1, 2. Us prɔblɛm bɔku pipul dɛn kin gɛt we dɛn kam bak to dɛn famili? (Luk di pikchɔ nia dis atikul in taytul.)

WAN man we nem Ɛdwado bin se: “We a bin de na ɔda kɔntri, a bin gɛt fayn wok ɛn a bin de mek gud mɔni. * Bɔt we a bigin fɔ stɔdi di Baybul wit Jiova Witnɛs dɛn, a kam fɔ si se fɔ de wit mi famili ɛn ɛp dɛn fɔ lan bɔt Gɔd, impɔtant pas di wok we a bin de du. So a go bak to dɛn.”—Ɛfi. 6:4.

² Ɛdwado bin no se if i kam bak to in famili, i go mek Jiova gladi. Bɔt jɔs lɛk Marilin we wi bin tɔk bɔt na di las atikul, Ɛdwado nɔ bin yus to in famili igen, ɛn i bin tek lɔng tɛm fɔ mek in ɛn in famili bi padi bak. I nɔ bin izi fɔ mek i kia fɔ in wɛf ɛn pikin dɛn na in kɔntri we tin tranga. Aw i go fɛn an-to-mɔt fɔ in famili? Aw ɔda brɔda ɛn sista dɛn na di kɔngrigeshɔn go ɛp am?

3. Aw pikin dɛn kin fil we dɛn mama ɔ papa nɔ de liv wit dɛn?

³ Ɛdwado se: “A kam fɔ no se a nɔ bin bisin bɔt mi pikin dɛn di tɛm mɔ we dɛn bin nid mi fɔ tren dɛn ɛn sho dɛn lɔv. A nɔ bin de wit dɛn fɔ rid Baybul stori to dɛn, fɔ pre wit dɛn,  fɔ bayobayo dɛn, ɛn fɔ ple wit dɛn.” (Dit. 6:7) In big gyal pikin we nem Ana, bin tɔk se: “A nɔ bin de fil fayn we wi papa nɔ bin de na os wit wi. We i kam bak, wi bin jɔs no am bay in fes ɛn in vɔys. We i bin de ɔg mi, i nɔ bin tan lɛk se sɛf na mi papa de ɔg mi.”

4. Wetin mek i kin tranga fɔ mek papa dɛn de oba dɛn famili gud gud wan we dɛn nɔ de liv wit dɛn?

⁴ Na papa dɛn fɔ de oba dɛn famili. Bɔt dɛn nɔ go ebul de oba dɛn famili gud gud wan we dɛn nɔ de liv wit dɛn. Ɛdwado in wɛf we nem Rubi, tɔk se: “A bin de du tu tin na di famili. A bin de du wetin mama fɔ du ɛn wetin papa fɔ du. Ɛn bɔku tɛm, na mi bin de disayd wetin di famili fɔ du. We Ɛdwado kam bak na os, a bin gɛt fɔ lan wetin i rili min fɔ lɛ uman put insɛf ɔnda in man. Ivin naw sɛf, a kin gɛt fɔ de mɛmba misɛf se mi man de naw wit wi.” (Ɛfi. 5:22, 23) Ɛdwado se: “Mi pikin dɛn bin dɔn yus fɔ de go aks dɛn mama we dɛn want fɔ du sɔntin. Mi ɛn mi wɛf bin kam fɔ no se wi fɔ sho wi pikin dɛn se wi gɛt wanwɔd we wi de mɛn dɛn, ɛn a bin gɛt fɔ lan aw fɔ de oba mi famili di we aw Kristian fɔ du am.”

5. Wetin Ɛdwado bin du fɔ mek in ɛn in famili liv lɛk aw famili fɔ de? Wetin bin apin we i du dis?

⁵ Ɛdwado bin mekɔp in maynd fɔ du ɔl wetin i ebul fɔ du fɔ mek in ɛn in famili liv lɛk aw famili fɔ de ɛn fɔ ɛp dɛn fɔ du wetin Jiova want mɔ. Ɛdwado bin se: “A bin want fɔ tich mi pikin dɛn di tru tin dɛn we de na di Baybul bay di tin dɛn we a de se ɛn du. A nɔ bin want fɔ jɔs tɔk se a lɛk Jiova, bɔt a bin want fɔ sho se a lɛk am.” (1 Jɔn 3:18) Yu tink se Jiova bin blɛs Ɛdwado fɔ in fet? Ana se: “We wi bin de si ɔl di tin dɛn we i de du fɔ tray fɔ bi gud papa ɛn fɔ kam nia wi bak, bin rili mek wi chenj di we aw wi bin de tink bɔt am. We wi bin de si se i de tray fɔ du mɔ na di kɔngrigeshɔn, dat bin mek wi gladi. Di wɔl bin de tray fɔ pul wi kɔmɔt nia Jiova. Bɔt we wi si se wi mama ɛn papa siriɔs fɔ sav Jiova, wisɛf tray fɔ du di sem tin. Papa prɔmis wi se i nɔ go ɛva lɛf wi igen, ɛn i bin du wetin i prɔmis. If i nɔ bin du am, sɔntɛm a nɔ bin fɔ de na Jiova in ɔganayzeshɔn tide.”

