Kankamana Bininge Yehova I Mukwashi Obe!

“Twikale na bukankamane bukatampe ne kunena’mba: ‘Yehova i mukwashi wami.’”—BAH. 13:6.

LE ULANGA’PO NAMANI?

Le bambutwile bafwaninwe kulonga bika pa kukwasha bisaka byabo bikale nyeke bikomo ku mushipiditu?

Le i muswelo’ka ubwanya mitwe ya bisaka kuvuija bisakibwa bya ku ngitu bya ba mu bipango byabo koku bekele nabo?

Le bene Kidishitu babwanya kulwa namani na makambakano a kuvilukila ku ntanda ya bweni mwanda wa kukimba lupeto?

1, 2. Le i makambakano’ka atananga bantu bavule bavilukanga kitatyi kyobajokela ku njibo? (Tala kifwatulo kidi ku ngalwilo.)

 EDUARDO * uvuluka’mba, “byonadi ñingidila ku ntanda ya bweni, nadi na kaji kayampe kadi namwene lupeto luvule. Ino kitatyi kyonashilwile kwifunda Bible na Batumoni ba Yehova, nafudile ku kumona amba nadi na kiselwa kikatampe mpata—kya kuvuija bisakibwa bya ku mushipiditu bya kyami kisaka ke’enkapo bya ku ngitu. Kupwa najokela ku njibo.”—Ef. 6:4.

² Eduardo wayukile amba, wasangeje Yehova pa kujokela mu kyandi kisaka. Inoko, pamo bwa Marilyn watelelwe mu kishinte kishele kunyuma, Eduardo wadi unenwe kushilula kwingila mwingilo wa kitatyi kilampe wa kulumbulula kipwano kya kisaka. Kadi wadi na makambakano a kukwatakanya wandi mukaji ne bandi bana mu kusakana kukatampe kwa lupeto. Le wadi wa kusokola bidibwa namani? Lelo wadi wa kutengela bantu bakwabo ba mu kipwilo bamukwashe na bika?

LONGOLOLA BINTU BYONEKELE MU BŪMI BWA KU MUSHIPIDITU NE BWA KISAKA

3. Le kubulwa kwikala ku njibo kwa mbutwile kuletanga bikoleja’ka ku bana?

³ Eduardo witabija’mba, “nayukile’mba nasūdile bami bana kitatyi kyobadi basakilwa bininge buludiki ne kisanso kyami. Nkyadi’popo  mwanda wa kwibatangila mānga ya mu Bible, kulombela nabo, kwibatunya ku mutwe, ne kukaya nabo.” (Kup. 6:7) Anna wandi mwana mwana-mukaji mukulumpe uvuluka amba: “Nkyadipo na mutyima-ntenke mu ñeni mwanda wa tata kadipo netu ku njibo. Kitatyi kyaajokele, twamuyukīle ku mpala ne ku diwi dyandi. Kyamwekele bu kyeni kitatyi kyaumpambile bīpa.”

4. Le kubulwa kwikala mu kisaka kwa shabana kudi na lupusa’ka pa bukomo bwandi bwa kuvuija mwingilo wandi wa bu mutwe wa kisaka?

⁴ Kadi kubulwa kwikala ku njibo kwa shabana kutyepejanga bukomo bwandi bwa kuvuija mwingilo wandi wa bu mutwe wa kisaka. Ruby mukaja Eduardo, unena amba: “Nadi nenwe kwingila mingilo ibidi—wa bu Mama ne Tata—kadi nadi na kibidiji kya kukwata butyibi buvule bwa kisaka. Kitatyi kyajokēle Eduardo ku njibo, nanenwe kwifunda mwine mushintulwila kikōkeji kya bwine Kidishitu. Nansha ke pano, nenwe kuvuluka kyaba kimo amba wami mulume udi’po.” (Ef. 5:22, 23) Eduardo ubweja’ko amba: “Bana bankasampe bana-bakaji badi na kibidiji kya kulomba kudi inabo lupusa lwa kulonga bintu. Byotudi bambutwile, twajingululwile amba tufwaninwe kwilombola ku betu bana bu tudi mu bumo, kadi nadi nenwe kwifunda kutangidila kisaka mu muswelo wa bwine Kidishitu.”

5. Le shabana umo washilwile kulumbulula bibi byalupukile ku kubulwa kwikala ku njibo kwandi namani, ne kwalupukile bipa’ka?

