34-36; 1 Tim 6:19.

10. Sooq akiitsoqalinnginnissaq silatusaarnerua?

¹⁰ Aningaasanik pisariaqartitsinerput Jehovap nalunngilaa. Aningaasalli ilisimassusertut Jehovameersutut iluaqutigisinnaanagillu illersuutigisinnaanngilavut. (Oqal 7:12; Luk 12:15) Nunamut allamut nuunnerup qanoq akisutiginera inuit amerlanertigut nalusarpaat. Aamma nunasineq aningaasarsiornissamut qularnaveeqqutaanngilaq. Nunamulli allamut nuunneq navianartortaqarpoq. Inuppassuit ilaquttaminnik qimatsisimasut angerlaraangamik suli annerusumik akiitsoqalersimasarput. Guutimut kiffartornerminni kiffaanngissuseqalernerunatik inuit taarsigassarsisitsisimasut kiffartorfigisariaqartarpaat. (Ussatit 22:7 atuaruk). Akiitsoqalinnginnissaq silatusaarnerujuaannarpoq.

11. Ilaqutariit missingersuusiorneq qanoq iluaqutigisinnaavaat?

¹¹ Eduardop nalunngilaa angerlaruni ilaquttaminik isumassuilluarsinnaajumalluni aningaasanik atuisarnermut tunngatillugu mianersortariaqarnini. Nulianilu pisariaqartitatik naapertorlugit missingersuusiorput. * Missingersuut malissinnaajumallugu aningaasaateqarnerugallarnermissut pisiaqartigisinnaanngillat. Ilaqutaasulli tamarmik suleqatigiillutillu pisariaqanngitsunik pisineq ajorput. Eduardo ima oqarpoq: “Assersuutigalugu qitornakka atuarfimmi namminersortumi atuartittarunnaarlugit atuarfimmi tamanoortumi atuartittalerpakka.” Ilaquttanilu aalajangersimasumik atuaqqissaaqatigiittarnerminnut ajoqutaanngitsumik suliffittaarnissani Jehovamut qinnutigisarpaat. Qinnutaat Jehovamit qanoq akineqarpa?

12, 13. Eduardo ilaquttaminik pilersuiniarluni qanoq iliorpa, pilimanianngitsumillu inuuniarluni aalajangermat Jehovap qanoq pilluaqquaa?

¹² Eduardo ima misigisalikkersaarpoq: “Ukiuni marlunni siullerni naammattunik aningaasaateqaqqalaaginnarpugut. Aningaasaatikinneruleraluttuinnarlutalu aningaasarsiatuannguakka ilaannikkut naammanneq ajorlutillu timikkut qasulluinnartarpunga. Tamattali ataatsimiinnernut najuuttuaannarlutalu oqaluusseqatigiittuaannarpugut.” Aalajangerpoq ilaquttaminik ungasillissutigisinnaasaminik suliffittaarnissani eqqarsaatiginiarnaguluunniit. Ima oqarpoq: “Akerlianik suliffiit aalajangersimasut suliffigineqarsinnaajunnaaraangata allamik suliffeqalersinnaaniassagama assigiinngitsunik suliffeqarnissara ilinniarpara.”

¹³ Eduardop akiitsuni sivisuumik akilersoramigit erniat akiitsuminit annerulersimasut akilersortariaqarpai. Eduardoli ilaquttanilu Jehovamut kiffartorsinnaaniassagamik taamaaliornissaminut piumassuseqarpoq. Ima oqarpoq: “Maanna nunami allami aningaasarsiamma qulerarterutaannit annikinnerusumik aningaasarsiaqarpunga, kaannerli ajorpugut. ‘Jehovap talia naappallaanngilaq.’ Tamatta pionerinngorniarluta aalajangerpugut.” Tamatuma kingunitsianngua aningaasaqarniarnertik  ajunnginnerulermat ilaquttani isumassorluarnerusinnaanngorpai. — Es 59:1.

14, 15. Ilaqutariit anersaakkut anguniagaqarnerminngarnit pigisanik pingaartitsinissamut tatineqarnertik qanoq akiorsinnaavaat, maligassiuilluarnerallu qanoq ajunngitsumik sunniuteqarsinnaava?