6. Us lɛsin sɔm mama ɛn papa dɛn bin lan we wɔ bin de na di Balkans?

⁶ Sɔm tin dɛn we bin apin di tɛm we wɔ bin de na wan ples we dɛn kɔl di Balkans, sho se Jiova Witnɛs pikin dɛn we bin de liv de, bin gladi pas aw dɛn bin gladi bifo di wɔ, pan ɔl we tin bin tranga. Wetin mek? Na bikɔs bɔku mama ɛn papa dɛn nɔ bin ebul fɔ go wok, so dɛn bin de lɛf na os wit dɛn pikin dɛn, stɔdi wit dɛn, ple wit dɛn, ɛn tɔk wit dɛn. Us lɛsin we wi lan frɔm dis? Di lɛsin na dat, pikin dɛn nid dɛn mama ɛn papa fɔ de wit dɛn pas di we aw dɛn nid mɔni ɔ gift. Na dat mek Gɔd in Wɔd se pikin dɛn go bɛnifit mɔ we dɛn mama ɛn papa pe atɛnshɔn pan dɛn ɛn tren dɛn.—Prɔv. 22:6.

7, 8. (a) Us mistek sɔm mama ɛn papa dɛn kin mek we dɛn kam bak to dɛn famili? (b) Aw mama ɛn papa dɛn go mek dɛn pikin dɛn lɛf fɔ vɛks pan dɛn?

⁷ I sɔri fɔ no se, we sɔm mama ɛn papa dɛn kin kam bak to dɛn famili ɛn si se dɛn pikin dɛn vɛks pan dɛn ɔ nɔ bisin bɔt dɛn, dɛn kin tɔk se, “Wetin mek una nɔ gɛt wan tɛnki fɔ ɔl di sɔfa we a dɔn sɔfa fɔ una?” Di pikin dɛn kin vɛks bikɔs dɛn mama ɔ papa bin dɔn lɛf dɛn fɔ lɔng tɛm. Wetin di mama ɔ papa go du fɔ sɔlv dis prɔblɛm?

⁸ I go fayn mek yu pre to Jiova lɛ i ɛp yu fɔ ɔndastand aw yu famili rili de fil, ɛn sho dɛn se yu lɛk dɛn. Dɔn, we yu de tɔk to yu  famili, gri se yusɛf ɛp fɔ kɔz di prɔblɛm. Tɛl dɛn se yu rili rili sɔri ɛn beg dɛn. We yu man ɔ yu wɛf ɛn yu pikin dɛn si se yu de tray ɔltɛm fɔ mek una kam bak togɛda lɛk wan famili, dɛn go no se yu min wetin yu se. If yu mekɔp yu maynd ɛn bia, yu go si se smɔl smɔl, yu famili go lɛk ɛn rɛspɛkt yu igen.

9. Wetin mek fɔ kia fɔ wi famili nɔ min se wi fɔ de tray ɔltɛm fɔ gɛt mɔ mɔni?

⁹ Di apɔsul Pɔl bin tɔk se we dɛn ol pipul dɛn we na Kristian nɔ ebul fɔ kia fɔ dɛnsɛf igen, na dɛn pikin dɛn ɛn granpikin dɛn fɔ “gi dɛn ɔl wetin dɛn fɔ gɛt.” Pɔl bin tɔk bak se ɔlman we na Kristian fɔ satisfay we i gɛt di tin dɛn we i nid ɛvride, dat na tin fɔ it, klos fɔ wɛr, ɛn say fɔ slip. Wi nɔ fɔ de tray ɔltɛm fɔ gɛt mɔ mɔni ɔ gɛda jɛntri fɔ tumara bambay. (Rid Fɔs Lɛta To Timoti 5:4, 8; 6:6-10.) Fɔ kia fɔ yu famili nɔ min se yu fɔ de rɔnata di jɛntri na dis wɔl, we go dɔn jisnɔ. (1 Jɔn 2:15-17) Wi nɔ fɔ tink se mɔni go ebul fɔ sɔlv ɔl wi prɔblɛm dɛn, ɛn wi nɔ fɔ ‘put wi at tumɔs pan wetin wi fɔ wɛr ɛn wetin wi fɔ it’ bikɔs dis go mek wi famili nɔ gɛt “di tru layf” na Gɔd in nyu wɔl, usay ɔlman go de du wetin rayt!—Mak 4:19; Lyuk 21:34-36; 1 Tim. 6:19.

