1, 2. Kukalanyi kwamonañawu antu amavulu atuntukaña nakuya nakuzatila mumatuña acheñi neyi afunta hetala? (Talenu mwevulu wakutachikilahu.)

 EDUARDO * wanukaña nindi, “Hinayili nakuzatila mwituña dacheñi, nazatileña mudimu wawuwahi nankashi nawa nadiña namali amavulu. Ilaña chinatachikili kudiza Bayibolu nawaYinsahu jaYehova, namweni nami nikweti mudimu walema chikupu wakukwasha chisaka chami kulonda chikali nawubwambu wakola naNzambi, bayi kuyikwasha kumujimba hohuku. Dichi nafuntili nakushakama nachisaka chami.”—Efwes. 6:4.

² Eduardo welukili nindi kudikunda cheñi nachisaka chindi, kwamuzañalesheli Yehova. Ilaña kufwana Marilyn washimwinuwu muchibaaba chinafumuhu, Eduardo wekalili namudimu weneni nankashi hakwila nawu yawahishi wulunda nachisaka chindi. Cheñi nawa wadiña nakukala kwamali hakwila yakwashi ñodindi nianyana mwituña mwadiña chihandilu chakala. Chumanyi cheliliyi? Indi akwawu muchipompelu amukwashili ñahi?

3. Kukalanyi kwafumañamu neyi anvwali ashiya anyanawu?

³ Eduardo wetejaña nindi, “ichi neluki nami nayuumbili anyanami chisayikila hampinji yakeñeleñawu wunlomboli wami nikuyakamena.  Hinadiña nakuyitañila mpanji jamuBayibolu, kulombela hamu, kuyikumbata nikuhemena hamu nawuku.” (Kuhit. 6:7) Mwanindi wamukulumpi wamumbanda wejina daAnna, wahosheli nindi: “Hampinji yafumini atata hetala nadimweneña neyi nindi wamukunkulwayi. Chafuntiluwu hetala, twayilukilili hohu kumesu nikwizu. Nawa chankumbatiluwu natiyileña neyi kwiji himuntu wacheñi hohu.”

4. Chumanyi chafumañamu neyi iyala yashiya mudimu windi wakalakalañayi neyi mutu wachisaka?

⁴ Neyi nvwali weyala yashiya chisaka chindi, hakutwesha kukalakala mudimu windi neyi mutu wachisakaku. Ruby iñoda Eduardo walumbulwili nindi: “Nazatileña nyidimu yatela kuzata antu ayedi, nazatileña neyi Mama yawantu niTata yawantu nawa nenjilili kufuukulahu yuma yayivulu yakeñekeleña muchisaka. Nfumwami Eduardo chafuntiliyi hetala, natachikili kudiza mwatalisha kwovwahila kwawakwaKristu. Niyinu mpinji neyi kudi yuma yitunakukeña kufuukulahu, navulamenañaku nami nfumwami wudi hohu watela kufuukulahu.” (Efwes. 5:22, 23) Eduardo wabombeleluhu nindi: “Anyanetu awambanda neyi anakukeña kwila chuma ayileña kudi mama yawu nakulomba lusesa. Hakwila tutachiki kudikunda nawanyanetu, etu anvwali twatachikili kuzatila hamu hakufuukulahu yuma nawa nadizili chinatela kulombola chisaka neyi mukwaKristu.”

5. Indi nvwali wumu welilidi hakwila nawu yawahishi wulunda windi nachisaka chafuntiliyi hetala, nawa yumanyi yafuminumu?

⁵ Eduardo wafwilileña kuzata nañovu kulonda yawahishi wulunda windi nachisaka chindi nikuchikolesha kwikala nawulunda naYehova. Wahosheli nindi, “chikonkwanyi chami chadiña chakuleja anyanami chalala nakashinshi muyuma yinahosheleña nichakutalilahu chami, bayi neyi kuhosha hohu nami namukeña Yehovaku, ilaña chiña nikwilamu.” (1 Yow. 3:18) Komana Yehova wamukiswilili Eduardo hachikuhwelelu chindi? Anna wakwili nindi, “Chitwamweni atata anatachiki kudikita chikupu nakwikala nvwali wamuwahi nikudikunda cheñi nanetu, chaleteli kuhimpi kweneni muchisaka. Twatiyili kuwaha hakumona chadiñawu nakudikita kulonda ashikuhu kukalakala nyidimu yamuchipompelu. Kaayi kafwilileña kutwambula kudi Yehova. Ilaña twamweni anvwali jetu anashi muchima kuchalala, anetu nawa twayimbujoleli. Atata atukanini nawu hiyamba katushiya cheñuku, mwamweni hiyatushiluku. Neyi atushili, kachi hinidi mukuloñesha kwaYehovaku.”

