1, 2. Ned sẽn tɩ tʋmd tẽn-zẽng sã n lebg n kuli, zu-loe-bʋs la a tõe n sege? (Ges-y fotã sẽn be yĩngrã.)

A EDUARDO sẽn wa n bas a zakã rãmb n tɩ be tẽn-zẽngã, a ra tara tʋʋm-sõngo, n paamd ligd wʋsgo. * La a sẽn wa n sɩng Biiblã zãmsgã, a bãngame tɩ pa ligdã bal n yaa tɩlae ne a zakã rãmb ye. A segd n sõng-b-la Wẽnnaam tũudmã pʋgẽ me. Woto kɩtame t’a lebg n kuli.—Ef. 6:4.

² A Eduardo ra miime tɩ yẽ sẽn lebg n kulã nooma a Zeova. La ra pa na n yɩ nana ye. A ra segd n modgame tɩ yẽ ne a pagã la a kambã le vɩ ne taab ne sũ-noogo, la a bao tʋʋm n tõog n ges b yelle. Wãn to la a ra na n maan dẽ? Tigingã neb ra na n sõng-a lame bɩ?

3. Kamb roagd sã n pa be ne-ba, wãn to la namsd kamba?

³ A Eduardo yeela woto: “Mam bãngame tɩ m basa m kom-pugli wã wakat ning b sẽn da rat m saglse, la m sẽn da segd n wilg tɩ m nong-b lame n yɩɩda. Mam da pa be yambẽ n na n karem Biiblã kibay tɩ b kelge, n naag-b n pʋʋse, n mobg-b la m deem ne-b ye.” (Tõo. 6:7) A bi-pugl-kãseng a  Anna yeelame: “M baaba sẽn da pa be yirã kɩtame tɩ m yam da pa gãe bãan ye.” A paasame t’a sẽn wa n lebg n wa wã, bãmb nifẽ, a ra yaa sãana. A sã n da mobg yẽ, pa sakd ye.

4. Bõe yĩng tɩ rao sẽn pa vɩ ne a zak rãmb pa tõe n ges b yell sõma?

⁴ Yaa toog ne rao sẽn pa vɩ ne a zak rãmb t’a ges b yell sõma. A Eduardo pag a Ruby yeelame tɩ yẽ n da segd n yɩ ma wã ne ba wã, la tɩ yaa yẽ n wae n yãkd yam bũmb fãa pʋgẽ zakã rãmb yĩnga. A paasame: “A Eduardo sẽn wa n lebg n wa wã, ra yaa toog ne-m tɩ m sak-a wa Biiblã sẽn yetã. Baa masã menga, m mi n yĩmame tɩ m sɩdã bee yambẽ.” (Ef. 5:22, 23) A Eduardo yeelame: “Tõnd kom-pugli wã sã n da rat n maan bũmbu, b kẽngda b ma nengẽ n tɩ kos sore. Tõnd a roagdbã bãngame tɩ bũmb sẽn na n sõng d kambã yaa d sẽn na n naagd taab n yãkd yam. Mam bãngame me tɩ m segd n lʋɩɩ taoor zakã yell gesg wɛɛngẽ wa Biiblã sẽn wilgã.”

5. A Eduardo sẽn lebg n wa wã, bõe la a maan n na n sõng a zakã rãmba, la rẽ woma bi-bʋse?

⁵ A Eduardo maana a sẽn tõe fãa sẽn na yɩl tɩ yẽ ne a zakã rãmb le vɩɩmd ne taab ne sũ-noogo, la a sõng-b tɩ b tũ a Zeova. A yeelame: “Mam sẽn da rat yaa m zãms m kambã Biiblã ne m no-goama, la ne m manesem. M pa rat n yetẽ bal tɩ m nong a Zeova ye. M dat n wilgda rẽ ne m tʋʋmã.” (1 Zã 3:18) A Zeova ninga a Eduardo modgrã bark bɩ? A Anna yeelame tɩ bãmb sẽn da ne b baaba sẽn maand a sẽn tõe fãa n get b yellã, n paas a sẽn modgd sẽn na yɩl tɩ bãmb le nong-a wã, sõng-b-la wʋsgo. A paasame: “Tõnd sẽn ne a sẽn tʋmd sõma tigingã pʋgẽ wã, d sũur noomame. Dũniyã ratame tɩ d zãag ne a Zeova. La d sẽn ne d roagdbã sẽn tũud a Zeova ne b sũy fãa wã, kɩtame tɩ tõnd me maand woto. M baaba pʋlmame t’a pa na n le bas-d ye. A sɩd pa bas-d ye. A sã n da maan woto, tõe tɩ rũndã-rũndã, m pa le be a Zeova siglgã pʋgẽ ye.”