10. Aw wi go sho se wi gɛt sɛns we i kam pan dɛt?

¹⁰ Jiova no se wi nid mɔni. Bɔt mɔni nɔ go ebul fɔ protɛkt ɛn ɛp wi di we aw di sɛns we Jiova de gi go protɛkt ɛn ɛp wi. (Ɛkli. 7:12; Lyuk 12:15) Plɛnti tɛm, pipul dɛn nɔ kin no se dɛn go gɛt fɔ spɛn bɔku mɔni fɔ go wok na ɔda kɔntri. Ɛn natin nɔ de we go mek pɔsin shɔ se dɛn pipul ya gɛt fɔ go mek mɔni na di kɔntri usay dɛn de go. Infakt, dis kin kam wit bɔku bɔku prɔblɛm dɛn. Bɔku pipul dɛn we kin go wok na ɔda kɔntri, kin kam bak na dɛn kɔntri wit bɔku bɔku dɛt. Dɛn pipul ya nɔ kin ebul fɔ sav Gɔd di we aw dɛn want, bifo dat, dɛn kin tɔn slev to di wan dɛn we dɛn trɔs to. (Rid Prɔvabs 22:7.) Fɔ sho se pɔsin gɛt sɛns, i nɔ fɔ tek dɛt atɔl.

11. We famili dɛn rayt wetin dɛn nid, aw dat kin ɛp dɛn?

¹¹ Ɛdwado bin no se fɔ mek i ebul fɔ kia fɔ in famili gud gud wan afta i dɔn kam bak to dɛn, i fɔ tek tɛm spɛn in mɔni. In ɛn in wɛf bin sidɔm ɛn rayt ɔl di tin dɛn we dɛn rili nid. Dɛn nɔ bin de bay ɔl di tin dɛn we dɛn bin dɔn yus fɔ bay di tɛm we i bin de wok bɔku mɔni. Ɔlman na in famili bin gri fɔ du dis ɛn dɛn nɔ bin de bay tin dɛn we dɛn nɔ nid. * Fɔ ɛgzampul, Ɛdwado se: “A pul mi pikin dɛn na prayvet skul ɛn put dɛn na gud gɔvmɛnt skul dɛn.” In ɛn in famili pre fɔ mek i go gɛt wok we nɔ go ambɔg am fɔ sav Jiova. Aw Jiova bin ansa dɛn prea?

12, 13. Wetin Ɛdwado bin du fɔ gi in famili wetin dɛn nid? Aw Jiova bin blɛs am we i disayd fɔ liv simpul layf?

¹² Ɛdwado se: “Di fɔs tu ia we a bin kam bak, tin bin tranga fɔ wi. Di mɔni we a bin gɛt, bin de dɔn ɛn di mɔni we a bin de wok, nɔ bin de du fɔ ɔl di tin dɛn we wi nid. Ɛn a kin taya. Bɔt wi kin go ɔl di mitin dɛn ɛn go fil savis togɛda.” Ɛdwado mekɔp in maynd se i nɔ go tek ɛni wok we go mek i nɔ de wit in famili fɔ lɔng tɛm ɔ ivin fɔ shɔt tɛm. Bifo dat, i se: “A lan fɔ du difrɛn difrɛn wok dɛn so dat we wan wok nɔ de, a go ebul du di ɔda wan we de.”

¹³ Bikɔs Ɛdwado bin te fɔ pe in dɛt, dat bin mek dɛn aks am fɔ pe mɔ mɔni pantap in dɛt. Bɔt i bin rɛdi fɔ du dis so dat i go sav Jiova wit in famili. Ɛdwado se: “Di mɔni we a de wok naw, tu smɔl we yu kɔmpia am wit di mɔni we a bin  de wok na da kɔntri. Bɔt wi de gɛt tin fɔ it ɔltɛm. ‘Jiova in an nɔ shɔt.’ Infakt, wi disayd fɔ payɔnia. Afta sɔm tɛm, tin nɔ bin tu tranga igen, ɛn wi nɔ bin de stren tumɔs fɔ gɛt wetin wi nid.”—Ayz. 59:1.