6. Yumanyi yadiziluwu anvwali amakwawu hampinji yikwadiña njita?

⁶ Wunsahu wamwekeshaña nawu hampinji yikwadiña njita muBalkans, anyana kawaYinsahu jaYehova adiña namuzañalu nankashi hela chakwila chihandilu chadiña chakala. Muloñadi? Muloña anvwali hiyayileña kunyidimuku, ashakamineña hamatala nawanyanawu, adizileña nikuhemena nawu hamu. Chumanyi chitunateli kudizilaku? Anyana akeñaña kushakama hamu nawanvwali jawu, kubadika kuyinka mali hela yawana. Eñañi, neyi chochahosha Izu daNzambi, anyana akafumamu wanyi neyi anvwali jawu anakuyakamena nikuyidizisha chiwahi.—Yish. 22:6.

7, 8. (a) Chiluwanyi chakoñañawu anvwali amakwawu neyi anafunti hetala? (b) Indi anvwali anateli kuwahisha ñahi wubwambu wawu nawanyanawu?

⁷ Chawushona, anvwali amakwawu neyi anafunti dehi kufuma kwayiluwu nakuzatila, anyana chatachikawu kuyisukwila ndulu hela kuyidiwula, anvwali alejaña anyanawu nawu, “Ami nayili nakuyikeñela chihandilu chachiwahi, hanu dinu munakuhilila ñahi?” Hela chochu, anyana ahilaña hamuloña wakwila anvwali ayishili. Chumanyi chinateli kwilayi nvwali kulonda yamanishi kukala kwamuchidiwu?

⁸ Mulombenu Yehova kulonda yayinki kanshinshi kakwiluka chikupu yuma yinakukeña chisaka chenu. Kuhiñahu neyi munakuhanjeka nachisaka chenu, itejenu neyi ayihiisha namuloña nawu ninenu mwaluwañesheli. Lombenu kwanakena kufuma hamuchima. Neyi mwinikwenu nianyana amona nawu munakufwila kwolola yuma, akwiluka nawu chalala munadanakeni. Neyi mutwalekahu kwikala namuchima wakuwunda nikufwila kwila chaloña, mukuhita kwampinji chisaka  chenu chikayikeña nikutachika kuyilemesha cheñi.

9. Muloñadi chitukuhoshela netu ‘kukwasha ayetu’ hichatalisha mukwila nawu tufwileña kwikala namaheta amavuluku?

⁹ Kapostolu Pawulu wasonekeli nindi neyi akwaKristu akula dehi anakañanyi kuwana yuma yakudikwasha nachu, anyanawu niezukulu atela ‘kuyinka anvwali jawu niankaka jawu yuma yayitelela.’ Hela chochu, Pawulu watwalekeluhu kuleja akwaKristu ejima kutiya kuwaha nayuma yikwetuwu, chidi neyi yakudya, yakuvwala nihakukama. Bayi tufwileña netu chiña tukekali nachihandilu chahewulu hela mali amavulu kulonda akatukiñi kumbiduku. (Tañenu 1 Timotewu 5:4, 8; 6:6-10.) Hakwila nawu mukwaKristu ‘yakwashi ayindi,’ hichatalisha mukwila nawu chiña yekala namaheta amavulu mukanu kaayi kadi kwakwihi nakuhitaku. (1 Yow. 2:15-17) Bayi twiteja “kudimbana kwamaheta” hela “kwakama yuma yawumi wunu” kuleñeli chisaka chetu chibuli ‘kukwata kuwumi waweni’ wamwituña daNzambi dadiha daloñaku.—Maku 4:19; Luka 21:34-36; 1 Tim. 6:19.

