1, 2. Ram danga awm tam takte chuan ina an kîr lehin eng harsatna nge an hmachhawn? (A thupui chunga milem chu en rawh.)

EDUARDO-A * chuan heti hian a sawi: “Ram danga hna thawkin, hna ṭha tak ka nei a, ka hlawh tam hle bawk. Mahse, Jehova Thuhretute bula Bible ka zir ṭan chuan mawhphurhna pawimawh zâwk ka nei tih ka hre thiam ta a, ka chhûngte chu tisa lamah chauh ni lovin, thlarau lamah pawh ka enkawl a ngai a. Chuvâng chuan, an hnênah ka kîr leh ta a ni,” tiin.—Eph. 6:4.

² Eduardo-a chuan a chhûngte bula a kîr leh avângin Jehova chu a lâwm tih a hria a. Mahse, ani chuan thuziak hmasaa kan sawi tâk Marilyn-i ang bawkin, chhûngkaw inlaichînna siam ṭha leh tûrin thil tam tak a tih a ngai a ni. Sum dinhmun harsa zâwkah a nupui fanaute a châwm a ngai a. An khawsak theih nân eng nge a tih ang? Kohhrana mi dangte hnên aṭangin eng ang ṭanpuina nge a beisei theih?

3. Engtin nge nu emaw, pa emaw awm bona chuan naupangte a nghawng?

³ “Ka fate chuan ka kaihhruaina leh hmangaihna an mamawh lai takin ka lo ngaihthah tih kan hre thiam ta a. Bible thawnthu chhiarsak tûr te, ṭawngṭaipui tûr te, duat taka pawm tûr te, leh infiampui  tûrtein an bulah ka awm lo a ni,” tiin Eduardo-a chuan a sawi. (Deut. 6:7) A fanu upa ber, Anna-i chuan: “Kan bulah ka pa a awm loh avângin rilru lamah him lo nia inhriatna ka nei a. A lo kîr leh chuan a hmêl leh a aw aṭang chauhvin kan hria a. Min han kuah chuan pângngai lo deuhvin ka hria a ni,” tiin a sawi a ni.

4. Engtin nge pa ber awm bona chuan chhûngkaw lû a nih anga a chanvo hlen chu a tihharsat lehzual?

⁴ Pa ber awm bona chuan chhûngkaw lû a nih anga a chanvo hlen chu a tiharsa lehzual a. Eduardo-a nupui, Ruby-i chuan: “Nu leh pa chan ka chan a ngai a, chhûngkaw thutlûkna zawng zawng deuhthaw chu mahniin ka siam ṭhang hle a ni. Eduardo a lo haw tâkah chuan, Kristian intukluhna awmzia dik tak ka zir a ngai a. Tûn thleng pawh hian, ka pasal a awm tih ka inhrilh nawn a ṭûl châng a awm ṭhîn a ni,” tiin a sawi. (Eph. 5:22, 23) Eduardo-a chuan: “Kan fanute chuan thil ti tûra phalna la tûrin an nu an pan ṭhîn a. Nu leh pa kan nih angin, kan fate chuan thutlûkna kan siam dûn tih an hriat a ngai a, Kristian inkaihhruai dân anga hmahruai dân ka zir a ngai a ni,” tiin a sawi belh.

5. Engtin nge pa pakhat chuan a awm bonain a nghawng chu a siam ṭhat a, chu chuan eng nge a rah chhuah?

⁵ Eduardo-a chuan a chhûngkuaa an inlaichînna siam ṭha tûr leh an thlarau lam tichak tûrin a tih theih apiang tih a tum tlat a. “Ka thiltum ber chu ṭawngkam leh entawn tûr siam—Jehova ka hmangaih tia sawi mai ni lovin, lantîrna—hmanga ka fatea thutak tuh hi a ni.” (1 Joh. 3:18) Rinna târ lang tûra a thiltih chu Jehova’n mal a sâwm em? Anna-i chuan heti hian a chhâng a ni: “Pa ṭha tak nih a tumna leh min hnaih leh tuma a thawhrimna zawng zawng hmuhna chuan thil a tidang lam hle a ni. Kohhrana a inhmang chho kan hmuh chuan, kan chhuang hle a. Khawvêl chuan Jehova laka min lâk hran a tum a. Mahse, kan nu leh pate’n thutak an ngaihsak tlat tih kan hmuh avângin chutianga tih ve chu kan tum a ni. Ka pa chuan min kalsan tawh loh tûr thu a tiam a, min kalsan lo ta rêng a ni. Amah awm lo ta se chuan, tûnah hian thutakah ka awm lo mai thei a ni,” tiin.