6. Zabr a ye sasa, bõe n maane, la rẽ wilgda roagdbã bõe?

⁶ Kibay kẽer wilgame tɩ zabrã sẽn wa n be Balkã wã, baa sẽn da pa nana wã, a Zeova Kaset rãmb nins sẽn be be wã kambã sũy ra noomame. Bõe yĩnga? Roagdbã sẽn pa le tõe n kẽng tʋʋma, b ra bee ne b kambã yiri, n deemd ne-ba, n sõsd ne-b la b zãmsd Biiblã ne-ba. Woto wilgda tõnd bõe? Wilgdame tɩ kambã nonga b roagdbã sẽn na n be ne-b n yɩɩd b sẽn na n kõt-b ligd wall bũmb a taaba. Sɩd me, Wẽnnaam Gomdã wilgame tɩ roagdbã sã n wae n be ne b kambã la b zãmsd-ba, nafd-b-la wʋsgo.—Yel. 22:6.

7, 8. a) Bõe n tõe n sãam roagdb kẽer sẽn lebg n wa sũuri? b) Bõe la roagd tõe n maan tɩ yẽ ne a kambã le noom ne taaba?

⁷ Zu-bʋko, roagdb sẽn lebg n wa tõe n mikame tɩ b kambã sũur pa noom ne-ba, wall b maandame tɩ yaa wa b toor kae ne b sẽn lebg n wa wã ye. Rẽ n so tɩ roagd ning tõe n yeel a meng woto: ‘Mam maana bũmb wʋsg m kambã yĩnga. La bõe yĩng masã tɩ b manesmã yaa woto?’ La tõe tɩ yaa roagdã sẽn da pa be yambẽ wã n kɩt tɩ kambã manesmã yaa woto. Bõe la roagdã tõe n maane?

⁸ Kos-y-yã a Zeova t’a sõng-y tɩ y yɩ wʋmda, n wilg y zakã rãmb tɩ b yell pak-y lame. Y sã n wa sõsd ne y zakã rãmba, wilg-y tɩ y sak n deegame tɩ y tara taal yellã pʋgẽ. Y sã n pelg y pʋg n kos y zakã rãmb sugri, tõe n sõngame. Yãmb pagã ne y kambã sã n neẽ y sẽn modgd woto wã, b na n bãngame tɩ y sɩd rata b neere. Y sã n tall sũ-mar n pa koms raoodo, bilf-bilfu, y na n le wa  paamame tɩ y zakã rãmb nong-y la b waoogd-y-yã.

9. Bõe yĩng tɩ ges f zak rãmb yellã pa baood tɩ f paam ligd wʋsgo?

⁹ Tʋm-tʋmd a Poll wilgame tɩ kiris-ned sẽn kʋʋl sã n pa tõe n ges a meng yelle, a kambã ne a yagensã segd n sõng-a lame. La a sagla kiris-nebã fãa tɩ b bao bũmb nins sẽn yaa tɩlaeyã bala. Wala makre, rɩɩbo, fut la ro-gãaga. D pa segd n maand d sẽn tõe fãa sẽn na yɩl n paam naar vɩɩm, wall ligd wʋsg n bĩng ye. (Karm-y 1 Tɩmote 5:4, 8; 6:6-10.) Pa tɩlae tɩ kiris-ned bao arzɛgs wʋsg dũni-kãngã sẽn na n loogã pʋgẽ, n yaool n tõog n ges a zak rãmb yell ye. (1 Zã 2:15-17) D pa segd n tags tɩ ligd tõe n welga d zu-loeesã fãa, wall d bas tɩ “vɩ-kãngã yɛlã” kɩt tɩ d zakã rãmb wa kong ‘vɩɩm sẽn yaa sɩdã’ Wẽnnaam dũni-paalgã pʋgẽ ye.—Mark 4:19; Luk 21:34-36; 1 Tɩm. 6:19.