10. Tunateli kumwekesha ñahi maana afumaña kudi Nzambi kutalisha hakwikala nanyikudi yayivulu?

¹⁰ Yehova weluka nindi twakeñaña mali. Ilaña mali hiyanateli kutukiña nikutuhemba neyi chinateli kwila maana afumaña kudi Nzambuku. (Mukwa. 7:12; Luka 12:15) Kakavulu, antu amakwawu amonaña nawu chidi hohu chiwahi kuya nakuzatila kwituña dacheñi nawa hiyelukaña neyi chakwila akachila mali amavulu neyi anayuku. Ashaña wumi wawu hakatoña. Antu amavulu atuntukaña afuntaña nanyikudi yayivulu. Chatela amuzatileña Nzambi mukukasunuka, atachikaña kuzatila antu ayisondamishili mali. (Tañenu Yishimu 22:7.) Neyi mubulaña kutambula mali hamukudi, himukwikala nakukala kwamuchidiwuku.

11. Indi kulanda hohu yuma yimunafuukuli kunateli kukwasha ñahi chisaka kubula kukisañana mali?

¹¹ Eduardo welukili nindi hakwila yazati chiwahi mwafuukwiliyi kulonda yadikundeña nachisaka chindi, wateleleli kuhimpa njila yakuzatishilamu mali. Yena niñodindi ashakamineña hamu nakuchinda mali atela kuzatishawu kuyuma yakumujimba yakeñeleñawu nankashi. Hakwila azatishi awa mali chiwahi, hiyalandileña yuma neyi chalandileñawu mpinji yadiñawu namali amavuluku. Dichi, wonsu wawu azatilileña hamu nawa hiyadiña nakukisañana mali kuyuma yamukunkulwayuku. * “Chakutalilahu,” Eduardo wahosheli nindi, “Nafumishili anyanami kumashikola abulili kwikala anfulumendi nakuyitwala kumashikola anfulumendi apela wuseya.” Yena nichisaka chindi alombeleña nawu yawani mudimu wukubulaña kumukañesha kuzata nyidimu yawu yakuspiritu. Indi Yehova wakwili ñahi kulomba kwawu?

12, 13. Yumanyi yeliliyi tata yawantu wumu hakwila yakwashi chisaka chindi, nawa Yehova wamukiswilili ñahi hakufwila kushakama chihandilu chapela?

¹² Eduardo wanukaña nindi, “Hayaaka yakutachikilahu yiyedi, twadiña nakukala kwamali. Mali inahembeli amanineña chovu-chovu nawa kadali kantesha kadiña nakunlunjikilahu kunyambawulu hitwatwesheleña kulandamu yuma yonsu yitwakeñeleñaku. Chumichi, chanzeyesheli kumujimba. Hela chochu, twayileña kukupompa kwejima nikuzatila hamu mwiha.” Eduardo wafuukwiluhu nindi hamba keteja kwiñila mudimu wudi wejima wukamuleñela kushiya chisaka chindi hadi tukweji twatuvulu hela yaakaku. “Ilaña” wahosheli nindi, “Nadizili nyidimu yashiyashana kulonda neyi mudimu inakukeña kwosi, nateli kuzata mudimu wukwawu.”

¹³ Chineli Eduardo wafweteleña mukudi wambala chovu-chovu, chumichi chamuleñeleli kufuntisha mali amavulu kubadika atambwiliyi. Ilaña welili mwenimu kulonda yekaleña nampinji yakudikunda nachisaka chindi mpinji yejima neyi chochakeñañayi Yehova nindi anvwali eleña. Eduardo wahosheli nindi, “Ichi nekalaña namali antesha kubadika inadiña nawu hampinji yinadiña nakuzatila kwituña dacheñi. Chikasa chaYehova chachihi wanyi. Dichi, twafuukwiluhu kutachika wupayiniya. Chimwahitili mpinji yantesha, chatupeleleli kulanda yuma yakudikwasha  nachu kumujimba muloña wuseya wayuma wafuntili mwishina.”—Isa. 59:1.

14, 15. Indi yisaka yinateli kumanisha ñahi ikakeja dakusambila kukeña yuma yakumujimba chatela akeñi yuma yakuspiritu, nawa chumanyi chinateli kufumamu neyi asambila kukeña yuma yakuspiritu?