6. Indona a thlen laiin nu leh pa ṭhenkhat chuan eng nge an zir chhuah?

⁶ Balkans hmuna indona a awm chhûng khân, chuta awm Jehova Thuhretute fate chu dinhmun harsa takah awm mah se, an hlim hle tih thiltawn ṭhenkhat chuan a târ lang. Engvângin nge? Hna thawk tûra kal chhuak thei lo nu leh pate chuan ina awmin an fate an zirpui a, an infiampui a, an titipui bawk a ni. Zir tûr eng nge awm? Sum leh pai emaw, thilpêkte emaw ai pawhin fate chuan an nu leh pate’n an awmpui chu an mamawh zâwk a ni. Ni e, Bible sawi angin fate chuan an nu leh pate ngaihsakna leh kaihhruaina an dawn chuan an hlâwkpui dâwn a ni.—Thuf. 22:6.

7, 8. (a) An chhûngte hnêna kîr leh nu leh pa ṭhenkhat chuan eng nge an tihsual palh ṭhin? (b) Engtin nge nu leh pate chuan an fate chu rilru put hmang ṭha lo hneh tûra an ṭanpui theih?

⁷ Nu leh pa ṭhenkhat, an chhûngte hnêna an kîr leh hnua an fate hnên aṭanga huatna emaw, ngaisak lohna emaw tâwkte chuan, “In tâna ka inpêkna zawng zawngah hian lâwm nachâng hre lo takin engtin nge in awm theih?” tiin lungchhiatthlâk takin an chhâng lêt a. Mahse, an fate’n rilru put hmang ṭha lo an neih chu an nu leh pate awm loh vâng a ni deuh ber a ni. Nu leh pate chuan chu buaina chu engtin nge an chhinfel theih?

⁸ I chhûngte chunga hriat thiamna nasa lehzual lantîr tûrin Jehova hnênah ṭanpuina dîl rawh. Tichuan, i chhûngte i sawipui hunah buaina awm chhanah chuan i tel tih pawm ang che. Tih tak zeta ngaihdam dîlna chu a ṭangkai thei a ni. I kawppui leh i fate chuan thil nih dân siam ṭha tûrin ṭan i la reng tih an hmuh chuan, i tih tak zetzia chu an hria ang a. Tum tlatna leh dawhtheihna nên i chhûngte hmangaihna leh zahna chu zawi zawiin i nei lêt leh thei a ni.

9. Engvângin nge ‘mahni chênpui chhûngte ngaihsak’ tûra sum leh pai chu kan zawn belh reng a ngaih loh?

⁹ Tirhkoh Paula chuan Kristian tarte’n mahni an inchâwm theih loh chuan, an fate leh an tute chuan an pi leh pute leh “anmahni hringtute chungah ṭhat ve thung zir zet rawh se,” tiin kaihhruaina a pe a ni. Mahse, Paula chuan Kristian zawng zawngte chu an nî tin mamawh—ei leh in, silhfên, leh awmna tûrte—neia lungawi tûrin a fuih zui a. Dinhmun changkâng zâwk emaw, hma lam hun atâna sum leh pai khâwl emaw chu kan tum reng tûr a ni lo. (1 Timothea 5:4, 8; 6:6-10 chhiar rawh.) ‘Mahni chênpuite ngaihsak’ tûrin Kristian chuan borâl mai tûr he khawvêlah hian sum leh pai lama hausakna a zawn kher a ngai lo. (1 Joh. 2:15-17) “Hausakna bumna” emaw, ‘dam chhûng khawsak ngaihtuahna’ emaw avângin kan chhûngkuaa Pathian khawvêl thara ‘nunna tak tak kan vawnna’ chu dinhmun hlauhawmah kan dah tûr a ni lo!—Mk. 4:19; Lk. 21:34-36; 1 Tim. 6:19.