⁵ Eduardo wadi musumininwe kulonga byonso byabwanya kulonga mwanda wa kulumbulula kipwano na kisaka kyandi ne kuningija bukomo bwabo bwa ku mushipiditu. Unena’mba, “kitungo kyami kyadi kya kukomeneja bubinebine mudi bami bana kupityila ku binenwa ne ku kuleta kimfwa—ke’nkapo’tu kunena bitupu amba nsenswe Yehova, ino i ne kulombola’mba musenswe.” (1 Yo. 3:18) Le Yehova waesele bilongwa bya Eduardo bya lwitabijo? Anna ulondolola’mba, “kumona bukomo bwaadi ulonga mwa kwikadila shabana muyampe ne mwanda wa kwitufwena dikwabo kwalombwele kushinta kwa binebine. Pa kumumona ukimba kwingila mingilo mu kipwilo, twadi twifyela. Ntanda yadi itompa kwitupalula kudi Yehova. Ino twamwene bambutwile betu bemanine pa bubinebine, ebiya netu twalonga bukomo bwa kulongela monka. Tata wetulaile amba kaketushiyepo kadi dikwabo, ne kadi ketushilepo. Shi wetushile, longa nkidipo padi mu bulongolodi bwa Yehova dyalelo.”

ITABIJA KISELWA

6. Le bambutwile bamo baboile ñeni’ka mu kitatyi kya divita?

⁶ Myanda imo mimweke ilombola’mba, mu kitatyi kya divita mu Balkans, bana ba Batumoni ba Yehova bādi’mo, bādi na nsangaji nansha byobādi mu ngikadilo mibi. Mwanda waka? Mwanda bambutwile kebadipo babwanya kwenda ku kaji, badi bashikete ku njibo ne kwifunda nabo, bakaya nabo, ne kwisamba na babo bana. Le i ñeni’ka yotuboila’ko? I ya amba, bana basakilwa kwikala na bambutwile babo pa kyaba kya kwikala na lupeto nansha bintu bivule. Na bubine, monka munenena’kyo Kinenwa kya Leza, bana bakamwena’mo shi bambutwile bebatele mutyima ne kwibafundija.—Nki. 22:6.

7, 8. (a) Le bambutwile bamo bajokelanga ku njibo baloñanga kilubo’ka? (b) Le bambutwile babwanya kukwasha babo bana namani baleke kwikala na mumweno bubi?

⁷ Ino i kya bulanda, mwanda bambutwile bamo bajokelanga ku njibo, pa kupwa kumona kiji ne kubulwa kwivwana kwa babo bana, banenanga’mba, “mwanda waka kemulombolapo mutyima wa kufwija’ko pa kwipāna konso konepāna pa mwanda wenu?” Inoko, mumweno mubi wa babo bana ubwanya padi kwimanina pa kubulwa kwikala kwa bambutwile ku njibo. Le mbutwile ukalonga bika pa kupwa uno mwanda?

⁸ Lomba Yehova akukwashe ujingulule mwiivwanina bantu ba mu kyobe kisaka. Kupwa, kitatyi kyowisamba na kyobe kisaka, yuka ne kwitabija’mba makambakano adi pa mutwe obe. Kulomba lusa kwa binebine kubwanya kukukwasha. Shi mwinē pobe ne bobe bana abamone’mba uloñanga  nyeke bukomo bwa kulonga biyampe, bakamona’mba kudipo na budimbidimbi. Na kusuminwa ne kitūkijetyima, ubwanya kwaluja bityebitye buswe ne bulēme bukulēmekele kisaka kyobe.

‘SASAKETA BA MU YOBE NJIBO’