¹⁴ Mumaluña amavulu, antu atiyaña kuwaha kuhana mali niyawana kudi antaña niamabwambu jawu. Eduardo wahosheli nindi, “Kuhana kwekala hichisemwa chetu nawa twatiyaña kuwaha kwila mwenimu.” Ilaña wabombeleluhu nindi: “Muntu watela kwiluka mwakukumina. Nayilejaña antaña jami mukubabala nami nateli kuyinka yuma yinakukeñawu neyi nikweti, ilaña hinateli kuleka kwakamena chisaka chami kuspiritu hamuloña wakukeñela antaña yuma yinakukeñawuku.”

¹⁵ Antu akeñaña nawu ntaña yawu yashiyi chisaka chindi nakuya nakuzatila kwituña dacheñi hamu niantu akaanaña kuya nakuzatila kwacheñi ayihililaña nikuyihoshola muloña antaña jawu akeñaña nawu ayikwasheña. Amakwawu ayitenaña nawu hiyakweti muchima wakukeñaku. (Yish. 19:6, 7) “Hela chochu,” Anna mwana kaEduardo wamumbanda wahosheli nindi, “neyi tusambila kukeña yuma yakuspiritu chatela tukeñeña maheta akumujimba, mukuhita kwampinji antaña jetu amakwawu anateli kwiteja nawu chihandilu chetu chawakwaKristu chalema nankashi. Ilaña neyi tutiyilila kwikakeja dawu, aketeja ñahi chumichi?”—Esekejenu 1 Petulu 3:1, 2.

16. (a) Muntu nateli ‘kudidimba ñahi nayitoñojoka yakutwamba’? (Yak. 1:22) (b) Kufuukulahu kwamuchidinyi kwakiswilañayi Yehova?

¹⁶ Muhela wumu chashikiliyi mwituña mwekala maheta nankashi chakadi nfumwindi nianyana, walejeli aeluda nindi: “Twadihanini chikupu hakwila nawu ninzi kunu. Nfumwami walekeleluhu niwueluda. Dichi nakuhweleli nami Yehova wukukiswila lunu lwendu.” Yehova mpinji yejima wakiswilaña antu amukuhwelelaña neyi anakufuukula yuma yinakukeña kwilawu, hanu dinu nateli kukiswila ñahi muntu wunafuukuli chuma chinambuki nankeñelu yindi, sweje-e neyi munabombeli kuleka nyidimu yajila hakadi muloña?—Tañenu Aheberu 11:6; 1 Yowanu 5:13-15.

17. Muloñadi chitwatela kulombela wukwashu waYehova henohu kanda tufuukuluhu yuma yitunakukeña kwila, nawa tunateli kumulomba ñahi?

¹⁷ Mulombenu Yehova yayikwashi henohu kanda mufuukuluhu yuma yimunakukeña kwila, bayi kumulomba neyi mwafuukulahu dehuku. Lombenu spiritu yindi yajila, maana niwunlomboli windi.  (2 Tim. 1:7) Dihulenu nenu: ‘Nateli kumwovwahila Yehova muyuma yamuchidinyi? Hela neyi nidi mukweseka nateli kumwovwahila ñahi?’ Neyi munatweshi kwila mwenimu, komana mukumwovwahila neyi chakwila chinakukeñeka nawu mupeleshuku chihandilu chenu? (Luka 14:33) Lejenu aeluda kulonda ayikwashi nawa kuhwelelenu chikupu muchikaninu chaYehova chakwila nawu wakayikwasha neyi mulondela kufumba kwindi. Bayi neyi aeluda anateli kuyifuukwila chuma chimwatela kwilaku, ilaña akuyikwasha kufuukulahu chiwahi yuma yikayileñela mukekali namuzañalu muchihandilu chenu mukuhita kwampinji.—2 Kor. 1:24.