¹⁴ Inuit ilaat misigisarput ilaquttaminnut ikinngutiminnullu aningaasanik tunissutinillu tunisisariaqartarlutik. Eduardo ima oqarpoq: “Tamanna kulturitsinnut ilaammat tunissuteqarneq nuannarisarparput.” Imali nangippoq: “Tunissuteqarsinnaanerpulli killeqarpoq. Periaaserillunga ilaquttakka nassuiaappakka inoqutimma pisariaqartitaannik Jehovamullu kiffartornerannik ingerlaannaq sumiginnaanngikkaluarlunga sapinngisannik tunissuteqarfigisarniarlugit.”

¹⁵ Inuup ilaquttaminik qimatsiniarnani imaluunniit nunamit allamit angerlarniarluni aalajangernera ilaqutaasut ilaasa pakatsissutigisinnaavaat. Allaat taamatut aalajangertoq asanninnginnerarsinnaavaat namminissarsiornerarluguluunniit. Sooq? Ilaqutaasut aningaasanik taassumannga tunineqarnissartik naatsorsuutigimmassuk. (Uss 19:6, 7) Eduardop pania, Anna, oqarpoq ilaqutariit aningaasat pinnagit Jehovamik pallorfiginninniarlutik aalajangernerat ilaqutaasut allat Jehovap qanoq pingaaruteqartigineranik paasinnissutigisinnaagaat. Ilaqutariit taamatut aalajanginngippata ilaqutaasut allat tamanna paasinaviarunanngilaat. — 1 Petrusi 3:1, 2 naleqqiuguk.

16. (a) Qanoq inuk ‘imminut salloqittarsinnaava’? (Jaak 1:22) (b) Aalajangikkat qanoq ittut Jehovap pilluaqqusarpai?

¹⁶ Qatanngut arnaq nunami allami suliniarluni ilaquttaminik qimatsisimasoq utoqqaanertanut ima oqarpoq: “Maanga nuussinnaajumallunga pilliuteqangaartariaqarpugut. Uiga allaat utoqqaanertaajunnaartariaqarpoq. Taamaattumik maanga nuunnera pillugu Jehovamit pilluaqquneqarumaarnera neriuutigilluinnarpara.” Uppersuseqarutta Jehovallu piumasaanut naapertuuttumik aalajangiisarutta taassumannga pilluaqquneqarnissarput qularinngilluinnarsinnaavarput. Jehovap aalajangikkat piumasaminut akerliusut pilluaqqunavianngilai. Aamma eqqunngitsunik pissuteqarluta kiffartornermi immikkut pisinnaatitaaffitsinnik eqqortitserusukkunnaarnerput iluarinavianngilaa. — Hebræerit 11:6; 1 Johannesi 5:13-15 atuakkit.

17. Sooq kingusinnerusukkut peqqissiminnginniassagatta aalajangertinnata Jehovamit siulersorneqarnissarput noqqaassutigisariaqarparput, qanorlu taamaaliorsinnaavugut?

 ¹⁷ Kingusinnerusukkut peqqissiminnginniassagavit aalajangertinnak Jehovamit siulersorneqarnissat noqqaassutigiuk. Anersaamik illernartumik ilisimassusermillu tunineqarnissat siunnersorneqarnissallu pillugit qinugit. (2 Tim 1:7) Imminut ima aperigit: “Jehovamut kiffartorniarlunga qanoq pilliuteqartigiumavunga? Taassuma ilaquttannik najueqqusinera, allaat tamanna ilorrisimaarnannginnerusumik inuuneqalissutigisinnaagaluarlugu, naalassavara?” (Luk 14:33) Utoqqaanertanut ikioqqullutillu taakkua Biibili tunngavigalugu siunnersuutaat maleruakkit. Taamaalioruit Jehovap ilinnik ikiuiumaarnerminik neriorsuutaanik tatiginninnerit ersersissavat. Utoqqaanertat illit sinnerlutit aalajangiisinnaanngillat, pilluarlutilli inuunissannut iluaqutissannik aalajangiinissannut ikiussavaatsit. — 2 Kor 1:24.