10. Bõe yĩng tɩ yaa sõma tɩ d ra kẽ sama?

¹⁰ A Zeova miime tɩ tõnd rata ligdi. La ligd pa tõe n naf tõnd la a kogl-d wa yam ning a Zeova sẽn kõtã ye. (Koɛ. 7:12; Luk 12:15) Naoor wʋsgo, neb nins sẽn dat n kẽng tẽn-zẽms n tɩ bao ligdã pa mi zu-loees nins rẽ sẽn tõe n wa ne wã fãa ye. Sẽn paase, baa fʋɩ pa wilgd tɩ b na n tɩ paama ligd ye. Wʋsg sẽn wat n lebg n wa tɩ b samã yɩɩda b sẽn wa n loogdẽ wã. Lebgda tɩlae tɩ b tʋm wʋsg sẽn na yɩl n yao b samã, n pa le tõe n paam sẽk n tʋm a Zeova tʋʋmdã sõma ye. (Karm-y Yelbũn 22:7.) Sẽn yaa sõma n yɩɩd yaa d sẽn na n modg n da kẽ sam ye.

11. Bõe n tõe n sõng zak rãmb tɩ b kẽgs ligdi?

¹¹ A Eduardo miime tɩ yẽ sẽn lebg n wa wã, a sã n dat n ges a zakã yell sõma, a segd n zãmsa ligd kẽgsgo. Yẽ ne a pagã gʋlsa bũmb nins sẽn yaa tɩlae ne-bã, n get rẽ n bãngd ligd ning b sẽn na n yiisã. Yaa vẽeneg tɩ b pa tõe n da bũmb wʋsg wa pĩndã ye. La zakã ned kam fãa sakame n pa na n da bũmb sẽn pa tɩlae ye. * A Eduardo yiisa a kambã lekoll ning pʋgẽ b sẽn da be tɩ yaoobã yaa toogã, n tɩ kẽes lekoll sẽn karemd sõma, tɩ yaoobã yaool n pa wʋsg ye. Yẽ ne a zakã rãmb pʋʋsa Wẽnnaam n kos t’a sõng-a t’a paam tʋʋmd sẽn pa na n kɩt tɩ b bas bũmb kẽer b sẽn da maand a tũudmã pʋgẽ ye. Wãn to la a Zeova leok b pʋʋsgã?

12, 13. Bõe la a Eduardo maan sẽn na yɩl n ges a zakã rãmb yelle, la wãn to la a Zeova ning-a barka?

¹² Pipi yʋʋm a yiibã, a Eduardo ra tʋmda wʋsgo, la a pa paamd ligd tɩ sek a na ra bũmb nins sẽn yaa tɩlae ne a zakã rãmbã ye. Ra yaa tɩlae tɩ b rɩ ligd ning a sẽn zã n wa wã. Baasgo, b ra tõogd n kẽnda tigissã fãa la b naagd taab n moond koɛɛgã. A yãka yam t’a pa na n tol n sak tʋʋmd sẽn na n kɩt t’a loog n bas a zakã rãmb ye. La a zãmsa tʋʋm buud toor-toore, sẽn na yɩl n tõogd n paamd tʋʋm wakat fãa.

¹³ A Eduardo ra tara sama. La a yãka yam n na n yaood bilf-bilfu. Rẽ kɩtame t’a segd n yao n dogl yõod wʋsgo. La a sẽn dat n pa ne a zakã rãmb n sõng-b wa a Zeova sẽn datã yĩnga, a saka rẽ ne yamleoogo. A Eduardo yeelame tɩ ligd ning yẽ sẽn da paamd pĩndã yɩɩda yẽ sẽn paamd masã wã naoor piiga. A paasame: “La d pa gõe kom ye. A Zeova nugã ka koɛɛg ye. D pʋd n yãka yam n lebg so-pakdba.” Rẽ poore, b tẽngã yidga bilfu, tɩ lebg nana ne-a t’a paam bũmb nins sẽn yaa tɩlae ne a zakã rãmbã.—Ezai 59:1.

14, 15. Yãmb roagdbã sã n dat tɩ y lʋɩɩs ligdã baoob taoore, bõe la y tõe n maane? Y sã n lʋɩɩs a Zeova raabã taoore, wãn to la tõe n sõng-ba?