14, 15. Wetin famili dɛn go du we dɛn fambul dɛn de mɔna dɛn fɔ put mɔni biznɛs bifo Jiova? Wetin go apin if wi nɔ du wetin wi fambul dɛn se?

¹⁴ Na bɔku kɔntri dɛn, pipul dɛn kin fil se dɛn fɔ gi mɔni ɛn gift to dɛn fambul ɛn padi dɛn. Ɛdwado se: “Na so wi kin du na wi kɔntri, ɛn wi kin gladi we wi de du gud.” Bɔt i tɔk bak se: “Nɔto ɔltɛm pɔsin kin ebul fɔ du gud. So a tek tɛm ɛksplen to mi fambul dɛn se a go gi dɛn ɔmɔs a ebul, bɔt a gɛt fɔ gi mi famili wetin dɛn nid ɛn wɔship Jiova wit dɛn.”

¹⁵ Sɔm fambul dɛn kin vɛks ɔ provok pɔsin we disayd fɔ kam bak na in kɔntri ɔ we nɔ gri fɔ go wok na ɔda kɔntri bikɔs i want fɔ de wit in famili. Sɔm dɛn kin se di pɔsin nɔ lɛk in fambul dɛn. (Prɔv. 19:6, 7) Ɛdwado in gyal pikin we nem Ana, tɔk se: “If wi nɔ gri fɔ put mɔni bifo wi wɔship to Jiova, leta sɔm pan wi fambul dɛn kin kam fɔ no se di Kristian we aw wi de liv wi layf rili impɔtant to wi. Bɔt if wi du wetin dɛn want, aw dɛn go no se di Kristian we aw wi de liv, rili impɔtant?”—Luk Pita In Fɔs Lɛta 3:1, 2.

16. (a) Aw pɔsin kin ‘ful insɛf’? (Jems 1:22) (b) Ustɛm Jiova kin blɛs wetin wi disayd fɔ du?

¹⁶ Wan sista we bin lɛf in man ɛn in pikin dɛn ɛn go na wan kɔntri we gɛt mɔni, bin tɛl di ɛlda dɛn se: “Mi ɛn mi famili lɔs bɔku tin fɔ mek a kam na ya. Mi man bin ivin lɛf fɔ sav as ɛlda. So a rili op se Jiova go blɛs mi we a dɔn kam na ya.” Jiova kin blɛs wi ɔltɛm if wi disayd fɔ du sɔntin we de sho se wi gɛt fet pan am. Bɔt aw Jiova go blɛs wi if wi disayd fɔ du sɔntin we i nɔ want, mɔ so if wi lɛf di spɛshal wok we i dɔn gi wi?—Rid Di Ibru Pipul Dɛn 11:6; Jɔn In Fɔs Lɛta 5:13-15.

17. Wetin mek wi fɔ tray fɔ no wetin Jiova se bifo wi disayd fɔ du sɔntin? Aw wi go ebul fɔ du so?

¹⁷ Na fɔ tray fɔ no wetin Jiova se bifo yu disayd fɔ du sɔntin, nɔto afta we yu  dɔn disayd. Pre to Jiova fɔ lɛ i gi yu in oli spirit, pre fɔ gɛt sɛns, ɛn pre fɔ lɛ i gayd yu. (2 Tim. 1:7) Aks yusɛf dis kwɛstyɔn: ‘A rɛdi fɔ obe Jiova ɔltɛm, ivin we pipul dɛn de mek a sɔfa bikɔs a de obe am?’ If yu ansa na yɛs, yu go rɛdi fɔ obe am ilɛksɛf yu nɔ gɛt bɛtɛ mɔni? (Lyuk 14:33) I go fayn mek yu aks di ɛlda dɛn fɔ advays yu frɔm di Baybul, ɛn sho se yu gɛt fet ɛn biliv di prɔmis we Jiova dɔn prɔmis se i go ɛp yu. Aw yu go du dis? Na bay we yu fala ɔl di advays dɛn we Jiova de gi yu. Di ɛlda dɛn nɔ go disayd fɔ yu wetin yu fɔ du, bɔt dɛn go ɛp yu fɔ disayd fɔ du tin dɛn we go mek yu gɛt gladi at.—2 Kɔr. 1:24.