10. Leiba inkhâwlkhâwm chungchângah engtin nge Pathian aṭanga chhuak finna kan târ lan theih?

¹⁰ Jehova chuan sum ṭhenkhat kan mamawh tih a hria a. Pathian aṭanga chhuak finna chuan min vênhimin, min chhawmdâwl thei a; sum leh pai erawh chuan a thei ve lo. (Thur. 7:12; Lk. 12:15) Mite chuan ram danga kala hnathawh avânga chânna awmte chu an chhût vak ṭhîn lo va, ram dangah chuan sum an hlawh chhuak ngei dâwn tihna lah a ni hek lo. A nihna takah chuan, dinhmun hlauhawm tak tak a awm zâwk a ni. Ram danga kal mi tam tak chu leiba tam zâwk neiin an lo kîr leh hial a. Zalên zâwka Pathian rawngbâwl a hnêkin, an leibatnate rawng chu an bâwl zâwk a. (Thufingte 22:7 chhiar rawh.) Kawng finthlâk ber chu a tîr aṭanga leiba neih pumpelh a ni.

11. Engtin nge chhûngkaw sum hman zât tûr ruahmanna chuan sum leh pai lama nêksâwrna a tihtlêm?

¹¹ Eduardo chuan a chhûngte bula awm tûra thutlûkna a siam tihlawhtling tûrin sum leh pai chu fîmkhur taka a hman a ngai a. A nupui nên chuan an thil mamawh tak takte lei nâna sum hman tûr zât an ruahman a. Chu an ruahman zât chu an chhûngkuaa an lo hman ṭhin lakah chuan a tlêm hle a ni. Mahse, an chhûngkuain ṭan an la a, thil ṭûl lovah sum an khawhral lo. * Eduardo-a chuan: “Entîr nân, ka fate chu private school aṭanga la chhuakin, public school ṭha ka hmuhsak a ni,” tiin a sawi. Amah leh a chhûngte chu an thlarau lam hun duan tibuai lo hna a hmuh nân an ṭawngṭai a. Engtin nge Jehova’n an ṭawngṭaina chu a chhân?

12, 13. Pa ber chuan a chhûngkaw enkawl tûrin hma lâkna ṭangkai tak eng nge a neih a, samkhai taka a chhûngkua enkawl a tumna chu engtin nge Jehova’n mal a sâwm?

¹² “Atîr lam kum hnih chu kan harsa hle a. Kan sum neihte chu a tlêm tial tial a, ka hlawh chuan kan sênso a phuhrûk loh châng a awm a, ka thawkrim hle. Mahse, kan inkhâwm kim vek theiin, thu hrilh rawngbâwlnaah kan tel thei a ni,” tiin Eduardo-a chuan a sawi. Ani chuan a chhûngte hlata a thla têl emaw, a kum têl emaw awmtîrtu hnate chu ngaihtuah pawh ngaihtuah lo tûrin a rilru a siam tlat a. “Chu ai chuan, hna pakhat a awm loh pawha a dang thawk thei tûrin hna chi hrang hrang thawh chu ka zir a ni,” tiin a sawi.

¹³ Eduardo-a chuan a leiba zawi zawia a rulh a ṭûl avângin, a sum pûkah a pung tam lehzual a pêk a ngai a. Mahse, chu chu Jehova’n nu leh pate ti tûra a duh anga a chhûngkaw bula awm theih nâna a pêk ngai thil tê tham takah a ngai a ni. “Tûnah chuan ram danga ka awm laia ka hlawh zaa 10 aia tlêm chauh ka hlawh a; mahse, rilṭâmin kan awm lo a ni. ‘Jehova kut chu tihtawiin a awm lo.’ Pioneer thawh kan tum ta hial a. Chhinchhiahtlâk takin, kan sum dinhmun chu a rawn ziaawmin, kan nî tin mamawh pawh neih a awlsam sawt tawh a ni,” tiin a sawi.—Is. 59:1.