¹⁴ Tẽns kẽer pʋsẽ, nebã getame tɩ yaa tɩlae tɩ b kõ b roagdbã ne b zo-rãmbã ligd la bũmb a taaba. A Eduardo yeelame: “Kũun yaa tõnd tẽngã neb minungu. D nong n kõta taab kũuni. La m miime tɩ m pa segd n kõ yaar ye.” A maaga a yĩng n wilg a roagdbã t’a na n sõng-b-la wa a sẽn tõe tɛka, la tɩ sẽn pak-a n yɩɩd yaa bũmb nins sẽn yaa tɩlae ne a zakã rãmbã, la a Zeova tũudmã.

¹⁵ Ned sẽn paam sor n tõe n kẽng tẽn-zẽng sã n zãgse, a sẽn pa rat n bas a zakã rãmb yĩnga, tõe n sãama a roagdb kẽer sũyã. Ned sẽn da be tẽn-zẽng sã n lebg n wa me, tõe n yɩɩ woto. B pʋd n tõe n yeelame tɩ ned a woto pa nong a roagdbã ye. Bõe yĩnga? Bala b sẽn dat yaa a sẽn na n tar ligd n sõngd-ba. (Yel. 19:6, 7) La a Eduardo bi-pugl a Anna yeelame: “Tõnd sã n pa bas a Zeova raabã n bao ligdi, tõe n kɩtame tɩ d roagdb kẽer bãng t’a Zeova tũudmã tara yõod wʋsgo. La d sã n maand b sẽn datã, b na n yɩɩ wãn n bãng rẽ?”—Ges-y 1 Pɩɛɛr 3:1, 2.

16. a) Wãn to la ned tõe n ‘belg a meng ne tagsg sẽn ka sɩda’? (Zak 1:22) b) Yam-yãkr bʋg buud la a Zeova ningd barka?

¹⁶ Saam-bi-poak n bas a sɩd la a kamb n kẽng tẽn-zẽng n na n tɩ bao ligdi. A sẽn ta be, a yeela kãsem-dãmbã tɩ sẽn na yɩl tɩ yẽ tog sorã, bãmb monga b mens bũmb wʋsgo. A paasame: “Yɩɩ tɩlae tɩ m sɩdã bas a kãsem-sobendã menga. Rẽ n so tɩ m saagd ne m sũur fãa t’a Zeova na n ning-m-la barka.” D sã n tar tẽebo, n yãk yam tɩ zems a Zeova raabã, d tõe n kɩsa sɩd t’a na n ning-d-la barka. La ned sã n yãk yam tɩ pa zems ne a raabã, a pa ningd bark ye. Sẽn paase, d sã n bas tʋʋmd a sẽn kõ-d bʋʋm-faad yĩnga, pa noom-a ye.—Karm-y Hebre dãmb 11:6; 1 Zã 5:13-15.

17. Y sã n wa rat n yãk yam n maan bũmbu, bõe yĩng tɩ y segd n deng n bao a Zeova sor-wilgri, la wãn to la y tõe n maan dẽ?

¹⁷ Y sã n wa rat n yãk yam n maan bũmb bɩ y reng n bao a Zeova sor-wilgri, n da wa maand y bãngẽ ye. Pʋʋs-y-yã-a n kos a vʋʋsem sõngã, yam la sõngre.  (2 Tɩm. 1:7) Sok-y y meng woto: ‘Mam na n sak n tũ a Zeova baa b sã n wa namsd maam m tẽebã yĩng bɩ?’ Yaa vẽeneg tɩ y na n leokame tɩ n-ye. La sã n yaa woto, y pa na n sak a Zeova n kell n pa ne y zakã rãmba, baa rẽ sã n na n kɩt tɩ y pa paam naar vɩɩm sɩda? (Luk 14:33) Kos-y kãsem-dãmbã sõngre, la y tũ sagls nins b sẽn na n tik Biiblã zug n kõ-yã. Y sã n maan woto, y wilgdame tɩ y kɩsa sɩd t’a Zeova na n sõng-y-la wa a sẽn pʋlmã. Kãsem-dãmbã pa na n togs yãmb y sẽn segd n maaneg ye. La b na n sõng-y lame tɩ y bãng n yãk yam sẽn na n naf-yã.—2 Kor. 1:24.

18. Ãnda n segd n ges zakã rãmb yelle, la bõe la d tõe n maan n sõnge?