9. Mwanda waka ‘kusasaketa ba mu njibo yetu’ kekwitulombepo kulonga nyeke bukomo bwa kukimba bintu bivule bya ku ngitu?

⁹ Mutumibwa Polo wānenene amba, shi bene Kidishitu banunu kebabwanyapo kuvuija bisakibwa byabo, babo bana ne bankana bafwaninwe “kulubwila bambutwile ne bankambo wabo byobya bibafwaninwe.” Inoko, Polo wāendelele kusoñanya bene Kidishitu bonso baloelelwe mu byobya bobadi nabyo difuku ne difuku—bidibwa, bivwalwa, ne pa kushikata. Ketufwaninwepo kulonga nyeke bukomo bwa kwikala na būmi buyampe bininge nansha kukimba lupeto lwa kwituletela mutyima-ntenke mu mafuku a kumeso. (Tanga 1 Temote 5:4, 8; 6:6-10.) Mwine Kidishitu pa ‘kusasaketa ba mu njibo yandi,’ kanenwepo kukimba bupeta bwa ku ngitu mu ino ntanda isa kupita’nka panō. (1 Yo. 2:15-17) Ketufwaninwepo kuleka “kyongo kya bya bupeta” nansha “makambakano a mu būmi,” bitūle mu kyaka kukwatyija kukwatyije kisaka kyetu “pototo būmi bwinebwine” bwa mu ntanda mipya ya Leza ya boloke!—Mako 4:19; Luka 21:34-36; 1 Tm. 6:19.

10. Le i muswelo’ka otubwanya kulombola tunangu twa Leza mu mwanda utala kwapula mapu mavule?

¹⁰ Yehova uyukile’mba tusakilwa lupeto. Inoko, lupeto kelubwanyapo kwitukinga ne kwitukomeja na mubwaninya kwitukingila tunangu twa Leza. (Mus. 7:12; Luka 12:15) Mu myanda mivule, bantu bapēlulanga bintu byobabwanya kujimija mwanda wa kwenda mu ntanda ya bweni, kadi kekudipo kintu kitukulupija’mba bakekala’ko na lupeto. Bine, kudi byaka bikatampe. Bantu bavule bavilukanga bajokanga’nka ne na mapu mavule. Pa kyaba kya kwingidila Leza na bwanapabo, bafulanga ku kwingidila boba bobapwile lupeto. (Tanga Nkindi 22:7.) Muswelo muyampe i wa kwepuka kwapula dibajinji.

11. Lelo kwibikīla’ko lupeto kubwanya kukwasha bisaka namani bityepeje’ko makambakano a lupeto?

¹¹ Eduardo wayukile amba pa kukwata butyibi buyampe bwa kushikata na kisaka kyandi, wadi unenwe kwikala na mumweno muyampe pa lupeto. Aye ne wandi mukaji bebikīle’ko lupeto’nka lwa kupota bintu bya ku ngitu bine byobasakilwa. Na bubine, lupeto lobebikīle’ko lwadi lutyetye kutabuka lupeto lwadi luvudile kwikala na kisaka kyandi. Ino abo bonso baingidile pamo ne kuleka kusupakanya lupeto ku bintu byampikwa mvubu. * Eduardo unena’mba, “kimfwa, natambije bami bana ku masomo a muntu ne kwibasokwela masomo mayampe a Leta.” Aye ne kyandi kisaka badi balombela mwanda wa asokole kaji kayampe kekabwanyapo kujikakanya bibidiji byabo bya ku mushipiditu. Lelo Yehova walondolwele milombelo yabo namani?

12, 13. Le i matabula’ka mayampe atabwile shabana umo mwanda wa kukwatakanya kyandi kisaka, ne Yehova waesele namani kusumininwa kwaadi usumininwe kwikala na būmi bupēla?

¹² Eduardo uvuluka’mba, “mu myaka ibidi mibajinji, twamwene’tu lupeto lubwanine. Lupeto lwami lwatyepele, misokwe yami keyadipo ibwanya kujika milupu, kadi nadi nkendi mukoke ku ngitu. Inoko, twadi tutanwa ku kupwila konso kadi twadi tusapwila pamo.” Eduardo kalañangapo nansha dimo kwitabija kaji kakamulengeja ashiye kisaka mu bula bwa myeji nansha myaka. Unena’mba, “na bubine, nefundile kwingila mingilo palapala mwanda wa kunena’mba shi mwingilo kampanda ubakoma kumweka, naingila mwingilo mukwabo.”

¹³ Eduardo byaadi unenwe kwaluja mapu andi bityetye, wadi ufwaninwe kuta mutyima bininge ku lupeto lwaakongwele. Ino waitabije kwingila kano kaji ka lupeto lutyetye mwanda wa kwikala pamo na kisaka mu būmi bwabo, monka musakila Yehova bambutwile kulonga. Eduardo unena’mba, “pano nsokolanga lupeto lutyetye bininge  kupita lonadi nsokola mu ntanda ya bweni, ino ketulalangapo na nzala. ‘Kuboko kwa Yehova ke kwīpipo.’ Na bubine, twakwete butyibi bwa kwingila bu pania. Kitatyi kityetye’tu pa kupwa kwa makambakano a lupeto kutyepa, ebiya twapelelwa kusokola bisakibwa bya ku ngitu.”—Isa. 59:1.