14, 15. Engtin nge chhûngkuate chuan tisa lam thil ûm tûra nêksâwrna an hmachhawn a, entawn tûr ṭha an siamna chuan eng nge a thlen theih?

¹⁴ Hmun tam takah, mite chuan an chhûngte leh ṭhiante chu sum leh thilpêkte an pêk ngai niin an hria a. Eduardo-a chuan: “Hei hi kan chîn ṭhan dân a niin, pêk chu nuam kan ti bawk a ni,” tiin a sawi. Mahse, “Chu chuan chin tâwk a nei a, ka chhûngkhatte hnênah chuan ka chhûngte thlarau lam mamawh leh hun duan ngaihthah si lovin, ka theih ang tâwk ka pêk tûr thu chu ṭha takin ka hrilhfiah a ni,” tiin a sawi belh.

¹⁵ Ram danga an kal hnua kîr lehte leh ram danga an chhûngte kalsan loh thlangte chuan an châwm beiseitu an chhûngkhatte thinurna, hmuhsitna, leh an laka lunghnualna chu an tawng fo ṭhîn a. Ṭhenkhat chuan hmangaihna nei lo angin an sawi hial a ni. (Thuf. 19:6, 7) Eduardo-a fanu, Anna-i chuan “Hausak nâna thlarau lam thil chân kan duh loh hunah, kan chhûngte zînga ṭhenkhat chuan kan Kristian nun pawimawhzia an hriat thiam hun a awm thei a ni. An duh angin kan awm chuan, engtin nge chu chu an hriat thiam tehlul ang?” tiin a sawi.—1 Petera 3:1, 2 nên khaikhin rawh.

16. (a) Engtin nge mi chu “mahni inbum” a nih theih? (Jak. 1:22) (b) Eng ang thutlûkna nge Jehova’n mal a sâwm?

¹⁶ A pasal leh a fate tel lova ram hausa zâwka kal unaunu pakhat chuan kohhran upate hnênah: “Heta ka lo kal theih nân hian nasa taka kan inpêk a ngai a. Ka pasal chuan upa anga a rawngbâwlna a chawlhsan a ngai hial a ni. Chuvângin, Jehova chuan heta ka rawn kalna hi mal a sâwm ngei ka beisei,” tiin a hrilh a. Jehova chuan amah ring chunga siam thutlûknate chu mal a sâwm ziah ṭhîn a; mahse, a duhzâwng nêna inkalh thutlûkna, a bîk takin ṭûl lo taka chanvo thianghlim kalsana siam chu engtin nge mal a sâwm theih ang?—Hebrai 11:6; 1 Johana 5:13-15 chhiar rawh.

17. Engvângin nge thutlûkna kan siam hmain Jehova kaihhruaina kan zawn ang a, chu chu engtin nge kan tih theih?

¹⁷ Thutlûkna leh intiamna i neih hnuah ni lovin, i neih hma ngeiin Jehova kaihhruaina zawng la. A thlarau thianghlim, a finna, leh a kaihhruaina dîlin ṭawngṭai ang che. (2 Tim. 1:7)  Heti hian inzâwt rawh: ‘Eng dinhmun hnuaiah nge Jehova thuâwih ka inhuam? Tihduhdahna hnuaiah pawh a ni em?’ A nih chuan, in khawsak dân tihhniam deuh a ngaih huna a thuâwih chu i inhuam tho ang em? (Lk. 14:33) Upate hnênah Bible ṭanchhan thurâwn la la, nangmah ṭanpui tûr chea Jehova thutiam i rinna leh i rinchhanna chu a kaihhruaina zawmna hmangin târ lang rawh. Upate chuan i tân thutlûkna an siam thei lo va, mahse khua reia hlimna thlentu tûr duhthlanna siam tûrin an ṭanpui thei che a ni.—2 Kor. 1:24.

18. Chhûngkaw châwm tûrin tuin nge mawhphurhna nei a; eng dinhmunte’n nge mi dangte ṭanpui theihna hun remchâng min pe thei?