18. Ilaquttanik pilersuinissamut kina akisussaaffeqarpa, qanorlu ikiuussinnaavugut?

¹⁸ Jehovap ilaqutariinni ittuusut ilaquttaminnik pilersuiuarnissaat piumasaraa. Ilaquttaminnik qimatsinatik, naak taamaaliornissaminnut ussernartorsioraluarlutik allanilluunniit taamaalioqquneqartaraluarlutik, akisussaaffimminnik eqqortitsisut qinnuttarlugillu nersualaartarpavut. Ajornartoortoqaraangat, soorlu ajunaarnersuaqaraangat nakorsartinnissamilluunniit pisariaqartitsisoqaleraangat, kristumioqatitsinnik asanninnitta misiginneqataanittalu ersersinnissaannut periarfissaqarpugut. (Gal 6:2, 5; 1 Petr 3:8) Illoqarfissinni suliffittaarnissaannut ikiorsinnaavigit imaluunniit pisariaqartileriataagaannik, soorlu aningaasanik nerisassanilluunniit, tunisinnaavigit? Taamaalioruit imaassinnaavoq ilaquttatik qimallugit sumiiffimmut allamut suliartortariaqanngitsut. — Uss 3:27, 28; 1 Joh 3:17.

19, 20. Sooq kristumiut Jehovamit ikiorneqarnissartik qularinngilluinnarsinnaavaat?

¹⁹ Jehovap ima neriorsoqqissaarpaatigut: “Aningaaserituussutsissi qanoq inuunissarsi aalajangissanngilaa, pigisasili naammagisigit. Guutimi nammineq oqarpoq: ‘Iperassanngilakkit imminiiginnassanallu.’ Taamaattumik nakimanata oqarsinnaavugut: Naalagaq ikiortigaara, sioorassanngilanga, inuup qanoq iliorfigisinnaagaminga?” (Hebr 13:5, 6) Tamanna inuunitsinni qanoq ersersissinnaavarput?

²⁰ Nunami siuarsarniakkami utoqqaanertaq ima oqaluttuarpoq: “Inuit Jehovap Nalunaajaasui pilluartuunerakulasarpaat. Aamma maluginiartarpaat nalunaajaasut kusanartunik atisaqartarlutillu pisariaqartitaminnik pigisaqartartut.” Tamannarpiaq Jiisusip neriorsuutigisimavaa. (Matt 6:28-30, 33) Jehova uagutsinnik asannillunilu iluaqutissatsinnik iliuuseqartuaannarpoq. Jehovap “nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit”. (2 Nal 16:9) Tamanna pissutigalugu ilaquttatsinnik pisariaqartitatsinnillu isumaginninnermut tunngatillugu peqqussutinik tunivaatigut. Peqqussutinik taakkuninnga maleruaagaangatta Jehovamik asannillutalu tatiginninnerput ersersittarparput. “[Guutimut] asanninneq tassaavoq inassutai maleruaratsigit, inassutaalu artornartuunngillat.” — 1 Joh 5:3.

21, 22. Sooq Jehovamik tatiginninniarlutit aalajangersimavit?

²¹ Eduardo ima oqaluttuarpoq: “Piffissaq nuliannik qitornannillu qimatseqqaffiga utertinneqarsinnaanngilaq, peqqissimissutikkali eqqarsaatigiuarneq ajorpakka. Suleqatikorpassuakka massakkut pisuujupput pilluarnatilli. Ilaqutaat qaangeruminaatsunik ajornartorsiuteqarput. Uagulli ilaqutariittut pilluarpugut! Nunami maani qatanngutivut piitsuugaluarlutik anersaakkut ittunik salliutitsiuarnerat tupigusuutigisaqaara. Jiisusip neriorsuutiminik eqqortitsinera tamatta misigaarput.” — Matthæusi 6:33 atuaruk.

²² Isumalluarit! Jehovap naalannissaa tatiginissaalu aalajangiusimakkit. Jehovamik, aappannik qitornannillu asannikkuit ilaqutariinni ittuulluarsinnaavutit. Jehovamik ikiorteqarnerit misigisinnaassavat.