LWA NA MAKAMBAKANO A MU KISAKA

14, 15. Le bisaka bibwanya kunekenya namani makambakano a kutūla bintu bya ku ngitu kumeso kwa kulondalonda bintu bya ku mushipiditu, ne i bika bibwanya padi kulupuka ku kimfwa kyabo kiyampe?

¹⁴ Mu bifuko bivule, bantu bavule bamonanga’mba banenwe kupa babutule ne balunda nabo lupeto ne bintu. Eduardo ushintulula’mba, “ye mwikadile kibidiji kyetu, kadi tusangelanga kupāna.” Ino ubweja’ko amba: “Kudi mikalo. Nshintulwilanga na bunwa kisaka kyami kikatampe amba nkebapa mwendele bukomo bwami pakubulwa kutūla bisakibwa bya ku mushipiditu ne kibidiji kya kisaka kyami mu kyaka.”

¹⁵ Bantu bajokelanga ku njibo ne boba bapela mikenga ya kushiya kisaka kyabo mwanda wa kwenda mu ntanda ya bweni basusukanga na kulobelwa, kufutululwa, ne kutyumukwa mutyima kwa babutule bebamwene padi bu bantu ba kukwatakanya kisaka. Bamo bebanenanga’mba kebadipo na buswe. (Nki. 19:6, 7) “Inoko,” Ana mwana Eduardo mwana-mukaji unena’mba, “kitatyi kyotwapelele kujimija bintu bya ku mushipiditu mwanda wa tumweno twa ku ngitu, babutule betu bamo bamwene padi mwenda mafuku kamweno kadi na būmi bwetu bwa ku mushipiditu. Ino badi ba kwikamona namani shi twaitabije byobadi betunena kulonga?”—Dingakanya na 1 Petelo 3:1, 2.

LOMBOLA LWITABIJO MUDI LEZA

16. (a) Le i muswelo’ka ubwanya muntu ‘kwiongola aye mwine na milangwe ya bubela? (Yak. 1:22) (b) Le Yehova weselanga butyibi bwa muswelo’ka?

¹⁶ Kaka umo pa kufika mu ntanda imo ya bupeta bininge kwakubulwa mwinē pandi ne bana, walombwele bakulumpe amba: “Ami pa kwiya kuno, twepēne bya binebine. Wami mulume walekele’nka ne kwingila bu mukulumpe. Nkulupile bine amba Yehova ukesela kuno kuviluka.” Yehova weselanga nyeke butyibi bwimanine pa kumwitabija, ino i muswelo’ka wabwanya kwesela butyibi bwampikwa kukwatañana na kiswa-mutyima kyandi, nakampata shi i bwa kuleka byampikwa kwendela’mo mingilo ikola?—Tanga Bahebelu 11:6; 1 Yoano 5:13-15.

17. Mwanda waka tufwaninwe kukimba buludiki bwa Yehova kumeso kwa kukwata butyibi, ne tukalonga namino muswelo’ka?

 ¹⁷ Kimba buludiki bwa Yehova kumeso kwa kukwata butyibi ne kwiivwana na muntu, ke pa kupwapo kwibukwata. Mulombe mushipiditu wandi ujila, tunangu, ne bulombodi bwandi. (2 Tm. 1:7) Wiipangule amba: ‘Le nkōkelanga Yehova mu ngikadilo’ka? Le mukōkelanga ne mu kupangwapangwa?’ Shi i amo, le umukōkelanga nansha shi kukekalapo mu būmi buyampe bininge? (Luka 14:33) Lomba bakulumpe madingi a mu Bisonekwa, kadi lombola lwitabijo ne lukulupilo mu mulao wa Yehova wa kukukwasha ulonde madingi andi. Bakulumpe kebabwanyapo kukukwatyila butyibi, ino bakokeja kukukwasha utonge butongi bukakuletela nsangaji ya mafuku malampe.—2 Ko. 1:24.