¹⁸ Jehova chuan chhûngkaw lûte chu an chhûngkua enkawl tûrin an “phur” chu nî tin phur tûrin a beisei a. An kawppui emaw, fate emaw kalsan tûra nêksâwrna leh thlêmna tâwk chung pawha chutianga ti lova an mawhphurhna hlentute chu kan fakin, kan ṭawngṭaisak tûr a ni. Chhiat rupna emaw, damdawi lama rang taka inenkawl a ngaihna emaw ang chi beisei loh tak thil thlengte chuan Kristian dik hmangaihna leh lainatna inlantîr tawn theihna hun remchâng min pe a. (Gal. 6:2, 5; 1 Pet. 3:8) Rîkrum thil atân sum i pe emaw, Kristian unau chu tualchhûnga hna hmu tûrin i ṭanpui emaw thei em? Chutianga i tih theih chuan, a chhûngte kalsana hmun danga hna zawng tûra nêksâwrna a tawh chu i tihziaawmsak thei dâwn a ni.—Thuf. 3:27, 28; 1 Joh. 3:17.

19, 20. Engvângin nge Kristiante chuan Jehova’n a ṭanpui dâwn tih an hriat avânga an lungawi theih?

¹⁹ Bible chuan: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah [Pathian] ngeiin, ‘Engtikah mah ka thlahthlam tawp lo vang chia, kal pawh ka kalsan tawp lo vang che,’ a ti si a. Chutichuan huai takin, ‘Lalpa chu mi ṭanpuitu a ni, ka hlau lo vang; mihringin engnge mi tih theih ang?’ kan ti ṭhîn a ni,” tiin min tiam a ni. (Heb. 13:5, 6) Chu chu engtin nge kan nunah kan hman?

²⁰ Ram retheia awm, hun rei tak aṭanga kohhran upa lo ni tawh pakhat chuan: “Mite chuan Jehova Thuhretute hlim dân chu an sawi châwk a. Anni chuan Thuhretu retheite pawh ṭha taka inthuamin, mi dangte aia zia zâwk angin an lang ṭhîn tih an hre bawk a ni,” tiin a sawi. Chu chu Lalram dah hmasatute hnêna Isua thutiam nên a inmil chiah a ni. (Mt. 6:28-30, 33) Ni e, i Pa vâna mi, Jehova chuan a hmangaih che a, nangmah leh i fate tân thil ṭha ber chauh a duh a. “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni.” (2 Chro. 16:9) Ani chuan chhûngkaw nun leh tisa lam thilte nêna inkûngkaihte pawh tiamin, kan ṭhatna tûrin thupêkte min pe a. Chûngte chu kan zawm chuan, amah kan hmangaihin, kan rinchhan tih kan târ lang a ni. “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo.”—1 Joh. 5:3.

21, 22. Engvângin nge Jehova i rinchhan tih târ lan i tum tlat?

²¹ Eduardo-a chuan: “Ka nupui leh fate ka kal bosan hun lai kha ka nei lêt leh ngai tawh dâwn lo tih ka hria a, mahse, chu ringawt chu ka ngaihtuah reng lo. Ka ṭhian hlui tam takte chu an hausa a; mahse, an hlim chuang lo. An chhûngte chuan buaina lian tham tak tak an nei a. Kan chhûngkua erawh chu kan hlim hle! He rama awm unau dangte chu rethei hle mah se, an nunah thlarau lam thil an dah hmasak dân hmuhna chuan ka rilru a khawih hle a. Isua thutiam dikzia chu kan tawng ṭheuh a ni,” tiin a sawi.—Matthaia 6:33 chhiar rawh.

²² Huai takin awm rawh! Jehova thu âwih a, amah rin chu thlang tlat rawh. Pathian, i kawppui, leh i fate i hmangaihna chuan i chhûngkaw tâna thlarau lam mawhphurhna hlen tûrin chêttîr che rawh se. Chuti chuan ‘Jehova chu nangmah ṭanpuitu che a ni!’ tih i hre dâwn a ni. (w14-E 04/15)