18. Udat gɛt di wok fɔ kia fɔ di famili? Wetin kin apin to wi kɔmpin Kristian dɛn we kin gi wi di chans fɔ ɛp dɛn?

¹⁸ Jiova dɔn gi papa dɛn di wok fɔ kia fɔ dɛn famili. Wi fɔ tɛl tɛnki to di papa dɛn we de liv wit dɛn famili ɛn ivin pre fɔ dɛn, bikɔs dɛn de kia fɔ dɛn famili pan ɔl we tin nɔ izi ɛn ɔda pipul dɛn de fos dɛn fɔ lɛf dɛn famili ɛn go fɛn mɔni ɔdasay. Sɔntɛnde, tin dɛn kin apin we kin gi wi di chans fɔ sho se wi rili lɛk wi kɔmpin Kristian dɛn ɛn kia fɔ dɛn. Fɔ ɛgzampul, big big briz kin blo ɛn pwɛl dɛn os, dɛn kin sik, ɔ ɔda bad tin kin apin to dɛn. (Gal. 6:2, 5; 1 Pit. 3:8) We dɛn tin ya apin, yu go ebul gi mɔni fɔ ɛp? Ɔ yu go ebul fɔ ɛp yu kɔmpin Kristian fɔ fɛn wok usay i de? If yu du so, yu go ɛp yu kɔmpin Kristian nɔ fɔ lɛf in famili ɛn go fɛn wok ɔdasay.—Prɔv. 3:27, 28; 1 Jɔn 3:17.

19, 20. Wetin mek Kristian dɛn shɔ se Jiova go ɛp dɛn?

¹⁹ Di Baybul se: “Una nɔ put ɔl una at pan kɔpɔ . . . , una fɔ satisfay wit wetin una gɛt, bikɔs Gɔd dɔn se, ‘A nɔ go lɛf yu, a go de wit yu ɔltɛm fɔ ɛp yu.’ Na dat mek wi shɔ bɔt wetin wi de tɔk wɛn wi se, ‘Na Gɔd de ɛp mi ɔltɛm, natin nɔ go mek a fred, bikɔs mɔtalman nɔ gɛt ɛni pawa fɔ du mi bad.’” (Ibru 13:5, 6) Aw wi go sho se wi biliv wetin dis skripchɔ se?

²⁰ Wan brɔda we dɔn bi ɛlda fɔ lɔng tɛm na wan po kɔntri, bin tɔk se: “Pipul dɛn kin tɔk bɔt aw Jiova Witnɛs dɛn kin gladi ɔltɛm. Dɛn kin si se ivin dɛn Jiova Witnɛs dɛn we po kin drɛs fayn ɔltɛm, ɛn dɛn kin gɛt wetin dɛn nid.” Dis de mek wi mɛmba wetin Jizɔs bin prɔmis di wan dɛn we de put di Kiŋdɔm fɔs na dɛn layf. (Mat. 6:28-30, 33) Fɔ tru, Jiova we na yu Papa we de na ɛvin, lɛk yu ɛn i want di bɛst tin fɔ apin to yu ɛn yu pikin dɛn. Di Baybul se, ‘PAPA GƆD in yay de ɔlsay na di wanol wɔl, fɔ sho in pawa fɔseka di wan dɛn we dɛn at klin fɔ am.’ (2 Kro. 16:9) Jiova dɔn gi wi in lɔ dɛn fɔ wi yon bɛtɛ wan. Sɔm pan dɛn lɔ ya gɛt fɔ du wit aw wi fɔ kia fɔ wi famili. We wi fala dɛn lɔ ya, wi de sho se wi lɛk Jiova ɛn biliv am. “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.”—1 Jɔn 5:3.

21, 22. Wetin mek yu dɔn mekɔp yu maynd fɔ abop pan Jiova?

²¹ Ɛdwado se: “A no se di tɛm we a nɔ bin de wit mi wɛf ɛn mi pikin dɛn, nɔ go ɛva kam igen, bɔt a nɔ de kɔntinyu fɔ tink bɔt dat ɛn alaw am fɔ pwɛl mi at. Bɔku pan mi padi dɛn we a bin gɛt, dɔn jɛntri bɔt dɛn nɔ gɛt gladi at. Dɛn gɛt siriɔs famili prɔblɛm dɛn. Bɔt mi famili rili gladi! Ɛn a de kɔle aw ɔda brɔda dɛn na dis kɔntri, de kɔntinyu fɔ put Jiova fɔs na dɛn layf, pan ɔl we dɛn po. Wi ɔl de si se wetin Jizɔs bin prɔmis de apin.”—Rid Matyu 6:33.

²² Nɔ fred atɔl! Disayd fɔ obe Jiova ɛn abop pan am. Lɛ di lɔv we yu gɛt fɔ Gɔd, fɔ yu wɛf ɔ fɔ yu man, ɛn fɔ yu pikin dɛn, mek yu ebul fɔ du ɔl wetin di Baybul se yu fɔ du fɔ kia fɔ yu famili. If yu du dɛn tin ya, yu go si se ‘Jiova go ɛp yu.’