¹⁸ A Zeova wilgame tɩ yaa zak sobend-dãmbã n segd n ges b zagsã rãmb yell daar fãa. (Gal. 6:5) D saam-biis wʋsg kell n paa ne b zagsã rãmb n get b yelle, baa sẽn pa nana ne-bã, wall neb a taab sẽn dat tɩ b loogã. D pẽgd-b lame, la d pʋʋsda a Zeova b yĩnga. D sẽn pʋʋsd b yĩngã toor sẽn ka be, sabab-wẽng sã n wa paam d tẽed-n-ta-kãense, wall b lʋɩɩ bãaga, d tõe n sõng-b lame. (Gal. 6:2; 1 Pɩɛ. 3:8) Y tõe n sõnga nin-kãensã buudã tɩ b paam tʋʋmd bɩ? Y tõe n kõ-b-la bũmb b sẽn dat zĩig pʋgẽ, wala ligd bɩ rɩɩb bɩ? Y sã n sõng-ba, tõe tɩ b pa na n bas b zakã rãmb n tɩ bao ligd ye.—Yel. 3:27, 28; 1 Zã 3:17.

19, 20. Bõe yĩng tɩ kiris-nebã tõe n kɩs sɩd t’a Zeova na n sõng-b lame?

¹⁹ Biiblã yeela woto: “Bɩ yãmb da yɩ ligd-noangdb ye, la bɩ y kɩt tɩ bũmb nins yãmb sẽn tarã sek yãmba. Tɩ bõe, Wẽnnaam mengã yeelame yaa: ‘Mam kõn bas yãmba, wall m mong yãmb abada ye.’ Dẽ, tõnd tõe n yeela ne daood yaa: ‘Zu-soabã yaa mam sõangda, mam kõn zoe rabeem ye. Ned tõe n maana maam bõe?’” (Heb. 13:5, 6) Wãn to la d tõe n tũ sagl-kãngã?

²⁰ Tẽng a ye neb wʋsg sẽn yaa naong rãmb pʋgẽ, kãsem-soab n yeel woto: “Nebã wae n yetame t’a Zeova Kaset rãmbã tara sũ-noogo. B neeme me tɩ baa a Zeova Kaset rãmb nins sẽn yaa naong rãmbã manegda b mens sõma, tɩ yaa wa b tara ligd n yɩɩd neb a taabã.” Woto wilgdame t’a Zezi sẽn pʋlem neb nins sẽn lʋɩɩsd Rĩungã taoorã bũmb ningã yaa sɩda. (Mat. 6:28-30, 33) Vẽenega, y saasẽ Ba a Zeova nonga yãmba, n dat yãmb ne y kambã neere. Biiblã yeelame: “Zu-soabã nif geta dũniyã zĩigã fãa n dat n sõng neb nins sẽn dat Wẽnnaam ne b sũyã fãa wã.” (2 Kib. 16:9) Yaa rẽ yĩng la a sẽn kõ-d noy d mens nafr yĩngã. Wala makre, a kõo noy zakã vɩɩm la bũmb nins sẽn yaa tɩlaeyã baoob wɛɛngẽ. D sã n tũud no-kãense, d wilgda a Zeova tɩ d kɩs-a-la sɩda, la tɩ d nong-a lame. Bala, “Wẽnnaam nonglem yaa tɩ tõnd sak bãmb tõogo. La bãmb tõog ka toog ye.”—1 Zã 5:3.

21, 22. Bõe yĩng tɩ y teeg a Zeova?

²¹ A Eduardo yeelame tɩ yẽ miime tɩ yʋʋm nins yẽ sẽn da pa be ne a pagã la a kambã sasa, a konga bũmb wʋsgo. La a pa basd tɩ rẽ sãam a sũur tɩ loog noor ye. A paasa woto: “Neb nins mam sẽn da tʋmd ne wã wʋsg lebga arzɛgs rãmbã, la b pa tar sũ-noog ye. B zagsã pida ne zu-loeese. La tõnd zakã rãmb tara sũ-noog wʋsgo! Sẽn paase, mam sã n get tẽn-kãngã saam-biis a taab sẽn lʋɩɩsd Wẽnnaam raabã taoor baa b sẽn yaa naong rãmbã, noom-m lame. D fãa neeme t’a Zezi sẽn pʋlem bũmb ningã yaa sɩda.”—Karm-y Matɩe 6:33.

²² Tall-y raoodo! Sak-y-yã a Zeova la y kɩs-a sɩda. Y sã n nong a Zeova, y pagã la y kambã, na n sõng-y lame tɩ y zã y zakã sõma wa Biiblã sẽn wilgã. Woto, y na n bãngame t’a Zeova yaa yãmb sõangda.