18. Hinyi wukweti mudimu wakwakamena chisaka, nawa akwawu anateli kumukwasha neyi yaholokela mukukala kwamuchidinyi?

¹⁸ Yehova wakeñaña kumona mutu wachisaka nakuzata “mudimu” wakwakamena chisaka chindi hefuku hefuku. Dichi twatela kuyihameka nikuyilombelaku ejima anakuzata iwu mudimu chakubula kushiya enikwawu hela anyana hela chakwila anakuyikanjikija nawu ayi nakuzatila kwakulehi. Neyi kunamwekani kukala kudi neyi, kukala kwadimwekenaña kwakweni hela yikatu yakukasumwisha, niyena himpinji yitwatela kumwekeshelamu kukeña kwalala kwawakwaKristu nikwakamena akwetu. (Ŋal. 6:2, 5; 1 Pet. 3:8) Komana kwila mumwinkahu mali mukwenu mukwaKristu wunaholokeli mukukala kwakukasumwisha hela kumukwashaku kuwana mudimu mwakamwihi nehi? Neyi mwila mwenimu, mukumukwasha mana kwetu hela muheletu kulonda yakaani ikakeja dakushiya chisaka chindi nakuya nakukeña mudimu kwakulehi.—Yish. 3:27, 28; 1 Yow. 3:17.

19, 20. Muloñadi akwaKristu chinateli kumukuhwelelawu chikupu Yehova nawu wukuyikwasha?

¹⁹ Nsona jatukonkomwenaña nawu: “Ikalenu nanyichima yakadi kufwila mali; toñojokenu yuma yimudi nayu nenu yinawani dehi; muloña [Nzambi] yomweni nahoshi nindi, Hinamba kakulekaku, hela kukushiya hinakakushiyaku. Dichi twahoshaña chakadi woma netu, Yehova diyi nkwashi yami, hinukutiya womaku, antu akuñila chumanyi?” (Heb. 13:5, 6) Twelaña ñahi mwenimu?

²⁰ Eluda wumu wunazati hadi yaaka yayivulu washakamaña mwituña mwenzala maheta wahosheli nindi: “Kakavulu antu ahoshaña nawu aYinsahu jaYehova akweti muzañalu nankashi. Ahoshaña cheñi nawu niaYinsahu atuzweñi mpinji yejima avwalaña nikumwekana chiwahi kubadika antu amakwawu.” Chumichi chinesakani nachikaninu chakaniniyi Yesu antu atwamijañaku Wanta. (Mat. 6:28-30, 33) Eñañi, Tata yenu wamwiwulu Yehova, wayikeña nawa wakeñaña enu nianyanenu mudiluñisheña. “Mesu aYehova adi nakutalatala mwahita iseki dejima kulonda akwashuku nañovu adi nanyichima yalala, yindi chikupu.” (2 Kushi. 16:9) Watwinka nshimbi jindi, jikwawu jabombelamu nshimbi jinateli kutukwasha muchisaka nichitwatela kumona yuma yakumujimba kulonda tuhetelumu. Twamwekeshaña netu twamukeña nikumukuhwelela neyi tujizatisha. “Kumukeña Nzambi yowu kwila mwatulejañayi; mwatulejañayi himwakalaku.”—1 Yow. 5:3.

21, 22. Muloñadi chimwatelela kumukuhwelela Yehova?

²¹ Eduardo wahosheli nindi: “Neluki nami mpinji yinakisañeni yinateleleli kwikala nañodami nianyanami hinamba kayimonahu cheñuku. Ilaña hinaditoñeshañaku. Amabwambu jami amavulu inadiña nawu adi namaheta ilaña hiyakweti muzañaluku. Yisaka yawu yinakumona kukala kweneni nankashi. Ilaña chisaka chetu, chikweti muzañalu chikupu. Nawa nikweti muzañalu hakumona amana kwetu amakwawu mudinu ituña hela chakwila hiyatuzweñi, atwamijañaku yuma yakuspiritu muchihandilu chawu. Wejima wetu tunakumona namesu kapu chinakushikijewa chikaninu chaYesu.”—Tañenu Matewu 6:33.

²² Bayi mutiya womaku. Mwovwahilenuña Yehova nikumukuhwelela. Kukeña kwenu kumwamukeña Nzambi, mwinikwenu nianyanenu kukuyileñela mukalakali mudimu wenu wakuspiritu wakukwasha chisaka chenu. Neyi mwila mwenimu, mukamona kwila nenu ‘Yehova diyi nkwashi yenu.’