18. Le i ani upelwe kiselwa kya kukwatakanya kisaka, ino i ngikadilo’ka ibwanya kupa bantu bakwabo mukenga wa kukwasha?

¹⁸ Yehova i mutwike mutwe wa kisaka “kiselwa” kya difuku ne difuku kya kukwatakanya kisaka. Tufwaninwe kufwija’ko ne kulombela pa boba bavuija kino kiselwa pakubulwa kushiya benē pabo nansha bana, nansha kulonga namino byokudi na makambakano ne matompo. Ngikadilo ya mu kitulumukila, pamo bwa bimpengele nansha bundapi bwa bukidibukidi, bitupanga mukenga wa kulombola buswe bwa bine bwa bwine Kidishitu ne kisanso kya bubana na bana. (Ngt. 6:2, 5; 1 Pe. 3:8) Le ubwanya kwibapa lupeto mu ngikadilo ya bukidibukidi nansha kukwasha mwanenu mwine Kidishitu asokole mwingilo mu kyenu kibundi? Shi i amo, ubwanya kutyepeja’ko makambakano abwanya kumulengeja ashiye kisaka mwanda wa kukakimba kaji kungi.—Nki. 3:27, 28; 1 Yo. 3:17.

VULUKA’MBA YEHOVA I MUKWASHI OBE!

19, 20. Mwanda waka bene Kidishitu babwanya kusangala pa kuyuka’mba Yehova ukebakwasha?

¹⁹ Bisonekwa bitusoñanya amba: “Mwikadilo wa būmi bwenu wikale wa kubulwa kusanswa lupeto, koku muloelelwa bintu byomudi nabyo pano. Mwanda aye [Leza] wānenene amba: ‘Nkikakushiyepo nansha dimo kadi nkikakwelapo nansha dimo.’ Amba twikale na bukankamane bukatampe ne kunena’mba: ‘Yehova i mukwashi wami; nkikakwatwapo moyo. Le muntu ukokeja kunonga kika?’” (Bah. 13:5, 6) Le twingidijanga namani bino binenwa mu būmi bwetu?

²⁰ Mukulumpe umo wa kala wa mu ntanda myendelele unena’mba, “bantu besambilanga divule dine pa nsangaji idi na Batumoni ba Yehova. Kadi banenanga’mba nansha Batumoni byobadi balanda, bavwalanga nyeke biyampe ne kumweka biyampe kupita bantu bakwabo.” Kino i kikwatañane na mulao wālaile Yesu ku boba batūla Bulopwe pa kifuko kibajinji. (Mat. 6:28-30, 33) Bine, Yehova Shenu wa mūlu wimusenswe kadi wimusakilanga biyampe banwe ne benu bana. “Meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.” (2 Bi. 16:9) I mwitupe mbila yandi—kimfwa yoya itala pa būmi bwa kisaka ne bisakibwa bya ku ngitu—pa mwanda wa kamweno ketu. Shi twiilonda, tulombolanga’mba tumusenswe ne kumukulupila. “Buno namino bo buswe bwa Leza, amba tulame mbila yandi; kadi mbila yandi keilēmangapo, aa.”—1 Yo. 5:3.

21, 22. Mwanda waka usumininwe kulombola kikulupiji kyobe mudi Yehova?

²¹ Eduardo unena’mba, “ndyukile’mba nkibwanyapo kwaluja kitatyi kyonapityije kulampe na wami mukaji ne bami bana, ino nkialakanyangapo. Bakwetu bavule ba kala ba ku kaji i bampeta ino kebadipo na nsangaji. Bisaka byabo bidi na makambakano makomo. Inoko, kisaka kyetu kidi na nsangaji mikatampe! Kadi ne mutengwe pa kumona muswelo utūdile banabetu bakwabo mu ino ntanda, nansha byobadi balanda, bintu bya ku mushipiditu pa kifuko kibajinji mu būmi bwabo. Batwe bonso twimwenanga bubinebine bwa mulao wa Yesu.”—Tanga Mateo 6:33.

²² Kankamana bininge! Tonga kukōkela Yehova ne kumukulupila. Leka buswe boswele Leza, mwinē pobe, ne bobe bana bukutonone uvuije kiselwa kyobe kya ku mushipiditu kya kyobe kisaka. Mfulo mfulō, ukemwena’mba ‘Yehova i mukwashi obe.’

[Kunshi kwa dyani]

[Bipangujo bya Kifundwa]